رواية موضوع عائلي 2 (الجميله والشعر الأبيض) الفصل العاشر 10 بقلم رحاب القاضي
رواية موضوع عائلي 2 (الجميله والشعر الأبيض) الفصل العاشر 10 بقلم رحاب القاضي
رواية موضوع عائلي 2 (الجميله والشعر الأبيض) البارت العاشر
رواية موضوع عائلي 2 (الجميله والشعر الأبيض) الجزء العاشر
رواية موضوع عائلي 2 (الجميله والشعر الأبيض) الحلقة العاشرة
كل شئ مباح في الحب نعم نعلم ذلك..
ولكن اياكم والاقتراب من القلوب المُتألمه
فهي تحمل ما يكفيها… فرفقاً بها 💔
_ رجعت شهد بعد ما وصلت ولادها المدرسه وكان صبري اخوها قااعد مدايق جداً وهي قالتله بقلق..
شهد
وبعدين بقي يا صبري انا فهمتك الموضوع انا روحت عشان يزن..
صبري بضيق
الناس هتفهم كده يا شهد اكيد لا، فلو سمحتي بلاش تخليني اقلب عليكي يونس ما تحتكيش بيه غير قدامي..
شهد بهدوء
حاضر وحقك عليا انا اسفه..
طبطب صبري علي كتفها وقالها
خلاص حصل خير، قوليلي هتبدأي امتي في كورسات الخياطه اللي هتاخديها دي..
شهد
حيلك حيلك يا صبري خياطة ايه، انا هاخد كورسات تصميم Clothes design ..
صبري بسخريه
الله يرحم ابوكي يا شهد لو كان سمعك كان مات برضو..
ضحكت شهد بهدوء وقالتله
مقبوله منك علي العموم هبدأ الاسبوع الجاي وهاخد 15 يوم وبعدين هروح اقدم في الشركه اللي قالي عليها عدي جوز هاجر..
صبري
ربنا معاكي ويوفقك واللي عايزااه اطلبيه عارفه لو اتكسفتي هديكي علي وشك…
ضحكت شهد وقالتله
ههههه لا بطلت اتكسف واخاف وابقي قبل ما تروح الشغل ابعتلي طعميه سخنه..
قام صبري وقالها
لا انتي ارجعي زي الاول احسن..
_ ضحكو هما الاتنين ودخلت زهره وهي مدايقه وقالت..
زهره
شهد كويس انك رجعتي روحي شوفي مدام فريده بسرعه،وانت سا صبري انا عايزه اروح لاهلي بقي النهارده نروح اسكندريه يعني النهارده..
شهد بقلق
استني بس مالها طنط فريده في ايه؟..
زهره
امبارح بنتها راحت شغل في شرم الشيخ وحصلت عاصفه هناك اللي كان بيتكلم عليها عمرو اديب امبارح وهي وراجعه شكلها كده عملت حادثه فروحي اطمني عليها..
شهد بقلق
يا نهار اسود طيب جميله كويسه، انا كلمتها بالليل وكانت مبسوطه..
صبري
لا حول ولا قوة الا بالله روحي يا شهد اقعدي مع الست دول يا حرام مش معاهم راجل والست دي شايله هم تقيل علي كتافها.
شهد
حاضر هتعبك يا زهره وروحو اسكندريه انتو انا هبقي اقعد عندهم ما تقلقوش انا مش لوحدي هنا..
زهره
ربنا يكرم اصلك يا شهد انا والله لولا امي تعباانه ولوحدها هناك ما كنااش هنروح..
ـــــــ #بقلم_الكاتبه_رحاب_القاضي ــــــ
_ وفي بيت حامد الصاوي..
كانت بطه نايمه في اوضتها القديمه، واول ما فتحت عينيها برقت بصدمه لما لقيت حاجه سودا واقفه قدامها، وقعدت بسرعه وهي بتصوت بخوف..
_ويوسف شال الطرحه من علي راسه وقالها وهو بيضحك…
يوسف
ههههههه شكلك مسخره وانتي خايفه..
ضربته بالمخده وقالت
اكبر لله اتصرف انك كبير يا رخمممم..
يوسف قعد جنبيها وقالها
بس المقلب جامد خوفتي مش كده..
بطه بغيظ
ايوه خوفت وفي الاخر تقول ما بخلفش ليه وانا من لما اتجوزنا للنهارده مش باخد منك غير المقالب..
يوسف
بطلي كدب واخده فلوسي وواخده صحتي وقلبي وحياتي كلها كمان..
_ابتسمت بطه وقامت فتحت شباك اوضتها وهو قام ووقف جنبيها وقالها..
يوسف
شايفها عمود النور اللي هناك ده؟..
بطه
ايوه مش ده اللي كنت كل يوم الصبح كنت بتقف عنده تستني يونس ينزلك..
يوسف بهدوء
لا انا كنت بكون مستنيكي تفتحي الشباك كده واشوفك، كنت بصحي بدري عن معادي واقف ع تحت البيت المهم اني كنت اشوفك وبس قبل اي حاجه تاني في يومي..
بصتله بدموع وقالت
يوسف اسمع كلام امك وريحها وريحني واتجوز وهات العيل اللي انا مش قادره اجيبه وافرحك بيه..
يوسف بحده
بطلي هبل قال اتجوز قال، وانا مش عايز اخلف اصلا يا بطه انا عايزك انتي وبس وسيبك من امي خالص عشان ما ارمكيش من فوق..
بطه سكتت وما ردتش عليه وهو قالها
هطلع اكمل تجهيز الفطار مع امك بره ويلا عشان تفطري وبعدين نرجع بيتنا يا بطوط…
_ ابتسمت بطه غصب عنها علي الاسم اللي ديماً بيقولو ليها ديماً، وهو طلع فعلا يجهز الفطار مع عظيمه وهي غيرت هدومها وطلعت قعدت معاهم…..
ـــــــ #بقلم_الكاتبه_رحاب_القاضي ـــــــ
_ وفي شركة عمار المنشاوي..
كانت فيروز لسه واصله المكتب بتاعها وحطت شنطتها علي الترابيزه بس وقعت ملفات علي الارض فنزلت تجيبهم في الوقت ده دخل عز الدين”ايوه بتاع المقابر” المكتب عندها وصفر بطريقه خبيثه وهو بيبصلها وهي مش واخده بالها وقال..
عز
علي الصبح كده بقي ده ينفع؟..
قامت هي بسرعه وقالت
نعم؟..
عز بهدوء
احمم انعم الله عليكي، عمار المنشاوي جوه؟..
فيروز
لا هو المفروض انه كان هيجي النهارده بس عنده ظرف شخصي ومش هيجي..
عز
تمام لما يرجع ياريت تبلغيه ان عز الدين جه وسأل عليه..
فيروز كتبت اسمه علي ورقه وقالت
تمام..
_كان هيمشي بس قرب منها وقالها بصوت واطي ونبره خبيثه..
عز
بعد كده لما تبقي هتنزلي تجيبي حاجه من علي الارض ابقي افتكري انك لابسه جيبه قصيره وو..
بص لتحت وقالها
عيب..
_ وشها قلب احمر بأحراج وكسوف وقبل ما ترد عليه سابها ومشي، وهي فضلت تنزل في الجيبه بتاعتها لتحت وقالت لنفسها بغيظ..
فيروز
انا غلطانه اني لبستها والله..
ـــــ #بقلم_الكاتبه_رحاب_القاضي ــــــ
_ وفي شرم الشيخ..
كانت جميله نايمه وعمار قاعد علي الكرسي جنبيها وهو حاطط رجل علي رجل وعيونه ما نزلتش من عليها وكان هيموت ويعرف هي ليه سابته ومشيت من الاوتيل، وبدأت جميله تفوق وهو فضل ثابت ما اتحركش خالص، فبصتله هي بضيق وبعدين بصت للناحيه التانيه بضيق اكبر وقعدت علي السرير وقالت..
جميله
احنا المفروض كنا رجعنا القاهره دلوقتي؟..
عمار بجمود
المفروض لو حضرتك ما كنتيش اتصرفتي من دماغك..
جميله بحده.
ممكن تسكت وما تخلنيش اسمع صوتك خالص، عشان انا اتبهدلت وكنت احتمال اموت امبارح بسببك..
وكملت ببكاء
وكمان موبيلي ضااع وايدي اتعورت والفستان الحلو الوحيد اللي معايا باظ…
قرب منها وقال
ليه مشيتي طيب انا زعلتك في ايه؟..
ضيقت عينها وقالتله بغضب
عشان عرفت انت كنت عايز مني ايه امبارح يا صاحب النوايا القذره..
عمار بعدم فهم
انتي عبيطه يا جميله هو انا لو كنت هعملك حاجه وحشه كنت هقول لامك انك معايا..
جميله بدموع
اومال ايه الكلام اللي سمعته هناك ده وانك كل ما تروح الاوتيل ده بتكون معاك واحده من اياهم..
عمار بضيق
هو بعيد عن مين قالك كده بس انتي لو كنتي صبرتي انا كنت هرجع واحكيلك كل حاجه، يا جميله انا كنت فعلا طايش وانا صغير وعملت حاجات كتيره غلط منهم جوازي من مامت مروان كان سني صغير وغلطت معاها اصلا قبل ما اتجوزها وصلحت غلطتي واتجوزتها واطلقنا قبل ما تولد مروان وبعد ما ولدته رمتهولي اربيه لوحدي ومشيت..
جميله بسخريه
دي طبعا اول غلطه وطلعت منها بعيل هاا في ايه غلطات تاني مخلف كام عيل في السر قول قول ما تتكسفش..
عمار بغيظ
لا ما خلفتش غير مروان بس هخاويه قريب ان شاء الله..
جميله ببرود
هه الطموح حلو برضو كمل كمل..
عمار
ما فيش حاجه تاني اللي حصل بعد كده كنا انا وزكريا اخويا فرحانين باننا كبرنا في الشغل سوا وبقيت شركتنا عالميه فقررنا نتنطط شويه، بس بعد كده هو خطب وانا لميت نفسي عشان ابني ما يقلدنيش في الغلط ده..
سكتت جميله وهو مسك ايدها وقالها
والله العظيم ما في واحده دخلت حياتي وقولتلها اني بحبها غيرك وما فيش واحده دخلت قلبي غيرك يا جميله، انتي عارفه انا ما اتجوزتش ليه لحد دلوقتي..
جميله ابتسكت وقالت
عشان صلاة الفجر والقياام..
عمار بعدم
ايه؟..
جميله
ما انا كنت بصلي الفجر والقيام ديماً واقول ياارب اللي هيبقي جوزي ما يحب ولا يشوف واحده غيري لحد ما يشوفني ويحبني وقيام الليل ده علي فكره ليه سحر خاااص كده يعني..
ابتسم عمار وقالها
لا وانا اتأكدت اهو، انا غلطت ايوه وعرفت كتير بس والله ما حبيت ولا هحب حد زيك، انتي ظهرتي واكدتيلي ان البنت اللي كنت راسمها في خيالي موجوده بجد وهتبقي معايا زي ما اتمنيتك بالظبط يا جميله واكتر كمان..
جميله بتوتر
طيب ممكن طلب؟..
عمار
عينيا ليكي اطلبي..
جميله بحزن
خليهم يدورو علي موبيلي والنبي ده عليه صوري من لما كنت في ثانوي اينعم كنت معفنه وبقرنين بس انا بحب الصور دي وعليه صور بابا..
عمار
هبقي اجيبلك غيره لان صعب الاقيه.
جميله بغيظ
طيب اسكت طيب مش عايزه منك حاجه، غني واسم علي الفاضي طيب ده لو بطل من بتوع الروايات اللي بقرأها كان زمانه جابه من قبل ما اطلب.
عمار بغيظ
طيب بالمناسبه امك مستنياكي تفوقي عشان تكلمك وتهزأك انك مشيتي بالليل لوحدك من غيري..
جميله بقلق
انت قولتلها ايه طيب؟..
عمار بهدوء
ما تقلقيش لسه ما قولتلهاش حاجه، لما نبقي نرجع ومش هستني كتير وهقولها كل حاجه..
جميله بتوتر
بص هو انا اصلا لسه مش مستوعبه وفي خازوق في الموضوع انا عارفه، بص اطلع بره..
عمار
والله هبله علي العموم انا جيبتلك هدوم اهي يارب تكون مقاسك، كلمي مامتك وغيري هدومك عشان هنمشي..
وطلع موبيله وقالها
الموبيل اهو الباسورد بتاعه 12/27..
جميله
وده عيد ميلاد مين ان شاء الله؟..
عمار ابتسم وقالها
عيد ميلاد ابني يا عم الغيور وصفي النيه ده انا سايبلك الموبيل كله اهو…
جميله ببراءه
والله انا ما بحبش اشوف خصوصيات حد..
عمار غمزلها وقال
ولو شوفتيها عادي ما بقتيش غريبه يعني..
_ قال كلامه وطلع وجميله قعدت علي السرير وفضلت تسقف وهي مبسوطه وبتقول..
جميله
ما طلعش خازوق ما طلعش خازوق..
_ وبعدين كلمت مامتها وغيرت هدومها ونزلت لقيته مستنيها قدام عربيته وقالها..
عمار
العروسه يا هانم اللي رمتيها امبارح جيبتهالك في العربيه،وبعد كده الهدايا بتاعتي ما تترميش..
جميله
يا عم محسسني ان الهدايا بتاعتك دي الماظ ومجوهرات دي حتت عروسه تطلعلها بعشرين جينيه..
عمار ضحك غصب عنه وقالها
اطلعي يا جميله خلينا نمشي من ام المكان ده يلاا..
_ وركبت جنبيه العربيه ومشيو في طريقهم راجعين القاهره..
ـــــــــ #بقلم_الكاتبه_رحاب_القاضي ــــــــ
_ في شركة يونس الصاوي..
كان قاعد يونس في مكتبه وقدامه زكريا اللي قاله..
زكريا
زي ما سمعت كده انا النهارده هروح بيت عمار وهجيب ورق المشروع كله..
يونس
لوحدك انا ماليش في الجو بتاع السرقه ده..
زكريا
بشوقك انا اصلا مش محتاج منك تساعدني، واظن برضو انت جايبني عشان الشغل ده اصلك عامل نفسك نضيف ومالكش فيه.
يونس
لو الورق ده كان عندي بكره، بعد بكره هقدم المشروع بتاعي علي طول..
زكريا
تمام الصفقه هتكون لينا بس عشان عمار يخسر لازم يخسر حاجه تانيه في نفس الوقت…
يونس
بمعني؟؟…
زكريا بحقد
لا دي حاجه خاصه بينا انت اقعد واتفرج..
يونس بفضول
احنا ايد واحده دلوقتي ويهمني اعرف انت ناويله علي ايه؟..
زكريا بجمود
بس ده ما يخصكش هتستفاد منه ايوه بس انا هعملو لوحدي وانت هتستفاد منه برضو..
يونس بسخريه
تعرف من سنين كان في بيني انا واخويا مشاكل كبيره بس عمري ما اتكلمت عنه بالحقد ده ولا ناويت اذيه زي ما انت ناوي تأذي اخوك كده، فضولي زاد اعرف هو عمل فيك ايه؟..
لمعت عيون زكريا بالدموع ورد عليه
خليك في حالك ليك عندي تاخد مكانه وانا هساعدك توصل…
يونس
وايه مصلحتك اني انا اخد مكانه، ليه مش انت؟..
اتنهد زكريا بضيق وقام وقال
اخد مكانه ازاي وهو اخويا مش هتوجعو قد ما يشوف اخوه بينزل فيه وبيعلي الغريب عليه..
_ قال كلامه وطلع من عند يونس وقابل دارين اللي كانت داخله عند يونس، فبصلها من فوق لتحت بسخريه ومشي راح مكتبه اللي هو في الاساس مكتب يوسف…
_ وعند يونس قعدت دارين قدامه وقالتله..
دارين
اطمن مايان مش هتتوظف في اي مدرسه تاني، ادعيلي بقي..
يونس ابتسم وقالها
لا انا عايز اعرف انتي عملتي ايه؟..
دارين
انا اقولك مايان كانت من فتره علي علاقه براجل لبناني غني جداً وقبله بواحد مصري مش مهم اقولك اسمه المهم خليت حد يهددها انها لو فكرت تقرب من اي طفل مش ابنك بس هيعرض صورها دي في كل مكان..
يونس بصلها بأعجاب وقال
برافو بجد تعرفي انتي كل يوم عن التاني بتثبتيلي اني مش هقدر استغني عنك خالص..
دارين ابتسمت بحماس وقالتله
طيب نتعشي مع بعض النهارده عشان خاطري..
يونس
النهارده بجد مش فاضي بس بكره نعوضها وكمان عندي ليكي مفجأه بكره هتعجبك اووي..
قامت وقفت وقالتله
اوكي انا هروح اشوف شغلي بقي بااي..
_ وطلعت دارين من عنده وهو مسك موبيله وبعت رساله لمايان وقالها..
يونس
ده رد بسيط عن اللي عملتيه في ابني ولو عرفت انك قربتي من حاجه تخصني تاني هتزعلي اووي يا مايا..
ــــــ #بقلم_الكاتبه_رحاب_القاضي ــــــ
_ وبعد كام ساعه تحت بيت جميله..
وقف عمار بعربيته قدام البيت وكان مدايق جداً وهي قالتله بهدوء..
جميله
ممكن ما تزعلش انا قولتلك انه ما ينفعش بجد دلوقتي تكلم ماما..
عمار
هو ايه اللي ممكن يخلي امك ما توافقش بيا؟..
جميله بهدوء
كتير في فرق كبير بيني وبينك في حاجات كتير، انا بالنسبالي عادي بس ماما مش عارفه وعشان كده بقولك استني اشوف انا الموضوع بالنسبالها هيكون ازاي وعلي اساس كده نتصرف..
عمار بضيق
هي لو امك رفضت اني ارتبط بيكي هتعملي ايه؟..
جميله بخبث
تؤتؤ انت اللي تعمل وتقنعها..
عمار ابتسم وقالها
هو انا لسه هقنعها والجو بتاع العيال التوتو ده، لا انا هخطفك منها ومن الدنيا كلها..
ضحكت جميله بهدوء وقالتله
وانا جاهزه اتخطف والله بس بلاش استعجال يمكن توافق..
_قبل ما يرد عليها وقف حسين ابن عمها عند الشباك وقالها…
حسين
جميله انزلي..
جميله بصتله وقالت
حسين انت هنا..
_ونزلت بسرعه من العربيه تحت نظرات عمار اللي نزل هو كمان من العربيه..
جميله
انت هنا من امتي؟..
بص حسين لعمار بهدوء وقال
من شويه مرات عمي كلمتني وقالتلي علي اللي حصل معاكي، انتي كويسه..
جميله
ايوه انا كويسه اعرفك بقي عمور.. اا عمار بيه مديري في الشغل، وده حسين العدوي ابن عمي..
حسين بجمود
من غير ما تعرفيني عمار بيه اسمه سابقه، اتشرفت بحضرتك..
اتنهد عمار بضيق وقاله
اهلا…
وبص لجميله وقالها
المفروض انك هتطلعي عشان ترتاحي يلا..
مسك حسين ايد جميله وقالها
تعالي يا جمله انا هطلع معاكي، انتي حصل معاكي ايه بالظبط ومال ايدك؟..
_ اتوترت جميله مش من حسين اللي مسك ايدها اد ما اتوترت من نظرات عمار الغاضبه وطريقته العصبيه اللي لتاني مره تشوفها بعد ما زعقلها قبل كده في الشركه لما كانت قاعده مع مهاب، وبسرعه سحبت ايدها من ايد حسين وقالت بتوتر..
جميله
لا انا كويسه ما فيش داعي يعني يا حسين تطلع معايا فوق، بص انا هبقي اكلمك اطمنك عليا..
حسين
اوكي خلاص هستناكي تكلميني، يلا سلام..
_ مشي حسين بعربيته، وعمار قرب من جميله اللي كانت رايحه تجري ومسكها من دراعها جامد وقالها بحده..
عمار
مين الاخ بقي؟..
جميله بتوتر
ابن عمي..
عمار
وهتكلميه تطمنيه علي ايه يا روح امك.
جميله
ايه الاوفر ده، احنا يدوب لسه معترفين لبعض يعني و،،،لا لا انت بس اللي اعترفت لوحدك انا لسه…
زعق فيها وقالها
متوهيش يا جميله هتكلميه؟..
جميله
يا باشا اهوو كلام بقي هو في حد بيقول كلام وبيعمل بيه وخصوصا لو حد زيي..
عمار بجمود
ماشي يا جميله اطلعي فوق وكلمي امك بسرعه هاا..
جميله
عينيا حاصر وبعدين ايه امك دي اسمها مامتك..
عمار بحده
اخلصي يا جميله..
_ طلعت جميله بسرعه فووق، وهو ركب عربيته ومشي بسرعه…
ــــــ #بقلم_الكاتبه_رحاب_القاضي ــــــ
_بالليل في بيت المنشاوي..
كان زكريا في اوضته وبيربط في رباط الكوتشي بتاعه وهو بيكلم مروان في الموبيل وبيقوله..
زكريا
تمام زي ما اتفقنا انت روح النادي وانا هخلص حاجه في ايدي بس واجيلك..
مروان
ماشي بس اوعي تغفلني وما تجيش، انا دي اخر خروجه ليا عشان الامتحانات خلاص قربت وبابا مش هيطلعني..
زكريا
حاضر والله هجيلك بس لو اتاخرت عليك ابقي تعالي عند جدك هنا بلااش تروح..
مروان
حاضر يا عمو مع السلامه..
_ قفل معاه زكريا وراح وقف عند الدولاب وطلع سلا*حه واتأكد من وجود طلقات ناريه فيه، وفي الوقت ده دخل عنده المنشاوي وهو ساند علي عكازه وبصله بخوف وقال..
المنشاوي
انت بتعمل ايه ورايح فين؟..
_بصله زكريا وما ردش عليه وحط سلاحه في هدومه وجه يطلع بس مسكه المنشاوي من دراعه جامد وقاله..
المنشاوي
انا بكلمك انت غاير فين؟..
سحب زكريا ايده منه بهدوء وقاله
زي كل مره رايح اعمل حاجه مش هتعجبك ولا هتعجب حد، بس المميز انها المره دي عند ابنك حبيب قلبك عمار..
اتنفض المنشاوي بخوف وقاله
انت واخد سلاحك ورايح لاخوك ليه انت اتجننت.
زكريا بدموع متحجره
رايح اجيب حقي طول عمري مستني اللي يجي ويقولي انا عدو عمار المنشاوي واهو جه وانا حطيت ايدي في ايده وقريب اووي ابنك اللي فرحان بنفسه ده هينزل تحت سابع ارض، ولو خايف عليه ايااك تقوله اني رايح عنده دلوقتي عشان والله لو طلع في وشي ووقف قدامي لاقتله ومش هاخد فيه يوم واحد..
نزلت دموع المنشاوي وقاله بعصبيه
ومين قالك اني هسيبك تطلع من هنا اصلا..
ومسكه من هدومه وقاله
ده انا اكسر عضمك لو قربت من اخوك بشر، ده اخوك يا زكريا اخوك..
ذقه زكريا جامد وقاله
مش اخويا اللي يدوس علي اخوه ويكسره ما يبقاش اخ، انا بقيت كده بسببه وما ينفعش انا ابقي كده وهو بيعلي ما ينفعش،ما ينفعش انا لوحدس اللي اخسر..
_ قال كلامه ومشي والمنشازي جه يروح ورااه بسرعه بس وقع علي الارض وفضل يعيط بحرقه وهو بينادي عليه ويقول..
المنشاوي
يا زكرياااااا استني يا زكريااااااا..
_«وقبل تلاتين سنه في فيلا المنشاوي»…
كان عمار واقف بيعيط وبيقول لباباه
مش عارف والله يا بابا راح فين هو كان ماسك في ايدي وسابني ومشي..
المنشاوي
انت اللي سيبته يا عمار وانا قولتلك اخوك صغير وشقي ما تسيبش ايده خالص..
_رجع عمار يعيط تاني وهو خايف علي اخوه اللي لسه مابيعرفش يتكلم اصلا وبيمشي بالعافيه، والمنشاوي طلع في الشارع ومعاه البواب وفضل ينادي بصوته كله علي ابنه بخوف..
المنشاوي
يا زكرياااااا.
“انت فين اراضيك يا زكريا.. بصوت احمد بدير في سعد اليتيم😂😁💔”
_ كان ده المشهد اللي افتكره المنشاوي وهو واقع علي الارض وقال ببكاء وهو مش قادر..
المنشاوي
ليه سيبت ايد اخوك يا عمار، ليه سيبت زكريا لوحده يا عمار…
ـــــــ #بقلم_الكاتبه_رحاب_القاضي ــــــ
ـ وفي بيت جميله..
كانت شهد قاعده علي سرير جميله وعلي رجلها يوسف وقدامها ايتن وهما التلاته بيتفرجو علي جميله اللي واقفه في البلكونه بتكلم عمار من موبيل ايتن وبتقوله..
جميله
يا عم والله العظيم ما هكلمه واصلا انا عملاله هو وكل عيلتي بلوك من كل حاجه وموبيلي ضايه واهو بكلمك من عند ايتن…
عمار
ليه يعني عملالهم بلوك هو حد منهم بيدايقك في حاجه..
جميله
لا بس فكرة انهم عايشين معايا علي نفس الارض مديقاني..
ضحك عمار وقالها
نوديهم المريخ يا حبيبتي ولا تزعلي ، المهم..
جميله
ايه؟..
عمار
بحبك وعايز اسمع ردك دلوقتي بقي مش هستني..
ابتسمت جميله وردت عليه
يعني هو لازم يعني؟..
عمار
ايوه لازم يعني هااا؟..
جميله بكسوف
شكراً…
_وفجأه لقيت عمار قفل الموبيل في وشها ففضلت تضحك، ودخلت جوه ولما شافتهم قاعدين فاتخضت وقالت..
جميله
في ايه مالكم؟..
ايتن
الله واكبر عليكي بتتكلمي وفاتحه الاسبيكر والشارع كله سمع المكالمه…
جميله بقلق
احيي هو الصوت كان عالي بجد؟..
شهد
لا لا مش اووي، تعالي بس قوليلي الراجل لمح واعترف وكل حاجه ليه بقي مش بتقوليلو انك بتحبيه..
جميله بضيق
ما هو انا لسه يعني مش حساها..
شهد وايتن ويوسف بصوت واحد
نعممم يا اختي؟..
شهد بغيظ
هو ايه اللي مش حساها ده بعد اللي عملو الراجل ده حتي لو مش حساها بعد اللي هو عمله ده انا اللي حاسه نفسي بحبه..
ايتن
ياااارب مروان يبقي زي باباه لما يجيب الاربعين ياارب..
شهد
لا لا مش هيبقي كده عمار ده طفره نادره، انتي بعد سنه واحده جواز هتلاقي اهمال وزعيق واحيانا مد ايد وسعات يحدفك بالكرسي..
جميله
ثواني هو الحيوان طليقك ده كان بيضربك..
رد عليها يوسف وقال
ايوه فمره ماما خرجت من غير ما تقوله فبابا ضربها بالقلم وزعقلها وهي فضلت تعيط، وانا فضلت اعيط معوها صح يا ماما..
اتملت عيون شهد دموع وقالت
لا يا حبيبي ده احنا كنا بنهزر، اصلا ما فيش راجل بيضرب واحده والا ما يبقاش راجل وبابا راجل واحسن راجل في الدنيا هو كان بيهزر معايا وبس..
بصت ايتن وجميله لبعض بحزن وجميله قالت
واد يا يوسف انت ايه اللي مقعدك معانا ما تطلع تلعب مع اخوك بره..
يوسف مسك في شهد وقال
لا انا بحب قعدت الستات..
شهد وهي بتضحك
نسخه منه اقسم بالله هيطلع لمين يعني، المهم يا ست جميله ناويه علي ايه مع عمار؟..
جميله
بصو انا هفهمكم انا بحبه وجداً كمان ومبسوطه جداً باللي حصل ده، بس خايفه اولاً من ماما وثانياً من عمي وثالثاً منه..
ايتن
منه ازاي يعني؟..
جميله بقلق
خايفه اكون فتره في حياته اصله لو كان راجل بيحب الاستقرار اكيد كان اتجوز قبل كده حتي لو مره كمان..
جميله
معاكي حق انتي استني واتأكدي من مشاعرك ولما تبقي كل حاجه جواكي تمام وافقي، وعلي فكره في موضوع الجواز بالذات لما بيكون خير بتكون كل حاجه فيه متيسره لوحدها..
ايتن
سيبك من جميله ومعلش يعني لو هقلب عليكي المواجع بس ممكن اعرف انتي اتعرفتي علي يونس ازاي هو اسمه يونس صح؟..
شهد اتنهدت بهدوء وقالت
ايوه اسمه يونس وعادي احكيلك..
ابتسمت شهد بدموع وقالت
الحكايه بدأت لما كنت راكبه ميكروباص وبسمع اغاني وسرحت ونزلت في منطقه غير منطقتي اللي كنت ساكنه فيها، وكانت حارة الصاوي وهو الكبير بتاعها…
_ وانتو عارفين الباقي بقي مش هنحكي تاني اكيد 😁
ـــــ بقلم_الكاتبه_رحاب_القاضي ـــــ
بُنيت احلامهم بأيدينا.. وعندما وصلو اليها
انكرو وجودنا 💔
_ علي مسافه كبيره شويه من فيلا عمار المنشاوي كان واقف زكريا مع رجالته اللي بيشتغل معاهم في شغله اللي اختاره بنفسه بس بدون نفس راضيه..
زكريا
يلا زي ما اتفقنا انتو كلكم هتروحو قدام عايز في لحظه واحده تلفتو نظر الكل ليكم، وانت يا منهم هتفضل هنا..
منعم
طيب ما ادخل معاك و..
زكريا
وانا من امتي باخد حد معايا جوه، نفذو يلا..
_ وفعلا راحو رجالة زكريا قدام بيت المنشاوي وعملو مشكله كبيره مع الحراس بتوع عمار وفعلا الكل اتجمع عندهم، وزكريا بسرعه بمساعدة منعم نط من علي السور ودخل بيت اخوه اللي كان بيته من سنين وهو دلوقتي بيدخله زي الحراميه.
_ وقف وبص للبيت بدموع متحجره، وبعدين اتحرك في البيت بكل هدوء ودخل من الباب الخلفي للفيلا وطلع فوق من سلم الشغالين وراح لاوضة مروان وكان النور مقفول، واتصدم اول ما فتحه لما لقي عمار قاعد علي الكنبه وحاطط رجل علي رجل ومبتسم بهدوء وقاله..
عمار
اتأخرت ليه كده يا زيكو..
زكريا بغضب
ابوك اللي قالك مش كده، وانا عند وعدي ليه..
_وطلع مسدسه ووجهه علي عمار اللي وقف قدامه وقاله بحده…
عمار
لو راجل اعملها، بس الاول خليني اقولك مين اللي قالي انك جاي لان مش ابوك اللي قالي..
_بصله زكريا بفضول من غير ما يتكلم ودخل فجأه من البلكونه يونس ومعاه يوسف، ويونس بص لزكريا المصدوم بشماته وقاله..
يونس
فكرني اجيب بيت جنبك هنا يا عمار بيه بعد ما اخد الصفقه ان شاء الله..
نزل زكريا سلاحه وقال بغضب
ايه ده؟..
ضحك عمار بسخريه وقاله
هههههه هتفضل طول عمرك فاشل حتي انك تعمل دور الشرير انت فاشل فيه..
يوسف بهدوء
انت غلطان يا زكريا انا ما عنديش مشكله ابقي نمبر تو مدام اخويا الاول، وحتي لو كان حصل و يونس باعني بجد وهو صاحبي مش اخويا انا عمري ما كنت هبيعه ولا احط ايدي في ايد عدوه لان دي اسمها واطينه وقلة اصل..
يونس بجديه
اخوك عرض عليا اعمل عليك الحوار ده مقابل الصفقه وانا رسمت الخطه بالظبط وخليتك تقع فيها وخليتك مضيت علي عقد عمل فعلا بس لعمار بيه مش ليا وكل حاجه فيه قانونيه، من غير ما تسقف عارف ان الخطه عجبتك، المهم انا دوري خلص كده يا عمار بيه..
ابتسم عمار ليونس وقاله
شكراً يا يونس واعتبر الصفقه ليك واي شغل يقف معاك انا في ضهرك..
_ابتسم يونس بانتصار ان اللي كان عايزه في البدايه وهو الوصول لعمار والشغل معاه تم زي ما كان عايز، وافتكر اللي حصل يوم ما اتخانق مع عمار في بس بالليل في اوتيل خاص من بتوع عمار….
_فلاااش بااااك..
يونس
وانت هتستفاد ايه اني اضحك علي اخوك واخليه يحط ايده في ايدي؟…
يوسف
اظن احنا عايزين منك شغل مش جايين محل مشكله شخصيه..
عمار بضيق
انا اكتر حاجه خلتني اطلب منكم حاجه زي دي انكم ولاد بلد ورجاله ووقفتكم مع بعض وانكم ايد واحده..
تابع بنبره حزينه
كنت انا واخويا زي كده وحصل خلاف كبير بينا وهو اتجه لسكه بتضيعه وانا عايز ارجعه تاني ايده في ايدي..
يونس
موافق بس انت عايز ايه بالظبط؟..
طلع عمار ورقه من الملف اللي قدامه
زكريا يمضي علي العقد ده وانه ما يشتغلش عند اي حد غيري، بس طبعا من غير ما يعرف، ازاي بقي بتاعتكم عملتو كده الصفقه كلها ليكم بالمشروع اللي انتو عايزينه وبتوصيه مني كمان..
مسك يونس العقد وقال
اعتبره اتمضي واخوك بقي تحت امرك..
يوسف
مدام نية حضرتك خير احنا معاك وانت زي ما قولت احنا ولاد بلد ورجاله اووي..
_ باااااااااااااك
ـــــــــــــــــــــ
_ مشي يونس هو ويوسف وفضل عمار واقف قدام زكريا اللي لحد دلوقتي ما نطقش بولا كلمه، وعمار قاله بجمود…
عمار
مهما عملت هتفضل غبي، كنت عايز تبقي مدير معايا ازاي وانت غبي..
زكريا بدموع متحجره
ليه مصمم تكسرني، ليه مصمم تخليني كده؟..
عمار بسخريه
بطل بقي تعيش دور الضحيه كفايه، لعبت الدور ده كتير سرقت وضربت وقتلت وانت برضو لسه عايش الدور ده، ايه ما بتزهقش..
زكريا بحزن
انت عايز ايه، لو فاكر ان الورقه اللي في ايدك دي هترجعني تحت امرك تاني وابقالك كلب اقول حاضر ونعم يبقي بتحلم يا عمار.
عمار بغضب
هو انا عملتلك ايه للكره ده كله، مشكله تافهه بينا كانت هتتحل عادي ليه كبرتها ووصلتنا للنقطه دي..
زكريا بحده
ما كنتش مشكله تافهه انك تهيني وتقل مني قدام كل موظفينك وتزلني عشان انت المدير ما كانتش مشكله تافهه..
عمار
وانت عملت ايه وقتها كنت هتدمر كل حاجه، وكنت عايز تاخد حق مش حقك…
زكريا
لا لا بلاش جو قلب الترابيزه ده، انا عمري ما فكرت ابقي مدير معاك الا بعد ما الشركه كانت هتافلس واللي انت عملته فيا كنت عايزك تردلي كرامتي قدام الناس بس انت دوست عليا اكتر، يا اخي غلطت وكنت بدور معاك علي حل انت عملت ايه شتمت وزعقت والمره الوحيده اللي عملت فيها مدير كانت عليا انا حتي مش بيني وبينك لا قدام امة لا اله الا الله فاكر وقتها قولتلي ايه..
عمار بضيق
انا كنت خايف لنخسر كل حاجه وكنت اا..
زكريا دموعه نزلت وقال بحزن
قولتلي انت فاشل يا زكريا انت خربتلي كل شغلي انت مالكش حاجه هنا، انا مخليك معايا عشان ابويا انت مش هتنفع في حاجه دي شركتي انا ودي فلوسي انا ، انت هنا اقل واحد ويا تقعد اقل واحد ومالكش اي قيمه يا تمشي..
زعق فيه وقال
قدام الكل اخويا قال كدا، خلي الناس تقول عشان هو ابن الست الفقيره عايز يخرب اخوه ابن العز مع انك اخويا او كنت اخويا وقتها..
مسح دموعه بضهر ايده وقال
انا بكرهك يا عمار في اليوم ده كرهتك في اول مره اشتغلت فيها حرامي وقطاع طرق كرهتك في اول مره ضربت واحد وعورته كرهتك في كل مره بقتل فيها حد من غير ذنب كرهتك، في كل ليليه بصحي فيها من نومي وانا خايف كرهتك..
عمار بسخريه
بتعلق غلطك عليا ليه، هو انا اللي قولتلك تبقي كده..
زكريا
ايوه انا بعمل كل ده عشان اوصل وابقي اغني واحسن وانجح منك.، عشان اثبت لكل اللي كسفتني قدامهم اني مش فاشل ومش عشان امي فقيره يبقي عمري ما هبقي ناجح زيك..
عمار
كنت جيت وبدأنا من الاول..
زكريا
ما انا جيتلك كنت عايزني موظف عندك وبس، بس انا هفضل زي ما انا وعارف اخرتها ايه اني هموت ما انا متعلم برضو وعارف “ان من قتل يقتل”، بس قبل ما ده يحصل هنزلك لسابع ارض وهاخد حق كل لحظه عشتها فوجع بسببك..
قال كلامه وسابه ومشي بس عمار قاله
انت مش هتتقتل اخوك في ضهرك ولو حكمت اموت مكانك وانت تعيش هعمل كده..
زكريا بصله بحزن وقال
انا ماليش اخوات.
_ مشي زكريا وعمار قعد علي الكنبه اللي في اوضة ابنه وحط راسه بين ايديه واتنهد بضيق ومسك موبيله وقال لابوه اللي كان علي الخط وسامع كل حاجه..
عمار
ما فيش امل يا بابا زكريا ما فيش منه رجوع…
المنشاوي ببكاء
الله قادر علي كل شئ، الله قادر علي كل شئ..
مروان اخد الموبيل من جده وقال
بابا جدو تعبان اووي انا جيت لقيته علي الارض اصلاً..
عمار
هبعتلك دكتور بس انا مش هقدر اجيلك دلوقتي خليك انت معاه..
ـــــــ #بقلم_الكاتبه_رحاب_القاضي ــــــ
_ وبعد نص الليل تحت بيت شهد..
كان واقف يونس بعربيته وماسك موبيله ومتردد يكلمها او لا، وفي الاخر شال الموبيل في جيبه ونزل من العربيه وطلع فووق وخبط علي باب الشقه بهدوء، وجه صوتها من ورا الباب وهي بتقول..
شهد
مين؟..
يونس
انا يونس..
فتحت الباب وهي لابسه حجابها وقالتله
في ايه يا يونس ايه اللي جابك في وقت زي ده؟..
يونس بنظره كلها اشتياق
هتسبيني واقف علي الباب..
اتوترت وقالتله
اا صبري مع زهره في اسكندريه عند اهلها وما فيش غيري انا والولاد هنا وهما نايمين دلوقتي والوقت متأخر وما ينفعش تدخل..
يونس بجمود
انا عارف انهم مش هنا وعشان كده جيت..
شهد بقلق
ايه اللي انت بتقوله ده، لو سمحت امشي يا يونس ما ينفعش كده..
ذقها بهدوء ودخل وقفل الباب وراه وقالها
هو ايه اللي ما ينفعش، انتي اللي ما ينفعش تقولي ليونس لا يا شهد..
يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية موضوع عائلي 2 (الجميله والشعر الأبيض))