رواية كامب شيراز الفصل الثاني 2 بقلم روزان مصطفى

كامب شيزار محافظة الأسكندرية / صيف ٢٠١٨

الكورة خبطت في راسها ف قلعت الكاب ولفت ، شعرها دار حواليها وهي بتضيق عينيها الواسعة وبتقول وهي حاطة إيدها على راسها : إيه يا كابتن إنت مش تحاسب ؟

وقف هو وخد نفس وهو حاطط إيده في وسطه وقال : مخدتش بالي ، إرمي الكورة

وطت هي بجسمها الرفيع جداً ومسكت الكورة بين إيديها وقالت : مش هرميهالك ! عشان متخبطش حد تاني في راسه

قرب هو بنرفزة وقال : أنا مبهزرش هاتي الكورة بنلعب

مسكت الكورة كويس ورجعت لورا بخوف وهي بتقول : شكلك بني أدم ناضج وعمرك كبير ف مش فاهمة إزاي بتلعب في الشارع المفروض كبرت على الحجات دي

هو بضحكة سخرية : لا إله إلا الله ، هتجيبي الكورة ولا أخدها بطريقتي !

جم من بعيد صحابها وواحدة منهم : إيييه بالراحة عليها شوية ؟ بص يابا إلعبوا بعيد مش في نص الشارع عشان متجيش عربية تشيلكم ولا حاجة

خالد إبتدى يتنرفز وبعدين قال : وإنتوا مالكم نلعب فين ، صاحبتك يا شاطرة خبطتها بالغلط في راسها ومن ساعتها وهي مرخمة مش عاوزة ترجع الكورة

ضحى بتتنفس بسرعة شوية من الخوف : خلاص خد ، أنا بس ، مكنتش حابة حد تاني يتخبط

صاحبتها بصوت عالي : إتكل على الله يا عمنا متخوفلناش البت بصوتك

خالد لصاحبتها : إنتي مسترجلة فيها ليه فاكرة إنك روشة كدا ؟

صاحبة ضحى : أحييه دا لسه بيتكلم

ضحى بخوف : خ خلاص خلاص ، إحنا أصلاً ماشيين بس ياريت وإنت بتلعب متأذيش حد

مشيوا بعيد ، خالد فضل يبص لضهرها شوية وصحابها بيطبطوا عليها

* الوقت الحالي

خالد بدموع : البداية كانت غلط مني وكان معاها حق ، كان كل كلامها معاها حق فيه مينفعش ألعب في الشارع وفي نوادي متخصصة للكورة ، بس بالرغم من إن معاها حق كان صوتها واطي ومترددة ، كانت بتخاف أوي حتى من خيالها وصحابها كانوا بيدافعوا عنها ويواسوها

كانت من النوع اللي لو حست إن هيحصلها مشكلة تاخد نفسها بالعافية وتترعش تلقائي ، رغم إن بنات إسكندرية معروفين بقوة شخصيتهم بس ضحى مكانتش كدا ودا اللي شدني ليها لإني مبحبش البنت اللي فاتحة حياتها مشاكل ولسانها مسحوب منها

الدجال : حط إيدك على النجمة وغمض عينك ، وإتخيل ملامحها

خالد قلبه دق ، المفروض الدجال هيحاول يحضر روح ضحى

غمض عينه وإفتكرها

شعر متوسط لونه كستنائي في الشمس ، عيون عسلية ووش قمحاوي نحيف وضحكة حلوة

نزل خط دموع من عينه وهي مقفوله

الدجال فضل على الوضع دا هو وخالد نص ساعة كاملة

فجأة الدجال فتح عينه وقال : روحها مش حاضرة ، مش موجودة زي الباقيين .. بس أنا دلوقتي هصرفلك اللي إنت حضرتهم من غير قصد

حس خالد بصداع رهيب وبحزن عميق جواه وقال : متصرفش حد ، إطلع برا

الدجال : متأكد ؟

خالد بجلد ذات : أيوة ، أنا لازم أتعذب زي ما عذبتها

الدجال : طب أتعاب محاولتي معاك !

رماله خالد الفلوس وطرده وطلب منه يقفل الباب وراه

بالفعل خرج وقفل الباب ف طفى خالد الشموع وخرج تليفونه من جيبه وهو بيبص على رقم ضحى وبيعيط

أتصل وفضل الفون يرن من غير رد ، في الاخر جت الرسالة الصوتيه بصوت ضحى ” لو مردتش عليك ف أكيد أنا مش فاضية أو مش موجودة في الوقت الحالي ، سيب رسالة هكلمك لما أسمعها

خالد بعياط وهو بيسمع صوتها ساب رسالة بعد الصفارة وقال : أنا كل يوم بتصل برقمك عشان أسمع صوتك في الرسالة ، سامحيني يا ضحى ????