رواية كحل عرب الحلقة الحادية والثلاثون 31 للكاتبة زينب ماجد

( تحديد يوم العرس ) 

بلاية وداع

مثل العود من يذبل ….بلاية وداع 

ومثل الماي من ينشف …….بلاية وداع 

تدريني هرش واوجرت بية الكاع 

يا رخص العشك من ينشره وينباع 

سرحان : ههههه انطر اليجرالك .. اعتبر هاذ تهديد يااا ابو نعمة ؟ 

– ال ضاحي كلهم حدر التهديد دام قصر ابوي لساهم مكوشين اعليه . 

–  (ان الأرض لله يورثها لمن يشاء من عباده ) و عادة اسلافنا تورث القصر للشيخ اليخلف بعده ، بدرياية الشيخ الكبلة .. و جدي چلوب ورث القصر و اطاه لدواي .. و دواي ورثه لخيه ضاحي .. ما باكه من احد ، و التكول عنه قصر ابوك … من الأساس ما جان لجدي ثجيل خاطر اطالب بيه .

– اعتبره رفض يبن مطر 

ضحك :هكو جلمة لجدي ضاحي ابوي دومه يسولف بيها … يكول العطية الما تجي من الله لا خير البيها . 

– دام هيج .. حضر عمامك .. النا جعدة وياهم .. و دمك محفوظ رد لدينك . 

– و احنا بأنتظاركم اذا راد الله . 

طلعت منه .. اعاين الوجوه كله الود ودها تاكلني .. جريت نفس و طلعت اتحسر ضيم … يساوموني اعلى عشكي ، شنهي البشر هاي، بتهم و شرفهم يساوموني اعليه ، تطينا ننطيك ما تطينا حضر عمامك .. 

مشيت و انا جاتلني القهر .. 

كضتني امي … ها سرحان يمه 

– يساوموني اعليها يمه 

– شكالك 

– كالي اطني قصر ابوي و اخذ هدوة 

– ياااااع جا من كونه غصرك .. غير غصر ابوك . 

– اكتله تعهد يو ورثت القصر اطه ليه 

– جا وما كتله اي و فضيتها وليما تورث القصر ييمه الله كريم .. اخذ البت و استر اعليها و فض السالفة . 

– يمه موش بهالسهولة .. يو تعهدتله .. سلطان نذل .. معناتها ينجتل ابوي بحي الله طريجه .. و تعال يو تطني القصر يو ما الك مرة ، الزلم التساوم بشرفها مالهم جلمة و يا الشريف ولا يتأمنلهم راي . 

امشي يمه امشي 

– لا تغهر بروحك يوليدي ، جا يو كاتبها الله الك ما تصير الغيرك . 

– الكاتبها و الماكاتبها هدوة ما تصير لزلمة غيري، اموتن لو وحيد خذها يمه . 

– اذكر الله و خلنا نرد . 

صعديت امي و مشيت بيها لكاع اهلي ، و صلت القصر نزلت امي و مشيت للمضيف .. صاح حميد ( اجا اجا هاذ سرحان اجا ) 

مشيت طلع ابوي .. هم اعليه ( تسودنت انت شمالك ولك ناوي تموتني انت سرحان .. راح اشكن زيجي منك خايب علعلتنييييي) 

– طاح الدم بويه و الهم كعدة ويا العمام و هاي سهلة . 

– شحجوا وياك 

– ما حجوا شي .. طاح الدم و بس . 

حجيتها و طلعت للشط .. كعديت اعليه و ظليت اردد 

هنا يمن جنا و جنت 

روحين لكن فد جسم 

فركاك ذوب مهجتي 

وظليت بس امشي رسم 

تدري بنحولي شوصلت ؟

عجزان من شيل الهدم 

يالصوبت كلبي بسهم 

لزمن تشد صوابك 

هنا يمن جنا و جنت 

جيت ووكفت ابابك .

اعاين الدرب و اتذكر ايامي وياها .. يا ضحكنا و يا غنانا و يا سوالفنا التوه بهوانا .. شحصل و هيج شدة و يالعشك دنيانا .. اعوفنها ؟ .. اخليها ؟ 

بيا طريقه احويها ؟ 

انحطت ايد اعلى ظهري : ها يالسبع 

– سبعيش و انا ولفي موش كادر احوي . 

خنجر :- كتلك يسرحان  عاداتنا و تقاليدنا كصت اركاب زلام يابو زلام … ما راح تتوانى عن ركبتك . د

– و اخليها ؟ 

– البت انفضحت لزوم تعرس 

– اموتن 

– سرحان انا ما رايد احبطنك .. لجن اكولن يو تلتهي بدربك و تهدها 

انتفضت من مجاني : مستحييييل .. انا واعديتها خنجر .. واعديتها ما اهدن ايدها .. شلون تريدني اهدنها و بهالوضع . 

– احسن نا تخسر روحك و روحها .. ال ثجيل ناس شرانيين و ينخاف منهم . 

– ويو كدرت اقنع حاكم .. يتبرى منهم و يذب جرش ويا ابوي ، 

– والله شكلك .. بس ما بيها شي ، يو حاكم قنع يذب جرش ويا ابوك ..ويهد ثجيل .. اظنن بعد تنبطل و مالهم راي اعليه . 

– اكومن لحاكم … و احجي وياه .. هلبت اكدر اقنعنه يذب جرش ويانا. 

كمت من مجاني ورحت لبيت حاكم .. دكيت الباب طلعت كواغد وبيدعا فرخه تبجي وتصارخ ، حجت  : ها خالة جا ما كفاك الاجانة جاي تزيدها .. تعبنا و العباس تعبنا . 

– انا جاي خاطر المن السالفة ، ام ستار تعرفيني و تعرفين شنهو انا الصار ملعوب من ال ثجيل و طيحونا بيه اثنينا، اسنديني اخذ البت و نكسر عيونهم . 

– ذاك ابوها و احجي وياه ، لا تكرب اعلى البيت يمه فدوة اغديلك ، الوادم يو تنوعتلك موچب ابابنا .  تلطخنا و كلوبنا موش حمل قهر بعد يسرحان يمه . 

– حاكم وين الاكي 

– اظنن بالكهوة هساع .. 

– يو رد خله يمر اعلى المضيف .. كليله سرحان رايدك . 

– ان شالله 

– ام ستار رايد انشدنج . 

– لا تنشد يمه ، البت حال الضيم حالها 

– شعملو بيها 

– شعملو .. ما تعرف الخشم من العين و الجدام مكسرة .. جا شيسوولها . 

صوبت كلبي ساعة الكالت هيج .. كمت افرك بوجهي و حاير شسوي ، سدت الباب و دشت و انا ظليت تايه بكاعي . 

رديت للمضيف بكلب حزنان .

لكيت ابوي و عمامي كالو : حضر روحك الكعدة ابكاع منعم .. و هو طباب خير بالسالفة و راح يحضرون الكل و الوجوه الخيرة تحكم بينا . 

– يمتى ؟ 

– باجر ان شالله ورا الغدا . 

– الله كريم .. 

– امش وياي هسه نروح للقصر نعرف ياهو الوصلك الرسالة .. امش 

رحنا للقصر و اخذنا البت .. كعدها ابوي و ينشدها : ياهو الطاج الكاغد ووصليتي لعمو . 

ما تجاوب، خذتها منه و انا اكللها : هاي الوريقة ياهو الطاها ليج . 

– تأشر و تكول … ذاك 

نعاين .. تأشر اعلى الباب، شالها ابوي و كادها رادها توصله الواحد ما وصلته .. 

حجه زناد : البت ما جاي تتضكر بويه 

– جا شلون كلي .. عيون لثجيل ابيتي و انا نايم . 

سرحان : اليوم وكت الجعدت وي ثجيل .. ساومني 

– اندار الشيخ … ساومانك شنهي 

– يكلي اعرفنك رايد بت حاكم ، اطني القصر و انا اطيك البت و افضحك عدوينك البقصر ابوك . 

– شلووون ولك . 

– انا رفضت المساوة لجن ساعة الردفني كال انا اعرف شتاكل و شتشرب بقصر ابوك .. يعني اله عين بقصرنا و توصله كل اخبارنا اول باول .. حتى الطارش كال وصلي علمه منكم ورديناه ، يعني يا بويه الجاي ينهش بلحمنا منا و بينا و ياكل و يشرب ويانا . 

كعد الشيخ جدامي محتار ، عاين اعلينا كلهم : غير يو اعرف ياهو الجاي يطعن بظهري ، الا و ضلع الزهرة ساعتها الا افصم ظهره و ظهر الخلفوه و اشوفنه الما شايفه بعمره . 

كمت انا و كتله بويه : كوم رايد اخصنك . 

مشيت و هو يعاين علي و الحيرة بعيونه و يرد يعاين للعايلة ، كام من مكانة و تبعني ، دشينا الديوان وصكيت الباب 

– شنهي الراي يسرحان ؟ 

– الراي بويه .. هد العواطف اعلى صفحة و خل العكل بمجانة .. 

– جا انا ابوك يا يوم ملت لعواطفي .. لجن حيرتي وياكم ما منها حيرة 

– انت عواطفك بس ويا الشيخة ملوك .. راح تهد اعليه و تكلي انجب و يمكنها اطول ايدك اعليه و ما تصدك .. لجن انا ما كايلك اتهمها ولا اكللك ابعدها .. انا جاي اكللك اختبرها . 

– اختبر حرمتي ولك 

– جا هي الحمة منين تجي غير من الرجلين ، كلش زين تعرف اخوها كاطع ردي و جربيته جثير و عرفته .. شدراك ما هو اليفتن اعليك .

– و شلون اختبرها ، خايب سرحان هاي الشيخة و ام ولدي ، شجاي تحجي . 

.- بويه انا اعرف انت تحبها لجن حتى اطمن كلبك و كلبي منها .. تختبرها. 

شختبرها ؟ 

– بعد الكعدة امس نحدد شنكللها .. يو وصلت الجلمة لال ثجيل .. منها و يو ما طلعت .. معناتها انا ظالمها 

تنهد : انا متاكد ضنونك موش بمحلها

– ياريت . 

– بس سولفلي اعلى مساومة ال ثجيل شنهي . 

(بيت حاكم ) 

كواغد : مشيت لهلي جبت هديوة بعبربانة ورديتها للبيت ، وكفت الباب صحت : خايب ستير يمه الحكني 

ركض ليه و عاوني اعلى شيلة هدوة من كون اجدامها مكسرة ما تكدر تكوم، دخلناها بحجرتي نوميتها ورديت الغطا اعليها. 

ستار : يمه هاي البت موش راضية تسكت، هدت حيلي . 

خذيتها منه و كمت اسكت بيها و امشي ، لجن البت متعودة اعلى صدر امها … كل حلها ٨ تشهر وتريد امها .. احتاريت بيها شطيها و تسكت . 

كمت جبتلها حليب هوش حميته و خففيته الها و اطيتها .. ما ترضى البت تبجي .. فكيت ثيابها وكمت اتفكد جسمها .. لكيت البت مطكوكه براسها و طالع منه دم شواي . 

كمت غسليت جرحها و بدليت الها .. اندكت الباب طلع سرحان .. حجيت وياه زفيته وراح .. رديت للبت اهود اعليها  .. كوة ليما فحطت نامت . .

اجت اعليه عمتي : خايبة كواغد تعاي ليه 

– ها عمه و العباس ما ظلي حيل من امس و انا راسي ما حاطته اعلى الوسادة من مصيبة لمصيبة اراكض . 

– ولج هاذ ابن حويكم ما جاي يسكت وما يرضى حليب امه و هاي كامت تبجي وياه . 

– جا ما ناكصني غير ايمان و بزريتها . 

نوميت البت يم راس هدوة و مشيت لبيت ايمان ، دشيت هاي شادة الراس و العين و المخطة سوا ، كتلها : خايبة شكللج .. مبارك يو اوغسل لهشوفه هاي ، شمالج تبجين 

– اريد انام و مدا يسكت ولا ديرضع . 

خذيت الفرخ ، كتلها : جا هم سموه يو لا 

– لا والله ايمان من جبتها و ليجاي تون .. و حويكم حطه و طلع .. 

عاينته حليو الله يستر اعليه : انا ذاك اليوم .. يوم الرحت لمدرسة جمارة و حجيت ويا المعلم .. جا تدرين شطلع اسمه 

– شسمه ؟ 

– مؤيد لجن شلون ولد مرتب الله يحفظه لهله .. و اذا ترضه المتيريسه اسمي مؤيد . 

ايمان : اخذي الج بس اريد اناممم 

وبجت 

– خايبة شتنتمين بس رضعي الولد 

– ما يقبل 

– جا هو يفتهم و ما يرضى ، غير تحاولين وياه ما يعرف يحط بحلكه . 

كامت تحاول وياها ليما خلت حلمتها بحلكه .. رضع و نام .. وردته للمهد اجت جمارة : يمه هدوة تبجي 

– جا انا ياهو الاسكتنه بيكم كلولي .. عمه ودي اعلى الخاتون اتزت ليمان وحيدة من بنات القصر تعاونها ، جا شنصير احنا . 

– جا شيخلصنا من حويكم يو كربينا القصر ، خلها انا هنا و انت غاد . 

– جا لا تودين اعليه بعد 

مشيت للبيت هدوة تريد تمش للحمام و تبجي كوميتها و اخذتها .. غسلت الها و رديتها و كامت تبجي و تون من رجليها ، لبست عباتي و رحت جبتلها من المضمد منوم و اجيت . 

شربتها حبايتين و حطت راسها تون : ليش هدوة يمه هيج ، ليمتها تظلين ما تسمعين جلمتي يمه . 

-يمه يعني راح يطوني لفلاح .. اجتل روحي لو خذاني والله . 

– جا رحمة يو خذاج ولج امس يتكاومون اعلى جتلتج و يصيحون نغسل عارنا . 

– يجتلوني ولا اخذنه .

– تكسرت اجدامج ووجيهج تخربطت اعلومه و بعده كلبج ما هده .. جا شسويله ويفك .. ولج يمه سرحان موش نصيبج . 

– الموت اهونلي من خلافه يمه . 

– جا موتي ياهو الكاضج 

ظلت تبجي : ولج يمه حطي عكلج براسج عمامج ما يرضون بسرحان . 

-ما اريدن غيره يمه . 

– من غمه التغمج مثل ما غمة حظج .. يم حظ الاعوج . 

كامت تون .. و انا حطيت راسي و نمتلي جم ساعة و كعدت زمينه بت ستير و ابتليت بيها .. 

حاكم : هلا يشيخ 

– هلا بيك حاكم تفضل 

– كالي حميد الشيخ رايدك .. و انا هم رايد احجي وياك . 

– كبل لا تحجي .. خل احاجيك .. 

– كول شيخ 

– بتك الله شاهد حسبة بنيتي .. وما ارضالها الشين مثل لما ما ارضى الشين البزري ، بتك يو ما جانت من ال ثجيل .. جان شفتني من الغبشة كبعيته و جبتها البيتي و سديت السالفة . 

– الغصد يشيخ . 

– الغصد سرحان ما يعرس اعليها ولونه اجاك .. اطرده ، سرحان يتصرف بعواطفه ورايد يلم السالفة جيفنها بتك و انت رفيجة ، لجن عواكب هالفعايل روح بتك وروح وليدي وال ثجيل ما امنهم . 

– يعني افهم من كلامك .. ما ترضى ابنك يستر اعلى بتي . 

– ابن عمها رايدها اطها ليه . 

– الفضحها وفضحني غصدك . 

– هاي بعد انت و اخوتك تحاسبو .. هم اخوتك 

– خلف الله عليك شيخنا و جثر الله خيرك ، ان جانت ما عدك جلمة ثانية انا اترخص . 

– شنهي سالفتك الاجيتني بيها 

– مالها الزوم بعد . 

– فعلتي هاي لمصلحة الكل . 

– الله يحميكم شيخ .

طلع من الشيخ و شاب نار بهدومة ، دش البيته و كال الها كواغد: هيج و هيج الصار 

– ونطي بتنا لفلاح ؟ 

– جا كليلي الحل شنهو ؟ 

– يا نار كلبي، جا اكضنها هالبت و ابتلي بيها .  شلون بيه كلي .. وين نوديها .. جا رب الفضحوها شلون احطنها عدهم و شلون راح يعاملونها يو خذوها .. يكومون و يكعدون يعايروها و يا عيشة تعيشها و ضرة بكترها . 

– بتج حطت نفسها بهالدرب 

– شسوت و حطت نفسها ، صكدت بت اخوك .. و راحت ضحية ملاعيبهم .. كلي انا شلون اخلص بتي منهم .. يو خذوها ما يرحمونها. 

كعدت تبجي و خاكم كاعد مدنج .. دايخ بزمانه ما يعرف شيعمل اعلى هالحال . 

ثاني يوم صارت الكعدة و حجت الناس الخيرة .. و اثترح الشيخ منعم يزوج سرحان من البت و يفضون السالفة لجن ناصر و ابنه كالو البت منهي اعليها و ما تنطي .. و احنا نريد فصل . 

كام مطر يحجي وياهم يحقق للناس الكبار سالفة الرسالة و كال الهم .. لجن محد صكد السالفة ، و اعتبروها دوسة كاع و اعليها فصل . 

بس حاكم كال الهم انا حققت ويا البت وفرزنت كلام مرت ستار ويا كلام اهلها و ما طلع متشابه و السالفة بفعل فاعل و اعليه انا زلمة ما اخذ فلوس حرام ولا احطنها ابيتي .. ومن كون اعرف الفصل باطل .. ما اريدنه . 

هو كال هيج وال ثجيل تسودنون .. وال مطر حطو افلوس الفرشة و ترخصوا .. و كبت العركة بين حاكم و اخوته وصلت الحد الطك و المفاشخ بيناتهم . 

سحب مطر ابنه و طلعوا … 

لجن ساعة المشة سرحان و طلب من حاكم يذب جرش و يتبرى من اخوته خاطر يلم سالفة الفضيحة و تنسد الحلوك ، خبره ان ابوك هيج و هيج كالي . 

وسرحان تسودن .. رد لأبوه و دش اعليه للمضيف 

– صحيح حاكم جايلك و انت راده 

– كتله البت ما ناخذها 

– الزلمة رايد يذب جرش 

– وان ذب جرش ، لجن ال ثجيل ما يجوزنون من عدنا ورايدين ازله اعلى ولدي خاطر يحطون الجيلة بكلوبكم و انا ما اطيهم الفرصة هاي لجل البت . 

-بويه شنهي سالفتك البت مفضوح .. وانا وياها .. هيج السمعة رخيصة عدك 

– موش رخيصة ، لجن البت ما تظل و ناصر مصر اعلى نهوتهوو راح ياخذها البت.  

– احز زردومه الياخذها غييييير .. بويه البت الجاي تحجي عنها  بت كلبي ، شلون يهلك راي و تجتلني بهالمصير . 

– عدك عايلتك و المرة حبلى جابل حرمتك و جوز من بت حاكم 

– انت جاي تحكم اعليه بالموت لو شنهي، انا علي يابو علي لكيت طريجة اخذنها بيها تمنعها ليش . 

– ال ثجيل ما راح يجوزنون منك يسرحاااان 

– ابعدنها . 

– ولا تبعدها 

– اتفك ويا ابوها واخليه يجلي من السماوة 

– البت ما تصيرلك سرحان 

– وما تصير لغيري بووووووويه 

– تصير ، البت لزوم تنرفع رايتها و يتبيض وجها خلاف الفضيحة الصارت.  ..

– انت جاي تذبحني 

– امش و انسى بت حاكم يسرحان . 

– شلون و انا ناسي روحي وافكر بيها ، لا يهنالي بال الشغل ولا ايدي تاخذ اعلى شي و البال مشدوه اعليه ، مشوهيييين وووووووجهه بويه مكسرييييين جدامها وانا السبب و اتكلي انسى شلوووون . 

– لا تعلي صوت يسرحان . 

– جا خوش .. دام هيج الحجي ، ذب بيه سند وانا طالع من العشيرة و خلني اتجازة ويا ال ثجيل . 

حجاها و جابه الشيخ بجف : يو عدت هالسالفة مرت الاخرى وعلي ما تلوم الا روحك . 

طلع سرحان من المضيف و عيونه غدن دم .. 

ما يعرف شيتصرف و شلون يرهمها .. و حاكم اطاه جلمته .. يو الشيخ ما رضى ابتي ما اطيها

داخ برايه و شلون يحصل اعليها و يمنع زواجها من فلاح .. و ظل الايام يحاول و يحاول و يحاول 

ويومية يعيد السالفة اعلى الشيخ و الشيخ بنفس جوابه . 

سرحان راضي الموت 

و هدوة راضية الموت 

و اثنينهم مفضلين يعرسون حتى لو جان الموت مصيرهم .. بس الشيخ جان حفظ ولده اهم من كلشي عده. و حاكم كل همه حفظ سمعته . 

لكل واحد فيهم حق من زاوية ما 

لكن اخبروني عن قصة للعاشقين لم يكن الفراق مصيرها. 

يا ترى هل تزوج عنتر بعبلة ؟

ام هل مجنون ليلى حظى بمن جن بها ؟

ام ان روميو و جولييت حظيا ببعضهما ؟ 

لو بحثت بكل قصص العشاق و العاشقين ستجد العادات و التقاليد هي سبب فراقهم و حزنهم و جنونهم.

فلا مناص لرجل ولا لأمرأة من هذه التقاليد 

ومن يخالف فالموت ما يستحق .

 …. 

بعد ما يسرى عافت بتها و راحت لهلها .. بيت حاكم تضرروا كلش بسبب الطفلة كون ايمان جايبة جديد ، و هدوة مريضة و رجليها مكسرة .. و الطفلة حولة و يحتاجلها عناية خاصة .. و هي بنت ٨ اشهر فقط . 

رغم ما الامور تضخمت بين حاكم و ناصر .. و الاثنين رافضين يسرى ترجع ، بس كواغد دخلت بالموضوع وراحت لبيت ناصر كحجي نسوان ورادت ترجعها لخاطر الطفلة 

بس يسرى رفضتها و كالت الها ( لا اريدكم ولا اريد بزريتكم ) و ام فلاح خشنت حجايتها ويا كواغد ، حلفت كواغد : يا يسرى شادة رايتي للعباس ان كون رديتج بعد يو اجيتج ، يو عسى الفرخة تنط و تموت ما اجيلج و اكلج بعازتج. 

ردت للبيت و كالت الستار : يسرى هيج تكلي و ما رايدة الرجعة . 

– جا خوش .. دامها هي البدتها انا الانهيها . 

– شتسوي ؟ 

– المرة الرايدة تكسرني و اتعبني بالبيت ، والله لكسرها بمرة 

– ياااع .. و شتسوي ولك 

– شنهي يمه النسوان گليلات و ادور يسرى ، امشينا نخطب بت خالي . 

– خايب استجن من دهر الدهرك هو احنا امدوهنين يا عرس يا زواج . 

– خالي اعرفنه لا يعز اعليه مرة ولا يتشرط بمهر .. و خوالي اهلي ازود منكم يو كتلهم معتاز يشيلون من ارواحهم و يطوني . 

ليما اجا حاكم و فتحت اعليه الموضوع كواغد و كالتله هيج و هيج السالفة .. 

كال الها : وعلي يفتهم ، جا شنهي عود تريد تدوهنه بالبت ، خل يحطله مرة اداريج و اداري بته . 

– جا هي المرة هيج .. ما ينراد الها صرف 

– خير من الله عدنا .. كاع نزرع وناكل منها و كهوة نسترزق منها و المعمل اشتغل بيه جا بعد شنعتاز .. تاكل تكلتنا و تشرب شربتنه و انا من زمان مفكرله ، شنهي ذنبه هالولد هاذ وياخذ بت هاكبرها .. ياخذله زغيرة و بحله اخيرله . 

– خايب انت و ابنك ما تفكرون غير بالعرس و النسوان ، جا وكتها يعرس . 

– ليما تطيب هدوة نفض شغلتها .. هساع خلنا نكسر خشم بت نويصر و نعرس لستار و نفضها . 

ما كال باطل حاكم .. طر العصر كض ابنك و امش لبيت صلاح اخو كواغد .. رحب بيهم و ضيفهم بالهلا و جثير الهله . 

كاله حاكم : والله خوية احنا جايين و طالبينك 

– تاخذون عيوني ، كول ابو ستار 

– انت تعرف يسرى مرت ستير اجت غصب عنه و هساع هدته و عايفتله بت حولة  و ضال الولد بلا مرة ، و هو شارني و كالي بويه انا رايدلي بنية من بنات خالي صلاح . 

صلاح : اها ستار عزيز ابوي الله يرحمه جنه نسمي عوجية الحجي كثر ما مرافك ابوي و بار بيه ازود من عدنا احنا ولده ، ويو رديت ستير وعلي ابوي بكبره يغضب اعليه ، صكد جذب ابو ستار بنياتي بنياتك .. كبع و اخذ بلا مهر . 

– لا ان شالله مهرها واصل . 

– مهرها كتاب الله و شارينكم يبو ستار 

– و النعم منك والله ، انا موش اجربكم من كون من كبل خذيت من عدكم مرة و صرتولي ظهر و اتنومس بيكم و الله شاهد انتم اهلي ولو انا من اعصب ويا كواغد اجيبنكم واحد واحد .. بس ابروني الذمه بيناتنا العباس 

ضحك و كاله : مبري ابو ستار جا ياهو البينا ساعة الشر ما يسب و يهذري ، لجن احنا ناخذ ساعة الخيورية و انت موش جدامك .. اعتبرنك اخوي الثامن الله شاهد 

– و النعم منك ، اعلى راسي . 

كاموا و هو يكله يومين و نجي ناخذ البت … 

رد  زستار كاله : بويه انا رايد اشتري غرفة اخشاب ونيشان للبت دام خالي كرمنا . 

حاكم : يجرالك بويه يجرالك . 

اخذ ابنه و راح لملم العده و الما عده و اداين اعليهن و اشترى لابنه غرفة اخشاب. .. و كواغد راحت لوحدة دلاله بالسلف و خذت منها هدمات و ازواكات لبت اخوها نيشان هالتكدر علي .. وودتهن لبيت اخوها . 

حفولها و رتبوها وما سوو حفلة من كون شمخي ما مرت اعلى وفاته غير سنه و الكلوب موش طويبة . 

خلو البنيات يصفكن بيناتهن و العصرية خذوا البت وزفوها لبيت حاكم . 

يسرى و درت ستار عرس ، و بت عمرها ١٥ سنة و اسمها ( لاله )

عرست اعلى اهلها .. الا هسه تردوني الرجلي 

– جا موش انت الما ردتي .

– لا انا اريدنه بس جنت زعلانه اعليه جيف طكني، لجن هساع اريدن ارد . 

جابوها ردوها .. الا الليلة تردوني 

و صبحية عرس ستار دفعت الباب و دشت اعلى بيت حاكم و تصيح : ستووووري ، وينك عيوني ستوري . 

طلعت الها لاله : ياهي انت 

– انا الياهي لو انت 

– انا جنة هاذ البيت 

.- من كونج انت لاله 

– اي انه و شرايدة ؟ 

– رايدة اطكنج يالخببببببببببگة

وتكاضضن بنص الحوش هاي اطك و ذيج تردم ..

طلعت كوةغد : يااااع خايبات شمالجن .. فكن ولجن .. خايب ستير تعال لييييييه 

ستار مر منهن عاين عليهن و كال الها : يمه انا رايح للكهوة . 

– خايب وين تروح تعال وعاوني 

– يمه عينج اعلى لاله من كونها عروس جديدة . 

كواغد : خايب فلك طرك … ولجن هددددن 

و جمارة كربت و بيدها عودة ، و طكي يسرى اعلى راسها .. و كامت ليها و عضتها من رجلها و هاي دفعتها و طاحت اعليها لاله اتملخ براسها .

كواغد تجر 

ليما اجا حاكم .. وجر يسرى من عدهن و كل وحدة شعفتها هاكداتها .. 

حاكم : شعدج جاية بويه 

– بيتي و حجرتي ، هسه تطلع منه 

– لا بويه موش حجرتج ، و هساع تردين لاهلج ، كافي اعلينا دكتج انت و اهلج بهديوة شرايدة من عدنا بعد 

– عمي انا غلطانة ورايدة بنيتي عميييي 

– كواغد اطيها بتها و خلها اروح 

– تطردني عمي . 

– محد طاردج لجن دام غلطتي بحكنا و فوك سوايتج طلعتي من البيت و تفشرين اعلينا ، كضي روحج و اكعدي عد اهلج و هدي وليدي يتهنى بمريته 

كعدت بالكاع و كامت تبجي و تنوح و لاله تكلها : جا هن الحياية شعدهن غير الدموع 

سمعت يسرى و نكزت : انا الحية 

رادت تكب اعليها ، كضها حاكم .. و طلع بيها و كال الها : امشي اوصلج لهلج . 

خذها و الدرب كله تبجي .. وصلها ليغاد و ما دش بيت ناصر ، وكف : شنعي ترد بتي يحاكم 

– بتكم هي الاختارت الطلعة وساعة الاجتها كواغد كالت ما تريدنا و اجت التاخذ مجانها و هساع كالها مجان ابيتي عكب سواياتكم . 

– يعني الافهمنه .. رايدين الطلاك . 

– حاشى احجي بالطلاك ، لا اله ولا رسوله يضون بهجمان البيوت ، لجن الجلمة عد ستار يو راد يردها بيتي يتعذرها ، عدي بيت كديم .. تفتحه و تكعد بيه اذا رضا زلمتها و ان ما رضى الامر راجعله.  

– جا خوش . 

عافهم و رد .. 

للظهر اجا ستار : بويه انا الكهوة بعد ما اريدنها و بس هاذ الشهر و سد الحساب وي حجي نوري . 

– عليش ؟ 

– كن ساعة الفتحت و لهساع و الوادم تنشدني اعلى سالفة اختي ما ظلي وجه اعاين الوادم بيه . 

حاكم : جا شتكول علي انا يبوي ، الوادم كلت وجهي .. لجن شسوي ، البت مكسرة رجليها المن اطيها . 

– اطها لفلاح و خلصنا ، والا ما بعد احمل جلمة الوادم متت . 

كواغد : خلونا نجلي من السماوة ، لجن بتي ما اطيها لفلاح . 

حاكم : ونهد بيوتنا و كاعنا و نتهجول ؟ شناكل شنشتغل و كولي جلينا … تاليها شنهي يكواغد ؟ 

البت منهي اعليها يو اهدناها العمر كله بلا عرس ، يو غصب تاخذ ابن عمها  .. البت اولها و تاليها معرسة 

– و تسخى ابتك يحاكم 

– انا موش ساخي لجن مالي غيرها ، منين ما تجيبينها ما تفج  الشيخ كاله نيه يرضى .. و ستار ماخذ يسرى وعدها منها بت حولة .. ما ينفع .. خل البت تقنع بقسمتها و تمش. لحال سبيلها و خلنا نطلع بطولنا جدام الوادم ترانا اتأذينا كلش . 

و استقر رايهم .. ينطون هدوة لفلاح لجن ناطرين توكف اعلى رجليها و تكوم خاطر يكلولها . 

مر شهر .. 

سرحان ما خله طريقة الا و حاول يوصل لهدوة و ما كدر من كونها مكرمة ..وما تكدر تطلع. . و هو ميت اعلى شوفتها و ما ظلت طريقة و ما حاول بيها خاطر الشيخ يرضى زواجهم . 

بهالفترة و بيوم  ٢/٩/١٩٧٨ 

طلكت مرت سرحان … هو جان بالمعل ووصله الخبر مرتك تطلك .. هد البيده وركض .. دش للقصر الشيخ واكفه .. حجه سرحان : ها بويه بشر ؟ 

– بعدها جوا .. تاطرين 

كريم : جا هلبت تجيبلك خلفه و تنسيك البالك . 

– والله يا كريم يو الف بت وولد بغير الهواها كلبي ما يروى . 

الشيخ : كلبي ارده اكصه بموس واچوي مچانه يدليني اعلى الدروب الكلهن مهانة … جا هو طيح حظك غير كلبك يا بويه . 

– خلف الله اعليك بويه . 

صبيحة : البشارة يشيخ 

– ابشري يم ادريس 

– اجالك حفيد جنه الكمر 

– اللهم صل على محمد و ال محمد 

ضحك سرحان بفرح .. و صبيحة لفت الولد و جابته .. اطته بيد الشيخ كال الها ؛ لا خل ابوه يكضه 

شاله سرحان و يعاين بيه بفرحة ، باسه بكصته و كاله : من كونه حظك يبوي يطلع اوجه من حظ ابوك و ما يطيح كلبك مثل ما طاح كلبه . 

الشيخ : امين امين ، اهم شي ما يطيح كلبه هههههه ، شو خل اعاينه ، اللهم صل على محمد وال محمد ، عين الله تحرسه ان شالله .. 

رفع راسه لسرحان : شتسمي ؟ 

– لا حاشى بويه ، انت سميه 

– اسمي مأمون ..

الله اكبر الله اشهد ان لا اله الا الله …..

اسمك مأمون اسمك مأمون 

صرخ الطفل و بجى .. ضحك سرحان و راد يتناوشه ، حجه كريم : جا عرفنه وليدنك لجن هد خل نعاينه 

– ههههههههه يله شوف 

شاله كريم : اووو هاذ مبين سرسري .. 

الشيخ : طالع على عمه ، دجيب جيب لا ينعدي منك السرسرة . 

شاله سرحان و ترخص يدش اليسرى و دخل .. نزل حب راسها و كاللها : يجعله من اولاد السلامه و ذخر الي والج . 

ما حجت هي من كونها تعبانه . 

واجا مأمون للدنيا . 

هدية : لهاليوم و ابوي ما حاط عيونه بعيني من بعد الصار وياي .. شهر مريت بيه اعجز شلون اوصفنه ، اجدامي اثنينهن مكسرات و اتنخى الرايح و الراد خاطر يكومني لو يكضيلي حاجة . 

ليما خذاني ابوي خاطر يفتحلي الچبس مالت جدمي .. طول الدرب و هو ما حجه وياي ولا حجاية لجن بالي انشده بسرحان و انا اعاين الدرب ، هنا مرينا و هنا شفته و هنا حجينا .. صارت عيوني تبجي شوك لشوفته . 

وصلت للمضمد و عيوني ما بطلن دمع ، ساعة الشافني ابوي ابجي كال : حسي ادموعج ياله خلنا ندش .. 

دشيت و فتحلي المضمد رجلي .. و حاولت امشي لجن رجلي جانت راخية ما اكدر اوكف اعليها ، سندني ابوي خاطر امشي .. اليسرى زينه ما توجعني .. لجن اليمنه اعرج منها . 

حجه المضمد : البت يلزمها عمليه .. والا تظل عرجه . 

ابوي ضل يعاين و يذب حسرات .. انا ساعة العاينيت رجلي كمت ابجي .. خذاني ابوي و ردني للبيت ، بالدرب حجه وياي : اغلاطج هاي درس الج يبويه، ما تنعاد .. ويو ياهو الجاج و كالج ما تاخذين الجلمة غير من امج .. لا تخدعج فلانه ولا تجرج علانه و تالي كلهن بخير و انت هاذ حالج . 

كامت تجري ادموعي ، ردفني : حسي ادموعج و اتحضري .

– المن ؟ 

– الخميس الجاي عرسج 

اندرت ليه و عيوني تنشد لياهو … هو فهم عيوني و كالي : ابن عمج رايدج و انت لازم تلمين اافضيحة عني و عن اخوج و ترضين . 

حطيت اديه اعلى خلكي و كامت عيوني تكت و اشهك بقوة، هو ما نشدني لجن هيسيته ، راد يبجي ، وصلني باب البيت و فتح الباب .. دشيت سده وراي ومشا 

كعدت بالباب اصرخ و ابجي : ولج يممممممممه ، ولج يمه 

ركضت الها كواغد و حبوبتها : هااااا ، شمالج 

– يمه ما اريد اعرس ، ادخليكم يمه . 

كواغد : جا شنهو البيدي يمه . 

– يمه اغديلج فدوة ما اريدنه . 

– جا ساعة الحجيت و الوصيت ما رديتي ، هساع وكت البوج و اخوج روسهم بالكاع تكليلي ما اريد ، الامر لا بيدي ولا بيدج يبنيتي ، ابوج نطى جلمه و الخميس زفتج . 

– لا يمه دخيلكم ، يمه احبن اديكم ، انا عار اجتلوني ولا تزفوني يمممممه . 

حضنتها كواغد تبجي و حبوبتها كعدت كبالها و كضت ايدها و تبجي وياها و تصبر اعليها .. و لاله و جمارة واكفات يبجن 

هدوة : دخلني جوا .. بجيت ليما خويت .. توسلت بيهم يهال الرحم هدوني .. خايبن جتلوني ولا تطوني ، ولا وحيد بيهم رد علي و طيب افادي . 

وساعة الكالتلي جمارة سمعت من ايمان صار عده ولد .. فرفح كلبي وما عرفت الهزا شلون طعمه

يا ذيج الليلة الما نمتها و لا غفتلي عين و ساعة الطر الفجر ، كمت من مچيني ، غافليت هلي و طلعيت من البيت ، مشيت و ادموعي هماله . 

وصلت للشط الضوه مامش .. كمت اعتب الميات 

ها يشط وين الوعود

وين الكال ما اهد ايدج يهدوة 

وين ذاك الغنا و الشوك 

طلع العشك جذابي و دموعي مالهن حوبه و الساعة نايم وي مريته و هادني .. اااااخ ربي ساعدني دخيلتك انا . 

بجيت لما نشفن ادموعي و ما كام الدمع يهمل .

جا هي المصيبة ادموعك تمل منك و احزانك مرافكتك ولا تمل ، و الدنيا شدة ويانا شدة ليل بشتا شما ننطر ضواه يطول . 

كاعدة و هيسيت حس احصان طربك من ابعيد ، فز كلبي و كمت من مجاني ، عاينيته اجه .. وهو ساعة الشافني فز من حصانه و ركض ليه 

كال : هدوة 

وجرن دموعه 

– اي انا هدوة الما وفيت وياها يسرحان 

– ولوني مو وفاي عليش جاي فجريه للشط ، و علي ما رحتي من البال لحظة 

– الخميس عرسي يسرحان 

كضني ووكف : كولي جذب يهدوة 

– مرتك خلفت الولد منك ، وانا ما خلفيت منك غير القهر و المر . 

ظل ساكت و دموعه تجري جدامي : انطك و كلي .. انا اموتن لو صرت لغيرك .. احجي وياي يسرحان . 

– ما ظلت غيرها ؟ 

– شنهي ؟ 

– انهبنج ….