رواية كحل عرب الحلقة الثامنة والأربعون 48 للكاتبة زينب ماجد

اختل بحسنك وافج گلبي واطلعك

تلعب بعمري !! 

واخاف الغيري يندلك واضمك

(عريان السيد خلف)

راديون : سحبني ليه .. و انا ابعده عني و اجر بروحي ، بعد راسه و همس : جاي اغصبنج ؟ 

– لا 

– ابتعد ؟ 

سكتت ، رد هو ليه و ضمني باكتاره .. 

جنت اتمنى منها و اتبرى من البلية الطحت بيها بلا ذنب ، جنت اتمنى تتبيض رايتي و يصير اليتمناه ، بس نفس الشي وكلشي ما حصل . 

تمدد احذاي اعلى نفس الجودلية ، و انا ساكته ، اخذ نفس حيل و رفع نفسه ، سحب ايده و شال راسي و حط ايده حدري و ضمني ليه .. هيس انا جامدة .. نشدني : 

– شمالج ؟ 

– ما راح تنشدني مرت الاخرى عليش ما طلع دم ؟

– جا هاي موش ليلتنا الاولى خاطر انشد!

– و بليلتنا الاولى ما طلع 

– انسي هالموضوع ما رايد افكر بيه . 

– بس انشد عليش مامش ببياضي دم ؟ 

– ما اعرف . 

– الما عرف هاي شك يو … 

– انهي الموضوع كلتلج و اطوي ، و اعتبري ليلتنا الاولى تم بيها كلشي و انتهينا . 

– بس ما تم ، و يمكن هالامر راح يظل ابالك كلما طرى هالموضوع جدامك و راح تنشد نفسك . 

– ما راح انشد نفسي و كلتلج راح اعتبر هالموضوع ما صار و كلشي تم بذيج الليلة ، انا زلمة اصلي و اصوم و عادة الله يختبر عبادة و يحطهم بمواقف صعبة خاطر يشوف ايمانهم حقيقي يو من اول موقف يتزعزع ايمانهم و طغوا وما صبروا … وانا ما رايد اتفشل لا جدام ربي ولا جدامج ، ما اعرف شنهو الحكمة من الصار لجن انا ما عدي غير اسلم امري لله . 

لجن خلي هالموضوع بيناتنا ما اريدن احد يعرف بيه ، ان عادو ونشدوج و اردو يسحبون السانج .. ديري بالج تنطكين بجلمة ، تراهم يعرفون بالامر ورايدين بس يتحققون ، وجلمة وحدة منج تنطبع هالجلمة بسمعتج .. و بسمعتي انا من كون تعديت هالامر وما وكفت عنده اللي لزوم بعاداتنا ، يو اغسل عاري بيدي ، يو اردنج لهلج يغسلون عارهم .. فلا تطيهم اليردونه يو شما حجو وياج بهداي و برهدنه .. 

بالبيت هاذ ، اذنج تفتحينها وعكلج تشغلينه، و السانج تصمينه ياله تعيشين .. 

هم اهلي لجن نصيحتي الج و احنا هاي اول ليلة نعتبرها … لا تأمنين لواحد منهم .. لا اخت ولا اخ ولا مرت اخ ولاواب ولا مرت ابو .. بالجاهل لا تأمنين . 

البيت هاذ وكر ذيب و كل التشوفينهم ذيابة ، واليعيش ويا الذياب لزوم يعرف يسايرها ويجاريها ، والا يروح ضحية حدر انيابها . 

عدنا الجنة مالها راي .. ولا ينسمع منها جلمة ، وشغلتها خدمة العيال و الرجال و الجهال ، انا ما رايد اخوفنج من اول يوم لجن ما اريدج تغلطين و تتوهدنين وياهم . 

-انا احسن اصعب واحد بهالبيت ابوك 

– و هو هجي .. صعب و اصعب مما تظنين ، لجن يظل اب ومالنا جلمة فوكة . 

-لا تشيل هم .. وان جنت بت خير و ابيت ابوي شيخة و خدم و حشم ، لجن اعرف الاصول وصدورنا تسع ضيم الايام . 

– اصيلة . 

حباني بكصتي و رد راسه للوسادة و هو لافني بيده ليه ، حجه : نكوم للقريوله يو نخليها الكرامة تستراح.  

ضحكت ردت اكومن ، حجه : ردي ردي ما بياش حيل اكومن ، عودين للصبح نلفيها . 

….. 

( قصر ال ضاحي ) 

بشرى : سرحان سرحان 

فز من نومته : ها ، شمالج 

– كوم مرت كريم جاي تطلك 

– اها  وهسه وينها 

– وينها ابيتها بكفا القصر 

كام مهرف اعلى حيله و هو يصيح : عفية هالسلف ما ينام بلا حدث يروى . 

مشيت جريت الدشداشة البسنها خاطر اطلع و انشدها : طرى الفجر يو بعده ؟ 

– يا فجر توى الليل چلچل ، حطيت راسي و نعله امك  تنهدني 

فكيت باب الكنتور ، اعلى حس الباب فز مأمون كام يبجي ، تدنتله بشرى تهود اعليه : تروحين يو بس امي تروح وياها ؟ 

– شروح بطني واصلة لييي خشمي و ابني منا ياهو يضل وياه . 

-جا ظلي انا راح اودي اعلى ام سالم تجي ويا امي . 

– ما يعتاز هي ولادة جا راح يجيبنها . 

فكيت الباب و طلعت و هي تهود اعلى مأمون خاطر يرد.ينام ، دكيت الباب ودشيت بيت كريم و امي كاضة بيد دينار، لجن الحجاب طايح اعلى راسها ونص شعرها مفرع ، ظليت موجف بمچاني و انا اصيحن : ها يمة ؟ 

– ها يبعد امك هاي مكرودة الطفل نازل و تون انا اكولن يو ناخذها للجدة . 

– ياله حطي عباتها اعلى راسها على ما احول السيارة . 

– اي 

مشيت للسيارة و انا اوصي الحارس من كون القصر ما ظل بيه غير مرتي و ابني ، حولت السيارة غادي عن البيت من كون البستان بيه نزله عن الشارع ، و البيت وجهه اعلى البستلن بكفا القصر . 

اجت امي صعدينا المرة و مشيت بيهن للجدة ، نزلت وانا ظليت جويعد بالسيارة ، ردت ليه امي و كالت : رد يمه الجدة تكول سالفتها مطوله لوجه الصبح ياله تولد . 

– ترد يو تضل 

– دينار تكول ما بياش حيل اردن و اجي مرت الاخرى راح اظلن وياها اماشيها هلبت  الله و ابو الحسن علي تسهل و تولد للصبح . 

– جا انا اردن ليما تطر الشمس اردن ليجاي . 

عفتهن ورديت للقصر ، توسديت الديوان ونمت اعلى وجهي .. اخافن لا ادش حجرتي و انام بفراشي وتحلالي النومه و اتاخر عنهن . 

للصبح لكيت بشرى مغطيتني بجرجف ، فزيت اعلى ايد مأمون و هو يلعب بشواربي، فكيت عني و شلت راسي : ها بويه . 

– دادا 

حبيت راسه وجريته بحضني ، دشت بشرى : جا شو عفتهن و اجيت 

– للصبح تولد ، شكثر الساعة هسه ؟ 

– بالسبعة الا ربع ، تريك و امش فرد دور . 

….. 

راديون : شلت راسي جسام موش بالفراش ، عاينت بالحجرة و انا اسمع اصريخ الجهال برا ، توني جاي اكوم ، دش جسام : ها اصباح الخير 

-اصباح النور ، من يمتى اكعدت ؟ 

– من الفجر تعليت و صليت ، طارت النومة من عيني و ظليت كاعد . 

– اهلك كاعدين ؟.

– اي كلهم كاعدين ، بس توهم 

كمت الملم بالفراش و هو كاعد اعلى كتر ، حطيت الشيل اعلى راسي ولفيته ، حجه : اااا رويدا 

ابتسمت و درت ليه : ها 

 – انا مشتري طشت و سطل ، تلكيهن عد الشباج مالت المخزن ، جيبيهن و اسبحي بحجرتج لا تسبحين برا . 

– عليش ؟ 

– احسن 

– جا ما راح اجيبن الماي بسطل جدامهم ؟ 

– الصوندا مشكله بالبوري ، جريها و دخليها من الشباج ، ترسي و يو كمليتي طري الماي من الشباج . 

– شني ما تكلي عاملين مصيبة يو مواكعين بزنا . 

– احسن ، سوي مثل ما اكلج . 

ظليت اهزن بيدي، طلعت من الحجرة ، صبحيت اعليهم و سلطان كاعد بنص البيت ، و احط اديه اعلى عكازته ما صبح عليه ولا رد  ، خزرتني مرت ابوهم : دنجي و حبي ايد عمج وراسه ياله . 

كربيت خذيت ايده و حبيتها و حبيت راسه اعلى الساكت ، حجت : شنهي السانج مكصوص ما تعرفين تكلياه الله يطول بعمرك عمي . 

سلطان : صبحج الله بالخير .

– الله يحفظك عمي . 

اشرلي اروحن ، مشيت برا شلت الطشت و السطل ، دشيت بيهن ، سلطان حاط السكملي و كاعد ونجمة كاعدة بالكاع و الوسادة بحظنها ، حجت : وين رايده بيهن ؟ 

– مالتمن ؟ 

حجت مرت جاسم : جسام اشتراهن اول عرسه و حطهن بالمخزن 

نجمة : وان جانن مالت جسام جا تحطهن بحجرتها ؟ 

– من امس وصاني اعليهن وكالي الجهال يلعبون بيهن و اهو يستنجس من عبنه يصلي . 

– اجفي ياله .. عذرها حدر السانها بت ضويحي . 

مشيت عنها و انا انشد روحي : بالله هسه هي ياهي مالتها الدخليتهن بحجرتي يو طلعيتهن ، شلها غرض ؟ 

دخليتهن و جسام كاعد فاتح كتاب و يقرأ، تنوعلي ساعة الدخلت ، حجه : خليهن و امشي ناوشيني الصوندة من الشباج من ينترس السطل اكلي اطفي . 

– ان شاءالله ، طلعت ليبرا وصليته بالصوندة ، ظليت مناطرة ليما اشرلي .. صكيت البوري ورديت للحجرة : اي و هسه ؟ 

– الماي جدامج اسبحي 

– جا كبالك ؟ 

– اذكرنج بامس يو نسيتي شصار ؟ 

فكيت عيوني حيل : ياااااع جا غير الضوا مطفي وذاك ليل ، لا تحج هيج شمالك . 

ضحك ضحكة مسموعه و سد الكتاب و كال : اتغشمر وياج ، انا راح اطلع غاد اكعد و انت سركي الباب و اسبحي اعلى راحتج . 

– جا خوش 

– بس اكلج 

– اي 

– هاذ الكتاب اريدنج تضمينه ، لاي واحد ما تكليله عدنا هيج كتاب

– انا ما اعرف اقرأ

– صكد ؟ 

– اي والله

– تريدين اعلمنج ؟ 

– جا الواه .. بودي اتعلم 

– سهله من افضى اجيبن طباشير و لوح و اعلمنج ، بس هسه هاذ الكتاب تضمينة ضمة كون ما يشوفها احد ، ابوي كون ما يعرف عدي هيج كتاب . 

– خوفتني شني هاذ الكتاب 

– كتاب ديني والحكومة منعت هالكتب و اليلاكوهن عده ينهدم بيته اعلى عايلته . 

– يمه اسم الله الستار ، جا عليش موهدن روحك و جايبة . 

– جا شلون نعرف دينه اذا ما نقرا عنه ، يو بس الصلاة و السلام ؟ 

– جا موش تكول ممنوعة ؟ 

– انت ضمي ولا تكليل لأي احد كأن من يكون .. عدنا كتاب ..خوش ؟

– جا خوش .

طلع من الحجرة و انا صكيت الباب كعدت بوسط الطشت وتعليت اعلى راحتي ولبست اهدومي ومشطيت ولفيت الشيل ، وذبيت الماي من الشباج ، وطلعت ، جسام كاعد ، تبسملي ساعة الفتت ، تبسميت و مشيت للمطبخ مالهم . 

وكفت هن كلهن يشتغلن و نجمة واكفة و تامر بيهن ، حجت : يساعة الماركة ساعة الطلعيتي من حجرتج يالمسعدة ، تامرين بشي يعيوني ؟ تردينه نخدمج و نجيبلج الأجل لييي عدج . 

– لا اشتغل حالي من حالجن ما عدي كل مانع 

– لا خاف تصير زحمة اعليج يبت ضويحي . 

– جدي شجابه بالنص الزلمة ميت وما يصير ينجاب بالطاري .

– تعاي علميني شلوووون احجي 

سكتت عنها وظليت موجفه و هي تسب بجدي، ليما طلعت من المطبخ كله وراحت تشكي لسلطان اعليه و تحجي يمه ، وكفت مرت سلطان الثانية (ذهب) حجت : جا راح تظلين موجفه ؟ مدي ايدج و عاونيهن 

– بيش اعونهن ، دلني 

شالت راسها سنية مرت نعمة : تعرفين تركبين يو لاله ؟ 

– انا عد اهلي ما مشتغله من كون القصر خداماته جثيرات و من مات ابوي و طشوا الخدم نسوان اخوتي ما قصرن .. بس اتعلم وياجن

– التركيب موش مالت تعلم ، عمنا سلطان يو نحط جدامه الأجل و بيه عيب نبتلي اعلى ارواحنه ، انت ظلي ويا مرت جاسم اعلى تنظيف البيت خوش . 

– خوش 

– وهسه اطلعي من المطبخ ووسعي المچان هالتشوفينة ما يكفي . 

طلعت من المطبخ رحت لمرت جاسم : الشغل شلونه ؟ 

– الديوان و الحوش اعليج ، يمتى ما طلع الخطار ادشيت للديوان تكشين الكاع و المنفضات تغسلينهن و الوسادات تعدلينهن و تحطين البخور ، والحوش ورى كل طلعت خطار تغسلينه بالمكناسة و تردين تحسينه بالوصله زين خاطر ينشف و يلمع ، و عليج صحون الريوك و العشا تموصينهن ، خوووش ؟ 

– خوش ، من يا وكت ابدي . 

– خلصي الديوان هسه اعلى ما يصير الريوك ، خاطر يظل عدج بس الحوش و الصحون . 

– جا خوش . 

دشيت للديوان انظف و اسمع صياح سلطان جوا ، وهو يرزل ابنه ، طلعت من الديوان خاطر اعرف عليش تكاومو .. تكربيت و سلطان يصيح : شيلتها منداية انت ما تستحي اعل روحك يومية جاطل حرمتك ومواكعها ، حيا ما براسك شيلتها منداية و تفوت من جدام ابوك .

– بويه وعلي مامش شي لجن حر و سبحت و انا موصيها الصبح …….. صرخ بيه 

– لا تجءب اعلي ولك ، انا سلطاااااان ، من اكللك مامس يعني مامش افتهمممممت . 

اشرت لمرت جاسم تكرب ، اجت عدي : عليش يصيح 

– سلطان ما يرضى الولدة اكثر من مرة يجامعون نسوانهم بالاسبوع . 

– ياااع جا هو ياهو مالته. 

– جلمة ياهو مالته ماتمشي عد سلطان ، ناكل و نشرب و انام وكت ما يسمحلنا اهو .. و اليغلط محد يخلصه من اديه . 

– تحجين صكد يو تشاقين ؟

– كاعدة وياج كبل و اشاقيج لجن هاي عاداتنا بهالبيت ، كلشي يأمر بيه سلطان نمشي بيه . 

– يعني هسه انت و جاسم شلون ؟ 

– خايبة دية شتحجين ، انا عدي سبع فرووخ و بحجرة وحدة ، السنة للسنة ياله واحدنا يسلم اعلى الاخر . 

– وما تعزلون ؟ 

– يااااع شمفاولة علي، شنهي تريديني اطلك . 

– تطلكين عليش ، يعزل بيج عليش ظالين هيج ؟ 

– المرة تحجي بطاري العزال تلكا ارويحتها عد اهلها و مطلكه بالثلاث و جهال ما الها ، كلهم يظلون ابيت جدهم . 

– هو مرتاح الهالسالفة خاطر يطلكج يو حجيتي بالعزال ؟ 

– جا اعلى كيفه يرتاح يو ما يرتاح ، غير الراي لجبيرنا 

– شني هالجبير هاذ الله و هو اكبر من كل جبير ما خانك الوادم هيج . 

– جا نسيتي هو شيخنا ومامش زلمة يوجف بوجه شيخنا ويحجي، نصيحة دية اشتغلي و انت ساكتة تراه الحجي يكلف اركاب ، امشي دية . 

مشيت انظف بالديوان و بالي مشدوه .. ذولة شلون عايشين ؟ 

صار الريوك و نصبنا السفرة لسطان وولده ، واحنا النسوان و الجهال بالمطبخ ، تكفكفنا وحدة بحضن الاخرى والكيما حطيناها وكمنا لشغلنا ، انا اغسل بالحوش و اسمع سلطان و اوامره اعلى ولدة ، العرفته اليوم عدهم كعدة بالديوان و بيت عمهم ناصر يجون عدهم .

جاي اذبن بالماي و اغسل … مر سلطان بعوجيته يمشي و محدب ظهره ، حجه : يواشج بالماي يبت مطير ، اعلى مايج هاذ يومية تارسة الخزان و مفرغينه من حدر راسج . 

حجاها و مر للديوان ، مروا ولده ومشوا للديوان ، وكف جسام : رويدا 

اندرت ليه : انا ما اعرف شيكصد 

– الماي النصرفه بغسل و تشطيف يروح للخزان ويمتلي و لازم نجيب سيارة تشفط الماي ، جا عد اهلج مامش خزان ؟ 

– لا هكو لجن ما افكر ينترس يو لا ، و اساسا انا ما اشتغل خاطر افكر بهالامور ولا حاطتها اعلى بالي .

-يواشج بهداي ، رشي الماي و كشي بمكناستج وردي بالوصلة نشفي .. شواي شواي تتعودين اعلى الطباع . 

سديت البوري ورديت حطيت الوصلة و دنجيت امسح ، صاح : هيّ هيّ جا ربحنا 

– شمالك ؟ 

– ولج الله الاحد اخوتي يو طلعو و انت مدنجة هيج انا شعمل بحالي.  

– جا شلون امسح وعلي ابتليت . 

– ههههههههه كعدي بويه و امسحي بهداي ، ماحد يراكض وراج . 

– جا انا باعتبار عروس مامش رخصة اجازة . 

– هي هي .. من هسه ادورين اجايز بزر الحلقوم .

ضحكت و ظليت امسح و هو واكف اعلى راسي : جا هسه انا شجابني لهالضيم موش جويعدة عد اهلي وراكدة بحجرتي و يوصلون الاريدنه لي جدامي ، شجاني وعفت اهلي . 

عاينت اعليه واكف ويعاين اعلية : اكلك انت ما عدك شغل ؟ 

– شغلي تجارة الاثنين و الخميس اطلع محافظات . 

– تبات ؟ 

– حسب ، اللحكت اردن ، ارد و الما لحكت ابات . 

كمليت شغلي وانا اسولف وياه وهو واكف احذاي.  

…….. 

هدية : من امس و ليجاي وانا اهيس بنيتي موش اعلى مرامها ، البت تزوع هواي  ومالها خلك ، هنوب اخافن اظلن عد ايمان خاف لا يجون عيالي و يشوفوني ما موجودة و يشكون ، ظاله كل ساعتين امشي ليها ارضعنها و اردن لبيت ابوي بسكوت . 

دشيت البيت و امي توها جاية من الكاع امددة رجليها و تون من اركبها ، كعدت : اكلج يمه 

– هاا 

– انا اخافن لا البت بيها شي 

– لا توهوسين ، ما بيها شي 

– لا يمه وعلي موش وهواس لجن اهيسنها موش اعلى مرامها ، تزوع هواي و مالها خلك ، وتهيسنها مالومة.  

– خافنها من الحليب مالت الهوش الطوه الها و سرحان جابلها قواطي شربت منه هالنخبطت بطن البت . 

– يمه لزوم اخذنها للمضمد يشوفها 

– توني رادة من عمامها شركيت و مركيت فوك روسهم و انا اكللهم ضيعيتو البت ، تريدين ناخذها و يشوفونها و نبتلي ، اكعدي و اسكتي 

– جا شلون 

– شربيها زهورات و هسه تخف بطنها و ترتاح . 

ككت فورت ليها زهورات و خليتها بهاي الجابها سرحان الها ووديتها بيد جمارة كلت الها : حطيها حدر اهدومج و اخذيها لايمان خاطر ترضعها هالزهورات . 

خذت جمارة من ايدي ومشت ليها ، شواي وردتلي تكلي : تكول ايمان البت بس تبجي ما تسكت ، يمكنها مالومة . 

– جا انا هسه شسوي ، دخيلج يم البنين الحرة . 

كمت لفيت شيلتي و حوليت لبيت ايمان ، البت بس تبجي و ما تسكت، امس نايمة و ما تكعد و اليوم تبجي و ما تسكت، ذول شعاملين ابتي الله لا يطيهم بجاه العباس ابو فاضل . 

…….. 

سرحان : وكفت اباب الجدة و صحت : ها يمة بشري 

– الف الحمد و الشكر لله .. جابت 

– يا الله ، شنهو  ولد يو بت ؟ 

– لا خطية جابت بنية 

– نعمة نعمة دامها طلعت بسلامه

طلع رجل القابلة و هو يسلم علي و يكلي : اعذرني ابو مأمون اجيت بالليل و انا نايم و ما دخليتك للبيت . 

– لا دايم ان شالله ، اذا المرة تكدر تكون خاطر نروح 

– ما يصير والله تجي وما نضيفك ، عيب ولا تحجي 

– مستعجل وعلي لزوم اروحن لخوي زناد من كونه مدهوس و خاسر كليته . 

– ابد لا تحجيها تشرب چايك و تتوكل بسلامة . 

– الله يسلمك . 

دشيت للبيت و ضيفون الجاي و الزلمة يشكي من واحد متكاوم وياه ويحذي الماي عن كاعه ورايدني امشي ليه ، كلت له : بالخدمة باجر تمر علي للديوان ونروح ليه و نتفاهم وياه . 

صحت اعلى امي : هاااا شنهي نروح يو نظل 

حجت الجدة : جا ما تطيني البشارة . 

– افا جا امي ما اطتج الفلوس . 

– لا اطتني الاجر لجن ما اطتني البشارة . 

ردحة : جا جايبة ولد و يطيج البشارة.  

حجه الزلمة : عيب يا مره تاخذين من الشيوخ ، امسحها بوجهي ابو مأمون . 

– لا عليش ، البت هم نعمة و النبي صلى الله عليه و اله يكول عنهن المؤنسات الغاليات  و تستاهل البشارة ، و عادتنا نكرم و هاي عادة اجدادي 

شلت الفلوس من جيبي و اطيتها للجدة ، كامت تترحم لبوي و اجدادي ، سلميت عليهم و خذت امي دينار و طلعنا من بيت القابلة ، دخليناها للقصر و هي تبجي . 

كعدت و هي تون : بعد اخوج عليش تبجين . 

ردحة : تبجي اعلى غربتها يمة ، المرة ساعة ولادتها تريد احبابها يمها و هي لا رجلها حذاها ولا اهل . 

– ان جان اعلى زلمتج ، كريم معذور من كونه بالجيش ، وان جان  اعلى اهلج احنا اهلج، جا ما ترضيني اخوج 

دينار : لا و النعم منكم لجن … 

– لا لجن ولا هم يحزنون .. شو ناوشوني هالبت خلني اوذن بذنها . 

شلتها و عاينت بوجهه : اللهم صل على محمد وال محمد … الله يبارك بيها ان شالله ، عدج اسم ليها يو انا اسميها . 

– دامك بحسبت اخوي الراي ليك خوية 

– الله يسلمج 

الله اكبر الله اكبر اشهد ان لا اله الا الله …….. 

اسمج وسن اسمج وسن .. الله يبارك بيج و يجعل الصحة و العافية و الحياة الهنية نصيبج بالدنيا . 

بشرى : بالله اشوفنها .. يوو فدوة تشبه امها لجن الخشم لابوها . 

– حدج لهنا بويه احنا المايورث الخشم عدنا ينشد امه منين جابته . 

– هههههههه لا بس وعلي حلوة 

– تكبر و اخذنها لمأمون ، مووووش بويه ، عاينلي 

دنجيت و انا احطنها جدام مامون ، فرح بيها وكام يناغيلها و يحومي اعليها و كاضها 

ردت اجرنها منه ، ما رضى كام يصرخ ، رديته كعده و انا كاضها و حاطها بحظنه ، ونعله دنج يحبحب بخدها : انا اخوووك شو بوية من هسه تحبحب بالبت جدامنا ، جا مامش حيا . 

بشرى : هههههه جا مو توك خطبتها ليه ، عليش تلومه يو حبها . 

– جا هيج من الكماط و يحبحب بيها يو كبر شيعمل بيها هي سرسري .

ردحة : ياااا هههههههه فلشك كون ، بعده جاهل يا يمة شيفتهم . 

بشرى : دامه ابن سرحان من المهد مفتح عيونه 

– انا اخوووك ، شلكيتي ولج مفتح عيوني اعلى بنات السلف ؟ 

– خلينا ساكتين . 

– هي وحيدة و باليتني بيها بلوة ، لا والحظ . 

– خو ما تعول ينجاب طاريها تنشنش . 

– هاج بويه هاي البت ، و انا اروحن . 

توني جاي اطلع ، دشت ملوك و ياسر ابن زناد وياها ، شالت البوشية من وجهه و كالت : راديون صكد ردت لبيت سلطان ؟ 

– وعليكم السلام و رحمة الله وبركاته 

تنهدت و دارت وجهه بضيكة نفس ، ردت تحجي : راديون وين 

– ابيت زلمتها 

– واعلى اي اساس ترد ولا انا ولا اخوها عدنا خبر . 

– انا اخوها الجبير و انا الاقرر بيها موش احد غيري . 

– اشوفن ساعة الطاح زناد تكوى عودك و سطيت اعلينا يبن ردحة . 

– انعالي فوك زناد و فوك ….. المرة ما اكربنها بجلمة  لا تخليني اطلعيني  عن طوري وتخليني احجيلي حجاية موش بمجانها ، فارجي وردي لبيت ابنج ياله . 

حجيتها و هديت البيت و طلعت رحت للديوان ، حميد و رحيم و خنجر موجودين : ها يزلام شنهي الراي ؟ 

– الراي رايك يبو مامون 

– طحتو بالمتعرضين لزناد يو ما حصليتوهم . 

خنجر : وين يرحون يبو مامون ، نلكاهم نلكاهم . 

عاينيتله و انا اخفي بابتسامتي ، حجه رحيم : ليهسه و سيارته مامش ، وحتى ما عرفنالهم اثر تتوقع ياهو المتعدي اعليه ؟ 

– ما اعرف و هاذ شغلك يخنجر اريدنك تحفر السلف بأبرة و اطلعلي المتعدي اعلى زناد . 

خنجر : عد عيناك يبو مأمون ، اسحلهم من اشواربهم و احطهم حدر اجدامك ، الا الشيخ زناد . 

– والنعم منك . 

….. 

راديون: خلصينا الغدا و دشينا للحجرنا .. نمدد شواي ، اجا جسام و انا جويعدة و امشط بشعري . 

– الله يهالشعر هاذ جم مرة باليوم يتمشط 

-من مات ابوي و لليوم ما داريته ، هالجاي ادهننه بالزيت و اسرحنه خاطر لا يشعف . 

– اشوفنه ثخين و طويل ، ليل امدد اعلى اجتافج ما شالله . 

-جانت امي كل اسبوع حنه و طين خاوة و زيت حية و تداري بيه ، لجن من مات ابوي لهيت عنه بحزني ، هدك من شعري ، احجيلي عن ابوك .. انا ساعة السمعيته يرزل باخوك جدامك اعلى سبحة مرته من يمي ذبت بثيابي من المستحى. 

– جا ليش كتلج خلي الطشت و السطل بحجرتج و اسبحي ..

– جا ويو شاف ثيابي مغيرة . 

– ان جنت انا موجود و ان جنت ما موجود يومية الصبح غيري ثيابج خاطر يتعود اعلى طبعج هاذ . 

– وانا طبعي هاذ يومية اسبح عد اهلي.  

– بهالبيت لكلشي قوانين و عادات يفرضها ابوي و اديرها امي نجمة . 

– وليمتها نظل هيج ؟ 

– جا شبيدنا ؟ 

-انت الزلمة و تكلي شبيدنا . 

– اطلع عن طوره يو اتبرى منه ، و الصيت لخاطر مرته ! و حتى يو طلعت يهدني ؟ سواها كبلي اخوي حمدان و انجتل هو و مرته و جهاله ، ومرته تطلكت و ٥ اشهور و ناس تطيح اعلى ايد ابوي خاطر ترد لجعالها ياله رضى . 

– ادخيلك ربي ، انا بديت اخافن وعلي . 

– سايريهم و امشي اعلى مايي و الله كريم ، و هسه كليلي راح اظلين تمشطين بهالشعر يو تخليني امشطه الج . 

– كملت 

– بس انا رايد 

– و يو طحنا ؟ 

– الصوندة موجودة و نعبرها من الشباج 

– ههههههههههههههههههههههههههه 

– خايبة حسسج هششش ، شهرتينا . 

– اهيس راس سلطان ابيك راح يطلعلي من الباب هاذ 

– ابيك شني اعوينة ابو اصلج ، خايبة حسسسج راح يطبنا صكد 

– ههههههههههههههههههههه 

– شو كربي خل اعلمنج الحس شلون يتنصى ، كربي 

– الماي ينترس الخزان يمعووود 

– اعوينة ابو الخزان انا افرغنه . 

– شيلتي تندي و يشوفها ابوك و يطيح بخوانيگك 

– ولج بس كصري حسج شهرتينا بعلي شو تعاااي . 

جورني ليه و ذبني اعلى القريوله ، ككت و كتله : لا لا لا يا 

فز : شنهي شكو ؟ 

– كرامتك نايمة ما يصير ع القريولة 

– اعوينة ابو اصلهم .. ما تكربين اعلمنج اعلى الكرامة . 

ظليت اضحك و هو يحط بيده اعلى خلكي خاطر لا تطلع ضحكتي و تنسمع . 

درت ليه : و هسه شلون 

– بس اغفالي شوية و كعديني 

– و شلون نتعلى 

– من اكعد ادبرنها . 

غمض اعيونه و نام ، و انا اعلى فطاريتي كضيت الوكت افكر شلون اتسلل بلا ما احد يشوفني و ادخل الصوندة و اترس السطل ؟ 

بالله اكضي عمري افكر شلون اترس السطلية ، عيشة هاي يربي ؟! موش جنت عد اهلي ومترهية اشجابني اعلى هالضيم هاذ . 

درت روحي و انا متجية راسي براحة ادية وضاربة عكس ، و اعاين اعلى جسام ، مدري ليش روحيتي تعلكت بيه .. جا هسه انا شنهو .. حتى تهت بروحي .. جنت احبن خنجر و كاضية وكتي وانا افكر بيه ، بجم يوم كلبي تغيرت علومه و ما عدت افكر بيه ، يعني انا شنهي ؟ 

عكول حب طيش جان و هاذ الاصلي ؟ 

ظليت مركزه بوجه جسام و هو نايم و افكر ، ليما صارت الساعة ٤ ، حطيت ايدي اعلى صدرته و ندهته ، فز و كض ايدي : ها 

– الساعة ٤ تكوم ؟ 

– اي 

جر ايدي حبها و حظنها و كلب على صفحتي و رد نام ، شاوريته : شكثر تحبني . 

– بكد السما … وهكو معلومة تكول السما يوميا تتوسع و تكبر .. بالضبط مثل عشكي ليج كل يوم يمر يكبر بدليلي و احبنج ازود . 

يحجيها بهمس و هو مغفي ، فتح تك عين و هو يكول : و انت ؟ 

– ما اعرف 

– شنهو الما تعرفين 

– ما اعرف اصفط هيج حجي و اعبر . 

– كليلي احبنك تكفي عدي الف  جلمة . 

– و يو ما كلتها ؟ 

– مستحى يو تردد ؟ 

– ظليت اعاين بيه ، ابتسم و هو يحبني اعلى خدي و يكلي: عوفيها للزمن اسمعنها ، خل نحير هسه بسبحتنا.  

– حير انت انا مالي غرض 

– هاااه هيج كدها و توكفين ابوجه ابوي 

– جا ابنه يدوهني و هو يرد علي ، خو حالك حال اخوك يرد عليك . 

– هاااه ، هيج الراي 

– جا شلون 

– انا رايح اسبح برا ، و ظلي انت حيري بسبحج 

– بدربك عبرلي الصونده 

– تعلميتي الدرب 

-جا غير منك تعلميت هههههههه

– هههههههههههههههههه ، ما دام هيج كومي انت عبريها خاطر اسبحنج و اتسبحين . 

– ياااع ، استحي اعلى اروحك 

– عليش 

– امش افيسد 

– اضكرنج بالصار كبل شوية يا افيسده ؟ 

– جسااااااام 

– جسام و عشيرته يندارون فدوة لهالليل هاذ المتمدد اعلى امتونج ..

تبسمت و نزلت ، و دبريناه بالخوة و عبرينا الصوندة ، و سبحنا ، و طرينا الماي ورى البيت من الشباج.  طلع هو الحجرة مبدل و لاف الغترة اعلى راسه ومسبحته بيدة و معطر روحه ..

انا ظليت كاعدة بحجرتي انشف بشعري ، خاطر ما يبين مبلل جدام احد ، ليما هيسيته نشف، لفيته و طلعت .. دشيت الديوان سلطان كاعد : هلا عمي . 

حجيت و جسام كاعد ، هو ظل يعاين لينا ، و كال : راح تكضونها هيج ؟ 

جسام بس حجاها كام من مجانه و طلع برا و صاح : رويداااااااااا تعااي

صاح سلطان : جساااااااام

اندار ليه و حجه : هالمرة اعديها يبت ضويحي ، لجن يو حطيتي راسج براسي ، الا احشن راسج . 

راديون : حاشى عمي احطن راسي براسك انت الخير و البركة و شتحجي جلمتك فوك روسنا . 

نعمة : عفية 

سلطان : فارجي

– جاية اكشن الديوان 

جاسم : جا تكشينه و احنا جويعدين شنهي هاي احترامات اهلج و تعلومهم الجايف . 

اندرت ليه : اهلي شيوخ وهاذ شغل الخدم موش شغلنا  ، لجن انا اخدمكم بعيوني واتعذر يو غلطت .

سلطان : شيوخ يبت ضويحي ، جدج يو ما مكوش اعلى حك ابونا ما توكفين جدامنا و تكولين شيوخ اعن الماخذين حكي و حك ابوي 

حجاها و كام اعلى حيله ، ردت اندار حط عوجيته اعلى متني و سحبني بطرفها و طكها براسي و صاح : وكت الاحجي انااااااااا ما تطيني كفاااااج ولج 

راد يطكني بعوجيته ، وكف نعمة و كاله : بويه اعصابك ما تسوى تعصب روحك اعليها ختولي ، امشي غاااادي .  

طلعت من الديوان ، جسام يمشي  و جاي صوبي ، كرب : موش كتلج تعاي عليش ظليتي 

– ابوك يتاني الحجة خاطر يطلع حركة جدي بيه . 

– انا عرفته ساعة الحجة هالطلعت ، تجنبي و ابعدي عنه ، و المجان الاكعد بيه انا ، لا تكعدين وياي جدامهم . 

– جا شلون ، هاذ اول يوم و روحي طكت ، العمر شلون يكضي . 

– تتعودين ، امشي دشي داخل . 

– اتعود اعلى الهم مامش امل نفتك يعني . 

تبسم و كال : النساوين ملتمات جوا ، دشي اكعدي وياهن . 

دش جسام للديوان و هو يسمع جاسم يحجي ويا ابوه و يكله : بويه تراه عريس ، صبرك اعليه . 

سلطان عاين الجسام : عريس ما كلت لجن هاي بت ضويحي جنها تجره من اذانه و تركب فوك متونه ، و هالردي منصي ليها . 

كعد جسام و ما يرد على ابوه ، حجه : من اشوفنك تمشي بشورها يا جسام راسك احشنه افتهمت . 

جسام ساكت و ميرد و داير عنه ، صرخ سلطان : مووووووووووش احجي وياااااااك 

جسام : بوية الرديتك و الرادديتك ابوي و عيب بحكي اسويها و ما اريدن اعصبنك و السكتت تعصبت ازود ، تراها وعلي مو عيشة هاي .

– بت ضويحي تصكرها موش تمشي بامرها ، و من احاجيك تكلي تامر بويه و ادنج راسك افتهمممممممت . 

– تامر بويه . 

جاي يحجون و دشو ناصر وابنه ، سلمو و كعدوا : جا هسه عمي انا شسوي ؟ 

سلطان : كواغد يو تحلف بالعباس ما اصدكنها ، هالمرة هاي طركاعة موش مرة ومامش غيرها الماخذة البت و لاعبة اعلى اشواربنه شله واعبر . 

ناصر : الصبح اجت لينا و هي تنشد و تهدد يو ما لكينا البت تاخذ بتها و تروح للامن، و امن صدام ما يرحم و انا عدي وليدات . 

– جا غير احش اجدامها ، هكو مرة من ال ثجيل ادش مراكز و توكف ويا الزلم و تحجي ، الا ما رايدة روحها . 

– كواغد ما تنكدر ملاية يو حاجيتها تشهرك و تخزيك 

– شنهي ينااااصر خايف من مرة . 

– انا خايف من الشهيرة و عكلي اندار البت وينها ، الصبح مرت فليح تكول نايمة ، ومامش احد دش لينا جا هسه شلون كلي . 

– خايب انا سلطان و تعلمني ، البت عد كواغد موش عد غيرها ، انا اكلك يمكن بتها  هدية صكد ما تدري بالسالفة و توهدنت و انسحنت ، لجن لا تقنعني كواغد ما تدري بشي ، هاي المرة انا ما امن ليها . 

…… 

هدية : درت لبيت ايمان و ظليت عدهم و حايرة ابتي ، ما رضعتها شواي اذا ما زوعت كل بطنها و احتاريت بامري شلون .. 

شربتها زهورات و مافاد ، ادكن اعلى ظهرها ، تبجي و ابت مزوهرة  …. ليغادي و اهيس صخنت و حرارتها صارت تجوي . 

كمت اتنخى بام البنين التحضرني و تحضر بنيتي ، و دمعاتي فوك بتي يسجبن ، و امي تروح و ترد ليه ، تشيلها عني و تداري بيها و البت تلوع ، و انا كلب ما ظل عدي . 

– جا شلون نمش .. 

ركضت جلجول لمجان خنيجر ، مامش ، نشدت عنه كالولها : بالمضيف مال ال ضاحي . 

طكطكت نعاله وطكتها ركضة للمضيف ، وكفت غاد من المضيف و صاحت : عمييييييي خنجر ، عميييييييييييي . 

طلع خنجر من المضيف ، و تبعه سرحان و رحيم وكف وراها : هاي موش بت حاكم ، شتريد 

– هاي صويحبتي يوميه تجي تذربن براسي و تمش ،ردو خلني اشوفنها شتمصرن هالمرة 

مشيت منهم و سرحان واكف ما تطمن لصيحتها ، من كون عرفها صيحتها ملهوفة موش لعب جاهلة و جاي تمصرن . 

كرب خنجر ليها : هاااا يجلجول شنهي 

– عمي الحك وعلي ما عدنا احد و بت هديوة مريضة و هديوة اخيتي راح تموت . 

– اهااااه ، امشيناااا . 

سرحان : خنجررررررر 

دار ليه ، اشرله ( شنهو )  .. كرب ليه وشوش اله : الفرخة مالت بت حاكم مريضة ومامش احد بالبيت .

– اخذ سيارتي و اطلع ليهم بساااع ، استعجل ، و كللهن يتبوشن و يصعدن ورا موش حذاك ، اسرررع . 

اخذ مفاتيح السيارة و مشى معرف اعلى بيت حاكم و جلجول تراكض وراه ، كال الها: اسبكيني و كلي لاخيتج تتبوش هي و امج و يركبن بساااع . 

ركضت كبله و سبكته و دشت للبيت ؛ هديووووه هديوة اهديوووة، خنجر اجا بسيارة و يكول خل تتبوش خاطر اخذنها بالسيارة هي و بتها 

ركضت حطت اي شي اعلى وجهه وجرت بتها هلتها حدر عباتها ، و صعدن ويا خنجر للمستشفى ، بالطريج للمستشفى .. و البت صارت زركة و تحولت عيونها …تخربطت .. 

كامت تصرخ هدية و ادك اعلى راسها ، و البوشية مةش قماش خفيف من كونها حطت حجاب اعلى وجها بس تريد تطلع ، كامت ورفعت البوشية و تصيح : فدوووووة خويو بتي الحكي ، بتي راح تروح من اديييييييييه…