رواية غرام العز الفصل السابع 7 بقلم فرح وائل

*كانت كارما تمسك الهاتف في محاوله منها للاتصال ب عز لكي تفهم لماذا فعل ذلك.. وبالفعل رنت اكثر من مره ولكن كانت الاجابه في كل مره ان الهاتف مشغول*

كارما:- اوووف رد بقا منك لله سيبت مفاصلي

عز:- الو!!

كارما:- كل دا مشغول البيه بيحب جديد ولا ايه

عز بأبتسامه:- ايه دا مالك في اي

كارما:- في زفت علي دماغك سايبني ملطوعه كل دا ومديني مشغول… وكنت مشغول في اي بقا ان شاء الله

عز:-………….

كارما:- ما ترد يا بيه ولا القطه اكلت لسانك

عز:- ماهو ارد اقول ايه..وانتي مالك اصلا كنت بكلم مين *ثم تابع بأبتسامه* تصدقي بالله لولا اني عارف انك مش طيقاني كنت افتكرتك غيرانه ولا حاجه

كارما:- ولما انت عارف اني مش طيقااك جاي تتقدملي ليه

عز:- اتقدملك!! ليه يا عسل اتخبطت في مخي ولا مستغني عن مرارتي عشان اجي اتقدملك!!

كارما:- ولما هو زي ما انت بتقول كده..جيت واتقدمتلي ليه عاجبك شكلك كده وانت مرفوض

عز:- يبنتي اتقدم ايييه انا مجتش اتقدم لحد..ثم اني يوم ما هفكر اتجوز هاخدك انتي!!!! بكل عقلك مصدقه دا بجد

كارما:- ليه يا حبيبيييي انت فاكرني بايره ولا اي لا فوق كده دا انت حته بوبع لا راح ولا جه هتعملي فيها عمر الشريف!! ثم انك اصلا مش من نوعي المفضل..انا مش هاخد واحد رياضي بياكل كل يوم اكل صحي..انا عايزه واحد نفطر انا وهو ممبار وكفته مشويه نتغدا محشي وبط نتعشي بيتزا وسوشي

عز:- دا انتو كده هيجيلكو انسداد في الشرايين من اول اسبوعين في الجواز

كارما:- انتاااااا ماااالك هي شراينا ولا شرايينك نسدها نسلكها نشوحها مع قرن فلفل وناكلها انت ماااالك

عز:- ايوا يعني انتي بترني عليا عشان تقوليلي خططك المستقبليه مع شريك حياتك يعني ولا ايه مش فاهم

كارما:- لا يخفيف الظل.. انا برن عليك عشان افهم حضرتك متقدملي ليه

عز:- انا مش فاهم اي اصرارك في انك تتغابي..بقولك متقدمتلكيييش اغنيهاالك

كارما:- ماما قالتلي ان في ظابط واسمه عز الدين اتقدملك

عز:- وهو مفيش ظابط واسمه عز في الدنيا كلها غيري!! اتكلي ع الله شوفي هتطفحوه اي وفكك مني الله يسترك

كارما:- يعني مش انت العريس بجد!!

عز:- وانا لو العريس هكدب عليكي ليييه اديني سبب مقنع

كارما:- ايوا بس انت قولتلي في الماسج اني حليت المشكله… ف افتكرت ان ا…

قاطعها عز:- ايوا انا حليت المشكله فعلا بس اكيد مش بالطريقه دي… انا جبت عادل دا وحطيته ساعتين في الحبس طلع فاقد النطق اصلا..ف متقلقيش

كارما:- الللله يخربيييتك حبست الولا!!! دا محامي يا متخلف..حبست محامي..ربنا ينتقم منك يا عزز

عز:- ششش بس كفايه صدااع…وبعدين كنتي عيزاني اعمل اي يعني

كارما:- ولا حاجه يا عز..ولا حاجه

عز:- طيب سلامه بقا عشان انتي عطلتيني عن شغلي

كارما:- عز

عز:- ايوا

كارما:- انت فعلا مش انت اللي متقدملي

عز:- يشيخه يلعن ابو معرفتك…اقفلي يا كارما اقفلي

»قفل في وشي السكه الحقير المتدني دا…بس مش عارفه ليه اتضايقت لما طلع مش هو اللي متقدملي.. يمكن لو كان جه كنت هرفضه بس اتضايقت لما عرفت انه مش هو العريس مش عارفه اي الاستهبال اللي انا فيه دا الحقيقه ولا انا ماشيه بمبدأ “يمتنعن وهن الراغبات” ولا ايه… بس خساره المز دا يضيع كده والله… تصدقي بالله ما في حاجه ضاعت الا اخلاقك يا كارما اخرسي منك لله..«

*ذهبت كارما لتستحم وتغير ملابسها لكي تذهب الي ريهام مره اخري..اما والدتها فكانت منشغله بترتيب المنزل استقبالا للشخص الذي سيأتي ويخلصها من ابنتها للابد ( ونعم الترابط الاسري والله يا ام كارما..دا انتو عيله نتنه كلكو..)*

كارما:- ماما انا رايحه بقا ل ريهام عايزه حاجه

والدتها:- روحي يختي وسبيني في الكركبه دي لوحدي.

كارما:- حد قالك اقلبي الشقه يعني..انا مش فاهمه انتي جايبه الثقه دي منين اني هوافق عليه اصلا

والدتها:- طب تبقي تفتحي بوقك يا كارما.. عشان اجوزك الولا اسلام صاموله

كارما:- لالا الله يسترك لا الولا دا ممحون اصلا ومشاعره فياضه زياده عن اللزوم وانا بقشعر لا

والدتها:- يبقي توافقي ع الظابط يختي..ع الاقل محترم وابن ناس

كارما:- وانتي عرفتي منين.. مش يمكن يكون صايع وخمورجي وبتاع ستات وبيشارك في قضايا مشبوهه وبيبيع اعضاء وسلاح

والدتها:- ما طبيعي يبقي كده ماهو جاي وبكامل إرادته ويتقدملك.. اكيد مش هيبقي شخص مثالي يعني دا لو اخدك هياخدك تكفير ذنوب

كارما:- انا مش فاهمه اي كميه الحقد اللي بتشعوريه اتجاهي دا.. هو انا بطفي سجاير في صرصور ودنكم ولا بحط راسكم في قاعده الكبانيه لامؤاخذه

والدتها:- بتت غوري من وشي مش ناقصه هم ع الصبح انا فيا اللي مكفيني

كارما:- يارب بعد كل التنضيف دا ما يجي.. عشان تبقي تعامليني معامله مرات الاب دي كويس

*غادرت كارما المنزل وذهب الي المستشفي ب ميكروباص ( والله انا كنت حساكو نسيتوا حوار الميكروباص دا.. نسيتوه؟! طب تمام مفيش روايه لمده سنه لحد ما تحفطوا البارتات القديمه يا بهوات..ههه بهزر معاكو اذا كان انا كنت ناسيه.. صباح الفل يفنزااتي ( بصوت عادل شكل)*

ريهام:- يعني انتي هرفضيه ولا لا

كارما:- والله لو مناسب مش هرفضه..اي اللي هيخليني ارفضه يعني

ريهام:- طب مش محضره اسأله

كارما:- اسأله ايه هو ميد ترم ياستي فكك مني

ريهام:- انا بتكلم بجد والله

كارما:- سبيها ع الله انا السؤال اللي هيجي في بالي هقوله هو مش قاعد مع جورج قرداحي ف من سيربح المليون مش اسلوب برضه اقابل الولا ب ورقه اول ما يدخل.. يلاقي نفسه في امتحان شفوي مفاجئ

ريهام:- يبنتي بقاا كفايه عشوائيه

كارما:- امك اسمها فوزيه

ريهام:- ارحممممي امي.. وخلي بالك العشوائيه دي هي اللي طفشت منك العرسان اللي فاتو

كارما:- عندك حق هو اسلام صموله مش بيحب العشوائية فعلا.. راجل منظم كده.. تصدقي بالله انتي تخشي الورشه بتاعته بصي صداااع من كتر النظاام… دا انا بدور وشي كده بلاقي كاوتش العربيه في قفايا والمفك بين صوابع رجلي وحاجه في منتهي النظام يعني ربنا يحميه بجد

ريهام:- اتلمي بقا وبطلي تريقه.. انا قصدي عشان ميبقاش في حاجه مسألتيش عليها ف تبقي محضره اسأله

كارما:- لا فاكس حوار الاسئله دا انا كنت محضره قبل كده اسأله لواحد والحوار مظبتش معايا

ريهام:- يا شيخه..طب مظبتش ليه اي اللي حصل يعني انتي مقولتليش الحوار دا

كارما:- والله يبنتي حضرت الاسئله واديتهاله وقولتله خمس دقايق وهلم الورق ف هو سابلي الورق ومشي ونسي يكتب اسمه حتي ع الورقه ف رسب في الاختبار

ريهام بضحك:- يبنتييي بقا انتي هتبطلي تريقه وهبد امتي

كارما:- لما اكبر لما اكبر

( الاسم:- كارما

المهنه:- لما اكبر لما اكبر

بعملكو ميمز اهو عشان محدش يتهمني ب اني نكديه ومش فرفوشه والاتهامات البطاله دي ????????)

ريهام:- طيب مين هيبقي موجود معاكم

كارما:- انا وهو وبابا وماما وخالتو و الولا هوبا.. صحيح نسيت اكلمه عشان اقوله

ريهام:- طيب رني عليه قوليله

كارما:- خلصانه يست حلويات

ريهام:- بتكلم مع بياعه بطاطا مش مع محاميه لا

كارما:- من تواضع لله رَفع يعسل

*ذهبت كارما الي الخارج لكي تحادث ديك البرابر الشملول خاصتها وتدعوه لكي يحضر تلك الجريمه التي ستحدث ليلا..*

_ الو

= اي يعم هوبااا فينك مش باين

_ بخاف من الحسد معلش

= ف اضحك بقا وكده!!

_ اتنيلي عايزه اي اخلصي

= عندك شغل ولا اي

_ لا انا بصيع عند عز في مكتبه اصلا.. بس لازم ابينلك اني مهم ومشغول وكده

= طب بص يا تافهه انت.. انا هعتبرك بني ادم له لازمه وهعزمك عندنا النهارده

_ اي امك عامله محشي.!!

= محشي ايه يا ابو لُغد انت.. انا جايلي عريس

_ وانا هاجي اشكر في اخلاقك قدامه يعني ولا هاجي اعمل اي مش فاهم

= انت مش محتاج تشكر في اخلاقي علي فكره

_ فعلا ماهو انتي معندكيش اخلاق اصلا عشان اشكر فيها

= هنقل ادبنا كتير علي بعض

_ ايوا ما انا مش فاهم وظيفتي هتبقي اي وسطكم

= تعالي هيبقي فيه جاتو

_ بالكريمه؟!

= وعليه وفاكهه كمان

_ لا اشطا انا كده هاجي خلصانه

= هتجي عشان تلبي نداء كرشك يا مفجوع..لكن مش عشان بنت خالتك في زنقه

_ لا ربنا يفك زنقتك يختي.. عندي اسم مُلين كويس هبقي اجيبهولك

= مهااب غور في ستين داهيه..جتك البلا في شكلك

_ بتمووت فيا ????

*اغلق مهاب مع كارما الهاتف ثم عاود النظر الي عز الذي كان يتحدث معه قبل ظهور تلك المتطفله علي هاتفه ( دا تلك المتطفله هتنفضك لما تشوفك ياعديم الربايه انت)*

مهاب:- يخربيتها رغايه.. بالعه صابونه ع الصبح

عز:- دي كارما!!

مهاب:- ايوا يعم هي

عز:- كانت بترن ليه

مهاب:- جايلها عريس وعيزاني اروح واشوفه وكده

عز:- هو هيشوفك ويشوفها وهيقول انا اي اللي وقعني في العيله الهبله دي..وهيطفش

مهاب:- لا انا مسمحلكش.. دا انا اعقل سلاله في العيله بتاعتنا

عز:- لا واضح حقيقي.. ثم ايه سلاله دي هو انتو قرود!!

مهاب:- ايوا جدع..خليك كده اقعد اسخر مني اسخر مني لحد ما تخش جهنم وبئس المصير بصاروخ استرالي

عز:- اتكل ع الله يلا يا صايع ع مكتبك عشان عندي شغل

مهاب:- كنت خارج اصلا يا قليل الذوق يا معدوم التربيه يا مستحق الدعم

*وها وقد جاء المساء وكانوا ينتظرون جميعهم ذلك العريس خائب الرجا الذي سيتم خداعه بعد قليل وتدبيسه ب تلك التي تدعي كارما.. وبعد قليل دق باب المنزل*

مهاب:- الضحيه وصلت يشباب

والدته مهاب:- اتلم يا زفت انت وروح افتح الباب.. وانتي يا كارما خشي جوا

كارما:- داخله يا خالتو داخله.. مع اني خايفه يفتكرني وش كسوف ويبقي اتدبس بجد

*دخلت كارما غرفتها وكانت تسمع صوت والدتها بوضوح وهي تقول “البيت نور بيك والله يبني اتفضل”*

كارما في نفسها:- نور بيه هو!! يعني ميمشيش معاكي ان دا نور النجف اللي انا لسه مسحاه النهارده!!! امهات اخر زمن والله بتكدبي لييه ها.. ربنا هيعمل فيكي اي اكتر من اللي انتي فيه مش كفايه ابتلاكي بيا ( يارب الستر والصحه وربع تصالحها مع نفسها دا)

*وبعد قليل جاءت والده كارما الي غرفتها تحثها علي الخروج لكي تقدم المشروبات (اللي هيطفحها العريس) وبالفعل خرجت كارما وبيدها بعض العصائر لكي تقدمها لهم وما ان دخلت الغرفه حتي قالت بصوت منخفض يكاد يسمعه من بجوارها فقط*

كارما:- حلااااوتك