رواية تنهيدة عشق الفصل الثانى عشر 12 بقلم روزان مصطفى

رواية تنهيدة عشق الحلقة الثانية عشر

《 كأن مصباح الغُرفة الصغير يتأرجح يميناً ويساراً مُحاولاً الإستغاثة بك ، أن تُغلق تلك النافذة التي يتسرب منها الهواء القاسي الذي سيتسبب في وقوع المصباح وكسره !》
#بقلمي
قلع العقرب جاكيته وحطه على جسم مياسة وهو بيبُصلها بتركيز كإنه مش عاوز يرمش عشان ميفوتهوش ثانية واحدة من الجمال المُتجسد قدامه
حست مياسة برعشة أول ما شمت ريحة برفانه الواضحة من الجاكيت
فتح باب الشقة وخرجوا سوا منها وركبوا الأسانسير عشان يروحوا الفرح
* داخل قاعة الفرح
ميرا كانت بترقص سلو مع كادر اللي إستلمها من عمامه وأبوه ، وكاميرات الصحافة بتصورهم أول بأول
” على ترابيزة بدر وسيا
بدر : ما هو إبن توفيق ، متوقعة منه يكون عدل يعني ؟
سيا بضحكة : يا بدر بنتك إتجوزت وخلفت وإنت لسه ماسك على نفس النقطة ، بعدين مالك متضايق منه أوي كدا إنهاردة ؟
بدر بتكشيرة : أنا حاسس إن بنتي مش مبسوطة أنا حُر
مسكت سيا وش بدر وحركته ناحية ترابيزة عزيز وسيليا وهي بتقول : بذمتك يا أخي دا منظر واحدة مش مبسوطة ؟
* على ترابيزة سيليا وعزيز
مسكت هي معلقة الاكل وهي بتأكل عزيز في بوقه ف جه عشان يعض إيديها بعدتها بسُرعة وهي بتضحك
سيليا : بطل الهزار دا بجد
عزيز وهو بيتأملها من فوقها لتحتها : والله ما في بطل غيرك ، ما تجيبي حاجة تحت الحساب كدا من غير ما حد ياخد باله
سيليا بإحراج : بس إتلم بنتك قاعدة
عزيز وهو بيبُص لأطباق السي فود اللي قدامهم على الترابيزة والإستاكوزا : وبعدين يعني جابوا كُل الأصناف دي ونسيوا أهم صنف ، ساندويتش الفياجرا اللي بيجيب من الأخر
سيليا ضحكت وهي بتقول : إنت لسه فاكر بقى
* على ترابيزة قاسم

كان ساند بإيده على الترابيزة وهو بيقول : يا سلام ، بيقولها إيه عشان تضحك أوي كدا
بصت ريما لترابيزة سيليا بعدين رجعت نظرها لجوزها وهي بتقول : وإحنا مالنا يا قاسم ؟ واحدة وجوزها بيضحكوا .. ركز معايا بدل ما إنت مركز معاهم ..
في وسط كُل الكلام اللي داير على الترابيزات ، دخل العقرب ومعاه مياسة وكُل العيون كانت عليهم ، بالمعنى الحرفي جذبوا الإنتباه
عزيز أول ما شاف العقرب إستأذن من مراته يقوم يسلم عليه لإن العقرب صديقه
قرب عزيز من العقرب وهو بيحضنه وبيقول : يا راجل حسبتك مش هتيجي مع إني قولتلك vip وبتاع
العقرب وهو حاضن عزيز : مقدرش يا قائد أرفضلك طلب ، في ترابيزة ولا هنقعد صف تاني
ضحك القائد وهو بيقول : في ترابيزة طبعاً ليكم ، بس تعالى أعرفك إنت و ..
بص القائد لمياسة شوية وإفتكر يوم ما كان عاوز العقرب يرميها في البسين والمايسترو ضربه على دماغه
بص عزيز بنظرة مُهتزة للعقرب وهو بيكمل كلامه وبيقول : تعالى أعرفك إنت والأمورة على المدام بتاعتي
مشيت مياسة قدامهم ف ضغط القائد على دراع العقرب وهو بيقول : إنت بتهزر ولا إيه حكايتك ؟
العقرب بتصنُع الغباء : مش فاهم بهزر ف آيه ؟
القائد وهو بيبُص حواليه رجع ركز نظره على العقرب وقال : البت اللي إنت جايبها مش هي دي الرهينة اللي كانت في ملهى المايسترو
العقرب بثقة : بقت رهينتي أنا دلوقتي
سحبه القائد من دراعه وهو بيقول : تعالى أعرفك على المدام بتاعتي وبعدين نبقى نشوف حكايتك إيه ، مراتي تبقى بنت بدر الكابر رجل الأعمال المشهور لو تسمع عنه ، وإنهاردة فرح أخوها على بنت عمها
العقرب بسُخرية : هما مُنغلقين كدا ليه يعني كُله جواز قرايب
القائد بهدوء : لا ما أنا كسرت أم القاعدة دي ودخلت خدتها من وسطهم
قربت مياسة لسيليا وهي بتقول بصوتها الطفولي : مساء الخير ، ألف مبروك
مدت سيليا إيديها لمياسة وهي بتسلم عليها وبتقول بسعادة : ميرسي الله يبارك فيكِ
قرب القائد معاه العقرب وهو بيقدمه لمراته وبيقول : دا صديقي يا سيليا ، عيسى الغُريبي
مد العقرب إيده لسيليا وهو بيقول : عقرب أنا بس مش هأذيكِ
مسك القائد إيد العقرب وسلم عليه وهو بيقول : مبتسلمش على رجالة بالإيد هي ، متزيطش..
سيليا بإبتسامة لمياسة : ودي مراتك ؟ ماشاء الله أمورة جداً
العقرب بسُرعة قبل ما مياسة ترد : ربنا يخليكِ إدعيلنا بقى ربنا يرزقنا بالخلف الصالح
القائد من بين سنانه في ودان العقرب : لا صالح دا يبقى جوز أمك
بعدين قال بصوت عالي : إتفضلوا إقعدوا معانا
قعد عيسى وعزيز جنب بعض وقعدت مياسة جنب سيليا وهي عمالة تبُص حواليها على حاجة تنقذها من الوضع دا
سيليا بهدوء : محتاجة حاجة ؟
مياسة بإحراج : أه كُنت عاوزة أروح الحمام
سيليا بإبتسامة : تعالي هوصلك ، حظك حلو إن بنتي مع جدتها وجدها
قاموا سوا ف قال العقرب بفضول : على فين ؟
مياسة بهدوء : الحمام
العقرب : أجي معاكِ طيب ؟
القائد بغيظ : خديها يا سيليا وروحوا ..
أول ما مشيوا قال عزيز لعيسى : اللي إنت بتعمله دا غلط يا عقرب وهيعملك مشاكل
العقرب ببرود : أنا مبخافش من حد ، اللي عاوز يعمل مشاكل معايا يجهز نفسه إنه يبقى خسران
عزيز من بين سنانه : مش فرد دراع هو ، البت متجوزة يا عقرب مينفعش
العقرب بسعادة : لا ما هو طلقها
عزيز بتبريقة : خليته يطلقها يا جاحد ! كدا غلط وهزعل منك
بصله العقرب وقال : غلط ليه ياعم ؟ هي مش طيقاه ضربها وإتسبب إنها تجهض .. وبعدين نبيل إيه دا اللي تبقى دي مراته ؟ يا قائد فوق دا كُنا بنبعته يجيب سجاير لينا
القائد بهدوء : مش معنى أنها أتطلقت عشان مش عاوزة جوزها .. إنها عوزاك إنت ، إنت يُعتبر جابرها على وجودها معاك وهتكرهك زي ما كرهته ، إسمع مني أنا عارف تفكير الحريم
سرح العقرب في كلامه شوية وحس إن عنده حق
* في الحمام
سيليا بتحط روج قدام المرايا وبتقول : إتعرفتوا على بعض إزاي بقى ؟
مياسة وهي بتغسل إيديها قالت بهدوء : شغل
قفلت سيليا الروج وهي بتقول : فعلاً ؟ أنا وجوزي برضو إتعرفنا بطريقة مُشابهة .. بس الحُب بيجمع كُل إتنين ويخليهم يحاربوا ظروف ودنيا عشان يبقوا سوا ، ولا إنتِ آيه رأيك ؟
مياسة بإبتسامة : أكيد ..
* في القاعة
العقرب كان مركز على الحمامات عشان يشوف مياسة خرجت ولا لا .. لمح الباب بتاع القاعة لقى المايسترو داخل !
إتعدل العقرب وهو بيبُص بهدوء للباب وبعدين فتح بوقه وقال بصدمة : آيه اللي جاب دا هنا !
بص القائد على الباب مطرح ما العقرب باصص وبيتكلم وقال : يا نهار إسود !
إتقلبت ملامح بدر الكابر أول ما لمح المايسترو داخل فرح إبنه ، تلقائياً تحولت نظراته لكينان وقاسم اللي بصوا بغضب على الضيف ( الغير مرغوب فيه ) اللي داخل وسطهم
قام بدر من مكانه وأول ما قام .. قاموا وراه كينان وقاسم في نفس التوقيت ، لدرجة سيا وريما ومادلين إتخضوا من منظرهم وهما بيقوموا
قرب بدر للمايسترو ومسك دراعه وقال : إنت مين اللي عزمك وسمح ليك تيجي ، عشان أقطعله صوابع إيده اللي سلمتك الدعوة !

سحب المايسترو قميصه من بين صوابع بدر وهو بيقول : عيب يا زعيم إحنا مش محتاجين دعوة عشان نروح أي مكان نفسنا فيه ، ولا إنت شايف إيه
شاور بدر براسه للحرس بتوعه يمنعوا حرس المايسترو من الدخول
سحب بدر المايسترو وحاوطه قاسم وكينان لغُرفة المُضيفين ( أهل العريس والعروسة )
العقرب كان متابع اللي بيحصل من بعيد ف قال بإستغراب : مش فاهم منعوه من الدخول عشان مش معاه دعوة ولا إيه ؟
القائد وهو بيفتح زرار جاكيته : لا غالباً عشان المشاكل اللي بين المايسترو وبين حمايا بدر الكابر
بص العقرب للقائد بصدمة بعدها بص قدامه وهو بيقول بسعادة : شكلها هتولع
قربت ريما لسيا وهي بتقول بقلق : إيه اللي بيحصل دا ؟؟
سيا بخضة : مش عارفة في إيه قاموا هبوا من أماكنهم فجأة ، يارب ميكونش حد من الصحافة صور وهما ساحبين الراجل دا
مادلين بقلق وهي بتقربلهم : ما تيجوا نشوف في إيه هنفضل واقفني نتكلم كدا وسايبينهم !
ميرا وشوشت كادر وهما بيرقصوا : خدت بالك من اللي حصل عند باب القاعة ؟
كادر بقلق وهو بيشاور بعيونه لعزيز ف غمض عزيز عيونه لكادر بمعنى ركز إنت في فرحك كُله تحت السيطرة
كادر لميرا : عاوز أروح أشوف في إيه ..
ميرا بتبريقة : وهتسيبني لوحدي والصحافة هتاخد بالها ؟ معلش خلي عزيز وبابي يتصرفوا هما بيقدروا يحتووا غضب عمي بدر
كادر من بين سنانه : بتهزري صح ؟ عزيز من دا اللي بيعرف يحتوي غضب أبويا .. مفيش حد فاهم بدر الكابر قدي ولو مروحتش هنبقى مضحكة الإعلام والجرايد
* في غُرفة المُضيفين
بدر بعصبية : من إمتى كلاب المشاوير بيحضروا فرح البشوات
المايسترو بغضب : ما تفوق لنفسك بقى يا زعيم ، وإعرف إن الأيام مش ثابته وعدي الليلة بتاعة إبنك عشان أنا مش جاي أعمل مشاكل ، أنا ليا حاجة مُعينة جاي أخدها وماشي
كينان بعصبية : ما تتكلم عدل بروح اللي خلفوك من إمتى وإنت ليك صوت وبيعلى
قاسم بغضب : الكبر خلاه يخرف
المايسترو بإستفزاز : دا أنا برضو اللي غيرت جلدي وعملت نفسي بيه على حساب الماضي بتاعي ؟ كُلنا في الهوا سواا
دخلت سيا ووراها مادلين وريما وقالت سيا بتكشيرة : في آيه يا بدر ؟
بدر بغضب : يلا يا بتاع الإتاوات يا وسخ .. برا يا إبن الكلب
سيا وهي ماسكة دراعه : وطي صوتك يا بدر في إيه !
سحب دراعه من سيا وهو بيقرب للمايسترو وكينان وقاسم بيمنعوه : برا يا كلب المشاوير يا مُهمش
دخل عزيز وهو بيحاول يسحب المايسترو لبرا ف قال بدر بغضب : أيوة أيوة إسحب اللي من عينتك بعيد عن وشي
خبطت سيا على فخادها بإيديها وهي بتقول بحُزن : لا حول ولا قوة إلا بالله على الواد كادر اللي حظه قليل دا
عزيز بتكشيرة : هو إيه اللي من عينتك ! دي جزاتي عشان جاي أهدي الوضع وميحصلش مشاكل !!
بدر بعصبية : ما هو واحد إبن توفيق هيجبلنا أشكال إيه غير واحد زي دا
برق عزيز وهو بيقرب لبدر وبيقول : متجبش سيرة أبويا على لسانك
سيا بصوت عالي : كفاااية بقى
قرب بدر بغضب لعزيز وهو بيقول : أديني جبتها وأخرك هاته
وقف كادر بينهم وهو بيقول : يا بابا ، يا بابا مش وقته الله لا يسيئك
بدر وهو بيزق كادر : ملكش دعوة إنت ! هتعمل إيه يا إبن بياع القوانص ؟
عزيز بتماسك : أنا عامل حساب لبنتك ولبنتي إنت اللي سايق الغضب عليناا
سيا وهي بتخبط كادر في دراعه : ملكش دعوة إنت بالمشاكل دي روح لعروستك يا إبني ، يلا يابني الله يهديك
كادر وهو بيعدل البدلة : ما أنا مش فاهم هو يوم واحد مش قادرين تستحملوا بعض فيه يا جدعان
بدر بصوت عالي : ما تشوف جوز أختك جايبلنا ضيوف عاملين إزاي !
العقرب من على الباب عمال يضحك على المايسترو اللي بيتهزق .. وبيحرك أكتافه بشماته
المايسترو : عاملين زيك يا زعيم قبل ما تنضف
بدر مسك إزازة المياه المعدنية خبطها في راس المايسترو وهو بيقول : برا يا سافل يا إبن الجزمة .. برا يا كلب المشاوير أنا من يومي أنضف من اللي خلفوك
سيا بضيق : طلعه برا بقى يا عزيز ..!
سحبه عزيز لبرا وخرجه من القاعة كلها والعقرب عمال يقول بإستمتاع : أيوة بقى
سيليا جريت ورا عزيز وهو بيخرج المايسترو برا ، شافت مياسة العقرب واقف مُندمج في الخناقة راحت خارجة من القاعة جري من غير ما حد ياخد باله كله كان مشغول في همه
لف العقرب لقى سيليا واقفة جنب عزيز بتكلمه ومياسة مش معاها !
جري عليهم وهو بيسأل سيليا برُعب : فين ماسة !!
سيليا بتبُص حواليها : مش عارفة كانت خرجت معايا من الحمام
جري العقرب برا القاعة عشان يلحقها قبل ما تهرب منه بعيد ..