رواية التضحية الفصل الخامس 5 بقلم آية حسن

روحت شهد بعدها وطول كلمت ندى حكتلها شن صار

ندى: قلت لامي نفس اللي قلتيه لكن اني حايرة شن بناخدله انتي شن خديتي ولا مزال؟

شهد: غدوة بناخد اليوم شفت شن نبي بس، هو معاي كيف بناخد ترا قوليلي؟

ندى: اهاا اي قلتيلي، المهم يوم الخميس تعالي بكري راهو

شهد: اي اي بكري واسمعي قولي معاي نفس الكلام بش ما يشك ان كذب(وقالت شهد شن خطة يوم الخميس)

ثاني يوم واللي هو الاثنين مشت شهد للمدرسة وطلعت مشت للسوق شرت تيشيرت لونه فستكي يطلع علي عبدو يجنن وماكينة حلاقة خاطره فيها ودارتهم في بوكس مع شكلاطة وورد مشت الامور

احمد خداله آيفون جديد لان تليفونه بدي ياخد ويعطي علي قولته

نورية شرتله زبون لفاتحة احمد والعيد الجاي مزال علي رمضان حوالي شهرين.

ندى خدتله السبيدرو اللي شافاته شهد وقبل بتاخده لكن جي من نصيب ندى ومعاها كريمات وريحة في بوكس

وفات يوم الثلاثاء والاربعاء وجي يوم الخميس شهد لا كلمت عبدو لا عيدت عليه لاشي ولما هو كلمها سالها ع التاريخ قالت: واضح التاريخ اني طالعة عندي موعد في عيادة الاسنان هي باي غدوة نهدرزو

عبدو زعل من شهد رسمي وبعدها كلم ندى لعل وعسى يلقى بادرة اهتمام

ندى: خيرك طلعت بكري الصبح؟ ما شفتكش اليوم بكل.

عبدو فرح: علاش شن بتقوليلي؟ شن بتعطيني؟

ندى: ماعندي ما نعطي نبيك توصلني للمدرسة ولا عندي مانقول الا اني وامي ماشيين لحوش خنساء اليوم بنتعشو عندهم توا بيرفعنا احمد …. هي سلااام

شهد كانت جنبها واحمد ونورية والكل ضحك علي الموقف

الساعة كانت حوالي 3 الظهر احمد جاب الهدايا كلهم مرة وحدة والطورتة وقعدو يوتو في الحاجات مع العشي اللي مدايرينه وبعد المغرب كان كله تمام

شهد: احمد باللهي تكلمه تقوله يجي هني بسرعة

احمد : تمام هي

احمد: عبدو تعالى وراس وخيي المية معش تصب واني بروحي تحت الدوش بنموت لو ركبت فوق

عبدو: كيف سكرت المحل اصلا منكد تعرف اني جااي هي نبي نرقد بس

احمد: تم نستنى فيك

ندى: ما يطلع منك ي بنت عفيفة والله جبتيها اهو جاي هي

احمد: ربي يحفظك من لما تعرفنا عليك وحوشنا تغير للاحسن وولا فيه روح ومبتهج

نورية: مدامك وليتي زي بنيتي وزي خنساء ماتقولي ي اللاي حتى انتي قوليهالي توا لان هذا السبر عندنا

شهد: مدامك تبيني نقولهالك عادي مافيش مشكله

عبدو اتصل باحمد: اني لوطة افتحلي الباب

احمد: الباب مفتوح اركب الحوش فاضي اني في داري

خشت ندى ونورية للدار داخل و الحوش كله مظلم شهد قعدت واقفة علي باب الصالون جنب الضي وهو اللي كانت فيه الزينة وكل شي

عبدو راكب في الدروج يدوي ومضايق: اللي نكلمه يقولي مش فاضي ويسكر عليا حتى شهد اليوم ماعيدتش عليا وربي مامصدقها منها هلبا هكي راهو

وشوية يحس بحد يحضنه بحكم ان ظلام ماشاف حد لكن الريحة ريحة شهد والطول طول شهد

عبدو حضنها وقرب منها يبي يبوسها شهد لفتت وجهها وعطاته خدها وفتحت الضي علي جيت الكل

قالو: كل سنة وانت طيب (بصوت واحد)

عبدو يتكلم: فرحت بمفاجاتهم مع اني ليا ممكن 4 سنين نا احتفلتش بيه لكن مدام شهد السنة هادي معاي كان احلى عيد ميلاد ليا، اليوم كملت 19سنة وخشيت لل20صح فاقد بوي لكن معايامي وخوي ووخيتي وحبيبت قلبي شهد ربي ما يحرمني منها ولا من مفاجآتها لان هي العقل المدبر عارف

احمد: كل سنة وانت طيب عارفك خاطرك في آيفون مليح مايغلى عليك شي اهوا

ندى: الهدية مش ذوقي اني لكن اني شريتها وانشالله تعجبك وعقبال مية شمعة

نورية: سلم ولدي كبر سنة، مش توا تلبسه الا في فاتحة خوك وعقبال زبون عرسك يارب

وحضنت ولدها وهو باس علي راسها ويديها وحضنها تاني

شهد واقفة وشادة هديتها بعيدة شوية تتفرج عليه وموقف مع خوته وامه بالاخص كانت اللحظة حلوة والعيلة السعيدة رغم بساطتها لكن الحب عندهم مقدس

ترددت انها تقدم وتعطيه هديته قدام امه وخوته تحشمت

نورية غمزت لندى مشو للكوجينة واحمد خش داره يحط تليفونه في الشحن

شهد: كل سنة وانت حبيبي الاول، هدية بسيطة ليك

عبدو: سلمها حبي ياربي ، لكن من حقي ناخد حاجة مليحة لان عيد ميلادي اليوم صحولا؟

شهد: شنو تاني، قصدك مش حلوة الهدية؟

عبدو: حلوة لانها منك لكن نبي نبوسك بوستي اللي نستنى فيها ممكن؟

شهد: عيب ي عبدو العيلة هني تخايل امك تشوف نعرفها ما ادورش لكن ماناخدوش راحتنا لان لكن فعل ردة فعل

عبدو: بقدرة قادر تحولتي لفيلسوفة زمانك لكن تو نحصل عليك تو تشوفي

جت ندى وجي احمد وقعمزو يهدرزو كلهم وكلمو خنساء حتى هي فيديو وهدرزو عليها

شهد: ياريتك معانا والله خاطري نهدرز معاك كلهم يحبوك هني

خنساء: والله وحتى اني اسالي احمد يقولك قداش مرة قلتله ياريت تجي مع اللاي وندى نحصلو تقعميزة باهية، حقا وين اللاي مش معاكم؟

ندى: تتكلم في التليفون وصوتها ما تسمعيشي مشعارفة مع منو؟ تو شوية وتجي ،

خنساء: سلمو عليها اني بنسكر الخط وعقبال المية شمعة ي عبدو وانشالله نفرحو بيكم النت وشهودة يارب

جت نورية وكان وجهها مايتفسرش في حاجة صايرة وعطلت في التليفون قعدت حوالي ساعة مش من عادتها

شهد تشوف لعبدو وحتى هو مش فاهم شي

ندى حست امها فيها حاجة: خديتي دواك؟ سكرك مرتفع؟

نورية: اي خديت دواي خيركم سكتو هيا قصو طورطتكم وكولو صحتين اني كالعادة خلولي الطرف متاعي للصبح لان توا منقدرش سكري يرتفع بعدين هيا شهودة قصيها انتي وحطي لكل حد في صونيته هيا سلم بنتي

شهد: حااضر يا اللاي هي خلي نجيب صواني فاضيات

عبدو: شن هي الكلمة اللي قالتها؟ زي اللي قالتها خنساء ولا؟

ندى: اي زيها ومعناها ام راجلي تمام هكي كل شي تبي تعرفه

نورية مش علي بعضها في شي صاير من المكالمة لكن شن هو؟

قصت شهد الطورتة وكلو وضحكو الا نورية تضحك منغير نية ولبزو عبدو علي وجهه وجت وحدة من التلبيزات علي تيشيرت شهد كملو وقامو الصواني وضمو الكوجينة شهد وندى عبدو واحمد كل واحد لداره

ندى: شوية وبيقولك هيا نروحو بيك بري خشي لداري بدلي حوايجك وهادو خليهم هني نغسلهم ولما تجي تلقي ما تلبسي، بري توا نكمل اني الماعين

خشت شهد بتبدل في دار ندى سكرت الباب خايفة من عبدو يجيها

وكيف نحت تيشيرتها لقاته قدامها في الدار.

شهد: وووه خلعتني شن ادير هني؟ حي ع الفضيحة امك يا عبدو تزبطنا فكنا من العار

عبدو: قلتلك تو نحصل عليك ولا وبعدين اني مشحندير شي بدلي وكاني مش موجود

شهد تتكلم: مداير روحه فالح، اني كنت لابسة كت تحت التيشيرت

عبدو: كأنك يا بوزيد ماغزيت ما شفت شي

شهد: مصح وجهك شن بتشوف خلي كل شي بعدين

عبدو: اي اي بعد الزواج، غر اسمعي هيا نروح بيك لاني بنرقد بديت ننعس

شهد: عبايتي ووشاحي ونلبس الشال ونطلع هي واسمع بلا حركات امك جوها مش عاجبني ومعانا ندى اصلا في السيارة عيب راهو

عبدو: امي مش عارف خيرها وحاضر بلا حركات سلمها اللي تتحشم

طلع عبدو خش لداره بيلبس جيبوطي وبينزل يولع السيارة

نورية بصوت جااف: شهد…… يا شهد تعالي نبيك………..

طلعت شهد من الدار وبعدها عبدو بش نورية ماتلاحظش

نورية كانت متعصبة وواضح عليها ناوية شي لشهد

نورية: اسمعي ي بنت اني كلمت امك علي موضوع صاير توا روحي وهي تحكيلك

شهد: موضوع شني؟ قلتيلها عليا اني وعبدو؟

نورية: لما تروحي تعرفي خلي امك تقولك

عبدو: ي امي البنت مانبوش نظروها بالله عليك

نورية: هذا اللي عندي وتوا هيا روح بيها امها تبيها بسرعة.

شهد عيونها معبيات دموع لبست عبايتها ونزلت

عبدو: هيا ندى بتمشي معانا؟ نروح بيها؟

نورية: ندى لا برا بروحك روح بيها نوض فيسع

ندى واحمد مصدومين من لما شافو شهد تبكي ومش قادرين يتكلمو

طلع عبدو وشهد مكسورين

احمد: كيف اديري هكي للبنت كانت فرحانة معانا علاش شن دارتلك وحتى عيب مادارت مايصيرش هكي ياامي راه

نورية ضحكت من وسط قلبها : نعرف نمثل ولا؟ شن رايكم فيا؟

ندى: شن قصدك؟ كلمتي خويلة امل ولا لا؟

نورية: علاش درتها مع خنساء قبل واني ناسية؟

احمد: كذب يعني ؟ شن قلتي لامها به؟

نورية: تعرفي انتي ي فرخة ندى تفتحي فمك تعرفي حسابك، توا نحكيلكم…………… وحكت نورية اللي صار.

اني معش عرفت نورية تبصر ولا حق كلاما لشهد

الحلقة السادسة هي اللي حتوضح استنوها