رواية طفلة أرهقت قلبي الفصل الثالث 3 بقلم عائشة البشير

رواية طفلة أرهقت قلبي الفصل الثالث 3 بقلم عائشة البشير

رواية طفلة أرهقت قلبي البارت الثالث

رواية طفلة أرهقت قلبي الجزء الثالث

رواية طفلة أرهقت قلبي الحلقة الثالثة

“” ويا أسعدهُ من صباح حين تكوني أنتِ أول من تراهُ عيناي “”
دنيا كنت مقعمزه في نفس المكان “المنور” بس هالمره غير كنت نستني فيه يجي ويشرب معاي القهوه تعودت الأيام اللي فاتوا نشربها معاه، فعلا كل الأشياء ليها طعم أخر بالمشاركه😊
حسام، بإبتسامه😊: صباح الورد تبتسمي للفراغ ولا شني !!
دنيا😊: صباح النور لابس كنت نفكر في شي، وقفت بنخش إنجيب القهوه
حسام في مني تفكر زعما🤔: وشني اللي شاغل تفكيرك ياست دنيا😏
دنيا من الباب وأني خاشه: مش لازم تعرف كل شي ياسيد حسام🙄
حسام أصبر شويه الزفت مازال هلبا على حركاتك هذي مش من بدايتها هكي😓
دنيا جبت القهوه ومعاها شوكلاته وطلعت: تفضل، شكله اليوم راحت عليك نومه تأخرت شويه😁
حسام، بإبتسامه☺: أي ماهو كله منك، إمبارح ماخليتينيش نرقد
دنيا بإستغراب🤔: كيف شني دخلي أني؟؟
حسام حطيت عيوني في عيونها وبهيام😍: حضرة جنابك قعدتي حاجز بين عيوني والنوم، خيالك قاعد قدام عيوني طول الوقت، نخاف نرقد وماتجينيش في الحلم
دنيا مافهمتش قصده ولشني بيوصل بالضبط، أحسن شي نتجاهله😒، وبتساؤل🤔: عمي مصطفي وعمتي أمتي بتوصل طيارتهم؟؟

 

 

حسام عارف كلامي كبير شويه على قدرة إستيعابها، من تجاهلها لكلامي واضح أنها مش فاهمه شي هالطفله، أبتسمت😊: س 3 توصل طيارتهم معناها بعد العصر يكونو في الحوش
دنيا: أها يوصلو بالسلامه ان شاءالله معناها الليله عشاكم عندنا
حسام😊: لا ليش تعبو روحكم مافيش داعي
دنيا: لا تعبكم راحه وبعدين أصلا من قبل منسقين أني وبابا بس لما سافرت عمتي أجلناها شويه
حسام، بفرحه☺: بصراحه أني مانقدرش نرفض نهائي وخصوصا لو كان العشي من إيديك، نبي نعرف بس أنتي أمتي تعلمتي هذا كله كل ليله ننصدم في العشي تقول عليه من المطعم😍
دنيا، بإبتسامه😊: بجد تأكل فيه يعني !! والله كل ليله نقول أكيده لوحه في الكناسه ماتوقعتش يعجبك تطيبي
حسام😍: كل شي منك أنت يعجبني وغصبآ عني وبعدين حتى السم راضي بيه من إيديك
دنيا، بضحكه😂: ههههههههه لا هلبا هكي
“” وكـأنمــا سـعـادتي مـرهـــونه بضحكتهــا
تُشـــع فـي روحِي نــورا إذا إبتسمـت “”
‏
حسام بغضب مصطنع: أسسسس أهفتي وخلي فيا شوية عقل🤤، باش نقدر نمسك روحي قدامك
دنيا طرمت شواربي وبزعل☹: ليش أني شن درت؟؟
حسام ياربي صبرني هذي أكيد ناويه تجنني، مش عارفه أنها بحركاتها هذي قاعده ترقيلي في الحراره🤒: عارفه أنك شريره😍
دنيا بصدمه😲: أني حرام عليك، لو كنت شريره تلقاني مقعمزه معاك توا😏
حسام😍: أي شريره لأنك قادره تخطفي كل شي فيا بنظره منك
شريره لأنك أستوليتي على تفكيري من غير إستئذان😊
شريره لأنك تتعمدي تربكيني وتوتريني بضحكتك وبحركاتك🤤
دنيا حاسه كلامه تقول ألغاز😪، بتوتر😳: ممكن تفهمني شني……وسكتت لما سمعت تليفوني يرن، ااااف هند شني تبي هذي في هالصبح، وفتحت الخط: صباح الورد، أها أي ماعنديش نيه هذا باش قتله ماتخطمش عليا، أي تمام، هههههه أني بروحي ماعنديش أصلا، عادى مش مهم بكل، باهي مافيك من وجيج، خلاص نحاول نجيبهولك حاضر😊، ماشي سلام
حسام كنت مركز عليها وكأني بننسخها نسخ😍 حركاتها الطفوليه اللي تطلع بعفويه، نظراتها البريئه ولمعة عيونها، حتى لون خدودها اللي يتغير من موقف للثاني، قدرت تخليني نغرق🤤في كل تفاصيلها من غير أي مجهود منها، بإبتسامه😊: مني هذي اللي مكلماتك في هالوقت؟
دنيا: هذي هند صاحبتي تسأل علاش مامشيتش للمدرسه،😊 ((طبعا أكيد مش راح نقوله أنها تبي رقمك وإمدرهتلي كبدي بيك من يوم شافاتك😒))
حسام وكأني كنت ناسي وإذكرت قمت تليفوني وشفت س9: مسرع جت 9 اللطف، تعرفي الوقت معاك يفوت بدون مانحس بيه😍، أي صح أنتي خيرك مامشيتش للمدرسه؟
دنيا بعفويه☺: تمام خليك معاي ديمه إمالا باش ماتحسش بشي، ماعندناش شي مهم مش لازم نمشي
حسام، بهيام😍: ومني قالك أني راح نخليك أصلا ماصدقت أني لقيتك، تحلمي مازال تغيبي عليا يوم
دنيا، رغم أني مش فاهمه شني يقصد بكلامه، بس توترت من نظراته حاسه وكأنه بيأكلني بعيونه،😏: أنت شكلك إستانست هلبا خلاص راهو عطلت على خدمتك، ولهيتني وأني عندي ألف حاجه بنديرها🙄
حسام: عادي هوا محل أمتي مانفتحه نفتحه بس مادامني مضايقك خلي إنوض، ووقفت بزعل🙁
دنيا بضحكه: هههههه أي مضايقني وهلبا بصراحه لدرجة حتى قهوتي معاش ليها طعم من دونك😁
حسام قاعده تجنني بكلامها وهيا زي العبيطه مش فاهمه شي، كيف إندير معاها هالهبله هذي🤨: نوضي خشي بسرعه من قدامي خير ماناكلك توا، وطلعت وأني نضحك ع منظرها وهيا خايفه وخشت تجري😅
“”ياذات الإبتسامة الجذابه
وذات العيون الساحره
سألتك بالله لاتقتليني❤””

 

 

دنيا مشي حسام وإستنيت شويه لين تأكدت أنه طلع، وخشيت خديت المفتاح وتوجهت لحوش عمتي درت عليه دوره هويته ونشفته وعطرته وبعد ماكملت الدروج والدور الأرضي قعدت حايره بين نرقي لغرفة حسام أو لا، وبعد تفكير ركبت وأني متردده فتحت الباب وإنصدمت من منظر الدار الكارثي😵 مقلوبه الفوقي لوطي😲 هذا غير كان عايش بروحه سبعه سنين كيف كان إمداير إمالا !!
رتبت الحوايج النظاف اللي كانو كلهم ملوحات برا والدولاب فاضي، وحطيت اللي يبو غسل في الغساله، رتبت السرير وحولت الطواسي متاع الميه والقهوه اللي من غير عدد، ونشفت الأرضيه ومسحت أثاث الدار، داره بروحها خدت مني وقت أكثر من الحوش كله، كانت فيه فرده من الدولاب مسكره بالمفتاح إنتابني الفضول زعما شني فيها !! أنتي شني دخلك يادنيا تي وراك مليون حاجه تبي الديران ركزتي غير على الفرده المسكره من الدولاب🤦‍♀️
رجعت للحوش وبديت في التجهيز للعشي تقول عليا شغاله ولا عزوز في ال 50 كل شي عليا😪، بس مطره أمي مش راضيه على عزومة عمتي لأنها مش فاضيه بس أني سكرت رأسي عليها وقتلها توا إندير كل شي بروحي😓
في حوش مفتاح، مقعمزين علا وسنيه بعد ماروحو من المدرسه يقرو لإمتحان بكرا
علا، بتفكير🤔: أشبح شني إمدايرين العشي عيلة عمك؟
سنيه😒: على أساس مش عيلة عمك حتى أنتي !! أكيد جايبينه واتي هاذم، بطيبهولك ناديه إمالا ؟؟
علا: زعما !! أكيده اليوم قاعده وهيا اللي مطيبه على خاطر العزومه، ومرات دنيا هيا اللي مطيبه
سنيه🙄: تي شني تعرف العيله هذي !! وبعدين علاش نشغلو روحنا بالتفكير توا نمشو ونشوفو
علا بعدم إهتمام: باهي خلينا نلهو في قرايتنا توا باش نلقو شني إنجاوبو في إمتحان غدوه
سنيه، بتوتر: علا شني رأيك في محمد خوي؟؟
علا بإستغراب🙄: شني رأيي !! خيره محمد خوك !! عادي يعني زيه زي هالشباب
سنيه، بإبتسامه: عاجبك ولا لا؟؟
علا، بعدم إهتمام: لا عاجبني ولا مش عاجبني، عادي نشوف فيه زي عادل، بس ليش هالأسئله توا شن خطرلك أنتي؟؟
سنيه، بتوتر: لا شي مجرد سؤال، بس على قد مانحبك نتمني تكوني مرت خوي وتعيشي معانا
علا بنص عين😒: بطلي كذب على أساس أني عايشه في المريخ يعني، ماهو الحياش في جنب بعضهم وديمه أنتي عندي ولا أني عندك، وبعدين ليش أني مانأخدكش لخوي وتقعدي معاي😉
سنيه، بفرحه☺: ياريت والله، أنتي أكثر واحده عارفه قداش نحب عادل من لما كنت صغيره، وتنهدت بحزن😔: بس هوا مايبينيش وعلى قد مالمحتله ديمه يصد فيا، ويقولي أنتي عندي زيك زي عبير وعلا، شكله عنده واحده
علا، بنفي: لا لا لو كان في واحده في باله راهو لاحظنا عليه، متأكده ماعنده حد، بس أنتي خليك في جرته توا يجيه يوم ويرومك وين بيلقى زيك أصلا

 

 

سنيه تنهدت بحزن😔، وإذكرت موضوع محمد: توا مش هذا موضوعنا، خلينا فيك أنتي ومحمد ماقتيليش شن رأيك فيه؟؟
علا🙄: واضح أنه فيه حاجه !! قولي شني فيه من غير لف ودوران
سنيه بتوتر: بصراحه هوا كلمني وقالي جسيلي نبضها وشوفي شني رأيها فيا مايبيش يكلم بوي ويقوله يكلم عمي عليك لين يأخذ الموافقه منك قبل
علا، بخوف: كويس اللي داره مانبيش الموضوع يوصل لبوي أو خوتي خايفه يجبروني عليه، وبعدين أنتي تعرفي مني هوا اللي نبيه ومستحيل نشوف غيره، قوليله علا قتلك ربي يهنيك مع غيري
سنيه،بنص عين: حتى بعد هالسنين قاعده في عماك الأول، هوا شني فيه زايد على خوي أصلا حتى الشبح مايشبحلك ولا قايمك من أرضك😏
علا، بغضب😠: أنتي عارفه مانحبش حد يناقشني فيه الموضوع هذا، وبعدين سواء هوا ولا غيره أني محمد مستحيل نشوفله أكثر من أخ، فكينا منها الدوه هذي وخلينا نلهو في الهم اللي قدامنا، ورجعت ركزت على كتاباتي
سنيه شافتلها بنضرة كره🤨 وهيا واجعها خوها اللي واضح من كلامه على علا أنه يحبها وشاريها بس هيا مش مقدراته وتجري وراء غيره
حسام مشيت للمطار وأستقبلت أمي وبوي ومروحين في السياره
سعاد: كيف حال خوالك ياحسام
حسام: على المسموع كلهم كويسيين ماشفت حد أني
سعاد بأسف: والله مافيهم واحد رفع التليفون وقال نشوف أختي، حتي بالنت الرخيص، صدق اللي قال بعيد ع العين بعيد ع الخاطر
مصطفي: كل واحد لاهي في روحه وعنده ماشاغله، أنت ياحسام شني إمداير في ماكلتك وحوايجك؟ جوك خواتك !!
حسام: لا واللهي ماحد جي وبعدين أني نطلع من الصبح مانروحش لبعد المغرب هما من الجيان غير أتصلو سألو بالك تبي حاجه😏

 

 

مصطفي بغضب😠: عارفهم أني شفتي تربيتك يافالحه هذا غير كلمتيهم ووصيتيهم على خوهم، وحاتم جاك؟؟ ولا حتى هو أحرف منهم !!
حسام شغال فتنه😉: لا أني ماشفتاش لكن ولده كل ليله نشوف فيه يلعب في حوش خالي لما نمشي لعادل، كلمني مره قالي تعالا تعشى معانا قتله مادورنيش أموري طيبه
مصطفي: هذا غير أمك قبل مانطلعو تتصل بي كل واحد بروحه وتوصي فيهم خوك ياحاتم خوك سلوى خوك ياسميره، وحتي عبير كلمتها شفتيهم عدلو عليك هلبا ماشاء الله
سعاد مش لاقيه ماتقول وكيف بتبررلهم، بأسف😞: ربي يهديهم وخلاص، باهي وين تأكل ياوليدي؟
حسام بإبتسامه😊:دنيا بنت خوك مش مقصره ماشاء الله، تجيبلي في الفطور والعشي، والغذي أني أصلا في المحل
سعاد بفرحه☺: بنيتي ربي يحفظها عارفتها تهنيني
مصطفي😊: أي هذي اللي تستاهل تقولي عليها بنيتي مش اللي دارو عيله ونسو عيلتهم الأصليه تقول جايين من الهواء ولا طول جو كبار هكي ماحد تعب وشقى عليهم باش وصلهم لهالمرحله
سعاد بغضب😠: ديما وانت حاط اللوم عليا راهم صغارك حتى أنت مش أني بس شني تبيني إنديرلهم كأنهم طالعين منكرين لعماتهم ولا نسيت خواتك كيف لوحولنا بوك بعد ماطاح على الفراش ولاعاد جوه ولا سألو عليه، وأني اللي عانيته لين مات😒
مصطفي، بعصبيه😡: وأنتي شوره معاش بتنسي زيدي ضيعي أجرك اللي درتيه بكلامك، وبعدين شن دخل خواتي بناتك أنتي اللي ماعرفتيش تربيهم، حطاها في خواتي توا🤨
سعاد بغضب😠: أستغفر الله العظيم واتوب اليه الصبر ياربي الواحد يسكت خيرله، أمتي يقدروك في الدوه أنت😒
حسام تكلمت بسرعه وقطعت على بوي اللي معصب قبل مايتكلم ويزيد يحتد النقاش بينهم أكثر، وبضحكه: تعوذو من الشيطان عاد، عيب راهو حتي تتعاركو قدامي راعو مشاعري النفسيه قاعد صغير على المشاكل أني😅
سعاد ضحكت على كلام حسام😂: أي صغير أنت اللي في عمرك توا بصغارهم
حسام: باهي هيا حركولنا أرواحكم 😉وأني مانقولش لا راهو😁
مصطفي🤨: تحشم على وجهك ياولد وأنتم عرق الحشم قطعتوه خلاص
حسام😁: سامحنا ياحويج بنغيرلكم جوكم بس فكونا من النكد الواحد مش ناقصه راهو، ماقلتوليش شني جوها سندس !! وكيف حال خالد وحموده؟

 

 

وصلنا للحوش ونزلو أمي وبوي وخشو قبلي وأني نزلت الشناطي ولحقتهم لقيتهم قاعدين واقفين قدام الباب يستنو فيا، ضحكت: هههههه أخر وقت أني اللي نفتحلكم حوشكم
سعاد: أني مفتاحي خليته عند دنيا، وبوك قال خلاه في دولابه
مصطفي🤨: بطل ضحك وأفتح الباب
حسام فتحت الباب، وتفاجأت من النظام اللي قاعد نشوف فيه ولاقتني الروايح اللي تفتح النفس، تلفتت لبوي وأمي اللي واقفين وراي وبصدمه: هذا مش حوشنا شكله فيه حد بدلهولنا😅
مصطفي😠: أستغفر الله العظيم، حول ياولد من قدامي، تاعب ومش ناقصني هبالك، ودف حسام من قدامه وخش، بإبتسامه😊: ماشاء الله الحوش أنظف من لما أمك كانت فيه، مانحسابش الغربه خلاتك منظم هكي
حسام حيي كان شفتوه النظام متاعي كيف كان الصبح، ضحكت: باش تعرف الرجاله بس، تلفتت لأمي شفتي كيف مانبيش إنتعبك طول اليوم وأني نحك ونلمع
سعاد، بنص عين😒: أنت ماضميت دارك !! بتحك وتلمعلي الحوش !! ، هذا ماديره إلا دنيا هيا الوحيده اللي مريحتني ربي يحميها إن شاءالله😊
حسام🤨: أنتي هذا اللي هامك الست دنيا وخلاص، راهو خالي سعيد عازمنا على العشي الليله😐، ورقيت لداري بنأخذ خيط الشحن، وأنبهرت من شكل الدار اللي تحولت تحويل جذري من الوضع اللي خليتها عليه الصبح😍 أسم الله العظيم وصلت حتى أهني هذي، لمساتها مميزه في كل شي حتي طريقة ترتيبها للأشياء تلفت النظر
“” أستطاعت أن تأسرني باأبسط الأشياء وأتفهها❤😍 “”
دنيا ليا حوالي ال 5 ساعات في المطبخ، شوقني العزايم شني درت في روحي أني😪، توجهت للباب لما سمعته يطق، هذا أكيده مؤيد وصيته على شوية حاجات

 

 

دنيا فتحت الباب، بإبتسامه😊: أهلين يامؤيد تفضل
مؤيد🤨: تي شني تفضل غير شدي مني الزفت إيديا إنشلو
دنيا قدمت وخديت منه الكيسات وخشينا مع بعض للمطبخ، وبخجل: سامحني يامؤيد ديمه متعباتك معاي
مؤيد😊: ولايهمك ياطشه ترديهولي في عرسي ان شاءالله، بس شني هذا إمدايره حفلة مشاوي ولا عزومة عشي؟؟
دنيا😅: إن شاءالله غير أعقل بس، شن رأيك مش حلوه الفكره !! فكرت نغير شويه من الروتين قلت إندير مشاوي ونقعمزو برا في المزرعه مادامه الجو حلو، قصدك بايخه اللقطه😧
مؤيد قلت خلي نلعب باأعصابها شويه🤭، بهزوه😏: بايخه بكل مش لقطه شني بيقولو عليكم ماعندهمش حوش قعمزونا برا، فيها تقليل لهيبة الناس اللي جاينكم وبعدين شني مشاوي هاذم أحني مايمشيش معانا إلا قعد كسكسي ولا بازين، ماتحشميش روحك قدامهم ديري حاجه مسقيه
دنيا حييي عليا 😰توا شني بندير تعبي كله راح ع الفاضي، وين نقدرهم قبيله أني إنديرلهم حاجه مسقيه، حاسه روحي دموعي ع وشك الإنهيار، برجاء🥺: باللهي كيف إندير !! كله من أمي اللي هاربه ومخليتني ديمه نتلقى في الرعايش بروحي، تي هيا مولاة الحوش مش أني، شني الحل يامؤيد توا !! حييي عليا كيف بنتصرف ومعاش مزال وقت ع المغرب😱
مؤيد بتفكير🤔: مافيش إلا حل واحد
دنيا، برجاء🥺: واللي هوا قول بسرعه أنقذني
مؤيد، بضحكه: تعزميني ع العشي معاكم باش تولى فكرة المشاوي مليحه وصقع عليهم😅
دنيا بإستغراب🤔: هذا الحل تي شني تخرط أنت🙄
مؤيد بضحكه: ههههه ياأم العبط أنتي إنبصر عليك والله فكرة مليحه ومافيش زيها كنت بنخوفك بس😂، وتوجهت للرخامه اللي عليها عرم حفاضات معبيات😍: ترا أنشوف شني إمدايره
دنيا هالبليد هذا رعشني ونزلي الميه في ركابي توا نوريك مالقيتش قدامي إلا الموس اللي كنت نشرح بيه في اللحم🔪، وبعصبيه😡: صار تتسهوك عليا صار بتخوفني👿

 

 

مؤيد أول ماشفتها شاده الموس ومتوجه جيهتي هربت طول للباب، من قدام الباب بصوت عالي😜: يامهبوله لوحي اللي في إيدك توا يجرحك ماتعرفيش تشديه كويس
دنيا ياعليك بلوه قاعد يتسهوك🤨: تعالا خليك وين هارب بنديرك مع المشاوي🔪😈
مؤيد😟: كان الود ودي بس أعفيني واللهي عندي موعد، وهربت جري🏃 لما طلعت وقاعده شاده الموس في إيدها🔪
دنيا قعدت واقفه قدام الباب ومعصبه😤من مؤيد اللي قدر يستفزني ويضحك عليا وهرب في لمح البصر وماشفتش إلا غبرته، لين تفاجأت من الصوت اللي وراى😣
أحمد😉: خيره الحلو والعتله مني مزعلك بس وأني نفنيهولك من على وجه الأرض
دنيا أيوه كملت ناقصني غير زولك الباهي، بغضب😠: باللهي أخطاني ماعنديش خلوق لتفاهتك، وقمت الموس في وجهه🔪
أحمد بضحكه: هههههه لا واللهي كبرتي وبديتي حتى تشدي في الموس على الرجاله ياطرف، وبحركه سريعه لويت أيدها وطيحت الموس لوطه😏
دنيا بعصبيه😡: ياحيوان أنت شني تحساب روحك أطلق يدي، أي رجاله اللي حاسب روحك منهم ياتافه😏
أحمد بغضب😠: لا أنتي تماديتي هلبا ولسانك هذا يبي القطع، راجل وغصب عنك لو عندك شك وتبيني نثبتلك رجولتي ماعنديش مانع 😉
دنيا خفت😟 لما فهمت تفاهة كلامه، بس مش راح نبينله خوفي ونسمحله يستقوي عليا، وبغضب😠: ياحيوان خزي عليك وعلى وجهك أطلقني وإلا واللهي تشوف شي مش راح يعجب رجولتك اللي مفتخر بيها بكل😏
أحمد😌: مش طالقك تعرفي ياحلوه🤤 أحلى شي فيك قوتك هذي اللي راح نكسرهالك بإيدي وتشوفي، وبهزوه😏: وريني اللي تقدري إديريه هيا خلي إنشوفو شني يطلع من طرف زيك
دنيا زدت خفت😰 أكثر ومش عارفه شني إندير، بس إستغربت😮 من أحمد اللي طلق أيدي بسرعه ومشي يجري لحوشهم، تلفتت للخلف وأنتبهت لحسام اللي طالع من حوشهم، يعني أحمد شافه هذا علاش هرب😕
حسام عصبت😡 لما شفتها واقفه بمنظرها هذا، بي بيجامه شرط لحد الركبه وتيشرت ربع كم، وقربت منها وأني الشياطين يتنطاطو في وجهي، وبعصبيه😡: أنتي شني واقفه إديري إهنايا ها عاجباتك الوقفه بمنظرك هذا والناس تتفرج عليك
دنيا قعدت نتلفت حواليا وبإستغراب🙄: أي ناس اللي تتفرج !!
حسام،زفرت بغضب😤: العمارات هاذم وهوا يأشر لعمارتين على الثالث مقابلينا في الجهة اللي قدام مزرعتنا، كل شي باين من عندهم معاش تطلعي من أهناي بمنظرك هذا ولا مخصوص طالعه باش توري روحك يانعن…… 🤬
دنيا برادة مؤيد، وحقارة أحمد، وتوا أستفزازه هوا قداش بنتحمل أني، بعصبيه😡: تعرفو تخلوني في حالى كرهتوني في نفسي نقتل روحي ونريحكم، وطبست قمت الموس وخشيت بسرعه وخليت حسام اللي قعد واقف مصدوم من كلامي😲
حسام هذي شني تقول !! شني قصدها !! وتفاجأت من الموس اللي قاماته شني كانت إدير !! تسلل الخوف لقلبي😟 زعما إدير حاجه في روحها، قربت بسرعه وطقيت على الباب، بصوت عالى: دنيا تسمعي فيا !!
دنيا من الداخل، بغضب: خليني في حالي

 

 

حسام كويس أنها ترد عليا😓، خفت عليها من الكلام اللي قالاته مرات إدير في روحها حاجه ماقدرتش نطلع ونرجع للمحل، رجعت قعمزت في جنب المنور متاعهم ومره مره نقرب من بابهم الخارجي متاع المطبخ ونزفر براحه لما نسمع حركه في المطبخ
قعدت مقعمز لين سمعت خالى روح تنهدت براحه ونضت خشيت لحوشنا وأني حاس بروحي فاشل من كثر خوفي عليها، اااااه ياربي معاش عرفت نفرح ولا نحزن باللي قاعد يصير معاي، نتمني نكون أقرب ليها من النفس بس مش عارف كيف نخليها تحبني هالطفله
دنيا: بابا وين ماما مش على أساس بتروح بكري
سعيد: قالت شويه وتوصل شني صار فيك أنتي
دنيا، بإبتسامه: شبه كل شي واتي، تعالا خلينا نفرشو برا معاش وقت مغرب
سعيد: باهي هيا
دنيا حطيت طاولتين في المنور ورتبت عليهم طرامس الشاهي والقهوة والكيك والحلويات والنواشف وحافظات السلايط، وفرشت مع بابا المكانات اللي بنقعمزو فيهم، وخليت بابا يولع في النار للشواء وخشيت دوشت بسرعه ولبست وطلعت لبابا حافظات اللحم والدجاج والحوت
سعيد: خلي نستنوهم لين يجو توا الشباب يشدوه الشواء
دنيا شويه وبدو يجو عمامي وعمتي والكل عجبتهم فكرتي لكسر الروتين
سعاد بفرحه: ماشاء الله عليك يابنيتي والله أحسن مادرتي الهواء يرد الروح
مبروك: أي والله هالحياش طبقو على قلوبنا
فاطمه مرت بشير، بحقد: شني هيا الحاجه الكبيره يعني كلها تفريشه في الحوازه😏
سعاد: وعلاش مادرتيها مادامها مش حاجه كبيره
مفتاح: خلاص باللهي خلونا مقعمزين ومرتاحين فكونا من الكلام الزايد
سعيد، بإبتسامه: أنستونا ياعويله

 

 

مصطفي: الله إيأنسك، تي واللهي ليك وحشه ياسعيد، معاش شفناك بكل هالعمل اللي واخذك طول اليوم ريح روحك شويه ياراجل، أهم شي صحتك راهو
سعيد: واللهي هذا هو نجرو في جرة هالدنيا واللي مايتعبش معاش يحصل شي
حسام: السلام عليكم كيف حالكم ياعويله؟
الكل: وعليكم السلام، أهلين، أهلا
عادل مقعمز على الشوايه، وبضحكه: تعالا ياحسام مكانك إهنايا بحداي😅
حسام توجهت لعادل ومحمد وسامر اللي مقعمزين جنب بعض: شني حاجات جديده شواء وحركات😏
عادل بإبتسامه😊: أي مليحه الفكره تغير روتين، دنيا هيا اللي مخططه لهذا كله قال عمي
حسام مش عاجبني كلام عادل على دنيا، حاس انه فيه شي، 😒: وانت خيرك فرحان وضحكتك من الودن للودن، شني فيه فرحنا معاك
عادل، بتوتر: لا عادي مافيه شيء، شني الواحد ممنوع حتى يضحك ولا كيف
حسام شفتله بنص عين وسكتت، ورجعت إندور عليها بعيوني من لما جيت ماقابلتنيش، بس إنتبهت لمرت خالى لما تكلمت
سالمه مرت مفتاح: نوضو يابنات تحركو ياسركم من هالتليفونات شوفو دنيا الداخل بالك تبي حاجه
حسام معناها الداخل هيا، وزفرت بملل لما شفت أحمد وسعد وسامح جايين جيهتنا
أحمد بهزوه: شفتو الطرف مايطلع منها ولا أم الطرف اللي منظمه الموضوع زعما !!
حسام، بغضب: تعرف تسكر فمك وتحترم نفسك ولا نوض إقلب خليقتك من قدامي
محمد بعصبيه😡: فكنا منك يابلي أنت
أحمد: حالة كلكم نفسيات الواحد معاش تبوه يتكلم ولا كيف، والله لو مش على خاطر نبي نمتع عيوني بشوفت الطرف مانجيكم بكل
حسام من لما شفته جاي وأني مقعمز على أعصابي ومش طايقه، بس هذا زودها معاش قدرت نسيطر على روحي وماحسيت على شي إلا وأني نايض وطايح فيه ضرب: ينعن🤬
ناضو الولاد يجرو وفكو أحمد من تحت حسام اللي محاصره برجليه وطايح فيه بجهده ومايجيب
الرجاله كلهم ناضو بفزع لما سمعو أصوات الشباب وسبان حسام، سعيد بخوف: خيركم شني صار؟؟
مبروك وهوا يشوف لأحمد اللي شادينه محمد وسعد وخشمه وفمه دم، بعصبيه: شني فيه تكلمو؟؟
عادل، تكلم بسرعه: مافيه شي ياعمي، عارفه أحمد وبرادته زي كل مره، وحسام قاعد مش واخذ عليه هذا باش ماتحملش كلامه بس
مصطفي، بغضب: خيرك ياحسام شني قلنا عليها عصبيتك الزايده هذي، أعتذر من ولد خالك بسرعه
حسام بغضب: هوا اللي غالط ومش محترم نفسه ويقول في كلام مايقبله حد
بشير: خلاص حصل خير ياجماعه ماتخربوش علينا هالتقعميزه الباهيه، سعد خود أحمد وبرا للحوش
فوزيه بخوف: زعما خيرهم شني فيه، تعالي ياسرور خيره خوك
سرور بملل: أحمد زي عادته مايقعمزش هافت، أشبح شني قايل لحسام
دنيا كنت مشغوله في المطبخ، طلعو البنات لما سمعو دوشة الشباب بس أني ماعدلتش وطول أستغليت طلوع البنات وخديت تليفوني ورنيت على ماما اللي زودتها وينها هذي، وزفرت بغضب لما لقيته مقفل
حسام خشيت الداخل بحجة أني نبي الحمام، وإنتبهت لدنيا اللي واقفه في المطبخ، قربت وأني نشوف في لبسها اللي مخلي جسمها مغري فعلا وزادت عصبيتي من منظرها، وبغضب😠: عاجبك اللي صاير صح، أصلا أنتي اللي عاطيتيهم مجال باش يتجرأو ويقولو عليك هالكلام

 

 

دنيا تلفتت بإستغراب🙄: أنت شني تقول !! باللهي فكني منك بروحي مضايقه مش وقت نفسياتك بكل
حسام مسكت إيدها وجبدتها معاي لأول دار قابلتني دخلتها وخشيت وسكرت الباب😡
دنيا بصدمه😯: أنت شني إدير !! وين تحساب روحك !! أفتح الباب وحول من قدامي أحسنلك
حسام بعصبيه😡: ممكن تفهميني أمتي بتكبري وتحسني من شكلك، أنتي مش منتبهه للبسك المستفز، أنتي بشكلك هذا قاعده تقدمي في إغراءات للشباب صعب يقدرو يقاوموك وأني أولهم
دنيا هذا كيف يقولي كلام زي هذا، علاش يحكي معاي هكي !! حاسه روحي خلاص معاش قادره نقاوم أكثر كل مره ننصدم من اللي حولي أكثر قعمزت على الصالون، وبرجاء🥺: ممكن تفهموني شني تبو مني !! أني فاش غلطت معاكم !! ليش كلكم تجرحو وتهينو فيا😢
حسام ليش درت هكي أني كأن ممكن نفهمها بطريقه ثانيه من غير مانجرحها بس من عصبيتي معاش عرفت روحي شني إنقول، كسرت قلبي💔 بدموعها، قربت منها بسرعه، وبأسف😞: أني أسف مش قصدي نجرحك أو نهينك والله، بس أفهميني ورأس أمك مانقدرش نسمع حد يتغزل فيك أو يقول عليك كلمه قدامي وأني نقعد ساكت، كأن نلقا نسكر عيون الكل ومانخلي حد يشوفك، عارفك مش فاهمه كلامي، بس ساعديني راني خلاص معاش قادر نتحمل
دنيا، بإستعباط🙂: باهي ممكن تفهمني شني المطلوب مني، ليش الكل مايحبونيش !! شني درتلهم أني !! وبعدين أني شني ذنبي باش تقولي الكلام اللي قلته
حسام😔 ندمت لأني تكلمت وزعلتها ونكدت عليها بأسف😞: ذنبك أنك مش عارفه كيف تحافظي على روحك وتخفي جمالك هذا على عيون الكل، مخليه روحك عرضه للي يسوي واللي مايسواش
دنيا😞: أني ماعنديش ذنب في شي مافيش حد نبهني أو نصحني وقالي كيف ممكن نحافظ على روحي، وبرجاء🥺: ممكن تقولي وتفهمني كيف إندير بس من غير عصبيه وعياط
حسام أبتسمت على كلامها طفله بكل معني الكلمه، بكلمه تهديها وبكلمه تعصبها، وبنظره واحده تسحرك وتخليك إذوب فيها😍: تمام معناها قدامنا مشوار طويل ياطفلتي، بس أول شي نوضي غيري حوايجك هاذم قبل ماتطلعي وألبسي حاجه أوسع وأطول من هكي
دنيا بغضب: بس شني دخلك أنت في لبسي ؟؟
حسام صبرك ياربي نطلع أفضل ماندير شي نندم عليه، بعصبيه😡: خلاص ديري اللي يريحك يادنيا، وطلعت وقربعت الباب، كنت نبي نروح للحوش بس مش قادر نخليها قدام الكل وأني مش معاها، رجعت وقعمزت جنب الشباب وأني معصب وواصل حدي

 

 

دنيا فعلا مش فاهمه شي من الكلام اللي حكاه حسام بس لاحظت أنه خايف عليا ممكن يكون هوا اول شخص ينصحني بشيء لمصلحتي زي مافهمت من كلامه، بس ماكنت نبي نعطي مجال لحد يتحكم فيا أو يفرض رأيه عليا، رافضه فكرة أني نغير من نفسي على خاطر حد، تنهدت بحزن ونظت طلعت، وزفرت براحه لما إنفتح باب الحوش وخشت ماما: وأخيرا شرفتي وينك لتوا تحشمت قدامهم ومعاش عرفت شني إنقول
ناديه: خلاص أهو جيت مش وقته الكلام هذا خلي نخش نبدل بسرعه ونجي
دنيا: وخيرهم حوايجك هاذم ماتطلعيش بيهم على الأقل سلمي عليهم وبعدين خشي
ناديه لا عيب كيف نطلع هكي قدام عمامك فكيني منهم يقعدو يفنصو فيا وعيونهم قريب يطلعو، خلي نبدل ونلبس حاجه واسعه ومستوره أحسن
دنيا وكأنه كلام ماما جي في الوقت المناسب باش يأكدلي أنه حسام كان يحكي لمصلحتي وأنه خايف عليا من نظرات الشباب المتفحصه لجسمي، تلفتت ورجعت لداري
محمد طول الوقت مركز على علا اللي متجاهلاته على طول وأول ماتجي عينها في عينه تشوفله بهزوه وتقلب وجهها
حسام كنت نشوف للجمر وحاس وكأنه والع في قلبي شني اللي قاعد يصير معاي معقوله حبيتها لهالدرجه أمتي لحقت أصلا، قمت عيوني لما سمعت صوتها وأرتسمت إبتسامه عريضه☺ على وجهي من غير إراده مني لما شفتها طالعه ومغيره اللي كانت لابساته بسروال أوسع وبلوزه أطول شويه من الأولى، فرحت لأنها سمعت كلامي وخدت رأيي😍 حتى لو عاندت في البدايه، بس الأهم أنها تكون مقتنعه بهالشي
دنيا أبتسمت لحسام اللي كان مركز عليا وواضح فرحان باأني سمعت كلامه وغيرت لبسي، بس تفاجأت بأنه تجاهلني لما جت عيني في عينه وتلفت للجهة الثانيه
بشير: والله كل شيء ماشاء الله، الواحد لازمه تغيرت جو زي هاذي كل مره
مصطفي: شني رأيكم كل ليلة خميس إنديروها عند واحد، منه تغيرت جو ومنه نلتمو على الخير إن شاءالله
مفتاح ومبروك وبشير كلهم أبدو بالموافقه وعاجبهم القرار
مصطفي تلفت لسعيد اللي قعد ساكت: شني رأيك ياسعيد
سعيد، بخجل: ماهو أني طبيعة عملي تتحكم فيا، مرات فاضي ومرات لا
سعاد: خلاص سعيد خلوه على حسب عمله لو فاضي يجي لو مش فاضي سلامته
مفتاح: خلاص إمالا تفاهمنا، هيا نستأذنو تصبحو على خير
دنيا لأول مره نحس أنه عندي عيله هكي ممكن لأنه اول مره يلتمو في حوشنا☺، ولا لأنه أني اللي كنت عازله روحي عليهم وديمه متجنبه أسألتهم وتدخلهم في خصوصيات حياتنا، مش قادره نفهم السبب الرئيسى للفرحه اللي قاعده نحس بيها، صح الأهل نعمه وعزوه، تمنيت أنه عمامي يدومو على هالحال، ومايكونوش فعلا زي الزبده أول مايطلع عليهم النهار إذوب الأقنعه اللي كانو لابسينها الليله وتبان وجوههم الحقيقيه😔
حسام طول التقعميزه كنت متجاهل دنيا على قد مانقدر وحتى لما تكلمني مانردش عليها، كنت نبيها تعرف وتتأكد أنه اللي قلته واللي قاعد إندير فيه من خوفي عليها بس😔، لازم تحس بيا وتعطيني مجال باش نقدر نخش لحياتها❤
سعاد، وشوشت لدنيا: غذوه تعاليلي جبتلك حاجات من مصر، بس ماتقوليش قدام حد😉
دنيا، بإبتسامه😊: تمام حاضر

 

 

مصطفي: هيا نوضي ياسعاد هوا هذاك وقت الناس وراها عمل الصبح، وتلفتت لحسام: هيا ياحسام مش وراك محل الصبح
حسام ماكنتش نبي نروح لين ينوض عادل مش عارف ليش ماناضش مع أهله لما روحو: باهي شويه هي، هيا شني ياعادل عجباتك التقعميزه إمالا
عادل، بتوتر: حاجه زي هكي، بس كنت نبي دنيا شويه
حسام بغضب: كيف !! وشني تبي منها إن شاءالله
عادل😉: غدوه إنقولك، ومشيت بسرعه قعمزت بحدا عمي سعيد
حسام هذا شني قصده وتلفتت لبوي اللي ينادي عليا يبيني إنروح، كيف بندير كيف بندير لازم البلوه هذا يروح قبلي، مستحيل نخليه يكلمها ولا يقعد معاها، بس خطرت على بالي فكره مافيش إلا هكي، أبتسمت😊: هيا تصبحو على خير، وتوجهت للحوش ولقيت بوي وأمي سابقيني وخاشيين لدارهم، كويس بكل
في مكان ثاني
………بغضب: تي قتلي أسبوعين ونجيبلك كل شي عليه، وينه اللي بتجيبه ماشفت شي
…….بخوف: واللهي لهيت في الشحنه اللي جايه، بإذن الله نكملو التوزيع على خير، وإنظملك أموره
…….بعصبيه: الحق فيا اللي عابي عليك واضح أنك ماعندكش إلا الدوه، وشني صار في الشباب اللي بيوزعو
……بتوتر: كل شي تمام، بس فيه واحد طالب مقابل التوزيع، نوفروله مكان فاضي وأمن يومين، قال عنده ثأر بيصفيه
……..بإستغراب: ثأر شني اللي بيصفيه، واضح وراه موضوع هذا، حاسس أنه فيه بنت في القصه
…….بتوتر: والله مش عارف، بس ليه فتره شادها في جرتي، وأني كل مره نوزع فيه بحاجه
……بتفكير: جايبهولي الولد هذا خلينا نشوفو شني وراه
حسام فوتت خمسه دقايق وأني على أعصابي وماشي جاي في الصاله، خلاص معاش قادر نصبر أكثر، طلعت بسرعه وتوجهت لحوش خالي، وأبتسمت لما لقيت عادل قاعد مقعمز هوا وخالي سعيد، بإبتسامه: ماقدرتش نخليكم بروحكم 😅
سعيد😊: تعالا تفضل قعمز ياحسام
حسام بضحكه😁: لا نبصر بس، وراي عمل غدوه وبنرقد، غير أمي قتلي ناديلي دنيا تتصل بيها ماحصلتهاش
سعيد، بخوف😟: إن شاءالله خير، شني تبيها في هالوقت
حسام، بإبتسامه😊: خير خير ياخالي مش عارف شني جايبتلها من مصر وتبي توريهولها
سعيد، أبتسمت😊 وقعدت إنادي على دنيا
دنيا: نعم بابا، وتفاجأت😮 بحسام اللي واقف ومبتسم، مش روح هذا شني اللي خلاه يرجع ثاني😕
سعيد: عمتك تبيك بري شوفيها وتعالي بسرعه
عادل، بتوتر: بس أني كنت نبي…..وسكتت لما قطع عليا حسام
حسام تكلمت بسرعه وقطعت على عادل قبل مايكمل كلامه: هيا يادنيا بسرعه حاس روحي منتهي ونبي نرقد وراي عمل غذوه
دنيا مشيت وأني مستغربه من اللي قاعد يصير، مش عمتي قتلي تعالي غذوه شني اللي خلاها تبيني الليله، قعدت نتبع في حسام وأني ساكته، بس إنصدمت😯 لما فات باب الحوش الرئيسي ومتوجه للباب الخلفي للمطبخ، تلفتت بخوف😟 لما سمعت صوت ورائ، وقبل مايطلع صوتي ماحسيتش إلا بحد مسكرلي فمي وساحبني معاه

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)