رواية طفلة أرهقت قلبي الفصل الثاني عشر 12 بقلم عائشة البشير

رواية طفلة أرهقت قلبي الفصل الثاني عشر 12 بقلم عائشة البشير

رواية طفلة أرهقت قلبي البارت الثاني عشر

رواية طفلة أرهقت قلبي الجزء الثاني عشر

رواية طفلة أرهقت قلبي الحلقة الثانية عشر

** فريدة هيا…
تلك العنيده في الحق ولاتتراجع
تلك التي تملك قلب طفل وعقل رجل..
تلك التي تؤمن بأن عزة نفسها لاتقدر بثمن..
تلك التي لايستطيع أحد إبهارها بالمال والهدايا..
تلك التي إذا أحبت تحب بصدق تصبر وتمنح الفرص.. **
مفتاح برفعة حاجب:وخيرك ماتكلميش سعاد تعزميه ولا تقوليلها أتجي حتى بعد الفطور تشرب قهوه
سالمه، لوت شواربها: هيا جبدت روحها بعد اللي صار، حتى أول أمس لما مشينا بنشوفو دنيا حسيتها تتجاهل فيا وماهدرزتش حتى عليا
مفتاح، بعدم إهتمام: بلاش منه هالتفتفيت الزايد متاع النسون، سعاد ماليهاش علاقه باللي صار، بنتك هيا الظالمه ونالت جزائها
سالمه، بضيق: حتى عبير لما تشوفها تحسها بايخه بعد اللي صار، ومرات تزيد تتضايق أكثر
مفتاح بغضب: لا واللهي هذا اللي ناقص نقطع أختي على خاطر شعور بنتك، سعاد مادخلهاش بموضوع عبير وحاتم، أتصلي وقوليلها تجي تشرب معانا قهوه توا
سالمه تنهدت بضيق وقامت تليفونها وأتصلت بسعاد ثلاثة مرات يرن لين يفصل وماتردش، أبتسمت براحه جت منك ياجامع: ماتردش
مفتاح، بشك: كيف ماتردش، وقام تليفونه وأتصل هو ونفس الشي، مرر نظره لسالمه بضيق، وبصوت عالي: علا ياعلا
علا جت تجري من الدار: نعم يابوي
مفتاح: ألبسي حاجه على رأسك وبري لعمتك قوليلها تعالي أشربي معانا قهوه قالك بوي
علا: باهي حاضر، ومشت خشت جابت وشاحها وحطاته على رأسها وطلعت
مفتاح قعد يتبع في علا بعيونه لين طلعت، تلفت لسالمه وبغضب: قسمآ بأيات الله نسمعك أنتي ولابنتك إمقايلين حاجه لسعاد ولا إمضايقينها بكلمه تشوفو حسابكم معاي، هيا رأس هالأخت اللي عندي مانبيش نخسرها على خاطر زولك أنتي وبنتك، فاهمه!!
سالمه هزت رأسها بحاضر وهيا مضيقه من داخلها
مفتاح، ينادي: سناء ياسناء!!
جت سميه: نعم ياعمي، سناء مشت لحوش بوها شويه وجايه
مفتاح: باهي ديريلنا قهوه ورأس بنتي
سميه بإبتسامه: حاضر ياعمي، وتلفتت وخشت للمطبخ

 

 

مفتاح شاف لسالمه بحده: نوضي كلمي بنتك وفهميها عمتها ماليهاش دخل إتجي سعاد تطلع تسلم عليها وتقعمز وتهدرز عادي وإلا واللهي تشوف معامله جديده مني
سالمه تنهدت بأسف وناضت خشت لعبير اللي معتكفه في الدار من يوم ماأطلقت وماتطلعش منها إلا للحمام وحتى المأكله تأكل بروحها في الدار، على أساس واجعها أنها إطلقت من حاتم وولدها اللي بعيد عليها !! هذا اللي تحاول تمثله قدام الكل، بس لا بالعكس هيا مش مدوره شي ولاهيه باأشياء ثانيه
علا وأني ماشيه لحوش عمتي لقاني عمي بشير، كيف بنتكلم بنقوله صح فطورك عمي خش لحوشه وقربع الباب وباين عليه معصب، مدورتاش ومشيت وصلت لقدام حوش عمتي وقبل مانطق على الباب أنتبهت للباب الخارجي للمطبخ متاع حوش عمي سعيد مفتوح، توقعت تكون عمتى غادي، توجهت ووقفت جنب الباب وتفاجأت لما سمعت صوت حسام، خشيت على طول من غير مانطق أو إندير صوت، بصراحه ماأنصدمتش وخصوصا بعد ماقالي حسام أنه عنده واحده في باله، وبالنسبة لدنيا في نظر الكل البنت اللي مش متربيه ومتوقعين منها أي شي، بس وجعني قلبي من قهرتي لما شفتهم مع بعض خيرني أني شني ناقصني باش يرفضني ويشوفلها هيا
علا، بإبتسامه مستفزه: ياعيني ياعيني، على عصافير الحب ماأحلاهم😏
حسام تلفتت بصدمه لما سمعت الصوت، ومارخيتش دنيا اللي قاعده في حضني، حتى لما حاولت هيا تبعد ضغطت عليها أكثر وكأني رافض بعدها لأي سبب، نبيها تعرف أني مش خايف من حد ومستحيل نرخي يدها مادامها هيا شاده أيدي
حسام برفعة حاجب🤨: أنتي شني إديري أهنايا!!
علا ضحكت ضحكه خفيفه: سبحان الله وكأن ربي كاتبلي أني نشهد على عمايلكم ونكشفكم على حقيقتكم، معقوله حتى في الشهر الفضيل حرام راهو أتقو الله
دنيا أول ماشفت علا توترت حاولت نبعد بس حسام ضغط عليا أكثر منعني من الحركه، فكرت أنه بحركته هذي قاعد يقهر في علا بيا، توسعو عيوني بصدمه لما سمعتها شني تقول، خيرها هذي شني تفكر وين إمشي تفكيرها!!، شفت لحسام بغضب: حول أطلقني
حسام، بغضب😠: تعرفي تسكري فمك خيرلك، وتلفتت لدنيا اللي تتحرك بين إيديا وتحاول تتخلص من حضني، تنهدت بضيق وطلقتها بناءا على طلبها
علا، بإستفزاز: هيا وعارفينها قليلة تربيه ومالقتش مني يشكمها، بس أنت ياحسام تطلع هكي!! ياخساره طحت من عيني
دنيا ماكلفتش نفسي حتى إنرد عليها أو إناقشها تصنعت البرود وقعدت نراقب في ملامحهم الإثنين نبي نحاول نفهم شني فيه بينهم

 

 

حسام، بغضب😠: مني أنتي أصلا باش تقوليلي طحت من عيني ها، سكري فمك وأقلبي وجهك من قدامي، ماتخلينيش إنظرك فاهمه!! ونقول لخوتك وأنتي عارفه شني قصدي بالضبط!!
دنيا تلفتت لحسام شني قصده باللي قاله معقوله يكون بينه وبينها حاجه وقاعد يهدد فيها بخوتها، إنصدمت من الفكره اللي قاعده تتكون في عقلي على حسام، حسيت جسمي تخذر بالكامل وضاق صدري، قدمت للصالون وقعمزت بقوه
حسام تلفتت لدنيا اللي شبه طاحت مش قعمزت، وقدمت جيهتها، وبخوف😟: دنيا أنتي كويسه خيرك فيك شي!!
علا، بهزوه😏: ننصحك بدل ماتخاف عليها خاف على روحك وشني راح يصير فيك لما بوي وعمامي يعرفو اللي بينكم ونقوللهم الوضع المخزي اللي لقيتكم فيه، وطلعت بسرعه وقربعت الباب وراها، وأخيرا سمحت لدموعها بالإنهيار من ثقل الوجع اللي صاب قلبها من أول ماشافتهم مع بعض، ومن نظرة الخوف اللي في عيونه عليها قدرت تعرف قداش هوا يحبها، ليش هيا!! علاش مش أني!!😭
حسام شفت بضيق للباب لما تقربع، وبغضب😠: خزي تافهه الله يلعنك
دنيا، بقهر: ممكن تطلع وتخليني بروحي لو سمحت
حسام قرنت حواجبي: شني!!، وقعمزت على ركابي قدامها، وبرجاء🥺: ورحمة بوك وأمك ماديريش فيا هكي ترفعيني للبحر وترديني عطشان، معاش قادر نتحمل تصرفاتك هذي راهو، شني اللي يغير فيك في دقيقه، قوليلي تكلمي ماتسكتيش وتعذبيني وإتعبيني معاك
دنيا نزلت رأسي بأسف😞: أني تعبانه أكثر منك، كل واحد قاعد يفكر في روحه بس، ماحدش فكر فيا أني شني إنحس!!
حسام، بحب: وأني وين مشيت!! مستعد نشيل تعبك كله ونحمله على قلبي بذلك، شني يهمك فيهم أهم شي أني اللي……..
دنيا، بحزن😔: معاش يهمني ولا واحد وأنت بالذات معاش تحاول تتعرضلي أو تقرب مني، مش محتاجه لا ليك ولا لي غيرك، أطلع وخليني بروحي باللهي عليك
حسام، بقهر: ليش هالكلام يادنيا فاش غلطت أني!!، لو درت شي ضايقك تأكدي أنه من غير قصد والله، تكلمي عيطي عليا هزبيني هينيني أضربيني حتى الضرب لو هالشي يريحك، بس ماتقوليليش بعد عليا معاش نبيك جنبي، لأنه هالشي مستحيل يصير
دنيا، حطت أيديها على وذانها وقعدت تهز في رأسها يمين ويسار، وبعياط: معاش قادره نسمع هالكذب أكثر معاش قادره، خليني في حالي وأطلع
^^^^^^^^^^^^^^^^^^^^^^^^^^^^^^

 

 

علا اللي صار خلاها تنسي هيا ليش جت أصلا، ورجعت متوجهه لحوش عمها المبروك عند سنيه، ونست تكلم عمتها بكل😞
سعاد اللي كانت راقده في سابع حلمه إستاقضت وقعدت تشوف للساعه، وبشهقه: هيييي أمتي رقدت أني!!، وقامت تليفونها وتفاجأت من المكالمات اللي فيه، عاودت لأخر رقم اللي هوا مفتاح، وأبتسمت: أهلين ياوخيي صحه فطورك، أي سامحني غفيت شويه وماسمعتاش، توا لا ماعندي ماندير، باهي إن شاء الله أهو جايه، حطت التليفون، وناضت غسلت وجهها ولبست عبايتها وطلعت لحوش خوها
حسام غمضت عيوني بقهر وأني حاس بقلبي إنكسر من البرود اللي تحاول تتصنعه معاي زي كل مره، وتنهدت بحزن😔 ليش كل مره تبعدني عليها أكثر، شني اللي صاير بس، كان غير تتكلم وتريحني، في حالتها هذي ماكنتش نبي نضغط عليها أكثر مانبيهاش تبكي وتنهار قدامي لأنه وقتها مش راح نقدر نتحمل، وقفت وأني نشوفلها بقهر وطلعت وسكرت الباب، وقعمزت على الكراسي اللي في المنور مش راح نخليها بروحها على الأقل لين إيجي بوي ويكلمها، مرات يوليلها خالى من جديد
^^^^^^^^^^^^^^^^^^^^^^^^^^^^^^^
في حوش بشير اللي خش معصب ومش شايف شي قدامه ويفتفت في كلام مش مفهوم كويس
فاطمه، بإستغراب: خيرك شني فيه؟؟
بشير بغضب: عصبني مصطفي كل مانكلمه يتهرب من الموضوع، وزادها عليه حسام ال…..، ماخلانيش نكلمها ونفهم منها بنت ال…….، لكن واللهي يشوفو يحسابوني بنخليهم يتحكمو كيف مايبو
فاطمه، بحقد: قتلك أني كل ماأطولو بالموضوع كل ماتخسرو أكثر، مصطفي وسعاد حتى هما مش هوينين ومش بعيده يلعبولها في رأسها ويلهفو منها كل شي، ويطلعوكم من المولد بلا حمص
بشير بعصبيه: يطلعو عينهم والله إنشردهم ونطلعهم من الحوازه وإيدهم على رأسهم، مايعرفوش بشير مني قاعدين
فاطمه أبتسمت بفرحه وهيا حاسه بالإنتصار أنها قدرت إدخله الفكره في رأسه وتخليه يشك في راجل أخته، ويطالب بحقه من ورثتة خوه
^^^^^^^^^^^^^^^^^^^^^^^^^^^^^^^

 

 

في حوش مبروك
علا تبكي: علاش أني ماعنديش حظ!! ليش ماحبنيش أني!! شني فيها زايد عليا هالفاجره هذي!!
سنيه أنه حسام يطلع يحب وإمداير علاقه ف هالشي عادي وطبيعي، بس أنه تكون دنيا هيا اللي يحبها غريب شويه، بإستغراب🤔: معقوله حسام يحب دنيا، تذكري قبل ماكانش يطيقها بكل ومايخليهاش تقعمز وتلعب حتى معانا، وديمه يعيط ويكشخ عليها ولازم يخليها تبكي
علا بعياط: معاش تقولي يحبها هوا مايحبهاش، كلهم عاجبهم جسمها وتوا بعد ماماتو أمها وبوها زادو طمعو فيها وفي فلوسها، بس اللي قاهرني كيف قدرت تأثر على حسام بس
سنيه، بنفي: حسام مش من النوعيه اللي تحكي عليها، ماأعتقدش أنه ممكن يضحك على بنت على خاطر فلوسها، تشوفي في حالتهم الماديه حتى هما كويسه ومش مستحقين
علا رجعت تبكي وحطت إيديها على وجهها
سنيه تنهدت بأسف على حالة علا، ياريتها عطت فرصه لقلبها وقبلت بمحمد لما كلمها كان ممكن ينسيها حسام اللي واضح من قبل مش شايلها من أرضها، وبالأخص بعد اللي صار بين أختها وخوه وإنفصلو، تنهدت بحزن وقعدت تحاول تهديها وتخفف عليها، بأنه مش ليها من الأول ومايستاهلش إنها إدير في روحها هكي على خاطره
علا كانت تمسح في دموعها لما رن تليفونها وشهقت بصدمه لما إذكرت اللي نساته😰
^^^^^^^^^^^^^^^^^^^^^^^^^^^^^^^
في حوش مفتاح، طلعت سميه من المطبخ متوجهه بتفتح الباب اللي يطق
سميه، أبتسمت: أهلين عمتي صحه فطورك، كيف حالك؟
سعاد، بإبتسامه: الله إيسلمك، الحمدلله، كيف حالك وكيف حال عامر وبنيتك؟
سميه: كويسين الحمدلله، هيا تفضلي
سعاد خشت وهيا تقول: زاد فضلك، وأنتبهت لمفتاح وسالمه اللي مقعمزين في وسط الحوش، أبتسمت: السلام عليكم، صحه فطوركم

 

 

مفتاح: وعليكم السلام الله إيسلمك أهلين، وفنص في سالمه وأشرلها توقف ترحب بسعاد
سالمه أبتسمت بضيق، ووقفت وقعدت تسلم على سعاد: تفضلي تفضلي أنستينا
سميه بتسكر الباب بس لما شافت سناء وولدها جايين خلت الباب مردود ومشت للمطبخ
خشت سناء وسلمت على عمتها، ووقفت بتخش لسلفتها في المطبخ
مفتاح،بتساؤل: إمالا وين علا ماجتش معاك ياسعاد؟
سعاد، بإستغراب🙄: من وين بتجي معاي!!
مفتاح: لما ماردتيش علينا بعتتها باش تناديك
سعاد، بنفي: لا ماجتنيش ولا ريتها بكل
مفتاح، بغضب😠: كيف وين مشت إمالا!!
سناء لفت وهيا ماشيه: علا خليتها مع سنيه في حوش بوي ياعمي
مفتاح تلفت لسالمه بضيق: بعتتها لعمتها ولا لسنيه أني، كلميها خلى تجي
علا منزله رأسها، وبأسف😞: خطمت على سنيه نبيها تمشي معاي تسايرني، مشي لهتني بالدوه ونسيت بكل يابوي
مفتاح سكت وماباش يطول الموضوع أحتراما لأخته اللي مقعمزه، بحده: أمشي من قدامي ومعاش تعاوديها
هزت علا رأسها ومشت بسرعه للدار وخبطت بعبير اللي كيف طالعه، علا فتحت عيونها بصدمه وهيا تشوف في عبير كيف حاطه مكياج كامل ولابسه تقول عندها طلعه: شني هذا كله على وين إن شاء الله
عبير، بغرور😌: طالعه نسلم على عمتي، ومشت وهيا تتمختر
علا ضحكت وحطت أيدها على فمها🤭: ربي يتبث علينا العقل
^^^^^^^^^^^^^^^^^^^^^^^^^^^^^^^
دنيا، كيف راح نقدر نقاوم كل هالأفكار اللي قاعده تسيطر على تفكيري وتنهش في عقلي من غير رحمه، لأمتي راح يكونو الخوف والقلق مسيطرين عليا، أمتي بنعيش يوم براحه ومن غير مايشغلني التفكير بأي حد، لأمتي راح نواجه نظرات الطمع من الكل، صح نبان قويه وثابته ونتصنع البرود واللامباله، بس هالأمر مفروض عليا ومش برغبتي، الدنيا واللي فيها أجبروني على هالشي باش نقدر نعيش بينهم ولا كنت إندهست وضعت من غير ماحد يفكر فيا أو يهتم لأمري😔
كل يوم قاعده ننصدم في أفعالهم أكثر من قبل، الخيبه والخذلان اللي تلقيتها من اقرب الناس ليا،😔 حاسه أنها نقطه في بحر قدام خيبة ظني فيه هوا مش قادره نصدق الفكره اللي تكونت في عقلي عليه معقوله يطلع حقير وإستغلالي بالشكل هذا!! 💔
قاعده نهز في رأسي محاوله مني لإستيعاب الموضوع، قمت عيوني وتنهدت بأسف وأني نشوف للفراغ اللي قاعد فيه طيفه قدامي، حاسه بالضعف والضياع ولأول مره نحير كيف نتصرف مع شخص كيف نقدر نسيطر على الشعور اللي قاعد يكبر في داخلي ليه، وكل يوم يزيد أكثر ومن غير توقف رغم كل شي قاعد يصير فيا، هوا ليه زاويه خاصه بيه بروحه مافيش أي شي يقدر يوصلها أو يغيرها حتى شويه😔
حسام قعدت مقعمز في نفس مكاني لين جي بوي وقلتله اللي صار،
مصطفي بأسف: كنت عارفه مش راح يفوتها على خير، باهي اللي لحقت عليه قبل ماخش ودارلها شي وهو معصب، توا أني نكلمها قعادها في الحوش بروحها الفتره هذي غلط
حسام تنهدت بحزن: وشني الحل يابوي!! معقوله طامعين في فلوس خوهم مش بنته أولى بيهم!!، وبعدين كان يطلع ماعنده شي باهي، كيف بيديرو وقتها
مصطفي، بأسف: مش عارف ياولدي خوالك من يوم يومهم غالي عليهم الرزق حتى لما توفي بوهم دارو هلبا وياريتهم حتى دارو بيهم فايده صرفوهم على الدوه الفارغه، عارفينه عنده يشوفو فيه كيف كان يخدم صبح وليل هوا ومرته
حسام، بحزن: ياناري عمره كله قضاه في الخدمه ومافيش يوم إرتاح وبعدين يجو هما يلهفو كل شي على البارد المستريح
مصطفي، تنهد بضيق: حتى أني هذا اللي واجعني وبعدين البنت مني بيها!! هذي العمر قدامها وتبي ألف حاجه وقاعده صغيره مني بيصرف عليها!!
حسام، برجاء: خالي أمنك عليها أنت، توا ولت في رقبتك، ماتخليهمش يضحكو عليها ويأكلو حقها باللهي يابوي
مصطفي تنهد: المشكله خايف منهم يفكرو أني طامع فيها لو تكلمت وعارضتهم، ربي يقدرني وخلاص، ترا شوفلي أمك خلي تخش معاي نكلموها بالك نقدرو نقنعوها تمشي وتقعد معانا أحسن وأامن ليها
حسام حاس بروحي فاشل وكل خلايا جسمي مدمره، وبدل مانمشي ونكلم أمي قررت نكلمها بالتليفون وخلاص: أيواه ياأمي،وين أنتي؟ أها لا غير بوي روح ويسأل عليك وقالك روحي يبيك، باهي سلام
مصطفي بإستغراب🤔: ليش وين هيا مش في الحوش؟؟
حسام: قالت مشت تهدرز في حوش خالي مفتاح، وأهي جايه
مصطفي: حوش مفتاح !! غريبه !!
جت سعاد وحكالها مصطفي اللي صار وخشت لدنيا هيا ومصطفي وبعد جهد جهيد قدرو يقنعوها بأنها تقعد معاهم هالفتره لين يشوفو حل ويحلو هالإشكاليات مع عمامها
حسام قعدت مقعمز نستني في أمي وبوي بعد ماخشو، وأبتسمت لما طلعو هما وياها، بس لما شفت نظرتها ليا حسيت بالخذلان في عيونها، نزلت عيوني بأسف وماقدرتش نوقف أكثر إنسحبت من بحداهم
مصطفي تلفت لحسام: وين ماشي معاش وقت طلوع خش باش تتسحر
سعاد اللي كانت سانده دنيا، شافتله بحده: ماتطلعش نبيك في موضوع
حسام تنهدت بضيق: مش طالع بنزل الحاجات من السياره بس، ولفيت بسرعه مانبيش نضعف ونشوف لعيونها
^^^^^^^^^^^^^^^^^^^^^^^^^^^^^^^

 

 

في حوش المبروك س2 ونص
خش محمد مروح من برا، شاف أمه مقعمزه وسارحه وحتى لما خش وقال السلام عليكم ماأنتبهتش ليه، تنهد بحزن على حالة أمه، قدم وجي جيهتها، أبتسم: كيف حالك توا ياأمي؟
فوزيه فزت بخلعه: حميده أمتي جيت!!
محمد، بأسف: توا كيف خشيت ولقيتك سارحه
فوزيه، نزلت رأسها: خوك هذا شاغل بالي والله حتى النوم مانرقده زي الناس، لاسامح الله صايرتله حاجه ولاشي وأحني مانندروش عليه، وقعدت تبكي
محمد سامحني ياربي مطر نكذب على خاطرها بس، تنهد وتصنع الإبتسامة: ليش تبكي ياأمي وأني اللي جايبلك خبر حلو عليه
فوزيه قمت رأسها وشافت لمحمد بلهفه: حقا طمني ورأس وليدي، لقيته!!شفته!!كلمته!!، كيف حاله!! وين قاعد!! شني إمداير في هالرمضان منين يأكل ويشرب!!
محمد حرت بأي كذبه بنبدأ بالأول وأي سؤال بنجاوب عليه، بإبتسامه: بالشويه عليك ياأمي نقولك كل شي، وشفت لتليفوني اللي رن برقم غريب، قمته ورديت وأمي مش طايقها صبر تبي تعرف شي على أحمد تقدر إطمن بيه قلبها
محمد توسعو عيوني بصدمه لما سمعت الصوت،” أيواه يامحمد هذا أني أحمد” تنهدت براحه الحمدلله ياربي ماخليتنيش نكذب، أبتسمت لأمي وأشرتلها على التليفون
فوزيه خدت التليفون بسرعه، وبدموع: أيوا أحمد، وينك ياوليدي!! هكي إدير فينا!! مش حرام عليك
أحمد: معليشي ياأمي سامحيني، أني كويس ماتخافوش عليا، قاعد عند واحد صاحبي وماشيه أموري الحمدلله
فوزيه، بدموع😢: روح ياوليدي ربي يهديك، كيف إمداير في هالرمضان منو بيك
أحمد: واللهي إلا كويس ومش ناقصني شي أموري تمام، ماأدورونيش توا مرواح مانقدرش إنروح، هيا بسلامتكم توا نكلمكم مره مره
فوزيه: غير أسمعني يا…. وتنهدت بحزن وهيا تشوف لتليفون بأسف لما سكر من غير مايسمعها
محمد خذي التليفون، وأبتسم😊: خلاص ياأمي أهو سمعتي صوته وأطمنتي عليه ماتزيديش روحك، لأمتي بيقعد عند صاحبه يعني توا يمل ويروح، أدعيله ربي يهديه بس ويدير عقله في رأسه
فوزيه تنهدت بحزن😔: ربي يهديه ويصلح رأيه، ويحميه ويبعد عليه أولاد الحرام
محمد، بضحكه خفيفه☺: شني الدعي هذا أحني مانحصلوش منه ولا كيف!!
فوزيه أبتسمت😊: أنت ربي الدعي الباهي كله حاطه فيك ربي يحفظك ويكملك بعقلك ان شاء الله
محمد، أبتسم😊: يارب، هيا شني ماتبوش تسحرونا ولا كيف!! وين البنات!!
فوزيه وقفت: البنات في دارهم توا إناديهم، خلى إنسخنو الحاجات لبين ماوصل بوك، ومشت وهيا تنادي: سرور سنيه هيا تعالو وتو السحور
محمد تنهد بحزن😔 وهو مضايق، الكل مفكرين أنه هو أكثر شخص عاقل ومتفهم ومرتاح نوعا ما ماحدش كان يعلم بالصراع اللي قاعد يصير في داخله بين كرامته وبين الحب💔
^^^^^^^^^^^^^^^^^^^^^^^^^^^^^^^
في حوش مصطفي بعد السحور، مصطفي خش يقرأ في قرأن قبل مايأذن الفجر، وسعاد وحسام مقعمزين في الصاله
سعاد، برجاء🥺: ورأس وليدي خليها في حالها، وفكنا من المشاكل، راهو ماأقنعناها إلا بطلوع الروح
حسام نزلت رأسي، وبأسف😞: قصدك ماكانتش تبي تقعد في حوشنا على خاطري أني، مضايقه مني لهالدرجه هذي!!
سعاد، بضيق: ماتقدرش تأخذ راحتها ياوليدي، وأنت ربي يهديك ماتبطلش نشاف وإدورلها في أبسط سبله باش تعاركها
حسام شني بنقول!! كيف بنشرح!! توا أني اللي مني بيحس بيا، في الأول هيا وبعدين أمي، معقوله مفكرين أنه أني اللي مستعد نضحي بعمري فداها ممكن نضرها، أني اللي نسعى لراحتها ممكن نزعجها، أني اللي فرحتي بشوفتها ماتحملهاش لا أرض ولا سمي وجودي مضايقها، تنهدت بضيق: خلاص ياأمي قوليلها تطمن أني أخر واحد ممكن نفكر نضرها، من توا معاش نوريها وجهي لو كان هذا يريحها😔
سعاد، بضيق: مش هكي ياوليدي بس دنيا وضعها خاص، وتشوف في خوالك كيف يتحزازو عليها، وأحني خايفين عليها هذي أمانه في رقبتنا، تقعد معانا وتحت عينا أفضل شي لين نشوف شني يصير في موضوع الورثه اللي طالعين بيه خوالك
حسام هزيت رأسي ووقفت: حاضر ياأمي، راح يصير اللي تبوه، وقفت وتلفتت بسرعه ماكنتش نبي أمي تشوف الضعف ولمعة الدموع اللي قاعده تتجمع في عيوني😢، وبصوت مخنوق تصبحي على خير ياأمي، وقفت في أول درجه وأني نشوف للدار اللي قاعده فيها ونزلت رأسي بحزن ورقيت بسرعه
^^^^^^^^^^^^^^^^^^^^^^^^^^^^^^^

 

 

فات يوم وبعده يوم وبعده أيام، واليوم 26 رمضان، من هذيكا الليله معاش جت بيني وبين حسام ولا كلمه وأصلا شبه مانشوفش فيه إلا لمح لما يروح وقت الفطور، طول اليوم والليل يخدم، شني بنقوللكم كرهته ولا نسيته ولا رجع في عيني حسام المغرور المتكبر اللي نكرهه ونخاف منه لما كنت صغيره، لا أبدا مافيش ولا شي من هذا كله صار ماكنتش عارفه أنه لما يبعد عليا راح نتعلق بيه أكثر، مانبيش نحكيلكم على رجفة قلبي لما نشوفه أو نلمحه، مش عارفه لأمتي راح نقاوم رغبتي في وجوده معاي، وضيقت صدري ولت علة يوميه تصيبني بإستمرار ومانرتاحش شويه إلا بالصلاه ولا قراءة القرآن
حسام أطريت نشتغل في مخبز في النهار نطلع من 9 لحد أذان المغرب، نفطر ونطلع نقعمز في المحل ولا نمشي لعادل اللي نافخهولي بتسهويكه وبرادته، متحمل التعب من الصبح لليل وقلة النوم مع الصيام ونفسيتي اللي كل يوم تتحطم أكثر من تجاهلها ليا، هذا كله باش ترتاح هيا، باش تقعد في حوشنا، كنت مستعد إندير أي شي لراحتها، نتعب باش ترتاح هيا، نبكي باش تفرح هيا، ننكسر وتنجبر هيا، حتى لو قالولي موت باش تعيش هيا مش راح نفكر حتى لحظه، أي حب هذا اللي يخلي طيفها يلاحقني طول الوقت في صحوتي وفي نومي، قعدت هيا الأساس في دعائي واللي نطلب فيها من ربي في كل ركعه
** وأني أدعو الله بأن يبقيكِ لي عمراً وحباً وقرباً لايعرفُ البعد❤❤**
دنيا زارتني خالتي كم مره في الأيام اللي فاتو نحاول قدامها على قد مانقدر نبين أنه كل شي تمام، ومن 4أيام نحيت الفاشات اللي على رجليا والجروح كويسات والحمد لله، قعدت نلبس في جوارب طبيه بناءا على نصائح الدكتور
وأمس فيه محامي أتصل بعمي مصطفي وقال أنه هوا صاحب بابا من قبل، وبابا قبل لايموت باأيام مخليله وصيه وقال أنه لازم تنفتح قدامي أني وعمامي وعمتي، الليله على أساس راح يجي ونشوفو شني راح يقول
طبعا عمامي دارو كدا موقف وموقف الأيام اللي فاتو على خاطر الورثه، بس اللي هداهم وخلاهم يسكتو ويستنو هوا موضوع الوصيه اللي طلعت في النص
حسام خش وينادي: أمي ياأمي
سعاد طلعت من المطبخ: نعم خيرك تعيط؟
حسام، بضيق: هيا وين القهوه!! وهيا قالك بوي ناديها وتعالي
سعاد: باهي أهي دنيا تصب فيها خش خوذها منها، خلي نلبس عبايتي ونجي
حسام تنهدت من قلبي، وتوجهت للمطبخ، وأول ماشفتها أبتسمت صابتني فرحه لاشعوريا قعدت نضحك
دنيا تلفتت بإستغراب 🙄وأني نسمع فيه يضحك وراي، شفتله بحده وبرفعة حاجب🤨،ورجعت تلفتت وقعدت نصب في القهوه في الفناجين
حسام إنخرست أول ماشفت نظرتها، بأسف😞: مش قصدي راهو ماتفهميش غلط ضحكت بس لأني إذكرت نكته بايخه بس
دنيا من غير مانتلفت، وبعدم إهتمام: عادي
حسام أبتسمت: هيا شني واتيين؟؟
دنيا قاعده على نفس الوضع من غير مانشوفله، وبتساؤل: من هما اللي واتيين؟؟
حسام، بإبتسامه😊: أنتي والقهوه!!
دنيا تلفتت، وبنص عين😒: أها، أي واتيين

 

 

حسام قعدت مركز على بلوزتها قصيره هلبا كيف تطلع بيها هكي قدام الراجل، ضيقت عيوني ومشيت خذيت سفرة القهوه وطلعت بسرعه قبل مانعصب ونفقد السيطره على روحي وهالشي اللي مانبيشي يصير، تلاقيت أني وأمي جايه جهة المطبخ
حسام، بضيق: باللهي ياأمي قوليلها تغيرها البلوزه اللي لابستها أهيا، مش ياسر أنها طالعه من غير وشاح وبلوزتها مش إمدرقه شي أصلا
دنيا لأني كنت بنطلع من المطبخ سمعته شني قال، طلعت فتت من جنبه هوا وعمتي وخشيت للدار
سعاد، بضيق: والله ماوقته هالكلام اللي تقول فيه هذا، شني قلنا أحني كنت عاقل الأيام اللي فاتو شني جاك الليله!!
حسام، بغضب😠: هبلت الزفت لأمتي بنتحمل ونسكت، وطلع وهوا يزفر بغضب 😤
في المربوعه كانو موجودين مصطفي ومفتاح والمبروك وبشير والمحامي طبعا، الأجواء متوتره والكل مسيطر على نظراتهم الشك والقلق من محتوى الوصيه،
حسام خشيت حطيت القهوه وطلعت خديت كرسي وقعمزت قدام المربوعه، أكيد مش راح نطلع ونخليها بروحها بينهم على الأقل نكون جنبها لو صار شي، قمت عيوني بتركيز لما سمعت باب الحوش تسكر وطلعت أمي ودنيا جايين للمربوعه، أبتسمت وأني نشوف فيها شني لابسه☺
دنيا مش ناقصني كلام وهم خشيت لبست قولف فوق البلوزه وكان فيه برنوص قمته على رأسي” متأكده أنك خايفه من كلامهم ومادرتيش هكي باش ترضيه😏!!” لا لا أسكت أنت🫀وريحني، وطلعت مع عمتي، أول ماجت عيوني عليها وشفت أبتسامته أبتسمت لاإراديا، بس قعدت نلعن في روحي ليش إندير هكي حسيت روحي زي الغبيه البلهاء اللي يضحكولها تريح فيها🤦‍♀️
حسام فتحت عيوني بصدمه شفتوها أبتسمتلي😳 حقا!! ولا أني نتخيل!! إشارتين في يوم واحد، بعد ماأستوعبت اللي صار ضحكت على روحي كيف قعدت نفرح بأي شي منها حتى ولو أبتسامه عابره😍
** إذا رأيت إبتسامتها كأني ملكت الدنيا بأكملها.. إبتسامتها شفاء لقلبي ودواء لإشتياقي وأملي وسعادتي **❤❤
داخل المربوعه بعد السلام بدي الوقت الحاسم واللي الكل قاعد ينتظره
المحامي فتح شنطته وقعد يطلع في الظرف فتحه وطلع منه ورقه وقال: تحبو نقرأ عليكم ولا تقرو بروحكم
مفتاح: لا أقرأ أنت أفضل
المحامي طلع ظرف صغير: طبعا قبل لانقرأ هذي رسالة خاصه لدنيا
وقف مصطفي خذاها منه ومدها لدنيا
المحامي شد الورقه وبدي يقرأ: السلام عليكم في الوقت اللي توصلكم فيه رسالتي هذي أكيد راح نكون فارقت الحياه نتمني أنكم تدعولي بالرحمه كل مانخطر على بالكم
كل الموجودين قعدو يتمتمو بالدعاء، وسعاد دمعو عيونها، ودنيا ملامحها بارده ماتخليكش تعرف تتنبي بأي شي قاعد يصير داخلها
كمل المحامي وهو يقول: ولأني نعرف خوتي وطبعهم، عارفكم قاعدين إضايقو في بنتي هلبا على خاطر الورث، ولأني عارفكم مش كفؤ ولا كم قد المسؤولية ومش راح تهنوني عليها، أني أمنت مصطفي عليها وحطيتها تحت وصاية سعاد لين إطق السن القانونيه
الكل لاحت على وجوههم علامات الإستغراب وتوجهت أنظارهم لمصطفي بغضب😠، وسعاد كملتها بكي😭، ودنيا صامته من غير أي ردة فعل😐
أستمر المحامي: كلكم عارفين قداش تعبت وشقيت وضيعت أحلى سنين عمري في الخدمه باش نوفر لبنتي كل شي ومانخليهاش تحتاج لحد، فاأكيد مش راح نسمحلكم أنكم تأخذو تعبي وشقي عمري، لهذا بالنسبه للعمارة والمحلات اللي عندي فهما بإسم دنيا ونفس الشي حوشي اللي في المزرعه بإسمها حتى هوا، ياريت ياخوتي تخلو بنتي في حالها وتعاملوها كويس بس إكراما للدم اللي يربطها بيكم
دنيا لاحظت بعد هالكلام بدت العصبيه تبان على ملامح عمامي ونظراتهم كلها شك وغضب إتجاه عمي مصطفي، بس مافيش حد فيهم تكلم
وكمل المحامي: نزيد نعاود ونقولك بنتي يامصطفي أمانه عندك وعند سعاد هنوني عليها باللهي عليكم، أها نسيت نقوللكم بالنسبة لحسابي اللي في البنك فهو فاضي ماتعبوش روحكم وتسألو عليه بكل، والسلام عليكم
حط المحامي الورقه وقام عيونه بسرعه لما سمع
بشير وقف وبعياط: تحسابو روحكم بتضحكو علينا بهالكلمتين، والله نطربقها عليكم عاليها واطيها فاهمين
مفتاح بعصبيه😡: كيف بنت تنحط تحت وصاية مرأه ليش أحنى وين مشينا بيضحك علينا الناس على أخر عمرنا ولاكيف
المبروك، بغضب😠: هالشي كله مايخشش الرأس قريب الشهرين ليه متوفي هذا وين تطلع الوصيه لا وكاتبها قبل مايموت بيوم شني نزل عليه الوحي وقاله غذوه بتموت ولاكيف!!
مصطفي كان ساكت ويهز في رأسه بأسف😞

 

 

المحامي: عندكم حق تشكو بس اللي خلاني نتأخر عليكم بيها كنت طالع برا البلاد وأول ماروحت أتصلت بالسيد مصطفي وخبرته، وبالنسبة للإجراءات والأوراق اللي تخص الوصايه والتنازلات اللي دارها المرحوم لبنته كلها قانونيه وتقدرو تتأكدو منها، وقف وتلفت لمصطفي: رقمي عندك لو تبي أي شي تقدر تتصل بيا في أي وقت، عن أذنكم وتوجه بيطلع
وقف مصطفي وشكره ووصله للباب وما أن تلفت حتى شاف البركان اللي قاعد على أهبة الإنفجار ومش واحد كانو ثلاثه
بشير بعصبيه😡: برافو يامصطفي عرفت تلعبها صح لكن والله ماتحلم حتى الحلم أنك تضحك عليا يانعن🤬
مصطفي، بأسف😞: أنت شني اللي تقول فيه!! تحشم وأحترم نفسك
المبروك، بغضب😠: معقوله أنت يامصطفي تطعنا في ظهورنا وتأكل حقنا في خونا
مصطفي: وأني شني دخلني باش تقولي هالكلام سمعتو بوذانكم اللي مكتوب، وبعدين عنده حق في اللي داره عارفكم مافيكمش أمان
مفتاح، بغضب😠: ماتخليناش نغلطو فيك يا مصطفي خليك بعيد لو سمحت وماتدخلش بينا وبين بنت خونا
بشير تلفت لسعاد اللي تمسح في دموعها ومصدومه من خوتها ونيتهم، وبأمر: غذوه الصبح تمشي تتنازلي على الوصايه لواحد مننا فاهمه
سعاد، بحده: مستحيل هالشي يصير ماتحلمش بيه حتى الحلم، مش راح نفرط في أمانة المرحوم ونخليكم تلعبو بيها على كيفكم
مفتاح بعصبيه😡: أنتي شني تقولي ياسعاد!! حتى أنتي طلعتي زي راجلك طماعه وتبو تلهفو كل شي بروحكم
بشير بعياط، وتحذير: ياأما تمشي وتتنازلي على الوصايه غذوه، ياأما تطلعي أنتي وراجلك وإدوري وين تعيشي
سعاد بصدمه😮: كيف!! ناسي أنه الحوش مبني في أرضي من حصة المرحوم بوي ماليكمش الحق إطلعوني منه، وماتقدروش أصلا
بشير، بهزوه😏: كيف ماقدرتو أنتم تلعبو وتزورو كل شي، حتى أني نقدر إندير هلبا حاجات والأفضل أنكم ماتكسبوش عداوتي خيرلكم
مصطفي بحده: أعلى مافي خيلك أركبه فاهم، تهدد فينا في حوشنا ناس ماتستحيش فعلا
كثر الكلام وكبر النقاش بينهم وأحتد لدرجة بشير قدم وكان راح يمد إيده على مصطفي لولا العيطه اللي طلعت من دنيا وجمدت كل واحد في مكانه
حسام قعدت مقعمز وكنت لاهي في التليفون جوني إشعارات رسائل في الماسنجر من نفس البنت اللي تعلقلي ديمه( مرحبا حسام، كيفك، ممكن نحكي معاك، لو سمحت أعطيني فرصه ) مني هذي ركزت على الأسم كويس وأبتسمت بهزوه أول ماشكيت أنها تكون علا وحضرتها على طول وأني نستغفر، قمت عيوني لما لمحت حد وقف عليا
محمد بإبتسامه: السلام عليكم، صحه فطورك، غير وين هايم؟
حسام أبتسم: وعليكم السلام، الله إيسلمك، أهو مكسد على الفيس، هيا تفضل قعمز، وهو يأشرله على واحد من الكراسي اللي جنبه
محمد قعمزت وكنت حاس بالتوتر والإرتباك بعلاقتي إتجاه حسام بعد ماعرفت أنه علا تحبه هوا، بس حاولت نتغلب على شعوري على قد مانقدر مفروض هالأشياء التافهه ماتأترش فيا حسام ماليشي ذنب في اللي صار، هيا اللي رخصت وذلت روحها ليه
حسام قعدت نهدرز أني ومحمد وكنت ملاحظ أنه مش زي قبل يمكن من الموضوع اللي صار من قبل، بس ماشغلتش روحي بيه هلبا الوقت هذا عندي اللي شاغلني وبالزايد، كل تفكيري عندها وشني اللي قاعد يصير الداخل، وقفت بسرعه لما سمعت الباب إنفتح وطلع المحامي ووراه بوي، ومن ملامحهم قدرت نتنبي أنه اللي صار مش مرضي أبدا، رجع بوي خش وبدت الأصوات تعلى بالشويه بالشويه، وأني قعدت ماشي جاي قدام المربوعه ومتوتر وخايف عليها منهم
محمد بضيق: قعمز ياحسام خيرك هدي روحك
حسام بخوف😟: ماتسمعش في عياطهم واضح فيه شي يستر الله

 

 

محمد تنهد بأسف😞: إن شاءالله خير وخلاص
حسام كنت نصبر في روحي بالسيف ونتوجه كدا مره للباب بنفتحه بس نتراجع ونولى ونقول نقعد بعيد وماندخلش خير، بس أول ماسمعت عيطتها جريت من غير عقل وفتحت الباب بسرعه
دنيا من الأول ساكته وماحاولتش نبين أي ردة فعل بس لأمتي مش راح نسمحلهم يتحكمو فيا فعلا، ووجعوني عمي مصطفي وعمتي كيف قاعدين يهينو ويتهمو فيهم بشي ماليشي أساس من الصحه، الله على الفلوس قداش تغير النفوس وتخلي النفس شجعه وطماعه، معاش قدرت نتحمل أكثر وقفت وعيطت بأعلى صوتي: خلاااااااااااااااص، وكملت لما شفتهم سكتو وأنظارهم توجهت ليا، وبعياط: مش معقوله قداش أنكم طماعين وكلاب فلوس
بشير بعصبيه: سكري فمك ياحيوانه ولا…..
دنيا قطعت عليه وبعياط: مش راح نسكت فاهم، قتلكم من قبل ماحدش فيكم يحاول يتعرضلي أو يوقف في طريقي صح، مش راح نسمحلكم أنكم تأخذو تعب بابا على البارد، ماحدش فيكم عنده الحق في ولا فلس فاهمين، لو تتحشمو فعلا وعندكم ذره من الكرامه والرجوليه تلمو بقايا كرامتكم وتقلبو وجوهكم من قدامي، عمري ماتشرفت بكونكم عمامي وللأسف زدتو نزلتو قدركم عندي لأسفل السافلين
المبروك قدم ورفع أيده وبيضرب دنيا، بس في أيد منعاته
والكل علت على وجوههم ملامح الصدمه لما حسام وقف قدام دنيا ومنع أيد المبروك تمسها، وبتحذير: أي حد يحاول يتعرضلها حتى بكلمه راح يلقاني في وجهه فاهمين، وياريت ماحدش فيكم يشري عداوتي، وماتطرونيش نطلع حسام القديم اللي دفنته من سنين لأنه هالشي مش لصالحكم
سعاد رغم الصدمه اللي كانت مسيطره عليها إلا أنها فرحت بالشي اللي داره حسام وتكلمت بثقه: اتفوووو على الدم اللي يربطني بيكم، ياخساره ياخوتي ياخساره
بشير أبتسم بهزوه: ماشاء الله مأمنين أنفسكم من كل النواحي لعبتوها صح ياولاد ال…….
مصطفي، بعصبيه: سكتلكم هلبا راهو ياريت تحترمو أنفسكم وتطلعو من حوشي
مفتاح، بصدمه: تلزنا من حوش أختي واللي مبني على أرض بوي يامصطفي!!
مصطفي: ماكنتش حاب هالشي يصير بس أنتم ماعطيتونيش مجال، فلهذا حوشي يتعذركم كلكم
المبروك، تلفت لسعاد بغضب: عاجبك هالكلام أنتي؟؟ يلز خوتك من حوشك وأنتي واقفه؟
سعاد، بهزوه: هذا وشويه فيكم، بعد اللي قلتوه وبانت نيتكم السيئه، معاش تشرفوني ونتحشم حتى نقول خوتي
مفتاح هز رأسه بأسف ودف خوته قدامه يبيهم يطلعو
بشير، بتهديد: والله مانخليكم تتهنو لو شني ماصار، ماتفرحوش هلبا بس
حسام، بهزوه: أيدك وماتعطيك ياخاااااااااالي😏
طلعو مفتاح والمبروك وبشير وملامح الغضب والشر اللي على وجوههم ماتبشرش بالخير
^^^^^^^^^^^^^^^^^^^^^^^^^^^^^^^

 

 

خلينا نديرو دوره على مصر
سندس تبتسم وهيا تشوف في ولدها وولد خوها كيف يلعبو ومنسجمين مع بعض، وتلفتت لحاتم: كلمت أمي قبل شويه تسلم عليك قالت الليله جايهم المحامي على خاطر وصية خالي الله يرحمه أشبح توا شني يصير؟
حاتم: الله إيسلمك ويسلمها، إن شاءالله خير، حرام عليهم يأخذو رزق البنت، اللي خلاه خالي من حقها هيا بس المفروض مافتحوشي الموضوع هذا بكل كأنهم يفهمو ويقدرو وتهمهم مصلحة بنت خوهم وخايفين عليها
سندس، بحزن😔: ياناري على دنيا وخلاص ربي يكون في عونها، سكتت شويه وبعدين تكلمت، بتوتر: قتلك ياحاتم بنأخذ رأيك في حاجه طلعت تليفونها وفتحت على صوره ومدتهوله، وأبتسمت: هاا شني رأيك؟
حاتم قعد مركز على الصوره وبانت على وجهه ملامح الإعجاب، وبإستغراب🤔: مني هاذي؟ وليش توريلي فيها؟
سندس أبتسمت😊: هذي خالده حماتي، شني رأيك فيها؟؟
حاتم لوح عليها التليفون، وبإنزعاج: هبلتي أنتي ولا شني، ليش توريلي فيها حرام عليك
سندس، بغمزه: لا مش حرام أعتبرها نظره شرعيه😉، يعني قداش بتقعد من غير مرأه ووليدك منو بيه، ولا ناوي ترجع مرتك😒
حاتم، بضيق: لا نرجعها ولاشي لكن مانبيش نفكر في هالموضوع توا، قاعد ماتخطيتش التجربه الأولي الفاشله، مانبيش نتسرع ونندم من جديد، خليني هكي مرتاح أحسنلي، تنهد بأسف: معاش تعاوديها هالحركات، عيب عليك توريلي صورة البنت
سندس: شني هوا العيب؟؟ والله خالده ماشاء الله عليها زين وأدب وذوق وفلاحه، غير ماعندهاش حظ ياناري طاحت في واحد متاع سكير وحشيش ودوه فاضيه قعدت معاه 4شهور بس وإطلقت
حاتم بحزن: ربي يستر عليها ويعوضها خير
سندس طرمت شواربها بزعل: وجهك مش وجه نعمه أنت
حاتم ضحك على حركتها وتنهد بألم ورجع يشوف لولده بحزن😔، شني ذنبه يعيش من غير أم من صغره صح هوا مش مقصر معاه بس عليوه قاعد صغير ومحتاج لحنان أمه أكثر وهوا عارف أنه عبير ماعندهاش هالشي لهذا فضل أنه يقعد معاه، أبتسم لما خطرت الصوره على باله وشاف لسندس اللي قالبه وجهها للجهه الثانيه وتنهد بأسف😞 وناض طلع بيتمشي شويه
^^^^^^^^^^^^^^^^^^^^^^^^^^^^^^^

 

 

ومن مصر لليبيا وبالتحديد لمكان لينا فتره مازرناشي الجبل
الكينج: شني صار في عمك وولده حسيتك معاش فتحت الموضوع الفتره هذي!!
خليفه، بغضب😠: تشوف فيا فاضي، خلى تكمل هالجبهه المفتوحه وتوا نفضي بيهم هاذم يبو وسعة بال
الكينج: عندك حق، بس تخافه عمك يتصرف في الأرض من غير علمكم
خليفه، بعدم إهتمام: لا أرض ولا رزق هاميني لولا بوي وعمي اللي هكي يبو ماكنتش وقفت في وجهه أني مش مستحق لا لأرض ولا لفلوس، وبحقد وكره: بس اللي يهمني حسام والثأر اللي بينا مستحيل ننسي شني دار فيا هذاك الوقت وإلا مانردهوله أضعاف وأضعاف
الكينج بغمزه😉: ياودي تخوف كان حطيت حاجه في بالك، يستر الله عليه ولد عمك هذا أبصر من وين محصل دعوه
خليفه أبتسم بهزوه😏، ووقف وطلع بسرعه أول ماجاه نداء على اللاسلكي للجبهة(( طبعا ملاحظين أغلب الجبهات تنفتح في رمضان وكأنها مقصوده ))
^^^^^^^^^^^^^^^^^^^^^^^^^^^^^^^
في المربوعه بعد اللي صار ساد الصمت في كل الأرجاء وماحدش كان عنده أي ذرة قوه تخليه يتكلم أو يناقش اللي صار، بس كان لازم من كلمات تشجيعيه
مصطفي قدم لدنيا وأبتسم: ماتخافيش أنتي بنتي ومش راح نسمح لحد يضرك مهما كان يكون
دنيا نزلت رأسي، هالكلام مفروض نسمعه من عمامي بس للأسف طلعو أسوء من ماكنت نتوقع
سعاد قدمت وحضنت دنيا: ماتخافيش يابنتي مايصيرش إلا اللي أنتي تبيه
دنيا أكتفيت بهز رأسي
سعاد محاوله لتغيير أجواء التوتر، بضحكه😅: والله حسني جعت بعد هالعركه، هيا نخشو نحطو حاجه نأكلوها
ضحكو الكل😂 وتوجهو مصطفي وسعاد وطلعو
دنيا مشيت بنطلع بس لفيت بسرعه لحسام اللي قاعد واقف في مكانه وعيونه عليا، أبتسمت😊: شكرا هلبا
حسام، بإبتسامه☺: مافيش حد يستاهل الشكر لأنه يحمي في روحه
دنيا هزيت رأسي وطلعت
حسام كنت مستنيها تقول شي، بس خذلتني وطلعت، تنهدت بأسف😞 وطلعت حتى أني
دنيا توجهت للدار على طول وحطيت رسالة بابا تحت المخذه ماكنش عندي قوه نفتحها توا، توجهت للحمام توضيت ورجعت فرشت الصلايه ولبست ملاية الصلاه، وقعدت نصلي بنية الشكر أنه ربي وقف معاي وقاعد يبينلي كل شخص على حقيقته
حسام قعمزت برا شويه وبعدين خشيت، لقيت أمي كيف طالعه من المطبخ
سعاد: سحورك على الطاوله، سفره ليك وسفره لدنيا لقيتها تصلي مابيتش نكلمها
حسام، بإستغراب🙄: مازال وقت السحور، وخيرك أنتي وين ماشيه ياأمي، ووين بوي!!
سعاد، بضيق: بوك كلي فمين وخش إرقد، وحتى أني بنخش نرقد نحس في روحي فاشله، هي تصبح على خير
حسام هزيت رأسي بضيق: وأنتي من أهله، وقفت شويه ونشوف لأمي لين خشت لدارها، قدمت من غير إراده لين وقفت في الدار اللي فيها دنيا، الباب كان مردود أبتسمت وأني نشوف فيها كيف تدعي بتضرع وخشوع
دنيا🤲ياربي راضيه بكل شي كتبتهولي في حياتي.. مؤمنه بأي شي سخرته ليا أو خذيته مني.. واثقه أنك راح تزيح همي وألمي ووجعي.. وبتمسح على قلبي وترعاني بعينك التي لاتنام.. يارب أني مانقدرش نوثق في أي حد في الحياه غيرك، يارب أنتي سندي وإليك وكلت أمري، خليك معاي وقويني وماتخليش حد يهزني أنت قادر على كل شي، يااااااااااااااااارب🤲
حسام توجهت للمطبخ وغيرت السفر وحطيت كل شي في سفره واحده، وقمت وطلعت حطيتها في الصاله، ومشيت طقيت عليها
دنيا أستغربت لما شفته على الباب: نعم

 

 

حسام بإبتسامه😊: تعالي كان بتتسحري
دنيا من أمتي هوا اللي ينادي فيا للسحور، وبعدين عمتي كانت تحطلي في سفره بروحي، أش معني الليله، بس يلا بعد اللي صار أكيد نست ماتلتامش، هزيت رأسي بباهي، وطلعت معاه، بس تفاجأت لما ماشفتش حد، وبتساؤل: وين عمتي وعمي مصطفي؟؟
حسام، بإبتسامه😊: تسحرو وخشو رقدو، وأمي قالتلي أنه هذا سحوري أني وياك
دنيا، بضيق: بس…
حسام قطعت عليها بسرعه: لو ماتبيش تأكلي معاي عادي، قعمزي كولي أنتي وتوا نطلع أني😞، وتوجهت للباب بنطلع بس تفاجأت بيها شدت أيدي، تلفتت وأني نمرر في نظري ليها ولأيدها اللي شاده بيها أيدي😳
دنيا، برجاء🥺: خليك ماتطلعش وتخليني بروحي لو سمحت
حسام أبتسمت: ليش أني نقدر نخليك أصلا،😍 وضغطت على أيدها أكثر، وقعمزنا مع بعض، بالنسبه لدنيا في الشك قامت فم، أما أني كنت نأكل بشراهه سحتت اللي في السفره كله، مش مني من الفرحه مش مصدق أنها في جنبي😅
دنيا كنت مقعمزه ومتوتره من وجوده جنبي، وماكنش عندي نيه بعد اللي صار، كنت نشوف لحسام كيف يأكل ومره مره يقيم في عيونه ويشوفلي وكأنه كان يبي يتأكد من وجودي، أستنيته لين كمل مأكلته وقمت السفره غسلتها، وأستغليت أنه خش الحمام خشيت طول للدار وسكرتها بالمفتاح، كنت عارفه أنه مش راح يخليني لهذا فضلت الإنسحاب على الأقل الليله
حسام تنهدت بقهر لما مالقيتهاش في المطبخ وأنتبهت لباب الدار اللي مسكر، عرفت أنها قاعده تتهرب بس أني عاذرها اللي صار الليله مش شويه، حاليا يكفيني هالقدر يعني الأمل موجود أنها تلين شويه وترجع زي قبل، لقيت تليفوني أمي على طاولة الصالون خديته ورقيت، أتكيت وبعتلها رساله
” قبل أن أنام أردت أن أخبركِ أنك ستبقين النبض الذي لايفارق قلبي مهما حدث بيننا❤❤ ”
فتحت عيوني بصدمه لما شفت اللي بعتاته هذي مش ناويه تخليني نرقد ولا ليله فرحان،
” لو أني كنت النبض إمالا هيا شني الشريان مثلا😏”
كنت بنتصل بيها بس تراجعت لما سمعت الفجر يأذن: أستغفر الله العظيم، صبرك يارب على ماأبتليتني🤲😔

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)