رواية طفلة أرهقت قلبي الفصل السابع 7 بقلم عائشة البشير

رواية طفلة أرهقت قلبي الفصل السابع 7 بقلم عائشة البشير

رواية طفلة أرهقت قلبي البارت السابع

رواية طفلة أرهقت قلبي الجزء السابع

رواية طفلة أرهقت قلبي الحلقة السابعة

** أعدك سأبقى معك في أسوأ حالاتك وأجملها❤**
……: برافووووو ياحلوين المشهد اللي بعده بسرعه
دنيا بعدت على حسام بسرعه وتلفتت بصدمه😮، وسيطر عليا الخوف للحظات، لما شفته واقف وعلى وجهه أبتسامه مستفزه
حسام قرن حواجبه: هوا انت روحت باهي أنست ياسي، وشبح لدنيا بحده: خشي الداخل أنتي
دنيا خفت على حسام منه، بخوف😟: بس… وسكتت لما شفت نظرات حسام الغاضبه
أحمد، بهزوه😏: ليش تخش خليها باش تكملو المشهد الرومانسي مع بعض وبالمره خلينا إنادو العيله، باش نستمتعو كلنا مع بعض
حسام، بغضب😠: دنيا قتلك خشي ولا لا، ليش قاعده واقفه
دنيا شفت لحسام بضيق، وتلفتت ومشيت خشيت وأني مش مرتاحه
أحمد قعد يشوف لدنيا وهيا ماشيه لين إدرقت، تلفت لحسام وبغمزه😉: ماشاءالله مسيطر حضرتك، قدرت تغلبها الطرف وتخليها تسمع كلامك، باللهي الطريقه لو سمحت؟
حسام أبتسمت في داخلي يحساب روحه بيقدر يستفزني هالغبي هذا، وبغضب😠: أحترم نفسك وبعد على دنيا وماتلعبش بعداد موتك أفضلك، نصيحه خوذها مني خليك بعيد وبعيد هلبا، ومشي وخلا أحمد واقف في مكانه
أحمد بصوت عالى: توا نشوفو ثقتكم وغروركم هذا لوين بيوصلكم لما تنفضحو قدام الكل
حسام، تلفتت لأحمد وأبتسمت بهزوه😏: قاعد صغير ياروحي، ألعب بعيد ياعيل
خش حسام وخلا أحمد واقف بغضب رغم أنه شدهم من نقطه ضعف بالنسبه ليهم بس مش قادر يستفيد منها مايبيش يبين عداوته ليهم من توا قدام الكل، باش ماحدش يشك فيه القدام، وتنهد بعصبيه وخش حتى هوا

 

 

دنيا قعمزت بحدا عمتي وأني خايفه ومتوتره، ماكنتش خايفه على روحي من أحمد أو أنه يقول اللي شافه لحد من العيله، لا عادي مايهمنيش رأيهم أو نظرة أي حد فيهم مادامني مقتنعه أني مش غالطه، بس كنت خايفه على حسام منه وخصوصا بعد ماعرفت نيته شني إتجاه حسام من اللي سمعته
سعاد، وهيا باديه على وجهها علامات الخوف😟: ماتندريش على حسام ياعادل عطل مش من عوايده
عادل، بنفي: لا واللهي ياعمتي طلعنا مع بعض على أساس مروح ركب سيارته ومشي ماقال شي
سعاد: ترا جيبيلي تليفوني ياسميره خلى أنشوفه
عادل: ماتعبيش روحك ياعمتي كلمته مايردش
الكل لاحت على وجوههم أبتسامه لما خش حسام😊
حسام، بإبتسامه😊: السلام عليكم أنستونا ياعويله
الكل بأصوات متفاوته: وعليكم السلام، أهلين، الله إيأنسك
عادل🙄: الحمدالله على السلامه، تي وين ياراجل شغلتني عليك خيرك ماتردش
حسام: وين كنت أهو جيت، نستأذنكم شويه ياشباب نبدل ونجي
دنيا كنت مركزه بعيوني👀 معاه من لما خش لين طلع، وحاسه بشعور لأول مره نجربه، خوفي من أني نفقده خلاني نحس بقيمة وجوده، تلفتت لي سميره اللي تكلم فيا وأني مش معاها بكل،بإبتسامه😊: نعم
سميره: هيا تعالي معاي إنوتو العشي، هذاكم وهيا تأشر على البنات: ضيوف ياحنه مايتحركوش😒
دنيا بضحكه خفيفه☺: هيا نوضي، طلعت سميره وأني وراها، وأنتبهت لأحمد واقف جنب حوشنا ويدخن ويشوفلي بنظرات هزوه

 

 

دنيا: سميره نجيب تليفوني نسيته الداخل ونلحقك
سميره: باهي تلقيني في المطبخ وخشت
دنيا خديت نفس بقوه وتوجهت لأحمد، مش راح نخليه يحس روحه أنتصر عليا أو شد عليا شي رغما أنه مايهمنيش بس هكي تعودت مانسمحش لحد يستضعفني😌
أحمد،بغمزه😉: أهلا بالطرف، باللهي باش ضحك عليك الجبالي هذا، قوي ياسي، بس أهو نقولك من توا ردي بالك لأني مش راح نخليه يتهني بيك
دنيا، تجاهلت كلامه، وبحده: لو مفكر انك ممكن تخوفني فهذا الشيء في حلمك، بس نصيحه أنت اللي لازم تخاف، وقرنت حواجبي بغضب: لحد الأن ماحدش يعرف مني اللي لعب بسيارة حسام وكان ممكن يمشي فيها بسببك، أبتسمت بنصر لما شفت الخوف في عيونه، وبضحكه مستفزه: نقولك شي ثاني ولا لا خليها مره ثانيه وتلفتت بنخش
أحمد، بتوتر😦: أني مادرت شي وبعدين ماحدش راح يصدقك لأنه عارفينك تكرهيني وساهل تتبلي عليا
دنيا تلفتت برفعه حاجب: بس ماحدش راح يكذب عيونه لما يشوفو وجهك واضح في الفيديو وكيف درت في السياره، وعلى فكره في أشياء هلبا أنت بروحك ماتعرفهاش على نفسك قاعد، وقادره تنهيك نهي، تنهدت بحزن: بصراحه واجعني قاعد صغير وماشفت شي من الدنيا، مش معقوله تقضي باقي عمرك في الحبس ولا مدفون تحت التراب، وبتحدي: حافظ على حياتك وألعب بعيد يا…….
حسام، بغضب😠: دنيا ليش واقفه أهنايا
دنيا تلفتت بخوف😟: لا شي كنت خاشه لي سميره في المطبخ
حسام فنصت في أحمد وأني معصب😡، وأستغربت أنه طول نزل عيونه ومشي من الجهة الثانيه، شديتها من أيدها وجبدتها معاي، وبغضب😠: المطبخ مش أهنايا، ولا معاش عرفتي طريقه
دنيا وصلنا قدام الباب ورخي أيدي اللي قعدت حمراء من شدته، قعدت ندلك فيها بأيدي الثانيه، بالرغم من أنها وجعتني بس ماتكلمتش، وعيوني مانزلوش من عيونه🥺
حسام برجاء: معاش تحكي معاه فاهمه ولا حتى حرف حتى يكلمك معاش تردي عليه ومادابيك المكان اللي فيه هوا أنتي ماتقعمزيش فيه، وأنتبهت لأيدها اللي إدلك فيه وواضح تتألم منها، وبأسف😞: أسف سامحيني مش قصدي بس لما شفتك واقفه معاه معاش قدرت نتحكم في أعصابي
دنيا أبتسمت😊 وهزيت رأسي بمعنى تمام وخشيت للمطبخ

 

 

حسام أول مره ماتجادلنيش على شي نقوله أو نطلب منها إديره، وتوافق على طول، أبتسمت بفرحه☺ وأنتي نتبع فيها بعيوني لين خشت، ولفيت ورجعت للمربوعه
أحمد صح قدرت تخوفني بنت أمها بس كيف عرفت !! زعما حق صورتني فيديو !!، ولا شني قصدها بالحاجات اللي تعرفهم عليا أني بروحي مانعرفهمش🙄 كنت نعرف أنها قويه ومش ساهله بس ماتوقعتش لدرجه هذي، معقوله طفله زيها تقدر تخوفني، شكلها تلعب معاي مستحيل تكون تعرف شي، بس لازم نأخذ أحتياطي منها، خلى نهدي شويه الفتره هذي
في المربوعه الجو كان مشحون بين السلفات وبالأخص فاطمه المتضايقه من وجود ناديه بينهم، والأنظار اللي تتوجه ليها بإهتمام وبالأخص لما تتكلم بأسلوب ملفت ومثقف، والقوه والثقه واضحه في كلامها، مما خلا سلافيها يركزو عليها بإعجاب زي كل مره تكون موجوده معاهم، ممكن لأنه كل واحد شايف فيها حاجات مش قادر يلاقيهم في زوجته، الثقه والأسلوب وكلامها الموزون المبنى على أساسيات قويه، شكلها المرتب وأناقتها الملفته ومظهرها اللي يوحي بأنها أصغر من عمرها بهلبا، كل هالأشياء اللي فيها قادره تلفت أنتباه أي راجل
فاطمه، بحقد: الفلوس مش كل شي راهو، والدنيا دواره زي ماتعطيك غذوه تأخذ منك
الكل إلتفتو لفاطمه بنظرات غضب على كلامها اللي مافيش ليه أي لازمه وماليشي علاقه بالموضوع اللي يهدرزو فيه، والكل فاهم أنها تلقح على ناديه وتستفز فيها
سعاد، بأسف: لا حول ولاقوة الابالله العلي العظيم، ربي يهدي إن شاءالله 😒
عادل: ماشاءالله الجو تعدل ورايق شني ضحكت عليك بكلمتين إمالا😏
حسام، بنظره مستفزه: أنت شني اللي واجعك خلى تضحك على قلبي زي العسل، وبعدين إنشم في ريحة حسد و غيره طالعه من جيهتك😒
عادل ضيق عيونه: ليش بنحسدك البناويت أكثر من الهم على القلب، وماعندي ليش بنغار منك اللي في بالي مايسواها حد ولا واحده تجي في ربعها
حسام صفق أيديه في بعض بصوت عالي: أيواه أطلع ياحق ربي، وحس بالأحراج لما شاف الكل تلفتوله وعيونهم معاه من حركته
عادل ضاغط على سنونه: فضحت بينا الزفت ياعيل
حسام تلفت للكل وبإحراج: سامحونا معليش تفاعلت مع الموضوع بس

 

 

سعد، بإستغراب🤔: موضوع شني شاركونا خلى نتفاعلو معاكم حتى أحني
حسام بحده: ألهي في روحك باللهي، وتلفتت لعادل بحماس: مني اللي في بالك إدرق عليا أني معقوله !!
عادل بنص عين: وخيرك أنت إدرق عليا، قول أنت نقول أني
حسام: بكل الزفت واحد لايأخذ منك لا حق ولا باطل، نقعها وأشرب إميتها معاش نبي نعرف😒
ساد الصمت مابين الشباب وكل واحد لهي في عالمه الخاص
محمد اللي كانو عيونه على علا طول الوقت، وخايف من أنها تخذل قلبه، وبالأخص أنه حاس روحه تعلق بيها زياده، وبدت الفتره الأخيره تسيطر على تفكيره أكثر
” صاحبة أوصاف وملامح جميله… ملكت القلب والتفكير وخلتني في حيره…ومن يومها وأنا شارد الفكر وعيوني حزينه ”
حاتم عيونه على عليوه اللي يلعب هوا وصغار سلوى وسميره، ويفكر هل قراره بالإنفصال عن عبير راح يضر ولده أو لا، وكيف بيعيش بينهم
” بعض الصفحات في الكتاب لا تحتاج إلي الطي بلطف والتغاظي عن المحتوى.. لاينفع معها إلا النزع وأقتلاعها بعنف… وإكمال قراءة الكتاب باأمل وتناغم ”
سامر وسعد وسامح اللي كل واحد فيهم شاد تليفونه ولاهي فيه
عادل كان يفكر في الخطوه اللي ناوي يديرها وكيف راح يكون الإقبال عليها
حسام سرحت بتفكيري للي صار قبل شويه، معقوله خافت عليا للدرجه هذي مش عارف نفرح باأي بادره منها خايف من التناقض العجيب اللي في شخصيتها، بلحظه أطيرني في السمي😍، وبلحظه أطيحني بقوه على الأرض😔
لفتت نظري مرت خالي سعيد كيف تهدرز مع أمي على المرضي والحالات اللي تشوف فيهم ويمرو عليها كل يوم وأشياء تخلى الواحد يقشعر بدنه، أصعب شي الأمراض النفسيه😞، أبتسمت على أمي اللي تهز في رأسها على أساس فاهمه وهيا ماتندري عليها من وين زارقه😅
فكرت في شي بس أن شاءالله تقبل تساعدني، وماتشكش فيا😊
دنيا تعشينا وضميت المطبخ مع بنات عمتي وطلعت لقيتهم كلهم طالعين بيروحو، توجهت لحوشنا وأني نشوف بإستغراب🤔 لحسام وأمي اللي واقفين في المنور، حاولت نخلى روحي عاديه وفتت من جنبهم، وسمعت ماما تقوله خلاص غذوه العشيه تعالا ونحكو ولو ماقدرتش إنفيدك راح نبعتك لأخصائيه أجتماعيه كويسه تقدر تفيدك، أستغربت من اللي سمعته، بس تخطيتهم وخشيت الداخل وأني مسيطره عليا الحيره، زعما شني فيه !!
سميره قعمزت على الصالون بتعب: خلاص فشلت غير شني خطر عليكم هاللمات ياأمي
سعاد: واللهي لمة العيله إلا باهيه، هذي دنيا بدت بيها وخوالك وبوك عجبتهم الفكره وقررو كل خميس نلتمو ونتعشو عند واحد

 

 

سلوى: والله رجليا تكسرو من الخشان والطلوع، مشوار من المطبخ للمربوعه
مصطفي كان مقعمز ومش عاجبه تذمر بناته لأنهم تحركو وخدمو في حوش بوهم وعاونو أمهم شويه، بهزوه😏: مادارت ديركم حتى دنيا اللي بروحها ماخلت مادارت
حاتم: تبو الحق والله مانحسابها هكي هالدنيا هذي، قبل ديمه نشوف فيها إنطوائيه ومغروره وقايمه خشمها في السمي
سميره: الحق ماشاءالله عليها والله ماقعمزت وهيا معانا إيد بيد عكس بنات خوالي الثانيين
حسام خشيت وأني ندخل في الصغار: 😒لا إعبو عليكم مقعمزين وهاذم لمني إمخلينهم برا
سعاد: خلي يلعبو ماعليهم، ماعندهم وين يمشو
حسام🤨: شني يلعبو ياأمي س12 مفروض راقدين من بكري
مصطفي شاف لعليوه بأسف، وتلفت لحاتم بضيق: ليش ماخليتش الولد يروح لأمه
حاتم: وحتى أني بوه مافيها شي لو بات معاي الليله كلمت خالي وقال عادي حقك
حسام وهوا يأشر لخواته: باهي هيا نوضو رقدوهم، وديرولنا طاسة شاهي خلى نقعمزو نهدرزو زي الناس وأنتم ماتجو غير مره في السنه
سلوى خدت الصغار ودخلتهم للدار، وسميره ناضت للمطبخ بدير الشاهي
مصطفي يشوف لبناته اللي سمعو كلام حسام وهوا مبتسم 😊
حاتم يشوف لحسام: باهي لوح هالتليفون من أيدك وقعمز مش تبي الشاهي خيرك واقف على الباب
حسام أبتسمت ☺وأني نقرأ في المسج اللي وصلني ” لو سمحت نبي نحكي معاك شويه ممكن “، توجهت للدروج وأني نأشر لحاتم باأيدي: شويه ونازل
^^^^^^^^^^^^^^^^^^^^^^^^^^^^^^^
في حوش مفتاح، خشو وتلقتهم عبير من فم الباب وبتسأل: وين عليوه إمالا !!
عادل، ببرود: قعد عند بوه قال يبيه الليله يبات عنده😒
عبير بعصبيه😡: كيف تخلوه عنده برا توا ياعادل جيبه منه، كيف يشده أصلا بأي حق !!
عادل، بحده: حاتم بوه ولا ناسيه وعنده حق فيه زي ماعندك وأكثر، خشي أرقدي غذوه توا يجيبهولك
عبير، بصوت عالى: لا جيبهولي توا كيف نقدر نرقد وولدي بعيد عليا
مفتاح اللي كان ساكت ويتابع في الكلام، تنهد بضيق: لو كنتي تفهمي قيمة الولد والعيله راهو مادرتيش اللي درتيه وخربتي حوشك بإيدك، يكون في علمك لو صار وأطلقتي ولدك يقعد عند بوه أني ماعنديش جهد لتربية الصغار طلعتي من الحوش بروحك ترجعيله بروحك

 

 

عبير بصدمه😮: كيف أنت شني تقول يابوي !! مستحيل نخلي ولدي أني اللي راح نربيه ماطلبتش من حد شي
مفتاح بغضب😠: وباش بتربيه يافالحه، حتى شهاده تقدري تخدمي بيها زي الناس ماعندك، فالحه غير لما سيبتي قرايتك وتبي تتزوجي، تحملي نتيجة غلطك توا، ولدك راح يقعد مع بوه وهذا أخر كلام عندي، وخش للدار وقربع الباب وراه بعصبيه
عبير تبكي😭: كيف هكي يقولي كيف تحرموني من ولدي باأي حق، هذا بدل مايوقف معاي وفي صفي، يوقف ضدي أي بو هذا
عادل بصوت عالى: سكري فمك وأحترمي نفسك، ياريتك جيتينا مظلومه كنتي شفتي كيف وقفنا معاك وخذينالك حقك، بس جايه والظلم كله فيك وماشاء الله مفتخره ومش ناكره ولا شي كيف تبينا نوقفو معاك، أصلا بارك الله فيه اللي تحملك 4سنوات، والله لو أني في مكانه لوحتك من أول شهر
سالمه، بحزن😔: خلاص ياولدي ياسرها اللي فيها
عادل بهزوه😏: شني هوا اللي فيها ماهو هيا اللي جاباته لروحها، وحتى أنتي ياأمي ساهمتي في هالشيء
سالمه، بصدمه😮: أني !! وشني اللي درته !!
عادل😠: ماعرفتيش تربيها كويس ياأمي مانصحتيهاش وماوريتيهاش الصح من الغلط، كل يوم راقده عندك من الصبح لليل لاتندري على راجل كلي ولا شرب ولا شني يدير ولا وين يمشي، وأنتي فرحانه وتسايري فيها على الغلط، عارفينها ماتعرف شي ومش قد المسؤولية وماتسترناش قدام الراجل ليش عاطينها من الأول خليتوها إندفست أهني، ليش واخذها هوا مادامها مش مريحاته ولاهو متهني معاها، أهو لوحهالك أشبعي منها توا، ومشيت خشيت لداري
سالمه تنهدت بحزن 😔على حالة عبير وهيا تشوف فيها طايحه على الوطا وتبكي ومنهاره، قربت منها بتسندها وتنوضها، بس زفرت بضيق لما عبير نفضت أيدها وناضت خشت للدار
سالمه تلفتت لعلا اللي واقفه، وبرجاء🥺: بري شوفيها سلم بنيتي وماتخليهاش بروحها راهي أدير في روحها حاجه
هزت علا رأسها بأسف وخشت لعبير، ومشت سالمه وهيا مضايقه وخشت لدارها
ومن حوش مفتاح لحوش مبروك واللي صار غادي مايقلش بشي على اللي صار أهني😓
وينه الحيوان ترباية الشوارع هذا وينه، هذا مبروك وهوا خاش معصب ويتحلف في أحمد
فوزيه برجاء🥺: الوليد راقد باللهي خليه وغذوه تفاهم أنت وياه، ليش هالعياط في هالليل
مبروك فنص فيها خلاها تيبس في مكانها، وبغضب😠: تعرفي تقلبي وجهك من قدامي وردي بالك تتدخلي بيني وبين ولدي فاهمه، وخش وقربع الباب على أحمد اللي فز من نومه وهوا مخلوع

 

 

فوزيه نزلو دموعها😭 وهيا تسمع في عياط مبروك وصوت السبته يلعب على أحمد، وبرجاء🥺: زود يامحمد ورأس وليدي بيقتله راهو، بوك لما يرقاله معاش يشوف قدامه
محمد، ببرود: مانبيش ندخل ياأمي خليه يتأدب مايصيرله شي ماتخافيش
سرور وسنيه اللي سيطر عليهم الخوف😟 وهما يسمعو في الصوت واضح في دارهم، ومش قادرين يطلعو أو يشوفو شني فيه خوفا من عصبية بوهم
طلع المبروك بعد مافش غله في أحمد وخلاه متلوح زي الجثه في الدار، ورفع صبعه في وجه فوزيه وبتحذير: قسمآ عظما نسمع بيك خاشتيله ولا محننه عليه ولا عاطيتيه فلوس ولا مدرقه عليه عمله من عمايله ماعاد تقعديلي فيه لا أنتي ولا هوا فاهمه، وطلع وهوا يلهث من المجهود اللي داره
محمد خش لأحمد وتنهد بأسف😞 على حاله، قعد يتأكد أنه مافيشي شي كبير كسر أو شي، وبعدها قامه وحطه على سريره وطلع لأمه اللي واقفه تبكي قدام الدار ومش قادره تخش
محمد، بضيق: ماتخافيش ياأمي مافيه شي حاجه بسيطه، بري خشي أرتاحي أنتي وماتفكريش فيه غذوه تلقيه ينقز زي الجن، وقعد بعيونه مع أمه لين خشت لدارها تنهد بملل وتوجه لدار خواته
خلينا نشوفو حوش بشير على السريع
فاطمه وهيا خاشه من فم الباب، وبصوت عالى: من توا نقولها أي مكان فيه الفاجره هذيكا معاذ نخشله
بشير، بنفاذ صبر😪: اللهم ماطولك ياروح، ناضت الهبله غير خلينا إنخشو
فاطمه، بكره: ماتشوفوش فيها كيف تشوفلي وكيف تلقح عليا تقول مافيش حد متعلم غيرها

 

 

سامر، بإستغراب: بس ياأمي كلنا مقعمزين ومالاحظنا شي ولا سمعناها قالتلك كلمه
بشير: ماهو يقولو فيها ياولدي المهموم ينخصوه مرافقه، تي كان مش موجودين كلنا وكل شي على عينا نصدقوك، ماهو أنتي اللي حاطه نقرك من نقرها وواقفتيلها على الكلمه
فاطمه، بحقد: مش عارف كيف ساحرتكم وكلكم واقفين معاها، أني اللي عندي قلته مكان فيه هيا معاد نخشله لو كان أشبح شني
بشير، بحده: إمالا خودي هذي، كلامك هذا رفعه الريح ومشي، والخميس الجاي اللمه عندنا وأنتي بروحك تمشيلها وتعزماها ولو ماتجيش هذيكا الليله دوري وين تباتي، أخر وقت أنتي تحكمي فيا ماتعبيش يافالحه، وتعدلي خير ماتعدلك واحده ثانيه،وشافلها بهزوه😏 وخش لداره
والولاد تنهدو بأسف وتوجهو لدارهم، وخلو فاطمه تغلي وتبكبك وتأكل في روحها مأكله🤭
^^^^^^^^^^^^^^^^^^^^^^^^^^^^^^
دنيا بعتت المسج وقعدت نستني، وأني متوتره ونحاول نرتب كلامي هالشي اللي قاعد يصير معاي غريب عليا وصعب ننسجم بسهوله بس في نفس الوقت مانبيش نخسر حسام وإهتمامه بيا، والأمان اللي حاساته معاه
دنيا أبتسمت 😊لما رن تليفوني: أهلا
حسام، بفرحه☺: أهلين وسهلين
ساد الصمت اللي قطعه حسام، بضيق: شني جو الرسميات اللي إديري فيه أهو لو سمحت !! وممكن !! معاش يتكرر باهي
دنيا: ماهو مرات مش فاضي أو ماتبيش تحكي مع حد
حسام، تنهدت بأسف😞: كان مش فاضي نفضي روحي ليك، وبعدين أنتي مش أي حد يادنيتي
دنيا ضحكت بعفويه من قلبي 😄
حسام كل اللي يسمعها يفكرها ضحكه والسلام، بس مايعرفش قداش دارت من أغاني ومواويل في قلبي😍: دايمه هالضحكه يارب، بس شني اللي يضحك فيك؟؟

 

 

دنيا، ببرائه: لا شي بس عجبتني دنيتي شويه قاعده خير من طفلتي
حسام، بحب😍: أنتي طفلتي ودنيتي وكل شي، وتقدري تتصلي في أي وقت، أني ووقتي وكل شي فيا على حسابك، إلا إذا كان أنتي أدوري في سبله، هذاكا بعدين شي ثاني🙄
دنيا بتوتر: مش هكي بس مرات تكون جنب العيله أو شي مابيتش نتصل على طول
حسام صعب تفهمني😓: تمام حصل خير، شني اللي تبي تحكيه معاي؟؟
دنيا، بتوتر: أنت كم مره وعدتني أنك مش راح تخليني وتكون جنبي صح !!
حسام، بإبتسامه😊: صح وقاعد إنقولك أني معاك وجنبك
دنيا، بقهر: باهي واللي صار اليوم شني أسمه هذا؟؟
حسام، تنهدت بحزن😔: أسمه أنك مش عاطيتيني مجال معاك أصلا، مش عارف كيف نتصرف معاك، دنيا ركزي معاي شويه شوفي أني كيف نعامل فيك وأنتي كيف تعاملي فيا؟
دنيا، بضيق: ماهو أني مش عارفه شي وأصلا مش فاهمه كيف تبيني نعاملك ؟
حسام، بهدوء: كل المطلوب أنك تكوني على طبيعتك معاي ليش تحطي في حدود لكل شي بينا، شفتي عفويتك اللي تصرفتي بيها معاي الليله وأنتي خايفه عليا خليها ديمه ليش تحاولي تأخذي دور مش ليك، تتقمصي في شخصيه غير شخصيتك، متعب هالشي يادنيتي ماتعبيش روحك وتعبيني معاك
دنيا، بحزن😔:حسام ممكن تعطيني شوية وقت، أني خايفه

 

 

حسام، بإبتسامه😊: وقتي وعمري كله على حسابك، بس ليش تخافي قتلك أني جنبك وراح نقعد جنبك لو شني صار
دنيا، بضيق: أني ديمه نخاف من بداية علاقتي مع الأشخاص، مانقدرش نتقبل أي شخص بسهوله تشوف فيا ماعنديش خلطه مع حد، نتجنب في الكل لأني مش مستعده نكون ضحيه لي ولا شخص مش متقبله فكرة أني ممكن نتنازل لحد أو نسمح لحد يستقوي عليا
حسام حاس وكأنه ألغاز الدنيا كلها تجمعت فيها، شني اللي يخلي طفله في عمرها هذا تفكر بالعقليه هذي،بهدوء: أني طول عمري راح نكون معاك مش ضدك، أحكي كل شي في خاطرك، قوليلي أنتي يادنيتي شني تبي بالضبط؟؟
دنيا تنهدت بحزن😔: محتاجه شخص يوقف جنبي يشد أيدي يكون معاي في الصغيره قبل الكبيره، يكون موجود في حزني قبل فرحي، محتاجه حد يسندني مايخلينيش نحتاج لحد ثاني في وجوده، حد يصححلي غلطي مش يلومني عليه
يوريني الصح من الغلط، الخير من الشر، حد يحميني من الكل نقدر نوريه ضعفي وأني مرتاحه أنه مش راح يستغلني ويكسرني بيه، نزلو دموعي اللي حاولت نخفيهم على قد مانقدر بس عجزت فيهم، بدموع😢: ممكن أني محتاجه أم وأب وأخ مش شي ثاني
حسام كلامها كسرلي قلبي💔 هيا صح تبان قويه من الخارج بس داخلها روح هشه فاقده أبسط أنواع الأحتواء، أحتواء العائله اللي كلنا بنكبر وبنقوي بيه، بحب: تقدري تعتبريني أني بوك وأمك وخوك
دنيا، بحزن😔: أنت الأول والوحيد اللي قدرت تأخذ مساحه من الفراغ اللي في داخلي، مانبيش نخسرك بتصرفاتي اللي أني أصلا مش عارفه كيف نغيرهم، كيف إندير باش نقدر نحافظ عليك
حسام، بحب❤: أنتي مش مجبوره تغيري ولا حاجه فيك على خاطر حد، ومش مفروض عليك أديري أي شي باش تحافظي عليا، أني اللي ملزوم ومجبور نحافظ عليك، لأني مستحيل نقبل أني نخسرك ولا بأي شكل من الأشكال، كلامك هذا يكفيني الوقت الحالي أنه نكون أني الأول والوحيد اللي قدر يشغل حيز من الفراغ اللي في داخلك شي أكيد يسعدني في بداية مشوارنا❤
“” تخيل أن تكون القبول الوحيد لشخص يرفض الكل… أنها فكره دافئه قليلا “”💝

 

 

حسام كلامها خلاني نستنتج أني تسرعت شويه في أندفاعي بمشاعري ناحيتها بالسرعه هذي،
مش من الصح أني نفرض عليها حبي ونقوللها حبيني غصب وتوا، بس قادر نكسبها لازم تحس بالأمان معاي لازم نخليها توثق فيا، لازم تحس أني السند اللي بيحميها وبيوقف معاها ويقويها في ضعفها، قدامي مشوار طويل، بس متحمس للبداية، فكرت أنها تشاركني اللي تفكر فيه، وتحكيلي اللي في خاطرها واللي قاعده تحس بيه، شي حلو ومش كل أثنين متحابين قدرو يوصلو لهالشي من التناغم والمشاركه
فات الليل وأحني فاتحين الصفحات الأولى في حياتنا، ونسيت الشاهي وخواتي والهدرزه معاهم، وكل مايجو بينادوني أندير روحي على أساس راقد😅
أنتي أعطيهولي ومادخلكش، هذا محمد وهوا يطلب في رقم علا من سنيه
سنيه بتوتر: خليني نسألها غذوه ونقولك مرات تزعل أو شي
محمد تنهد بضيق: قتلك أنتي مادخلكش مش راح نجبدك بكل، مانقولش خذيته منك
سنيه: ماهو واضحه أصلا منين بتجيبه يعني مش راح تصدقك بكل
محمد بغضب😠: تي هاتي البلي الزفت نقوللها خذيته بالدرقه، وأنتي ماتندريش عليا
سنيه عرفت أنه مصر وأعتراضها على الموضوع مش راح يمنعه بأنه يأخذ رقمها، بإستسلام: باهي سجل هي، بس أني برا الموضوع هذا راهو
محمد سجل الرقم وطلع من غير ولا كلمه، توجه لسيارته لأنه الدار كان فيها أحمد وأكيد مش راح يكلمها قدامه
علا تنهدت بحزن😔 وهيا تشوف لعبير اللي تبكي وتشهق بالعبره على كسرة خاطرها بعد الكلام اللي سمعاته، أنتبهت لتليفونها اللي رن برقم غريب داراته صامت، وتمددت على سريرها، وهيا تفكر مني هذا اللي يرن عليها في هالوقت، زفرت بضيق لما رجع يرن من جديد
محمد زفر بغضب 😤وهوا يرن مره وإثنين وثلاثه وأربعه بعدين إذكر أنها ممكن ماتردش على أرقام غريبه، فبعتلها رساله ” علا أني محمد ممكن تردي لو سمحتي محتاج نحكي معاك شويه مش راح نضايقك”
علا أنفتحو عيونها على وسعهم 😯وهيا تقرأ في الرساله، أنصدمت ماتوقعتش أنه ممكن يدير هكي أو أنه يكون متمسك بيها لهالدرجه، بس تصرفت ببرود وكتبت الرساله وسكرت تليفونها وغمضت عيونها محاوله منها أنها تنسي نهاية اليوم الكئيبه وتغط في نوم عميق
محمد تنهد بأسف😞 وهو يشوف للي كاتباته ” أعذرني يامحمد مانقدرش نرد عليك لا توا ولا أي وقت ثاني لو سمحت معاش إضايقني أكثر “

 

 

نزل رأسه على الدومان وهوا يفكر شني ممكن يدير بيش يقدر يكسبها ويخليها تلين معاه شويه
دنيا العلاقه الهادئه اللي بيني وبين حسام ريحتني هلبا وبالأخص مع ضغوطات الإمتحانات، وجوده جنبي ودعائه ليا بالتوفيق والنصائح اللي ماوقفتش منه هالشيء مخليني في قمة السعاده،☺
أهتمامه بتفاصيل يومي خلا هالأسبوعين يمرو وكأنهم ساعات ووجوده جنبي ورفعه لمعنوياتي خلاني مانحسس بالتوتر اللي ممكن يصير مع أي طالب قبل الإمتحان
اليوم أخر يوم في الإمتحانات أبتسمت بفرحه على المسج اللي وصلني ” صباح الورد، ماتنسيش تأخذي حاجه حلوه وإمية مرقيه قبل ماتطلعي، ركزي كويس ممنوع تخلي أي سؤال فاضي، لو ماعرفتيش الحل أكتبي حسام وخلاص، بالتوفيق يادنيتي ” كل يوم كان يستني فيا في البوابه، بس اليوم عنده مقابله في شركه فطلع بكري باش مايتأخرش
حسام ضحكت من قلبي😅 وأني في عز توتري وخوفي من المقابله لما شفت رسالتها ” صباح السعاده، خلاص اليوم حل الأسئله كلها حسام بس بشرط ماتجاوبش على ولا سؤال في المقابله من غير ماتقول دنيا ”
وأبتسمت😊 لما وصل مسج ثاني ” مش مقبول تروحلي وأنت مش محقق الهدف من المقابله اللي حرمتني من شوفتك اليوم ”
زي ماتشوفو لانت شويه ولو بنسبة 5% بس هالشيء مرضي ومريح بالنسبه ليا 😍كونها معاي وفي جنبي، قاعد نبدل في كل جهدي باش نقدر نحافظ عليها ومانخسرش النقطه اللي وصلتلها معاها❤❤
دنيا طلعت من الإمتحان وتنهدت براحه وأخيرا الحمدلله أنتهيت من هالمرحله على خير، طلعت تليفوني على أساس بنسبقه هالمره بس كالعاده ديمه سابقني ” طمنيني كيف كان إمتحانك ” رديت ” تمام التمام الحمد لله وأنت شني الأخبار عندك ”
حسام توجهت للمكتب اللي فيه لجنة المقابله وأني عيوني في التليفون ونكتب ” الحمدلله يادنيتي، أنتي ليا اليوم كله، جهزي روحك، كيف خاش أدعيلي ” أرسلت الرساله وأبتسمت😊 للمدير اللي قال وهوا يضحك: واضح من توا عقلك مش معاك وين مخليه وجاي😅
“” سلبت عقلي.. وأحتلت قلبي.. أصبحت وحدها الحب والحبيبه.. صارت وطنآ يحتويني ويآسرني.. نعم بكل كبريائي وغروري أسرت قلبي وروحي.. أمست هيا حدودي وكوني وعالمي.. نعم أعترف عشقتها وقلبي أصبح ينبض بحروف أسمها “”

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)