رواية ظلمت نفسي الفصل الأول 1 بقلم سارة اللومي

– انا خلاص قررت يا ماغي ، مش عايزة اكمل مع البني آدم ده انا هاطلب الطلاق

– طلاق ايه يا رنا انتي اتجننتي !؟بقى كل من عشان ايه ؟ عشان جايبلك ازازة برفان بس في عيد زواجكم؟

– انتي اصلك مش عايشة معاه لو كنتي عايشة اللي انا عايشاه ما كنتيش تقولي كدة المسالة مش مسألة برفان بس انا زهقت منه انسان بارد معندوش احساس مفيش مشاعر مفيش دلع انا كنت مستنية ليلة ذكرى جوازنا تكون حاجة خيالية و يحجز لنا في مطعم و بلالين و ورد ويهديني حاجة ذهب

في الاخر جاي تعبان آخر الليل جايبلي ازازة برفان فرحان بيها و بيقولي بكل برود كل سنة و انتي طيبة و حطيلي لقمة مهدود حيلي

– طب و انتي عملتي له ايه عشان عيد جوازكم ؟ يعني المفروض انتي اللي تعملي جو رومنسي و سهرة و مفاجأة و هدية

– ما عملتش حاجة طبعا! مش هو الراجل انا كنت فاكراه هيعمل لي مفاجأة و ياخذني يعشيني برة ما عملتش اكل و كمان المفروض هو اللي يجيبلي هدية هو اللي بيشتغل مش انا

– بصراحة يا رنا انا مش شايفة انه غلطان ، محمود راجل محترم و بيحبك بس بطريقته يعني مش لازم حب و غراميات و سهرات عشان يبينلك الحب ده !

– انتي بتدافعي عنه كأنك بتعرفيه زي ما انا عارفاه ! انا بقالي معاه ثلاث سنين مش حاسة اني متجوزة مفيش مشاعر خالص مفيش كلمة حبيبتي مفيش دلع مش هاقدر اعيش كدة انا انسانة رومنسية بحب اللي يعبرلي عن الحب مش واحد رجعي و فاكر أنه لما يقول لمراته بحبك يبقى ضعيف .

– أحيانا التعبير بيكون في المواقف مش شرط بالكلام يا رنا و بعدين محمود انسان مثقف رغم أنه مكملش تعليمه و لو كان رجعي مكانش سمحلك تكملي دراستك و تدخلي جامعة .

– و هو يعني سمحلي بمزاجه؟ ما انا زنيت على دماغه لحد ما زهق.

– بس برضو لو مكانش بيحبك مكانش وافق و حققلك امنيتك.

– يوووه انتي في صفه كدة على طول !! كل ما اكلمك عنه تدافعي عنه ولا كأنك صاحبتي.

– انا لاني صاحبتك و بحبك بقولك اوعي تخسري واحد زي محمود لانك مش هتلاقي زيه…

– يووووه بقى الكلام مامنوش فايدة معاكي انا هاقفل يالا باي ..

؟………………

– الو انت فين يا محمود ؟

– هاكون فين يعني في الارض زي كل يوم .

– طب انا مستنياك ضروري تجي بدري النهاردة .

– خير يا رنا هي البت عيانة ولا حاجة ؟؟

– لا بعد الشر لينة كويسة بس انا محتاجة اتكلم معاك ضروري موضوع مينفعش في التلفون .

– طيب هاحاول اخلص بدري و اجي .

………………….ه

ايوة يا ماما انا قررت اطلب الطلاق

– متأكدة يا بنتي ؟

– ايوة يا ماما انا مش هأقدر استحمل كلمة زيادة من البني آدم ده كل الناس عايشة بحب و حنان الا انا كأني عايشة مع آلة .

– اللي تشوفيه يا حببتي محدش هيقدر يغصبك عالعيشة دي

– طب اقفلي زمانه جيه

…………………… ه&

– جرى ايه يا نادية ده بدل ما تعقلي بنتك تقومي تقويها على جوزها ؟

– يا خوي انت مش شايف عامل معاها ازاي ؟ يا حبة عين امك يا بنتي اخذها وردة مفتحة و كسر نفسها الهي تنكسر مناخيره

– انا شايفه راجل و سيد الرجالة هو بس مش فاضي للكلام الفارغ ده شقيان عشان لقمة العيش و موفرلها احسن عيشة ده حتى جايبلها عفش آخر موضة و وافق تكمل جامعة اذا كنت احنا بنفسنا رفضنا و هي ما اعترضتش

– اقعد يا خوي دافع عنه ده اللي انت فالح فيه ! يا عيني عليكي يا بنتي و على شبابك و جمالك اللي بيضيع هدر مع البني آدم البارد ده

– ربنا يهديكي انتي و بنتك و تفوقو قبل ما الفاس تقع بالراس