رواية عائلة بالإكراه الفصل السابع عشر 17 بقلم سلمى بسيوني

رواية عائلة بالإكراه الفصل السابع عشر 17 بقلم سلمى بسيوني

رواية عائلة بالإكراه البارت السابع عشر

رواية عائلة بالإكراه الجزء السابع عشر

رواية عائلة بالإكراه الحلقة السابعة عشر

نزلت من العربيه بسرعه وهي بتصرخ قدام المستشفى: ترولي بسرعه ..اتحركوا
جريت عليها ممرضه بترولي ومعاها الممرضين نقلوا يوسف عليه ودخلوه المستشفى داخله حنان تجري وراه ولكنه دخل قسم الطوارئ وشاورلها الممرض ان ممنوع دخولها وهي واقفه هتتجنن
..لحظه اكيد علي هيساعدها مشيت بخطوات متوتره بفستانها اللي ملاه الدم مش عارفه حتي هي رايحه فين نفسها سريع وكأنها في سباق مش قادره تتنفس بشكل منتظم مش فارق معاها حاجه كل اللي هاممها تطمن على حبيبها وبس
جريت عليها ممرضه بعد ما شافتها بهيأتها دي: حضرتك كويسه ؟ بتدوري على حد ؟!
حنان بسرعه: بدور على علي …دكتور علي حسني هو فين متعرفيش مكانه ..لازم اشوفه ..
الممرضه : خدي نَفَسك بس الاول ..دكتور علي فوق في مكتبه في الدور السابع
طلعت جري للدور السابع وقابلت علي اللي ذُهل من منظرها ونزل جري معاها تحت بعد معرفته بإصابه يوسف يمكن مش قريبين اوي بس مهما كان هو صاحبه
قبل ما يدخل قسم الطوارئ حنان ندهتله وفي عنيها رجاء : طمني يا علي ارجوك
علي بسرعه: حاضر
دخل بسرعه وهي بره بتبكي وتدعي ربنا يقومه بالسلامه تليفونها رن فجأه وكانت ساره
ساره كانت في العربيه مع الباقيين مروحين
ساره بقلق :يبنتي انتي روحتي فين انتي ويوسف مش لقياكم اسراء بتتصل عليه مش عارفه توصله وانتي مبترديش جننتيني
حنان بعياط : احنا في المستشفى يا ساره ..يوسف اتصاب يا ساره ..الحقيني
ساره جسمها كله اترعش لمجرد الكلمه بس مفيش وقت للاستغراب اختها محتاجاها: طيب ..انا جايه يا حبيبتي اهدي .احنا جايين ..اهدي يا حنان بالله عليكي …مسافه السكه وهبقى قدامك
قفلت معاها واتكلمت بسرعه : يوسف اتصاب ماما اتحركي على المستشفي بسرعه
كلهم بلا استثناء اتكلموا في وقت واحد فردت ساره :معرفش حاجه والله اتحركي بسرعه يا ماما
ساره كلمت اسراء اللي اترعبت لمجرد ما سمعت وقالت لامها وهي منهاره واتحركوا بسرعه على المستشفى
**********
طالع علي من غرفه الطوارئ بيجري بسرعه
حنان وقفته برعب :في اي قولي ماله بالله عليك
علي :لازم يدخل اوضه العمليات بسرعه …معندناش وقت يا حنان حالته بتسوء
حنان :اتصرف بسرعه يا علي ارجوك
علي طلع يبلغ فريق التمريض عشان يجهزوا اوضه العمليات بسرعه
وحنان قاعده بتحاول تهدي نفسها :هيبقى بخير يا حنان اهدي .. خدي نفسك واهدي ..مين عمل كدا ..مين ممكن يعملها
طلعت تليفونها بسرعه وكلمت حازم
_ الو ..ازيك يا حنان
حنان : يوسف في المستشفى يا حازم ..لازم نعرف مين عمل كدا ..
حازم اتنفض وقام من مكتبه بسرعه : انتي بتقولي اي يا حنان ومين عمل اي …يوسف ماله في اي ؟!
حنان: كنا واقفين سوا يا حازم ..حد ضرب عليه نار ..حد حاول يموته
حازم : انا جايلك حالا ..اهدي وانا جاي
*********
المجهول قاعد على مكتبه بهدوء : انت متأكد يا ماهر
ماهر بعمليه : ايوا يا باشا ..هو في المستشفى دلوقتي
رفع سبابته في وش ماهر فبانت وحمته الواضحه في ايديه اليمين
وقال بحده : تعرفلي مين عمل كدا ..
ماهر بطاعه : امرك يا كبير
**********

نور وساره واسلام منيره وعبير كلهم وصلوا سوا
ودخلوا بسرعه سألوا على حنان بيتحركوا في المستشفى والناس كلها مستغربه لبسهم السواريه
وصلوا لحنان وجريوا عليها اخدتها منيره في حضنها : اهدي يا بنتي ..اي اللي حصل بس
حنان بصوت متقطع وشهقات متوقفتش : كنا بنتكلم …كان بيطلب فرصه ..ملحقتش حتى ارد عليه يا ماما ..كنا ه‍ …هنرجع تاني ..
منيره : خدي نفسك بس يا بنتي ..اهدي هيكون بخير ..خلي عندك ثقه في ربنا يا حبيبتى
حنان بعدت عن حضنها شويه وساره قربت منها بحذر : طب هو عامل اي دلوقتى يا حنان
حنان : علي دخله العمليات من ١٠ دقايق ..بيقول حالته بتسوء يا ساره
ساره حضنتها : هيبقى كويس ..انا متأكده
عبير حسست على حجابها بهدوء : خليكي قويه يا حبيبتى ..ربنا معاه ويقومه بالسلام بإذن الله ..هيجبر بقلوبكم ويريحها ..ربنا عند ظننا بيه يا حنان ..ظني دايما الاحسن وربنا هيفاجئ قلبك بالاحسن منه
اسلام مسح دموعها ومسك ايديها : احنا هنا جنبك انتي مش لوحدك …متخافيش ..هو بيحبك ومش هيستسلم بسهوله ..اجمدي يا حنه مش هو بيقولك يا حنه ؟!
حنان غمضت عينها بحنين
نور بهدوء : يوسف قوي متخافيش ..(حاولت تخفف شويه وغيرت الموضوع) طب انتي فستانك كله متوسخ ..بصي هروح الڤيلا بسرعه اجيبلك هدوم نظيفه واجيلك
حنان بإمتنان : مش عارفه اقولكوا اي كلكوا
نور : متقوليش حاجه (بصت لاسلام) اسلام ..تعالى معايا يلا نروح ونرجع بسرعه
اسلام :تمام يلا ( بص لساره ) خدي بالك منها يا ساره
ساره : حاضر
نور واسلام مشيوا وحنان سألت امها : عرفتوا اسراء وطنط زينب
ساره ردت : ايوا يا حبيبتي زمانهم جايين
شويه ووصلت اسراء وزينب أمها بيجروا
شرحولهم الوضع وحاولوا يهدوهم شويه
شويه وعبير ومنيره اخدوا زينب اللي كانت منهاره على ابنها وراحوا لمسجد المستشفى عشان يصلوا كالعاده ويدعوا ليوسف
قاعدين ساره وحنان واسراء سوا قدام العمليات
وشويه وجه ظابط ياخد اقوالها عن اللي حصل واقوال يوسف تتاخد بعد ما يفوق
شويه وحازم وصل وسأل عليهم ودخلهم
حازم بقلق : هو فين
ساره :في العمليات من ساعتها
حازم بص لحنان : عارف اني بضغط عليكي ..بس انا لازم اعرف تفاصيل ..لازم اعرف مين عمل كدا في يوسف
حنان اتنهدت وحكيتله كل اللي حصل معاهم ووصفتله المكان وتفاصيله الممله
حازم بعد ما سمع منها : كدا كويس اوي ..انا لازم اتحرك دلوقتي ..هسيب اتنين من رجالتي بره ..اي حاجه تحتاجوها اطلبوا منهم وانا هتصرف وهاجي تاني
حنان: تمام شكرا يا حازم
_اول ما يخرج من العمليات عرفيني من فضلك
_حاضر
حازم اتحرك وخرج عدد كبير من رجالته يفحصوا المكان ممكن يكون وقع حاجه من الفاعل
البنات لسه سوا اسراء شددت على ايد حنان بخوف : هم هيخلصوا امتا بقا بقالهم كتير اوى جوا يا حنان
حنان حاولت تتماسك : يارب يخرج على خير يا رب ..يارب طمنا عليه
********
حسن مع سمير
حسن : لا جدع يالا ..جدع ..عجبتني الحركه الصايعه دى .. اخيرا اتحركت انت ..واخيرا هنخلص من يوسف
سمير بإستغراب : يوسف !!! ..بس انا معملتش حاجه هو اي الموضوع ؟!
حسن بصله بقرف : يعني مش انت جتك القرف يا اخي نفسي احس انك ابني بقا
سمير اتنرفز : ما تسيب الناس في حالها بقا
انت اي شيطان !!!!!
حسن قرب منه بهدوء مريب : وانت اول مره تعرف اني شيطان يا سمير ؟! الله يرحمك يا مي ..كانت لطيفه اوي
سمير غمض عينه بوجع لذكراها ولاول مره يحس انه بني ادم من سنين
سمير : لا عارف ..بس متوقعتش توصل للمرحله دي ابدا ..كنت فاكر آخرك صفقتين سلاح ..زي اللي اخوك كان بيعمله ..بس شكل نهايتك هتبقى **** زيه ..وانا مش مستعد اكمل معاك في السكه الزباله دي ..ياريتك سبتني لسليم ..كان زماني بني ادم ..قدرت احمي حبيبتي من جبروتك ..
كمل مشوارك لوحدك يا حسن يا قاضي ..ما اتمنيتش أبدا ان ابويا يبقى كدا …كويس انك فكرتني بمي ..ربنا يرحمها كانت نظيفه

حسن انفعل :كانت غبيه ..زيك كدا ..بتمد الايد اللي اتمدتلك وتتغابى ..انت حر ..بس متجيش تلومني بعد كدا ..اغرق في داهيه ..بس خليك فاكر لو خرجت من المكتب دا ..اعرف ان ملكش اب يا سمير
سمير بهدوء: انت عمرك ما كنت اب اساسا ..كل اللي هامك الفلوس وبس ..قلت بعد اختفاء سليم اللي بقالنا سنين مستنين منه مكالمه ولا حتى اشاره يفرق وتتلهي وتدور على ابنك بس محصلش قلت يمكن مع موت امي هتفوق والايام من غيرها هتقويك بس مفرقش حاجه ..انت طينتك كدا ..حبيبتي اتاخدت في الرجلين في صفقه من صفقاتك القذره انت واخوك ..حتى اكتر واحده عشقتها في حياتي مسبتهاش في حالها ..قلبي مات من بعدها ..وانت كملت استغلالاك ودخلتني في شغلك القذر دا ..بس انا قرفت …قرفت من كتر احساسي اني مكروه ومستبعد ..كرهت نفسي عشان رضيت بيك تأمر وتنهي وتقل مني ..وكأنك اشتريتني ..كفايه يا بابا لحد هنا وكفايه ..انا هسافر وكفايه عليا كدا معاك
سمير خرج ورزع الباب وره وساب حسن وراه بيصرخ : هتندم يا سمير كلكوا هتندموا
*********
طلع علي من غرفه العمليات منهك وواقفين كلهم مستنين كلمه منه
علي بهدوء : ربنا ستر فعلا ..نجى بأعجوبه ..ساعتين بالكتير وهيصحى
زينب واسراء حضنوا بعض بفرحه وشكروا ربنا
حنان بلهفه وتوهان : يعني هو بخير يا علي بجد
علي بإبتسامه : اه والله زي الفل الحمدلله كان محتاج نقل دم بس اتصرفنا
حنان بصت لساره وقالت بوهن: هو كويس يا ساره
ساره حطت ايديها على راسها : ايوا والله كويس يا حبيبتي
حنان وقوتها بتضعف مره واحده : الحمد لله … الحمدلله
وقعت في لحظه في حضن ساره اللي صرخت والكل جري عليها ودخلوها اوضه واطمنوا عليها
علي بهدوء:هو خير انشاء الله ..اللي عاشته مش سهل وتماسكت لفتره مش قصيره … ومجرد ما اطمنت عليه وقلبها ارتاح ادت فرصه لنفسها تنهار ..هتفوق قريب بإذن الله ..ومع ذلك هقول لدكتور نفسي زميلي ينزل يطمن عليها ..لو في حاجه تانيه
ساره بهدوء :تمام يا دكتور علي …تعبناك معانا اوي ..شكرا لمجهودك دا بجد
علي ابتسم ببشاشه : انا معملتش حاجه يا ساره ..دا واجبي ..هروح اطمن على حاله يوسف وبإذن الله خير
*********
سمير روح ولم هدومه وحجز تذكره على امريكا ..قرر يتحرك ويبدأ حياه جديده نضيفه واهم حاجه ..ان ابوه مش فيها
******
يوسف اتنقل اوضه عاديه
وحازم اخيرا لقى حاجه بعد بحث طويل وجه عشان يسأل حنان عليها واستغرب ازاي يوسف كل دا مخرحش من العمليات
دخل وسأل وعرف انه اتنقل اوضه عاديه وماشي في الدور تايه
نور واسلام وصلوا المستشفى بعد ما حابوا الهدوم اسلام راح على امه بسرعه يطمن على يوسف منها
ونور رايحه لأسراء و ساره اللي موجودين في اوضه حنان لقت واحد تايه في الدور قربت عليه :حضرتك محتاج مساعده
لف وشه ليه وشافته وعرفت انه نفس الحرامي شهقت وضربته بشنطه الهدوم اللي في اديها كذا مره ورا بعض ومع كل مره تقول بصوت عالي لم الكل حواليها حتي ساره واسراء سابوا حنان وطلعوا يشوفوا في اي : يعني محرمتش ….حرامي وبجح كمان …..يا اخي اتقي الله …ربنا ياخدكوا ..
دخل هو وسط الزحمه ملهوف وعايز يشوفها دخل اوضتها بعد خروج ساره واسراء وقرب منها وهي نايمه ..بصلها بحنيه مد ايده على خدها بيتحسسه بإديه بهدوء
همست حنان وهي نايمه : يوسف !!

كانت متخيله في حلمها انه يوسف بس حلمها قلب كابوس لما لمساته زادت وقاحه وامتدت لجسمها
ساعتها فتحت عنيها واتنفصت من السرير
_ انت بتعمل ايه هنا ..انت اتجننت ..ازاي تلمسني كدا يا حيوان ..انت اتجننت يا يونس
قرب منها بسرعه وكتم فمها بإيده وهمس جنب ودنها بهدوء : اهدي يا روحي …خلصتك منه خلاص .. هيموت وهتبقي ليا ..عارف انه مهددك يا حياتي .. كل حاجه هتبقى كويسه
زقته عنها بقرف وصرخت بعلو صوتها حد يلحقها بس مفيش اي استجابه محدش سامع صوتها ابدا بسبب الدوشه اللي برا
بدأ يقرب عليها تاني وهي تتراجع : ابعد عني يا يونس بقا …انت اي … مجنون ..
فضلت تتراجع وهو يقرب لغايه ما وصلت الكومودينو كان عليه فازه مسكتها وهددته بيها بس مفرقش معاه فزعقت فيه : لو قربت هقتل نفسي …مش انت بتحبني بقا ..هقتل نفسي يا يونس
تراجع بسرعه وكأنه طفل مهدد لعبته تتكسر :خلاص يا حبيبتي انا اسف خلاص
هجيلك تاني اطمن عليكي
خرج بسرعه من الاوضه وهي انهارت علي اقرب كرسي
عند حازم ونور الوضع كالاتي
حازم لوى دراع نور وراء ضهرها وبيزعق ..واسلام بيحاول يهديه
ساره واسراء بيحاولوا يشدوا نور من ايده واهيرا نجحوا وهديوا
نور بزعيق : خلاص يا عم مكانش سوء تفاهم ..دانت غبي (بصت لاسراء) حنان فين
حازم : معقوله حنان تعرف الاشكال دي
نور بنرفزه :بقولك اي يا جدع انت ..ما تلم لسانك بقا ..
عبير زعقت : نور !!! خلاص احنا مش في الشارع ..احنا في مستشفى
نور : انتي مش شايفه يا بيبو ..ما هو اللي مش مريح نفسه ..
عبير : طيب خلاص بقاا ..يلا نروح لحنان ..سيبتوها لوحدها وطلعتوا كلكوا
دخلوا عند حنان لقوها قاعده بتعيط ومنهاره
منيره جريت اخدتها في حضنها والتفوا كلهم حواليها : في اي يا حنان اي اللي حصل يا بنتي
حنان بصت لحازم اللي واقف على الباب بيبصلها بأسى : حازم !
حازم قرب شويه : في اي يا حنان ..اي اللي حصل تاني
حنان : انا عرفت مين عمل كدا في يوسف
كلهم ركزوا في كلامها
حنان : يونس المنشاوي …صاحب مستشفى الحياه ..اللي في اسكندريه
حازم : انتي متأكده ؟!
حنان بدموع : ايوا وجدا كمان
حازم : انا كنت جايبلك حاجه لقيناها في مكان الحادثه (طلع من جيبه دلايه ) دي ؟!
حنان :شكلها كانت متعلقه في مفاتيحه
حازم : طب عرفتي منين ان هو
حنان مسحت دموعها : كان هنا من شويه ..اعترف
حازم بإستغراب : وهو مجنون عشان يجي يقولك عملتها
حنان هزت راسها بمعنى اه والكل استغرب فحكت كل حاجه حصلت وتجنبت تحكي عن لمساته القذره على جسمها
الصوره وضحت قدام حازم وفهم كل حاجه وخرج رجالته بالفعل يدوروا عليه
قعدوا كلهم مع بعض وحنان غيرت ولبست الهدوم اللي جابتها نور وقاعدين كلهم في انتظار يوسف يفوق
عدى ما يعادل ساعتين وعدت ممرضه عليهم بلغتهم بصحيان يوسف الكل قام وكلهم سبقوا حنان اللي كانت بتمشي بضعف نوعاً ما كانت معاها نور سندها
دخلت اوضته بلهفه كلهم كانوا دخلوا قبلها
بصتله ودمعه نزلت من عنيها : يوسف
يوسف بصلها بضعف وعلى وشه كل علامات الاستغراب : انتي مين !!!

يتبع ….

• لقراءة الفصل التالي: اضغط هنا
• لقراءة باقي حلقات الرواية اضغط على (عائلة بالإكراه)