رواية عائلة بالإكراه الفصل الثامن والعشرون 28 بقلم سلمى بسيوني

رواية عائلة بالإكراه الفصل الثامن والعشرون 28 بقلم سلمى بسيوني

رواية عائلة بالإكراه البارت الثامن والعشرون

رواية عائلة بالإكراه الجزء الثامن والعشرون

رواية عائلة بالإكراه الحلقة الثامنة والعشرون

نور كانت خرجت من شركه حازم بتتمشى مش عارفه تروح فين عدت من قدام كافيه وكانت صدمتها اضعاف ..لما لقت صوره ابوها على التلفزيون …كل الي قاعدين بيتكلموا عليه ..
حطت ايديها على قلبها وحست بنغزه شديده قالت بحسره : آه ليه كدا !!
تليفونها مش موقف رن، اصوات في دماغها مبتقفش، احساسها بالعجز قاهرها، كلام الناس إلي حواليها
اتصلت على حازم وهي بتبكي : ليه كدا يا حازم ..ليه ..كان ممكن اتكلم معاه .. كان في الف حل وحل ..ليه كدا بس
حازم وصله صوتها الباكي وجع قلبه قال بأسف : معملتش اي حاجه يا نور ..صدقيني هو إلي عمل كدا في نفسه !!
____________________
يمنى دخلت عند يونس كان نايم بتبص عليه وكأنها بتودعه ..عارفه انه مريض عشان كدا طلبت تشخيصه ..يمكن يساعده في القضيه ..مش عارفه ليه هي عايزه كدا ولا عارفه ليه مهتمه ..ولا عارفه ليه واقفه كدا من الاساس
قالها يونس فجأه وهو مغمض عنيه : طلبتي تشخيصي ليه
يمنى اتخضت : ودول بيطلعوا الساعه كام ان شاء الله
يونس فتح عينه : ساعه ما بتيجي تقفي هنا وتبصي عليا
يمنى بهدوء : هه انا !! انا هاجي ابص عليك ..ليه يعني من جمالك يعني ..انا ..انا كنت جايه بشوفك صاحي ولا لاء ..عشان اجيب العشاء مش اكتر
يونس : اه اذا كان كدا تمام طبعا

 

 

 

خرجت من عنده وعي مكسوفه من نفسها وتصرفاتها ..طلعت لمكتب ثائر وخبطت فسمح لها بالدخول
_ اتفضلي يا يمنى
_ شكرا لحضرتك ..هو حضرتك اتكلمت مع يونس المنشاوي يا دكتور
_ ايوا كنت عنده الصبح
_ والتشخيص !!
_ يونس عنده متلازمه دي كليرامبو
عنده اقتناع تام ان حنان بتحبه وهو مهووس بيها ..دايما مفكر ان يوسف مهدد حنان ..وبصراحه . في حاجه كمان عشان كدا طلبت يعملوا رنين مغناطيسي للمخ
قالت وعنيها مدمعه : ورم !!!
ثائر : مع الاسف الورم ضاغط على الاعصاب ..وانتي عارفه يعني اي ورم في المخ ضاغط على الاعصاب، غل، كره، غضب..وكان هو دا سبب التصرفات طول الفترات إلي فاتت ودا طبعا بإضافه للمتلازمه
_ طب والحل يا دكتور
_ في جراح كويس جدا جدا في اسكندرية ..هو الي يقدر يعمل عمليه بالخطوره دي انا اعرفه شخصيًا وهكلمه ..بالنسبه للمتلازمة ف علاجها هيطول ..وهيحتاج يفضل عندي في المصحه ..ودا بعد العمليه طبعا
_ انا هتكلم معاه في المواضيع دي ..
_ انا اوريدي كلمته في الورم ..ووافق على العمليه ..العلاج النفسي دا بعد العمليه
_ تمام يا دكتور شكرا لحضرتك جدا
قامت عشان تخرج ف ثائر نادها قيل ما تخرج فبصتله
_ العلاج النفسي هيستغرق سنين ..متعذبيش نفسك جنبه ..
يمنى وهي يتحاول تداري دموعها : انا ..وانا هستناه ليه ..انا مش متخلفه يا دكتور ثائر ..عشان احب واحد بيعشق واحده تانيه
سابته وخرجت وهو قاعد مكانه ..وحشته مراته وكلامهم سوا ..خصامها طال وقلبه معادش مستحمل بُعدها ..
_______________________
اسراء قاعده على الارض دموعها نازله وبتحاول تفوق سليم بدأ يفوق واحده واحده ويقوم واسراء بصاله بذهول …فضحك من منظرها : اي دا خفتي عليا يا سوسو ..

 

 

 

اسراء بصتله : اقسم بالله انت مش بني ادم طبيعي بجد ..
سليم بطل ضحك وسكت : كنت عامل حسابي ولابس حزام واقي ..صاحبي اصر عليا ..اسراء انتي اكيد صعب عليكي تصدقيني بس دا واقع ..انا فضلت ٧ سنين عايش على صورتين ليكي مكنتش بلعب وحياتي مكنتش سهله ولا كنت هربان منك ..انا فعلا ظابط ..مكدبتش
زعقت فيه : انت كدبت عليا ..كدبت عليا في كل حاجه ..كنت مفهمني انك مهندس ودا إلي اعرفه ..كنت بتعرفتي غلى زمايل ليك وتاخدني مواقع البناء ..استهزأت بعقلي وضحكت عليا ..غبت سنين ..سبتني في كابوس بتمنى افوق منه في اي لحظه ومشيت ..مشيت فين محدش يعرف ..الارض انشقت وبلعتك ..وجاي حالا بعد سنين تبوظ كل حاجه ..جاي تقولي انك ظابط ..واضطريت تسافر .. واي كلام وخلاص ..
شوههت كل حاجه اكتر ماهي متشوهه ..ف ارجوك ..ملوش لزوم الكلام بعد كل إلي حصل ..سيبني لوحدي من فضلك يا سليم
سليم اتوجع لما شافها بتعيط وقام حاول ياخدها في حضنه فزقته بعيده عنها وهي بتزعق : اطلع برا يا سليم ..حالا !!
____________________
الصبح طلع وتليفون نور مقفول ومحدش عارف يوصلها
ساره وحنان شافوا الخبر على القنوات التلفزيون وعمالين بيرنوا على نور تليفونها اتقفل
حنان اتصلت على يوسف
_ نور فين يا يوسف
_ مش عارف ..بندور عليها انا وحازم مش لاقينها يا حنان ..وتليفونها مقفول
_ انا هروح المديريه لانها احتمال تكون هناك وساره هتروح المستشفى يمكن تلاقيها هناك ..
_ تمام واحنا بندور برا في الشارع ..لو في خبر عرفونا
ساره نزلت المستشفى بتدور على نور دخلت اوضه اسلام كانوا منيره وعبير واسلام نايمين خرجت برا سألت على على كان في العمليات ولما خرج قابلها
ساره بخوف : شفت نور يا دكتور ..مش لاقينها
على بأسف : لا مشفتهاش خالص ..شفت الاخبار بس للاسف مشفتهاش ربنا يصبرها ..
_ طب ياريت يا على لو شفتها او سمعت عنها تعرفني ..لاننا مش عارفين نتصرف ولا لاقينها وانت شايف الساعه كام
_ لو حصل اي حاجه هعرفك اكيد ..وانتوا لو وصلتوا لحاجه طمنوني
ساره رجعت اوضه اسلام قعدت في خوف ودماغها بين كفوفها مش عارفه تتصرف ياترى نور ممكن تعمل اي ؟!!
حازم ويوسف كل واحد بيلف بعربيته مش عارفين يوصلولها وحنان وصلت المديريه ودخلت مكتب الظابط المسؤل عن القضيه واتصدمت لما لقت نور جوا
جريت عليها وحضنتها ونور عيطت في حضنها الظابط سابهم وخرج
بعد وقت بعدت وهي بتمسح دموعها
قالتلها حنان وهي بتعيط : بتعملي اي هنا بس يا نور

 

 

 

نور وهي بتبكي : ليه يا حنان …عايزه اعرف عمل كل دا ليه ..ليه هو كدا
حنان : نور بلاش
نور بهدوء : هم بلغوه وانا بالفعل داخله له
حنان مسكت ايديها بخوف
ودخل العسكري بلغهم ان نور تدخل
نور سابتها ومشيت وهي خايفه
وحنان كلمت يوسف وحازم وطمنتهم وكلمت ساره إلي قالتلها انها رايحه لإسراء المحل تجيبها وتيجي
دخلتله الاوضه لقته باصصلها بصه مفهمتهاش قعدت قدامه ومقالتش غير كلمه : ليه !!
رد عليها عصام بغضب : نعم !!
نور ودموعها على خدها : ليه عملت كدا في الناس إلي اعتبرتهم عيلتي .. ليه يا بابا .. ازاي تعمل كدا في بنتك طيب ..ازاي جالك قلب تدمر فرحة العيلة إلي اعتبروني منهم ( عيطت بإنهيار) ازاي !!!
زعق فيها بصوته العالى واتردد صدى صوته في الاوضه الفاضيه : ولا حد يهمني …ولا انتي تفرقي معايا ..انتي بنت خاينه .. ملهاش شرف
نور بصدمه : انت ..بتقول اي
عصام بغل بيلمع في عيونه : امك ست **** خانتني وخانت شرفي مع محمود القاضي وقتلتها ..ومش ندمان يا نور ..ولا عمري هندم ..
نور بإنهيار : أمي !!! امي انا خاينه ..
عصام : كنت بعشقها ..(صرخ مره واحده) بس بردو عرقها ال*** اتحكم فيها ..وروحت لقيتها في ڤيلا محمود القاضي .. امك خانتني مترددتش لحظه واحده في قتلها
نور صرخت وايديها على ودنها : بس خلاص مش عايزه اسمع حاجه تاني كفايه !!
عصام مكمل كلام : كنت هقتله …هددني كان معاه تسجيل كاميرا وانا بقتل امك ..استغله وهددني ..اضطريت اسيبه عايش مؤقتًا
ولما فشلت كذا مره في قتله قطعت عهد على نفسي ادمر حياة كل الناس إلي بتحبه واولهم حنان
نور بتصرخ اكتر : خلاص كفايه !!! قلتلك كفايه
خرجت وهي بتجري وهو ضحك على سذاجه بنته
خرجت لقت حنان قدامها اترمت في خضنها وهي منهاره : هو ليه وحش اوي كدا ..ليه ..ليه كل الحقد والغل دا ..ليه يا حنان ..ليه امي تبقى خاينه وابويا قاتل ليه
حنان مش مصدومه واخدتها في حضنها بتهديها خرجت برا وهي لسه حضناها لقت يوسف وخازم وصلوا شاورتلهم بدماغها بأسف ركبتها العربيه
واتحركت على البيت
حازم اتقهر على شكل نور وهو مش قادر يعملها حاجه يوسف طبطب على كتفه وحاول يطمنه ومشيوا الاتنين كل واحد في طريقه

 

 

 

دماغها بتميل مع حركه العربيه بتبص على الناس من ورا ازاز الشباك حاسه ان الدنيا كلها واقفه حواليها ..مش سامعه في ودانها غير كلمه امك خاينه نفسها ديق وروحها مُتعبه ..كان نفسها يطلع كابوس بس مفيش كابوس هتتوجع فيه اوي كدا غمضت عنيها بتعب عسى كل الوجع دا يختفي
حنان جنبها اتصلت على ساره وقالتلهم انهم رايحين على البيت
واخيرا وصلوا وحنان سندتها وطلعتها في سريرها
_________________
ساره رايحه اسراء المحل لقيته متكسر ..مفيهوش حته واحده سليمه ..اتصلت بسرعه على اسراء لقيتها في البيت
_ اي يا بنتي إلي في المحل دا !!! اي الي حصل ؟!!! اعصار !!!
_اهدي يا ساره مفيش حاجه سليم جه امبارح
_ نعم !!! ووجوده يعمل كدا !! اي كنتوا بتحاولوا تقتلوا بعض !!!
_ يبنتي …..
قاطعتها ساره : بس انا جايالك
قفلت معاها وركبت عشان تروحلها
__________________
وصل يونس للنيابه …معاه المحامي بتاعه ومش قادر يمحي من دماغه نظره يمنى وهو ماشي ..وكأنها بتودعه بعيونها المدمعه العسلي
دخل هو والمحامي
ودار بينهم حوار طويل اتقدم فيه التقرير الطبي النفسي ليونس ..وكان القرار بإحالته لمصح نفسي بعد استأصال ورم مخه
خرج من النيابه واتحول لمستشفى خاص في الإسكندرية عشان العمليه والمفاجأه ان كانت يمنى هناك لقاها داخله عليه وفي ايديها محلول وعي بتبتسم
_ جاهز للعمليه ؟!
_ يمنى !!! بتعملي اي هنا
_ اممم ..استنى اقولك ..عمليتك مهمه وانا ممرضه مهمه ..والممرضه المهمه مكانها العمليه المهمه
_ يعني جايه عشان العمليه بس !!
_ بقولك اي ..اتخمد ورانا عمليه مهمه
________________________

 

 

 

ماهر وصل النيابه بعد مده من خروج يونس واتحول ورقه للمحكمه بعد التحقيق معاه وهو خارج كان دا عصام الليثى
بصله عصام بصه توعد وماهر اترعب منه واتحرك كل واحد في اتجاه وعصام دخل جوا واعترف بكل حاجه ..كل حرف كل الناس إلي قتلهم ..الناس الي فاكرهم والي مش فاكرهم واعترف بقتل هاجر زوجته وخيانتها ليه اعترف بكل افعاله ..وكان قدامه هدف واحد بس قبل ما يتعدم يقتل ماهر !!
____________________
اسلام بعد اذن من الدكاتره خرج على كرسي متحرك ..وراحوا كلهم البيت
وساره راحت لإسراء إلي حكتلها على كل حاجه
_ ينهار اسود ..ظابط يا أبن الكدابه …ما هو ابن مين …دا ابن حسن القاضي عيزاه يطلع شيخ
_غيري الموضوع بقا ..نور عامله اي حالا
ساره اتنهدت : حنان بتقول حالتها صعبه اوي ..ربنا يستر ..مين كان يصدق ان ابوها يطلع منه كل دا يا اسراء دي مصيبه
_ كل حاجه جايه ورا بعضها كأننا في سباق ..قومي يبنتي خلينا نروح لنور نشوفها
__________________________
اسلام وصل البيت كانت حنان جنب نور وهي نايمه
امه ومنيره طلعوه يرتاح بعد اسألته الي مخلصتش على نور وقعدوا الاتنين وانضمولهم ساره واسراء حنان نزلت من اوضه نور وقعدت معاهم مش عارفين يعملوا اي
وبيتكلموا لقوا عبير سرحانه تماما ومش معاهم
اسراء بهدوء : رحتي فين يا بيبو
عبير : عصام كان عارف الي عمله محمود فيا …وجه وعرض عليا الانتقام منه وخصوصاً اني صاحبه منيره والموضوع هيبقى سهل
منيره : نعم !!!
عبير : دا الي حصل .. بس معرفتش منه ابدا انه قتل هاجر ..ساعتها انا رفضت ..فدخل عليا من حتت انا بحبك ..وفضل يلف عليا لغايه ما صدمته ..وقلتله اني فاهمه بيعمل اي ..واني مصره على رفضي ..اتكلمت معاه بهدوء وبينلي انه اقتنع والموضوع خلص ..مكانش في بالي يعمل فينا كدا
___________________
سليم وصلته ورقة دعوى طلاق مرفوعه عليه من اسراء ومهموم مش عارف يتصرف ازاي
فيرديان : وبعدين يعني ..هتفضل قاعد كدا
سليم : اكيد مش هسيبها اكيد …استني كدا
جه في دماغه يبعتلها رساله صباحيه و فعلا مسك تليفونه وبعتلها رساله مضمونها : صباح الخير عليكي يا حبيبتي ..كل صباح وانا بعافر وراكي
اسراء اول ما شافتها عملتله بلوك
فيرديان ضحك : اووف ..صعب البلوك اوي صعب
سليم : ولو مش هسيبها ..

 

 

 

فيرديان : تدهشني محاولاتك الفاشله في الواقع .لكن استمر عسى يلين قلبها لك
سليم : مشفتش ابويا ..هو فين من الصبح
فيرديان وهو بياكل بسكويت : خرج في الصباح مع حقيبه للسفر وقال لي ” انا راجع البلد ..ابقى عرف سليم”
سليم : وانت ازاي متقوليش يا بني ادم انت
فيرديان : نسيت سماح المرادي يا بيه
سليم كلم ابوه الي ضعف آخر فتره واطمن عليه
استغرب من ضعف ابوه وهدوءه وبعده عن الكل
حسن أيقن بعد فتره انه مكنش عايز الفلوس ..حسن كان بيكره اخوه عشان سرقه ..وضحك عليه ..بس كله عدا ..وببعد ولاده عنه حس انه منبوذ ..اه سليم رجع بس مش زي الاول ..وسمير لسه كارهه وبعيد عنه ..ايام وحدته علمته ان مفيش حاجه في الدنيا اغلى من ولاده ..
وندم انه عافر كل دا على حاجه مش مضمونه زي الفلوس
____________________
يونس عمليته نجحت ..ولما اتكلم معاه الدكاتره وفهموه ضروره وجوده في مصحه وافق بدون جدال وكان دا اشد الاشياء غرابه ..يمنى طول الوقت معاه وسنداه ورجعوا الاتنين القاهر ووصلته المصحه ..شكرها على كل حاجه عملتها وهي عنيها بكت وهي بتودعه
__________________

 

 

 

 

ماهر وعصام اتعدموا …
نهايه كل الحقد دا ..نهايه كل الغل وقسوة القلب ..
كل حاجه اتبخرت لاحظه ..اخر نفس في الدنيا كان زي النار ..وكأن كل حاجه عملوها حرقت اعناقهم وروحهم بتخرج ..انتهى عصام ..وراحت روحه للي اعظم منه للي بعد عنه ما استعنش بيه ..قرر يسوق مشاكله لنفسه ..ونسي ان الحياة فانيه ..نسي ان لكل ظاغي نهايه …نهايه بشعه بشاعه طغيانه ….
_________________
نور قررت تسيب البيت وبنت حياتها لنفسها في المرسم بتاعها ..بعدت عن الكل وانعزلت
رغم كل محاولتهم معاها ..مقدرتش تكون غير لوحدها
___________
ثائر داخل ليونس ومبتسم : البنت المجنونه دي مش مبطله سؤال عليك
يونس بتعب : حنان صح ؟!
_______________
(بعد ٦ اشهر )
صوت رزع على الباب وصوت سليم العالي : افتحي يا هانم افتحي
جات اسراء بسرعه تفتح : في اي يا بني ادم انت بتزعق ليه
سليم : مين الي مصورالي معاه دا يختي ..وازاي يبقى قريب منك كدا انتي اتجننتي
اسراء زعقت قدامه : وانت مالك اصلا ..ملكش كلمه عليا اساسا
سليم : لا انا لسه جوزك
اسراء : ايوا جوزي إلي سابني ٧ سنين ومشي
سليم : ابو ام ال٧ سنين الي بتذل بيهم …
اسراء : بقولك اي اياك تعلي صوتك عليا تاني
يوسف جاي من بعيد : اسكتوا بقا ..هو كل يوم على كدا ..انت مزهقتش منها …دانا زهقتلكوا بجد ..ما ترجعيلوا بقا تخلصوني
اسراء وسليم في صوت واحد : يوسف !!!!!
_________________

 

 

 

حنان صحيت الصبح لقيت الكل نشيط والكل بيجهز لعيد ميلاد الباشا الكبير اسلام ..
تليفونها رن وكان يوسف ف أبتسمت بفرحه
_صباح الخير يا حبيبي
_ صباح الفل على عيونك يا قمر ..اطلعي مستنيكي برا جايبلك هديه
_ بجد !!!
حنان لبست وطلعت لقيته برا واقف بعلبه كبيره اوي قربت وعندها فضول
_ اي دا يا يوسف
_ افتحيه
حنان فتحته لقيته فستان باللون البنفسجي فرحت بيه جداا
_ يوسف بجد دا روعه ..تسلم ايدك يا حبيبي
يوسف وهو باصص لعنيها إلي بتلمع : الواحد بيبقا عايز يهد الدنيا عشان يشوف فرحتك دي ..مش مصدق ان كمان كام يوم هصحى الاقيكي جنبي .. قلتيلي قبل كدا واحنا في المستشفى هنعدي كل دا ازاي يا يوسف …شفتي يا حنان ..عديناه ..قلوبنا فرحت وربنا ريحنا كلنا ..ربنا عوضنا عن كل الايام الصعبه دي ..وخلاص ..هانت
حنان سابت العلبه ونطت حضنته وهي بتهمس : بحبك يا يوسف
_______________
نور في المرسم مندمجه مع لوحه
خبطت على الباب حد فقامت تفتح تشوف مين الي قطع عليها وحدتها لقيته حازم ..اخدت نفس عميق وهمست : حازم !!
كملت بصوت عالي : اتفضل يا حازم
‏حازم لسه واقف مكانه : مش ناويه تحني عليا وعلى قلبي ؟!!
‏نور ارتبكت : حازم انا …
‏حازم بهدوء : لا انا ولا انت …انهارده عيد ميلاد اسلام ..وكلهم عايزينك تيجي وانتي مش بتسمعي كلام حد …خلينا نتجمع يوم من نفسنا يا نور حرام عليكي نفسك

 

 

 

‏نور بتسمت : جايه .. هاجي بليل
‏حازم فرح جداا : بجد هتيجي
‏نور ضحكت : اه والله
‏حازم : طب انا ..انا لازم امشي
‏نور ضحكت : مالك … مستعجل ليه كدا
‏حازم عينه لمعت : في حدث مهم الليله !!
‏_______________________
‏
ثائرداخل ليونس ومبتسم : البنت المجنونه دي مش مبطله سؤال عليك
يونس ابتسم بفرحه : يمنى !!
ثائر : اطلع مستنياك برا
يونس طلعلها بلهفه لقاها واقفه متوتره قرب عليها : وحشتيني
ابتسمت بفرحه : وانت كمان يا يونس
_خلاص يا يمنى هخرج بكرا ..مش هفضل هنا ..بقيت كويس
يمنى بخوف : حمدالله على سلامتك يا يونس
يونس بصلها بإستغراب : يمنى مالك !!
يمنى: خايفه ..خايفه مشوفكش تاني
يونس ابتسم : كنت لسه هكلمك في الموضوع دا ..انا مش عايز ابطل اشوفك يا يمنى
يمنى بإستغراب : يعني اي ؟!
يونس وعينه وقلبه وعقله بيقولوها في صوت واحد : تتجوزيني يا يمنى ؟!!
___________________
الكل اتجمع بالليل عشان عيد الميلاد ووصلت رساله على تليفون حنان من يونس : انامش عارف هبدأ منين ولا هكتبلك اي ..غلطي مفيش اعتذار عنه ..اكيد دكتور ثائر عرفك ..انا كنت مريض ..مريض مهووس وبيتحرك بلا وعي وبلا ادراك ..انا اسف على كل اذى سببته ..اسف على كل ذكرى سابت في نفسك اثر وحش .. مع ان كلمتي مش هتأثر في شئ ..انا لاول مره مش تايهه ..انهارده لأول مره مش خايف ومش اهوج ..لقيت وجهتي ..ولقيت اجمل حد في الدنيا ..لقيت الانسانه إلي وقفت جنبي لغايه ما بقيت كويس وربنا شفاني ..انا هتجوزها وهنسافر نعيش برا ..هنبدأ حياة جديده بعيد ..واضمنلك انك ماشوفيش وشي تاني ابدا
يونس المنشاوي ..
قفلت الرساله وهي بتتنهد ..ودعت ربنا يوفقه في حياته
الكل اخيرا اتجمع والكل رحب بنور الي فرحوا لوجودها وسطهم من تاني

 

 

 

البنات واقفين سوا جت اسراء عليهم : عملت زي ما قولتوا بالظبط وجه الصبح شايط وعلى آخره
ساره : احسن خليه يتربى بقا
حنان ضحكت : حرام عليكوا الراجل بجد
نور : يا بنتي طالما هترجعيله مش لازم وجع القلب دا
اسراء : ولو ..ولو ..هربيه
البنات واقفين مع بعض وزينب و منيره وعبير واقفين يضحكوا على خناقات سليم واسراء الي بتحكيها زينب
وحازم ويوسف مستنين علي ف سارة اتصلت عليه
_ يا علي انت فين
_ انا على طريق اهو يا حبيبه قلبي
_ طب يلا عشان نلحق اسلام قبل ما يجي
_ حاضر يا حبيبتي خلاص داخل عليكوا اهو
قفلت التليفون معاه التليفون وهي بتسمع صوت سليم إلي لسه داخل ..وداخل معاه فيرديان
_مرحبا بكم يا آل القاضي
قالها فيرديان بمرح
اسراء برخامه : دا اي الي جابه دا ..وبعدين اي الولا إلي معاه دا مش بطيقه
حنان بتضحك : انا إلي عزمته
اسراء ضربتها في كتفها : اعمل فيكي اي !!!
سليم راح لحماته يسلم عليها : ازيك يا زوزا
زينب : سليم ..ابعد عن وشي يا حبيبي احسن
سليم قرب من اسراء ف البنات بعدوا عنهم شويه
قرب منها وغمزلها : ما تحن يا جن
اسراء : تصدق انك قليل الادب اصلا
سليم : معلومه متعرفيهاش ..انتي مراتي
اسراء : وهو في واحد …

 

 

 

قاطعها وكمل : يسيب مراته يوم الفرح
اسراء برخامه : ظريف
سليم قرب منها : ما تجيبي بوسه
اسراء : سليييمم !!!! اتلم !!
حازم قرب ناحيه نور : زي القمر النهارده
نور اكتفت بإبتسامه وبعدها قالت : فكرت في كلامك كتير …انا هرجع هنا تاني .. خصوصا انا فرح حنان خلاص كمان اسبوعين
حازم بفرحه : بجد يا نور !!
نور فرحت لفرحته : بجد يا حازم
علي اخيرا وصل وساره طلعت تستقبله : اخيرا يا علي ..اتأخرت اوي
_ حقك عليا يقلب علي ..بس اديني جيت اهو
اي الحلاوه دي بس
_ اتثبتت الحقيقه
_ بقولك اي ..ما نتجوز مع حنان ويوسف
ساره بتضحك : انت بتقول اي يا علي ادخل
علي : اعمل اي فيكي يا بنت القاضي
الكل اتجمع وأخيرا اسلام جه من الكليه ببدلته الحربيه
الكل اتلم حواليه وهنوه بالسنه الجديدة وهو اتبسط جداا بوجودهم حواليه قعدوا مع بعض كتير يضحكوا ويهزروا …يتكلموا في فرحهم ويشاركوا بعض الضحكه ..وهما قاعدين وصل بوكيه ورد لونه احمر وجميل اوي وعليه كارد اسلام استلمها وسارة خطفت منه الكارد وقرأته بصوت عالي :
” لن انسَ اول مرة رأيتك فيها ..اول نظرة

 

 

 

..وأول فرحه ..اول ورده اهديتني اياها ..رسائلك المُعطره ساكنه حنايا روحي ..بجانب كل تفاصيلك
كل عام وأنت أمني وأماني ومأمني ..كل عام وأنت الأعز والاغلى ..كل عام وأنت حبيبي”
كلهم بصوله وضحكوا
واسراء قالت بضحك : يا سيدي يا سيدي
نور غمزتله : اي يا حضرة الظابط ..لقيتها ولا أي
يوسف : يا جماعه بتقوله آماني ومأمني ..اكيد متجوزها عرفي يعني
عبير شهقت مره واحده : متجوز من ورايا يا اسلام هي دي تربيتي !!
اسلام فاق من سحر الرساله :يا ماما يا حبيبتي اتجوز اي بس من وراكي هو انا اتجننت
عبير : حبيبي ابني العاقل
ساره : اي التفاهم دا كله
اسلام : ملكيش دعوه يا سوسه
علي : ولا ..متقولش على خطيبتي سوسه
اسلام : دي اختي قبل ما تكون خطيبتك يا علوله
قعدوا كلهم يهزروا ويضحكوا
وباصين عبير ومنيره عليهم من بعيد ..
عبير : شفتي يا صحبتي حلوين ازاي …عيالنا كبروا يا عبير
منيره وهي مدمعه : وبيتجوزوا كمان
عبير : كل حاجه عدت …كل حاجه بقت كويسه ..أخيرا …شايفه لأول مره من كتير بيضحكوا من قلبهم
منيره ضحكت : ايوا … ربنا رزقنا الفرح والضحك من جديد فاكره يا عبير كنا عاملين ازاي في الاول
عبير :كنا تايهين ..مش عارفين حتى هنتصرف ازاي
منيره ببسمه : عشنا احداث صعبه ومع ذلك لسه متمسكين ببعض ..
عبير مسكت ايديها بحب : كل حاجه عدت عشان الايدين دول ماسكين في بعض
فضلوا قاعدين بيضحكوا ويحكوا ..ما صدقوا ارواحهم اتلاقت تاني ..ولقت معاد للفرحه الي كانوا مفكرينها مستحيله لغايه ما جه بوكيه تاني احمر بكارت اسود
حازم : لا كدا اوڤر ..لم معجبينك يا سي اسلام
اسلام : لا والله المرادي مش عارف مين
اسراء : اعترف ان الي فاتت واحده معروفه ..
سارة : استني يابت نشوف دا من مين

 

 

 

اسلام بيفتح الكارد وبيقرأ بصوت عالي :
” كل سنه وأنت طيب يا حبيب قلبي ..وان شاء الله لينا مقابله قريب”
محمود القاضي …
علامات الصدمه على وشوش الكل ..الخوف دب في قلوبهم ..وكلهم بيبصوا لبعض في حيره
لغايه ما طلعت ضحكة اسلام إلي كسرت الحاله دي ..ضحك هستيري وكلهم باصينله بتوعد ف قال : جماعه بجد شكلكوا حكايه !!!!! ماهو اكيد عيد ميلادي مش هيعدي بالساهل ..لازم ساسسبنسس
كلهم في صوت واحد قالوا بغضب : إسلااااااام !!!!!
” جَعلت الحياة مِنا عائلة بالإكراه، فإنحنت لنا الحياة وأصابتنا حلاوة القدر فجعلت مِنا نسيج لن يتفرق ابدًا”
سلمى_بسيونى
عائله_بالإكراه
Basio♥️🚶
***تمت***

• لقراءة باقي حلقات الرواية اضغط على (عائلة بالإكراه)