رواية طريق الظلام الفصل الرابع 4 بقلم عمرو علي

رواية طريق الظلام الفصل الرابع 4 بقلم عمرو علي

رواية طريق الظلام البارت الرابع

رواية طريق الظلام الجزء الرابع

رواية طريق الظلام الحلقة الرابعة

ازيك يا واد يا وليد
= سهام!!
سهام هانم ، متنساش نفسك
= جاية ليه وايه اللي فكرك بيا
لا هو انا مفتكرتكش أصلا ، بس ابو عبدالله اشترالي محل جنبكو هنا ف قولت بالمرة ادخل اسلم عليك
= مين ابو عبدالله
حبيبي و جوزي مستقبلا ، رجل أعمال وطبعا الفقرا اللي زيك مش هيعرفوه
= دا من مصر
وأنت يهمك في ايه
= بطمن
لا اطمن ، انا حاليا فنانة كبيرة وليا جمهوري
= هو الرقص دلوقتي اسمه فن
اه طبعا
= اعتقد ان جمهوره رخيص زي اللي بترقص بالظبط
” كان ناقص شوية وعنيها تطلع نار ، بصراحة معرفش جبت الجرأة دي منين ولا عارف رديت عليها ازاي كدا ، كنت نسيت أن أميرة لسة واقفة و افتكرت لما سمعتها بتوجهلها كلام
هو حضرتك تعرفي وليد من زمان
= عز المعرفة ، كان جوزي
وانفصلتو
= اه بصراحة ، مكنتش قادرة استحمل اصله فقير والفقر صعب أوي ف طلبت اننا نتطلق
بس الفقر مش عيب حضرتك ، العيب اننا نعاير بعض بيه
= وهي مين دي يا وليد ، جبتها محامية ليك عشان تتكلم بالنيابة عنك ، ما انا عارفاك لسانك مقطوع دايما
لا انا مش محامية ، بس بعرف ارد على الأشكال الرخيصة
= انت مجنونة ولا ايه ، أنتي متعرفيش انا مين وممكن اعمل فيكي ايه ، ممكن اعمل تليفون صغير ل ابو عبدالله اخليه يحدفك ورا الشمس
انا مش بيهمني ابو عبدالله ولا ابو مازن ولا ابو حيدر
= هتبقي تعرفي مين هو ابو عبدالله لما احبسك ان شاء الله

 

 

 

 

يدينا ويديكي طول العمر
” شوفت سهام وهي ماشية وعايزة تقول ” يارب الارض تتشق وتبلعني ” ، لكن المفاجأة بالنسبالي هي رد أميرة ، خصوصا انها متعرفش عني حاجة ولا تعرف سهام ، كنت فرحان اني عرفت ارد كرامتي او جزء منها على الاقل ، فوقت من تفكيري على صوت أميرة
انت خلصت ولا لسة قدامك شغل
= لا دا انا خلصت جدا
طب يلا بينا
” اتمشينا شوية وبما اني فاشل في فتح المواضيع وايضا خجول ف دا معناه ان الصمت كان لييه دور كبير بينا ، هي برضو كانت ساكتة يمكن عشان في جميع الاحوال لازم الراجل اللي يبدأ ، لحد ما قررت فعلا اكسر حاجز الصمت
تعبتي
” سألتها واتمنيت أنها متردش رد ينهي الكلام و ارجع اعيد من الاول افتح موضوع
= بالعكس انا مستمتعة جدا ، الجو حلو وانا اصلا بحب امشي
وبتحبي ايه تاني
= بحب الهدوء ، النظام لكن بدون روتين ، بحب المزيكا ، اي حاجة بسيطة بحبها وبفرح بيها جدا
زي ايه مثلا
= يعني انت ممكن تجبلي وردة و اطير من الفرحة وممكن تجبلي قصر بس هيكون عادي بالنسبالي
يعني انا دلوقتي لو جبتلك وردة ، هتفرحي وملامح الزعل اللي انا شايفها دي هتختفي
= اكيد لا
اشمعنا
= عشان انا عمري ما هفرح بالوردة طول ما انا زعلانة
و ايه اللي يفرحك
= لو اعرف هقولك
الشاب اللي أنتي ركبتي معاه العربية هو السبب
” سكتت ومردتش ، حسيت اني اتدخلت في حاجة مليش دعوة بيها و دا ممكن يرجعني تاني لنقطة الصفر ”
انا اسف ، انا مكنتش اقصد اتدخل ، انا بس…
= دا يوسف خطيبي ، انا وهو اتخطبنا عن قصة حب كبيرة الكل كان شاهد عليها ، لكن هو اتغير مبقاش زي الأول ، بقا شكاك وعصبي بشكل غريب ، في الاول قولت عادي وبيغير عليا ، لكن الموضوع تطور لما لقيته بيراقبني ، بيراقب تحركاتي و لازم ابعتله لوكيشن للمكان اللي انا فيه دايما ، وبرضو كنت فاكرة انه عايزني ابعتله لوكيشن عشان يبقا مطمن عليا لكن عرفت بعدها انه مش بيصدقني ، لما حاولت افسخ الخطوبة اتحول وبقا زي المجنون ، لانه كان فاكر اني بكلم واحد تاني ، بقيت بهرب منه وبقا يطاردني في كل مكان زي ما انت شوفت
بس هو اكيد عنده سبب للي ييعمله دا
= كان بيرفض يقولي أسباب
جايز حد بيكلمه و بيحاول يفرق بينكو

 

 

 

= معتقدش لان يوسف مش بيسمع لحد غير نفسه
طب ما تحاولي معاه تاني طالما بيحبك
= مستحيل ، انا مش هقبل اعيش مع واحد زي دا
طب لو مش عايزة يبقا خلاص متزعليش نفسك يا أميرة ، كملي حياتك عادي ، أنتي جميلة بصراحة ومتستحقيش الزعل دا
” كنت بحاول اكون لطيف لاقصى درجة ، ولكن تقريبا كدا انا وقعت في مشكلة لإني لقيت حد بيركن عربيته ونازل منها
هو دا بقا اللي أنتي سيباني عشانه
= مش كفاية يا يوسف اللي انت بتعمله دا
سبيني بس اتعرف الأول
= ملكش دعوة بيه كلامك معايا انا
ليه ، وهو لسانه اتقطع ولا ايه ، خليه يتكلم معايا راجل ل راجل ويعرفني بنفسه
” حسيت نفسي متوتر ، بدأت اعرق ، في الحالة دي انا معنديش حلول كتير ، الحل الوحيد هو اني احاول اخرج من الموقف دا
انت عايز ايه
= اخيرا نطقت
اه نطقت ، وقولي حالا عايز ايه أو تتفضل تركب عربيتك وتمشي
= نعرف الأول انت مين وماشي مع خطيبتي ليه
هو انت خطيب أميرة
= انت مكنتش تعرف ولا ايه
امال انا ابقا ايه
= مش فاهم يعني ايه
يعني اعرفك بنفسي ، انا وليد عبدالرحمن خطيب أميرة
= خطيب مين ، و دا حصل امتا
من كام يوم بس تقريبا أميرة نسيت تعزمك
= امال انا ليه مش شايف اي دبل في أيديكو
” في اللحظة دي بصيت ل أميرة اللي لحقتني وحست اني خلاص فقدت كل الطرق وبدأت تتكلم معاه
انت عايز يا يوسف ، اه انا وهو مخطوبين ، قرينا فاتحة وهنتخطب قريب واوعدك انك هتكون اول المعزومين
= يا أميرة انا بحبك ، صدقيني انا هتغير وهعملك اللي أنتي عايزاه بس ارجعيلي
وقلبي
ملوش لازمة الكلام دا دلوقتي ، انا مع حد تاني وبحبه ، يعني ميهمنيش كلامك خالص
” كنت مصدوم من كلامها ، لكن في الحقيقة كنت فرحان لسبب انا معرفوش ، معداش وقت كتير لانه مشي وسابنا واقفين ، بصتلها
انا بجد اسف على اللي قولته ، بس انا كنت اقصد اني اخليه يبعد عنك وميحاولش يكلمك تاني
= متتأسفش يا وليد ، دا انا المفروض اشكرك عشان انقدتني منه
هو كدا مش هيرجع تاني
= وحتى لو فكر يرجع برضو هرد عليه نفس الرد
طب ايه رأيك لو نقفل السيرة دي
= اه ياريت
تحبي نقعد في اي مكان
= احب وبالمرة تحكيلي عنك شوية
” قعدنا وبدأت احكي كل حاجة من الاول ، مكنش سهل عليا اني اقول حاجة حصلتلي بس نوعا ما كنت مطمن ليها
يعني افهم من كدا انها تستاهل الرد اللي رديته عليها

 

 

 

= تقريبا اه
ازاي كنت مستحملها كل دا
= كنت بحبها ومضطر استحمل
بس هي مش بتحبك
= عرفت متأخر
المهم انك عرفت
= بس بعد ما دمرتني
كان لازم دا يحصل عشان تفوق وتشوفها على حقيقتها
= وبعد ما شوفتها ، حالي بقا اصعب
مستحيل هيفضل صعب ، قول يارب لانه هو اللي عنده الحل
= يارب
طب ايه
= ايه
ناكل؟
= ناكل
” قعدة لطيفة وجو الطف بيخلق حالة من الاستمتاع ، جو قادر فعلا انه يخليك مبسوط ، مقدرش انسا دور الشخص اللي معايا ، لانه هو السبب في حالة الاستمتاع دي ، وفعلا اللي قال انها مش بالمكان دا عنده كل الحق ، رجعت البيت بعد يوم لطيف ، غيرت هدومي ، ببص على الموبايل لقيت رسالة منها
” كنت محتاجة اليوم دا جدا ، بجد بقالي كتير متبسطتش كدا ، شكرا انك كنت موجود
= انا معملتش حاجة ، وبالعكس انا اللي المفروض اشكرك
في كلا الحالتين نظرتي فيك كانت صح
” اخيرا حد ممكن يكون فاهمني فعلا ، كان بقالي كتير مش بضحك كدا او اني اكون مبسوط بشكل عام دي حاجة افتقدتها في الفترة الأخيرة والنهاردة لقيتها ، نمت عشان دي تكون اخر حاجة في يومي ، صحيت الصبح على غير العادة جوايا نشاط ومستعد للشغل ، نزلت و روحت و داخل وانا مبتسم
مالك يا وليد ، انت كويس
= لا بس حاسس اني مبسوط شوية
دي أول مرة من ساعة ما اشتغلت هنا اشوفك بتضحك
= ومش هتكون اخر مرة ان شاء الله

 

 

 

وايه السبب بقا
= بعدين يا حسام
” كان عدا نص الوقت في الشغل ، ومع مرور الوقت بدأت احس بملل لكن لقيتها واقفة قدامي ، ضحكة تلقائية اترسمت على وشي
قدامك كتير
= خالص ، دا انا خلصت اصلا من بدري
عندك مانع لو اتمشينا
= إطلاقا
” بدأنا نشوف بعض كتير ، تقريبا بقت كل يوم بتجيلي الشغل ، كلامنا كان بيزيد كل يوم ، عرفت عنها كل حاجة وبرضو هي عرفت عني كل حاجة و دي حاجة مش سهلة أبدا ، بس بيني وبينكو كنت بكون مرتاح لما بحكي
أميرة حلو القميص دا
= كان عادي لحد ما شوفتك وانت لابسه
هااا يا وليد ، اختار ايه ، الكشمير ولا الاوف وايت
= من رأيي الكشمير
و الاوف وايت وحش
= لا هيزودك جمال وأنتي مش محتاجة
جعانة
= وانا كمان ، تحبي ناكل ايه
بص انا بحب الشاورما جدا ، لكن بطلتها وبقيت مدمنة كشري
= انا كمان بحب الكشري
وبعده نشرب عصير قصب
= حيث كدا يبقا يلا بينا
” كل حاجة كانت ماشية تمام لحد ما لقيتها جاية تقولي
انا عندي ليك فرصة شغل كويسة جدا

 

 

 

= دي فين
في شركة واحد صاحب بابا
= بس انا مطلبتش
انا مش هسيبك هنا ، المكان دا مش بتاعك ولازم تخرج منه وأنا هساعدك
= انا مش مجهز نفسي للي أنتي بتقوليه دا
عايز تجهز نفسك ازاي
= يعني اولا لازم افكر قبلها هقول ايه واكون متوقع كل الأسئلة اللي ممكن اتسألها و…
ايه كل دا ، هو انت هتقدم في المخابرات
= انا مش هينفع اعمل حاجة مش عامل حسابها ولا محضرلها
يا وليد دي فرصة كويسة جدا ، شغلك في المكان دا مش لايق بيك
= طب كنتي خدي رأيي قبلها على الاقل
لو كنت قولتلك قبلها مكنتش هتوافق
= وانتي شيفاني دلوقتي موافق يعني
طب بص بقا المعاد بكرا الساعة 9 والعنوان هبعتهولك دلوقتي ، لو مجتش اعتبر نفسك متعرفنيش ولا تكلمني ، سلام
” مدتنيش فرصة ارد ومشيت ، طول عمري بخاف من اي حاجة مباشرة ، مبحبش المواجهات ، بقلق لو خسرت حالي يبقا أسوأ ، بس المرادي معنديش اختيارات كتير ، يإما اواجه أو هخسرها و دي انا مش مستعد ليها ، استأذنت بدري من الشغل و روحت البيت ، بحاول اكلمها مبتردش ، لحد ما قررت خلاص هروح وحتى لو متقبلتش هكون حاولت على الاقل ، نمت ، صحيت تاني يوم على صوت المنبه ، قومت لبست ونزلت روحت العنوان بتاع الشركة ، دخلت وانا بقدم رجل وبأخر رجل ، متوتر جدا واتوترت أكتر لما سمعت حد بينادي عليا بس كان مميز انا عارفه
كنت عارفة انك هتيجي
= جيت بس خايف

 

 

 

 

المهم انك جيت ، المحاولات مش هتخسرك حاجة
= و اديني بحاول
متقلقش برغم الخوف دا بس أنا واثقة فيك وعارفة انك هتتقبل
= بجد
بجد
” كأني كنت محتاج اسمع الكلام دا عشان رجلي تبدأ تتحرك ، مشيت وانا جوايا ثقة في نفسي و دخلت الانترفيو
” بعد نص ساعة ”
هااا عملت ايه
= قولتلك مش هتقبل
يااربي ، عموما الحمدلله وكويس اننا حاولنا ، متزعلش
= انا مش زعلان ، بس وانا خارج قالي حاجة غريبة جدا
ايه
= قالي تعالى بكرا عشان تستلم شغلك لأنك خلاص بقيت معانا
قول والله
= اه والله
” ب تنهيدة ” الحمدلله ، قلبي ارتاح ، من ساعة ما دخلت وانا قلقانة ، بس دلوقتي فرحت وفرحت جدا
= اصل هما هيلاقو احسن مني فين
عندك حق ، دلوقتي احنا حمدنا ربنا وفرحنا ، تعالى بقا ورايا عشان انت هتعزمني على شاورما دلوقتي بمناسبة المقلب اللي انت لسة عامله دا
= استني طيب ، انتي سريعة أوي ليه كدا
” ومن هنا ابتديت فعلا حياه جديدة ، حياتي اتحولت 180 درجة ، طبعا أميرة كان ليها دور كبير جدا في التغيير دا ، مكنتش مصدق اصلا اني هلاقي حد يفهمني ، شخص كنت بدور عليه طول حياتي و دلوقتي لقيته ، وطالما لقيته يبقا مكنش ينفع اسيبه يروح مني

 

 

 

تتجوزيني
= ايه دا ، انت فاجئتني يا وليد ، انا عايزة فرصة افكر
هاا فكرتي
= هو انا لحقت
مستنية ايه
= بفكر
أنتي مش عايزاني
= لا قصدي بفكر في فستان الفرح هيبقا شكله ايه
هيزيد حلاوة لمجرد انك لبستيه
” بعد استقرار في الشغل وكمان اترقيت ، كان لازم ااخد الخطوة دي لان هي دي اهم خطوة ، هي دي العوض ، وفعلا اتجوزنا بعد إلحاح كبير مني ، حياتنا مستقرة ومتفاهمين جدا
انت كلت كيس الشيبسي بتاعي يا وليد ، دا انت نهارك أسود
يا أميرة فين الشراب بتاعي اللي عليه ميكي ماوس
= تقريبا ضاع
ايه الإهمال دا ، هنزل ازاي انا دلوقتي
= عندك شرابات كتير يا وليد
اصل انا بحب ميكي جدا وبتفائل بيه كمان
” حتى أميرة عاقلة جدا ومشاعرها مش بتأثر عليها
خلاص بقا يا حبيبتي دا فيلم مش حقيقة
= شوفت الخاين عمل ايه فيها ، وهي يا عيني ضعيفة
شوفت اه
= شايف يا وليد بتعيط ازاي ، اوعا تكون هتعمل كدا فيا
اكيد طبعا لأ
= بس انت شكلك عايز تعمل كدا فعلا ، انا مش هقعدلك في البيت دا دقيقة واحدة
يا حبيبتي اهدي دا فيلم ، والله فيلم
” لكن اللي مش هقدر انكره هي اني مبسوط جدا معاها ، ونفسي اكمل باقي حياتي ليها هي وبس ، لأن السعادة عندي بتكمن في شخص واحد بس وهي أميرة
هاا يا روحي عاملة اكل ايه
= مكرونة وبانيه
انا بقالي سنة باكل نفس الاكل
= ماهو اول سنة ولسة بتعلم يا وليد
اتعلمي يا حبيبتى ، دا أنتي عليكي مكرونة وبانيه يجننو ، حضري الاكل عقبال ما افتح الباب
” روحت افتح الباب وكانت المفاجأة بالنسبالي ، كانت لابسة لبس مبهدل جدا
سهام
= وليد ، انا دورت عليك كتير جدا لحد ما لقيتك
وعايزة ايه
= ابو عبدالله طلع نصاب ، حتى اسمه مش ابو عبدالله ومش عايش برا مصر ، حتى المحلات اللي كان مشتريهالي كلها عقودها مزورة ، خد فلوسي كلها و هرب ، انا بقيت على الحديدة
ومطلوب مني ايه
= انا لسة بحبك ، ايه رأيك نرجع

 

 

 

 

بس انا متجوز
= عادي ، انا معنديش مانع اكون زوجة تانية
لا انا بتكلم على مراتي ، هي مش هتقبل يكون ليها درة
= بس انا عايزاك
اسف يا سهام ، بس انا لما برمي الزبالة مش برجع ااخدها تاني ، و دلوقتي امشي ولا تيجي تاكلي معانا ، خلاص بلاش اصل الاكل بتاعنا مش هيليق بيكي ، عن اذنك
” يمكن عيشت ايام صعبة بس اتعوضت عنها ، حقيقي ترتيب وكرم ربنا جميل جدا ويستحق اننا نصبر عليه ، خليك صابر ومع كل يوم بتصبر فيه ربنا بيكافئك ، متيأسش 💜 ”
” عشان ارجع للروايات ، كان لازم الرجوع يكون قوي ، والحمدلله قدرت احقق دا فعلا ، وكمان كنت حابب اني ابدأ معاكو السنة الجديدة ، شكرا لأي حد بيقول كلمة كويسة عني ، دا بيفرق جدا معايا ، وكمان حابب اقول انه حاليا بيتم التحضير ل رواية عشان انزلها في المعرض اللي جاي 2023 ، اشوفكو في حكاية جديدة 💛 “

لقراءة باقي حلقات الرواية اضغط على (رواية طريق الظلام)