رواية 30 يوم حياة الفصل الثلاثون 30 بقلم أميرة اسامة
رواية 30 يوم حياة الفصل الثلاثون 30 بقلم أميرة اسامة
رواية 30 يوم حياة البارت الثلاثون
رواية 30 يوم حياة الجزء الثلاثون
رواية 30 يوم حياة الحلقة الثلاثون
خرج زين من باب الشقه طلع فوق لهيما خبط عالباب كان احمد العربي بيلبس جزمته ونازل رايح لحاج سعيد
راحت رحاب تفتح..
رحاب….ازيك يازين
زين…ازيك يارحاب
احمد العربي ..اهلا يازين تعالي ياحبيبي دخل وين سلم عليه وحضنه اعدوا فالانتريه
احمد…عامل ايه يازين
زين…الحمد لله يا عم احمد
رحاب…تشرب ايه يازين
زين…لا يارحاب ولا اي حاجه انا جاي بس اخد هيما واطلع اخد ادهم ونازل علي طول
احمد…خير يازين في حاجه
زين…لا ابدا ياعم احمد الظاهر ان في حد فينا لازم يتحرك وشد الباقي فا شكلها كده جت فيا
احمد العربي …جدع يازين طول عمري بقول عليك جدع وكنت عارف ان انت اللي هتشدهم وتفوقهم
زين…والله ياعم احمد انا محتاج اللي يفوقني وتعبان زيهم بالظبط
احمد العربي…عارف ياحبيبي كريم وجع الكل يا زين ماسابش كبير ولا صغير غير لما أثر فيه خلينا نفضل حزنانبن عليه حتي لو هنفضل حزنانبن عليه العمر كله بس يا ابني دنيتكم لازم تمشوا مش عشان اي حاجه عشان عالاقل تلاقوا حاجه تلهيكم وتشغلكم عشان ترجعوا الروح للحاره من تاني يازين وترجعوا الروح لبيوتنا من تاني
زين…عندك حق يا عم احمد وعشان كده انا هنا الوقت لازم الكل يفوق ويخرج من الحاله دي حتي ولو واحد فالميه انا يمكن كريم اول حد في حياتي يأثر فيا ويوجعني بالشكل ده ابويا لما مات انا كنت مش مدرك اوي كنت اه مش صغير بس بردو مكنتش كبير ولا حتي عاشرته اد ما عاشرت كيمو
احمد….فعلا يا زين انت كنت صغير
زين….الحمد لله علي كل حال
احمد العربي…طيب قوم يا حبيبي ادخل لصاحبك وانا هنزل اروح اعدي عالرجاله ونروح لعمك سعيد
زين….ماشي وانا هجيبهم ونجيلكم شويه
احمد…ماشي يا حبيبي مستنيكم
قام زين دخل واحمد العربي نزل.
زين….عامل ايه ياهيما وراح عليه سلم عليه وحضنه كان بقاله خمس ايام مشافهوش
هيما…حضنه جامد بخير ياصاحبي زي مانت شايف
زين….طيب يلا أدامك بالظبط خمس دقايق تكون مظبط نفسك ولابس كمان
هيما… علي فين انا مش قادر اروح اي مكان
زين…مش هنروح اي مكان هنطلع نجيب اخوك ونعدي علي الباقي عشان نروح نشوف عادل وبعد كده نطلع نشوف عامر…عامر تعبان ومحتاجنا ياصاحبي
هيما….ماشي هغير علي طول
راح هيما طلع لبس وغير هدومه…انا جاهز
زين…يلا بينا خرج زين وهيما وبلغ هيما رحاب انه طالع لادهم وهي راحت تجهز عشان تنزل تعدي علي منه ووعد وتروح معاهم.
……….
عند أدهم وتوته كان لسه أدهم نايم علي صدر توته وتوته حاضنه راسه ووخداه في حضنها
سمعت توته جرس الباب خبط..
توته….ادهم. ادهم. يا ادهم
ادهم….امممم
توته…قوم ياحبيبي الباب بيخبط
قام ادهم اعد عالكنبه وشكله متبهدل من النوم علي الحزن عالانهيار. اللي كلن فيه
قامت توته راحت فتحت الباب
توته….اهلا أزيك يازين ازيك ياهيما
زين…ازيك ياتوته
هيما…ازيك ياتوته
توته….الحمد لله تعالو اتفضلو ادهم اعد جوه اهو
ادخلوا علي ما افتح النور
هيما..هو نايم ولا ايه
توته…لا صاحي بس كنا قافلين النور هو مصدع شويه بس
ادهم…تعالوا يا هيما
فتح توته النور
راح زين علي ادهم اللي مكانش يختلف عنهم حضنه جامد فضلوا عالوضع ده شويه وكل واحد فيهم عينه كلها دموع وقف جمبهم هيما حاطط ايده علي ضهر كل واحد فيهم وهو بيطبطب عليهم بتأثر
وتوته واقفه بالركن مربعه أيدها ودموعها نازله
سابه زين وحضن ادهم هيما واعدوا وهما بيمسحوا عينهم بهدوء.
أدهم…عشان يغير المود وانتي واقفه بتعيطي ليه ياهبله ماتروحي تعمليلنا حاجه نشربها
توته…يعني توجعوا قلبي وتقولولي عايزين حاجه نشربها
هيما….انت متجوز واحده هبله ياعم
توته…مش هرد عليك
ادهم…امسحيها فيا انا يلا بقي اعمليلنا حاجه
زين….استني يا توته متعمليش حاجه انا جاي اخد ادهم ونازل
ادهم…تاخدني فين
زين…كفايه كده يا ادهم الكل محتاجنا ومينفعش نفضل كده محبوسين كتير
توته…والنبي انت جدع يازين كنت اعده اقنع ادهم من الصبح ينزل
زين…ايه خلاص خنقك صح
توته…بابتسامه لا والله ابدا ده حبيبي انا لو عليا ميتنقلش من جنبي بس أعدته دي مقطعه قلبي
زين… طول عمرك جدعه با توته
أدهم…اصيله ياتوته…طيب انا هقوم البس وانتوا اشربوا اي حاجه
زين…ياعم اخلص انا مش عايز لسه هنعدي عالشباب هفضل كل شويه اشرب يلا بقي
توته…بقولك يازين ميتهيأليش عامر هينزل شهد بتقول تعبان اوي
زين…عارف يا توته انا هعدي اخدهم واروحله هنطلع بس الاول نشوف عادل وعم سعيد ونطمن علي منار ونروحله
توته.؟.ومنار تعبانه اوي ربنا يصبرنا كلنا
زين…يارب
بعد وقت بسيط راحوا عدوا علي صالح وصلاح وخدوهم وراحوا خدو يوسف وودوا روحيه لمديحه تطلع معاها عند فاطمه…وراحوا علي بيت حاج سعيد
كانوا اعدين فوق فالسطح مشغليين قرأن بسيط واعد مع رجاله الحته وعادل باصص عالشارع وساكت
طلعوا مع بعض الشباب
زين….سلام عليكم
الجميع….عليكم السلام
احمد….جدع يازين كنت واثق فيك
راح زين علي حاج سعيد باس ايده وباس راسه
هو والشباب كلهم
زين…اخبارك ايه ياراجل ياطيب
سعيد…بأبتسامه رضا في نعمه يا ابني الحمد لله
زين…يارب ديما حقك علينا كل واحد فينا كان قافل علي نفسه شويه
سعيد….عارف يا ابني كلنا تعبانين وانا مديكم عذركم ومقدرش ازعل منكم انتوا عملتوا اللي محدش يعمله
ادهم…متقولش كده يا حاج سعيد احنا ولادك ولا انت شايفنا اغراب
سعيد…عمري ما شوفتكم اغراب يا ادهم انتوا ولادي اللي مخلفتهمش انا قلبي واجعني علي كريم بس انا معايا 9 رجاله يسدوا عين الشمس
زين باسه من كتفه احنا معاك دينا يا حاج سعيد
سعيد…لو عليا انا بخير حاولوا بس تفكوا عادل شويه
زين..حاضر راح زين علي عادل اللي شارد في دنيا تانيه وراح وراه الشباب
زين حط ايده علي كتف عادل وشده في حضنه وعادل كان علي تكه وكأنه ما صدق فضل يعيط زي الاطفال وصحابه كلهم حواليه ودموعهم نازله معاه من غير صوت
زين….اجمد يالا اخوك شهيد مش ميت موته عاديه واوعي تفكر انه نقص من وسطنا كيمو هيفضل موجود
عادل…وحشني يازين اوي مش عارف اعد فالاوضه من غيره شايفه فكل مكان مش عارف اعيش حياتي طبيعي حاسس اني هيجرالي حاجه حاسس اني هتجنن
ادهم…ادعيله يا عادل محدش فينا مصدق وكلنا موجعين عليه ياريت في ايدنا حاجه نعملها عشان يفضل وسطنا واحنا نعملها
صالح…شد حيلك يا عادل ابوك تعبان وبيحاول يبين انه قادر يقف علي رجله
صلاح…صالح عنده حق ابوك بيحاول يتماسك عشان كل اللي حواليه امك تعبانه ومنار اختك تعبانه وانت بحالتك دي بتزود الهم فوق كتافه
عادل…مسح دموعه غصب عني والله كل ما ابقي لوحدي التفكير بيخليني هتجنن
زين…عشان كده احنا هنا انهرده ومن اللحظه دي محدش فينا هيسيب التاني كلنا محتاجين بعض يا عادل ومش معني كده اننا بنساعد بعض علي نسيان كيمو كيمو هيفضل في وسطنا بس لازم نقاوم ادام لسه فينا نفس اللي حوالينا ملهمش ذنب ومعندناش استعداد علي خساره اي حد الوقت
عادل معاكم حق ..صحيح فين عامر وايهاب
ادهم…عامر تعبان اوي وايهاب معاه
عادل…عارف ان عامر تعبان وانا مقصر معاه بس غصب عني
زين…خلاص لو تقدر تعالي نروح نعدي عليه ونشوفه
عادل…اكيد طبعا بص ليوسف اللي كان واقف سامع وساكت
عادل…عامل ايه يا يوسف
يوسف….بخير ياعادل عايش
هيما….طب ايه يلا نروح لعامر
زين…تعالي بس ننزل الاول نشوف الجماعه تحت ونطمن علي منار
أستأذنوا من الرجاله زنزلوا تحت وعادل معاهم خبط فتحتله رحاب اللي كانت قريبه من الباب كان البنات وامهاتهم كلهم تحت وفاطمه اعده في وسطهم دموعها علي خدها واعدين مع منار فالاوضه
عادل…ازيك يارحاب
رحاب…الحمد لله ياعادل انت بخير
عادل… الحمد لله امي فين ومنار
رحاب…فالاوضه جوه كلنا مع منار
عادل…طيب بلغيهم ان الشباب عايزين يطمنوا عليهم
ادهم…بقولك ايه خلاص خليها وقت تاني نعدي عليهم
عادل…استني ياجدع بس
دخلت رحاب بلغتهم فاطمه قالتلها دخليهم
رحاب…تعالوا ادخلوا
عادل…تعالوا يارجاله
دخل عادل…سلام عليكم عاملبن ايه جميعا
ردوا عليه السلام راح عادل باس راس امه عامله ايه يا امي
فاطمه…في نعمه يا حبيبي
عادل….الشباب فالصاله جايين يطمنوا عليكي
فاطمه…دخلهم يا ابني
عادل…تعالوا ياشباب
مديحه…وسعوا جمب بعض يا بنات راحوا البنات كلهم جمب بعض عشان يوسعلهم المكان
دخل زين ووراه الشباب
زين…سلام عليكم
الجميع…عليكم السلام
زين…راح باس ايد فاطمه عامله ايه يابطوط انهرده
فاطمه….الحمد لله يازين
سلموا عليها الشباب كلهم
وهي دموعها نازله براحه
زين….اجمدي كده مش عايز اشوفك كده وبعدين منار محتجاكي
ادهم….عامله ايه يامنار
منار….بصوت واطي وباين عليه التعب الحمد لله
فاطمه…غصب عني يا ابني مش قادره قلبي جواه نار انا راضيه والله بس مش قادره اخد علي عدم وجوده
كان حنين يازين وعمره مازعلني كان بس ربنا يكرمه بقرشين يقسمهم معايا كنت افضل اقوله معايا ابوك مديني واخوك لسه مديني وانت لسه مديني اول الشهر يقولي وماله زياده الخير ويصمم يديني مكانش يحب يديني ادام ابوه عشان ميزعلهوش
زين….كريم طول عمره جدع مع الكبير والصغير
فاطمه…يوم ما الواد اللي بيشتغل معاك راحله في رمضان عشان السحور كان كل يوم يجهزله السحور لوحده في طبق ويظبطهوله
اقوله ما تديله من تحت علي طول يقولي عشان لما اشوفه اناديله و اديهمله علي طول ومحدش يشوفه والواد يتحرج…كان بيخاف غلي زعل الناس…كريم مكانش باين عليه الموت يازين بس لما مات واعدت مع نفسي افتكرت حجات كتير يا ابني كان قلبه حاسس انه هيموت
يوم ما اتجمعنا اخر مره عالسطح كان مصمم يطلع شاشه التلفزيون بتاعته واعدت اقوله دي لجوازك ياحبيبي لاول مره الاقيه يصمم وقاللي مش يمكن يا امي اموت قبل ما اتهني بحاجتي يومها قلبي وجعني وقولتله خلاص طلعها ياحبيبي كريم مكانش بيحب يأعد من الشغل ابدا طول عمره ياحبيبي بيحب ينزل شغله ويعتمد علي نفسه عشان ميقولش لاي حد اديني كان ديما هو اللي بيراضي الكل..واستغربت لما فضل قافل من بعد رمضان ومش عايز يفتح المحل كان كل يوم يقولي بكره وشويه ويقولي بعد فرح ادهم وتوته واخر مره قاللي بعد مانرجع من الرحله وكأنه كان خلاص حاسس ياقلبي ويوم ما اتجمعنا قبلها كانت نفسيته زي الزفت ومضايق يقولي انا مش واخد عالاعده ومرتحش غير لما اتجمعنا كان ديما هو اللي بيحب يجمع الكل
نعمه…صلي عالنبي يافاطمه بقي ادعيله ياحبيبتي
سهير…كفايه عياط والنبي انتي دموعك ما نشفتش
فاطمه…لو فضلت اعيط عمري كله مش هقدر ارتاح برده
ادهم باسها من راسها وحدي الله عشان خاطري
فاطمه….لا إله الا الله
زين….بقولك ايه انتي فالبيت ده القلب الكبير اللي بيطبطب علي الكل لو انتي مجمدتيش كده كل اللي حواليكي هيتعبوا حاج سعيد تعبان وبيقاوح ومنار انتي شايفه هي عامله ازاي
هي مينفعش تشوف كل ده لانها محتاجه ترتاح وتغير جو
فاطمه…غصب عني يا ابني غصب عني والله انا ام وقلبي محروق علي ابني …ده الكبير اول فرحتي احن خلق الله كان بس يشوفني مضايقه يفضل ورايا لحد ما يضحكني كان يشوفني بعمل الاكل وواقفه سانده عالحيطه يصمم اني اخرج ارتاح ويكمل هو بدالي كان مريحني عمره ما قاللي اعمليلي كوبايه شاي كان يقوم يعمل لنفسه ويعملي ولما كنت أساله اعملك شاي يا كيمو يقولي لا وبعدها الاقيه قام عمل اقوله ما انا لسه قيلالك يقولي يعني ينفع انا ابقي اعد يا بطوط وانتي واقفه تعمليلي شاي
زين….طيب عشان خاطري كفايه كده بالله عليكي منار مش هتستحمل كده شيفاها عامله ازاي
فاطمه…حاضر يا ابني اوعوا يازين تبطلوا تزوروني ولا تطلعوا تأعدوا معايا انتوا من ريحه كريم
زين…ايه اللي بتقوليه ده بس انتوا اهلنا ولو كريم راح فانتي وحاج سعيد وعادل ومنار موجودين
صالح….متقوليش كده يا خالتي انتي مش عارفه غلاوتك عندنا ولا ايه
هيما…اطمني يا ستي هنكلعلك ونأعد معاكي وتعزمينا عالغدا اياك انتي بس متزهقيش مننا وتطرودينا
فاطمه…مقدرش انتوا عارفين معزتكم عندي
زين….وانتي يامنار شدي حيلك شويه
منار…بأبتسامه بسيطه غمضت عينها بمعني حاضر
صلاح…سلامتك يا منار شدي حيلك
هيما…ان شاء الله هتبقي زي الفل وترجعي تقرفينا تاني انتي ورحاب ووعد وتجننونا
ابتسمت منار بحزن
سهير…هتبقي زي الفل ان شاء الله هي بس تسمع الكلام وتاكل
زبن…لا هتسمع الكلام ولو مسمعتش مش هخلي وعد تيجي تأعد معاها تاني هي حره بقي وبص لوعده بأبتسامه لاكن باينه جدا انها حزينه. اعملي حسابك يا وعد لو معرفتيش تأكليها يبقي هي كده بتقول انها مش عيزاكي تاني تيجي تأعدي معاها..
وعد….ايوه عندك حق بس هي هتاكل صح يا منار
أبتسمت منار وهي ساكته.
زين…طيب احنا هنروح نبص علي عامر عشان هو تعبان اوي
فاطمه…اه طمني عليه يا ابني هو مختفي خالص من يوم موت كريم شوفته فالدفنه بس الصبح ومشفتهوش تاني
ادهم…لا هو كان معانا بليل فالعزاء بس من بعدها قافل علي نفسه ومش بيكلم حد تعبان
فاطمه…خليكم معاه يا ابني عامر كان اقرب واحد لكريم وكريم كمان كان بيحبه اوي كان بيقولي انا بحبهم كلهم يا اما كأننا كلنا شخص واحد وروح واحده مش بفضل حد عن حد بس عامر بحسه ابني الصغير اللي مخلفتهوش ولا هخلفه
زين…بوجع عارف وعشان كده لازم نروحله نخرجه من اللي هو فيه..
فاطمه…ابقوا طمنوني عليه
زين…حاضر يا امي مش عايزه حاجه
فاطمه…عيزاكم طيبين
زين…المره الجايه عايز اجي الاقيكي احسن من كده واجي يامنار الاقي قايمه من عالسرير ده
مديحه…ان شاء الله يا ابني
ادهم….ايه خالتي همتكم معانا كده فوقولنا بطوط شويه وانتوا يابنات فوقولنا منار ايه توته فين مناقرتك معاها
توته….بحزن حاضر هقومها
ادعم…لو أحتاجتوا اي حاجه كلمونا.
فاطمه…ما تعرمش منكم …وبصت ليوسف يوسف
يوسف…ايوه يا خالتي
فاطمه…انت كويس يا حبيبي
يوسف….بخير المهم صحتك انتي
فاطمه….يارب ديما ياحبيبي ادعي لكيمو يا يوسف كان بيحبك انت كمان اوي
حس يوسف انه اتخنق ومش هيقدر يمسك نفسه…ودموعه هتنزل…انسحب بسرعه ونزل علي تحت
صلاح…معلش يا خالتي يوسف كمان نفسيته تعبانه اوي
فاطمه…ربنا يقوينا كلنا علي وجع القلب الاحنا فيه روح له يا حبايبي وابقوا طمنوني علي عامر لحد ما اقدر اروحله
زين….لا يا ستي انا هخليه يجيلك لحد عندك
فاطمه…ان شاء الله
ادهم…يلاسلام عليكم
الجميع…عليكم السلام
……….
نزلوا تحت كان يوسف بيشرب سيجاره وباين علي عينه انه كان بيعيط
زين…يلا يا چو
يوسف…يلا
طلعوا كلهم علي شقه حسني بعد ما سلموا علبه في البقاله بتاعته وقالهم يطلعوله فوق
خبط زين…فتحله ايهاب واتفاجئ بوجودهم ايه ده زين وادهم والشباب تعالو
سلم عليهم ايهاب ودخلهم وحضن عادل اوي وأتأسفله علي تقصيره معاه
ايهاب….عاملين ايه
زين…الحمد لله عامر عامل ايه
ايهاب….والله ما عارف يا زين هو تعبان بس مش بيتكلم مع اي حد ساكت علي طول حاسس انه عنده زهول ومش عارف اعمله اي حاجه
زين…هو صاحي ولا نايم
ايهاب…ولا دي كمان اعرفها هو استحاله يكون بينام كل ده وغالبا لما بدخل عليه بيعمل نفسه نايم عشان متكلمش معاه
ادهم ..طب احنا عايزين ندخله
ايهاب…طب ما يلا ادخلوله علي بال ما اعملكم حاجه تشربوها معلش بقي شهد راحت لمنار ومفيش حد غيري
زين…مسكه من ايده تعالي بس احنا مش عايزين حاجه
دخل ايهاب فتح النور كان عامر اعد علي حرف السرير
وباصص عالشباك اللي في اوضته ومدي ضهره لباب الاوضه وضهره محني كأنه مش قادر يقف
دخل زين والشباب واتصدموا من منظر عامر😳
زين…بقلق عامر انت كويس
رد عليا
ايهاب…مش راضي يتكلم خالص
ادهم…ايه منظره ده انا مكنتش متخيل انه تعبان بالشكل ده
يوسف…نزلت دموعه وراح اعد ادامه علي ركبه عامر رد عليا انا ياصاحبي متوجعش قلبي اكتر ما هو موجوع ايه اللي عامل فيك كده
زين…بعصبيه ايه يا ايهاب
انتوا ازاي ساكتين عليه كده
ايهاب….مش راضي يا زين يتكلم مع اي حد خالص
زين….ده محتاج دكتور يتكلم ايه بس
صالح …انا هروح اجيب دكتور بسرعه
هيما….استني انا جاي معاك
عامر…بصوت ضعيف محدش يجيب حاجه مش عايز دكاتره
زين…بعصبيه هو ايه اللي مش عايز دكاتره مش بمزاجك يالا
عامر….ايه هتكشفوا عليا بالعافيه مش عايز حاجه مش عايز حد سيبوني في حالي ابعدوا عني
ادهم….انت عبيط يالا عامل في نفسك كده ليه عايز تموت
عامر…بدموع اه اه يا ادهم عايز اموت محدش ليه دعوه بيا
زين….لا مش هتموت يا عامر ومحدش فينا هيسيبك في حالك ايه انت اتجننت معترض علي اللي ربنا عايزه عايز تموت كافر
عامر…شايفني موت نفسي نانا لسه عايش اهو
زين….اه بتموت نفسك وهتموت كافر ياعامر انت بقيت عامل زي الراجل العجوز انا دخلت شوفتك من ضهرك اتصدمت ضهر محني وجسم زي العيال الصغيره وقله اكل تبقي بتعمل ايه في نفسك
عامر….بدموع زي العيال الصغيره وانا مش عايز اعيش انتوا مالكم ومالي
زين….هيماااااا صالحححح بسرعه يكون معاكم الدكتور
هيما…هواااا يلا ياصالح
يوسف….ليه كده يا صاحبي كل ده ليه
عامر…..كريم راح يا يوسف راح وسابني كريم مشي يا صاحبي
يوسف..بس احنا لسه موجودين ياعامر
زين….احنا مش فارقين معاه ولا ابوه واخواته فارقين معاه ولا اي حد بيحبه فارق معاه انت مش راحل ياض انت لو راجل هتعمل حساب غيرك لو راجل مش هتموت نفسك بالبطئ
ادهم….براحه شويه يازين
زين…هو ايه اللي براحه انت مش شايف منظره
ايهاب….عامر زين خايف عليك
عامر….وانا مش عايز حد يخاف عليا وحاول يقوم وهو مش قادر وبيطوح حاول صلاح يجري عليه يسنده
زين….سيبه يالااااا سيبه مش هو راجل وحكم علي نفسه بالموت ومعترض علي قضاء ربنا يبقي سيبه يقف لوحده
صلاح….معلش يازين براحه عليه
زين…بعد صلاح اوعي يالاحه سيبه قولت
عادل…عامر ليه عامل في نفسك كده يا صاحبي انا عارف ان كيمو كان غالي عندك بس لازم بردو نفسك تبقي غاليه عندك دي امانه ياصاحبي هيسألك عليها ربنا
وبعدين الانت عامله ده اعتراض زي ما زين بيقول
عامر…مش قادر مش قادر انتوا ليه مش حاسين بيا انا بموت والله العظيم كل يوم الف مره ارحموني اللي في قلبي محدش فيكم حاسس بيه لو كريم عايش كان حس بيا عشان هو اكتر واحد بيحس بيا كريم مكنش صاحبي ولا حتي اخويا كريم ده كان انا بس روحنا اتقسمت اتنين..
كريم كان بيودعني قبل الرحله بيومين بس انا مفهمتش ابويا واخويا كانوا بيناموا وهو يفضل واقفلي كأني ابنه اللي خايف يدخل ينام وهو لسه بره مرجعش
زين….وانت عملتله ايه يا عامر دعتله اترحمت عليه كام مره من ساعت ما مات ختمتله مصحف طلعته صدقه قولي عملت ايه تردله بيه اللي قولته ده كله كلنا مصدومين اه كلنا مصدومين كلنا حابسين نفسنا اه كلنا حابسين نفسنا بس محدش فينا معترض
ادهم….يمكن فراقه اصعب حاجه عدت علينا يا عامر بس لازم نكمل
عامر….انا مش قادر يا ادهم
زين…عشان ضعيف وايمانك بالله اضعف
عامر….انا همشي هسافر الشغل اللي جالي مش هقدر اعد هنا
يوسف…هتسيبنا يا صاحبي
طيب كريم راح انت كمان هتمشي يا عامر
عامر…مش قادر ومش هقدر انزل واشوف الشارع ده من غيره مش هقدر اشوف مكانه وهو مستنيني فالبلكونه مش هقدر اشوف المحل
صلاح…خلاص غير جوه وروح شويه بس ترجع
ايهاب…لو حاسس انك هتبقي مرتاح سافر شويه لحد ما تخس انك بقيت احسن
زين….لو سافر مش هيرجع عشان ده مش جدع
عامر…انت عايز مني ايه انت مالك ومالي ياجدع سبني في حالي انشالله اموت واغور في ستين داهيه
زين…مش هتموت ومش هتروح في اي مكان وهتفوق يالا فاهم يعني ايه هتفوق
ادهم كان بيحاول يبعد زين عنه عشان عارف ان زين خلاص فقد اعصابه بمجرد ما شاف حالته….
ادهم…اهدي يازين براحه
عامر….بدموع تقطع القلب انت عارف يا زين انت لو حاسس بربع اللي فيا مش هتعمل معايا كده انا مش عايش يا زين انا مش معترض بس كمان مش قادر ارضي كيمو مات يازين وماتت معاه كل حاجه كيمو خد روحي معاه وساب جسمي هنا
متعلق لا طايل سما ولا طايل ارض قولي كده مين هيستناني تاني مين هيفضل يكلمني كل شويه مين هيعمل فيا كل مقلب والتاني ويسبني واقف فالمحل مين هيفضل يشاكل فيا وأشاكل فيه طيب قولي لما اضربت بالمطوه وكنت هموت ليه لحقتوني وليه هو لحقني. قولي يازين ليه هو قدر يصرخ ويلحقني وانا مقدرتش الحقه وكان بينا خطوات بسيطه طب قولي ازاي كريم مات يازين وهو كان خارج ورايا طب قولي كريم كان حاسس بأيه وهو بيموت كان بيصرخ يازين وانا مسمعتهوش زي ما هو سمعني انا بموت يازين والله العظيم بموت ومش عايز اعد فالدنيا دي دقيقه واحده بعده
نزلت دموع الشباب كلهم ونزلت دموع زين وشد عامر في حضنه
عامر…..كريم مات يا زين كريم كسرني يا صاحبي
بعد وقت بسيط جه الدكتور مع هيما وصالح وكشف علي عامر وقالهم ان حالته النفسيه وحشه جدا ومينفعش يتساب لوحده ابدا عشان ممكن يأذي نفسه وكتبله علي مكملات غذائيه وقالهم لو تعب اكتر لازم يجروا بيه عالمستشفي
فضل الحال زي ما هو يوم ورا التاني ورا التالت اسبوع اتنين
ابتدت الحياه تمشي طبيعيه شويه بشويه الشغل يرجع من تاني الكل نزل شغله لاكن حالتهم النفسيه كانت زي ماهي لسه خصوصا عامر ومنار ويوسف كلهم الحزن مسيطر عليهم وتقريبا مش بيتكلموا كتير مش بيضحكوا مفيش اي حاجه تخلي فيه روح من تاني نزل عامر شغله فالبنك كان بيروح ويرجع من غير ما يقف فالشارع ولا يكلم اي حد حتي لما كان زين يناديله او صالح ولاحه او حتي والده كان يادوب يقف يقولهم كلمه ويستأذن بسرعه مش قادر يشوف محل كريم واللي كان بيحب يشوفه كان بيطلعله فوق كان رافض ينزل القهوه خالص
لحد ما في يوم كلهم كانوا معاه فوق ابتدا يضحك معاهم بسيط يتكلم ولاكن صدمهم لما قالهم قراره انه خلاص هيسافر كلموه كتير لاكن هو كان مصمم قالهم انها فتره بسيطه ويمكن يقدر يغير جو ويقدر يتأقلم علي عدم وجود كيمو وقالهم انه خد اجازه ست شهور بدون مرتب
علي اد زعلهم لاكن وافقوا عشان عارفين ان هو نفسيته كانت متدمره..
….في منزل أدهم
كانت توته بتحضر العشاء
توته…ادهم يلا ياقلبي العشا جاهز
ادهم…تسلم ايدك ياتوته ايه ده كله يابت انتي عازمه حد ولا ايه
توته….ولا عازمه حد ولا حاجه بس انهرده كنت اجازه وقولت اعملك اكله حلوه
ادهم…مش ناويه تسيبي بقي الكوافير ده ياتوته
توته….احنا مش متفقين يا ادهم من الاول
ادهم…وانا مبرجعش في اتفاقي يابت وانتي عارفه انا بس عايزك ترتاحي يابت وتبقي هانم واللي تحتاجيه وتشاوري عليه يجيلك انا مش عايزك تتعبي كفايه شقي
توته….انت عارف يا ادهم الحكايه مش حكايه فلوس ولا حكايه شقي بس انا خدت عالشغل مقدرش أعد احس اني هيجرالي حاجه
ادهم..بعد الشر عنك يابت عموما انا تحت امرك وقت ما تحبي تسيبي الشغل سبيه وهدلعك مش عايزه تسبيه خليكي واي حاجه تحتاجيها فالشغل من سيوله لاي حاجه بردو انا معاكي
توته…بحب ربنا يخليك ليا يا ادهم انا بحبك اوي
ادهم….وانا ما بحبش حد ادك وعايز اشوفك احسن واحده فالدنيا انتي والبت رحاب
توته…ربنا يخليك لينا يارب يلا كل بقي
ادهم….ابتدي ياكل تسلم ايدك الاكل جميل اوي
توته….عجبك
ادهم…طبعا
توته…بألف هنا
ادهم…طب انتي مش بتاكلي ليه
توته…مانا باكل اهو
ادهم….فين ده انتي اعده بصالي
توته…بصراحه بقي مش قادره اكل معدتي تعباني اوي يظهر بقي عشان كنت واقفه اعمل الاكل وشميت الريحه فا شبعت ولما شوفت الاكل حاسه اني مش قادره
ادهم…ممكن ورجع ياكل تاني
حست تزته انها مش قادره قامت جريت عالحمام وهي ماسكه بطنها وفضلت ترجع
جري وراها ادهم…مالك يابت
توته…مش عارفه شكلي خدت برد في معدتي
ادهم…انتي جسمك متلج تعالي ارتاحي اروح اجبلك الدكتور واجي
توته…ملهوش لزوم يا ادهم انا كويسه والله بس يعني
ادهم…يعني ايه في ايه يابت
توته….اصل بصراحه كده انا شاكه اني 🙄
ادهم….انك ايه اوعي تقولي انك ممكن تبقي😳
توته…هزت راسها بضحك انا بقول شاكه
ادهم…طب ودي نعرفها ازاي
توته…ممكن اعمل اختبار فالبيت بتاع حمل بنجيبه من الصيدليه
ادهم…وهو بيلبس بسرعه طب اعدي ومتتحركيش لحد ما اجي
توته…رايح فين
ادهم…هجيبلك اختبار
توته…طب خليها الصبح وروح كمل اكلك
ادهم…مش عايز اكل
انا رايح بسرعه
توته….بضحك استني يا مجنون
جري ادهم بسرعه علي الصيدليه راح جابلها اختبار ورجع علي طول
ادهم…يلا يابت قومي
توته….خدته من ايده طب خليك هنا رايح فين هو فرح
ادهم.. اتنيلي قالي يعني بتتكسف مني طب يلا يا اختي بسرعه
دخلت توته الحمام وقفلت علي نفسها وهو واقفلها بره
غابت حوالي عشر دقايق وهو واقف هيموت يعرف
واخيرا فتحت توته
ادهم…ايه
توته….مفيش
ادهم…مفيش ايه
توته….مفيش حمل
ادهم….طب عادي الحمد لله
توته…يعني انت مش زعلان
ادهم…لا طبعا هزعل ليه ربنا يرزقنا بأذن الله قريب
توته…من قلبك
ادهم…بحب اه والله العظيم لو كنتي طلعتي حامل كنت هفرح بس ادام لسه مأرادش هزعل ليه
توته…طيب بقولك ايه
ادهم…ايه
توته….أفرح
ادهم…يعني ايه
توته…مش قولت لو طلعتي حامل كنت هفرح انا بقولك افرح عشان انا حامل😍😍🙈🙈🙈
ادهم…كب احلفي بالله
توته…والله العظيم حامل
ادهم….خدها في حضنه وشالها رفعها من الارض وهو طاير من الفرحه
ادهم…الحمد لله يارب
توته…انا فرحانه اوييييييي
ادهم….وانا كمان مش مصدق اسمعي بكره بأذن الله هنروح نعمل تحليل ونطلع علي اي دكتور عشان تتابعي معاه ومن هنا ورايح مش عايز اي مجهود والشغل يا توته والنبي مش هقولك لا بس هقولك خلي بالك
توته….ماقلقش والله هعمل كل حاجه يقول عليها الدكتور
ادهم….انا فرحان اوي ياتوته بقولك ايه لو جه ولد انا اللي هسميه
توته….وانا موافقه عالاسم يا سيدي
ادهم….انتي عارفه انا هسمي ايه
توته…طبعا عارفه كريم
أبتسم ادهم بوجع…مش عايز اسمع بتقطع ابدا عايز نفضل ننادي بالاسم ده علي طول مش عايز حد ينساه
توته….كريم عمره ما هيتنسي ابدا بس بردو انا موافقه عالاسم
ادهم….بقولك ابه تعالي نقوم نصلي ركعتين شكر لله
توته….يلا😍
عدي حوالي اسبوع كمان توته راحت الدكتور واتأكدت من حملها وكتبلها علي ڤيتامينات وحجات تمشي عليها الكل عرف سعير واخواتها طاروا من الفرحه احمد العربي كان طاير من الفرحه اصحابه كلهم باركوله واصحاب توته الكل كان فرحانلهم ودي كانت اول حاجه تحصل تخليهم يبتسموا او يفرحوا شويه بعد موت كيمو..
اما عند عامر بلغهم خلاص بمعاد السفر كان مسافر عالعصر وده كان توقيت شغلهم كلهم وكان مصمم محدش يوصله في اي مكان يسلم عليهم بس ويمشي هو
كان فاضل بوم علي سفره وقرروا يطلعوا يأعدوا معاه
ويسهروا مع بعض…
منار عرفت من عادل ومن صحابها ان عامر خلاص مسافر كانت كول الليل مقضياه عياط
لحد ما جه تاني يوم بوم سفر عامر
طول اليوم كانت باصه من الشباك ومستنيه معاد نزوله
فضلت تفكر كتير ومش عارفه تعمل ايه كانت عايزه تمنع سفره بأي طريقه
مكنش في حاجه بتتردد في ودنها غير كلام كريم
فلاش باك…🌪️🌪️🌪️
كريم….اوعي تتخلي ابدا عن اي حاجه بتحبيها حتي لو بعيده عنك عافري عشان توصليلها حاربي عشان تطوليها متستسلميش واوعي تسمعي كلام عقلك لما يقولك مفيش فايده ومفيش امل صدقيني يامنار في امل وامل كبير كمان
لفت منار وبصتله بأستفهام وأرتباك انا مش فاهمه حاجه
كريم…أبتسملها بحب لا يا منار انتي فاهمه وفهماني انا بالذات المهم اسمعي كلامي اوصلي للأنتي عيزاه ياحبيبتي فرحي قلبك اللي قرب يعجز من الوجع
باك….مسحت منار دموعها وخرج بسرعه من باب اوضتها
فاطمه…في ايه يا منار
منار…مفيش حاجه يا ماما بقولك ايه هو عادل فين
فاطمه…فالمكتب يا بنتي هيكون في ايه
منار …طيب انا هروح اعد معاه شويه
فاطمه…طب استني لما يرجع عشان شغله
منار…مش هأخره ولو عنده شغل هسيبه واروح لوعد
فاطمه…طيب يا بنتي روحي وخلي بالك علي نفسك
منار…حاضر سلام يا امي
…خرجت منار وهي بتجري من باب البيت زي المجنونه
ولسه صوت كريم سمعاه في ودنها…..
….اوعي تتخلي ابدا عن اي حاجه بتحبيها حتي لو بعيده عنك عافري عشان توصليلها حاربي عشان تطوليها متستسلميش….
عافري عشان توصليلها حاربي عشان تطوليها.
أشوفكم بكره في نهايه
30 يوم حياه
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية 30 يوم حياة)