رواية لن أعشق سواك الفصل الثامن عشر 18 بقلم منى مرزوق

رواية لن أعشق سواك الفصل الثامن عشر 18 بقلم منى مرزوق

رواية لن أعشق سواك البارت الثامن عشر

رواية لن أعشق سواك الجزء الثامن عشر

رواية لن أعشق سواك الحلقة الثامنة عشر

عمر : مستحيل
نور بتنهيده و هي بتغمض عينيها : لا يا عمر المستحيل الوحيد هو اني افضل على ذمتك يوم واحد من بعد النهارده
عمر و هو بيقرب منها : انتي على ذمتي لحد ما اسيب الدنيا، انتي متفكريش لحظه يا نور اني ممكن اسيبك
نور بغضب : لا هتسيبني بالذوق بالعافيه هتسيبني، انا مبقتش قادره ابص في وشك انا مبقتش قادره حتى اتنفس في وجودك او في مكان انت فيه
عمر بذهول : انا…انا عارف اني ظلمتك و عذبتك بس ده كان غصب عني، انتي… انتي عارفه انه كان غصب عني انتي عارفه اني اتجننت اول ما حسيت انك ممكن تكوني بتخونيني
نور بإبتسامة سخريه و الدموع في عينيها: اه و المفروض اني اعيش مع انسان معندوش ثقه فيا و كمان كان بيلومني عشان كنت عايزه اسيبه قبل الجواز لما شوفته بعيني مع واحده و هو يقلب عليا الدنيا عشان صورتي مع شخص في مكان عام و مفكرش حتى يعرف الشخص ده مين ولا مقابلتي معاه سببها ايه، انا مشوفتش حد اناني كده في الدنيا
عمر : نور طب ادينا فرصه نسمع بعض و نحاول نتفاهم
نور : نتفاهم على ايه يا اخي انت ايه، بقولك مش عيزاك مش طايقه اقعد معاك لحظه زياده، انا همشي يا عمر و ياريت ورقة طلاقي توصلني بسرعه و بلاش ندخل في مشاكل
عمر و هو بيمسك ايدها: نور انتي بتقولي كده عشان اللي عملته انا عارف بس انا كنت في عذاب، مكنتش انا و انتي عارفه ده كويس اكيد، نور انتي اكتر حد في الدنيا بيقدر و بيحس بيا
نور وهي بتشد ايدها منه : و كان المقابل ايه؟ وريتني العذاب و الذل و اهانتني و طعنت في شرفي و عايزني بعد ده كله اعمل ايه؟ اقولك حبيبي ولا يهمك و ٱخدك في حضني و اقولك مسمحاك؟
عمر بدموع : اغفري يا نور، انا كنت هتجنن من حبي فيكي انا كنت بموت في اليوم 100 مره ، نور ارجوكي حطي نفسك مكاني
نور : ما انا كنت مكانك ولا نسيت؟
عمر : لا منستش و انا استحملت كل اللي عملتيه فيا و كل اساءتك ليا عشان كنت عارف انه بدافع حبك و غيرتك عليا والله
نور : ده على اساس اني عملت فيك نص اللي انت عملته فيا؟ ده على اساس اني مدتكش فرصه تدافع عن نفسك؟
عمر : معاكي حق انا عارف ، بس.. بس يا نور شعور الراجل بيختلف
نور : لا في الحته دي بالذات بقى فالشعور واحد لان الموضوع متعلق بالاحساس و الكرامه يا عمر
عمر : حقك عليا يا نور، انا غلطان، انا ٱسف لٱخر عمري بس سامحيني و اديني فرصه اعوضك عن كل اللي عملته
نور : خلاص يا عمر مبقاش عندي طاقه اسامح ولا بقى ليك عندي رصيد يخليني اديك فرصه… ايوه يا عمر انت رصيدك في قلبي خلص بقسوتك عليا واللي شوفته منك
عمر : طب عشان خاطر ابننا يا نور، عشان خاطر الحاجة اللي عيشنا سنين نحلم بيها من اول ما حبينا بعض
نور بدموع : انتهى.. انتهى الحلم خلاص و صحيت منه
عمر : نور….. *بيقاطعه صوت جرس الباب*
بيفتح الباب و بيقول بمفاجأة : ماما!.. اهلا يا حبيبتي ايه المفاجأة الحلوه دي اتفضلي
*مامته بتبص له ب لامبالاه و بتدخل من غير ما ترد عليه*
نور : اهلا يا ماما عامله ايه يا حبيبتي؟

 

 

 

 

بتقرب منها نهله مامت عمر و بتاخدها في حضنها و بدموع بتقول : انتي يا بنتي تتبهدلي كل البهدله دي بسبب ولادي؟ انا مكنتش اعرف حاجه من كل ده و لو كنت اعرف *بتبص لعمر بغضب* كنت اتبريت منه ليوم الدين
نور بتطبطب عليها و بتقول : طب اهدي بس يا ماما بالله عليكي عشان سكرك ما يعلاش ، اقعدي ارتاحي
نهله : ارتاح؟ وهي الراحه هتيجي ازاي بعد كل اللي عرفته و سمعته ده؟ انتي يا بنتي رزق من ربنا لينا و من يوم ما ابني اتجوزك بقيتي بنتي و زيك زي نيره يعني اللي يمسك بكلمه كإنه مسني انا، حتى لو كان… ابني للأسف
*عمر كل ده كان واقف يسمعها و مش بينطق*
نهله : قوليلي يا حبيبتي، ايه اللي يرضيكي و يريحك وانا هعمله غصب عن عين اي حد
نور بحزن : انا مش عايزه اي حاجه يا ماما غير اني اتطلق و اعيش عشان اربي اللي في بطني
نهله : بصي يا بنتي انتي ليكي كل الحق تقولي اكتر من كده و طلبك ده شئ طبيعي بعد كل اللي حصل، لكن يا بنتي انا مش طالبه حاجه من ربنا غير اني اشوفك معانا و في وسطنا و متبعديش عننا ابدا، انتي زي ما قولتلك بقيتي بنتي و مفيش ام تعرف تعيش من غير بنتها
نور : والله يا ماما كلامك ده على راسي، بس اللي بتطلبيه مني ده فوق طاقتي لاني مبقتش قادره اعمله، انا…….
*بتقاطعها نهله* كل اللي قولتيه و اللي هتقوليه انا فهماه كويس، بس انا دلوقتي بكلمك ك ام و جده هتتحرم من بنتها و حفيدها
نور : وانا يا ماما بكلمك ك واحده اتهان كرامتها و اتجرحت و اتخاض في شرفها… لو كان ده حصل مع نيره كان ايه هيكون رد فعلك ؟
نهله : رد فعلي كان هيبقى نفس اللي هعمله دلوقتي… *بتبص لعمر بقرف* و بتقوله : لا انت ابني ولا اعرفك ولا عايزه اشوف وشك و غضبانه عليك ليوم الدين لحد ما تراضي مراتك و ترد لها كرامتها و تصلح اللي عملته و لو هي مشيت اعتبرني ميته و هكون خصيمتك يوم القيامة*
نور و هي باصه في الارض : ماما…..
بتقاطعها نهله : متقوليش حاجه يا بنتي، انا قولت اللي عندي … انا ماشيه ولما يبقى ابني اللي انا ربيته يرجع ساعتها انا بيتي مفتوح ليه لكن غير كده مشوفش وشه
*بتخرج نهله من البيت وسط ذهول من نور و صمت من عمر*
نور بتكسر الصمت و بتقول بحده : بعد اللي مامتك قالته انا عايزه اقولك اني هفضل موجوده معاك و هنفضل متجوزين بس هنرجع لعلاقتنا في اول جوازنا يعني جوازنا هيكون صوري و بس و معنديش حاجه تانيه اقولها
*بتطلع نور اوضتها و يتسبب عمر قاعد غرقان في تفكيره و ندمه على اللي حصل و حزنه على موقف نور و والدته*
___________________________________________

 

 

 

 

*تاني يوم بيروح عمر شغله وبعدها بيتصل ب احمد*
احمد : ايه يا بيبي لحقت اوحشك؟
عمر : مش وقت ظُرف اهلك هو، تعالى عالكافيه عايزك
احمد : خلصانه نص ساعه و هكون عندك
*بيوصل احمد و عمر الكافيه*
احمد : ايه ياسطا حد ضايقك؟ حد داسلك على طرف؟ قولي و هاجي معاك ٱخدلك حقك
عمر : لا الموضوع جد يا احمد في حاجه مهمه عايز اتكلم معاك فيها
احمد : في ايه ياعم قلقتني، اتكلم
*بيحكي عمر لأحمد الموضوع كله*
احمد : شوف اللي امك عملته ده هو الحاجة الوحيده اللي منعتني من اني اقوم اديك بالبوكس في وشك
عمر : وقته يعني هو الكلام ده؟
احمد : اومال امتى وقته ان شاء الله
عمر : احمد انا بجد عايز حل انا دماغي هتنفجر من التفكير من امبارح
احمد : طب وانت ليه و ازاي متحكيش كل الكلام ده ليا من البدايه؟
عمر : كنت هحكيلك ايه؟ ان مراتي بتخونني؟ كان هيجيلي قلب و هقدر ٱجي على كرامتى و احكي حاجه زي دي عادي؟
احمد : ايوه عادي يمكن كنا ساعتها هنعرف نوصل للحقيقه، بس هو في حاجه غريبه في الموضوع
عمر : حاجة ايه؟
احمد : الشخص اللي بعتلك الصور و الرسايل على الواتس ده ليه مقالش هو مين و ليه قفل تليفونه بعد كده؟
عمر : ممكن يكون مش عايز يدخل نفسه في مشاكل او يعني…..
بيقاطعه احمد : عمر الشخص ده يعرف نور و يعرفك كويس والا كان جاب رقمك منين و عرف كل الكلام ده
عمر : ما اكيد يعني
احمد : طب و يا ترى طالما هو حد يعرفكم كويس و بيحبك و خايف على مصلحتك و شرفك كده ليه مراحش واجه نور وهي قاعده مع رامي؟ بلاش دي، ليه مجاش قالك وجها لوجه و وقف جنبك في مصيبه زي دي؟ اللي اعرفه ان الشخص الكويس فعلا ميسبش شخص بيحبه في شدته خصوصا وهو اللي مبلغ عنها و شايفها بنفسه
عمر : يعني انت عايز توصل لإيه؟
احمد : عايزك انت توصل للشخص اللي بلغك بالكلام ده عشان ده واضح جدا انه شخص بيكرهكم جدا و بيكره نور بالأخص و عايز يبعدكم عن بعض بأي طريقه، و اعتقد انك لما تكشف سر الشخص ده قدام نور و ترد لها كرامتها منه ده شئ هيحسن موقفك معاها جدا
عمر : طب وانا اقدر اوصل للشخص ده ازاي؟ ده ولا ليه اي بيانات على ال true caller ولا عارف اوصله
احمد : انت مسجل الرقم عندك على التليفون؟
عمر : ايوه
احمد : طب قوم معايا دلوقتي
عمر : هنروح فين؟
احمد : عندي واحد صاحبي هيجيبلك اسمه واحنا واقفين
عمر : طب يلا بينا
*بيخرجوا من الكافيه و بيوصلوا عند صاحب احمد*
احمد : عايزك تجيبلنا اسم و تفاصيل صاحب الرقم ده ضروري يا شريف
شريف : تمام 5 دقايق و هجيبلكم كل حاجه عنه، اقعدوا انتو استريحوا، تشربوا ايه؟
احمد : ياعم مش وقت شرب خلينا ف اللي احنا فيه ده
شريف : عيب عليك عشان صاحبك اول مره يجيلي
عمر : تسلم ربنا يخليك بس حقيقي مش هقدر و احنا كمان مستعجلين على البيانات دي
شريف : خلاص تمام دقايق و تكون معاكم

 

 

 

 

 

*بعد 5 دقايق بيكون جاب تفاصيل صاحب الرقم*
شريف : اسمع يا سيدي، الاسم : سمر عماد حمدي الغمري
عمر بذهول و هو مبرق : سمر؟!
احمد : سمر؟… سمر بنت خالتك؟
عمر : لا مش ممكن، لا يمكن تكون عملت كده
شريف : تحب اقولكم العنوان؟ هو عموما في……
بيقاطعه احمد : في المعادي؟
شريف : ايوه في المعادي في شارع……..
*بعد ما بيتأكد عمر انها سمر بيخرج من المكان بسرعه و بيخرج وراه احمد*
احمد : استنى يا عمر انت رايح فين؟
عمر : رايح اخلص حق نور و ارد كرامتها و كرامتي من بنت ال$#&* دي
احمد : طب اهدى عشان تعرف تاخد حقك و حقها صح
عمر : اهدى ايه ده انا لو اطول كنت اخنق*ها بإيدي
احمد : بس لازم يا عمر تعمل ده بهدوء عشان متجبش على نفسك اي غلط و كمان فكر هتواجهها ازاي
عمر : معاك حق، انا عارف انا هعمل ايه
___________________________________________
عمر : الو
نيره : الو
عمر : ايوه يا نيره بقولك ايه انا عايز اطلب منك حاجه
نيره : حاجة ايه؟
عمر : هقولك………

 

 

 

 

*في بيت عمر و نور بيرن جرس الباب*
نور بتفتح الباب : ايه ده ايه المفاجأة دي؟
نيره و هي بتحضنها : حبيبتى عامله ايه؟ و صحتك عامله ايه دلوقتي؟
نور : الحمدلله انا تمام، المهم طمنيني عليكي انتي يا نيره عملوا معاكي ايه في البيت عندك؟
نيره : معملوش حاجه ياستي متقلقيش، رامي مسابش الفرصه ليهم عشان يكلموني و اتصل حدد ميعاد مع ماما و بابا و هييجي ٱخر الاسبوع يتقدم بإذن الله
نور بفرحه : بتهزري! انتي بتتكلمي جد؟
نيره : هههههه اه والله ياستي الحمدلله العقده اتحلت
نور : الف الف مبروك يا حبيبتي والله العظيم فرحتلك جدا، ربنا يتمملكم على خير و يسعدكم يا رب
نيره : تسلميلي يا رب يا حبيبتي، المهم طمنيني عمر عامل معاكي ايه؟
نور بحزن : عمر خلاص مبقاش عندي اكتر من انه ابو اللي في بطني و بس يا نيره
نيره : لا يا نور متقوليش كده ارجوكي، انتي متعرفيش عمر بيحبك ادد ايه، صدقيني والله كل اللي صدر عنه ده كان بدافع حبه ليكي و غيرته عليكي
نور : مفيش حد بيحب بيعمل كده في اللي بيحبه يا نيره
نيره : والله يا نور هو كان بيموت من اللي بيعمله ده لكن الشعور اللي كان جواه كان مخليه زي المجنون
نور : و لو يا نيره ده مش هيخليني اقدر اغفر اللي عمله فيا و شوفته معاه
نيره : طب لو قولتلك انه باعتني النهارده عشان اجهز البيت لحفله هو عاملها ليكي و عازم فيها العيله و اصحابكم
نور : نعم! حفلة ايه؟ هو جنان يعني؟
نيره : يا ستي اعتبريها جنان بس اهي فرصه حلوه عشان تقعدى مع الناس اللي بتحبك و يمكن ده يغير حاجه
نور : مفيش حاجه هتتغير يا نيره زي ما قولتلك
نيره : طب يا ستي اعتبريها عزومه و خلاص، المهم اطلعي انتي بس غيري هدومك على ما اظبط انا البيت و اجهز للناس اللي جايه حاجه يشربوها
نور بقلة حيله : ماشي يا نيره
*بعد حوالي ساعه بتوصل نهلة مامت عمر و معاها خالته و سمر بنتها و بعدهم بيوصل مالك و معاه احمد و ٱيه*
نور : منورين والله يا جماعه
نهله : نورك يا حبيبتي يا رب تكوني بخير
نور : اه الحمدلله يا ماما

 

 

 

 

خالة عمر : ابقي خلي بالك بقى على نفسك يا نور عشان اللي في بطنك يا بنتي، انا والله كنت خايفه عليكي جدا لما عرفت ب اللي حصلك في العزبه
نور : الحمدلله يا طنط جت سليمه
نهله : اومال فين عمر؟
نور : ها.. زمانه جاي هو بس خرج في مشوار
سمر : مشوار؟ هو في حد يعزم الناس عنده و يروح مشوار؟
نور بإبتسامه صفرا : متقلقيش كده يا سمر هو اكيد زمانه جاي
سمر : لا يا حبيبتي مش قلقانه بس اصل يعني هو قال انه عازمنا على حفله و احنا مش شايفينه ولا شايفين اي حفلات
– لا ازاي، ده الحفله النهارده صباحي و على شرفك كمان يا سموره
سمر : عمر! احم ايه ده انت جيت امتى؟ ده احنا كنا هنمشي يا راجل
عمر بإبتسامه : تؤ تؤ تمشوا ايه بس يا شيخه و انا بردو يهون عليا تمشوا قبل ما امسي و اصبح كمان عليكي يا بنت خالتي
سمر بضحكه مستفزه : اصيل يا ابن خالتي
عمر و ابتسامته ابتدت تتلاشى : بس انتي مش اصيله يا سمر
سمر وهي عاقده حواجبها : ايه؟
عمر : زي ما سمعتي، انتي اكتر واحده ناقصه شوفتها في حياتي
خالة عمر : ايه ده؟ ايه اللي انت بتقوله ده يا عمر انت اتجننت ولا ايه؟
عمر : لا يا خالتو متجننتش ، للأسف دي الحقيقه… الٱنسه سمر بنتك المحترمه اللي كنت بعاملها زيها زي نيره اختي كانت هتخرب بيتي و تخسرني مراتي و ابني
نهله : انت بتقول ايه يا عمر؟ انا مش فاهمه حاجه
عمر : انا هفهمك يا ماما و هفهمكوا كلكوا *بيحكي عمر الموضوع كله ليهم*
نور بصدمه : انا مش مصدقه
عمر : لا صدقي يا نور صدقي
خالة عمر بتمسك سمر اللي كانت بتعيط من شعرها و بتنزل فيها ضر*ب و هي بتش*تمها
*و بعد ما عمر و مامته بيخلصوها من ايدها*
عمر : اللي بتعمليه ده مش هيحل و لا هيغير حاجه يا خالتو، صدقيني هي كل اللي محتاجاه انك تفهميها ان الشر ٱخرته وحشه على صاحبه و ان الحقد ده اسوء صفه ممكن يتصف بيها انسان خصوصا لو كانت تجاه اقرب الناس له، و كمان عرفيها ان اللي بيعمل حاجه النهارده الدنيا بكره تلف و نفس الحاجة دي تترد له

 

 

 

 

*بتحرك خالته راسها بحزن بالموافقة و بتشد سمر من ايدها و بتاخدها و تخرج من البيت*
مالك و الذهول مالي وشه : انا حاسس ان انا بتفرج على فيلم سيدة القصر بتاع فاتن حمامه
نهله : طول عمري بلوم على ولادي عشان بيبعدوا عن بنت خالتهم و بيقولوا عليها بتغير منهم ومش بتحبهم و كنت بقول ده لعب عيال بس عمري ما كنت اصدق انها تكون بالسواد و الغل ده
نيره : شوفتي عشان تبقي تصدقي كلامي، والله العظيم انا مفيش حد عارف قيمتي ف العيله دي
نهله بخجل و هي بتبص لنور : حقك عليا يا نور، انا مكنتش اتخيل ابدا ان كل اللي انتي شوفتيه ده هيطلع بسبب بنت اختي والله يا بنتي
نور : متقوليش كده يا ماما، انا عارفه والله من الاول ان سمر بتكرهني بس… بس مكنتش متخيله ان الموضوع ممكن يوصل انها تعمل فيا كده، عموما ربنا يسامحها
عمر بحزن : وانا قدامكم كلكم عايز اقول اني ٱسف من هنا لحد ٱخر عمري يا نور، واني لو قعدت اعتذرلك من هنا لحد ما اموت يمكن ده مش هيكون كفايه، بس انا املي انك تسامحيني و تديني فرصه
نور بعد ما بتبص لكل الموجودين بتبص ل عمر و بتقول : انا ٱسفه بس انا مش…. *بتصرخ بصوت عالي* ااااااه
عمر ب ذعر : في ايه مالك
نور : انا بوولد….

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية لن أعشق سواك)