رواية تشابك أرواح الفصل الخامس 5 بقلم هبة الله أحمد

رواية تشابك أرواح الفصل الخامس 5 بقلم هبة الله أحمد

رواية تشابك أرواح البارت الخامس

رواية تشابك أرواح الجزء الخامس

رواية تشابك أرواح الحلقة الخامسة

بعد اللي حصل دا كله كان لازم اقوم واسيبه يفكر مع نفسه في اللي عمله
اعصابي كانت علي اخرها .. قومت وطلعت علي الاوضه كانت سلمي نامت .. حاولت انام انا كمان بس معرفتش دماغي كان فيها مليون حاجه وخايفه افتح الفيسبوك اشوف الخبر وصل لحد فين.. فضلت اتقلب ع السرير لحد ماالنهار طلع وموبايلي رن
فتحت عيني اشوف مين كان اسم مستر غيث .. فتحت الموبايل بسرعه بس متكلمتش .. هو اللي اتكلم بعد كام ثانيه وقال
_ هستناكي في المطعم
_ تمام يامستر غيث جايه
قفلت المكالمه قبل مااسمع منه اي حاجه تانيه وقومت غيرت هدومي ونزلت
كان قاعد مستنيني وماسك الموبايل
_خير يامستر غيث حضرتك عايزني في ايه
_ طب ياشيخه قولي حتي صباح الخير
_ ياريت تقولي عايزني في ايه بسرعه عشان عايزه اقوم ورايا حاجات لازم اعملها قبل مااسافر
_ رحمه الخبر نزل علي كل المواقع والناس كلها عرفت .. انا حقيقي مش هعرف اعمل حاجه في الموضوع دا
_ يعني ايه ياغيث الكلام دا فهمني
_ يعني هنتخطب
_ يعني ايه هنتخطب
_ يعني هنتخطب يارحمه .. الصحفيين كلهم هتلاقيهم هنا كمان شويه .. تفتكري هنعمل ايه .. عايزاني اقولهم اني كنت بعمل كده عشان حمزه بيضايقك .. تمام معنديش مشكله
_ لا يامستر غيث حمزه ايه احنا اكيد مش هنجيب سيرته
_ خلاص يبقي تسمعي كلامي
_عايزني اعمل ايه
_ ولا حاجه احنا هنأكد اننا فعلا مخطوبين قصدي هنتخطب يعني فتره صغيره وبعدين نقول اننا فسخنا الخطوبه لأي سبب .. وقبل ماتقولي اي حاجه صدقيني هو دا الحل الوحيد عشان اهلك وكمان اهلي منبقاش في موقف وحش قدامهم .. يعني انتي هتبلغي اهلك اني عايز اجي اتقدملك وهنمشي الخطوات كلها عادي خالص وطبيعي .. بس كل دا لازم يحصل بسرعه
اتنهدت بعصبيه وقولت

_ امري لله لما نشوف اخرتها ماهو اصل انا اخلص من حمزه تطلعي انت
_ بتقولي حاجه يارحمه
_ لا مبقولش
_ طيب احنا هنرجع النهارده ان شاء الله سوا صح
_ احنا هنرجع اه بس مش سوا مفيش سوا دي .. انا زي ماجيت هرجع
_ خلاص براحتك .. بس ياريت اول ماترجعي تفاتحي والدك في الموضوع
عيني دمعت وقولتله بصوت مهزوز
_ انا والدي متوفي من فتره وكمان والدتي متوفيه من قريب ربنا يرحمهم
اتنحنح وحط ايده علي شعره وقال
_ انا اسف يارحمه مكنتش اعرف والله
_ لا ولا يهمك
_ طيب انا لو حابب اطلب ايدك اروح لمين
_ عمي موجود.. بس هو مش هنا .. هو في قنا .. عمدة قرية صغيره كده في قنا
_يعني انتي طلعتي صعيديه ياست رحمه .. وانا بقولك دماغك ناشفه كده ليه .. خلاص ياستي انتي ممكن تديني رقمه وانا هكلمه واتفق معاه
_ لا مش هينفع .. خليني اكلمه انا الاول وهحددلك معاه ميعاد واقولك
_ خلاص ماشي بس متتأخريش عليا .. متأكده انك مش عايزه ترجعي معايا
_ لا انا هرجع زي ماجيت اتفضل انت متقلقش عليا
_ تمام ماشي يارحمه بس ياريت تخلي بالك وتمشي من هنا بسرعه عشان الصحافه وكده
_ خلاص انا هقوم الم حاجتي
قومت وطلعت الاوضه صحيت سلمي وحكتلها اللي حصل كله
_ علي فكره بقي هو عنده حق والحل الوحيد انكو تتخطبو .. مش بس عشان الناس واللي حصل في الحفله يارحمه .. لا دا كمان عشان حمزه يبعد عنك خالص .. ولا انتي بقي لسه بتفكري فيه
_ صدقيني ياسلمي انا خلاص اكتشفت اني كنت مغفله ومخدوعه فيه وحقيقي مش عايزه افتكره تاني ممكن بقي نقفل ع السيره دي خالص .. وقومي يلا خلينا ننزل نلف شويه قبل مانرجع البيت .. ياعالم هنعرف نيجي هنا تاني امتي
_ اخيرا هننزل دانا افتكرتك هترجعيني قبل مانودع البحر بصي هقوم البس في ثواني
نزلنا قعدنا ع البحر وفطرنا ولفينا واشترينا كذا حاجه ورجعنا اخدنا شنطنا عشان نمشي
_ يلا هاتي الشنط ياسلمي وانا هنزل اسلم المفاتيح وادفع الحساب
ماشي هستناكي ع الباب

_ عايزه اسلم المفتاح وادفع حساب الغرفه لو سمحتي
_ بس يافندم مستر غيث خلص كل الحساب وقال انكو تبع الشركه
_ يعني ايه تبع الشركه هما اللي تبع الشركه مبيحاسبوش
_ لا اكيد بيدفعو نسبه معينه
_ طيب انا بقي عايزه ادفع زي زيهم
_ يافندم حضرتك كده هتعمليلي مشكله .. مستر غيث خلص كل حاجه قبل مايمشي من شويه.. حضرتك ممكن تكلميه تفهمي منه اكتر لكن انا مفيش قدامي اي حساب للغرفه
سيبتها ومشيت من غير مااتكلم معاها اكتر من كده وطلعت لسلمي
_ شوفتي عمل ايه
_ هو مين وعمل ايه
_ غيث دفع الحساب
_ طب وهو يعمل كده ليه
_ معرفش .. البنت اللي في الرسيبشن حتي مرضيتش تقولي الحساب كان كام
_ خلاص اصبري بس لما نرجع ونبقي نتكلم معاه
_ طب يلا خلينا نمشي من هنا احسن انا زهقت
بعد كام ساعه رجعنا البيت واصريت علي سلمي تيجي تبات معايا
_ خلي بالك انا امي لو عرفت اني رجعت هنا ومروحتش البيت هتعمل مني شاورما
_ ياسلمي بقي خليكي معايا النهارده بس .. انا كده كده شكلي لازم اسافر قنا بكره
_ ليه يارحمه
_ عشان لازم غيث يطلب ايدي من حد من اهلي .. وانا ماليش حد هنا .. وكبيري هو عمي … لازم اسافرله وربنا يستر بقي
_ يستر علي ايه .. هو ممكن ميوافقش بغيث
_ انتي مش فاهمه حاجه .. انا ابويا لما جه بينا هنا من 15 سنه كان جاي هربان من عمي ومشاكله .. عمي صعيدي درجه اولي غير بابا خالص .. أفكاره وعاداته غيرنا .. بابا مكانش مرتاح خالص هناك فساب كل حاجه وجه هنا .. ومن يومها وعمي مقاطعنا تقريبا.. بس بابا كان دايما بيتصل بيه ويطمن عليه لحد مابابا اتوفي وجالي يطلب مني ارجع معاه البلد انا وامي بس انا رفضت ويومها قالي اعتبريني موت زي ابوكي وانو عمره ماهيقبل ان حد من اهل بيته يقعد لوحده والكلام دا
لدجة انو ميعرفش ان امي ماتت

_ ليكي حق تخافي يارحمه دا الموضوع طلع كبير
_ هو كبير فعلا .. ربنا يستر ويحنن قلبه عليا
قضينا باقي اليوم في الكلام والرغي ونمت وانا مقرره اني هسافر لعمي الصبح
اخدت شنطة هدومي اللي مكنتش لسه فضيتها ومشيت انا وسلمي .. هي راحت علي بيتها وانا طلعت علي محطة القطر عشان اروح قنا عند عمي
وبعد وقت كبير وصلت لقنا ونزلت من المحطه وبدأت اسأل ازاي اروح القريه اللي فيها بيت عمي ولما وصلت هناك بدأت اسأل عن بيت العمده حكم منصور الزفتاوي
مكنش صعب عليا اني اوصل لبيت عمي قد ماكان صعب عليا الموقف انا وقفت قدام البيت وكنت خايفه ادخل .. فكرة اني ممكن وجودي ميبقاش محبب بالنسبه لعمي دي كانت حاجه قلقاني .. طب ياتري هو هيقدر انا جايه ليه ولا مش هيعمل لصلة الرحم حساب
قطع تفكيري صوت الغفير اللي قالي
_ شكلك غريبه عن هنا ياست .. انتي عايزه العمده في حاجه
_ ايوه انا غريبه وجايه للعمده .. ممكن تبلغه ان في حد عايزه
_ اقوله مين ياست
_ قوله واحده غريبه عن البلد
اخدني الغفير قعدني في اوضه بعيده عن البيت شويه يعني تعتبر اوضه خارجيه في الجنينه عشان استني عمي العمده لحد ماسمعت صوت عكازه بيخبط في الارض وكحته قبل مايدخل الاوضه .. شعور تلقائي مني لقيت جسمي بيتنفض وبقوم اقف
_ سلام عليكم قالولي انك عايزاني يابنتي خير
دخل عمي وقال الكلمتين دول قبل حتي مايبصلي
بس مجرد مارفعت وشي وبدأت اتكلم تعابير وشه اتغيرت لدرجة اني مبقتش فهماها
_ وعليكم السلام ياعمي .. اخبار حضرتك ايه
_ غريبه رحمه هانم بنفسها جايه الصعيد .. مش غريبه دي شويه
_ لا مش غريبه ياعمي انا جايه بيت عمي وبيت ابويا وجدي ولا انا بقول حاجه غلط
_ لا بس انا اتحايلت عليكي زمان تيجي وانتي رفضتي

_ مكانش ينفع ياعمي اسيب تعليمي وحياتي وامرمط امي معايا لحد هنا صدقني مكانش ينفع
_ وايه اللي خلاه ينفع بقي دلوقتي .. ايه مصاريفك كترت عليكي وامك مبقتش قادره تصرف عليكي فبعتاكي هنا
_ ماما الله يرحمها كانت مكفياني وزياده ياعمي
_ يعني امك وربنا افتكرها كمان اهو امال بقي ايه اللي مقعدك هناك لحد دلوقتي مش خلصتي تعليم برده
_ ايوه ياعمي خلصت تعليم .. وكمان بشتغل دلوقتي وبقدر اصرف علي نفسي دا غير معاش بابا الله يرحمه .. انا مش محتاجه من حضرتك حاجه
_ امال جايه ليه يابنت حسن
_ انا متقدملي عريس وعايزه حضرتك تقعد معاه
تعابير وشه كلها اتحولت لغضب وقال
_ عريس ايه وزفت ايه دا اكيد طمعان فيكي وفي ورث ابوكي .. متحلميش يارحمه اني هديكي حاجه من ورث ابوكي عشان تروحي تصرفيهم علي عيل صايع .. واذا كان ع الجواز ف منتصر ابني موجود .. ساعتها بس اقدر اديكي حقك في ورث ابوكي
_ يعني ايه الكلام دا يعمي .. منتصر دا زي اخويا .. وبعدين انا مطلبتش من حضرتك ورث انا كل اللي بطلبه انك تقعد مع الشخص اللي متقدملي .. ولا انت عايزه يقول ان ماليش اهل
_ لو اتجوزتي حد غير منتصر ابني يارحمه يابنت حسن اعتبري نفسك مالكيش اهل فعلا ……

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية تشابك أرواح)