روايات

رواية ميراث نور الفصل التاسع والثلاثون 39 بقلم لينا بسيوني

رواية ميراث نور الفصل التاسع والثلاثون 39 بقلم لينا بسيوني

رواية ميراث نور البارت التاسع والثلاثون

رواية ميراث نور الجزء التاسع والثلاثون

رواية ميراث نور الحلقة التاسعة والثلاثون

” جزيرة الافاعى ”
مارو قرب عليا وهو مبتسم وقالى :
– مش قولتلك هيعترف بكل حاجة … جاهز تعرف اللى قاله العفريت يابويا .. علشان الموضوع طلع صعب شوية !!!
قلتله :
– صعب أزاى !!؟
قالى :
عدوتنا فى قلعة محصنة ملهاش مدخل ولا بوابة ارتفاعها واصل السحاب, جدرانها من الجرانيت السميك , ومفيش أى تضاريس أو جبال حواليها , فى مكان مهجور فى عالم الانس والجن مكان بيسموه جزيرة الأفاعى!!!
القلعة هيبقى صعب تسلقها لان عليها حراسة شديدة .
تحت القلعة, جيش كامل من الشياطين مجهز بالاسلحة والدروع .
بجانب كائنات العزيف , ودول محتاجين نتغلب عليهم الاول علشان نعرف نتسلق القلعة واللى متقسمة طوابق .. كل طابق فيه كتيبة من الشياطين واللى جاهزين يرموا الحجارة والنار على أى حد هيتسلق القلعة .
طبعا الطابق الاخير متقفل تماما ومفهوش حتى فتحه واحد , وده الطابق اللى قاعدة فيه عدوتنا .
أبن القاف قال :
– كده يبقى الموضوع شبه مستحيل !!
نصير قال :
– يابنت القرود!!
قولتلهم :
– ولا يفرق معانا .. أحنا هنهجم برضة !!
حنوش قال :
– بس ده هيبقى أنتحار !!
قولتله :
– أحنا تقريبا كده كده ميتين , سواء هاجمتنا أو هاجمناها ..
أبن القاف قال :
– انا مع نور .. على الاقل هبقى مت وانا بحاول أقضى على الشر مش وانا بدافع عن نفسى ..
مارو مكنش مركز معانا وقال وهو بيبص على أسلحة الكهربا :
– هى دى بقى أسلحة الكهربا ؟!!
قولتله :
– أها.
وروحت جبت سلاح من الاسلحة وقلت :
– ده قوس ودى أسهم .. وتر القوس بيشحن السهم.
لما بتحط السهم فى القوس وتشد وتر القوس … السهم بيتشحن بشحنة كهربائية عاليه , الشحنه اللى فيه كفيلة تقتل عشرة افيال ، يعنى سهمك لو صاب الشيطان فى أى حته فى جسمه هيقتله .
أديت مارو القوس و أنا بقوله :
– ماتنساش تمسك السهم من القاعدة الخشبية اللى ورا
وناولته درع , و قولتله :
– ده درع مصنوع من المطاط المتين مضاد للحرارة علشان مايوصلش الكهرباء .
شاورلى على سيف , فقولت:
– نفس الفكرة شحنه كهربائية عالية وبتقتل أى شيطان يصيبه ..
قطعت كلامى لما لاقيته ماسك قنبلة كهربائية وبيقولى وهو بيحاول يفتحها:
– وأيه البتاعة اللى عامله زى الطبق دى؟ !!
جريت بسرعة خطفتها من أيده وانا بقوله :
– يخربيتك ده مش طبق رز بلبن … دى قنبلة بتطلق موجات كهربائية مداها كبير جدا ودى أخر حاجه هنلجألها .. زى حزام ناسف كده .
نصير قال :
– هو أحنا هنهاجم من غير خطة!!
قولتله :
– تقريبا كده , هنسيبها على الله .. أهم حاجه توزع الاسلحة على الجن اللى معانا !!
مارو قال :
– تقريبا أنا عندى خطة , ممكن نتغلب بيها على الشياطين اللى فى طوابق القلعة .
قولناله بصوت واحد :
– خطة أيه !!
قال :
نبنى برج موازى أعلى من قلعتها , وأقف عليه وأصطادهم من بعيد .
حنوش قاله :
– وأحنا المفروض نروح نقولها أزيك يانيللى ممكن تسمحلنا نبنى برج جنبك علشان نعرف نقتحم قلعتك !!! بنقولك الحرب خلاص ساعات وهتقوم وأنت بتقول نبنى برج كامل جنبها !!!
مارو قال لحنوش :
– اولا انا قلت برج موازى ليها مش جنبها , كما أن البرج اللى هنبنيه ده مش هنبنيه من الطوب أو الحجر , ده هيبقى مصنوع من الخشب برج صغير بس طويل جدا وده أقدر ابنيه لوحدى فى ساعه واحدة لو محدش ساعدنى , هيبقى عبارة عن قطع خشب بتتفك وتتركب فى بعضها عاشق ومعشوق ,هنركبها فى اى مكان بعيد عن القلعة .
هصعد فوق البرج وأصيد الشياطين اللى فى طوابق القلعة بالقوس وبعد كده هرشق سهم خطاف فى أخره حبل وأطلقه فى جدار القلعة … وأمسك فى الحبل واتمطوح بيه لحد ما أوصل للقلعة ومن هناك هرميلكم الحبال اللى هتتسلقوا بيها القلعة .
الصمت عم المكان وبصينا لمارو واحنا بنفكر فى فكرته وبنحاول نستوعبها.
حنوش قاله :
– طيب ليه اللفة الطويله دى , ماتركب على ضهر أبوك وهو تنين وتصيدهم براحتك من فوق السحاب ؟!!
مارو فرح زى الاطفال وقال :
– حلوه ياعمو حنوش !! أنا نفسى من زمان أركب على ضهر تنين وهو طاير .
نصير دخل فى الحوار وقال :
– لا ياحبيبى منك له ماحدش هيركب نينو غيرى , لامؤاخده يانينو , أحنا الاتنين دويتو فى الحرب وبنكمل بعض , وكمان أحنا عايزين نستغل البغل فى حاجه جديده , لامؤاخذه يامارو .
مارو قال :
– ماليش دعوه انا اللى هركب أبويا , لامؤاخدة يابابا …أنا أولى بيه …انا من لحمه … انا حلم حياتى أركب فوق ضهر التنين وهو طاير !!
نصير بص لحنوش وقاله :
– منك لله شبطت الواد , أبقى حاسب على كلامك مايغركش جسمه , لسه عقله عقل طفل .
وبص على مارو وقاله :
– يامارو ياحبيبى مش أنت بتعرف تطير اصلا !!
مارو قاله :
– أنا بعرف أطير , بس عمرى ماهوصل لارتفاع اللى بيوصل له التنين ..من الاخر محدش هيركب أبويا غيرى .
قولتلهم وانا بزعق فيهم :
– في ايه يابتاع منك له .. هنسيب الحرب ونقعد نتخانق على اللى يركبنى هو أنا حمار يا حمار منك له !!
أحنا هنمشى على خطة مارو بتاعت البرج الخشب , ومحدش هيركب فوق ضهرى غير نصير .
نصير قال وهو بيطبطب على ضهرى :
– أصيل يانينو !!!
كملت كلامى وقلت :
– أحنا هنهجم من الارض الأول بأسلحة الكهربا وأن شاء الله لو أنتصرنا مارو يجرى على البرج ويعمل اللى قال عليه ونتسلق القلعة بالحبال .
بصيت لنصير وقلتله :
– وزع الاسلحة والدروع على كل الجن اللى معانا …
وبصيت على كل اللى واقفين وقلت :
– بسرعة يلا هنبنى البرج مع مارو .
بنينا البرج وأتنقلنا كلنا لجزيرة الأفعى اللى فى البرازيل .
نقلنا البرج وهو متفكك للجزيرة وسيبناه على الشط .
اتمركزنا فى حتة بعيدة عن قلعة نيللى علشان ماترصدناش هيا والجن بتوعها , أول ما حطينا رجلنا على الجزيرة أتفاجئنا ان جزيرة الأفاعى كلها أفاعى حرفيا!!
الأفاعى والثعابين مغطية الجزيرة , تحت رجلينا وفوق كل الشجر وبأعداد مهولة !!
ابن القاف قالنا وهو بيرجع لورا :
– هى اسم على مسمى ولا ايه … ايه كميه الافاعى دى ؟!! هنعدى أزاى ؟!!
قولتله :
– عيب عليك يا أبن القاف لما تسأل السؤال ده , ده أنت اللى معلمنى السلسلة الغذائية!!! خليكوا ورايا .
لفيت بالقميص بسرعة وانا بفكر فى حيوان النمس!!
النمس مرعب الافاعى !!
بيقدر يصطاد الافاعى الكبيرة والسامة ,فروته السميكة ما بتنفدش فيها انياب الافاعى,جسمه بينتج بروتين سكرى بيحصنه ضد السم ويقدر بفكه القوى يقتل كوبرا فى ثوانى !!.
الافاعى أول ماشافت النمس فيه جزء كبير منهم هرب وأتفضل جزء صغير حاول يهجم عليا , قتلت تقريبا كل اللى مهربوش لجحورهم وفضيت السكة .
مارو كان فرحان اوى لما شافنى بتحول لنمس وبرجع تانى بنى ادم !! وقال :
– الله يا ابويا … ايه الحلاوة دى .. على فكرة انا عارف تعزيمة بتبعد الافاعى , بس حبيت اشوفك هتعمل ايه يا نمس !!!
حنوش قال بصوت عالى :
– ألحق يانينو ده مفكرنا رايحين رحلة مش حرب !!
قولتلهم بصوت واطى :
– هشششش عايزين نتحرك بهدوء عشان نفاجأهم بالهج…
قطعت كلامى لما اتفاجئت بجيش الشياطين قدمنا , اتفاجئوا بينا زى ما أتفاجئنا بيهم .
تقريبا كانوا رايحين يهجموا علينا فى نفس الوقت اللى كنا جايين نهجم عليهم فيه !!
فى ثانية الحرب بقت على المكشوف ..
مارو اختفى من وسطنا وبقى فى وسط جيش الشياطين وطاح فيهم .
ابن القاف اتحول لذئب وانضم لمارو وانا لفيت بالقميص واتحولت تنين .
نصير نط فوقى وطيرت فوق جيوش الشياطين وانا بنفث النار عليهم من فوق , وبفرقهم عن بعض بدواير النار .
كنت بحصرهم فى دواير النار زى ماعملت قبل كده , الفرق ان اللى كان بينط فى الدواير المره دى ويخلص على الشياطين اللى فيها ..مارو…
واللى كنت مش ملاحقه، كان بيفضى الدواير قبل حتى ما اقفلها , كان بيشاورلى وهو بيقتل فى الشياطين وبيقولى :
– كبر الدايره شوية يا والدى.
جيشنا بقيادة حنوش وابن القاف كان مكتسح جيش نيللى على الارض بفضل الاقواس والسيوف الكهربائيه .
جيش الشياطين والعفاريت اتفاجأ بالأسلحة الفتاكة اللى معانا واللى كانت بتحولهم لرماد من صاعقة واحدة .
بدأوا يتراجعوا من الذهول والخوف و اتقهقروا لورا ، جيشنا اتحمس اكتر وفضلوا يتوغلوا بالاسلحة الكهربائية وسط الشياطين والموضوع مشى افضل مما توقعنا.
وسط زحمة الشياطين وتكاترهم اجسامهم كانت ملامسه لبعض فكان اى شيطان بيتكهرب بيكهرب اللى حواليه ويتصعقوا معاه دا غيران الدروع المعدنية اللى لابسينها تعتبر موصل جيد للكهربا .
اما جيشنا فمكنش متأثر تماما بالكهربا بفضل الدروع المطاطيه اللى كانوا لابسينها.
حنوش واللى معاه اجتاحوا جيش الشياطين.
لحد ما أتفاجئنا بكائنات ضخمه بتخرج من الارض .
كائنات عزيف باعداد كبيرة جدا شبه الاخطبوط او العناكب ليها اطراف كتيرة و3 رؤوس .
هنا بدء مارو هوايته المفضله .
صيد الحيوانات ..
مارو اول ما شاف الحيوانات فرح اوى وجرى نحيتهم , فهبطت وطيرت على مستوى منخفض جنبه وهو بيجرى وقلت لنصير :
– قول للاهبل دا يرجع !!! دا بيجرى عليهم !!
اتفاجأت بمارو بيبص عليا وهو بيجرى و بيقولى :
– انا سامعك يا والدى متخافش مش هقتلهم كلهم هحتفظ بواحد احطه فى قفص فى الكوخ بتاعى .
قلتله :
– يا بغل انا مش خايف عليهم .. انا خايف عليك انت !!
قالى قبل ما يختفى:
– حنان الاب .
طيرت على مستوى اعلى واندهشنا انا نصير لما شفناه ظهر وسط كائنات العزيف وطايح فيهم بالسيف والقوس
كانوا بيهربوا منه وكان بيجرى وراهم ويصيبهم بأسهم الكهربا , واللى بيحصله بيشقه نصين بالسيف !!
حنوش والجيش اللى معاه كانوا بيبصوا بأندهاش على مارو اللى طايح فى كائنات العزيف مارو كان تقريبا قايم بنص الحرب لوحده !!! ان مكنش كلها!!
مارو خلص على كيانات العزيف كلها ووقف مضايق .
نزلت على الارض انا ونصير و رجعت بنى ادم , قربنا عليه وقلناله :
– انت كويس يا مارو ؟!
قالنا وهو زعلان :
– كنت فاكرهم اكتر من كدا ماتوا كلهم منى .. ملحقتش احتفظ بواحد ..!!
نصير قالى وهو بيبص على مارو :
– فردوس الجنيه دى احسن حاجة حصلت فى حياتك يانينو !!!
قلت لمارو :
– بسرعة يا مارو خد حنوش وروحوا ركبوا برج الخشب وانا ونصير هناخد الجيش ونطلع على القلعه وهنستناك تنزلنا الحبال .
اختفى مارو و اتقدمنا بالجيش واحنا بنحارب بواقى الشياطين اللى فاضلين من المعركة لحد ما وصلنا تحت القلعة بالضبط , الشياطين اللى فى طوابق القلعة بدأوا يحدفوا علينا كتل حجارة ونار!!
ظهر حنوش وجنبه مارو، وقالنا وهو مش على بعضه :
– مصيبة … البرج الخشب اختفى !!!

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية ميراث نور)

اترك رد