رواية تزوجت ملاكمه الفصل الثاني 2 بقلم مروة ماجد

رواية تزوجت ملاكمه الفصل الثاني 2 بقلم مروة ماجد

رواية تزوجت ملاكمه البارت الثاني

رواية تزوجت ملاكمه الجزء الثاني

رواية تزوجت ملاكمه الحلقة الثانية

وفجأه هدى هانم بتقع على الأرض من ضربه جامده اوى فى ام مناخيرها من ايد الكوتش نرمين ، وطبعا اسر واقف فرحان اوى ومنشكح اخر انشكاح ومتسالنيش يعنى يايه منشكح علشان اقسم بالله ما عارفه
هدى مش مصدقه اللى بيحصل ، والمصيبه ان نرمين بصت لأسر وقالت
هى فين اوضتى ولا هنتجوز هنا فى الصاله؟
ها لا اتفضلى الاوض كلها فوق اختارى الاوضه اللى تعجبك
طيب قول للشغالة عاوزة اتعشى، وعلى فكرة انا باتعشى كيلو االا ربع لحمه وطبق سلطه خضرا اوعى تزود فى اللحمه علشان الرجيم
اسر بيبرق وفاتح بوقه وبيقول
ايه بتتعشى كيلو الا ربع وجايه على نفسك كدة ليه امال بتتغدى ايه؟
نرمين بتلاقاءيه بتقول

ايه يا اسر يا حبيبى انت هاتقر عليا ولا ايه ، انت مش عارف انى باعمل مجهود جامد اوى فى التدريب وطول اليوم اشيل واحط فى الحديد ولازم اتغذى، شوفى يا ماما اااا ،
وبشوف واطى بتهمس لأسر وبتقول
الا قولى هى امك اسمها ايه؟
اسر مش طايق ليها كلمه وبيقول
اسمها مامتك ، والمفروض انك تقوليها يا ماما ،اسمها دولت هانم
نرمين قالت
تمام
بصى يا خالتى ام اسر انا جعانه واسورة حبيب قلبى مستخسر فيا الاكل
ام اسر بتبص حواليها وبتقول
خالتى ام اسر مين ؟
اه دة انا ، معلش يا حبيبتى اصل محدش قالى كدة قبل كدة ، بس انتى عادى تقولى اللى يعجبك دة انتى مرات الغالى وتقولى اللى يعجبك، تحبى يا قلب ماما دولت تتعشى ايه، اكيد بنوتى الحلوة بتتعشى عشا خفيف علشان تحافظ على جسمها اللى زى المنيكان دة
نرمين بتلوى بؤقها وحاسه بمياصه ام اسر وبتقول
بالضبط يا خالتى ام اسر انا باتعشى كيلو الا ربع لحمه وسلطه خضرا
الست بنفس الذهول بتاع ابنها بتقول
نعم ؟

أيوة زى ما باقولك كدة يلا حركى الجته ونادى الحته اللى واقفه فى المطبخ دى وقوليلها طلعى العشا لستك نرمين
وطلعت نرمين تتمشى وهى بتكلم فى نفسها وبتقول، والله ولايق عليكى العز يا بت يا نيرمو، بقى ولاد القرعه دول عايشين فى كل البيت دة ، وانا وامى عايشين فى ٣٠ متر ، امه بتكنس البيت ده كله ازاى ، يلا كلها شهر وامشى واسيبه خلينى اتمتع
وطلعت نرمين ومن وراها اسر اللى كان مبسوط منها اوى انها ضربت هدى وقال
نرمين ، انا مبسوط منك اوى، ايه يا بنتى دة انتى طلعتى جامده موت
ايه ايه يا اخ بتقول نرمين عادى كدة ليه ، اسمى كابتن نرمين ولا ايه ، خلى بالك انا احب الحدود ما بينا انت حيالله روحت ولا جيت جوزى على الورق وبس
خلاص خلاص ، اعملى حسابك تلبسى لبس احلى من دة شويه انا بكرة هاعمل حفله كبيرة اوى واعرف كل الناس انى اتجوزت بصراحه عاوز اكسر مناخير هدى باى طريقه
نرمين باستغراب قالت
يااه اد كدة هدى كانت مزعلاك طيب متغير يعنى شيل دة عن ده يرتاح ده من اده
اسر بقله حيله
للاسف يا نرمين مينفعش، هدى زى ما تقولى كده العصمه فى ايدها
نرمين بتنط من مكانها وتقول
نعم ، وايه اللى يخليك تعمل فى نفسك كدة ، انت طلعت راجل نص كوم بصحيح
اسر بعصبيه
اخرسى يا بت انتى ازاى تتكلمى معايا بالطريقه دى انتى لازم تعرفى انك متجوزة اسر بيه ، يعنى تتكلمى بحساب وتمشى بحساب وكل حاجه بحساب
نرمين بتحط رجل على رجل وتريح فى قعدتها وتقول
اه يبقى كدة بقى لازم الاتفاق يتغير انت كدة بتملى شروطك عليا وده مكنش اتفاقنا احنا اتفقنا انى براحتى خالص
اسر سمع صوت حد طالع على السلم وبسرعه بيقول
ششششش اسكتى خالص واضح ان حد طالع وموضوع الاتفاق ده اياكى يعرف بيه
وبتدخل عليهم الام الفرحانه بجواز ابنها والاكتر انها فرحانه بضرب هدى وبتقول
حبيبه ماما العشا يا قلبى تتغذى بالف هنا وشفا ، ياما نفسى بعد تلت شهور من دلوقتى اشيل عيالك
نرمين بتشوح بايدها وتقول
ليه يا حجه مجوزاه ارنبه ، دة لو طالبهم من جوميا هياخدوا اكتر من كدة ، عيب يا حجه الكلام ده ، انا بعون الله لو عاوزه عيال الصبح يبقى عندك عيلين تلاته بيلعبوا على راسك

الحجه بتبص لأسر وتتنطط من الفرحه وتقول
الله اكبر ، البت باين عليها متمكنه وواثقه من نفسها ، باقولك ايه يا قلبى انا عاوزة ولدين وبنت
نرمين بتريح الست فى الكلام وتقول
تمام يا ياحجه اطلبى الاوردر اللى يعجبك وبإذن الله يوصلك قبل معاده ، سعدنا بزيارتكم يلا يا ختى خدى سكه
اسر بعصبيه
نرمين عيب كدة انتى ناسيه انك بتكلمي امى
نرمين بزهق
امى امى ، بصراحه بقى امك رغايه اوى
اسر بصوت واطى وبرضو خايف من نرمين
احترمى نفسك يا بت ، دى دولت هانم بنت الحسب والنسب
خلاص يا ماما تصبحى على خير حضرتك اتفصلى انتى واعنلى حسابك هنعمل حفله بكرة علشان نعلن خبر الحواز
ونزلت الام ، وقعدت نرمين تبص لأسر اللى كل حاجه فيه بتدل انه ابن ناس اوى وغلبان اوى لكن فى سر فى حياته لازم نرمين تعرفه
الا قولى يا اسر بيه انت فعلا اتجوزت هدى دى والعصمه فى ايدها زى الافلام يعنى
اسر وكأنه ما صدق يلاقي حد يفضفض معاه
لا يا نرمين انا هاحكيلك الموضوع من البدايه
ابويا الله يرحمه كان ليه شريك راجل محترم بعيد عنك ، ضحك على ابويا وسلفه مبلغ كبير اوى علشان يدخل معاه فى صفقه كبيرة اوى ، وبعد شهرين الصفقه فشلت وكان لازم ابويا يدفع الدين الكبير دة ، لكن الراجل فكر وطلب من ابويا انه ينقل نص الشركه باسم هدى بنته وطلب ايدى للجواز من هدى ، طبعا هدى دى كانت زى ما تقولى كده بايرة واتخطبت تكتر من ست سبع مرات ومبتعنرش مع راجل ، علشان كدة ابوها بلانى بيها ، واتجوزت هدى غصب عنى لكن تنفيذا لاوامر ابويا الله يرحمه ، وبعد الجواز عملنا حادثه كبيرة اوى كنت انا وبابا وهدى ، وللأسف بعدها محصلش حمل وهدى راحت لكل الدكاترة فى مصر وبره مصر لكن الحمد لله قالوا انها سليمه وميه فى الميه انما انا للاسف الحادثه دى أثرت عليا ومستحيل انى اخلف ، علشان كدة تحسى ان هدى مستحملانى لكن من وقت التانى بتذل فيا وفى امى ، وبصراحه انا مش عاوز منها عيال انا كل اللى عاوزة انها تبعد عنى ونطلق ، لكن بينى وبينك الشركه مشتركه اوى واى واحد فينا هيكون لوحده هيكون هو اللى خسران
بس بصراحه انا عاوز اخد نصيبى واشتغل عليه بجد وابطل بقى كسل واخلى شركتى احسن شركه فى البلد وابعد عن هدى لأنها ببساطه بتتعمد تقلل منى قدام الناس وديما تفكرنى انى عقيم وعمرى ما هاخلف

نرمين بتاثر
يا عينى عليك يا اسر بيه بجد صعبت عليا ، بس معلش بقى اسمحلى انت ضعيف الشخصيه يعنى علشان خايف على الفلوس تعمل فى نفسك العمله السوده دى ، ونسيت ان ربنا سبحانه وتعالى هيسالك عن عمرك وشبابك هاترد تقوله ايه ،كنت خايف من هدى ، على فكرة بقى انا عاوزة اساعدك قولى انت عاوز منى ايه بالظبط
اسر
بجد يا نرمين انا مش عارف اشكرك ازاى، بصى انا عاوزك كل يوم تيجى معايا الشركه واى حد يتعرض ليا فى الشركه تبع هدى تاكليها علقه موت ، عاوز اقولك ان الشركه كلها ستات علشان كدة مينفعش انى اجيب راجل يضربهم انما انتى انا متاكد انك هتقومى بالواجب وزياده
نرمين بتهز راسها بالموافقه
تمام يا اسر بيه ، بس خلى بالك ان الساعه من شغلى وانا بضرب النسوان دى بضعف الاتفاق
اسر
يا ساتر عليكى انتى ايه يا شيخه متعمليش حاجه لله ابدا
نرمين بابتسامه
خلاص خلاص صعبت عليا علشان خاطر خالتى ان اسر انا هاخفض السعر شويه
وعلى سلم الفيلا كانت مامه اسر نازله
وفجأه سمعت هدى بتكلم حد فى التليفون وشكلها مقلوب ١٨٠ درجه وواضح كده انها بتخطط لمصيبة ربنا يستر
وتانى يوم كان اسر نام على الكنبه ونرمين على السرير ، ونازل بدرى يطمن على والدته لكن الفيلا كانت مش طبيعيه وهدى مش موجوده
صباح الخير يا ماما امال امنا الغوله فين
مش عارفه يا ابنى ، بس اعمل حسابك امبارح كانت بتكلم حد وشكلها مقلوب ١٨٠ درجه
اممم ربنا يستر، اعملى حسابك يا امى الليله عازم كل الناس علشان نعلن جوازنا

وبالليل حضرت هدى وكان اسر جهز الحفله كبيرة اوى لكن هدى من الواضح انها بتخطط لحاجه اكبر
وبدأت الحفله والكل مستنى يشوف العروسه الجديده اللى قدرت تخطف قلب وعقل اسر بيه ويتجوزها وعلى مين على هدى هانم
وظهرت هدى لابسه فستان شيك اوى اما نرمين فكانت لسه راجعه من الجيم وشافها اسر على بوابه الفيلا وقال
ايه ده انتى كنت فين يا نرمين
كنت فى الجيم ، في ايه
انتى مجنونه يا بت انتى ولا ايه جيم ايه وهباب ايه ، انتى ناسيه ان النهارده الصباحيه وفى حفله وناس مستنيه تشوف جنابك
ولا يهمك يا شبح ثوانى اتشطف والبس اى حاجه واكون على سنجه عشرة
اسكتى خالص اسكتى واقفلى بؤقك اللى بيطلع جاز ده ، اتشطف ازاى يعنى انتى لازم تتعلمى الكلام من اول وجديد
نرمين زعلت اوى فى نفسها وزعلت على روحها معقول فى فرق كبير اوى ما بينها وما بين ولاد الذوات، هى اصلا مكنتش عارفه ان فى ناس نظيفه كده عايشه فى الدنيا
وطلعت الاوضه ، ولبست جينز وبلوزه واسعه اوى وشكل الهدوم رجالى اوى ، وماخدتش بالها ان اسر مجهز ليها فستان شيك اوى على السرير ، وبرضو ربطت ربطه المطلقات ونزلت وياريتها ما نزلت
هدى كانت محضرة مفاجاه جامده اوى ليها وهى ، فرقه بنات بتغنى وترقص وتتنمر على نرمين ، والبنات بدأوا يقربوا من نرمين ويطلبوا منها انها ترقص وواحده قالت
نرمين هانم لازم تورينا رقصك الست الجميله هى اللى بتعرف ترقص
وهنا هدى ردت عليها علشان تحرجها قدام الكل وقالت
هههه ست وهى فين الست دى ،دى راجل بدقن وشنب ، دى حتى انا شايفه انها بدال ما اسمها نرمين نسميها كابتن عبده موته هههه
وبدا الكل يضحك ومستغرب اوى ازاى شاب شيك وجنتل زى اسر بيه يتجوز نرمين البنت الفقيرة البسيطه اللى تشبه لحد كبير الرجاله
وهنا اسر قرب من نرمين وقال
انا اسف يا نرمين بس انا عرفتك قبل كدة ان هدى واصحابها ستات قادرة ولازم تساعديني نوقفها عند حدها
وهنا بدات نرمين تقرب منها وقالت
ايه رايك يا هدى هانم ما دامت الست الجميله هى اللى بتعرف ترقص انتى وصاحبتك هزوا شويه ، بس من غير هدوم
هدى بعصبيه وصوت عالى بتقول
انتى انجننتى يا بتاعه انتى ولا ايه
نرمين بتعيد الكلام تانى

عليا النعمه لترقصى انتى والقرشانه التانيه ومن غير هدوم،،،،،،
وهوبا ، بدات نرمين فى ضرب هدى وصاحبتها اللى اتريقت عليها ، وقطعت هدومهم والكل واقف بيتفرج واى حد حب يتدخل يفك الخناقه كان اسر بيه بيبعده وبيقوله محدش يدخل ما بين حريمى
وطبعا متنساش خالتك ام اسر اللى كانت مظققطه من الفرحه وعماله تشجع نرمين وتقول
اديلو على مناخيروا يا نرمين يا جامد
وبعد الحفله طلعت نرمين الاوضه وكانت زعلانه من نفسها ومن طريقه كلام اسر ومن تنمر الناس عليها لكن اسر طلع وراها وصالحها وقال
نرمين انا اسف انى كلمتك بطريقه وحشه ، صدقينى انا بس كنت متعصب اوى وعاوزك تلبسى بسرعه
نرمين بترد وبتقول
على فكرة يا اسر بيه انا ضربت النسوان دول علشان كنت لابسه رجالى وحاسه من جوايا انى راجل بدقن وشنب ، انما لو كنت لبست الفستان بتاعك مكنتش هاعرف اضربهم
وعدت الليله ونرمين بتفكر لو كانت ست حلوة زى الستات ممكن اسر بيه يفكر فيها بطريقه تانيه
وتانى يوم الصبح هدى نازله ورابطه دماغها من كتر الضرب اللى اكلته من نرمين ، وبتجر رجليها وكلمت حد فى التليفون وقالت

أيوة يا بابا شوفت المصيبه اللى انا فيها ، البيه متجوز ملاكمه والبت نازله فيا ضرب ، والمصيبه الكبيره احسن تحمل وتولد والسر المستخبي يبان
وهنا نرمين كانت برضو بتلمع اكر وسمعتها وهى بتتكلم وعرفت ان موضوع ان اسر مبيخلفش طلع كدب من هدى وهنا طلعت تجرى على الاوضه علشان تقول لأسر لكن اول ما فتحت الباب شافت ،،،،

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية تزوجت ملاكمه)