رواية كحل عرب الحلقة التاسعة والأربعون 49 للكاتبة زينب ماجد

( نظرة سلطان ) 

شمس مغرب حياتي وباكها الماي

(عريان السيد خلف)

هدية : بتيييي راح تروح من ادية  يمه بتي 

اهزن بيها ، ادكن اعلى كفاها ، البت غدت زركة و العيون مكلبة و الادين مسبلة . 

خنجر افتر راسة ما كام يعرف يربي وين وليوين يطي وجهه ، البت بادت بين اديهم و المستشفى موش جريبة.  

دار السيارة ووكفاها عد المضمد و نزل اخذ البت ومشى بيها للمضمد ، و هدوة من حلات روحها اعلى بنيتها نزلت وراه. 

كام المضمد يرفعها من رجليها و ينكث بيها و يدك اعلى ظهرها ، ليما رد النفس بيها و صرخت تبجي وكامت تزوع ، اطاها الخنجر و كاله : بوجهك للمستشفى بساع البت نفسها تعبان و بطنها رايجة ، اركض . 

التفت خنجر و كال : للسيارة ردي بساع . 

جريتها من عده و طلعت بالسيارة و هو يكلي : غطي روحج خوية خافن وحيد ردي يشوفنا و نروح نبتلش بدمه . 

…… 

ملوك : هلا يبو فاضل ، زارتنا البركة تفضل . 

عم سرحان : البركة بيج شيخة ، جيت انشد عن ازناد شنهي علومة.  

– هالتشوفه مت عيني طريح وساد لا يشيل ايد ولا رجل ، جدامه مكسرة و كليته مامش . 

– الشيخ زناد سبع و يكوم منها 

– بحيل الله يكوم و يوجف اعلى رجليه و ياخذ حكه من اعداه اعلى داير مليم.  

– جا احنا غير يو نطيح بيهم وعلي الا نحش ركابهم . 

– شلون تلكونهم وانتم جويعدين يبو فاضل ؟ لا تزعل مني انا وديت عليك خاطر احجي وياك من كونك عمهم و اعكلهم واريدة اشيرنك ، ابني شيخ لهساه الدهسه مامش ، شنهو معناتها . 

– الدهسه سلابة و نكرية تسبكوله اعلى الطريج العام و سلبوه .. جا وين نعرفهم و نكضهم ؟ 

– زلمة و شيخ عشيرة يندهس بوضح النهار و يسلبون سيارته !! اعذرني يبو فاضل ، الحادث مدبر موش سلابة ، و الجتال يو ما طلع ، اعرف هو منك و بيك ، ياكل و يشرب وياك 

– شنهو كصدج يشيخة ؟ 

– انا مالي كصد الرايدة اعرفنه المتولي ثار زناد ياهو ؟ 

– سرحان و امس وصاهم و امر خنجر يحفر السلف ببرة و يطلع المتعدي اعلى الشيخ زناد 

– جا كول ودع البزون شحمة 

– عليش ؟ 

– المغتاضين من ازناد اثنين سرحان و خنجر ، الاول يظن اخذ المشيخة من عده و طالبة بثار ، و الاخر ما اطاه اخيته و هو خاطبها.  

– تشكين بسرحان هو ورى دهسة اخوه. 

– سرحان ما يسويها لجن خنجر خلك نكري سرسري ، شنهو هو وتحطونه بالمضيف و تأمنون بيه . 

– الزلمة استعدل واشتغل وتاب من سوالف النكرية و الشقاوجية و الشيخ الله يرحمه عفا عنه و حطاها بالمضيف و هواي جان يحتاجة و يطلبه و يكضي حاجات المضيف . 

– انت اكثر واحد تعرف اخر ايامه الشيخ كلش تأثر بسرحان و صار يمشي اعلى اثره عمياوي ، انا ما اشكك  براي الشيخ و قراراته لجن يظل ابوه و سرحان تربات حضر ، لسان معسول و دم بارد مسموم . 

 – والله يا ام زناد انا الاثنين ولد اخوي ، و ان جنت انحازيت لزناد بوكت الشدة ، وما رضيت السرحان يطي بت الشيخ لخنجر و يحرم وليدي ، لجن سرحان موش بهاذ التصور الأنت مصورته عنه ، الزلمة حكيم و يحشمنا احنا عمامه ، وموش متسرع مثل زناد .

– كلامك هاذ يكلي انت صاف بفيه ؟ 

– انا موش صاف ويا احد ، لجن جاي اخبرنج بالجاي اشوفنه ..  وان شاءالله ما نكصر بدوارتنا اعلى المتعدي اعلى شيخنا .. تامرين امر . 

كام منه و راح خبر سرحان و كاله هيج و هيج الشيخة ملوك تكول ، و انا ما رايد يصير جرخ بينك و بين اخوك ، استعيل و الكاه الداهسه . 

– جا عمي يو ما لكيته انا انلام ، عليش بوية ؟ موش خبرنا الأمن ؟ موش حشدت ازلامي و ازلام العشيرة ادور اعلى المتعدي اعليه ، و هالشوفة عينك ، عيني ما الحك اديرنا اعلى كثر الوادم التروح و الترد وتتحمد لسلامته ، لجن مرت ابوي و انا اعرفنها ما يرتاح كلبها لا ما تبعدني و تنوم كل مصيبة براسي . 

– انا جيت احذرنك ، اعدانا جثيرين و يو تفركنا دشو بينا و خربونا … خلنا نظل اعلى راي واحد وما نطي بوحيد منا . 

– الله كريم عمي . 

…… 

هدية : نزلنا عد المستشفى ، دخلينا البنيا للطواري و خذوها من ايدي ، فحصوها .. وظلو يكلبون بيها و ما اعرف شعملو بحالها ، و انا دموعي تسجب ، وكلبي موجر اعلى بنيتي . 

امي واكفة عدي و خنجر يروح و يجي مت عيني عليه ما هدانا ولا شوية ، واكف وكفتنا ، فحصتها الدكتورة و كالت : الطفلة عدها التهاب بالأمعاء ، و ارتفاع حاد بالحرارة هذا اللي خلاها تنشمر .. انتم منطينها منوم او هيج دوا للطفلة ؟ 

– لا وعلي دكتورة ما مطيتها غير حليب قواطي و صدري ، ها و زهورات فوريتلها هاي بس بعد ما مطيتها شي عليه العباس . 

– لا ماما البنت ماخذة ادوية مسببتلها التهاب ، تعرفون زين ما ماتت ، انت وين لاهية عن بنتج ، بس تخلفون و تحطون بلا رعاية . 

-دكتورة وعلي خذوها مني عيالي و ما اطوها الي، يو علي احطنها ابطن عيني ، ساعة الخذوها مني اعلى سمنها يكلولي توكلينها حصو ردوها الي هاذ حالها 

– هنا الحجي يعني الطفلة مجانت عندج 

– لا 

– و شمنطينها عيالج 

– ما اعرف ، جابوها اليه اول يوم خامدة 

كواغد : الله لا ينطيهم كون بجاه ضلع الزهرة ، ساعة الخذو البت ووهدون حالها ، ها يم البنين . 

– من المنوم يا امي اموتيها للطفلة بالمنومات ، اكو طفل عمره ٤ اشهر تنطي منوم ، شلون عفتيها عدهم و اذا هم ميكدرون لتبريتها وتزعجهم كعدتها شلهم بيها ماخذينها ، ليش مخلوها عندج ؟ 

– هيج عناد بيه خاطر يكسرون كلبي بيها . 

خنجر : دكتورة طوليتيها فدوة بوية كليلنا البت هسة شنهي . 

– البنت ما اكدر اطلعها لازم امها تنام بيها هالأيام الى ان تتحسن الطفلة و اذا ظلت  على هذا الحال و طلعتوها ، لتجون بعدين و تكلولنا خسرناه شسويتولها ، من هسه اكللكم البنت لو طلعت .. تموت . 

خنجر : تنام تنام ، كتبيلها خاطر تركد بيها امها ، ياله خوية ، شدي ضعنج خاطر تركدين ببنيتج ، و شتعتازين الركاب سدادة لا تكولين ابيج و اخيج مامش ، وعلي احش رجليه اليكرب منج.  

كواغد : الله يطيك العافية ييمه يو ما انت جا البت هسه ضاعت من ادينه . 

– لا تكولين هاذ الحجي ام ستار ، انا و ان جنت حويكم ما اطيكنا لجن انت و الشاهد الله احترمج ، و جلجول رفيجتي خوما اتفاشل وياها و هي الركضت ليه و تنختني . 

ضحكت امي و الدكتورة دكتبلي دخول و حولتني للردهات فوك .. خذينا البت و صعدنا ، حجت امي : يمه اهديوة نزلي شيلتج خافن لا يشوفنا وحيد و احنا مالنا خلك . 

– يم الحجاب ضخين و من اهدنه اهيس ارد اطيحن اعلى وجهي ، و ما اوجد دربي و بتي بيدي . 

خنجر : طيني عنج البت و التهي بروحج خوية . 

شالها و صعدنا فوك ، كتبولنا دخول و شكلو للبت مغذي ، كامو يدكون اعلى اديتها و يدورون وريد خاطر يحطون هاي الما ادري شيسمونها هيج ، هيج جنها ابره وبيها منكار من فوك و بوري ، و زرفون اديتها ، و هي اديها سمينه و لابسه شحم ولحم ، يردون وريد ما لكو. 

حولو اعلى اديتها الثانية و هم مامش و الدم كام يجفي  من ايدها و انا اهيس كلبي غده فليس من حزني اعليها ، نذرت سفرة لام البنين يو بنيتي طلعت سالمة و كمت ادير الوجه و اصيحن ها يم البنين ادخيلتج انا ،  و ادموعي همالة . 

ليما حطو هاذ الواحد برجلها ولكو وريد و علكولها المغذي و انا حاطتها بحضني و الوليلها و دموعي يصبن فوكاها ..

شواي و دش سرحان : هااا بشرو 

كواغد : هلا خالة ، شبشر الله لا يطيهم كون بجاه علي بن ابي طالب اليوجر كلبوهم مثل ما وجرو كلوبنا اعلى هالفرخة هاي . 

– سلامتها هدوة ان شالله معافات لا تشيلين ابالج

شلت راسي ليه و حجيت : تعبت يسرحان تعبت ، و العباس تعببت . 

حجيتها و جرن دموعي و انا اعاينله . 

اختنك هو ، كضته العبرة هيسيته راد يبجي : شدي حيلج بوية الله كريم ما تضيج الا تفرج 

كواغد : لا جا انا كتلها ما يظل حمل مطروح ويفرجها ربج ، لجن هي كلبها مضعضع اعلى بنيتها . 

سرحان : ربك و كدرنا ناخذها من عدهم يو ظالة عدهم جا موتوها . 

خنجر : ما تطيحن بيهم ابيس بمصارينهم وعلي انا كلبي موجر من ال صخيل . 

سرحان : كون احد شافكم ؟ 

– لا الحمد لله سترها ، لجن حتى يو شافونا ابالي اليجي و ينشدها ويكلها شعدج ، الا امدنه و اطلع حليب امه من خشمه . 

– جية حاكم كربت ان شالله و ما ظل شي ، خلنا نستر اعليها ليما يرد حاكم من العسكرية . 

كواغد : جا غير يجي وعلي الا يوذرهم ، ساعة المشى تلاكفونا هالواوية . 

سرحان : الله كريم الله كريم . 

طلع سرحان و كال الخنجر حاول لا تنحك بيهن ، خلك جريب و بعيد خاطر يو احد شافهن ما ينتهمن بيك و نتهم احنه و نطيح بيها . 

ظل خنجر بالاستعلامات و كل شواي يودي وحدة من السسترات تروح تشوفه . 

… 

راديون : خلصيت شغلي ودشيت للحجرة ، لكيت جسام حاط راسه بالكتاب و يقرأ .. كربيت ليه : شجاي تقرأ . 

شال راسه : شنهو ؟ 

– جاي اكللك ، شجاي تقرا؟ 

-كتاب ديني

– عن شنهو يحجي ؟ 

– يحجي عن فئة من الناس و شلون تعرضوا للتهميش و الاضطهاد من الحكام على مر العصور ، و شلون جانو يحطونهم و يبنون عليهم البنايات و يصلبونهم وشلون لازم الواحد يصر اعلى مبادئه يو شما جانت الظروف صعبة و الحكم جاير.. و هجي يعني . 

– هاااا ، جا انا يو ردت تعلمني شلون ؟ 

– باجر بحيل الله اجيبن طباشير و نكتب اعلى الباب و عودين نمسحه بوصلة منداية بعدها و كل يوم اعلمنج حرفين . 

– و اصيرن اعرف اقرا ؟ 

– الما يعرف يقرا و يكتب ما ينعد اعلى البشر ، جن عايش اعمى و ما يفهم الداير ما دايره شنهو لزوم الواحد يعرف يتعلم يقرا . 

– احنا ما عدنا بت تطلع ، يو كلش احتامينا ع الطلعة حدنا للسوك نفره و نرد مغشايات . 

– جا هم هنا ، لجن حتى السوك ما يرحن ثيابهن يخيطنها برواحهن و القماش الدلاله تمر بيهن و يشترن منها و يو احتامن يطلعن للزرع . 

ظلينا جويعدين واحد يسولف للاخر اعلى طبايع اهله ، شفت طبايع اهلي تفرك عنهم جثير ، لجن ما اعرف مرتاحة لطبايع جسام و طابتلي عشرته، اشوفنه زلمة معدل ، انا ما اعرف شنهو الحكمة من حالتي لجن اعرف خنجر عصبي و ما يتفاهم انشد روحي يو صادفه هيج موقف يسكت و يتفهمني مثل ما تفهمني جسام، انا عرسيت و هديته حرك السلف و البيه جا يو عده وما بيضيت رايتي شيسوي ؟ … وان جان هالزواجة صعب علي لجن الله رادلي الانسبلي و الحكمة عد الله ، الهم كلبي ارتاحله . 

كعدنا الصبح متأخرين ، طلعيت من الحجرة لابسة و متعدله و متهندمة والمسج عطره يفوح مني ، وكحل العرب بعوينتي جريته .

صبحيت اعلى جبيرنا و حبيت ايده و راسه ، لجن اشوفنه يتنهد و يزفر جنه ما راضي ، رفعت راسي ، حجه : شنهي النوم هاذ يبت ضويحي ؟ 

– اتعذر منك عمي ، لجن انا شغلي ورا الريوك يعني ما يضر . 

– واعلى كيفج تمشين امرج ، شغلج بعد الريوك تكعدين ساعة التحلالج .

جسام : بوية البت جديدة عهد و تتعلم . 

سلطان : و عليش تنط و تحجي عنها ما عدها السان و تحج … احذر يجسام هاذ الحجي انا ما ارضاه ، اكره الزلمة اليدافع عن حرمة .

– ما دافعت بوية لجن انا جاي اعلمنها اعلى طبايعنا ….. 

– انا اعلمنها ، بشوري ، نجممممة . 

– امر يبو نعمة 

– الغدا اليوم نريدة من حدر ايد بت ضويحي و خبريهن الغدا كله اعليها . 

راديون : انا الصكد ما اعرف اركب لجن بحيل الله اسعى و اسويلكم الغده و ان شاءالله يعجبكم . 

نعمة : الشيخ مالكم ياهو هالساه بعد ما طاح زناد . 

– اهلي كلهم شيوخ .. و مامش فرك بين سرحان و زناد الحسين اخو العباس . 

سلطان : زناد يعرف بردتج يو السرحان الراي ؟ 

– ما اعرف . 

– ما تعرفين يو تتسترين اعلى اهلج . 

مشيت منهم ، و ظل سلطان يحجي ويا ولدة بسالفة بت ناصر و يكللهم ،اريدنكم تراغبولي كواغد وين تروح وين ادش .. لزوم نتبع هالمرة انا شاك السالفة عدها . 

كضيت كلبي بيدي ساعة الحجو هيج ، كملينا الريوك وتنظيف البيت ، كضيت جسام : اكلك 

– اي كولي

جريته و فتت ليغاد : تكدر تمش لبيت حاكم ؟ 

– عليش ؟ 

– لا تكلها ابوك كللها بيت نويصر عزمو اعلى تتبيعتجن وراح يلاحكونجن . 

كضني ، عاين منا و منا ، مشى ليغاد تفكد و رد ليه : لا تكولين البت صكد عدهم 

– اي عدهم و اخافن لا يبتلن وهن نساوين و زلمهن بالعسكرية . 

– عليش ما كتيلي من امس 

– ما طرى اعلى بالي هسه من كال يلاحكهن خفت اعليهن. 

كام من مجانه طلع برا و انا دشيت للمطبخ كمت اشتغل ، احضر لجن اندار راسي ما اعرف اركب ، المرجة احطنها معجون طماط و ادهربها لجن التمن ما اعرف شكثر احطن ماي ، السمج شلون اشوي . 

جسام راح تلث ارباع الساعة ورد ، كتله : ها بشر ؟ 

– مريت منهم لكيت بتهم هاي الزغيرة 

– جلجول .. اي وكتلها ؟ 

– ما اطتني شي عنهن ، تكلي امي بالقراية واختي هديوة ميته اعلى بنيته عليش جاي تنشد و انهد موش فرخة الدلالة ما تلحك اعلى السانها 

– بعد بيتي جا تطي بختها ، و شكلت الها 

– حذريتها و كتلها ترا راح يراقبون امج خاطر يعرفون البت عدكم يو لا كلي لمج تتحاذر ، هدتني وركضت . 

– جا راح تكللهن دام ركضت. 

– بديتي بالطبخ 

– لا بعدني توها الساعة ٩ و غداهم ب١١ ونص اخافن يبرد . 

– انا راح اكعد ليغاد يو اعتازيتي شي اندهي علي . 

– ريتك سالم . 

مشا و تلاكا بامه نجمة و هي تكله : شو اليوم لافي اعلى المطبخ موش اعىى عوايدك ؟ 

– لا هيج اجيت انشد مرتي اعلى دشداشتي البيضة.  

ابتسمت من كال هيج .. انطخ راسي اعلى هالتركيب هاذ ، السمجه خذتها نجمة من عدي و كالت ديري بس التركيب . 

والله شلون ما جان دبريتها ، و التمن كاضة الطاسة و كل شوية اذبن ماي و احتاريت بعد يو بس ؟ 

انداريت جسام كاعد جدامي ،اشريتله ما فهم شنهو التاشيرة . 

هم مفرشين و كاعدين بالحوش الجو طيب و ضحكهم و سوالفهم واصل لسابع جار ، مر من عدي ، و كال : اعتازيتي شي يابة ؟ 

– التمن ما اعرف شكثر احطن ماي، تعرف انت ؟.

تبسم : حطي ليفوك التمن باصبعين . 

– جا خوش

كدرت الماي ، صكد و خليته اصبعين .. كمليته و الله شو نفش الحمد و الشكر ما عجن .. لجن المرجة صارت هورة اظني زوديت ماي ، وشاعله النار حدرها تفور وهي بعدها خفيفه . 

دشت نجمة و حطت السمج بالكاع و كامت تخلي بصواني و النسوان نصبن السفرة ، والله صبن الاجل ليهم و حطنها و اندارينا خاطر نصب للجهال كاموا يتلعلعون.  

و نعل سلطان يصيح : نجمممممممممممة 

فزت من مجانها وراحت ليه :امر يبو نعمة 

-هاذ اجل هاااااذ ، كطرة ملح ما بيه ، ياهو العملته 

– مرت جسام الركبت اعلى جلمتك .. يمكنها ناسية الملح 

– ناسية الممممممممملح عايني هاي مرجة تنحط جدااااامي ، مرجة هاي يو زواع بزاززززززززين . 

نجمة : راااااديون ، خايييييبة راديون نعله اعلى والديج تعاااااي . 

كربيت و انا كضني الرجيف من صيح سلطان ، وكفت و كلت الها : ها ؟ 

بعدني توني نطكت و جابتني بجف اعلى خدي و تشتم بابوي و تصيح : اعوينة ابيج اشتعل كبره بنار و نفط ، هاااااذ اجل تحطينه جدام الشيييخ 

فز جسام : ترى بالعباس ماكو هيج ، عليش اطكينها يمة 

سلطان : جسااااااااام رد المجانك 

– اليطك حرمتي يطكني بوية 

كام اعلى حيلة و شال عوجيته و طكه اعلى راسه و صاح : ترادددني ولك 

كام نعمة : اعصابك بوية ، لا تعصب ما صار شي 

– يدافع لبت ضويحي ، جلب صاير ليها الاغممممم 

جسام : بس فاض الغيض بفادي ، بسك ، بت حاط حطاطك اعليها عبنها بت ضاحي من الاول لا ترضاها تجيبها و تهينها بيا حك 

سلطان : ولكم هاذ طالع حسه ، صالها يومين ابيتي و رفع حسه وانا واكف ، ولكمممممممم ابني كام ما يطيعني ولكمممممم 

جسام : من الاول كالتلك انا ما اعرف تركيب ، حطيته براسها و منعت كل وحدة تعاونها يو تعلمها ، انت كول جايبها خاطر اطلع حيف اهلها بيها ، اذا هاذ رايك انا هسه اطلكنها و اردنها لهلها ما تخليها عدي . 

كام اعلى حيله سلطان صاح : خايب جسيم تحجي وانا ابوك واكف جسيييييم

وشال عوجيته و راد يطكه بيها ، شكفها جسام عن وجهه وحط ايده ، اجت العوجبه بساعد ايده 

شلون تحط ايدك و تردني ، تولاه طك بالعوجية كام الدم يجري من راسه و اخوته يريدون يفاككونه لجن اليتكرب ينجتل وياه ، انا الوب بمجاني اريد اتحرك و نجمة واكفة و دافعتني عنه . 

دفعتها و طحت عليه خاط اشكف عنه و الدم يجري من راسه ، ولن راس عوجيته يجيبها بوجي ، سحبوه ولده و هو يفشر علي … جرتني نجمة ما اعرف الراشديات منين تولتني شلون صرت جدام سلطان . 

ليما ذبتني بالكطعة مالت الصخول .. 

ما بجيت لجن اغتاضيت كلش ، و الغاضني جسام انطك و انهان جدام اخوته بسببي . 

انا يو طلعت و شكيت لسرحان و عمامي اعلى طكتي يكومون السلف و ما يكعدونه و يعتبرونها تعدي من ال ثجيل اعلى ال ضاحي ، لجن العرض بعيني جسام ، بعد ما نطك اهيننه و اطلع ، ظليت جويعدة بمجاني و اهيس دمي يفور . 

كمت من مچاني ،ردت افكن الباب مسركه ، ظليت كاعدة ليما نزل المغرب ، فكت الباب نجمة و كالت : مرت الاخرى يو فكريتي توكفين بوجه الشيخ راسج ينكص . 

تعديتها و طلعت من الكطعة و مشيت لحجرتي، تكربيت جسام ملفوف راسه بشاش وداير ظهره و نايم ، تكربيت و كعدت عده ، حطيتي ايدي اعلى راسه ، عرفته كاعد لجن ما رايد يحجي . 

همست له : ساعة الأنطك لا تدافع عني ، هدني انا اواجهنه، كلت الك صدري وسيع و يسع ظلم ابوك و جبروته.  

حجه و هو اعلى حطيته : الجاي يسويه موش بس ظلم و جبروت ، ابوي جاي يطلع غيضه من ال ضاحي بيج ، و هاذ الانا ما ارضاه.  

– جا شتسوي ؟ 

ما حجه ، تكربيت ليه و حجيت : موش هين علي تنطك بسببي جدام اهلك و اخوتك ، انا ساعة الشفتك ….

….. اختنكت بعبرتي و ضيعيت حجايتي و سكتت 

اندار هو وكعد : اول يومين بعرسنا المفروض عرسان وواحدنا مجابل الاخر ، و هاذ حالنا ، هاذ و هو يعرف انا رايدج . 

– اهيس ابوك يغار اعليكم من نسوانكم و ما يريد ليهن جلمة اعليكن ، وكونكم حدر طوعه موش تميلون لنسوانكم . 

– ان جانه يظن انا مثل اخوتي غلطان ، سكوتي عنه موش ضعف ، لجن صبر و يو فاض الصبر اطكن وما اردن يو الدنيا تتلايم . 

– بس تعرف

ندارلي و هو يعاينلي و يستمعلي : الشاش البيض اعلى راسك لايكلك ، اشوفنه حلو اعليك . 

تبسم و هز راسه بحزن و سحبني لحضنه: اريدنج توعديني 

– بشنهو ؟ 

– ما تملين و لا تهديني و تروحين 

– انا يو اريد اسويها جا سويتها وما اجيت للحجرة هساع ، لجن تطمن . 

– جان المفروض هاي احلى ايامنا.  

– لا تحجي هيج انا……. اتكاطع كلامي بدكة الباب ،مرت جاسم تصيح علي خاطر اكشن الديوان . 

توني جاي اطلع للديوان و يدشون عماتي اثنين ورجولتهن ، جايات علي يواجبني ، تلكيتهن بالهلا و المرحبا ، زلمهن دشو للديوان و عماتي دخلن جوا ، و جسام طلع . 

كعدن جدامي و صدن بيه اعلى الضوا و شهكن : ياااع شماله وجهج ، شنهي ولج مطكوكة . 

نجمة : يا هلا ومرحبا زارتنا البركة   

ردن اعليها عماتي و كعدت ، حجت عمتي الجبيرة : شماله وجهج راديووون . 

– انطكيت بالباب عمة وانا اشتغل و نعله مزورك . 

– متاكدة يو شي ثاني 

– لا عمة مامش شي ، لجن يمكنه عين و صابتني برجعتي .. و ان شالله سلامات. 

نجمة سكتت و سوت روحه تحشم بجناينها اعلى الضيافة حجت عمتي : اذا هيج خوش بس بالج تسكتين يو احد كرب صوبج تراج بت الشيخ مطر ال الشيخ ضاحي .. و ما عاش ولا صار اليكرب صوب بنياتنا  . 

نجمة : جايات تواجبن يو جايات تحشدن بالبت اعلى عيالها ورجلها . 

– موش احنا النحشد يم جاسم ، لجن البت بتنا و نعرف طبايعها و البت موش اعلى مرامها ، بس دامها ساكته نسكت لسكتتها الا وعلي يو شكت زلامنا تتفداها تفدي . 

نجمة : ياهي التنفدي هاي الكسرت وجوهكم.   يو ما زناد جاتلها ساعة الرد و جايين تعلون بشانها بروسنا ، اكول اشربن جايجن دية و خلن الحجي مدثر . 

– انا بت ضاحي و اشرب ابيت ثجيل ، مت عين الدنيا الذبت بنيتنا عدكم و خلانا نطبكم الا انتم ياهو اليلفي عدكم كلها الناس تعرفكم و تتجفاكم . 

جلمة من عمني جلمة من نجمة ارتفعت اصواتهن ، كمنا نهدي بيهن و انا اترجى بعماتي يسكتن ، كامن اعلى حيلهن و اطني الواجب ، وحدة جايبتلي دلاعة و الثانية محبس ذهب و عمتي الثلاثة اطتني فلوس .. و طلعن وصليتهن للباب ، سلم عليه رجل عمتي و الباقين ، و سلطان وولده واكفين ، وحجه : بعد عمج بوية شتعتازين اركابنا سدادة 

– عساك سالم عمي ريتك محفوظ 

حجت عمتي : عمه انت عروس حتى يو ابوج ميت حواجبج حفيهن . 

– حواجبي موش ضخان لجن عمة لا انزع اسود ولا احفن وجه و ابوي ترابه اخضر ، لا وعلي مت عيني يو سويته 

– جا عمة عروس 

– عمة انا يو ما الزمن ملاويني اعرس و ابوي ترابه اخضر لجن الدنيا و مصايبها

– رجلج شلونه وياج ؟ 

– وردة مالت الله 

– يعني موش مثل اهله

– يييي موسى بقصر فرعون 

– الحمد لله دامه زين عاوني عمة و شتعتازين كولي لا تسكتين . 

– ان شاءالله عمة . 

طلعن عمات راديون من البيت و مشن لبيت زناد سيرين  على بيته ووصلنه ، رحبت بيهن ملوك و عاتبنها : جا دية بتج ما مشيتي ليها ما شفتي حالها غادي شنهو ما شنهو عايفة البت بيد ال ثجيل ؟ 

– طاك كلبي اعليها امس يالة دريت ردت سرحان ردها بدون علم احد ، ردت اروحن اليوم لجن الناس ما كفت رجلها و الخطار هواي ، شلون اهدن و امش.  

– موش عذر اغبشي و اطلعي لبتج تراها متأذاية 

– يا زناد يا يمة ، صكد 

– اي بالعباس البت مطكوكه و عمتها كلتنا بكشورنا ساعة الحجينا لجن ما قصرينا بيها و زفيناها بنص دارها ، اغبشي و امشي ليهم ، و خليهم يهابونها ما يكربونها تراه سلطان و عايلته ما ينحرزون 

– لا جا الصبح غبشة اطلع ليها ان شاءالله ، كلشي ولا راديون ، احبيبة  كلبي هاي . 

….. 

هدية : يومين و انا مجابلة بتي وما هادتها ، و امي من كون حبوبتي مريضة ردت و كالت اردنلج العصر . 

ظل بس خنجر حذاي الزلمة ما قصر كلساع تجي سستر تنشد اعلى حالي و هو يوديها .. سرحان منطي فلوس و مخليهن عده يطيهن للسسترات خاطر يعاونني ، و ما خلوني وحدي . 

ساعة الردت ليه امي العصر ، حجت : خايبة يهديوة كلبي نغزني 

– عليش ؟ 

– وانا طالعة لاكيت واحد من ال ثجيل و يعاينلي، و جلجول كالت مراكبينج ، انا ضيعيتهم لجن ما امنلهم 

– جا يو ظاله ما جاية 

– جا اخافن منهم و اهد بنيتي وحيدها بالمستشفى عوينة ابيهم .

ظلت امي حذاي، نشدنا الدكتورة يمتى نطلع لجن كالت : لا تستعجلن اعىى طلعة البت حالتها لهسه ما مستقرة ، لا تخاطرن بحياتها على طلعة تلحكن تروحن للبيت وتملن منه . 

ثاني يوم من الصبح طلعت ملوك مبوشة لبيت ال ثجيل وبت كاطع مرت زناد وياها ، و السايق وصلاهن للباب ، نزلت من السيارة و كربت ، دكت الباب 

راديون توها مخلصة الريوك و جاي تكش بالحوش ، ندكت الباب و دفعتها و فاتت ملوك : راديوووون 

فزت راديون من مجانها : يمه هاي انت 

شالت بوشيتها وركضت راديون ليها حضنت امها و بجت بحضنها : كفي دموعج يبت الشيخ مطر ، ما تلوك لعيونج غير البسمة ، ياهو وياج يمة . 

– مامش احد وياي لجن مشتاكتلج . 

– مامش احد وياج وجهج هاذ وجه ، و مشتاكتلي و رادة بلية علمي عدوتج انا يو امج ؟ 

– دشي داخل ، تفضلي 

طلعن نسوان سلطان رحبن بيها و دخلنها جوا و ضيفنها ، و هي عينها اعلى راديون ، حجت ملوك : شماله وجهج 

– انطيت بالباب 

– وايدج هم انطكت ، موش يو لاله . 

كامت تنزل برداناتها و سكتت ، حجت : الطكج ياهو يراديون ؟ 

– مامش احد طكني 

– المامش هاي ما تنكالي يبتي . 

نجمة : شنهي القصة كل الاجة و كام يتحقق ، شنهي انتم متانين الكشة يو شنهي.  

ملوك : محد متعدي اعلى حكج يدية الحجي ويا بنيتي و انت محشومة . 

راديون : محد متعدي اعلى حكي يمه ، و انا ما بيه شي.  

جاي يحجن ، كح سلطان و هو داش من برا و كال : يا الله . 

كامت ملوك اعلى حيلها ووكفت ، حجه : ياهي هاي . 

نجمة : ام زناد يشيخ 

– هلا بام ازناد ، يا هلا ومرحبا زارتنا البركة ، شلونج شلون اعلومج 

– يعلي علومك يبو نعمة جاية انشد اعلى علوم بتي . 

– جا ما ضيفيتو ام زناد ؟ 

ملوك : ما كصرو لجن انا مستعجلة و اجيت اشوفن بتي ، و حطها بالك يبو نعمة هاي بت ال مطر … و التعدي اعلى حكها ، تعدي اعلى حك ال ضاحي . 

سلطان : سامع عنج جثير و كبل جان كاطع يجيني برايج ، لجن اليوم انت ابيتي و ما اطلعين يو ما تغديتي . 

ملوك : غداك واصل ، ابني طايح و عيب اكدر افراجنه ، ياله اترخص منكم . 

فتحت صرة و اطتها لراديون بيها باون ذهب و كالت الها : هاي هبة عرسج ، و يجعلها مبارك . 

سلطان : انا عدي وياج جلمة يم زناد 

– كول يشيخ 

– موش جدام الوادم ، اوصلنج للباب و احجيها.  

مشت و هو طلع جدامها و هي وراه مبوشة ؤ حجه : انشد عن المسلب زناد و متعدي اعليه ، لهساع ما لكيتو ؟ 

– ما يضيع الحك ان شالله لا يضل بالك 

– دام انت امه ما ينخاف اعلى زناد ، لجن ينخاف اعليه من سرحان . 

ملوك : ما جاي اعرف جاي تنشدني عليش ؟ تعرف شي ؟ 

سلطان : مرات المواقف ما يعتاز تدور عنها و تنشد ، واضحة جدام بنادم لجن هو اليدير بعينه عنه ، لجن خلي ابالج هالمرة سلبوه و طلع منها سلامات بخسران كلية ياهو اليضمن مرت الاخرى تتعداه ، و يو طاح زناد المستفيد واحد مامش غيره. 

اندارليها : و هاذ الواحد ساعة الوليدج طايح ابيته و ما يكوى اعلى الكومة متربع بمضيفه ويندهوله الشيخ .. يشيخة 

تنهدت ملوك ، ورفعت بوشيتها و اندارت لسلطان و حجت : يو طحتلي بسرحان يو جبتلي شارة تلوي ذراعه ، اظل ممنونة منك يشيخ طول عمري . 

ظل يعاين بيها و ايده اعلى عكازته ، حجه : جانو يكلولي مطر عابد مرته و جنه نعيبة اعلى خضعانه ليج ، لجن هسه ياله عذرت مطر و هو بكبره . 

ردت و نزلت البوشيه اعلى وجها و حجت : ردلي خبر بالحجيته ، و امانة الله ورسولة راديون عدك ، و يو تأذت ساعتها اذبن غيضي اعلى ال ثجيل ومحد.يسلم من شر ام متأذيه بضناها . 

حجتها و طلعت من بيت سلطان كله ، دش هو للديوان و طلب نعمة ، حجه : شكثر عمر ام زناد ؟ 

– ما اعرف لجن هي ازغر من مطر بجثير، بس اظنن بالاربعينات عليش ؟ 

– خلصت عدتها ؟

– بوية المرة طلكاها الشيخ كبل موته ب٨ اشهر ، لجن الاعرفنه هي مغشاية وما تطلع حالها من حال نسوانه . 

سلطان : موش مرة جمبدة .. 

ضحك : ها بوية اشوفن ارويحتك ردت خضرة 

– انت يو شايف الانا شايفة جا ما حجيت حجايتك ينعمة . 

-ههه  تراها شيخة بوية و ام شيخ ، يعني لا تفكرلها . 

– ابوك سلطان انا ، مامش شي ما افكر بي و يصعب علي . 

جاسم : بوية بوووووية 

– ها يجاسم  شنهو الراي 

– كواغد و بتها بالمستشفى و البت عدهن موش ضايعة. 

– هاي الاخبار ، موش كلت الكم كواغد هاي انا ما يهدى بالي منها ، حضروا السيارة . 

حضر سيارته و طلع للمستشفى هو وولدة، ساعة الشافه خنجر تخفى عنه ، مشىسلطان  و دش اعلى الردهة ، كواغد كاعدة بالكاع تكشر برتقال وتسولف ويا هدوة 

سلطان : يا صباح الخير يم ستار ، اشوفنج هنا ، هااااه ، البت الندور اعليها صالنا ايام و انت تهوبزين و تنشدين عنها . 

فزت اعلى حيلها كواغد ، حجه سلطان : شايفة عكلنا لعبة عدج و تلعبين اعلينااااااا …..