Uncategorized

رواية ليل الفصل الرابع والعشرون 24 بقلم ياسمين خالد

 رواية ليل الفصل الرابع والعشرون 24 بقلم ياسمين خالد

رواية ليل الفصل الرابع والعشرون 24 بقلم ياسمين خالد

رواية ليل الفصل الرابع والعشرون 24 بقلم ياسمين خالد

مي بتوجهه كلامها لعُمر بكُل صرامه وقوه:أنا كويسه ومش ضعيفه..ولا شايفني بترجاك وبقولك بالله انا هموت.
“بصتلهُ بكُل قوه وسابته ومشيت خطوتين ..مي اكتر حاجه بتإذيها ان شخص يحسسها بضعفها ..وهو عيونه اتجمع فيها الدموع ..ولإنه شخص عصبي وكتم عصبيته ..مقدرش يتحمِل وفقد وعيهُ ..
“قلبها اتقبض بصت عليه بخوف الكل اتجمع من صوت الهبده ..
ايات باإتهام :عملتي ف اخويا ايه!!!!
 مي كانت واقفه مصدومه وكانت حاسه إنها مش فِ وعيها إحساس إن الشخص مظلوم وواقف وشايف نظرات الإتهام فِ عيون الكل إحساس بشع إنسحبت خطوتين لورا ..
ندى قربت منها بخوف : إيه إللي حصل .
_”أومأت برإسها بمعني مش عارفه ..
=ماجد: بسرعه ياسميه هاتي مايه 
_ أيات بتوتر بتضربوا ضربات خفيفه علي وشه: عمر يا حبيبي فوق فِ إيه!
“سميه بتجيب المايه ..ماجد إبتدا يروي قطرات خفيفه علي وجهه عمر إبتدا يفوق ويفتح عينهُ بُبطأ..فؤاد وجهه كلامه لِ ندى وساره :خلاص يابنتي هو ابتدا يفوق روحوا خلوها تقعد البنت بتترعش .
“أيات بَصت ل مى نظرات إتهام وحقد كإنها بتقولها إنتي السبب “..
مى بتخرج عن صمتها بنبره تكاد ترتجف من الخوف: حضرتك هو بيفوق بدل نظرات الإتهام دي إسأليه أنا عملتلوا حاجه ولا لأ ..أكيد مرشتهوش بمخدر يعني وسيبته ومشيت .
_بكُل قوه وصرامه آيات بتخرج عن صمتها:لا مش بعيد تكوني عملتي كده عشان تسرقيه
“مى بصتلها بحِده وصدمه من إللي قالتهُ أصوات أنفاسها بتتسارع من قوه الإتهام دموعها إتحررت ونزلت زي السيل إتشهتفت زي الأطفال إبتلعت ريقها بَصت لِ عمر إللي إبتدا يفوق ..
_فؤاد بعصبيه:إنتي إزاي تقولي كده وتتهميها الإتهام البشع ده !البنت واقفه بتترعش وإنتي تيجي عليها بالطريقه دي !إعتذريلها فورًا .
_ندى بعصبيه مُفرطه:أنا مكنتش عارفه ياساره إني لما أجيب صاحبتي هتتهان بالشكل ده وتتهم بالسرقه ..”خدت شنطه مي ورميتها ف الأرض ووجهت كلامها لِ أيات ” الشنطه عندك فتشيها ..وفتشينا كلنا قبل ما نمشي ..”بَصت لِ مى بصوت نَفض قلب الجميع” وإنتي بتعيطي ليه إنتي إتجننتي إمسحي دموعك دي “بتمسحلها دموعها ..وبتاخدها ف حضنها ..أيات واقفه مصدومه حَست ب ندم حاولت تداريه لكن من جواها كانت ندمانه علي إتهامها ليها بدون دليل ..”
مؤمن وجهه كلامه لماجد وإبتسم بسخريه: شكرًا ليك ياماجد ولأخت حضرتك ..مش عارف أقولك إيه بس أنا مجيبتهومش معايا عشان يتهانوا بالشكل ده .
_ماجد بِ أَسَف: حقك عليا يامؤمن والله العظيم مش قصدها هي خافت علي عمر بس “بيجز علي سنانه وبيبص ل أيات” ..صح ياأيات!
=…..
قاطع صمتهُم عُمر وهو بيقوم بصوت غالبهُ التعب:إللي انتي قولتيه ده ياأيات مينفعش أنا كويس ومفيش أي حاجه أنا ضغطي واطي من الصبح ومره واحده محستش بنفسي “بيبص لِ مي” بعتاب ..أنسه مي ملهاش علاقه بتعبي .
_أيات بصت بصدمه لكلام عمر..إبتلعت ريقها وبصت لِ مى و قالت بندم : أنا اسفه متزعليش حقك عليا يامي “بتوطي تجيب شنطتها من علي الارض إللي ندى رَميتها فِ الأرض..إتفضلي شنطتك وحقك عليا تاني أنا بعتذرلك قدام الكُل ..
“مى كانت ساكته مكنتش عارفه هل تاخد موقف وتمشي ولا تسامحها عشان نظره الندم إللي كانت فِ عيونها وإعتذارها إللي كان قُدام الكُل ..ندى خدت الشنطه من إيد آيات بعصبيه ..ووجهت كلامها لِ مى،يلا نمشي ..
_ساره بنبره زعل:انا كمان همشي ..
=مؤمن:إستنوا كلنا هنمشي ..”وجهه كلامهُ لِ ماجد ..مُتشكر علي واجِب الضيافه ياماجد
_فؤاد:يابني حقك عليا انا متزعلش أيات بس بتخاف علي عمر ومش قصدها حاجه.
=عمر: بعد إذنك يابشمهندس مؤمن إتفضلوا إستريحوا دقيقتين وانا هتكلم مع مى.
_ندى بحِده:مى مش هتتكلم معاك ولا مع غيرك وخلاص كفايه لحد كده بعد إذنك يابشمهندس مؤمن يلا نمشي.
=مؤمن:انا مقدر موقفك وزعلك علي مى بس نديلوا فرصه يعتذرلها .
_ مع إحترامي لكلمه حضرتك طبعًا بس إنت مش شايف منظرها دي مش عارفه تنطق حرف وواقفه عماله تعيط.
ليل بتقرب علي مى:طب انتي كويسه ،لو كويسه قولي أي حاجه .
_”خدت نفس طويل ومسحت دموعها”: أنا كويسه ممكن نمشي.
=عمر: بعد إذنك يامى هي دقيقه بس .
_ ساره:خلاص يامى كلميه دقيقه بس وهنمشي.
=……
_ليل: خلاص ياحبيبتي لو مش حابه تتكلمي ممكن نمشي..
_ندى:كلميه وإسمعيه ..لكن لو عاوزه تمشي يلا محدش هيضغط عليكي 
=”بعد إصرار من الكُل “مي قالت بتحدى: لأ هسمعوا..
_مؤمن: طب يلا ياجماعه نقعد لحد ما يخلصوا كلامهم.
= مى: خليكي مرقبانا من بعيد يامدام ايات يمكن المرادي هضربوا بسكينه واطلع أجري.
_ايات:اظن مالهوش داعي الكلام ده ..انا اعتذرت والاعتذار بعد الغلط ميعيبنيش ..عن إذنكم.
“بيروحوا يقعدوا ف الجنينه ..
_________
ماجد:متزعلوش ياجماعه عمر عندنا بالذات حاله خاصه .
=ليه حاله خاصه!
___________
_ ف بدايه كلامي بعتذرلك يامي عن الكلام اللي أيات أختي قالتهُ،بس انا عارف ان غصب عنها 
=غصب عنها !.
_اه غصب عنها “بيبتسم بسخريه” ..دايما بيعاملوني بشفقه وخايفين عليا كإني طفل صغير بيخافوا يقولوله كلمه ليعيط.
=كلامك متلغبط ومش فاهمه حاجه .
_معاكي مرايه!.
=مش فاهمه عاوزها ليه .
_معاكي مرايه ف شنطتك يامى!.
=ردت بِحيره:اه معايا بس ليه!.
_هتعرفي ،هاتي المرايه ..
“مى فتحت شنطتها دورت علي المرايه وسط أدواتها التجميليه ..بعد الحصول عليها إديتهاله ..:إتفضل .
_مش عاوزك تخافي ماشي .
“مى بعدت خطوتين لورا” ..سألت بخوف: هو فِ إيه!.
=”إبتلع ريقهُ” متخافيش يامى 
_…..
“مى بصت بحده وصدمه “..
_ إنت بتعمل إيه!
= عرفتي بقي بيعاملوني ليه ب شفقه وبيخافوا علي زعلي !
_ إنتَ..!!
“بيفتح كف إيدو وبيحط العين الصناعيه عليها ..معنديش غير عين واحده يامى ..والعين دي صناعيه ..
_قالت بتلعثُم:طب طب إنت ..انت ليه حاططها طيب!وايه حصلك ولا انت ..انت يعني اتولدت كده!
= “دموعه نزلت علي كف إيدو اللي فيها العين الصناعيه “يوم وفاة بابا كنت راجع من الجامعه ..لاقيت بابا رانن عليا كتير اوي فوق ال 100 مره وده علي غير عادته مخدتش بالي من الموبايل غير بعد ما روحت لإن ف المحاضرات بعمل الموبايل سايلنت .
روحت البيت قلعت هدومي رميت شنطتي علي السرير 
______________
“فلاش باك
ياربيي الجو حر أوي إيه ده ..
“بيفتح التكييف”..
“بيفتح دولابه ..بص ف حيره علي هدومه البس ده ولا ده ! ولا دي ولا ده ! ولا ده ولا ده! ..لا هلبس ده ..لا لا ده هيبقي وحش اوي وبيعملي كِرش انا عاوز ف السهره اكون واد جامد كده وعضلاتي تكون باينه من القميص والبنات يقولوا مين عمر الواد الجامد ده ..
“بيختار قميص إسود وبنطلون إسود وجزمه جَملي وساعه جَملي 
بيقف قصاد المرايه ..الطقم ده هيبقي جامد عليا انا اصلا واد جامد ..هو انا متخلف هو انا بكلم نفسي ليه!.إفرض طلعلي عفريت من المرايه دلوقتي هعمل ايه ..لا لا ربنا يجعل كلامي خفيف عليهم
“تليفونه بيرن ” 
_ايه يازميلي .
=إيه ياعمر جهزت.
_ يابني المحاضرات خلصانه من ساعه ويادوب روحت ..هاخد دش وهلبس علي طول .
=خلصانه متتأخرش 
_ ف واحد قاعد ف استراليا يقول خلصانه!
= ده علي اساس انك مبداش المكالمه ب ايه يازميلي ها 
_قلبك ابيض ،يلا هقفل عشان متاخرش ..
_ماشي سلام.
=سلام.
“بيقفل الموبايل بيبص ب استغراب علي عدد المكالمات “ايه ده هو بابا رانن عليا ليه كل ده هتصل اشوف ف ايه “..
“حاول يرن عليه كتير لكنه مردش “..
ايه يافرغلي هتقلقني عليك ليه بقي!..
القلق والتوتر اتجمع جوا قلبه ..رمى موبايله علي السرير بقله حيله ..دخل خد دش ولبس حط البرفيوم بتاعهُ ..خد موبايله وركب عربيته مشي للمكان اللي هيقابل فِ صحابهُ ..كان رايح فرح واحد صاحبهُ معاه فِ الدراسه..رغم إنه كان صحابهُ معاه وف ناس تشغل تفكيرهُ إلا إن بالهُ كان مشغول ب والدهُ حاول انه يتصل بيه لكنه مردش ..
_____________
بعد مرور وقت الفرح خلص..
_مازن :مالك ياعمر حاسك مش مبسوط هي العروسه كانت الإكس بتاعتك ولا إيه!
=ما تحتِرم نفسك عيب كده علي فكره مفروض متجيبش سيره أي بنت،واظن هي  دلوقتي متجوزه صاحبك واخوك اللي لسه ماشي من فرحهُ 
_إيه ياعم مالك قفشت كده ليه!
=ياعم ايه الاكس بتاعتي دي! ياعم ترضى إن سيره أختك تتجاب وسط شله شباب وهي لسه متجوزه حتي لو الكلمه اتقالت بهزار!.
_ايه ياعم عمر هي هَبِت منك ولا إيه!
=شوفت اتعصبت ازاي لمجرد إني قولتلك ترضاها علي اختك لو كل واحد حط أخته قصاد أي كلمه هيقولها علي بنت أو حاجه عملها او بيعملها مع بنت مكنش ف ولد ضحك علي بنت وكانوا كل الولاد حافظت علي بنات الناس ..وصانت قلوبهم
_إياد:خلاص ياعمر مش قصدوا يعني حصل خير ياجماعه ..وانت يامازن متزعلش عمر شكله متضايق اصلا من حاجه.
=عمر:ياسطى مقصدش ازعلك بس انا بفهمك الصح من الغلط حتي لو كانت الطريقه بقسوه شويه،وبعدين والله مخنوق ومتضايق ف طلعت عصبيتي عليك.
_مازن:مالك ياعمر .
=مش زعلان الاول!
_ياعم إنت مغلطش ،سيبك مني ف ايه !
=ابويا رن عليا كتير وأول مره تحصل انه يرن كتير كان ممكن مره او مرتين وارد عليه وخلاص بس حتي لو قلق عليا مش هيرن فوق ال 100مره،وبرن عليه مبيردش قلقان اوي.
_متقلقش ياعم خير..يمكن بس قلق لما مردتش عليه
=يارب يكون عشان كده بس .
“تليفونه بيرن ..أيات اختي بتتصل استنوا..الخوف والتوتر زاد جواه أكتر .
_ألو .
=”صوت شهقات عياطها ” إنت ..إنت فين ياعمر.
_”أصوات أنفاسه بتتسارع “أبويا جراله حاجه!.
=تعالي علي بيتي عاوزاك.
_ب عصبيه:انتي بتعيطي ليه ردي عليييا ابويا جراله حاجه.
=تعالي بسرعه ياعمر.
“بتقفل السِكه”.
“بيتحرك ب العربيه ب أقصي سُرعه “.
“اصحابه”:ف ايه يابني براحه هنعمل حادثه إهدى ف ايه !
“عمر ساكت مركز ف الطريق عاوز يوصل ب اسرع وقت الطريق يستغرق من الوقت نصف ساعه ..عمر بسرعتهُ وصل فِ ربع ساعه ..وبسُرعه البرق نزل من عربيتهُ رمى المفتاح لصحابه روحوا انتو ..
_لا احنا هنستناك ف العربيه
“سابهم وطلع عند أيات إللي صوت صراخها وِصل للأدوار اللي قابليها ..عمر حَس إن خطواته تِقلت زي الطفل اللي لسه بيتعلم المشي ..حاول يسند نفسه لحد م وصل علي باب شقتها ..خبط علي الباب فتحتله أيات إللي الكُحل من عياطها سايح علي خدها والإسود إللي لابساه اللي اكدلوا ان ف حاله وفاه.. البيت بعض الحاجات فيه متكسره نتيجه إنفعال أيات..نور جمبها بيواسيها، عمر نظر إليها نظرات خوف وكإنه بيقولها أنا شاكك إن والدي مات بس إوعى تأكديلي ..
_قالت بصوت منبوح من العياط :بابا مات ياعمر ..بابا مات ضهرنا أتكسر ياعمر ..
“كَلِامَتُها نَزِلت علي قَلبِه كالصاعقه “..
_لا لا الحاجات دي مفيهاش هزار ..متهزريش ياأيات “بعدم إستيعاب” بابا عايش ..بابا رن عليا فوق ال 100 مره لا لا هو كويس إتلاقيه بيعمل فينا مقلب بس 
“حضنتهُ بكل ما فيها من قوه وكملت بُكائها إللي هَز بدنهُ..كإنها بتأكدله علي الخبر ..
“خَرجها من حضنه..قعد بعدم إستيعاب شايفهم لكن مش سامع أصواتهم..
قرر ينسحب ونام ..نام من غير عياط ولا طلع زعلهُ ف زعيق أوعصبيه قرر يستسلم للزعل ولجأ للنوم ..هرب من الواقع والحقيقه
________________ 
“Back”
_صحيت من نومي مش شايف ب عيني اليمين جريوا بيا علي المستشفي وقتها عرفت انِ فقدت عيني ..جاتلي جلطه بسبب الزعل ..انفجرت فيهم كلهم مش عشان فقدت عيني لا  كان صعبان عليا اوي إن بابا رن عليا وانا ملحقتش ارد عليه مكنتش سامع الموبايل بسبب انه سايلنت..ندمت اني عملته سايلنت وندمت وقتها اني روحت الكليه مكنتش عارف اعمل ايه زعقت جامد وطلعت كل عصبيتي ف الدكاتره عمال اقول طب مش كنت حتي سمعت صوته لأخر مره! اول مره يرن عليا كتير كده اكيد كان قلبه حاسس وكان عاوز يودعني..عاوز يوصيني علي نفسي ..عاوز ينصحني قبل ما يفارقني ..روحت بيتي وقررت اعيش لوحدي تاني كل م كنت ببص لعيني بفتكر ابويا قعدت منعزل لا كنت بروح الامتحانات ولا الكليه ولا اي حاجه..لحد اليوم اللي بابا زارني ف الحلم وقالي اوعي تقع ياعمر انا عايزك دكتور قد الدنيا انا معاك يابني وطبطب عليا ومشي حسيت وقتها ان وصيته اللي كان هيقولهالي ف الموبايل قالهالي ف الحلم ..صحيت من النوم، اليوم ده طلعتله صدقات وروحت للدكتور وعملت عمليه بس طبعا فقدت عيني بس العمليه دي عملتها عشان عيني نفسها تفتح شويه الجفن نفسه بدل ما هو لازق ف بعضه يكون ف مساحه احط عين صناعيه، اداني العين الصناعيه ..بقيت البسها ف المناسبات وانا رايح الجامعه وهكذا ..وطبعا عشان ف فرق بالعين اللي ربنا خلقنا بيها والعين البلاستيك المزيفه البنات كل م بتقرب مني بتبعد ومش بتتقبل الوضع ده ..مش بحكيلك عشان تشفقي عليا لان نظره الشفقه دي بتدبحني بس حكيتلك عشان بس اقولك انك تعذُري ايات لان هي كانت معايا خطوه بخطوه وخوفها عليا ك خوف امي لان هي اللي مربياني انا ملحقتش اشوف امي ولا لحقت اشبع من ابويا .
_ انا مش زعلانه ياعمر وحقها اكيد تزعل حتي لو من غير اي ظروف إنت يعتبر إبنها ووقوعك قدامها فكرها بيوم وفاه والدكم الله يرحمه 
= انا لما بكتم عصبيتي او زعلي بفقد الوعي ..وانا مكنتش اقصد احسسك إنك ضعيفه وانتي فهمتيني غلط بس ولما قولتي الكلمتين دول ومشيتي كتمت جوايا ومحستش بنفسي بس ف انا اسف تاني .
=انا عيط قدامكم كلكو وانا مبحبش حد يشوفني بعيط او يشوف دموعي اختك ظلمتني بس انا مسمحاها وخلاص مش زعلانه،بس عايزه اقولك علي حاجه ياعمر انت مش مُضطر تفضل بالعين الصناعيه دي ولا إنك تخبيي شكل عينك الحقيقيه تحت نضارتك الشمسيه ده قضاء ربنا ولو بنت حَبِيتك ف هي هَتحبك عشان قلبك وروحك مش عشان الشكل إنت حلو بروحك وب أخلاقك وبدينك وصلاتك وعبادتك مع ربنا مش عشان لابس كاجوال ولا عشان شاب روش لا البنت الكويسه بجد وبنت الاصول هتدور علي راجل تتحامى فيه بعد باباها..شخص يحسسها إنها خرجت من بيت أبوها اللي كان مصدر آمان ليها دخلت بيت جوزها اللي محسسهاش بفرق نفس الحنيه ونفس الطبطبه ونفس الونس ونفس المشاكسه والضحك نفس الخوف والغيره نفس الآمان بنت الاصول هتبص علي المضمون مش علي الشكل من برا.
_توافقي بواحد زيي!
=”اتوترت” ابتلعت ريقها بَصت بخجل:هو انت ليه بتقول واحد زيي!وبعدين انا مش عاوزه حد دلوقتي مش عشانك انت يعني.
_”قال ب مشاكسه” لا لا ياستي انتي مش عاجبك شكلي انا عارف.
= “ابتسمت” علي فكره لأ قولتلك.
_يعني موافقه!.
=موافقه علي ايه !.
_ انتي غبيه صح ! موافقه تتجوزيني !
=ايه السرعه دي انت تعرفني اصلا ،تعرف طباعي تعرف اسلوبي! متعرفش عني اي حاجه
_ عارف ،بس فاهمك ..فهمتك من اول م شوفتك وانا صعب اطلع اللي جوايا او اللي حاسوا لحد وطلعتلك كل اللي ف قلبي ف 5 دقايق اهو .
_مش مبرر للجواز ..وبعدين انا جوايا جرح لسه 
=نخيطوا.
_ هو ايه!
=الجرح.
_يابني هو انا مديالك تيشرت بقولك خيطهولي غُرزتين !
= ايه يابت السكر ده!دمك يلطُش.
_ زي دمك يابايخ .
= فكري .
_افكر ف إيه ياعمر انت عبيط.
=خدتي عليا اوي وهديكي بالشنطه ف وشك.
_ وانت فاكر هسكتلك ده انا هجيبلك ندى وما ادراك ما ندى .
=عارف كانت هتبلعنا كلنا وانتي بتعيطي ..المهم يعني هنتجوز امتي !.
_عمر شكلك شارب بجد مش منطق خالص اننا أول مُقابله نتجوز كده علي طول.
=امال مفروض اقعد معاكي سبع سنين بقي وبعدين اتقدملك.
_ لا بس انا معرفكش .
= هنعرف بعض ف الخطوبه ،فكري وهستني رأيك.
_انا مش مؤهله لأي حُب تاني.
= ما إنتي هتعشقيني مش هتحبيني .
_ثقه ولا غرور !
=عيونك قالت كده.
_هتنصُب بقي ولا إيه !
=بكره هتعترفيلي ب اني كنت صح.
_لأ بعينك .
=او بقلبك .
_____________
علي الجانب الأخر 
_________
ايات بتبعد عن المكان اللي هما متجمعين فيه نور جوزها بيروح وراها.
_ مرضيتش أعاتبك ولا ازعلك قدامهم بس اللي عملتيه ده غلط.
=غصب عني انت عارف ظروف عين عمر ده ابني مش اخويا بخاف عليه اكتر من نفسي .
_فاهم،بس لازم تراضي البنت تاني ،تعالي نروح نقعد معاهم وإستنيها تصالحيها 
=حاضر يانور .
_______________
“بيروحوا لترابيزه ماجد ومؤمن اللي كلهم متجمعين عليها “
كان وقتها ماجد بيحكيلهم قصه عمر وان ليه هما مش بيحبوا يزعلوه لان زعلهُ بيقصر علي نفسيتهُ
____________
_ايات:سلام عليكم.
=وعليكم السلام ورحمه الله وبركاته.
_ انا اسفه ياجماعه ليكوا كلكم  
=ليل بلُطف:حبيبتي إحنا مقدرين موقفك ومش زعلانين حصل خير سوء تفاهم واتحل.
_مؤمن:متزعليش ده قضاء وقدر بس لازم تتحكمي ف عصبيتك انا بعتبرك اختي لان ماجد اخويا ولو اختي ف نفس الموقف هقدر خوفها لكن هنصحها تتحكم ف نفسها .
_عندك حق يابشمهندس .
“مى وعمر جاين ب ابتسامه “.
_عمر: منورين ياجماعه ،هي البت دي تلزمكوا ف حاجه.
=مى:يابني إتلم بقي انا سكتالك من الصبح .
“الكل بصوا لبعض ب ابتسامه علي هزارهم مع بعض “.
_ايات: افهم من كده ان عمر عرف يضحك عليكي ويصالحك!
=مي:للاسف حصل.
“بيعدل القميص بغرور ” 
_ايات: اهو شوفتي ياستي مش هنعرف نتكلم معاه تاني .
=لا لا لو زعلك ولا اتنك عليكي كلميني بس .
_عيني حاضر ،زعلانه مني!
=لا حصل خير مفيش حاجه.
_اسيل:ينفع كده جايين تتخانقوا ف سبوع عمر الصغير !
=عمر:ده حدث تاريخي ده ان عمه اتخانق مع واحده وهيتجوزها  لما يكبر هحكيلهُ.
“كلهم بصوا بذهول ل عمر ومي”.
_مي بتوتر: عمر ايه اللي بتقوله ده ! 
=عمر:عروسه وبتتكسف بقي ياجماعه .
_مى:لأ ياجماعه والله متصدقهوش..انا موافقتش
=ندى:جايباكي السبوع عشان تعبانه ترجعي عروسه !عصر السرعه ده ها .
_يابنتي موافقتش والله.
=بذمتكم انا عريس يترفض!ندى بعد اذنك اقنعي صاحبتك عشان هي عندها فرصه تفكر دقيقتين بس 
_ندى:دقيقتين !دي لو عارفاك من يوم م اتولدتك مش هتوافق عليك ف دقيقتين 
=وانا بقول انك هتساعديني!.
_ماجد:علي قد ما انا مصدوم من السرعه دي ،علي قد ماانا مبسوط عمر عمروا ما إنجذب لبنت لدرجه انه يطلبها للجواز ف شوفي معاد مع باباكي نيجي نتقدم .
_ياجماعه انا والله ليا ظروفي الخاصه اللي تمنعني موافقش علي اي حد حاليا مش عمر بس.
=عمر :هنعدى كل حاجه سوا يامي .
_ايات:متضغطش عليها ياعمر اديها فرصه تفكر هي لسه متعرفكش واكيد اتلغبطط من طلبك بالسرعه دي
=ايه الغريب ف اني شوفت واحده عجبتني طلبتها للجواز هو انا لازم العب بيها وبمشاعرها واعيطها وانكد عليها واسيبها وارجعلها وف النهايه افكر يا اسيبها يا اتقدملها !!!!”بعصبيه”مي انا عايزك  ..مش موافقه عليا عشان عيني قولي غير كده متقوليش مبررات.
_مش من حقك تتعصب عليا ياعمر بس عمتا انا الشكل مبيفرقش معايا .
= ايات:عمر براحه ف ايه!
=عمر:انا اسف ..فكري براحتك يامي ..فكري مره واتنين وعشره وعمتا ف وقت الخطوبه هتعرفيني اكتر واي حاجه مش عجباكي فيا هغيرها .
_افرض العيب مكنش فيك العيب كان فيا انا !.
=هحب عيوبك قبل ما احب مميزاتك متقفليهاش لان هلاقيلك مخرج لكل حاجه هتقوليها .
“مي من جواها إرتاحت لعمر وحَست انه عوض وإنها صدفه جمعتهم سوا عشان يكونوا من نصيب بعض بس جواها رهبه وخوف ليكون شخص سئ،..فاقت من شرودها علي صوته وهو بيقول قولتي ايه!.
_حاضر ياعمر هفكر وأرد عليك.
=هستني ردك ..
_ماشي.
=ايات:هاتي رقمك يامى .
_ماشي “بتديلها الرقم ” ..بيباركوا ل اسيل وماجد وبيمشوا ..
_____________
وهما ف الطريق 
______________
_ندى:مرتاحه يامى!
=اه مرتاحه بس متلغبطه
_عشان الموضوع جيه بسرعه ولا عشان عينه!
=لا حقيقي مش باصه لعينه ولا باصه ان صحابي هيقولوا عليه ايه ف الغرح لما يشوفوه ولا كلام الناس بس انا متلغبطه وحاسه اني لسه متعافتش من الموضوع القديم إزاي هدخل علاقه جديده!!
_صلي استخاره واي اشاره هتجيلك من ربنا ..قولي ل أيات اخته.
=خلاص هعمل كده .
_بس وافقي الولد شكله كويس
=تفتكري!
_اه والله .
=حاضر ،هصلي استخاره الاول.
_ماشي ياحبيبتي ..
______________
علي الجانب الاخر .
______________
_ايات: عمر انت ارتاحت للبنت !
=اوي ياايات ..خايف اقولكم اني حبيتها تفتكروني بأفورها ..بس انا كنت بسمع عن حب من اول نظره مكنتش اعرف انه بجد
_ماجد:البنت شكلها محترمه وكويسه لو فيها الخير ربنا يجعلها من نصيبك ،بس نفترض وافقت هتعمل ايه ف دراستك!.
=هخطبها وهستني اخلص اخر سنه ليا اهي ربنا يكرمني وانجح فيها هناك ..وبعدين هرجع هنا هاخد سنه جيش ونتجوز كل الموضوع سنتين تكون هي جهزت نفسها لو حاجه نقصاها  
_توافق تعيش هنا ف فيلا بابا!
=اه طبعا اوافق ،ما تصفي شغلك هناك وتعالي عيش هنا ويبقي البيت مفتوح بيك وتكون بدل بابا الله يرحمه 
_فعلا كنت ناوي اعمل كده.
=اسيل بفرحه:بجد ياماجد .
_اه ياحبيبتي انا عارف انك مكنتيش مستريحه هناك واهي جت الفرصه انا هفضل مدير الفروع اللي هنا واخلي حد من زمايلي يكون بدالي هناك  ..
_نور: طب وانا ياابو نسب!
=انت بقي هتيجي معايا وهتبيع الشقه اللي جبتها هناك وتحطهم هنا ف البنك وتجيب ايات ونعيش كلنا ف فيلا واحده ..وعمي فؤاد هو اللي هيكون بدال بابا الله يرحمه 
_فؤاد:ربنا يباركلك يابني ،احسن قرار والله.
=سعد بخجل: وانا ان شاء الله ربنا يكرمني انا وسمير وناخد شقه برا نعيش فيها احنا والجماعه.
_ ماجد :ما تقولي حاجه يامرات عمي لإبنك ..انت من لحمي ودمي انت تقعد انت وسمير ومراته ومرات عمي ومراتك ووالدتها قبل مني اصلا كلنا هنتجمع ف بيت واحد 
_سمير:بس .
=فؤاد:من غير بس،انتو كلكوا ولادي وهتقعدوا قصاد عيني مفيش كلام تاني بعد كلمتي.
_ثُريا بِ ابتسامه:دايمًا مفتوح بحِسك ياافؤاد 
=وبحسك يامرات اخويا 
_يارب
_______________
علي الجانب الاخر
__________________
_جعان يالميس.
=انت فِ ديدان ف بطنك!تعالي كُلني 
_معرفتش اكل ف السبوع.
=امال مين اللي خلص نص الفرخه!
_سيبت منها دبوس عشان الاتيكيت 
_إتيكيت !!!
=ايه يابتاعت لميس دي انا .
_اااه كويس فكرتني “بتقلع الشبشب”..
تعالي هنا يامحمد ..اعملي فيس سميه لميس دي انا .
=معتز بتريقه:سميها لميس الجامده دي انا 
_مش عيب علي قرعتك لما اسمي نفسي لميس الجامده ايه وضع رجولتك .
=انتي ف 2021 يعني ايه عاوزه تسمي نفسك لميس دي انا 
_ انت مالك انت ..امال انت مسمي نفسك ايه علي الفيس اللي خونتني عليه!
=يادي الفضايح الواد قاعد
_محمد:والله عندو حق يخونك.
=”بتضربه علي كتفه” ما انت هتطلع عدل لمين يعني .
_ معتز:مثلا يعني هيطلع عدل لامه !
=بنبره تحذير:معتز لم الدور احسنلك ها.
_مش هلِم حاجه 
=قلبك جامد يعني !
_محمد:بابا قلبه جامد ياماما عشان مسمي نفسه معتز القناصه اللي نظره منهُ برصاصه .
=”بتضحك” يالهوي وبتتريق عليا ياقناصه ايه الحلاوه دي يا زوز ياشقي ياولا يالعيب .
_متكسفنيش بقي يالولو الله .
“بتقرب عليه وهي بتضحك ” لا لا بس قولي ايه اللي مقوي قلبك كده ياقناصه كرشك ولا قرعتك ولا بؤك اللي مفتوح اربعه وعشرين ساعه علي الاكل !”اختفت ضحكتها وبصت بتحذير” ايه ياقناصه بتخوني مع مين تاني!.
=بكل ثقه”تليفوني عندك فتشي فيه براحتك
_ قدام واثق كده يبقي عامل حسابك وماسح كل حاجه صح!
“بيتجاهل كلامها ودخل اوضته”
_واد يامحمد تعالي افتحلي الموبايل ده .
=ماما بابا زعل.
_ افتحلي بس اتاكد انه مش بيخوني وهخش اصالحه.
“بيفتح الموبايل بيدور ف كل الابليكشنات مش بيلاقي حاجه .”
= ظلمتوا ..طب هات الموبايل ده وروح نام يلا.
_ ماما انا جعان.
=يارب عايشه مع ديناصورات ما صدقت واحد نام من غير عشاء ،ف تونه ف التلاجه روح كلها .
_مش عاوز تونه
= ف جبن ف التلاجه روح كل يلا.
_ماشي .
“بتسيبه وتدخل الاوضه اول ما لميس دخلت الاوضه معتز بيحط المخده علي وشه ” لا لا متحورش وتعمل نفسك نايم..
= لميس متضايقنيش لو سمحت.
_ بتزعقلي !
= انا كده مزعقتش يالميس.
=والله ! وقالب وشك ليه!انا كنت بهزر وبعدين انا مفتشتش ف تليفونك ..تليفونك اهو
_ انتي لسه بتشكي فيا يالميس وانا سامعك وانتي بتقولي لمحمد افتح التليفون شكلي ايه قدامه وانا خاين وامه بتشك ف ابوه
=خلاص متزعلش يامعتز .
_نامي يالميس.
=خلاص يامعتز متزعلش
_ ياستي مش زعلان نامي.
=معتز
_نعم
=بحبك ،خلاص بقي
_وانا بحبك نامي 
=مش هتاخدني ف حضنك!
_من امتي ده!
=من دلوقتي يلا .
“بيفرد دراعه” ..
تعالي .
“ب ابتسامه” ..جيت اهو.
_متزعلش بقي ها .
=مش زعلان،بس انتي بتحبيني!
=اه بحبك اوي .
_قد ايه 
=قرعتك.
_ياااه يبقي بتحبيني كتير اوي .
=”بتضحك شوفت بقي”.
_تصبحي علي خير ياحبيبتي.
=وانت من اهل الخير ياحبيبي
____________
علي الجانب الاخر
_____________
_ كلتي ياتيتا فاطمه !
= اه ياحبيبتي 
_طب يلا عشان تنامي 
=حاضر تصبحي علي خير.
_وانتي من اهل الخير ياتيتا.
=مامي هنام مع تيتا 
_لا عشان تيتا تنام براحتها.
=لا سيبيها تنام جمبي ،يلا ياعائش .
_يلا ياتيتا.
_______________
بيدخلوا الاوضه 
__________
_تيتا احكيلي حدوته
=طب نامي واتغطي كويس وبكره هحكيلك قصه دينيه حلوه اوي اوي .
_حاضر ياتيتا،تصبحي علي خير
=وانتي من اهل الخير ياحبيبتي
___________
علي الجانب الاخر
____________
_ايه ده بتعملي ايه!
=مش بعمل 
_ ف ايه ياليل 
=مفيش
_امال بتاخدي مخده وغطا ليه
=هنام برا.
_وده ليه يعني
=كده 
_متعصبنيش ف ايه
=قولتلك مفيش هنام برا انا حره.
_مش هتنامي ف حضني يعني!
=لا مش هنام ف حضن حد
_حد !طب انا عملت ايه!
=معملتش 
“بتخرج برا بتنام علي الكنبه “..
“بتشغل التلفزيون علي القران “
“مؤمن بيقرب عليها “
طب ف ايه !
=قولتلك مفيش يامؤمن مفيش
_اول مره من 17 سنه تنامي بعيد عني..
=ماشي ،سيبني انام بقي
_طب عملت ايه!.
=مزهقتش من السؤال ده!
_لا مزهقتش منك ولا بزهق
=طب روح نام يامؤمن.
_مبتتكلميش معايا كده غير وانتي غيرانه لان حتي ف زعلك بتكلميني احسن من كده.
=وانا هغير ليه عادي اتكلم مع ايات براحتك ولا غيرها حتي عادي ولا يفرق معايا
_ ايات!! مش قولتلك غيرانه! طب انا موجهتلهاش غير نصيحه.
=قالت بعصبيه: وتكلمها ليه وتوجهلها نصيحه ليه ولا زفت هي صغيره م تخلي اخوها يقولها 
_طب خلاص اهدي وغلاوتي عندك اهدي
= انا هاديه مش شايفني بشد ف شعري
_طب خلاص طيب 
= خلاص ايه!
_متزعليش مش هكلم حد تاني.
=ولا تكلم عادي يعني.
=بجد والله.
_اه عادي ميخصنيش.
= امال يخص مين ..
_يخص ايات .
“بتغطي وشها “.
“بيشيل الغطا”
_ ليل مش هعرف انام وانتي مش جمبي 
=ليه صغير!
_اه عيل صغير متشعلق ف حضن امه ..إتَاخرِي بقي متبقيش رخمه ..
“بتديلهُ مساحه ينام فيها جمبها “
“بيفرد دراعها وينام علي ايديها ..بيقول بتلقائيه :ما تحكيلي حدوته ده انتي ام قاسيه
=مؤمن بطل استفزاز ونام 
_ محدش يملى عيني غيرك
= اهو كله كلام 
_ لا مش كلام وانتي عارفه.
=لا مش عارفه حاجه .
_مش عارفه اني بحبك.
=نام قولتلك .
_طب حاوطيني ب ايدك احضنيني بنِفس عشان اعرف انام.
=مؤمن انت مش صغير نام مش هتحايل عليك.
_”بيبص علي بطنها” عشان بس تكون شاهد علي أمك بتزعقلي وتتعصب عليا ..انا هنام ياست ليل 
=ايوه نام.
_طب تعالي جوا.. الكنبه ضيقه وهصحى رقبتي وجعاني..وجسمي متكسر
=انا مش هتحرك من مكاني روح نام جوا انت .
_ طب اوعي تزقيني توقعيني.
“كتمت صوت ضحكتها ” مش هرد عليك .
_ الله يخربيتك ياأيات ..طب اعمل ايه ياربي بس والله مقصدش وبعدين قولتلها انتي اختي.
=انا يوم م تيتا كانت ف المستشفي وكلمت سواق الاوبر انت بصتلي بصه خليتني اخاف انطق اسبوع.
_بس ايه رايك فيا حِمش صح.!
=مؤمن انت مستفز 
_طب متزعليش.
=خلاص يامؤمن نام،والصبح لما اصحي كإن مفيش حاجه.
_بتغيري يالوله
_لا مبغيرش.
=شامم ريحه شياط طالعه منك دي !
_اتلم ها اتلم عشان مش طايقاك .
=بتموت فيا يالهوي.
_طيب.
=والله انا بطريقتي دي بتكلم علي خناقه تعيش معانا العمر كله.
_ايوه عشان تروح ل آيات ها.. ماشي 
_والله ابدا ظلماني اوي..بحبك والله
=طيب.
_تلجه ياربي مبتحسش.
=ماشي
_بيقلدها”:طيب ماشي نينينيني .
=هتنام ولا لا!
_بتهدديني يعني !
=اه بهددك .
_طب هنام خلاص .
=ايوه كده ارجع ف كلامك .
=تصبحي علي خير ياحبيبتي.
_وانت من اهل الخير.
=اسمها وانت من اهل الخير ياحبيبي.
_لا حبيبي دي وانا متصالحه معاك دلوقتي لا.
=ربنا شاهد انك مفتريه وقويه عليا.
_….
=انتي مبترديش عليا ليه ها !طيب ماشي ،انا هنام والصبح هتصالحيني انتي خدي بالك علي كل اللي عاملاه فيا ده يامفتريه ياجباره .
“ليل ضحكت علي طريقته لكنها مردتش عليه .. حضنها وبعد مرور وقت راح ف النوم”
______________
علي الجانب الاخر ف اوضه مي.
____
_”بتلف ف الاوضه من التوتر” يارب إلهمني الاجابه انا صليت استخاره ..بس اكيد الاجابه مش هتجيلي دلوقتي لازم احلم او علي الاقل احس براحه بعدها ..طب م الراحه دي انا حاسه بيها من بدري ..طب اعمل ايه..طب انا ليه متوتره ..طب ياترى هو هيطلع كويس ويحافظ علي قلبي ومشاعري!..يارب رتب لغبطي وشتات تفكيري خدت نفس طويل وهي علي يقين وثقه ف الله انه هيختارلها الخير ليها”حضنت مخدتها ونامت” ..
____________
علي الجانب الاخر ف اوضه عمر ..
____________
قاعد مستني مسدج من ايات تقوله فيها ان مى وافقت ..هو انا مستعجل ليه!
اكيد حتي لو معجبه بيا مش هتقولي كده علي طول هتستني شويه ،بس هي ممكن توافق عليا ! بس لا لا هي قالت انها مبيهمهاش الشكل .
طب اشمعني هي !عادي يعني هو الحب مفهوش اشمعني 
طب هو انا بجد حبيتها !
طب افرض قالت لا ..هقدر عادي اتخطاها !
“صوت جواه بيجاوب”
اه عادي يعني انت لسه متعلقتش بيها.
طب ازاي انا اول مره اتلغبط كده ويبقي كلي شغف وفضول اعرف رأى بنت فيا او اتقدم لبنت اصلا..طب انا اعمل ايه !
مفيش ف ايديا حاجه غير اني استني..هستني واكيد ربنا هيعوض صبري خير والخير هو وجود مي ف حياتي يارب اجعلها من نصيبي
“بيحضن مخدته وبينام”
____________
_علي الجانب الاخر.
____________
_تفتكر يانور مى هتوافق علي عمر!
=يابنتي هو ايه اللي ناقصوا ..شاب زي اي شاب تعرض لجلطه فقدت عينه قضاء ربنا ونفذ هنعترض! 
_ونعم بالله ..يارب توافق عشان ميتعبش عمر كتوم وزعلوا بيقلب علي نفسيته..هي لحد الان مردتش عليا
_ياحبيبتي ده عدا بس كام ساعه ازاي بس هترد عليكي فيهم لازم تاخد وقتها يوم واتنين وعشره كمان.
=عندك حق
_نامي ياحبيبتي ومتشغليش بالك وسيبيها علي الله.
_ونعم بالله تصبح علي خير ياحبيبي
=وانتي من اهل الخير ياحبيتي.
___________
علي الجانب الاخر ف غرفه سعد
___________
_سميه انتي عارفه اني بحبك!
=بجد ياسعد!
_اه والله بجد ،عايزك تخلي بالك من نفسك ومن ابننا  
=حاضر،بس لو طلعت بنت هتزعل!
_لا طبعا انا مش جاهل الذريه دي رزق سواء بنت او ولد وكل اللي يجي من عند ربنا خير ويكفي انها هتكون حته منك.
_بحبك اوي ياسعد
=”بيبوس راسها ” وانا كمان ياحبيبتي ..يلا عشان تنامي
_حاضر.
=تصبحي علي خير
_وانت من اهل الخير يارب
_____________
علي الجانب الاخر ف غرفه سمير.
_______
_بس موقف ماجد ده فرحني انه عاوزنا نقعد معاهم ف الفيلا .
=يا لبني ياحبيبتي انتي متعرفيش عمي فرغلي ده كان طيب وجدع ازاي لازم ولادوا يورثوا منهُ حاجه.
_ اكيد طبعا ..سمير
= نعم ياحبيبتي
_هو انت متضايق اني اتاخرت ف الحمل شويه.
=لا طبعا هتضايق ليه 
_يعني نفسك زي اي اب يكون عندك ولاد
=اكيد نفسي وربنا كبير بس ده غصب عنك هي شويه ادويه وهتكوني كويسه وزي الفل وهتجيبي عيال قمر زيك كده يملوا علينا البيت..
_يارب ،بس مش هيجي اليوم وتتجوز عليا!
=نامي يالبني عشان مقلش ادبي.
_طب جاوب طيب.
=لا طبعا انتي هبله اتجوز ايه !انا عاوز يوم ما اجيب عيال يبقوا منك.
=ربنا يديمك ليا يارب
_وليا ياحبيبتي..تصبحي علي خير.
=وانت من اهل الخير يارب ياحبيبي
______________
ف غرفه ثريا..
ياترى انت عامل ايه ياممدوح! بتاكل ولا لا ! عاجبك حالك واللي وصلتله ! مش عارفه اشيل منك رغم كل حاجه حصلت،من قتل يُقتل ولازم تكون دي النهايه مش هقول ده ذنبي وذنب دموعي وقهرتي كل ليله بترجع فيها بيكون ريحه جلابيتك كل يوم ريحه سِت شكل لكن هقول ده عدل ربنا وربنا مبيرضاش بالظلم ..انت اللي اختارت حياتك ياممدوح ..
“دموعها بتنزل “..
لا اله الا انت سبحانك اني كنت من الظالمين يارب ريح قلبي يارب  
_____________
ف غرفه ام سميه زوجه عم علي.
_________
ماسكه صوره عم علي ..ليه ياعلي سمعت كلامه ..ليه انت طول عمرك ف حالك كان ربنا هيحلها من عندو بس ليه تيتم عيال مسكينه ..بسببك انت بردو ابنه عينيه ضاعت علي موت ابوه ..
يارب هونها عليا وعلي بنتي يارب انت امرتنا بالدعوه ووعدتنا بالاستجابه يارب عوض بنتي وطبطب علي قلبي برحمتك وكرمك وارحم جوزي برحمتك 
_______________
علي الجانب الاخر عند ليل ..
حاجه الهمت ليل انها ولاول مره بعد مرور 17 سنه جواز تفتح تليفونه ..استغربت من الالهام اللي جالها بعد ما قربت تروح ف النوم ..معقول يكون حلم ! ..
معقول بعد السنين دي كلها اتجسس علي مؤمن ..لا لا اكيد لا ده وسواس من الشيطان بس صح.
“بعد اصرار وحرب داخليه قررت انها تفتح موبايل مؤمن..حاولت تنيموا علي المخده بهدوء ..وقامت من جمبهُ بخطوات بطيئه عشان ميحسش بيها ..
“دخلت الاوضه بتلاقي التليفون علي الكوميدينو”..
“بتفتحه بتدخل علي الماسنجر مش بتلاقي اي مسدجات غير من صحابه ..فتحت الواتساب لاقت رقم متسجل ب بشمهندس “م”ف بدايه المسدجات الرقم ده باعت مسدجين .. الاسم لفت انتباهه..مؤمن عندو الواتساب اللي مش بيمسح اي مسدج حتي لو الطرف التاني مسحها ..اول مسدج مكتوب فيها ..وحشتني والمسدج من تحت معمول علامه اكس بمعني انها مسحتها لكنها متمسحتش ف تليفون مؤمن .
والمسدج التانيه اسفه بعت استيكر بالغلط عشان كده مسحت المسدج ..
“ليل ضربات قلبها زادت قعدت علي السرير بعدم استيعاب ..ابتلعت ريقها ..خدت نفس طويل دخلت علي صورتها لاقيتها بنت ملامحها جميله وبشعرها.
قفلت الموبايل انهارت من البكاء ..
فتحت دولابها خرجت شنطتها وفتحتها ابتدت تجهز هدومها ..وهي بتتشهتف زي الاطفال ..علبه الاكسسور وقعت ..
“مؤمن بيقوم بفزع علي الصوت بيحاول يفتح عينه ويقفلها بيبص جمبه مش بيلاقي ليل  ..بيجري علي الاوضه اللي كان فيها مصدر الصوت ..قال بخوف :ليل فيكي حاجه ..ايه ده !!! انتي بتحضري هدومك ليه!.
_قربت عليه وبنظرات استحقار : طلقني.
يتبع..
لقراءة الفصل الخامس والعشرون : اضغط هنا
لقراءة باقي فصول الرواية : اضغط هنا
نرشح لك أيضاً رواية وقعت أسيرة في حبك للكاتبة غفران

اترك رد