رواية اسرار قدس الفصل الحادي عشر 11 بقلم زينب ماجد

رواية اسرار قدس الفصل الحادي عشر 11 بقلم زينب ماجد

رواية اسرار قدس البارت الحادي عشر

رواية اسرار قدس الجزء الحادي عشر

رواية اسرار قدس الحلقة الحادية عشر

يبس ظلهن وراك وعرگ ضيّهن نار
إبخهن بالصبر وألگاهن يسعرن عيوني
(عباس العبادي)
دخلت البيت وظهر محمل هموم
اذكر اول دخلتي لهالبيت … بنفس الخطوات امشي وراه .. جان كلبي فارق وعكلي ما عده سالفة
اثاريها المحبة هموم راحة بال الكلوب الفارغة
لو ضالة بلايا حب جان ما شلت هم ولا هسه اني حال الاسيرة الماخذيها قصب وبايكيها من احلامها
مثل وردة بنص بستان تزهر وانلكطت اعدام من مكانها وميها وكاعها حتى ترضي اناني رايد يشمها .
هيج احساسي واني امشي بوراه
بس العيون تدور .. تدور واحد وعدته ما اخطي هالخطوة وخليت بكلبه امل اردله وما جنت كد الوعد .. اتدور عيونه خاطر تشوف شلون تموت احلامه بكلبه.
بس ما شفت عيونه !
دخلت البيت
كال ابو وهب : تفضلي
حجاها بصوت مسموع وواضح وصاح : سرااااب
طلعت سراب من قرفة امها : ها يابه
– سلمي على مرت ابوج قدس، وينهن ذني ؟
دنجت باوستني وسلمت وردت عليه : امي وعفاف جاي يخبزن واميرة ما ادري عنها
– اندهي على عمتج كليلها ابوي يريدج
مشت فتحت الباب على الحاجة
واني عيوني اتدور البيت وادحك بالقرف واحساس الخنكة تارس صدري حجه : نزعي عنج العباة خافها مضايكتج
– اروح لقرفتي ؟
– انطري احاجيهن واوصيهن عليج خاطر لا احد تكربج لو تاذيج
سكتت ، طلعت الحاجة : هلا يمه .. اجيت
– هلا حاجة اكعدي عدي جلمتين احجيهن
كعدت وهي دايرة وجهه عني .. اجت اميرة طلعت من القرفة مالتي ما ادري شعدها بيها، من شافتني جن تصركعت وعيونها وجن نار .. كربت اطمش بلا حجي ، حاجاها : صيحي عفاف وعواطف
اندارت على سراب اشرتلها تصيحهن وهي اتدحك بالحاجة وبحركة بوجهه جن تستفسر منها ، اندارت عنها الحاجة ما ردت .
اجا مصطفى ابن اميرة كعد بحضن ابوه
وركض محمد يتسابق وياها خاطر يكعدون يمه .. ضحك وهو يحبهم ويلاشيهم زكحت بيهم اميرة : امشو غاد ابوكم مو بحالكم هسه .. سراب اخذي اخوتج كوووومي تحركي
ما رد ابو وهب اندار علي يكلي : جوعانة ؟
واندارلهم : غداكم شكثر بعدله ويجهز
محد بيهم جاوبته بس نور بته كالتله : بس يخلصن خبز يابه
دخلت عواطف وهي بثوب الخبز فحطانة .. حجت : يا ويل كلبي وجيت من الحر
اتفاجئت بكعدتي وابو وهب هين ضلت ادحك .. دخلت ووراها عفاف شايلة صينية الخبز تخطتها وخلتها جدام الحاجة .. شافتني بس سوت روحها ما مهتمة صاحت بنور : يولي ما تشعلين المبردة احتركتا حرك
حجت سراب : سحب هاي ما تتحمل مبردة مشغلين ماطور للبستان .
عفاف : طفي دطفي الماطور نعلبوه متنا من الحر .
تحجي ورافعة حاجبة ومتضايكة من وجودي مبينه .. دخلت ورا عفاف للحمام قسلن اديهن ورجليهن واجن .. حجت عواطف وهي تصيح على بتها : كومي صبي الغدا ما طوله الخبز حار
الحاجة مدت ايدها للصينية تبرد الخبز وتحط وحدة فوك اللخ ، حجه ابو وهب : هدن هسه واكعدن رايد احجي وياجن خاطر اكوم اصلي فرض الظهر راح يوذن
كعدن كلهن وانتبهله ، حجه : قدس مرتي وردت ليجاي وحالها من حالجن .. تالله الاسمع وحدة منجن محاجيتها لو غالطة عليها وما محترمة .. لا احط ظهرها واكسروا .. الكلام يتعداج يحاجة وما عليج زود بس انت جدامي مسؤله لو صابها شي … سمعتن ؟
عواطف : بالمبارك عليك تشوف خيرها ان شاءالله
اندار عنها وهو يدحك بيه ويكول : الله يسلمج
اميرة : ورضيت تطلع وتشرد من البيت وما عليها حساب ؟
ريسان : احاسب اللي اريد احاسبها واعفي بكيف ما جا بخاطري محد له جلمة يمي .
سكتت عن الرد وكامت بسرعة وهي تصيح بعفاف : كومي نكضي البتيتة على ما يخلص الوذان ونتغدا .. كومي
كامن اثنينهن وعواطف راحت لبتها تساعدها بتجهيز الغدا .. وام خطاب خلصت صفطت الخبز وصاحت على نور تجيبلها علاكة الخبز .. ابو وهب كام من مكانه راح يتوضى
الجهال يتصايحون بنص الهول وواحد يركض ورى الاخر .. كمت من مكاني خاطر امشي للقرفة مالتي .. لكيت وهب نايم بفراشي ، اندرت ابو وهب وراي حجيت وياه :
– فد كعده
صاح ابو وهب وهو يتعداني ويفوت للقرفة : وهببب كم من هين يول المرة تريد تحط غرضها .. وهبببب
شال راسه دحك على ابوه فوكه واني وراه
حط اديه على الكاع وعان روحه وكام .. ما لابس قميص فد الشورت .. صاح ابوه : انا جم مرة كايلك لا تتصلخ والبيت بيه حريم
– يابه نايم ما جان احد هين
طلع من القرفة وهو يصيح على اخته تجيب هدومة .. صك وراه الباب ابو وهب وضليت فد اني وياه بالقرفة : ارتاحي على ما يصير الغدا
جر سجادة مصفطة بطرف الشباك ومدها .. وكف ياذن .. واني جريت جنطة هدومي وفتحت البوفية ملابس وهب والبنات .. جاي اطلع بيهن طبت نور : بس ملابس وهب يريدهن
– اخذيهن هاي الملابس اريد احط ملابسي هين
– بس هاي بوفيتنا وين نحط ملابسنا عجل
– مدري فد اني هم ملابسي بجنطة اريد اصفطهن بخانة
جرت فد هدوم وهب وطلعت ضايجة لين كتلها شيليهن .. عفت الجنطة على حطتها ما فتحت ولا حطيتهن بالخانة لما عرف وين احط هدومي
كام يصلي
كعدت على الفراش .. صرت وراه وادحك عليه
كارهته وكارهه وجوده ووجودي يمه .. ثكلان على كلبي شلون راح اكابل خطاب وشلون راح اشوفو .. وشلون راح يشوفني
اتمنى الكاع تنشك وتبلعني
ملك الموت يمر وياخذني ولا اعيش اللي جاي اعيشه .. كلبي لشخص واني لشخص ثاني حفرة منين ما افتر اكع بيها وما اعرف شلون راح اخلص روحي واصل بر الامان واحط عد الرادني
دمعت عيوني واني ادحك بيه
خلص صلاته اندار يدحكلي : مهضومة ؟
– ماكو شي
– لا تتضايكين عزمت العمام والمنا ومنا العصر نسويلج هوسة وصفكة وجقليت .. كومي اعدلي روحج لا تضلين معبسة وجهج ياله
كام من السجادة لمها
واني كمت من مكان، سالته : هدومي وين احطهن ؟
– مو هاي البوفية
– نور تكول مالتنا
– خلها تولي ذبي هدومهم عد امهم تحير بيهن وكومي تغدي
حجاها وطلع
صاير واحد ثاني واسلوبه مختلف وياي
هو متقير لو شنهو الوراه ؟
شلت الهدوم رحت اوديهن لقرفة عواطف
مرت جاي تحط الجدر صاحت : وين وين موديتهن
– هدوم وهب والبنات بالبوفية مالتي
– مالتج شني من يوم يومها هالبوفية لهدوم جهالي
– ابو وهب كال انطيهن الج
حطيتهن بالكاع ومشيت .. طلعت برا صاح ابو وهب : وين يولي ؟
– فد اقسل
– داخل غسلي لا تغسلين برات البيت
تنهدت وفتت للحمام قسلت وجهي
ما جاتلني القسل روحي تريد تطلع ما هاوية الطبة ..
كعدت يمه
فد روحي محصورة مختنكة حيل اريد ابجي وما اكدر رايدة اصرخ احس اكو صرخة بصدري تسعر مثل النار بداخلي حيل خنكتني كل هالوجوه ما اهواها
مدن السفرة اشرلي اجي يمه
كعدت وهن كامن يخلن بالسفرة .. مركة بيتنجان وعليها كرفس وخبز ومواعين بيها بصل مكطع وطماطة .. الكل تجمع ياكل فد خطاب ما هو
حجه ابو وهب … اليوم منتظر خبر لو حصل وصار بحيل الله راح اجيب خروف واذبحو تا اشبعكم لحم
صفك وهب : هله هله ببوي صدك راح ناكل لحم
– بس ادعي ان شاءالله يصير
الحاجة : وشنهو الخبر ؟
– عملية جهادية بنص سوك بالثورة
حجت سراب : سيارة مفخخة ؟
ما جاوبها ، حجت عواطف : السوك مو بيه نسوان خط…. قاطعها
– اتزقنبي واسكتي مو انت التعلمينا شغلنا
الكل سكت ..
اني قمست بالمركة شوية وكتله : رايحة اعزل قرفتي
حط ايدو على رجلي وحجه : حاجة العصر راح يجون كرايبنا دزي وهب للسوك وكلوله شمحتاجين رايد اسوي صفكة وهوسة لقدس خاطر اليوم تكضي ليلتنا
هزت راسها وما حجت
دحك عليه وكال : معتازة شي من السوك يجيبوه الج
– لا ، فد اريد اروح للقرفة
– روحي
اختنكت حيل كمت من المكان
كومتي صارت بسرعة .. احس الكاع افترت بيه مديت ايدي اريد الزم بشي خاطر لا اكع .. بسرعة كضبني ابو وهب : شجاج
– دخت
رجعني كعدني هدا راسي وهو يكلي : يولي ما كلتي .. احاجيج مريضة انت ؟
– فد رايدة انام احس روحي تعبانة
صاح : سراب عينيها
كامتلي وسندت ايدي مشيت للقرفة .. دخلتني جريت ايدي : روحي تقدي اني راح ارتاح
عافتني ورديت الباب
شلت الفراش كلبتو ونكثتوا ونكثت المخدة وتمددت ودرت وجهي اخذت طرف من حجابي حطيتو بحلكي وكمت ابجي بخنيك خاطر لا يطلع حسي .
روحي ولعت .. احس نار بصدري تفور .
شوي واجا دخل للقرفة سويت روحي نايمة فد الشهكة بصدري .. من شافني نايم سد الباب وطلع .
كعدت ويا روحي شبعت بجي .. ما اعرف شلون راح اخلص من هذا السجن ما اريدو
العصر كعد ابو وهب طلع برا
ليقاد كاموا يجون خطار .. اجت سراب بيدها علاكة : هاي ابوي جابها الج
– شنية ؟
– هدوم زينة تلبسيهن جدام النسوان
هزيت راسي .. رادت تطلع سالتها : اكلج
اندارت : ها
– فد تعاي سدي الباب
دخلت وسدت الباب : شصار عكبي من شردت
– ما صار بس الحاجة كالت لابوي غلطت علينا وكامت تصيح وطلعت من البيت
– وخطاب
– شبي
– يعني هم جانوا يتعاركون على البيت
– عمام خطاب بيومها اجو وحجو ويا ابوي
وراها هم اجوا وابوي ما يرضى يطلع يكللهم كبل ال٦ اشهر ما اطلع انا زلمة عدي عوايل وجهيل جثيرة وين امش بيهم .. فعمه راد من ابوي ايجار على الست الشهر اليكعدهن
– وابوج رضى
– اي بس كاللهم ما انطي مال ست اشهر انطي كل شهر بشهره لخطاب
– وخطاب وين راح يعيش ؟
اخذ الدوانية خله بيها سرير اله وكام ما يدخل للبيت صارت غرفته ياكل وينام غاد ما يطبلنا ولا يجي ..
– هو موجود
– ما يجي بالنهار من تغرب الشمس يدخل للبيت وبالدوانية .. وابوي منعنا نخدمه لو نسويله اكل
– عجل ياهو اليطبخلو ؟
– مخلصها برا ولو راد الحاجة تسويله على الجولة ، ليش تسالين عليه ؟
– فد ردت اعرف شصار بعدين
– البسي وتعاي اكو نسوان بالهول متانياتج
– هسه
راحت تنهدت وتحسرت بقهر
لبست هدومي .. جن لابسة ثوب عدام
هم احمر بس ملمع .. ولبست شرشوبة تنحط على الراس للزينة .
طلعت عدهن سلمت عليهن ، نبتني وحدة : عيونج فاهيات اكو عروس بلايا كحل .. امج ما اشترتلج سواكاتج
حجت اميرة : بطرك العباة اجتي يولي شتحجين جايبها من الجول
فكت حلكها : ول يبختج جايبها من الجول .. غدي .. شنهو كليلات النسوان ويدور الجول
اميرة : بعد ما تدرين حظ الكبايح بالسما لايح
– اعلى كولتج يميرة .. وحظ الملايح بالكاع طايح .
ضليت كاعدة ما ارد
حجت وحدة : بس حلوة شنهي ابو وهب شايب والبت ازغيرة
حجت عفاف ؛ هو هالدورها انت ما تعرفين الزلم ما تهمهم هالسوالف المهم عدهم البت زغيرة تردهم لصباهم
حجت يمي مرة : عدي كحل تريدين احطلج
– بكيفج
طلعت من جنطتها كحل عرب وحطتلي
وطلعت حمرة حمرا حطت لحلكي وخلت شوية على خدي منا ومنا ودعكتهن ..
حجت وحدة : يا ابتسام شسويت بالبت دخيل بختج
– يا حلوة صارت مو احسن ما وجهه فاهي
– يولي يا فاهي لغمطي البت جانت شحلاتها
– لا هسه العيون فتحت بالكحل والخدود صارن طماطة
حجت : دعكيهن بعد يولي دعكي
كمت ادعك بخدودي
وضليت كاعدة .. اللخ حجت : شو احسج ضايجة ومكهورة شني مغصوبة على العرس
– لا
– عجل شجايلج ؟
– فد بطني توجعني
ضلن يحجن بيناتهن
شوي ليقاد وحدة كامت تقنيلهن وتنشدلهن وهن يصفكن .. وحدة كضبت صينية واللخ شلعت القبق مالت الترمز وكامن يدكن عليه ويقنن .
صاح وهب : ابوي جاب طلي .. ابوي جابلنا طليييي
الجهال طلعت تركض
والنسوان تصيح : يا شني ما شايفين طلي
طلعتله اميرة وعفاف يساعدنه
ذبح الطلي وسلخه وكاللها : شكثر يحتاجلو ويصير
كالتلو : ساعة يجهز
دخل سلم على النسوان من الباب وصاح : حاجة يمه .. كومي احكمي خاف ما يدبرنها وحيدهن كوميلهن .
كامت الهن .. دحك عليه
وصاح : شلونها ام فؤاد ؟
– شايف الخير ومهنى ان شاءالله
– الله يسلمج ..
سالته وحدة : صدك من الجول
– اهلها عايشين بالجول البت طينة من اهل الله هل رغبتها .. تا نجيبلنا وحيد زغيرون نلعب عليه
ضحكن وياه
حجه .. قدس
انداريتله .. اشرلي اجي
مشى جدامي : تعاي الوث رجلج بدم
جيتج خير .. العملية تمت على خير .. اشبعج لحم اليوم .. ياهو الحاطلج ذن السواكات
– المرة حطتلي
– تا تجهزين روحج الي الليلة … ها .. يا ملعونة
حط ايده فوك جتفي ومشاني يم الطلي
نسوانه طلعن جدر جبير وبريمز جبير نصبنه وغسلن اللحم وسراب تكشر بالبصل وتذب فوك اللحم والحاجة تحط دهن وتوجه بيهن
طلعن جدورة بعد
النسوان طلعن كلهن برا لان طفت الكهرباء وصارت ظلمة برا والمغرب كرب .. كامن يعاونن بالطبخ .. هدرن التمن والمرك على النار
اذن المقرب
اجو ازلام على ابو وهب
صاح على وهب خاطر يجيبلهم بساطات بالبستان يكعدون …
وهب يجيب بساطات
وسراب تجمع سجادات صلاة
ونور تحضر دولكات ماي وتكسر ثلج من القالب البترمز وتحط وتكاسر
وعفاف شالت المعجنة وراحت تخبر هي وعواطف مرة لخ .. واميرة يم الجدر وام خطاب واكفة وتسولف ويا النسوان الحطلهن فراش وكعدن .. اجت الكهرباء بس طابتلهن الكعدة برا.
اني واكفة ادحك احس ضايعة بنص هالهوسة
وبنص هالهوسة .. طب خطاب
عد ما شفته طب من الباب .. مدري شصاب كلبي .. العرك ما ادري مني نضح بسرعة وكلبي جن يدك دمام وبطني عصرها الوجع عصر
وكفت تبسمرت بمكاني ما اعرف شسوي فد ادحك بلا شعور .. هو ما انتبهلي .. دحك بالزلم هز ايده مشى سريع لباب الدوانية دحك النسوان .. بس ما صدت عينه عليه فات وما شافني .
ادحك ابو وهب .. كاعد ليقاد
ام خطاب يم النسوان .. اميرة وهب البنات
كلهم داير ما دايري .. فد محد دحك بوجهي وشاف حالي جان عرفوا وجهي شح لونه
طلع من الدوانية اجا وجهه بوجهي .. كلت شافني وبطني صار بيها اعصار .. فد ما ميزني اندار عني .. ورد رجع راسه بسرعة يدحك
وكف بمكانه
طشت مال عرك انصب فوكي
الحرارة البجسمي وصل لعيوني كامت عيوني تقوش
تكرب مني : شتسوين هين يولي .
شهكت وجنه ملك الموت يكربلي
انداريت منه عفته وراي ومشيت للمطبخ
صاح من وراي : ييييييييمه
ركضت امه
ظليت واكفة بالمطبخ اريد اكضب حيلي
الكاع معد تشيلني .. اسمع سراب تكل لاميرة : شبي خطاب
– شاف الشوفة وتصركع جنه حالي .. اكولي اشتغلي بس اشتغلييييي
مشت عنا
طلعت من المطبخ للهول رحت لقرفتي
اشهك وكوة اجر النفس من صدري .. دحكت بالمرايا اللازكة بعجين بالحايط .. المراية قديمة وبيها خيط سواد .. عيوني مكحلة والكحل نازل لجوات عيني والحمرة على خدي وحلكي ملغمطات .. ابشع مرة اشوف روحي بيها .. مو بس وجهي مشوه .. روحي تشوهت .. كلبي تشوه .. كلشي بيه تشوه
النفس الاجرة من صدري احس بالموت وياه
كامت دموعي تجري .. الكحل سال ويا الدموع وصار خطوط سود بدموعي
جاي ابجي ما احس الا خطاب دفع الباب وطب
فزيت من مكاني ادحك بيه .. حجه : خنتيني وجيتي وياه
طبت امه بسرعة : يول يالصكعة امشي خالك هين اطلع
– انعل ابو خالي يمه المرة مرتين تفتهميييين شنهو مررررتي
– ولك اطلع راح تهجم البيت فوكنا
– ينهجم البنية الي
– هاي الاجت وياه خطاب يمه نسوان هين لا تفضحنا … خطاااب
دفعتني … اطلعين من هين انت امشي
جرني : وعدتيني ما ترجعيله وعدتي تخابرين وعدتيني ما تصيرين لغيري وعوووودج وين
صفكت امه على وجهه ودفعتني من القرفة حيل
ركضت للحمام .. كام يصيح وامه تحط ايدها على حلكه وتحاول تطلع بيه
سديت باب الحمام قفلتو وهو اظلم
كعدت ابجي لكل حيلي ..
لشوية اجت ام خطاب دكت الباب عليه بالحمام : يول هين
– ها
– فتحي الباب احاجيج
فتحت الباب ، حجت : ابخت الله اذا تعرفين الله تصعدين تفهمين وتكليله ما اريدك وابعد عني .. اذا صل هذا حاله راح يشهرنا بين الاوادم .. صعدي يولي
– واذا شافوني
– انا اغطي عليج بس صعدي .. هدي ولو ما هديتي لا اخلي ابو وهب ينحر اركبتج .. صعدي
سوتلي مجال وصعدت للسطح
لكيته يدور بحركة .. من حس بحركة بناحيتي دحك عليه بسرعة .. شافني كربني بهمة : شعدج راجعة لهين
– ما رجعت براضي
– لا تكولين غصبوني انا كتلج خابري
– ومنين اخابرك
– رقمي اطيته الج قدس لا تحججين جاية تخونيني كبال عيني
– امي وعدتني اذا اردله راح اطلكني منه
– يا وعد يولي ناصبلج عرس وعازم الوادم جنها فاتحتي يولي مو عرسج .. رايدة تحركيني لييييش وعديتي ما تردين
– والله امي كالتلي اطلكج منه فد ردي
– وراح يكربج ياخذج الليلة يولي اني الخذيتج واني الرسمت روحي بجسمج شلون تنطينه روحج يولي شلون
– لو ما رضيت بالرجعة شلون اصير الك ما واح يطلكني
– وراح يرضى لو خذاج
– امي تكول اي ما اعرف شنهو البراس امي فد هي تكول هيج
– قدس لا تجننيني شلون ترضين تجين ويااااه شلون
– لا تشهرني ابخت الله عليك .. خطاب اني جاي اموت لا تتصورني رايدته والله من اشوفه يمي اتمنى اكتل روحي واخلص
– جهزي روحج نطلع منا اليوم
– لو جان هذا الحل اني الاكلك اخذني وياك لا تردني بس لو شردنا هم ما يطلكني
– ولا يطلك امشي اكلج
– اكتلني هين واكتل روحك احسن ما نجور بالحرام .. احنا مكتولين مكتولين تتصور لو شردنا ما يلكانا ؟
-دحجي يولي بالحرام لا ما طلعتيلي اليوم بالليل ومشيتي وياي لا اسمم عيشتج وعيشته ابالله ما اخليج تشوفين الراحة يوم لو اختاريتي
– اني اخترتو ؟ الله ياخذني لو جان اخترته
اني مثل طير مذبوح بعشه مالي حيلة ولا تكلي اشردي .. شردتنا لو بيها فايدة من ذيج الشردة نهج وما نرد بس مالها تالي .. نعيش بالحرام ونموت مكتولين
– سوالف المالج حيلة لا تسولفيهن وياي .. والله لو ما جيتي وياي واخترتي لا اسممج .. تحدرين هسا تلمين كل غراضج وتبلغيني وكت عشاهم اطلعين وياي .. بسرعة
– خطاب ما اكدر
ابو وهب كتال وينخاف منه .. اخوي راح بسببه ولو شردت عنه يجري على اهلي مثل ما جرى على اخوي
– مو كل عمرج تصيحين اخوتي عسرين هسه براسي تا اطلعين المحنة يولي
– يضلون اهلي اكلت وشربت ونمت وياهم والعشرة ما تهون واطي بيهم .. لو شردت منه ما يخليهم بحالهم
– عجل اختاري يا انا يا هو ولو اختاريتي هو وفضلتي اهلج عليّ مودعة بالله بس والله ما اخليج تتهنين .
حجاها وتعداني انداريت وراه ادحج ودموعي تجري .. مشى شوية واندار دموعه تجري : يولي رايدج تعاي
شهكت وكمت ابجي وجسمي كله يهتز ببجاي .. احس البجي يطلع من جوات روحي مو من عيوني
رد واخذني بين اديه .. اديه على عيوني وهو عاصرني بحضنه .. حط راسه فوك راسي وكام يبجي مثل ابجاي .
بعدتو من عندي
كضب وجهي .. حجيت : والله مو بيدي خطاب والله اتمناك فد مو بيدي امي الرادت هيج وناويه على كتله .. امشي لامي وساعدها تكتله تا نرجع سوا
جاي احجي صعدت امه
من شافتنا هيج زلغت وجهه وشهكت : يصخام التصخمتو واني الصعدتج اله تبعدين تكعين بحضنه يولي
عافني بسرعة ونزل وهو يمسح وجهه بعصبية وحركة .. كمت بمكاني ابجي ، حجت : نايم وياج صدك يولي
دحكت بيها ؛ امي القصبتي ارد والله ما رايدة ارجع لهين
– يولي احجي كاربج صدك
هزيت راسي واني امسح بوجهي .. لطمت وجهه : يولو لا ما بليتونا بمصيبة ما ترتاحون .. شلون كربج شلون اطيتي روحج يولي مو مهجومة معرسة انت يمتى اطيتي روحج
– سالي هو
ردت امشي .. جرتني : يولي ولو كربج اليوم ولكاج مو بنية
– يعني شنو يلكاني مو بنية
– خله يكربج ولو لكاج بهالحال لا احط الورور بيدا واكله اغسل عارها هالعار بت الجول
حجتها ونزلت
مسحت وجهي ونزلت وراها بسرعة
صارت نزلتنا سوية ابو وهب طلع بوجهنا حجه : شنهو يم احمد وينكم
– البت هاي اختنكت وصعدتها فوك هم احاجيها وهم انصحها تصف وياك واطيعك
دحك عيوني مورمة حجه : شجالو حالج يولي
– بطني توجعني جثير
– وشجاها بطنج بهالساع
– ما ادري
حجيتها وتعديتو .. كضبني : حالج ما يعجب وانا الما يعجبني اعدلي بس بطريكتي .. خوش
هزيت راسي
تبسم وحط ايده على جتفي : طبختو للطلي وكلتلهم لحمة الفخذ محد ياكلها غير قدس .. دهينة وراح اطيب بطنج .
– شكراً
– غسلي هالهوسة العلى وجهج وتعاي يلا خاطر نصب
– ماشي
رحت قسلت وجهي بالصابونة
ومشيت برا .. دحكت الدوانية ضواها مسدود .. تعديتها ورحت يم الجدورة .. ام خطاب واكفة دحكت علي من فوك لتحت .. تنهدت واندارت عني
جابوا صبوا بيهن تمن وفوكهن مرك وحطوا لحم وغطوا بخبز ودوا صينيتين للزلم .. وتلث صياني للنسوان .. فرشنا سفرة بالهول والنسوان كلها التمت
صاح ابو وهب كبل لا اكعد : عشاج لوحيدج لا تكعدين عزلتلج شلون لحمة اطيب كلبج
– اروح لقرفتي
-روحي اذا تريدين الله ذاب صرتج بهالغرفة من اجيتي ولهالساه غرفني ويا غرفتي
حجت وياه وحدة
احنا النسوان سرنا بالغرف
رداها : ابالله من جبتها ولهساه غرفتي ويا غرفتي
حجت اميرة : عجل الما شايف شيسوي بت وجايبها من الجول منيلها غرفة كبل وتصيرلها ..
ردها : كملي عشاج يولي
حجت المرة اللخ : عجل اهلها وينهم ابو وهب ليلة عرسها ولا واحد من اهلها هين شنهي ميتين
-انا من زمان ملجت عليها لجن صارت مشاكل ورديتها من ردت اخوها مات جتلوه الامريكان وامها كالت خذها بلا هوسة ما بينا واحد له خلك يفرح
– مساجين
– اي والله بعد قسمتهم شتسوي
– الله لا يطي هالامريكان ذول ولونا
– الله كريم نكضيهم ما يضلون
– ها
– والله وداعتج لا نردهم لبطون امهاتهم .. واليوم اول الغيث
– شنهو الصار
– فتحي الاخبار وشوفي الدنيا مكلوبه
– عليش
كام يحجي وياها
اني كعدت بقرفتي .. شوية قاد
طب ابو وهب وشايل صينية متبلة لحم وحجه : فتحي المبردة : خل نتعشى انا وياج
حطه كبالي
واني كمت فتحت المبردة .. من اشتغلت ولفحني هواها … جن ريحة خطاب بيها .. انعصر كلبي بريحتها .
انداريت .. كعد هو على فراشي وسرفن الردن
واشرلي يمه : كربي اكعدي هين
كعدت يمه .. ريحة اللحم طبت بخشمي
لاعت روحي .. كام يكلب بالتمن بيدو ويخبط شال وحط بحلكه ونكث من ايده بالماعون ورجع خبط وجر من اللحم وحجه : فتحي حلكج
– ما احس مشتهية
– دفتحي حلكج اكلي شنهي ما احس .. فتحي
وكلني بيدة .. لعبت روحي
لجت اللكمة بالزور .. فد احس روحي تريد تطلع
كام ياكل هو ويندسني .. كمت احط بحلكي فد ما جاي اتحمل الى ان حسبت روحي راح ازوع .. كمت بساع صاح : وييين
فتحت الباب ما لحكت زوعت بالباب على صفحة .. هو كام يصيح والنسوان كشت روحهن جاي يشربن جاي
ما بطلت روحي زواع كمت اذب من عمدتي ومرار كتلني احس روحي تطلع واني ازوع حتى دموعي جرت .. كمت كوة اصيح اريد ماي
صاح : يول سراااب جيبيلها ماي من خ…. بهالمسية الكلها زواع .. خلصتها علينا بطني وبطني ليما كششتنا منا الاكل
جابتلي سراب ماي ..
شربت .. صاحت عفاف : امسحي زواعج لعبت ارواحنا من كون كبر
حجيت ويا سراب : بيمن امسح
-اطيج وصلة زايدة لمي ورجعي عليه بوصلت المسح مسحي لماي وتايت حتى لا تضل زفرة
– انطيني
انطتني الوصلة مسحت ونظفت
وديت الوصلة للحمام .. طفت الكهرباء .. ضليت واكفة بالحمام اخذت نفس .. اسمعهم يريدون يطلعون.. كامن يسلمن
دنكت للوصلة مصتها بالظلمة وحطيتها على صفحة .. وطلعت اتلزم بالحايط .. كضبت احد .. حجه وهب : ها ياهو
وخرت منه .. اجت الكهرباء
دحك بيه ومشى عني .. رجعت طفت الكهرباء بسرعة .. وكفت بمكاني .. اجت ، جاي امشي لقرفتي .. طفت
دخل ابو وهب يصيح : ولد القنادر ما جاي تشوفون الكهرب تروح وتجي … طفرا الزايد ولد الجلاب
تراكضوا الكل اطفي بالظلمة
اجت اني واكفة كريب من باب قرفتي .. دحك عليه : شلون صرتي
– احسن
تعداني ومشى شقل التلفزيون .. مشيت للمطبخ حتى اشرب ماي .. سراب جاي تقسل الصحون حجيت : خطاب موجود ؟
– لا طلع ليش
اندفعت من وراي .. فزيت
طلعت ما خطاب دفعتني وهي تمشي وتتخطاني .. بمعنى سمعتني .. ظليت ادحك وراها … صاح ابو وهب : قدس
مشيت للهول .. اميرة مدنج جاي تجر الهول تمسحه .. مشيت صاحت : وعمى ما تشوفيني جاي امسح
ابو وهب : على كيف بختج يولي .. جيبيلي ماي قدس بس كون بارد
رجعت للمطبخ جبت الدولكة مالت الثلج ترستها من الحنفية وزوتها ماي وخذيتها اله .. شرب بالدولكة
ورجع يدحك بالاخبار
دحكت .. اخبار عن انفجار وشهدا ودم وهوسة .. هو يدحك وخابر واحد يضحك ويحجي وياه بلغز ويباركلو
سد الخط وكال : كربي هين يولي لشو كربي هليني اتهنى بهالخبر
كعدت يمه اخذ حنجي كضبه وباسني بخدي وكال : وجه خير عليه
اميرة صارت عيونها بكصتها وعفاف جانت كاعدة .. كامت بسرعة وراحت لقرفتها .. ام خطاب كالت : انا رايحة اقرا كم سورة من الكتاب الكريم ما طولها اكو كهرباء
ابو وهب مركز بالاخبار .. حجت اميرة : ليلتك يم عواطف
ما رد عليها .. حجت : منهو بحالي بعد لا يسمعلي ولا يشوفني اليكول جلب بهالبيت اني … مصطفى محمددددددددددد
ركضوا جهالها كدامها صفكت ابنها على راسه : دمشي امشي فوت جوا
وكع الجاهل على وجهه صاح ريسان : شجالج يولي اكوم اكسر عظامج هسه
دنجت لابنها وجرته من هدومه وشالته : امشييي
دخلت جهالها وصفكت الباب وراها صاح : هااااه مو اكوم امييييرة
اندارلي ويقمزلي : غارت منج
– والجاهل شنهو ذنبه يكع هالوكعة الكشرة على وجهه لين قارت
– اميرة تعشكني اكثر وحدة تحبني بنسواني
وانا هم احبها واحترمها .. بس راح احبج اكثر زعم انت الزغيرونة والزغيرون دومه مدلل
ما رديت
حجه : سبقيني للغرفة واكو ثوب بالعلاكة جبتو اليوم رايد اشوفج بيه
– ابيض جنه حرير
– اي هذا
– فد هذا اتك … العفو هدوم كصيرة يعني
– رجلج انا والي حك اشوف هاللحم الابيض واتهنى بيه .
– ما عرف البسو
– بس البسي يولي مثل الثوب شنهو الما تعرفينو
– فد استحي ما احب
– امشي عاد رجلج اني لا تكولين استحي منا وجاي .. امشي لبسي وانا لاحكج
مشيت للقرفة .. خذيت الثوب ادحك بيه شلحة كصير شلون البسه ؟ توني دخلت فات وراي : بعدج يولي ما لبستي
– فد كصير
كضب ثوبي ورفعه .. لزمت ثوبي : لا
خزرني وصاح : هششش لا تبعدين ايدي .. هالمرة سويتيها مرت الاخرة لو عديها اصير وياج مو خوش
حجاها واندار .. طفى الضوا وكرب داس دكمة المبردة اشتقلت .. من اشتقلت ودب هواها .. غمضت عيوني وجن خطاب يمي
كضب ثوبي رفعة
اذا انهره يكتلني واذا اعوفه تلعب روحي منه
كشعر جسمي ودموعي هلت .. غمضت عيوني وكمت اجبر روحي اتخيله خطاب حتى ارضاه وما ابعدو
جردني وما لبسني الثوب انهد عليه
فد ما يصير خطاب .. بحضن خطاب ما حسيت ولا شعرت بشعور الخوف .. وياه وعلى كثر ما تيهني بهواه .. كلشي وياه جان حلم ما بيه وجع ولا خوف .
فد هذا لا .. احسه شايب
كام يعض بزني ويعصر بيه .. قصبا عني ما اتخيله خطاب .. اتأذيت ولعبت روحي : فد ايدي .. جاي توجعني
– اكربي يولي
يجرني حيل وذبني للفراش .. كام يحاول وياي فد روحي ما تهوى .. استلذ من اني ابعده مني كام يزيد ويصير اعنف .. كمت ابجي حيل ..
عد ما كربني .. استقرب وكام مني
– يولي انت بنية ؟
– شنوه ، فد وخر
كام مني وذب الجرجف فوكي وشقل الضوا كمت اقطي روحي .. جر الجرجف مني : دم ما يطلع منج ليش ؟
– ما ادري
ذب روحه وكام يعصر ويجر بشعري .. كمت ابجي حيل ابعد بيه وهو يكضب بيه حيل .. دفعني : يولي مو بنية انت ويامن لاعبة كبلي
– ما عرف شلاعبة
جرني من شعري حييييل : يولي اتمشيهن براسي سوالف الثول .. ويامن نايممممممة كبلي احجيييي
– ما لاعبة ويا احد
ضربني جف ورجعني للفراش
وكام يحاولت مرت الاخرى وياي كمت اصرخ وابجي بيده وجعني حيل .. رد دفعني وجر دشدشاته يلبسها
بسرعة جريت الجرجف تقطيت بيه ، كضبني من راسي : يولي جاية تلعبين عليه بت القندرة لج ياهو اللاعبة وياااااه احجي
– ما لاعبة ويا احد والله
جرني من شعري ودنج عليه يخزرني ويحط عيونه بعيوني : احجي الصدك لا تخليني هسه احط جيلة براسج وانهيج
اندكت الباب .. صرخ ابعدواااااا من هين
حجت ام خطاب : شجاريلك خلنا نفتهم البيت انترس صياح
ذب هدومي وصرخ : لبسيهن
لبست هدومي وهو وفتح الباب وطلع .. وكفته ام خطاب : شنهو الصار
عواطف وعفاف واميرة وكلهم واكفين يريدون يعرفون شكو .. كمت البس بسرعة وهو دفعهم ومشى .. توني كمت ما احس الا هو يطب وبيده المسدس
من شفت بيدو سلاح كمت ارجف من الخوف .. كضب راسي وحط المسدس براس : يولي بالله لو ما حجيتي وكلتي ويامن مصخمة لا افرغ هالمسدس براسج ااااااااحجي
– ما عرف والله ما عرف
ثار طلقة جابها بالكاع خاطر يخوفني
كمت اصرخ والبيت انخبص خبص .. صياح وبجي وهو يصرخ ويكلي : احجيييييييي
جرني من شعري سحلني من القرفة والمسدسد بيده كم اجر بروحي منه دفرني برجله وهو يفشر عليه ويجرني ويكلي : اليوم ادفنج والله
كمت اصرخ من كل كلبي : عليكم الله خلصوني والله ما مسوية شيييييي خلصوووووووني …

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية اسرار قدس)