رواية هل نلتقي الفصل الأول 1 بقلم هاجر عصام

رواية هل نلتقي الفصل الأول 1 بقلم هاجر عصام

رواية هل نلتقي البارت الأول

رواية هل نلتقي الجزء الأول

رواية هل نلتقي الحلقة الأولى

قعدت ف كافيه قريب من كليتي اخلص مشاريعي اللي بقالي شهر بخلص فيها وانا اللي بخلص مش هي. حاولت افصل شويه واسمع اغنيتي المفضله( مغرم انا بيك) واندمجت لقيت ايدي بتجري على قلمي الرصاص وبرسم ملامح شخص في حدود 12سنه برسمها بكل دقه ما هي محفوره في ذاكرتي تقريبا دي الرسمه ال900 مش مبالغه بس انا عندي صندوق مليان بالصوره دي نفس الملامح نفس السن بنفس الحب اللي بكنه له. كريم صاحب العيون العسلي والشعر الاسود اللي كنت بحسده عليه صديق طفولتي الحلوه أو هو اللي خلاها حلوه انا من أصحاب adhd مكنتش بركز مع اي حد أو في دراستي بس كنت حابه اركز مع كل حاجه معاه اول تعارفنا كان عندنا 4سنين هو كان أكبر مني بشهور بس كان سابقني بسنين كان قادر يسيطر عليا بطريقه صح او بمعنى اصح طريقه حلوه حببتني في السيطره عموما، مع بعض في الدروس بنلعب مع بعض هنشرب حاجه يبقى زي بعض كنت بحب ملامحه اوي حببني في الفراوله مع اني كنت بقرف منها كنت بخاف من النقط اللي عليها فكان يجي قدامي ويتلذذ في طعمها لحد ما اكلتها وبقت من افضل الفواكه بالنسبالي، اول ما اتعرفنا قالي اسمك ايه قلتله نيللي قالي ياخساره كان نفسي يبقى اسمك ليلى وسابني ودخل الشقه بتاعتهم انا زعلت اوي ساعتها ليه سابني هو اسمي وحش ودخلت شقتنا وانا علامات الحزن مسيطره عليا
-ماما هو اسم نيللي وحش
=لا يا روح قلبي اسمك جميل شبهك
-طب ليه ابن الجيران لما عرف اسمي قالي ياخساره وسابني ودخل
=ممكن يكون متضايق من حاجه او زعلان بكره لما تلعبوا اسأليه
ضميت ايدي وحواجبي وبصيت يمين وشمال وقلت-لا انا مش هلعب معاه هو رخم ومش محترم ده سابني ومشي ازاي يسيبني ويمشي
ماما ضحكت عليا وعلى تصرفي طبيعي ٤سنين هتتصرف ازاي يعني
تاني يوم الباب خبط
=اتفضل يحبيبي عايز مين
_نيللي يا طنط
=انت مين يحبيبي
_كريم عماد جاركم الجديد ساكن هنا
ابتسمت= هو انت بقى اللي قلتلها ياخساره إن اسمها نيللي
_هي زعلت انا اسف جدا مكنش قصدي انها تزعل ممكن تيجي تلعب معايا انا معرفش حد هنا غيرها
=بس هي متعرفكش
_سلمت عليا امبارح يبقى تعرفني
=شكلها هتوافق اصلك شبهها،نيللي
-نعم يا ماما ..هو انت ياخساره معندناش بنات بتلعب هنا
_انا اسف يا نيللي كنت رخم معاكي امبارح
-انا كنت عايزه ابقى لطيفه معاك وانك ضيف جديد في العماره واضمك لشلتي بس انت قابلتني برخامه
مد ايديه يسلم عليها _انا اسف انا كريم جارك الجديد واتمنى انضم لشلتك
-امممم هفكر لفيت حواليه شكلك مش بطال تنفع تلعب معانا بس لو اتضايقت انا مليش دعوه مش هحميك كل واحد يحمي نفسه مش عشان جديد هتبقى خايف
_هاهاها لا متقلقيش انا قوي ومش بخاف واجتماعي جدا ماما بتقول عني كده دايما
-حلو يا سي كريم اما نشوف
_انتِ بتتحركي كتير كده ليه
ارتبكت كنت فاكره أنه تصرف طبيعي لطفله شقيه بتحب اللعب-بحب اتحرك كتير مبحبش اقعد لو قعدت بحس اني مخنوقه، يلا ننزل
_امممم ماشي
-ماما احنا هننزل بقى
=طيب متعملوش دوشه عشان الجيران
-طيب طيب
نزلنا نلعب الشله اتجمعت كانت مكونه من ٦بنات واربع اولاد وانا وكريم
-اعرفكم بصاحبنا الجديد
_لا انا اللي هتعرف عليهم انا مش صغير
وبدأ فعلا يتعرف عليهم ويضحكوا ويهزروا مع بعض مش خايف أو كاشش منهم هو فعلا اجتماعي ومحبوب اوي
_ليلى
اتعصبت عليه -اسمي نيللي محدش هنا اسمه ليلى
عيونه دمعت _انا اسف نسيت انا هطلع بقى عشان تعبت
حسيت اني ضايقته بس انا مسميش ليلى فسبته يمشي-تمام ماشي هتلعب معانا بكره
من غير ما يبصلي _هفكر
كملت لعب تاني كإن محصلش حاجه وبعدين طلعت انا كمان
-ماما الولد ده غريب وكل شويه يقولي ليلى ليلى لو دي صاحبته القديمه كانت جت معاه ميدورش عليها في حد تاني
=ممكن تكون حد قريب منه وفقده
-ده مش طبيعي يا ماما
=معلش براحه عليه ولو قالك ليلى تاني فهميه أنتِ عقلك كبير ومتتعصبيش عليه عشان ميكرهكيش
اتنهدت- حاضر يا ماما
دخلت نمت وانا ضميري بيأنبني هو اكيد زعل انا كنت وقحه اوي معاه مع أنه لطيف اوي وجميل بكره هعتذرله الورده بتاعتنا طلعت ورده بيضا جميله هقطفها واديهاله واقوله انا اسفه لقلبك الابيض اللي شبه الورده دي متزعلش مني يا كريم وبعد ما جهزت الخطه نمت
تاني يوم
صحيت ودخلت البلكونه جري أطمن عليها الورده جميله احلوت النهارده اكتر اكيد فرحانه انها هتروح لكريم عندك حق يا ورده هو جميل اوي يستاهل انك تحلوي عشانه مسكت المقص وقصيتها وجريت على شقتهم كانت الساعه ١١ونص
رنيت الجرس-صباح الخير يا طنط
“صباح الخير يا قمر عايزه كريم
-ياريت يا طنط هو كويس
“اه يحبيبتي ماله
-لا لا مفيش اصل انا زعلته امبارح ف جيت عشان اصالحه
“طب اقعدي هنا وانا هقوله
-شكرا لحضرتك
_اهلا يا نيللي في حاجه
-اا اه شوفت الزرعه بتاعتنا طلعت ورده جميله اوي شبه قلبك اتفضل
_شكرا هي حلوه فعلا
-انت زعلان مني اني اتعصبت عليك حقك عليا بس انا بحب اسمي ولو الاسم اللي بتقولي عليه ده بتاع صاحبتك القديمه كان ممكن تجيبها معاك وانت بتنقل لكن انا اسمي نيللي يا كريم
_انا اسف اني نديتلك باسم غير اسمك وقابل اسفك
-هتلعب معانا النهارده
_لا
-ليه يا كريم انت شاطر خالص
_مش عايز اضايقك
-انت مش بتضايقني انت جميل
_خلاص هاجي العب معاكوا
-شكرا ليك جدا يلا سلام
_سلام
قطعني من شرودي وانا بفتكر حديثنا الحلو
نور- ايه يا ست نيللي طالعه معانا الرحله ولا لا بردو
نيللي -تسليم المشاريع قربت وانا لسه مخلصتهاش
نور – عشان الهانم قالت تشتغل فيهم كلهم مع بعض وتنجز وقت وهي اتسحلت اكتر
نيللي-اعمل ايه قلت كده احسن
نور- اتنيلي بس عارفه لو عرفتي الرحله فين هتقولي مواقفه
نيللي- فين
نور- الاقصر وأسوان
نيللي -احلفي
نور – يبنتي امال انا بزن عليكي ليه انا عارفه انك هتموتي وتطلعي رحله زي دي من زمان
نيللي- خلاص اتفقنا هقول لاهلي ونطلع هتبقى امتى وكام يوم
نور- يوم السبت الجاي هتبقى اسبوع
نيللي بحزن- كده هنرجع على التسليمات
نور -انتِ الوحيده اللي يعتبر مخلصتيش
نيللي -انت بتعايريني
نور -يا ست لا هاجي بليل اخلص معاكي شويه عشان نسافر رايقين
نيللي- شكرا يا اجدع صاحبه في الدنيا مش هنسالك الموقف ده
نور -طب يلا قومي عشان تقنعي اهلك وانا هجيلك على ٧كده
نيللي – اتفقنا
خرجت من الجامعه وانا ماسكه كل لوحي اللي مشتته أفكاري وهخلصها ازاي وبفكر هقنع ماما ازاي بابا هيوافق مع شوية إلحاح بس ماما لا،
ماشيه وانا بدعي يكون لسه ف اسوان ما نقلوش هموت على الرحله دي عشان اشوفه أقابله لو صدفه طب ياترى هيبقى نفس الملامح ولا اتغير لسه قمحي ولا لونه اغمق هيعرفني اصلا وصلت البيت وانا بالي مشغول بحاجات كتير انا مش عارفه اعمل حاجه فيهم
نيللي -مساء الخير يا ماما
الام-مساء الخير ادخلي دخلي كراكيبك دي واتغدي
نيللي- انتوا سبقتوني
الام-معلش أنتِ اللي اتأخرتي
نيللي- ماشي ماشي انسوني على طول كده
الام-ادخلي بلاش غلبه
نيللي-حاضر يا مرات ابويا حاضر
الام- والله لاوريكي مرات الاب بجد
نيللي -خلاص يا ماما قلبك ابيض الله وبعدين عايزاكي في موضوع
الام- كلي الاول وبعدين نشوف الموضوع
نيللي -حاضر
اكلت وغسلت الاطباق وروقت المكان عشان اكسب نقطه عند ماما وتوافق بس خلاص الساعه ٧ ونور هتيجي دلوقتي اكلمها امتى
جرس الباب
نيللي -حاضر
نور- جايه ف الميعاد مظبوط اهو كلمتيهم
نيللي- لا لسه كنت هكلمهم بس لقيت الوقت عدى
نور- طب خير نخلص الحاجه بتاعتنا وبعدين كلميهم
نيللي- تمام اتفقنا
نور- هاتي اللوح نشوف بتقول ايه واتنين شاي بقى عشان نعمل الشغل على رواقه
نيللي- انا خلاص بفنشهم يعني
نور- يا ست كويس عشان مياخدوش مننا وقت
نيللي- خدي اهم
نسيت أشيل رسمة كريم من كتر ما دماغي مشغوله
نور-حلو ده أنتِ ناقصلك حاجات بسيطه اوي، ايه الورقه دي
نيللي- لا لا مفيش
نور- حلو اوي الرسمه دي الولد ده جميل خالص مين ده
بلعت ريقي -حد كان صاحبي زمان
نور-ده حلو اوي فين ده
نيللي-معرفش اصلا انا معرفش ازاي رسمته زهقت من المشاريع لقيت ايدي بترسم الملامح دي
نور- وده اللي واخد عقلك
نيللي- عقلي ايه بس مفيش الكلام ده اصلا مش فاكراه نور-هعمل نفسي مصدقه حاضر
نيللي- طب خلصي عشان نخلص ها خلصي
نور-طيب متزقيش قال يعني انا اللي مش مخلصه شغلي
لحسن الحظ ان نور قريبه مني في المكان يعني في اي وقت عايزاها بتجيلي قربنا من بعض اكتر لما دخلنا الكليه بس متعرفش كريم ولا حكيت عنه لحد خليته ذكرى جميله جوايا وبس لحد ما أقابله اتمنى اني أقابله
نيللي -الوقت اتأخر يا نور
نور- متقلقيش قلت لبابا هبقى اكلمك تيجي تاخدني
نيللي- مش عايزه اتعبه
نور- يا ستي هو بيحب يخرج ويتمشى أنتِ مالك وبعدين احنا خلصنا اهو كل المشاريع كده تمام
نيللي- شكرا يا نور مش عارفه من غيرك كنت هخلصهم ازاي
نور- انا معملتش حاجه احنا بس فنشناها سوا يعني معملتش مشروع من أوله لاخره
نيللي-بردو شكرا يا صاحبي
نور- يا ستي العفو هكلم بابا بقى عشان الحق انام شويه بكره يوم حافل والمحاضرات والسكاشن
نيللي- هيعدي زي كل يوم
نور- على وشنا
نور مشيت وماما وبابا ناموا فضلت انا وذكرياتي
رنيت الجرس
كريم -حاضر , اتفضلي يا نيللي
نيللي-كنا اتفقنا الصبح انك هتلعب معانا
كريم – انا اسف مش هقدر
نيللي- بسببي صح
حاول يداري عيونه -لا خالص انتِ ملكيش دعوه
مسكت ايده -انت هتنزل تلعب معانا يا اما انا كمان مش هلعب
كريم- دي حاجه ترجعلك انما انا مش عايز العب النهارده
نيللي بغيظ- بقى كده يا سي كريم طييب
نزلت اجري على السلم بغيظ وهو مركز معايا ومقفلش الباب وانا نازله رجلي اتلوت ووقعت على السلم معيطتش ولا دمعت زي العيال بس مكنتش قادره اقف وعشان انا حظي حلو وقعت قريب من اسانسير العماره قمت بالعافيه وانا مش قادره ادوس على رجلي وبقنع نفسي انها اتلوت عادي معرفش أنه كسر بضغط على نفسي عشان مبقاش ضعيفه لحد ما وصلت الاسانسير وطلعت شقتنا لقيته لسه واقف على الباب مركزتش معاه بس لما لقاني بعرج خاف عليا وجالي
كريم- ايه ده مالك وليه مندهتيش عليا
نيللي- انده عليك ليه
كريم- شكلك وقعتي جامد
نيللي- شايفني بعيط
كريم-لا شايفك بتتألمي
مكدبش عليكم انا كنت هموت من الوجع وباين على وشي جدا
نيللي-لا ما بتألمش ممكن تسيبني ادخل
كريم-طب ممكن تسندي عليا
نيللي-لا
كريم- مش لسه هسألك ومسكني وانا مكنتش طايقاه خبط على الباب ماما فتحت
الام-مالك يا نيللي حصل ايه
نيللي-مفيش يا ماما رجلي اتلوت وانا نازله على السلم
الام- اتلوت ازاي لتكون اتكسرت
نيللي- لا إن شاء الله محصلش حاجه
الام- ادي آخرة اللعب في الشارع انا قلت بلاش
كريم-حصل خير يا طنط هي كويسه
نيللي- شكرا ممكن تمشي انا كويسه
كريم- عارف انك كويسه ووقعتي بسببي لانك كنتي متعصبه مني فلازم افضل جنبك
نيللي-لا مش عايزه حد انا هدخل انام
كريم- لما عمو يوصل وياخدك للدكتور هبقى امشي
نيللي-هتعمل ايه يعني
كريم- هفضل جنبك
الام- خلي التلجه دي على رجلك عشان متورمش
نيللي- حاضر
كريم- انا اسف عارف انك بتتوجعي
نيللي-انا مبتوجعش مش اول مره اقع
كريم- طيب يا نيللي أنتِ شجاعه وقويه عارفه انا كنت بقولك ليلى ليه
الفضول كلني ومتحمسه اسمع مين ست ليلى دي بس قلتله بعدم اهتمام
نيللي-براحتك
بدأ عينه تدمع وكإنه بيقول لعيونه بالله عليكي مش عايز ابقى ضعيف بالله عليكي عايز اتكلم عنها وانا بضحك قام وقف ابتسم ابتسامه حلوه اوي بانت غمازته وسنته المخلوعه اتنهد
كريم- ليلى دي تبقى اقرب حد ليا
ضحكته بتختفي مع كل كلمه وشه لونه بيتغير ملامحه بتتغير للحزن
ليلى دي اول حد مسك ايدي كانت كل خطوه ف حياتي هي أول من يشاركني بيها كانت قويه اوي حاربت مرض وحش ماما قالتلي هي انتصرت عليه أنتِ بردو قويه يا نيللي بتضايقي لما اقولك ليلى وانا بقولهولك لاني شفتها فيكي
الباب خبط كان بابا وانا حمدت ربنا أنه وصل عشان مش قادره اتحمل الوجع اكتر من كده كإن شاكوش عمال يخبط في رجلي
كريم- هفتح الباب ثواني
نيللي-بابا انا رجلي بتوجعني ممكن نروح للدكتور
الاب- ايه اللي حصل
نيللي- هحكيلك ف الطريق بس ممكن نروح بسرعه
كنت خلاص جبت اخري ومش قادره اكتم الوجع طفله عندها تقريبا ٤سنين أو اكتر بحاجات بسيطه كاتمه الوجع ده إنجاز
نزلنا ركبنا العربيه واول ما قفلت الباب دموعي اتحررت وعيط من غير صوت واول ما بابا وقف بالعربيه مسحت دموعي وخدت نفس عشان محدش يلاحظ دخلنا للدكتور وقلتله اللي حصل عمل اشعه عليها وطلع كسر اتجبست وقالي ممنوع اتحرك عليها شهر ونص وانا مبعرفش اقعد نص ساعه على بعض هاديه ازاي شهر ونص
نيللي- لا يا دكتور بالله عليك انا مش هعرف اقعد كل ده مش هعرف
الام- هي على طول بتلعب وتجري مبتقعدش هاديه
الدكتور- لا الحركه غلط على رجلك هتضرها اكتر
سكت ما هقول ايه انا السبب
في الطرف التاني كريم واقف في البلكونه مستني عربية بابا توصل عشان يطمن عليا وعلى وشه القلق
كريم- يارب انا من سنه وقفت نفس الوقفه دي مستني ليلى تيجي بس مجتش يارب انا عايز نيللي تيجي هكون جنبها دايما بس يارب مش عايزها تمشي زي ليلى انا مصدقت لقيت حد زيها معايا يارب

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية هل نلتقي)