رواية ميراث نور الفصل الثامن والأربعون 48 بقلم لينا بسيوني

رواية ميراث نور الفصل الثامن والأربعون 48 بقلم لينا بسيوني

رواية ميراث نور البارت الثامن والأربعون

رواية ميراث نور الجزء الثامن والأربعون

رواية ميراث نور الحلقة الثامنة والأربعون

” تنين ابيض”
بعد شويه دخل علينا بن القاف ومعاه حنوش ونصير
وقالولنا :
– مش هتصدقوا زيجا الخاين قال ايه !!
قولنالهم بفضول :
– أيه ؟!!
حنوش قال :
– حكالنا ازاى الساحر فصل قرينه عنه وحبسه علشان يعرف يخدعنا وقال أن المشكلة مش فى جوهر أبن المارد على قد ما هى فى أيسر الساحر ووافق يقولنا كل حاجة يعرفها عن أيسر بس بشرط .
قلتله :
– هو هيتشرط كمان!!
حنوش قال :
– هو شرط تافه يانينو !!!
حنوش بص لمارو وكمل كلامه وقال :
– الشرط ان مارو يسامحه!!
مارو قال بأستغراب :
– أسامحه !!! على فكرة الواد دا شكله بيخدعنا تانى!!
نصير قال :
– للاسف معندناش طريقه نعرف اذا كان بيخدعنا ولا لا, لأن قرينه مفصول عنه مؤقتا ومحبوس , مقدمناش غير ان أننا نصدقه خاصة أنه أنقذنا مرتين .
سندس قالت :
– على فكرة بقى انا حاسه ان الواد زيجا دا كان مجبور على اللى عمله .. انما من جواه هو حبنا .. والصراحة كان بينقى الخضار احسن من حنوش .
حنوش قالى :
– انا بدأت اتخنق من مراتك !! شوف احنا فى ايه وهى بتقول ايه !!
قلتله :
– على فكرة يا حنوش احنا ماشيين بدعوة سندس .
مارو قال :
– على جثتى اسامح الكلب ده .
نصير قال :
– يا عم سامحه كده وكده .. اللى فى القلب فى القلب ,خلينا نخلص يا مارو.
مارو قال :
– أبدا انا مش بوشين !!
حنوش بصلى و قال :
– شوفلك صرفه مع عيلتك دى بقى يانينو , أنا تعبت.
بصيت لمارو وزغرتله وأنا بقول :
– وله يا مارو بطل هبل متضيعناش , اعمل نفسك مسامحه واخلص .
مارو قال فى طاعة :
– حاضر يا والدى.
بن القاف قالى :
– طول عمرك سيطرة يا نور.. اه صح هى ايه العصاية اللى فى ايده دى ؟!!
قلتله :
– منعرفش ومش راضى يقولنا .
خدنا مارو وروحنا ناحية القبانى المحبوس فيه زيجا , وسيبنا سندس ونورا فى القبانى بتاعنا .
دخلنا على زيجا القبانى لاقيناه قاعد على الأرض جنب المنقد ,أيده ورجله مربوطين بجنازير حديد متعزم عليها وبيحاول يدفى نفسه قدام النار, أول ما شاف مارو قاله :
– مارو أنا أسف ,صدقنى كان غصب عن..
مارو قطع كلامه وقال:
– مش وقت تبريرات ، أتفضل قول اللى عندك بسرعة ولو ربنا كتبلنا عمر نبقى نتصافى بعدين.
حط وشه فى الأرض وقال :
– أنا اسف يا مارو انى خنت ثقتك بس صدقنى انا حبيتك زى اخويا وحبيت عيلتك كأنهم أهلى اللى مشفتهمش …..
مارو قطع كلامه وقال :
– بلاش النغمة دى يازيجا , قول اللى عندك ولو ربنا عدانا من الحرب دى على خير , أوعدك اننا هنقعد مع بعض ونتصافى !!
زيجا هز رأسه و قال :
– أيسر مش ساحر عادى أو مخضرم , ده من أقوى السحرة اللى شوفتهم , ومفيش ساحر وقف قصاده الا وهزمه وخد كل اللى عنده من كتب ومقتنيات .
كان بينتصر مرات بالمواجهة ومرات كتيرة بالمكر والدهاء , ووجوده فى صف جوهر , هو اللى هيقلب الحرب لصالحهم.
خاصة أن الشياطين اللى مع جوهر بالرغم من عددهم المهول واللى يعدى ال100 ألف , ألا أن أغلبيتهم متوترين و دايما بيتلفتوا حواليهم فى خوف وقلق, علشان مش متعودين على الخروج بره البير .
وده اللى لاحظه أيسر , فعمل صفقة مع جوهر و هى أنه يساعد جيشه ويساعده فى القضاء عليكم كلكم فى مقابل أن أيسر ياخد قلب مارو , علشان يعمل عليه تجارب ..
جوهر وافق على الصفقة , فأيسر مد الجيش بتاعه بتركيبات تقضى على الخوف والقلق اللى مسيطر على الشياطين اللى معاه.
ومش بس كده التركيبات بتقويهم وبتشرسهم زى الحيوانات المسعورة , ده غير انه حصنهم من النيران والكهرباء اللى كانت السبب فى فوزكم فى الحرب الاخيرة , و ..
حنوش قاله وهو متوتر :
– وأيه تانى ؟!!
زيجا كمل كلامه وقال :
– أيسر معاه كتاب فرعونى خطير !!
قولتله :
-كتاب ايه؟!!
قالنا :
-كتاب أسمه تحوت.
حنوش لطم وهو بيقول :
– كتاب تحوت!!يا نهار أسود ومنيل!!!!
وسأل زيجا وهو متوتر وقاله:
– الكتاب اشتغل معاه ؟!!
زيجا قاله :
– أها شغال معاه وجربه قدامى قبل كده !!
أبن القاف قال :
– بيعمل أيه الكتاب ده ؟!
حنوش قاله وهو مسهم :
– كتاب سحر فرعونى خطير جدا فيه تعزيمات بتمنح السيطرة على البحار والأرض وببكشف أسرار لغة الحيوانات، ده غير أنه .. أنه بيسمح بإحياء الموتى على هيئة زومبى وبيمكن صاحب الكتاب من التحكم فيهم .
نصير قال وهو بيلطم :
– زومبيز يعنى هيطلعلنا الميتين كمان يحاربونا .
ابن القاف قال :
– دا غير ال 100 الف شيطان !!
قلتلهم :
– لا بقولكم أيه!!!أهدوا كده علشان نعرف نفكر .
نصير قال :
– نفكر فى أيه.. الجماعة دول القوة بتجرى وراهم وبتهرب مننا , كتاب العزيف ودلوقتى تحوت , أحنا هنحارب أيه ولا أيه !!
قولتله :
– وفى كل مرة ربنا بينصرنا عليهم يانصير , أحنا محتاجين بس نهدى علشان نعرف نفكر ….
قطعت كلامى لما دخل علينا واحد تبع أبن القاف وهو متوتر وقال :
– ألحق ياقائد فيه جيوش شياطين جايه من بعيد و بتقرب علينا !!
نصير قال :
– الحمد لله مش هنلحق نفكر!!
جرينا كلنا بره القباب ماعدا زيجا اللى سيبناه متكتف مكانه .
أبن القاف جرى ناحية القبانى بتاعه و خرج و فى أيده بوق نفخ فيه , فكل الجنود اللى فى القباب خرجوا وأتحركوا بسرعة ونظام زى خلية النحل.
وزعوا على بعض وعلينا الاسلحة والدروع وأصطفوا كلهم ورا السور.
مارو ماخدش القوس اللى ادهوله أبن القاف , وتمتم بتعزيمات على العصاية بتاعته , فأتحولت لقوس طويل.
مط وتر القوس فظهر من العدم سهم مدبب ونصله بيلمع !!!
بصيناله بأستغراب , فبصلنا وهو مبتسم .
ابن القاف أشهر سيفه وقال لحنوش :
– أركب فوقيا لما أتحول هنروح نستطلع جيش الشياطين ونرجع تانى !!
وتمتم بتعزيمات على سيفه اللى بقى لين زى الحزام, لفه على رقبته وأتحول لذئب.
حنوش ركب فوقيه, فأبن القاف (الذئب ) جرى بيه وخرج من البوابة لخارج السور .
قلت لمارو :
– خليك هنا وخد بالك من نورا وسندس وماتجودش فاهم !!؟
هز رأسه فى طاعة.
بصيت لنصير وقولتله :
– يلا بينا يانصه.
نصير لمسنى فبدأت أتحول لتنين لونه ابيض , أكتمل تحولى ونزلت جناحى لنصير فركب فوقيا وهو بيقول :
– انا خليت لونك ابيض عشان متبقاش مكشوف , تمويه يعنى.
هزتله رأسى و فردت جناحى وطيرت فوق فى السما لحد ما وصلت للسحاب.
بصيت على جيوش الشياطين اللى جايين من بعيد جدا و بيتحركوا فوق الجليد بأعدادهم المهوله.
جيوشهم كانت عبارة عن دببة وذئاب ضخمة لونها أسود راكبها شياطين متشكلين على هيئة بشر بس شكلهم غريب.
كنت شايف ملامحهم بنظر التنين الحاد.
عينيهم مشقوقة بالطول وليهم أنياب طويلة خارجة من بوقهم، ودانهم مدلدله على أكتافهم ، لابسين فرو حيوانات ودروع معدنية وفى أيديهم الاسلحة.
بيقودهم شاب بشرى ضخم الجته، راكب فوق دب أسود ضخم فعرفت أنه جوهر ابن نيللى …
نصير بص على الجيش بتاعهم باعدادهم المهولة وبص على الجيش بتاعنا اللى ورا السور وقال :
– أسترها معانا يارب ده احنا غلابة !!
شوفت أبن القاف وحنوش وهما راجعين ناحية السور , فضميت جناحاتى وطيرت ناحيتهم على ارتفاع منخفض.
طيرت جنب أبن القاف (الذئب ) وهو بيجرى وفوقيه حنوش فقالنا :
– شوفتوا أعدادهم !!
نصير قاله :
– مش بقولك ايام سوااد.
ابن القاف وصل عند بوابة السور ووقف قدامها ومدخلش وأنا وقفت فوق السور.
أبن القاف نطر حنوش من فوقيه ورجع لهيئتة البشرية وقالى :
– نينو روح خد مارو وطير بيه بعيد عن هنا بما انهم بيتعقبوه هو ,فانا عايزك تغير اتجاههم .
نصير قال لابن القاف من غير ما يبصله:
– معتقدش !!
بن القاف قاله بأستغراب :
– متعتقدش ايه ؟!!
نصير شاور بأيده على مارو واللى كان بيصعد فوق جبل تلجى !!! ، وقال :
– مارو أتصرف من دماغه وبيجود..
حنوش قال :
– هو رايح فين ؟ !!
نصير وجه كلامه لحنوش وقاله :
– حنوش خليك انت عند سندس ونورا ,وبسرعة يا نينو نلحق البغل ده نشوف رايح فين.
فردت جناحى وطيرت بسرعة فى اتجاه مارو فى نفس الوقت اللى جرى فيه ابن القاف ناحية جيشه وقادهم بره السور واتمركزوا قدامه كحائط دفاعى .
وصلت لمارو واللى كان وصل لقمة الجبل، نصير قاله واحنا طايرين فوقيه :
– بتعمل ايه يا مارو , هو مش ابوك قالك متجودش !!
بصله وهو مبتسم ومردش عليه.
ومط وتر قوسه واطلق اسهم كتير جدا ظهرت من العدم وانطلقت فى السماء اتجاه جيش الشياطين اللى كان لسه بعيد .
الاسهم سقطت من السما و شوفتها بتصيب رؤوس الذئاب والدببه اللى كانوا بيجروا بسرعة رهيبة.
مفيش سهم واحد اخطأ هدفه.
الذئاب والدببه وقعوا فجأة على الارض واتقلبوا فوق الجليد فسقط من فوقيهم الشياطين وكعبلوا الذئاب والدببه اللى جايين وراهم، فحصلت فوضى وثغرات فى الجيش .
مارو مط قوسه تانى واطلق دفعة جديدة من الاسهم واللى كلها برضه صابت اهدافها من الدببه والذئاب .
نصير قال:
– حلو نشن على الهجي..
مكملش كلمته اتفجأنا بسهم بيعدى من جنب دراع مارو بعد ما خدشه.
بصينا على مصدر السهم لقيناه الهجين جوهر، واقف بثبات على ظهر الدب برجله وهو بيجرى ، وبيحضر السهم التانى واللى اطلقه فى اتجاه مارو.
السهم اتحرك بسرعة غريبة ووصل عندنا قبل ما عينا تدركه واتفجأنا بيه بيصيب كتف مارو.
مارو توازنه اختل ووقع من فوق الجبل , طيرت بسرعة ولحقته على ظهرى قبل ما يقع على الارص ونصير سنده فوق ظهرى قبل ما يتزحلق .
نصير قاله :
– انت كويس ؟!!
مارو رد :
– اها كويس
وكسر السهم اللى فى كتفه .
طيرت بعيد وانا بتفادى اسهم جوهر , سهم منهم جيه فى رجلى وصابها بعد ما اخترق جلد التنين السميك .
نصير قال :
– الواد دا فى ايده يقتلنا بس شكله عايز يقفشنا صاحيين عشان يتشفى فينا برح…
قطع كلامه وسكت شويه وبعدها قال :
– طير فى اتجاه الشمال بسرعة يا نينو .
معرفتش أسأله ليه بس طيرت فى اتجاه الشمال زى ما قالى
، لحد ما وصلنا عند منطقه معينة , لقيته بيقولى :
– طير على ارتفاع منخفض كأنك هتلمس الارض .
معرفتش اسأل ليه برضه بس اتفجأت بيه بيزق مارو وبيرميه من فوق ظهرى وبيقوله :
– عشان تبقى تجود تانى !! خليك هنا متتحركش من مكانك طبقات التلج اللى حواليك خفيفة جدا ،. من الاخر انت هتبقى الطعم فركز بقى ابوس ايدك وبلاش تهور وابوس رأس ابوك بلاش تجود .
وقالى :
– متقلقش يا نينو انا عندى خطة , طير فوق ، فوق خالص.
مكنتش فاهم هو بيفكر فى ايه , طيرت لفوق فلقيته بيقولى :
– طير يا نينو هتفهم لما تطير فوق خالص ..
طيرت لفوق بأقصى سرعة عندى عشان الفضول وعشان مارو اللى رميينه تحت.
اول ما طلعت فوق وبصيت على التضاريس عرفت نصير بيفكر فى ايه.
نصير رمى مارو فوق قطعة جليد سميكة بيحوطها بحيرة متجمدة فوقيها طبقه رقيقة من الجليد .
نصير قالى :
– لو لسه مفهمتش بص على جيش الشياطين وانت هتفهم .
بصيت على جيوش الشياطين لقيت معظمهم انشق عن الجيش و غير اتجاههم و بينطلقوا فى اتجاه مارو .
نصير قال :
– كدا يا نينو يبقى اللى بيقود الجيش مارو .. هو الجى بى اس بتاعهم.. لو حركت مارو فى اى حته هتلاقيهم ماشيين وراه لا أراديا..
الصح بقى اننا نستنى دلوقتى ومندخلش غير فى اللحظة الاخيرة عايزك تستخبى فى اى سحابة ومتظهرش خالص فى السما .
استخبيت ، شوية و شوفنا اسهم بتسبق الجيش وبتتجه ناحية مارو .
كنت ههبط تانى بس نصير خبطنى على ظهرى بقوة وقالى :
– اثبت مكانك .. متقلقش على مارو.. بص عليه كدا
بصيت على مارو لقيته بيتمتم بتعزيمات على القوس بتاعه فرجع بسرعة لشكله الحقيقى “العصاية “وبعدها اتحول تانى لدرع معدنى كبير شبه الشمسية .
الاسهم كلها سقطت على الدرع من غير ما تخترقه او حتى تأثر فيه.
شوفت مارو وهو بيسخر منهم وبيتاوب فى ملل .
الشياطين دخلت البحيرة، اول ما دخلوا طبقه الجليد بدأت تتشقق , نصير قالى :
– دلوقتى يا نينو .. بسرعة حاوطهم كلهم بالنار.. ولعها وسيح الجليد
خدت نفس عميق وضميت جناحاتى وهبطت بسرعة رهيبة على الارض زى الصقر وانا بنفث النار حوالين البحيرة.
اللشياطين حاولوا يصيبونى بالأسهم لكن تفادتها وكملت حرق وحاوطهم كلهم بالنار لحد ما طبقة الجليد اللى فوق البحيرة انهارت وابتلعت الشياطين اللى واقفين فوقيها.
طيرت بسرعة ولقطت مارو برجلى من فوق كتلة الجليد السميكة اللى اتشققت هى كمان ، طيرت بيه لفوق وشوفت وانا بطير الجليد وهو بيسيح وبينهار و جزء كبير من الشياطين بيغرقوا فى المايه اللى تحت الجليد.
حسيت بنغزة فى رجلى فبصيت عليها لقيت مارو مبتسم وبيقولى :
– شيلتلك السهم اللى فى رجلك .
رجعت فى اتجاه السور التلجى والقبب عشان اطمن على بن القاف واللى معاه واتصدمنا لما لقينا السور متساوى بالارض وكل القبب مهدودة بعد ما اكتسحتها جيوش الشياطين.
مارو نادى بصوت عالى :
– نورااااا .. خالتى سندس .. حنووووش .. بن القااااف.
محدش رد علينا واتفاجأت بسهم بيصيب جناحى , بصيت على مصدر السهم, لقيته جوهر واقف على نفس الجبل اللى كان واقف عليه مارو.
اطلق عدة اسهم بسرعة فى اتجاهى، فنصير صرخ فيا وقال :
– طير يا نور ….طير بعيد بسرعة.

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية ميراث نور)