روايات

رواية فتى القطار الفصل الرابع 4 بقلم آيات محمد

رواية فتى القطار الفصل الرابع 4 بقلم آيات محمد

رواية فتى القطار البارت الرابع

رواية فتى القطار الجزء الرابع

فتى القطار
فتى القطار

رواية فتى القطار الحلقة الرابعة

” وقدرت ابعد وعرفت اعند حتى الهجر قدرت عليه … ”
بعمل فنجان القهوه بتاعي وانا مشغله الست وسرحانه في كلمات الاغنيه وبدندن معاها وانا بسأل نفسي هل ممكن حد يبقى قاسي للدرجه دي ! طاب ما انا اتقسى عليا كنت فكراه هيبقى اسعد يوم في حياتي طلع اتعس يوم في حياتي ..
قطع تفكيري صوت الموبايل بيرن وكان هو مش فاكره بيرن للمره الكام بقاله يومين ! بس اللي اعرفه اني مش قادره ارد ولا قادره اني اسمع اي مبررات للي هو عمله دا ..
صبيت القهوه وقعدت اشربها جنب الشباك وفتحت الموبايل لاقيته سايبلي ماسدج
– نور انا عارف ان حقك ماترديش بس ارجوكي اديني فرصه اشرحلك عايز اشوفك ضروري ونتكلم
من غير مافكر لاقيتني بكتبله
– تديني معاد نتقابل وفي الاخر ماتجيش صح ؟
شافها في نفس اللحظه ورد عليا بسرعه جدا
– والله يا نور غصب عني ظروف كانت اقوى مني محتاج نتقابل واشرحلك كل حاجه
قفلت الموبايل واخدت بق من فنجان القهوه واللي لاقيت ان الروج طبع على الفنجان وفضلت افكر دقيقه مع نفسي كدا وفتحت الموبايل
– فين وامتى ؟
حددنا الميعاد اللي كان النهارده بليل بعد محاضراتي وقررت اني البس اسود اوفر سايز واحط ميكب غامق شويه اول مادخلت المكان لاقيته قاعد كان قاعد مستنيني في وش الباب رغم اني رايحه ربع ساعه بدري !
روحت قعدت قدامه من غير ماتكلم كلمه ماكنش شايل عينه من عليا
– ازيك
– انا الحمد لله تمام .. انت جايبني هنا عشان تقولي ازيك !
– اكيد لا بس انا عارف ومتاكد انك هتعذريني اما تعرفي السبب
– اتفضل

 

 

 

 

 

 

– اليوم دا قبل مانزل بنص ساعه امي تعبت جامد وكان لازم تتنقل المستشفى لان جاتلها جلطه وكانت محتاجه بسرعه تاخد حقنة الاذابه واتحجزت في المستشفى حتى ماكنتش عارف امسك الموبايل اتصل بيكي من كتر الاشاعات والتحاليل والكلام دا كله حتى نمت في المستشفى يومها تاني يوم ع طول كلمتك بس ماكنتيش بتردي انا عارف انه حقك بس بردو من حقي انك تسمعيني
سكتت شويه كدا وانا عيني مدمعه حسيت بتأنيب ضمير من ناحيته
– انا .. انا اسفه انا ماكنتش اعرف
– لا لا انتِ ماتتأسفيش على حاجه انا اللي اسف على كل حاجه
– طاب هي طنط كويسه دلوقتي ؟
– ايوه الحمد لله بتتحسن للعلم هي عايز تشوفك
– تشوفني انا ؟؟
– ايوه تشوفك انتي .. النهارده الصبح اما لاقيتني ماسك الموبايل ومتضايق سالتني ف حكيتلها ف اصرت انها تشوفك
– ايه الاحراج دا هقابلها ازاي انا
– ايه يعني ماتقابليها قومي نروحلها
حاسب ومشينا راكبه جنبه العربيه وشغل اغنية لعمرو دياب وسرحت معاه وهو بيقول
” وحيات عينيك انتي اللي عاش قلبي انا يدور عليه وخلاص لاقيت كل اللي ياما حلمت بيه في اللحظه دي ….. ”
بصيتله وانا ببتسم وبدندن مع الاغنيه وفي لحظه فوقت من الهبل اللي بعمله دا وفضلت باصه م الشباك لحد ماوصلنا المستشفى طلعنا اوضتها دخل هو الاول وبعدين طلع اخدني
دخلت لاقيت والدته نايمه على السرير وباصه ناحيتنا وهي بتحاول تتكلم
– اهلا بالقمر
– اهلا بحضرتك يا طنط الف سلامه عليك ان شاء الله تخرجي منها بسرعه
– الله يسلمك يا حبيبتي المهم قوليلي الواد دا مزعلك في ايه
ضحكت وبصتله وبعدين بصتلها تاني
– ولا اي حاجه يا طنط والله احنا تمام
اتكلمنا كتير والكلام خدنا ماخدتش بالي الساعه بقت ٨ انا لازم اروح
– الوقت كدا اتاخر هاجي لحضرتك تاني
– استني هاجي اوصلك
– لا لا خليك مع طنط يا نديم
– لا طبعا مش هينفع اسيبك تروحي لوحدك
استأذن مامته وجه وصلني لحد تحت البيت وانا بفتح الباب ونازله لاقيته بينادي عليا
– نور

 

 

 

 

 

 

– نعم
– اتمنى تكوني صفيتي من ناحيتي
– ماتقلقش صفيت جدا ربنا يخليلك مامتك
– امين يارب .. طاب هنتقابل بكره ؟
– الساعه ٧ الصبح نفطر مع بعض ؟؛
– الساعه ع الصبح في شط الشاطبي
طبعا اول حاجه كلمت اميره وحكتلها اللي حصل واننا هنتقابل
تاني يوم صحيت من الفجر صليت ولبست فستاني الابيض فيه ورد لبني لون السما وفردت شعري وحطيت شال على كتافي ووصلت الشط كان فاضي طبعا احنا في الشتا لاقيته مجهز طرابيزه عليها فطار وعليها انواع الجبن زي مابحب عرف يضحك عليا ازاي
مد ايده وسلم عليا وباس ايدي وهو بيقولي
– سعيده يا هانم
– سعيده مبارك
وضحكنا سوا وروحنا نقعد شدلي الكرسي زي ماكنت بشوف في الافلام بالظبط انا سامعه صوت دقات قلبي وقلبه الاتنين عاملين لحن جميل مع بعض لحن يجنن فعلا
فضلت بصاله وسرحانه فيه وقد ايه انا هيمانه فيه يارب ماياخد باله مش عايزه احراج معاه اكتر من كدا وبدأنا ناكل فعلا وهو طول الوقت باصصلي وبس خلصنا اكل ولاقيته جاب كوبايتين شاي بالنعناع زي مابحب بالظبط وشغل اغنيه رايقه وجميله زيه تماما
” يا حلو صبح .. يا حلو طل يا حلو صبح .. نهارنا فل .. من اد إيه و انا بستناك و عيني ع الباب و الشباك عشان اقول لك و اترجاك عشان اقول لك و اترجاك يااااا حلو .. يا حلو ياااا .. يا حلو صبح ”
شيلت الشال من على كتفي و قلعت الشوز ووقفت قدام البحر خليت البحر يلمس رجلي عمري ماحبيت انزل البحر كنت دايما احبه من بعيد لبعيد كنت بخاف اغرق بس من يوم ماشوفته واكتشفت اني ممكن اغرق وانا على البر عادي زي ماغرقت في عينه لاقيته جه وقف جنبي وحاطط ايده الاتنيت ورا ضهره واخد نفس طويل
– نور

 

 

 

 

 

– نعم
– انا بحبك
ماصدقتش بصتله في وقتها وانا مش مستوعبه
– ايه!
– تتجوزيني ؟
دقات قلبي زادت اكتر ووشي احمر اكتر من الاول بكتير ماحستش بنفسي غير وانا بحضنه وبقوله اني موافقه طبعا لازم ابقى موافقه لو يعرف اني هيمانه من اول يوم اتقابلنا فيه
كملنا وقفتنا قدام البحر وانا بتمايل واغني بصوت عالي مع كلمات الاغنيه وهو ماسك ايدي
” و حق ورد الخدود و العود و تفاحه
ببسمه حلوه تخلي الدنيا تتغير
مكتوب عليا ابص لفوق
و اجيب لقلبي شوق على شوق
و الحلو دايماً حلو و ذوق ..حلو و ذوق
يا حلو ياااا .. يا حلو صبح … “

تمت

اترك رد