رواية لاكسا الفصل السادس 6 بقلم اسماعيل موسى

رواية لاكسا الفصل السادس 6 بقلم اسماعيل موسى

رواية لاكسا البارت السادس

رواية لاكسا الجزء السادس

رواية لاكسا الحلقة السادسة

بدأت اشوف كل حاجه بتعمله مراتى بنظره تانيه، نظره موضوعيه بعد ما اختفى الشغف، الحاجات إلى كنت مبهور بيها طلعت عاديه جدا،
مبتعملش حاجه مبهره، حتى الآكل مش بتعرف تطبخ وانا كنت بتحمل عشان مجرحش شعورها
وكنت بسأل نفسى دايما ليه ما اكتشفتش كل ده الا بعد ما ظهرت عفاف؟
لكن الإنسان طالما ماشى فى طريق واحد عمره ما يعرف جمال باقى الشوارع
كانت عفاف بتفوز دايما عند اى مقارنه اعملها بينها وبين روزى لحد ما بقتش طايق نفسى ولا طايق ابص فى وشها
وكان لازم الاقى حل مش معقول هفضل كده الايام بتجرى وانا مش سعيد
من حقى اعيش ايام سعيده زى كل الناس
فاتحت عفاف برغبتى فى الجواز منها، لكن عفاف رفضت، قالت مستحيل اخون صاحبتى، مش هحترم نفسى وقتها
كانت منفعله جدا وقالت انت ازاى بتفكر بالطريقه دى وليه وصلك احساس انى ممكن أوافق على الجواز منك؟ حاولت اشرحلها لكنها سبتنى ومشيت

وكنت متوقع ان عفاف هتكلم مراتى وتقولها انى طلبتها للجواز وان فيه مشكله كبيره هتحصل
لكن عفاف مكلمتش مراتى ولا اتصلت بيها وكل إلى عملته انها اعتذرت عن عزومات الغدا إلى كانت بتحضرها دايما ودا ادانى آمل ان عفاف ممكن تغير رأيها
وفضلت كتير اتصل بعفاف واتحايل عليها انها تدينى فرصه اشرحلها وجهة نظرى وكانت كل مره تصدنى وترفض
لكن انا ميأستش، اصل السعاده مش بتيجى بالساهل ولازم تحارب عشانها
فضلت وراها لحد ما وافقت تقابلنى وكنت محضر نفسى كويس
وضحتلها انى مش بحب روزى ولا طايقها لكن مش هظلمها وحلفتلها انى مش هضيع حقها وانى هنفذ رغبات روزى مهما كانت
عفاف كانت زى الصنم مفيش اى تجاوب معايا، فضلت ساكته وبعد شويه لانت
فكرك لو انا وافقت مثلا، روزى هتوافق؟
قلتلها روزى ملهاش علاقه بالموضوع ده، انا مش بعمل حاجه حرام
المهم انك توافقى

هعملك فرح كبير استأجر شقه خاصه بيكى وهفرشها على زوقك وهعمل كل حاجه ترضيكى
عفاف رفضت لكن حسيت انها متردده وممكن توافق
وأتخذت خطوه جريئه زورت والدة عفاف، اتكلمت معاها وشرحتلها ظروفى كلها وطلبت منها ايد عفاف وحلفت انى هأمن مستقبلها
والدتها كانت متردده لكن لما قلتلها هكتب الشقه بأسمها وهعمل فرح كبير وحاجات تانيه
قالت انا معنديش مانع لكن مش هقدر ارغم عفاف على حاجه لازم هى توافق دا مستقبلها
سبت عفاف اسبوع كامل بعد الزياره مرضتش اكلمها، قلت هسيبها تاخد وتدى مع والدتها وتفكر على راحتها
بعد اسبوع رنيت على عفاف نص رنه كده وفصلت، سبت التليفون جنبى وحطيت ايدى على قلبى لحد ما رنت عليه
عايز ايه سألتنى؟
حسيت ان قلبها انفتح، قلت اما زورت والدتك وطلبت ايدك
قالت عارفه!!
بس دا موضوع صعب انا كده هخسر صاحبتى
ليه بتسميها خساره؟ انا مش مرتاح معاها دا مش ذنبك
طيب هى عفاف هتوافق؟ كلمتها؟

قلتلها مقدرش اكلمها غير لما اخد موافقتك الأول
قالت سبنى اسبوع افكر!
قلتلها انى بحبها ومش قادر اعيش من غيرها وانى حبها ملكنى وانى بشوف وشها على اكلى وفى المرايه فى الشارع وفى المطاعم وان عنيها بتصادفنى على واجهات المحلات والدكاكين
انا بحلم بيكى يا عفاف وبستنى اللحظه إلى تجمعنا سوا
قعدت اضغط عليها لحد ما قالت شوف روزى لو وافقت انا موافقه
لكن مش هعمل حاجه من وراها
كنت طاير من الفرحه وحاسس ان ملكت الدنيا كلها، قعدت مع روزى وقلتلها انا عايزك فى موضوع
روزى قالت خير ان شاء الله؟
قلتلها الصراحه انا هجوز
روزى وشها اصفر، الدم رحل منه، انت بتقول ايه؟
بقلك هجوز
هو انا قصرت معاك فى حاجه؟
طاب الناس تقول ايه؟ دا احنا لسا متجوزين مبقلناش ٥ شهور!!
قلتلها انتى مقصرتيش فى حاجه وانا مش بعمل حاجه حرام، شقتك هتفضل معاكى تحت ايدك وانا مش هقصر معاكى فى حاجه
روزى قعدت تعيط وتبكى، سبتها لحد ما هديت شويه
قالت انا مش موافقه، لو هتتجوز طلقنى

استهدى بالله يا روزى، دا شرع ربنا وانا مش خاين انا فاتحتك على طول وقلتلك الحقيقه ومتمسك بيكى انا بحبك
بتحبنى وعايز تتجوز عليه؟ بعد خمس شهور جواز بس؟
طيب قلى السبب عرفنى انا غلطت فى ايه! ؟
ليه تظلمنى من غير سبب؟
انا مش بظلمك يا روزى قلتلك دا شرع ربنا وانا مش بعمل حاجه حرام
وانا هنفذ رغبتك لو عايزه تفضلى هشيلك فوق دماغى لو مش عايزه حقوقك كلها هتوصلك على داير مليم
ياه، دا انت متمسك بيا وبتحبنى فعلا
بجد متشكر، لكن انا مش عايزه حبك
طلقنى قبل ما تتجوز، روزى دخلت غرفتها لمت هدومها وخدت شنطتها ومشيت
كلمت عفاف وحكتلها على الى حصل كله وان روزى مشيت وسابت البيت وانها مصممه على الطلاق
وهتعمل ايه؟
هديلها فرصه تانيه، هكلمها واكلم أهلها واحاول أقنعها تفضل معايا وكده يبقى ريحت ضميرى !!
اتفقت مع عفاف نعمل خطوبه وبعد اسبوع نجوز مكنتش عايز اضيع وقت وكمان عفاف كانت بدأت تتكلم معايا على راحتها وتقول عايزه ايه وانا نفذت كل طلباتها

كلمت روزى مره واتنين رفضت ترد عليا، كلمت والدها ووالدتها واستحملت كلام كتير اووى عشان خاطر روزى
لحد ما وافقت تكلمنى رغم كده رفضت روزى ترجع بيتها وطلبت ورقة طلاقها
فضلت اتحايل عليها واقسملها انى بحبها وانها بكده بتخرب بيتها وكلمة مطلقه مش ساهله
روزى رفضت بكل الطرق
كنت متأكد انى عملت إلى يريح ضميرى وبدأت فى استعدادات الجواز
وقررت اطلق روزى واديلها كل حقوقها
قبل الفرح بيومين والدة روزى كلمتنى وطلبت منى انى مطلقش بنتها وانها هتقنعها ترجع، كنت سعيد اووى، كده الفرحه بقيت فرحتين
قررت اعمل فرح كبير يليق بحب قلبى عفاف، حجزت قاعه فخمه وبعت الدعوات وكل حاجه كانت تمام
يوم الفرح الصبح عفاف صحتنى من النوم، كانت زعلانه جدا وبتعيط وبتقول انها مش ممكن تتجوزنى طالما روزى على عصمتى
وعرفت منها ان روزى كلمتها لما عرفت انها هتتجوزنى وانها بهدلتها واتهمتها بالخيانه والحقد والوساخه والسفاله
كلام مهين كتير وقالت انت لازم تتطلقها دلوقتى حالا
روزى كانت غلطانه وقطعت اخر خيط يربطنى بيها، مكنش ممكن اخسر عفاف عشانها

عفاف إلى ملكت قلبى، طلقت روزى بالتلاته وخليت عفاف تسمع بنفسها المكالمه إلى طلقت روزى فيها
الفرحه تم وعفاف بقيت مراتى وملكى، كنت عارف من البدايه انها مش صدفه انها تظهر قدامى واحبها وان القدر كان عايز كده
بعد شهر من الجواز عفاف اعترفتلى ان المكالمه بتاعتها مع روزى محلصتش وانها اخترعت كل الكلام ده وروزى مكلمتهاش
قالت إنها كانت غيرانه عليه وقلبها مستحمل حد يشاركها فيا
سامحتها، الحب يعمل اكتر من كده، كنت مبسوط انها بتحبنى للدرجه دى وعملت كل ده عشانى
انتهت

لقراءة باقى حلقات الرواية اضغط على : (رواية لاكسا)