رواية مذكرات حبيبة 2 الفصل العاشر 10 بقلم عادل عبدالله
رواية مذكرات حبيبة 2 الفصل العاشر 10 بقلم عادل عبدالله
رواية مذكرات حبيبة 2 البارت العاشر
رواية مذكرات حبيبة 2 الجزء العاشر
رواية مذكرات حبيبة 2 الحلقة العاشرة
: انتي صاحبة المشروع ده ؟؟
: ايوه يا جمال ، كتير عليا ؟
: لأ مش مسألة كتير ، لكن ازاي ؟!
: ده موضوع كبير اوي مش مهم تعرفه ، المهم طمني ولادي عمر وعمار عاملين ايه دلوقتي ؟؟ اكيد كبروا ، وقولي كمان أمك عاملة ايه ؟؟ واخوك السافل وشهد مراته ؟ وحشتني اوي شهد حبيبتي .
: ياااه ده حصلت حاجات كتير اوي .
: طيب تعالي اقعد واحكيلي .
: مش هينفع اقعد علشان المقاول ممكن يخصم لي اليوم علشان الشغل هيتعطل .
: متخافش انا هقوله ان انا اللي معطلاك ، يلا احكيلي .
: احكي علي ايه ولا ايه ؟
: قولي الاول عمر وعمار عاملين ايه ؟
: كويسين دخلوا المدرسة و عايشين مع امك دلوقتي .
: ليه ؟ هي امك ماتت ؟
: لأ ، ايدها التانية اتشلت ولسانها كمان .
: الحمد لله .
: انتي شمتانة في امي ؟؟
: اللهم لا شماته لكن بقول الحمد لله ان الناس هتترحم من لسانها اللي اللي كان بيأذي الناس وينقط سم .
: الله يسامحك ، ما انتي عارفة اني مش هقدر ارد عليكي !!
: انت عملت زمان بما فيه الكفاية ، المهم قولي شهد عامله ايه واخوك دياب واخواتك الصغيرين ؟
: شهد الله يرحمها ماتت .
: ماتت !! لا حول ولا قوة الا بالله ، دي صغيرة يا عيني !! الله يرحمها ، ماتت ازاي وامتي ؟
: ماتت من حوالي سنة ، دياب اخويا قتلها .
: بتقول ايه !!! يا مصيبتي !!! قتلها ليه المجرم ده ؟؟
: كان بيشك فيها وقتلها .
: حرام عليه دي شهد دي اشرف واحدة شوفتها في بيتكم ، هو فاكر كل الناس انجاس زيه ؟!!
: ليه كده يا حبيبة ؟ بتغلطي في امي واخويا علشان عارفة اني مش هقدر ارد عليكي ؟ عموما فيه رب بيخلص .
: ايوه صح كلامك واهو خلص منكم اللي عملتوه فيا ، المهم قولي اخوك اتعدم ولا لسه ؟
: اخد سجن مؤبد .
: احمدك واشكر فضلك يارب .
: انتي مش عارفة ان شماتك فينا دي حرام عليكي ؟ ولا مستقوية بفلوسك ؟
: لا لا ، انت فاهم غلط ، انا مش شمتانة ولا مستقوية بفلوسي ، لكن بقول الحمد لله ان ربنا بينتقم لي من كل اللي اذاني .
: وهو دياب كان اذاكي في ايه هو كمان ؟
: دياب اخوك اغتصبني في غيابك يا جمال ، فهمت انا شمتانه ليه ؟ وقولتلك لازم اسافرلك علشان كنت عايزة احافظ علي شرفك و ابعد عن البيت النجس ده ، فهمت دلوقتي ؟!
: بتقولي ايه !! دياب !!! لا مش ممكن انتي كدابة .
: لأ ، انا مش كدابة ، وأسأل امك ، ولا بلاش تسألها هي مش هتعرف ترد عليك علشان اتشلت ، تصدق ان امك لما انا اشتكيت لها منه قالتلي بلسانها اللي اتشل ده … جوزك غايب وانتي صغيرة ومحتاجة راجل اعتبري دياب راجلك علي ما جوزك يرجع ؟!! شوفت قذارة اكتر من كده ؟؟
: امي قالتلك كده ؟
: ايوه ، اومال انا طفشت ومشيت منهم ليه ، ووقعت يمين طلاقك عليا علشان اهرب من قذارتكم ، دا انا شوفت في بيتكم ظلم وقهر واغتصاب منك ومن اخوك !!! روح ربنا ينتقم منكم كمان وكمان يارب .
: ياااه ، ده انتي شايله في قلبك جامد اوي !!
: دا انت وامك ذلتوني والحمد لله ربنا انتقم لي منكم وامك دلوقتي مذلوله بعجزها زي ما ذلتني ، احمدك واشكر فضلك يارب .
: انا هقوم امشي علشان مش ارتكب مصيبة .
: عارف يا جمال لولا ان بينا عيال كنت ذليتك ذل عمرك ما تتخيله ، لكن انا مش هعمل كده علشان انت ابو ولادي بس .
: وانا كنت عملتلك ايه ؟! مش كفاية فضحتينا في البلد كلها لما طفشتي !!
: ده كفاية اغتصابك ليا ليلة دخلتنا ، كرهتني في الجواز وفي الحب وفي كل حاجة حلوة ، وسقطتني بدل المرة الواحدة مرتين وذلتني وظلمتني روح منك لله .
: انا همشي ، بس اعملي حسابك مش هتشوفي عيالك تاني .
: ولادي انا هاخدهم بالمحكمة لو مش اخدتهم برضاك .
: وليه يا حبيبة كل ده ؟ ما تيجي نلم الشمل ونرجع لبعض تاني .
: وده بقي علشان بتحبني ولا علشان طمعان في فلوسي ؟؟
: انتي اكتر واحدة عارفة أني اخر حاجة افكر فيها الفلوس ، انا ممكن اكون وحش في حاجات كتير لكن أني ابص لفلوس غيري حتي لو كانت مراتي ده مستحيل .
: الصراحة انا عارفة كده لكن عارفة بردو انك مش بتحبني ، يبقي عايز ترجعلي ليه ؟ و عايز ترجعني امتي بعد ما اتجوزت اتنين غيرك وخلفت كمان بنت من واحد فيهم .
: اتجوزتي مرتين يا حبيبة ؟
: ايوه ، اومال كنت عايزني اعيش ازاي والكل طمعان فيا !! وكمان العز اللي بقيت فيه ده تفتكر منين !! ماهو من اللي اتجوزتهم .
: مش هنقلب في دفاتر اتقفلت خلاص ، انا عايز ارجعلك علشان الولاد يتربوا بينا احنا الاتنين ، ده غير اني ممكن اكون في اول جوازنا كنت مش مشغول بالحب والكلام ده لكن بعد كده حبيتك ، وانتي اكيد حسيتي بكده وحسيتي ان معاملتي معاكي اتغيرت كتير .
: اذا كنت خايف علي العيال سيبهم وانا اربيهم كويس ، هعيشوا معايا في مستوي كويس وهيتربوا ويتعلموا كويس جدا .
: وهتكملي حياتك وحيدة ولا هتتجوزي وتجيبي لعيالي جوز ام ؟؟
: انا خلاص مش هتجوز تاني ، هعيش لولادي وبس .
: انتي بتضحكي عليا و لا علي نفسك !! انتي لسه مش كملتي ٢٥ سنة !! معقول هتكملي بقية حياتك من غير راجل ؟
: انا دلوقتي بفلوسي اقدر احمي نفسي كويس ومش محتاجه اتجوز .
: لو حميتي نفسك من الطماعين في فلوسك مش هتحمي نفسك من اللي هيطمعوا فيكي وفي جمالك .
: انا عارفة انا هعمل ايه كويس ، لو بتحب ولادك و لسه باقي علي العيش والملح رجعلي ولادي يتربوا معايا .
: ولادك عند امك مش عند حد غريب لكن بيتربوا قدام عيني ، انما يمشوا ويتربوا بعيد عني مش هسمح بكده ابدا ، وفكري تاني اننا نرجع لبعض وصدقيني انا حبيتك بجد و مش عايز نرجع لبعض علشان الولاد بس ولا علشان فلوسك ، انا عايز ارجعلك علشان بحبك .
مشي جمال من قدامي وانا مشيت وكنت هطير من السعادة والفرح لأنتقام ربنا منهم علي اعمالهم معايا لكن في نفس الوقت كنت بفكر هل فعلا هقدر اكمل حياتي بدون جواز واعيش اربي اولادي وحدي ولا لازم افكر اتجوز ؟ معقول هتجوز لرابع مرة وانا لسه في منتصف العشرينات ولا ارجع لجمال يمكن يكون انتقام ربنا منهم رادع له ، خصوصا انه كان فعلا اتغير معايا في اواخر ايام جوازنا ؟؟؟ وكمان فلوسي هتكون مصدر قوة لي لو رجعت له تاني ؟؟؟
لقراءة باقي حلقات الرواية اضغط على : (رواية مذكرات حبيبة 2)