رواية درة أدهم النادرة الفصل التاسع 9 والأخير بقلم نور

اخذت الطيارة و رجعت البيت في 24 ساعة ، كانت العمارة مقلوبة ، طنط نوال بتعيط و امي بتسكتها و مي هتموت من القلق ، مفيش اي خبر جديد عن درة ، هي لسه مفقودة ، عملت كل اتصالاتي مع البوليس و اصحابي اللي في الجيش عشان يدورو اكتر ، قعدت اطمن في طنط نوال و انا نفسي محتاج حد يطمني ، وعدتها اني هلاقيها و هارجعها مهما حصل ، يومين ما غمضتش عينيا لحظة واحدة ، مفيش مستشفى مدورتش فيه ، صاحباتها زمايلها و اي حد ممكن تعرفه ، قربت اتجنن ، حاسس اني في كابوس و بحارب عشان اطلع منه ، كنت بدور في الشوارع زي المجنون ، بقيت حاسس بنار قايدة في قلبي و مش قادر اطفيها ، ازاي اعيش دقيقة واحدة و درتي مش موجودة ، مش عارف هي فين و عاملة ايه ، دماغي كانت هتنفجر ، يأست و تعبت بس مبطلتش ادور عليها 

– ادهم ، مفيش جديد يا ابني 

– لا يا ماما ، ادعيلها و ادعيلي انا كمان 

– هو انا عندي حاجة عايزة اقولها بس…. يعني 

– قولي يا ماما ، أي حاجة شكيتي  فيها قولي 

– احنا دورنا في كل مكان تقريبا ، فاضل مكان واحد مدورناش فيه ، أبوها يا ادهم ، أبو درة 

ازاي نسيت الراجل الكلب ده ، ده دينه فلوس و اكيد سهل جدا يعمل ، ماهو كان هيعملها وقتها و انا سكته بالفلوس ، اكيد دي عمايل واحد نذل زيه 

– طنط نوال ، بطلي عياط و ركزي معايا،  عايزك تفتكري مكان جوزك بأي طريقة ، مكانه ، حد من اهله او اي حد من صحابه ، لازم الاقي خيط يربطني بيه ، الشرطة دورت عليه في كل مكان و ملقتهوش،  فص ملح و داب ، اكيد هو ورا الموضوع ده 

– آخر حاجة افتكرها انه عنده شقة فوق السطح مأجرها ، اه و عنده واحد صاحبه من سنين اسمه محمود مهما يتخانقوا يرجعوا غير كل صحابه التانيين 

– تمام جدا ، هاتي عنوانه ده او نمرته 

– كان ساكن تحت شقة حسن ، اصلا هو اللي كان مأجرلو الشقة ، اهو العنوان 

– تمام 

– ادهم ، استنى ، عايزة اقولك حاجة مهمة

– ايه هي 

– حسن مش اب درة الحقيقي 

– نعم

– ايوه ، أنا مكنتش عايزة حد يعرف ، بس انا خايفة على بنتي و لازم اقولك ، أبو درة هو جوزي الأول ، اتجوزته من ورا اهلي ، مات بعد ما حملت في درة بشهر ، قام والدي جوزني لحسن غصب عشان حملي كان بالنسبة له فضيحة عشان اتجوزت من وراه و لما رجعتله و الناس متعرفش عن جوازي ، خيرني بين انزل اللي في بطني او أتجوز حسن و اسكت طول عمري ، و طبعا هو كمان اتجوزني غصب بس شبع فلوس من ابويا ، لما ولدت ابويا مات ،  حسن كانت فرصته قام سابنا و سافر و الباقي انت عارفه ، زمان ابويا باعني ليه ، و دلوقتي عايز يبيع درة كمان ، انا السبب ، انا السبب 

مقدرتش اقف على رجليا بعد اللي سمعته ، لو كان قلبي مرتاح شوية عشان اللي خطفها أبوها ، يعني مهما بلغت درجة اذيته ليها مش هتكون كبيرة ، اكيد روح الأبوة جواه هتغلب جبروته ، بس طلع مش أبوها اصلا ، تعبت ما بقاش فيا حيل اعمل اي حاجة ، عايز اشوفها دلوقتي طالعة على السلم ، كتبها على ايديها و بتضحكلي ضحكتها الحلوة ، عايز اصحى من الحلم و ارجع الشاب المراهق و هي درتي الصغيرة ، يا ريتنا ما كبرنا يا درة ، يا ريتنا فضلنا زي ما كنا 

– اتكلم احسنلك ، انا مش فاضيلك يا أخ ممدوح ، ولا محمود

– ………ا

– خلاص يبقا بنتك هتعرف ، و اهو واحدة بواحدة 

– لا لا خلاص هقول ، بص هو حسن عنده بيت ابوه في المزرعة ، كل ما يعمل مشكلة او يقدموا فيه بلاغ يروح يتخبى هناك لحد ما يبطلوا يدوروا ، و انا بأخذله الأكل لحد عنده هناك

– يلا قدامي ، اتحرك 

وصلنا المزرعة  هناك بالليل ، فتحنا البيت و اول حاجة شفتها كانت حسن ، كان مرمي على الأرض و راسه كلها دم ، رحت اشوفه و لقيته لسه بيتنفس ، محمود راح يحاول يفوقه و انا رحت ادور في الأوض ، لحد ما فتحت أوضة كانت كلها فيران ، ريحتها وحشة و الأرض مبلولة ، كان في ركن من الخشب جنبه خيط مقطوع و بقع دم ، و فجأة لفت نظري سلسلة ، و كانت هي ، سلسلة درة اللي كانت هديتي ليها في عيد ميلادها العاشر و من وقتها عمرها ما خلعتها ، قلبي وجعني اوي و صرخت بأعلى صوتي ،   

مقدرتش اتخيل عمل فيها ايه و ووداها فين ، خرجت فضلت اضرب فيه رغم أنه مكانش واعي بحاجة ، سبته و طلعت انادي عليها زي المجنون ، كنت بدور عليها بنور الموبايل بين الشجر ، طول الليل ما قعدتش و البوليس كمان جا عشان يرفع البصمات و يدور معايا ، كنت بدور و انا حافي محسيتش لا بالطوب اللي تحت رجليا و لا بشوك النبات اللي بيجرح في جسمي ، كنت مستعد اتحمل اي حاجة المهم الاقيها ، و فعلا شوفتها ، ايوه شوفتها ، كانت نايمة زي الملائكة تحت شجرة ، هدومها مقطعة و كلها دم ، شعرها مقصوص بعشوائية ، وشها ازرق و جسمها كله جروح ، جريت عليها و انا حاسس ان روحي طلعت مني و سبقتني ليها 

– درة ، درتي ، يا عمري بصيلي ، اصحي و كلميني ارجوكي ، متسبينيش يا درة ، لا لا ما تعاقبنيش كده ارجوكي ، ارجوكي يا درة 

– ادهم ، انت هنا بجد 

– أنا هنا يا روح ادهم و حياته ، انا هنا يا عمري ، متخافيش يا قلبي انا هنا 

– أنا ناديتك كتير ، بس انت مجيتش ، انا نعسانة يا ادهم ، احكيلي حكاية حلوة زي بتاعت امبارح 

– نامي يا عمري ، نامي و لما تصحي هتلاقي نفسك في حضني و كل اللي عشناه ده حلم 

عدى شهر على الحادثة ، درة لسه قاعدة في المستشفى ، جروحها شفيت و شعرها اتظبط و بقى قصير و حلو ، و الكسر اللي في ايدها تمام ، الدكتور قال انها طلعت من الحادثة دي بأعجوبة و اتعرضت لعنف و ضرب و تعذيب كبير بس الحمد لله انها جات على حد كده و متجاوزش الخطوط الحمرا ، دي الحاجة اللي شفعتله و خلاتني اسلمه للبوليس و هو مدمر بعد العلقة اللي اديتهاله ، اتحكم عليه عشرين سنة سجن بسبب كل البلاغات المتقدمة فيه ، اعترف انه خطفها عشان يهدد اهل امها في البلد ، حبسها اسبوع هناك لوحدها ، بس لما عرف انهم متبريين منها قرر في النهاية يسيبها ، و اول ما درة شافته ضربته على رأسه و هربت ، و هناك لقيتها ، و دلوقتي اهو بيخلص كل عمايله ، كل حاجة رجعت تمام ، إلا درة مرجعتش ، جروحها الجسدية راحت بس جروحها النفسية لا ، كانت عاملة زي الأصنام لا بتكلم حد و لا بتسمع اي حد ، كأنها عايشة في عالم تاني خالص ، يا ريت كان عقابي اخف من كده ، يا ريتها صرخت في وشي و ضربتني و لا اشوفها في الوضع ده ، الدكتورة النفسية قالت إنها اتعرضت لأزمة نفسية حادة و كلنا لازم نساعدها تطلع منها ، مسيبتهاش ولا لحظة و رجعت اعاملها كأنها بنتي ، بعد شهر ابتدت تتفاعل معايا انا بالذات ، لما احكيلها حكاية قبل النوم ، ساعات تبتسم و ساعات تعيط و ساعات تحضني و تنام ، و ساعات تصحى في الليل تصرخ من الكوابيس ، و شوية شوية رجعت تتكلم 

الشمس حلوة جدا النهاردة ، كنت حاسة ان الدنيا وحشتني ، كل حاجة وحشاني ، وحشتني الشمس و السماء ، وحشتني الالوان ، حسيت اني كنت في عالم تاني ، عالم كل حاجة فيه رمادي بارد و جامد ، وحشني ادهم ، هو كان فاكر اني  مكنتش حاسة بيه جنبي ، بس انا كنت حاسة بكل كلمة و همسة طالعة منه ، بسببه رجعت اعيش و نسيت اصعب فترة عشتها في حياتي ، نسيت العذاب و الهم اللي شفته ، حمدت ربنا أن حسن ما ماتش ، كان جزء من تعبي النفسي بسببه ، مكونتش عايزاه يموت علي أيدي  ،وجود ادهم جنبي قواني و خلاني أحب الحياة من جديد ، و احبه هو حب من جديد 

– صباح الخير يا احلى درة على الكرة الأرضية ، عاملة يا درتي 

– صباح النور يا ادهم ، كويسة الحمد لله 

– فترة السجن خلصت النهاردة ، الدكتور كتبلك افراج و هتخرجي تنوري العمارة من تاني 

– ربنا يخليك يا ادهم ، انا عذبتك اوي معايا ، بس كفاية كده 

– مش فاهم 

– اقصد كفاية تعبتك معايا ، انا بقيت كويسة و انت تقدر ترجع شغلك و حياتك و تسافر  ، كفاية بقالك فترة موقف حياتك عشاني و بتعمل كل حاجة عشان تسعدني ، انا بجد مش عارفة ازاي أشكرك على كل حاجة عملتها 

– ………ه

– ادهم ، استنى ، انت زعلت مني 

– سيبي ايدي ، بعد كل ده جاية تقوليلي الكلمتين دول ، عايزاني اسافر و اسيبك كده عادي ، بتشكريني كأني شخص غريب عنك عمل فيكي معروف ، عايزاني اعمل ايه تاني عشان ترضي عني ، حياتي وقفت من غيرك و بعد ما اتردت روحي عايزة تاخذيها مني تاني 

– ادهم … انا 

– درة ، انا عايز أسألك سؤال و ارجوكي جاوبي بكل صراحة و من غير لف و دوران 

    انتي بتحبيني

– ا…….

– ردي و كفاية عياط يا درة ارجوكي………….. اجابتك وصلتني خلاص ، عن اذن… 

– لو خيروني بينك و بين كل العالم ، هختارك انت ، انت مش عارف انت ايه بالنسبالي ، انا عديت الحب من زمان و مفيش كلمة توصف مشاعري تجاهك ، انت فاكر اني مكنتش حاسة بوجودك جنبي طول الفترة دي ، مشوفتش الحاجات اللي عملتها عشاني ، انت ابويا و اخويا و كل حاجة حلوة في حياتي ، بعد كل ده و لسه بتسأل يا ادهم 

– بسأل و مش هبطل اسأل يا درتي 

– طيب و انت ، بتحبني 

– لو خيروني بينك و بين كل العالم ، هختار العالم و اجيبه بين ايديكي انتي ، انت العالم بتاعي يا درة ، انتي وطني و ارضي و ضحكتي و كل حاجة حلوة في دنيتي ، انتي روحي اللي مقدرش استغنى عنها ، بحبك يا درة ادهم النادرة 

اكيد عارفين اللي حصل طبعا ، مش محتاجين نطول المشوار ، اتجوزنا بعد شهر بالظبط و كان احلى فرح في الدنيا 

– أنا مش مصدق يا درتي ، أخيرا،  أخيرا انتي في حضني و قدام كل الناس، انا مش مصدق و الله 

– أنا بقا مصدقة ، عشان تعبت كتير في حياتي ، و كان دايما عندي احساس ان ربنا هيعوضني بحاجة حلوة ، و اهو كان رحيم بيا و عوضني بيك

– ربنا كان رحيم بيا كمان يا درتي 

مش محتاجة احكيلكم حياتنا كانت عاملة ازاي ، كنت على طول اخاف اكون في حلم جميل و اصحى منه ، بس بحمد ربنا دايما أنه يطلع حقيقة في الاخر  ، و احلى حقيقة 

– أنا عمري ما شفت بيبيهات بالجمال ده ، ايه الحلاوة دي ، يا روح عمتو انت و هي 

– عقبالك يا مي يا عروستنا الحلوة 

– ها بقا قررتوا تسموهم ايه 

– ده ادهم عايز يسميهم يا ماما ، تخيلي مخلانيش حتى اختار اسم البنوتة 

– ايه يا درتي ، انتي معندكيش ثقة في ذوقي و لا ايه ، ده انا اللي مختارلك اسمك يا حبيبتي 

– طيب ايه 

–  ادهم و درة ، عشان تكون درة ادهم 

– هههه تاني 

– ههه ايوه تاني ، بس دول هيبقوا اخوات بجد يعني 

– بحبك يا ادهم 

– وأنا بعشقك يا درة ادهم 

و تمت ..