روايات

رواية قلاع الضر الفصل الرابع 4 بقلم زينب ماجد

رواية قلاع الضر الفصل الرابع 4 بقلم زينب ماجد

رواية قلاع الضر البارت الرابع

رواية قلاع الضر الجزء الرابع

رواية قلاع الضر الحلقة الرابعة

(شذرة)
النـرجس احـلى ورّد وانـتِ احلـى مِـن عنـده
(كاظم أسماعيل الكاطع)
دنج اركبه للكاع يصيح : رحمتك يا االله
وهلن دموعه بلا شعور .. ضليت واكفة اطمش عليه وما كدرت اكضب دموعي هلن وياه
دحج علي وكام حب راسي وكال : الف الحمدلله والشكر الف الحمدلله .. رحمتك يا رب
– شفت من كتلك احساسي ما يخيب واني احس راح ابزرلك هواي واترس ديرتك اهل
– يا بختي … انا مصدك بعد كل هالسنين الله يشملني برحمته وذر بزريتي اليوم اخلي بشاير الله بكل مجان واذبحلا الذبايح
– احلفك لا .. ما اريد احد يعرف
– عليش ؟
– انا ما رايدة احرضك اعلى احد لاجن انت تشوف وتعرف ضرايري شلون متشمتات بيه عد ما علمن ما ابزر .. لو درن انا حبلى ما راح يخلن فعل ما يفعلنه هن ولا كل واحد يكره خاطر هالبزر ما يضل ابطني
– تخافين العين
– عجل باطل من يكولون ثلثين المكابر من العين .. ما طوله الله رزكنا وشملنا برحمته خلنا نضم فرحتنا بينا ليما نفرح بالجبيرة عد ما اجيب بسلامة
– هاهيه امري المهم عدي الله ما كصر وياي وزادني بفضله الف الحمدلله والشكر .. اطلبي مني اليتمناه كلبج على امره تم
– راح اطلب لجن ما الحين .. بوكته
تبسم وكال : انت تامرين .. الف الحمدلله والشكر ربي الف الحمدلله
صعدنا الربل ونده لابو راشد صعد وصلنا للكاع
ونزلنا اثنينا ضلينا ليما صار الغدا ونحن واحد مجابل اللاخ وخشان فرحته ما واسعته
جاب خالد الغدا .. وكعد يتغدا ويانا ..
وهو عدياكل حجيت : شرايك يخالد نزوجك ؟
دحك عليه وتبسم ، وابوه ردف : بودك ؟
– التشوفه يابه عد امرك
– بارك الله بيك وليدي .. ان شاءالله نشوفلك مرا تناسبك ونزوجك خاطر نفرح بيك ونشوف بزرك .
يازي: عروسته جاهزة ان شاءالله بس ينوي احطها تحت ايديه
خالد : ياهي ؟
ضحك خشان : يازي حاطتلك عينها على فرد مرا تريدها الك
– ياهي يابه اعرفها
– ما ادري عنك يمكنك شايفها اخت يازي الزغيرة
– وانت تذكرها اشتااكيت لها ولامي والباكيات بعد اذنك اروحلهم عكب الظهر ازورهم
– على راحتج ييازي فرحة اليوم البشرتيني بيها على اثرها اطيج عيني .. انت تامرين ما بس اطلبين
– يا بختي بودي اترحم على ابوي عد ما باعني بذاك اليوم لو ما بايعني ما جان صرت عدك .. يمكنه القدر
– هلا بقدر كاتب الله يا محلاه
حجه وكام
كمنا وراه نمشي للكلعة وخالد يندستي : اختج حلوة
تبسمت : لو جنت رايد تشوفها امش وياي اليوم زتني الهم وتشوفها
تبسم وكال : اي اروح
الولد بعده زغير … حيل كيف واعش جو عد ما سمع نوينا نزوجه … الظهرية كلها منكع روحه بالماي ويجلف خاطر يصير نظيف وحلو
خشان من الفرحة لا هود ولا نام كام يتكلب الظهرية كلها
عد ما نزل الظهر كال : كومي اخذج لاهلج دام ما نمت
كمت لبست النقاب الذهب والعباية المطرزة وطلع هو ينده : خاااااالد
– امر يابه
-انده لابو راشد گلو يجهز الربل خاطر نمر على آل موازي
سميعة : ليش ما كبل ثلاث تيام جنتوا بال موازي شنهو الجرى شو مسوين الدرب خريط
دحج عليها واندار ما مهتم بكلامها وراح ينده على وحدة من بناته تحطلو الطشت يغسل وجهه
اندرت لها وكتلها : اهلي ورايدة ازورهم شنهي اعتراضج
– عشتو اهلها وهم خيمة شعر فوك منها لابسه نكابها الذهب اليشوفها يكول رايحة لكصر الوالي ما لال موازي وهو زينهم بيته طين
– يكفي بزينهم انا منهم
حجيت ومشيت ضحكت وراي وهي تحجي : هالعاجر شايفة بروحها زين
اندار الها خشان وهو يكللها : كفي غيضج وكصري السانج يا سميعة
– انا ما بقيد اغيضها لجن هي التجبر الواحد اعلى الحجوة المرة الما تخلف حصيرة دوس اباب البيت اخير منها
– شكثر تركركين لخاطر بختج
حجاها وهو يتعداها وهو مكشر منها ومن سوالفها
عرضلي خالد : ابو راشد جا بالباب
– بس خل يكمل ابوك خاطر نمشي
طلع خشان كالو : انت شعندك تمش
– وياكم غير
-اكعد هين بين ما نرد ما نطول
– بس انت ما كتلي الظهر
– انا شكلتلك يولو اثكل واركد هين
وكف خيبان من حجاية ابوه، دحج عليه واشر لابوه امه شافته يأشر كالتله : وانت شعدك رايح ليغاد اكعد هين وانجعم
حجيت : وانتم كلكم افتريتم عليه ايش كال المسيجين راد يمشي ويانا خاطر يفتره شجالكم ؟
خشان : خليه بالدار ما نطول
– والدار شبلاها عكبنا راح تنهجم لو تهد جيوش .. خله يمشي الولد دام بخاطرة المشية
سميعة : مالو طلعة انجعم هي احاجيك
ضاج خالد حيل وطلع من الدار
نطرت خشان ليما طلع وخالد كاعد اباب الكلعة ووجهو مكشر كلتلو : عليش تخليها بكلب الولد كوم خالد اصعد يم ابو راشد
كبل لا يحجي خشان انا ندست خالد ودفعتوا : دكوم ول دادة كوم
صعد بسرعة وكعد يم ابو راشد ….
تحرك الربل وطرينا الدرب لال موازي على ديرة اهلي
وصلنا غاد خشان راح عد ابوي هو وخالد وابو راشد وانا مشيت ع الكاع امي وخواتي كاعدات يحوشن شجر الرمان
تلكني وفرحن بجيتي وبشرتهن ووصيتهن محد يدري بخبر حمالي .. وامي ظلت تندعيلي .. حجيت وياها اعلى نيتي وكتلها : بنيتي ازوج مرجانة لخالد ابن خشان
– ماهو زغير
– لا ماهو زغير هو يكبرني بسنة مدري سنتين وهالانا معرسة ودايرة امري ماني زغيرة ..
– والله ييمه شفتيتلي على ال خشان ، بس حاجيتي خشان بالحجي
– حاجيته واشوفه راضي بالنية .. انا ما اريدها لواحد من ولد عمي وتاليها ييمه حالها اردى من حالج خلها تعيش بخير خشان وتفتك من ضيم ابوي
اجت مرجانة شايله الرمان بشليلها حطته وكعدت وامي تفشكلي الرمان وتحطة جدامي احمر يزهي لونه .. دحجت من بعيد خالد واكف .. اشرت وندهت عليه : خاااااااالد اكرب اكل رمان طيب
خالد بكلبه النار بس يريد يكرب ويشوف ياهي النريد نزوجها اله .. شلتله رمانة مفشكه اطيته وكتله : سلم على امي واختي مرجانة
سلم على امي واستحى يدحج بمرجان ضل مدنج .. ضلت تحاجي امي وهو يلصلص بعينه عليها … حجيت ويا مرجانة وكتلها : كومي نكمل حوش كبل لا ينزل المغرب
كمت منها وكتلها : خالد رايدج مرا
هي ما ردت ضلت مدنجة ومستحية ، ندستها وكتلها : تراني اختج اذا ما رايدته كولي محد يغصبج عليه
– لا ما بغصب
– رايدة لو لا ؟
تحجي بحيا : بكيفكم
فهمت هي رضت بيه …
ليغاد صاح خشان وركبنا نرد بس خالد يضحك للهوى كن فرحان بنيتنا اله
رد يسر امه ويبشرها ويكللها: ابوي رايد يزوجني
فرحت من سمعت ابوه رايد يزوجه وكالتله : من باجر اشوفلك بنات الديرة وتخير ياهي التريدها
كال الها : لا ما من الديرة .. رايد اخت يازي الزغيرة مرجانة
هي سمعت هيج وتجننت .. اسمع بس كوانها ويا ابنها وهو مغتاض ويكللها ما اريد بنات كرابتي انا اخذ التعجبني
وهي ترده : انحرك هين وما اخليك تاخذ وحدة من حياي ال موازي وبخت الله انحرك
انا كاعدة بحجرتي واسمع كوانها ما احس الا وهي هادة عليه للحجرة وتكلي : لو حطيتي براس ابني اختج اهجم الدنيا فوك راسج ، الغريبة ما نريدها تضل حية بين اكتارنا انا لو ردت مرة لابني بنات عمومته وخواله وحدتهن جمارة ما عايزين فضالة ال موازي
لا حاجيتها ولا كثرت حجي وياها كتلها : اخطبيله الترضينها ابنج وحكج عليه ياخذ اليطيب لها كلبج .. انت امه وادرى بحاله
من شافت حجيي هاكذ خمدت وكالت : اي ما ارضى الغريبة انا ما اريدها شنهي كحط بنوات ونروح نخطب من ال موازي .
– يا اختي روحي اخطبي اللي تهواها كلبج انا شكو
– انت الحطيتي الفكرة براس ابني وهالمعارض ويزاكح بوجهي
-بطلنا ما تريدو اختي روحي شوفي لها التهوينها بس سدي الباب وخليني اريح جدامي تون وظهري ياذيني
– من زين حمالج وظالة تشكين اليسمعج يكول داشة العشر ما عاجر وموغفة على كلوبنا
– سميعة فاركي
ردت الباب بكوا وربدته
انطري يصير عدي جاهل .. اشوف عيونج وخيبتهن عد ما تعرفين العاجر الكل ما كمتي وعايرتيها شلون تحبل وتجيب … يا كثر شوكي لهاللحظة اليعرفن بيها انا جنت حامل كل هالفترة المضت
تمددت وبالي وكلبي مريحين عكب ما عرفت بروحي حبلى
انتهيت من وساويسي ها خاف ما احبل ها خاف اكضي العمر هيج بلا حبال.
كتمت على خبر حمالي ما خليت احد يعرف بيه حتى ملكه علن ما تعرف اتزاورلها سالفة اذا ما تذرها لحبايبها المنا ومنا ومن حبيبة لحبيبة سر حمالي الاكي على كل السان.
سميعة اعترضت يم خشان على فكرة يخطبلا وهو كاللها : هي نية لا سعينا ولا خطبنا شادة حيلج وش بك .. فاركي مالي بغيضج خاطر
ضلت على بالها هالسالفة كامت تكوم تكعد تكول حرام ما اخلي ابني ياخذ اختها لو اموت .. رايدة تكوش على الكلعة هالحيايا
تكوم تكعد وتحجي وتذري وانا مخليتها على مايها
وكوانها هي وابنها للضالين هي تصيح عليه وهو مغتاض منها كن وكفت حجر عثرة بزواجه ومنعت يتزوج والولد الباين ما معول من كلناله نزوجك مكيف بهالخبر .. وطالعة روحه من امه عد ما امتنعت
من كالتله ازوجك بس كرابه
ما راضي كايللها انا رايد مرجانة اخت يازي .. انا شفتها وعجبتني ..
عد ما درت شافها انجنت شلون شايف عروسته كبل العرس تكلو هذه لو ما هي ساقطة ما تشوفها كبل العرس نحن عدنا الزلمة ما يشوف عروسته الا ليلة دخلتها .. ما تاخذ بت محمود لو على كص ركبتي
معارض وضاين كل يوم مكاونهم ما يفض
وخشان لغى نية زواجه .. الشي الزاد بحقد خالد على امه .
مرت الايام …
وخشان حيل فرحان بحمالي .. ما واسعته الكاع من فرحته
وهو عده الي طلب كال ( جزاة بشارتج شطلبين وبيا وكت امرج منفذ) وانا كل الاريدة اخلص امي وخواتي من الخيمة وضيم الخيم
حازة بكلبي مرت ابوي كاعدة ابيت ومرتاحة وامي وخواتي متيهات بالكاع عيشتهن شغل اذا ما اشتغلن مالهن زاد .. ابوي سايك عليهن جنهن حواوين ماهن بشر
تذكرت المرة الحجت وياي كالتلي البطنج بنت
وخاف تطلع صدك بنت ويخبت خشان من ما اجيبلا الولد
فكلت اكله بطلبي كبلا اجيب ..
عملت الغدا وطلعت للكاع اتغدا وياه
عد ما وصلت غاد فرشت وهو اجا يكعد خاطر يتغده .. حجه : عليش كلفتي روحج وانت حبلى لو ضاله بالكلعة انا ارد واكل
– لا كلت نكعد هين بالكاع ونتغدا اعلى ريحة الشجر والكاع مالي بهوسة الكلعة
سم بسم الله واكل
حجيت : خشان انت كتلي جزاة بشارتج طلب اطلبه يمتى ما ردت ما
– كولي شنهو البالج
– انا رايدة تخصصلي وصلة من هالكاع باسمي
كشر على حاجبه : وصلة من الكاع .. عليش انا مكصر عليج بشي
– يشهد الله انا لا معتازة ولا بحال الوصلة لجن اخر حيلة ضلتلي ويا ابوي
– شلون ؟
– عد ما تنطيني وصلت كاع باسمي .. ابني بهالكاع بيت لامي وخواتي يكعدن بيها ويفتكن من ضيم الخيمة .. بهالحال الكاع كاعي بالاسم طبعا الحلال حلالك حاشى الي نية ثانية يشهد الله نيتي بس امي وخواتي … يكعدن وعد ما يكعدن ابوي وعمامي ما يكدرون يلوونك بيها .. تتبرى وتكول الكاع كاع يازي هديتها الها .. ما تضل لاحد حجه .. لو ابوي يبنيلهن بيت ويدن يعيشن غاد ابيت .. لو يخليهن عايشات هين بالكاع والبيت النبنيه الهن .
– مدري والله السالفة احسها مخربطة
– انا رتبتها ابالي واعرف تمضى ناطرة موافكتك
– اذا على موافكتي .. انا واعدج وحجاية الزلمة ما تنرد وكتلج التطلبي على السانج لو شما كان .. وما طولج رايدة وصلة كاع انا حلالي ومالي فداج ما بس هالوصلة .. ويجرالج انا اروح واخصصلج وصلة من الكاع واكتبها الج .
تشكرت منه هواي وصدك جانت هاي الفرحة الجبيرة ما فرحة حبالتي .. فرحت من كل كلبي .. وهو فرح على فرحتي
ثاني يوم كتبها الي .. وبلغ بيها الكاع ليازي
لو هم تخافتوا من تحت الكاع .. اخوته اعترضوا .. نسوانه اعترضن ..
اخوته يكلون تطي حلالك لمرا وما تطي لواحد منا واحنا الصيم حالنا .. ونسوانه يطالبنا مثل ما اطيتها تطينا شنهي هي وحدة شو عاجر وما تخلف واحنا المبزراتلك
حتى ملكة اغتاضت تكلو : خوية وانا اخيتك لا كتبتلي وصلة كاع ولا اطيتني شي .
عزم اخوته واهله وكلهم وسوا وليمة وبشرهم بلا ما يعلمني وكاللهم : وصلت الكاع اطيتها بشارة .. يازي حبلى وانتم والكل يعلم انا شكثر ناطر وحدة من حريمي تحبل وهي الوحيدة الحبلت منهن وكتلها اطلب شتتمنين ويجرالج طلبت كاع تبني بيها بيت لامها وخياتها وانا زلمة ما ارد بحجايتي واعلى اثر طلبتها اطيتها وصلة من الكاع هذا الصار وهذا الجرى.
نظرات الغيض والحقد الشفته بوجوه الوادم ما شفت مثلها .. جلمة بالمبارك محد مكالها ابجي .. باركوله اله محد اندار وكالي بالعافية
بس ان جان الحايط حس واهتم انا اهتميت
العدها الكمر شلها بالنجوم ؟ .. ما طول ولي نعمتي خشان رضاته اوجب من الكل اطيع واسكت واتحمل واشيل لجله ولجل عيونه .
ما جنت مهتمة بغيض خواته بكثر ما مهتمة ابني بيت لامي وخواتي واخلصهم من عيشة الهم العايشاتها .. خشان طلب من بعض ازلام يبنون البيت
وباشروا بالبيت وانا وياهم اجي من الصبح ارد ويا غروب الشمس، وخالد صاحبي وايدي اليمنى اليرافكني وياي بكل مچان ..
كضينا البيت بشهر
ورحت جبتهن واجيت … لا بلغت ابوي ولا اطيت علم لاحد ولا احترمت احد منهم .. جبتهن جبت غطوتهن وتعاونت وياهن نظفنا البيت
خالد ويانا ويانا ما هدنا
حسيت بيه كام يهوى اختي واختي هم من ادحج غاد عنها احس بيها تلصلص بعيونها عليه وتهواه …
الفرحة لامي عد ما صار عدهم بيت وسكنت بيه يا فرحتها
كعدت ورتبت امورها وسكنت عكب يومين وما نحس الا ابوي يهد على كاعنا
اجا يتكاون ويا امي دفعته عنها وكتلو : شعدك عليها وجاي بحيلك تريد تتكاون ..
– تطلع بلايا علمي تهد كاعي وانا يا غافلين الكم الله
– غيضك هذا عليها لو على خسارتك خسرت اربع خدامات يخدمنك ليل نهارخاطرتنطيهن الزاد .. ذني امي وخواتي وحكي ولو تكربت منهن والله لا اسويها وياك دماية
– تكفين بوجهي يولي .. كبرتي وطلعلج صوت وكمتي تهاددين
– ليش ابالك اكعد ابالك واطيك ذهبي واترجى بلكت ترضى تخليني ابني البيت لامي وخواتي وانت ضاميهن .. اذا انت محمود وتضن محد بحيلتك انت بنتك واتعداك .. وشما بخيلك اركبا امي وخواتي ماهن برادات وياك .. ولو حاولت تهد على كاعي مرت اللخ الي زلمه اخلي يطلع ويكسر شرك ويردك لعفريت الشر المجابلها .. فارج
هدني ومشى على خشان يهادد : تطر وتاخذ مرتي وبناتي بلايا علمي وتحطلهن بيت بكاعك … انا وياك كوام يخشااان
ردوا خشان : انا لا جبتهم ولا هي كاعي الكاع كاع يازي انا كتبتها الها وهي البنت بيت وهي الجابت امها واخياتها وكعدتهن
– يازي محسوبه عليك ومالي جلمة وياها جلمتي وياك انت
– هي وان جانت مرتي تضل بتك وكوانك وياها وخلافكم اسرار بيت تصافى انت ومرتك وبناتك وخليني ابعيد .. اتدخل لو حصل شي ليازي من كونها تضل مرتي واليمسها يمسني .
احتار ابوي بامرا وراح على عمامي يكللهم خشان باك مرتي
اجو عمامي وفهموا السالفة من خشان واتبرى خشان من السالفة وكاللهم الامر يم بتكم الكاع كاعها .. اجو عمامي ساومتهم كتلهم : الجايني بخير هلا بيه انا ما شفت امي وخواتي عايشات بخير غاد وجبتهن قسط .. بس ترضون مكعد مرتا وعياله ببيت وامي وخواتي بخيمة ويكرب عليهن كراب المطي .. شنهي ذيج العفريت بيش احسن من امي تبزر ولد ؟ ..
امي عدي واليكربها والله ما يطلعها الا على جثتي واليمس شعره مني عدي ازلمه بكبر الجبل يهد بيوتكم فوككم لو مسني شي
تريدون الخير وتريدون امي تعاونوا بينكم وابنوا بيت لامي وخواتي ويتعهد ابوي ما يشغلهن ليل نهار بالكاع بشغل فلاليح ما تحمله ..
اليتعهدلي بيكم بهالعود من عين باجر امي وخواتي يردن تكولون لا ويردن خدامات تحت ايد ابوي ومرته .. تكولون لا .. يضلن هين ومالهن طلعة من هين وانا لكل واحد يتعدى اليرشني بماي ارشا بدممممم
مشوا ومحد اجبل منهم بعد .. ظنيتها لهين وتكضي ما جنت ادري غيضهم علي راح يربى بحجورهم ويردون بغيض اكبر.
كعدن خواتي واستراحن بهالدار
وخشان جر داير ما داير الكاع حبل وجراجف غطاهن عن العين خاطر لحد يمر بدربهن وهن بس نسوان كاعدات بديرته
جان وسيطهم خالد
ما هن الكربنه .. هو الروحه علكت عد هالكاع ليل نهار كاعد غاد وبس تطلع امي يركض الها شمعتازة وشرايدة .. صارلها كن ابن ما ابن نسيب
بهالايام ثكلت بطني حيل واوجاعي وان جانت جثيرة لجن ما اذعن الهن .. اكوم لحيلي واروح يم امي وخياتي نزرع الكاع الكتبها الي خشان خيرات الله طماطة وخيار وعنب وخضرة رشاد وريحان .. ونزرع بهالكاع ونسكي بيها وامي مرتاحة هي كن سكنت ولاكت مجانها .. وهالشعور عدي ما تساوي فرحة
بهالايام زادت ولادتي جنت جايبة تعلولة ورايدة اتعلل ويا خشان العصرية بالكاع خذيت التعلولة وكتلي الجاي ورحت للكاع .. عملت الجمرية وحطيت الجاي المهيل بس احس الوجع نزل على رجلية
اجا خشان وسولفنا وتعللنا والوجع جاتلني
ما حس اعلى شي عبن انا ما مبينة عدي وجع اضم بروحي
ليما الوجع وصل حده حسيت الجاهل راح يطلع من بين رجلية .. فزيت من مجاني وما احس الا الماي والدمايا يجرن اعلى رجلية
ركض خشان للبيت ينده ملكه وامي ركضتلي من بيتها
وامي تركص حسيت الجاهل طلع .. خواتي تراكضن ولفن عبيهن داير ما دايري خاطر لا اظل فرجة بالكاع لعين اليمر
بين ما ملكة جابت وحدة تجيبني انا والدة ومخلصة وناطرة تجي خاطر تكص السر مال الجاهلة
وكتها ما جنت بحال الجاهلة ليما كصن السر ولمنها وشالنها بحضني .. ادحك الجاهلة سمرة طوووووووخ بسمار خشان
لفنها عني وانا ادحج بيها ..
ليما جا خشان وشفت فرحته بيها كضبها يحبحب بيها ويحب براسي ويحمد الله ويشكره .. وعيونه تتلامع وهو يدحج بوجه الجاهلة
الجاهلة سمرة طوخ بس عيونها جن شذرتين خضر بوجهه لون عيونها شي غريب .. ما شايفة هيج خضار جادح بعين احد
خشان اسمر طوخ وعينه جوزية ما هي سودة طوخ
وانا شهبة .. شعري احمر ووجهي ابيض منمش وعيني صفرا
البنت اختلطت ما بيني وبين خشان .. خذت لون ابوها والعين الملونة مني بس ماهي صفرا خضرا …
خشان كال نسميها ( شذرة ) عبن هي شذرة نادرة جت بعد قحط طويل ابزرة ابوها وجانت هي فاتحة الخير لبزره .. من عدها فكت جبسته
شلت هالبنت وحبيتها بكصتها وخذيتها بحضني ارضعها
عد ما رجعت للكلعة وبيدي هالبنت .. اسمع جلمات الشماتة
كربت مني سميعة ونظرات الحقد باينة بعينها : بالمبارك يولي ولو جانت بنت بس يلا احسن من ما تضلين عاجر
– التجيب الولد تجيب البنت
– دجيبي البنت عدل يولي دحكي بنت وسودة فرحانة بعمرج امبزرة
– سودة بيضة شلون ما جانت انا ما خالكة منها شي ما اعيب شي الله سواه حاشى
– احنا ما نعيب بس باجر عكبة تكبر تعنس حالها حال .. واشرت على حجرة (ملكة) محد يهواها
– الله كريم لمينا تكبر
– اي بالمبارك بس يكلون اذا تحطيلها عسل ويا الحليب يمكنها تكشف جربي حطيلها عسل وانت ترضعيها يمكن تكشف ما تظل سودة هيج ولو جنها مالها جارة يولي
– المن تطلع قابل ابوها وعمامها سمران وكل بزر يطلع على اهلها
– فرحانة مبزرة يولي شهالبزة هاي
هزت ايدها وطلعت وانا اعلى فراش انفاسي
اجت زهرة نفس حجايتها .. حتى ملكة تكلي : يشين بختج يولي البنت سودة شحال حظها
– ملكة لا تفاولين الجاهلة بحظ شين حبي الله
– والنعم بالله بس اخافنها تصل ضلتي يولي محد كلبني وبرت على كلب اخوي
– الله كريم
اجا خشان فرحان يسمي بسم الله ياخذها ويحبحب بيها كتلو على حجيهم اغتاض وكال : انا اردهم مالج غرض
ثاني يوم ذبح عجل لوجه الله تعالى وعزم الوادم على جيبة البنت، اجبلوا الوادم اللي وصل بليرة ذهب اللي وصل بكطعة كماش الي .. لو لفة حرير لفراش الجاهلة .. وفلوس
بس الكل اليجي يتعجب على خشان ذابح عجل لجل بزرة بنت ..لو ولد بيها مجال .. بس بنت وسودة وفرحان بيها خشان الا صايبة شي
هالبنت اخذت حيز بكلب خشان محد ماخذو كبلها لا ولد ولا بنت .. تربعت بكلبو اميرة … اول ايامها اعتزل الشارع ما يطلع كثر ما مجابلني ومجابلها ويحبحب
عدت ايام جيابتي وكضت ..
وكمت لحيلي ورديت احوش ويا امي وخواتي واشتغل وياهن
بس من رديت عرفت صاير برغوث مودة بين مرجانة وخالد
بس تنده امي يركض الها وبس يتكرب هي تجي وتوكف جريب من كفا الجرجف ادحك عليه
كضبتها وحذرتها كتلها : خشان لو علم بينج وبين خالد شي يلومني وما تضل الجن كعدة هين ويردجن لكاع ابوي … خالد رايدج واعرف هاويج بس لا تذبين بروحج وادحجين وتثبتين على نفسج تاليتها يكلون شوف بزرية ام يتزي شلونها
يمرجانة شماتي هواي والكرهون هواي لا تخليني حجوة بحلك واحد محد منهم يودني .. بالج اسمع مكربه لخالد لو طالعتله
كالت : لا وما عدي شي وانا ما ادحج وهو يكرب يسعل نعتاز شي وانا اطلع اطي جواب
– لو جا وسعل امي تطلع تجاوبه انت لا تطلعين ولا تخلين احد من ديرة ال عكاب يشوف طولج يولي نصير حجوة بحلوك الولدم تلوك بينا.
عد ما كفت اختي من خالد وما كامت تطلعله ولا تشوفه وجهه
خالد اغتاض حيل … راح عد ابوه يطلب يزوجه مرجانة
خشان كاله : بالاول ارضي امك
انا ما اكدر اجيب الغريبة واغصبها على امك
دامها جابتك لها حك عليك ترضيها
راح يطلبن من امه
امه تجننت شلون رجع يفتح موضوع مرجانة جدامها
تكاونت بالبيت واجت علي تكاوني وتكلي : انت الجاي ادربي ابني لكاع اهلج .. كله منج
كتلها : انا لا ارضى بعيب ولا اكبل خالد يكربهم امنعي ابنج عنهن ولا يجبلهن الحجي تراهن بس نساوين وما رايدة احد يعيبهن بجلمة ..
تجننت شلون كلت الها هيج
ما خلت فشار وغلط ما فشرت وغلطت ليما جا خشان تكاون وياها وكتلها وكعدت بحجرتها تدعي وتتشكى لله علي.
ثاني يوم بالضبط من كوانها
جنت انا كاعدة مجابلة بنتي ارضعها
ما نحس الا ال موازي هادين بفشكهم على ديرة ال عكاب .. ومحاوطين كلعة خشان داير مداير مسلحين ويهددون من بعيد
خشان ما جان بالبيت
عد ما سمع .. ودى خالد وابو راشد على اخوته وعمامه يخبرم
واجاهم يطبربك بحصانه ومتلثم بلثامه، اول ما وصل عدهم صاح : يااااااااااا عرب … الكلعة بس حريم الزلمة البيكم ينازلني بلا سلاح لا اعلموا الزلم التهد اعلى كلهة ال خشان منم
اول ما تلكاهم ونزل من على حصانه ….
والا واحد من ولد عمومتي يحط الجيلة بجتف خشان …
اعلى حس الجيلة وما تحس الا ازلام من تحت الكاع هدت اعلى طكت الفشك …
تكاونوا بينم …
صاروا دمايا … ثلاث من ال موازي واثنين من ال عكاب
ووجرحى ومصابين بكل مجان انولينا بهالمسية …
ال موازي جروا ولدم وشردوا
وال عكاب شالوا ضحاياهم .. وحملوا خشان وركضوا بيه للحكيم .. عدوا وانداروا لبيوتهم … خذوا تفكهم وشالو غيارم وهدوا على ال موازي .. حركوا كياعينم … وكتلوا ثلاث منم
ما تسمع بس حس الفشك بالديار
هذا كله … ونحن ما ندري ال موازي ليش هدوا وعليش فزعوا وعلى يا مال تكتلت كل هالوادم …..

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية قلاع الضر)

اترك رد