رواية ولا كان على البال الفصل الأول 1 بقلم عبير عمر

رواية ولا كان على البال الفصل الأول 1 بقلم عبير عمر

رواية ولا كان على البال البارت الأول

رواية ولا كان على البال الجزء الأول

رواية ولا كان على البال الحلقة الأولى

كل سنة وانتِ طيبة يا بسبوستي، رمضان بكرة خلاص، هتتسحري فين بقا؟
في حتة خيمة يابت يامريم تحفة، بس للاسف أنا من عيلة محافظة وهتسحر في بيتنا عادي
وكان لازمته ايه الحماس اللي حسسني انك حجزتي فيها ده؟ علي فكرة أنا هاخد ياسين ونروح نفطر ونتسحر كمان، خليكِ انتِ في بيتكوا يا محافظة بقا
أحلي أجواء ممكن تمُر علي الواحد في السنة كلها والله، أغاني رمضان، والزينة اللي بتبقي مالية الشارع، الولاد اللي بتجري ورا بعض لحد الفجر، كل حاجة ليها روح تانية بجد
يحيى عايزك في المكتب، أنا هنزل عشان ياسين مستنيني تحت
انتِ هتسبيني لوحدي معاه؟ يومك مش فايت
هو أنا سيباكي في بيتكوا احنا في الشركة عادي والموظفين رايحين وجاين اهو
كنت عايزني في حاجه يامستر يحيى؟
احنا معلقناش زينة رمضان في الشركة هنا لية؟ حاسس اني مشغل ناس بتعبد الكرفس معايا محدش قالي كل سنة وأنت طيب بالغلط حتي.
مبدئيا كل سنة وأنت طيب، ثانيا احنا لسة فيها اهو ممكن نجيبه دلوقت ونعلقه، انزل هاته وأنا هستناك هنا وهعمله معاك متتأخرش بقا
نزل أشتري كل حاجة كانت قدامة غالبا، الموضوع لذيذ لأبعد حد والله، قعدنا نعلق في كل مكان، جاب فانوس كبير وشغله، شغل أغاني رمضان واللي رايح وجاي كان بينبهر ب المنظر، منظر مُريح للاعصاب والله مش هزار
تعبتي أوي في الحاجات دي، صحيح كنت هنسي كل سنة وأنتِ طيبة الفانوس دي ليكِ والمصلية دي كمان
ايه ده؟ دي مكتوب عليها اسمي، لحقت تجيبها امتة دي؟ تحفة بجد والله
المصلية كنت طلبتها من كام يوم هي والفانوس وجبتهم وأنا طالع بس.
روحت بيهم كأني طفلة عندها ١٠ سنين، أي هدية الواحد فكر فيها انها تكون مختلفة عمرها ما فشلت انها تبهرني، كنت كل شوية أشوف اسمي اللي مكتوب علي المصلية واتبسط واشغل الفانوس
– مستر يحيى جابلي فانوس ومصلية
-مستر يحيى اللي قاعد جوه ده.. تعبان ولا ايه؟
– مريم أنا بتكلم بجد والله، أنا فكرت انه جاب للناس كلها هنا زي عادي
– هو انتِ في حد زيك؟ ده ساب الناس كلها وجابلك انتِ فانوس، يلا الله يسهله بقا ياعم
دخلت ست لابسة عباية سوده شيك أوي وطريقة كلامها صعيدي شوية سألت عليه ودخلت
عندي ليكِ حتة خبر عارفة مين اللي عند يحيى جوه دلوقت؟ أمه
اسمها مامته وبعدين شكلها مش بتتكلم زيه أصلا
مهو أصلا أهله صعايده وكلهم قاعدين في الصعيد وهو بس اللي هنا عشان شغلة، عارفة سليم بيه عبد المچيد.
أُريد رجُلا؟
هو بعينة، شكلها كده، والله يابت ياعبير بخاف من الصعايدة دول معرفش ليه، بحس انهم هيغدروا بيا في أي لحظه
انتِ عليكِ ثار يابنتي، قومي خلصي شغلك بدل ما سليم بيه بنفسه يطلع ياكلك
بعد شوية ندهلي فا دخلت، مامتة جابتني من فوق لتحت وبعدين ديرت وشها، كنت حاسه إن فيا حاجة غلط، عرفني عليها واداني ورق وطلعت، بعدها بشوية طلعوا وقال انه نازل، انا مالي ما تنزلو هو أنت كنت السكرتيره
سليم بيه راح فين؟
نزل مع مامتة
والورق ده امضيه منين دلوقت؟ هو الحلو مضايق ليه؟
طنط كانت بتبصلي بطريقة غريبة كده بجد مش عارفة فيا حاجة غلط ولا ايه
يمكن مستغرباكي؟ مش واخده علي انها تشوف بنات حلوة مثلا؟
مستغربة ايه هو أنا داخله عليها ب فستان سوارية ما لابسين فورمال عادي، رجع بعد شوية مش طايق نفسة، دخل وهبد الباب وراه، ده أنت اتشبشبلك علي كده، شوية وندهلي، كل ما حد يتزنق في الشركة دي ينده لعبير
فضلت واقفه قدامة خمس دقايق باصصلي وساكت
حضرتك ندهتلي فية حاجة؟
فية سفرية تبع الشركة ل الاقصر وأسوان بعد العيد، اعملي حسابك عشان هتكوني موجوده
الأقصر وأسوان في الحر ده؟
نعم؟ هو أنا هسفرك علي جمل ياعبير؟ هنسافر طيران وساعة وهنبقي هناك، اتفضلي علي مكتبك، وخدي الفايل ده معاكِ راجعية
ممكن تهدي، عبير هو قالك ايه ل كل ده؟
هو أنا بشتغل عنده؟ بيتكلم معايا كده ليه مش فاهمة؟ سوري أنا بشتغل عنده فعلا، بس برضو يتكلم معايا ب أسلوب أحسن من كده
كل ده عشان قالك اتفضلي علي مكتبك؟ قلبك أبيض تلاقية متضايق من حاجة بس، تلاقي الست والدتة اتخانقا معاه، أنا شكلي حسدتك انتِ وهو امبارح علي الفانوس
أنا همشي بدل ما أفطر عليكِ إنتِ وهو
بعتلي مسدج بليل أنا أسف لو كنت انفعلت عليكِ، مكنش قصدي والله، هي جت فيكِ انتِ حقك عليا
حصل خير يامستر يحيى
حصل خير ومستر يحيى، ده انتِ مقموصة بقا؟ طب حقك عليا تاني والله
محصلش حاجة تمام
رن عليا في نفس الدقيقه، رميت الموبايل من ايدي، حد يفزع حد كده يا أخي أنت كمان
فتحت وسكت شوية
يعني هتصلي علي المصلية وتدعي عليا دلوقت؟ ده أنا غلبان حتي
مين قالك اني بصلي عليها؟
يعني ده اللي ضايقك وانك هتدعي عليا دة عادي؟
لا هدعي عليك لية، الموضوع مش مستاهل كل ده يعني
وهو لو مستاهل هتدعي؟
لااا برضو، حضرتك محتاج حاجة؟
ما كفاية حضرتك وحصل خير بتوعك دول، مكنش قصدي اني انفعل عليكِ النهارده كان فيه حاجات مضيقاني بس
وبقيت أحسن؟
لو قولتي انك مش زعلانة هبقي تمام
مامتك قالتلك حاجة ضايقتك؟ مش قصدي اتدخل والله بس انت من بعد ما جت وأنت باين إن فية حاجة مضيقاك
عايزة تجوزني بالعافية، غالبا بتجبلي عروسة كل ساعتين، النهارده جت مخصوص عشان تشوف يمكن اتجوزت من وراها ولا حاجة، علي أساس لو اتجوزت هاخدها الشركة معايا وأنا نازل كل يوم، فا اتخانقنا وبس
طب ما تشوف عروسة منهم وتريحها مش يمكن واحده فيهم تطلع كويسة؟
كلهم ناس كويسة بس مش شبهي، المناسب بالنسبة لماما مش هو المناسب ليا، معادلة صعب تحقيقها بيني أنا وهي، هي شايفة انها طالما قادرة تفتح بيت وشكلها كويس يبقي عايز ايه تاني؟
وتجبلك الواض
انتِ عرفتي منين؟
المسلسلات مسابتش حاجة بقا، كمل سمعاك
بس أنا مش عايز كده، عايز واحده فهماني ، دماغنا شبه بعض، مش مجرد واحده اتجوزها واقعدها في البيت تعملي محشي
تصدق ماما كانت عاملة محشي علي الفطار النهارده! كان ناقصك تاكل منه والله
عبير ابقي فكريني اخصملك يومين
كل ده عشان قطعت كلامك خلاص كمل
كلام ايه عشان مجبتليش محشي من اللي مامتك عملته ده، انتِ مش عارفة اني بحب المحشي بتاعها؟
انت خدت علي أمي أوي، مش عشان أكلتك معايا مره هتصاحبني، المهم يعني نرجع لموضوعنا، مفكرتش توصل معاها لحل وسط؟ حد يعجب كل الاطراف يعني
هو أنا اللي هتجوزها ولا كل الاطراف؟
أنت بس..
مفيش بس، أنا اللي هتجوزها يبقي أنا اللي اختارها
وهتفضل معذبها معاك كده؟
لاا، قريب كل الاطراف هترتاح، اتمني اننا نرتاح كلنا ساعتها، يدوب تلحقي تتسحري وتناميلك ساعتين عشان عندنا شغل الصبح بدري الصبح، تصبحي علي حاجة حلوة شبهك كدة.
علي فكرة مستر يحيى عازمنا كلنا يوم الجمعة
علي خطوبتة ولا ايه؟
علي الفطار ياعبير الفطار
اه فطار سوري، مقاليش يعني، مش عازمني معاكوا ولا ايه؟ أنا أصلا مش فاضية يوم الجمعة
طب روحي كلميه عشان قالي عايزك
مريم قالتلي ان حضرتك عايزني
فاضية يوم الجمعة؟
قالولي علي الفطار اه، بس للاسف مش فاضية متعوضه ان شاء الله
وراكي ايه ان شاء الله؟
حاسة ان هيبقي ورايا حاجة ، ماشاء الله أخر واحده بتتعزم في الشركة كلها
هو محدش عرف غير السكرتاريه اللي هيحجزو المكان أصلا، انتِ مش فاضية الجمعة بجد؟ فاضية امته؟
انت هتغير اليوم عشاني؟
والغيه خالص لو مش عايزه
لا وعلي ايه أنا تمام معنديش حاجة
طب ابقي خلي يومين الخصم أربعة عشان تستظرفي حلو بعد كده
محدش قالك اننا في أيام مفترجة حرام فيها الخصم ده؟
ولا حد جابلي سيرة
كنت متحمسة لليوم كأنه عيد ميلادي مثلا، لبست دريس أبيض شكلة رقيق وهادي، ونزلت، اتقابلنا كلنا، كان يوم هادي، بعيداً عن ضغط الشغل وكل ده
شكلك حلو أوي في الدريسات، مختلفة عن الفورمال
شكراً يامستر يايحيى ده من ذوقك
الوحيدة اللي بتحسسني اني مُدرس انجليزي بجد، احنا برة اسمي يحيى عادي علي فكرة
شكراً يايحيى
رمضان كان بيجري، فجاة بنلاقي نفسنا في ليلة القدر وبندعي، كل سنة كان بيبقي عندي كم دعوات كتير أوي، السنادي كنت حاسة أن مفيش غير أني عايزه ربنا يريح قلبي بس، كنت بدعي للي حواليا أكتر مني، كل حد كنت أعرفة كان عنده دعوة بيلح عليها أوي
دعتيلي معاكِ؟
عايزني أدعيلك بأي؟
ادعيلي أمي تبطل تجيبلي عرايس بالله عليكِ
طب ما ادعيلك تلاقي بنت الحلال قريب وتريح طنط وترتاح أنت كمان
اللي انتِ شيفاة في مصلحتي اعمليه
دخلت الصبح لاقيت علبة كحك وبسكوت علي المكتب ومعاها ظرف مكتوب علية كل عيد وانتوا بخير
واوو طب ما الشغل طلع حلو وفيه عديات اهو، الكل كان مبسوط بيها مش لوحدي، لانه المره دي كان جايب للشركة كلها
هتروح فين في العيد بقا؟
هروح للكبيرة عشان ترضا عني شوية، وكمان الجو وحشني هناك، أعملي حسابك عشان عندنا سفر ٣ يوم العيد
عبير العبده والله
مش عاجبك؟
أنا اقدر طبعا، طب انزلي قابليني كده هديكي حاجة
لبست اسدال ونزلت، كان المفروض مناخدش يوم الوقفه ده أجازة والله، ماما كانت شوية وهتمسح بوشنا الحيطان
يوم اسدال ويوم دريس ويوم فورمال كده، عارفة المشكلة فين؟ انك حلوة فيهم كلهم
أنت جاي تعاكسني تحت بيتي؟ ولا اية
لاا بصراحة، دي علبة شوكولاتة، كل سنة وانتِ طيبة، كل عيد وانتِ معايا..معانا يعني في الشركة
والشركة كلها عديت اديتها علبة شوكولاته؟
هي الشركة كلها عبير؟
خدتها وطلعت جري، دي بدايات أنا بخاف منها والله، الانسان نام وصحي لقا نفسه تالت يوم العيد طب أنام يومين كمان طيب
انتِ مرعوبة كده ليه؟
أول مرة أركب طيارة، حاسة أن روحي هتتسحب مني و..
عبير اهدي مفيش أي حاجة من دي بتحصل، الموضوع أبسط من كده
الطيارة اتحركت، الموضوع مكنش مرعب ولا حاجة كان عادي
وصلنا الاوتيل وكل واحد طلع أوضتة، كان نفسي أطلع رحلة الاقصر وأسوان دي من أيام ما كان المعبد تحت الانشاء لسة غالبا، غيرت ونزلت عشان كان عندنا شغل
كل اللي بيجي هنا بيبقي زي القمر كده؟ ده أنا هنقل مقر الشركة هنا بقا
يلا عشان منتاخرش علي الناس يا يحيى
خلصنا الشغل كله ، ربنا كان مسهل كل حاجة بجد
احنا خلصنا كل حاجة كده، وكده كده هنقعد اليومين فا ممكن نتفسح فيهم بقا
البلد كانت تحفة كنت ماشية مبهوره بكل حاجه هناك زي اللي أول مره يخرج من بيتهم
ركبنا مركب في النيل، المية كان شكلها تحفة كل حاجة كانت سبحان الخلاق
عارفة فية أغنية كده سمعتها من كام يوم كانت بتقول
هي اللي جت خلتني أحس دخلت حياتي عملتلي حس. عجبتني اوي
حلوة دي بتقول ايه كمان؟
ليها وبس أنا قلبي دق في القرب منها بحس فرق، فاهمة الكلام من غير ما أقولة حفظاني جدا جزء جزء
طب يابختها والله
هي مين؟
اللي بيتغنالها الاغنية
بيقولها كمان دي أحلي ما شافت عيني، مفيش في جمالها اتنين ولو حبيت أوصف محتاج سنين
لا لازم اسمعها بقا شكلها حلوة
حلوة زيك كده بالظبط متختلفش عنك حاجة
عملت ايه مع مامتك في الاجازة؟
حاولت اقنعها شوية، اقتنعت بس مش أوي يعني، يومين وهتلاقيها جيبالي عروسة تانية وكأن محصلش حاجة
طب ما تدور أنت بسرعة يمكن تلاقي اللي أنت عايزها قبلها
أنا لاقيتها، بس خايف متوافقش، عارفة عني كل حاجة غالبا، خايف اهلها ميوافقوش هما كمان، مش عارف بس حاسس اني متلغبط بجد
ايه يخليها متوافقش؟ أو اهلها
يمكن مبتحبش الصعايده؟ عايزه تتجوز واحد من القاهره زيها فهماني؟
بس هي هتعيش معاك في القاهره، هتروح زياره الصعيد مش هتعيش هناك يعني الموضوع مش بالتعقيد اللي أنت عاملة ده، ولا أنت خايف ان مامتك هي اللي متوافقش؟
أنا بحترم كلام ورأي والدتي أكيد، بس بعمل اللي أنا عايزه ومرتاح لية مش اللي هي تختارة
مقصدش والله كده، بس رأيها مهم أكيد
رجعنا تاني القاهرة، كان فية تجمع عائلي لذيذ أوي فيه كل قرايبي.
يعني أيه أهلة صعايده انتِ اتهبلتي الموضوع ده ميتفتحش تاني مفهوم.

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية ولا كان على البال)