رواية عائلة بالإكراه الفصل التاسع عشر 19 بقلم سلمى بسيوني
رواية عائلة بالإكراه الفصل التاسع عشر 19 بقلم سلمى بسيوني
رواية عائلة بالإكراه البارت التاسع عشر
رواية عائلة بالإكراه الجزء التاسع عشر
رواية عائلة بالإكراه الحلقة التاسعة عشر
حنان نازله بسرعه من على السلم بتجري بفستانها الازرق وحجابها الهادي ووشها اللي نور بعد ما انكتب كتابها على حبيبها
لقيتهم كلهم قاعدين يفطروا
منيره بإبتسامه: اي يا عروستي بتجري ليه
حنان ابتسمت : يوسف مستني برا هنزل معاه
منيره بدهشه : حنان ..كتب كتابك كان امبارح ..وناوله الشركه النهارده !!
حنان : عارفه انه غريب بس الشركه دي لو اهملنا فيها اكتر من كدا هتقع يا ماما ..حقيقي الواحد مش عارف ياخد باله من حاجه ..ربنا يستر ومتحصلش حاجه تبوظ الخطط اللي حطاها
ادعيلي يا حبيبتى
منيره : دعيالك على طول يا قلبي
حنان وهي بتمسك تليفونها : يوسف بيرن
اسلام بهدوء : هوا السكر مش هيهدى شويه ولا اي محسسني انك ملكيش راجل هنا
حنان : ولا اظبط كدا ..كتب الكتاب كان امبارح
اسلام مسح على شعره : اه صح لا مؤاخده يا حنونه دماغي عملت ايرور من سهرت امبارح
حنان : اه ماشي ..فين ساره ونور
عبير بضحك : انتي متخيله انهم هيصحوا دلوقتي بعد السهر اللي سهرتوه دا
حنان : عندك حق والله ..طب انا نازله
منيره : طب مش هتفطري
حنان : هفطر في المكتب بقا عشان متأخره
قربت وسلمت عليهم وطلعت برا ليوسف اللي ساند على العربيه وايده في جيوبه ببدلته الرسميه ووسامته المعتاده مجرد ما شافته ابتسمت بسعاده وقربت عليه بإبتسامتها اللي بيعشقها : صباح الخير
يوسف بصلها بسعاده من غير ما يرد وشدها عليه اخدها في حضنه واتنهد بهدوء فضلوا كدا شويه وحنان جسمها كله متوتر
يوسف همس في ودنها : حنان ..انا جوزك يا حبيبي
الكلمه هديتها شويه وضمها ليه اكتر وهي اخيرا اطمنت في حضنه
حنان همست : يوسف !
يوسف بتوهان : مم
حنان بهدوء : يوسف احنا في الشارع هاا ..قدام البيت وفي الشارع
يوسف فاق وبعد عنها شويه وهمس في ودنها : انتي نسيتيني الدنيا كلها …نسيتيني حتى احنا فين
بعد ولعب في شعره بهدوء : صباح النور يا حبيبتي
حنان ضحكت : طب مش يلا بقا
يوسف وهو بيفتحلها باب العربيه : اتفضلي يا حنتي
حنان ابتسمت من كلمته وركبوا سوا وأخدها وفطروا سوا قبل ما يروحوا الشركه
********
ساره صاحيه من النوم مبنجه اخدت دُش ونزلت لقت نور واسلام بيلعبوا بلايستيشن وبيتخانقوا
وصوتهم عالي
ساره بصوت عالي غطى على صوت خناقهم : ايييي …في اي عالصبح ..قاعدين في السوق
نور بخناق : الولا دا رخم جدا على فكره عمال يضحك عليا عشان مش بعرف العب حلو ..
ساره بملل : اخويا وانا عرفاه ..عيل بارد ..امال ماما ومُنمن فين
نور : في النادي
اسلام بمكر : كب تعالي نلعب جيم كمان
نور لسه بترد عليه ابوها اتصل فقالت: بابا بيتصل شويه ورجعالك يا رخم
بعدت عنهم شويه وفتحت المكالمه
_ الو ..ازيك يا حبيبي واحشني
_وانتي اكتر يا روحي ازيك يا نور عيني ..عامله اي
_الحمدلله يا بابا انا كويسه
_ربنا يديمك بخير ..انتي فين يا قمر
_لسه عند ساره وحنان في البيت
_مرجعتيش شقتك ليه
نور بضحك : بيبو مسكتلي السكينه قالتلي مش هتروحي تقعدي هناك لوحدك
عصام الليثي (والد نور ) ابتسم لذكر عبير وقالها : يعني مرتاحه عندك يا حبيبتي
نور بإبتسامه : ايوا يا بابا انا مرتاحه وزي الفل ..انت اي اخبارك ..واي اخبار شغلك
_انا تمام يا حبيبتى ..والشغل كويس اهو الحمدلله
_الحمدلله ..انت مش هترجع بقى عشان اشوفك
ابتسم بغموض : لا يقلبي ..لسه ورايا شغل كتير اوي هنا في دبي ..سلمي على حنان كتير وباركيلها ..ممكن انزل عالفرح بإذن الله
_ ماشي يا بابا ..الله يبارك فيك يا حبيبي
_ يلا ..هتصل عليكي تاني يقمر
قفلت معاه ورجعت كملت خناق مع اسلام
******
سمير في نيويورك ..اخيرا حاسس انه حر ..اخيرا ولاول مره من موت مي وهو مرتاح ..مش حاسس انه شيطان زي ابوه ..ولا هو آداه لأعماله القذره ..مرتاح ..وحاسس انه وصل للسلامه النفسي بعد عناء
*******
دخل عليه دراعه اليمين ماهر لقاه بقفل تليفونه فقاله بهدوء: اي يا باشا …بيقولوا عاوزني
المجهول بهدوء وهو ماسك في ايده ملف : ايوا .. يونس المنشاوي ..
ماهر :ماله
المجهول رمى الملف من ايده : مهووس حنان القاضي ..شافها مره من ٣ سنين ومن وقتها ماوراهوش غيرها ..بيراقب كل تحركاتها ..المشكله انه ظهر في حياتها من فتره وعرض ارتباطه ورفضته ..واكيد هو اللي اتسبب في اصابه يوسف غفران
مختفي …بقاله اسبوع بالظبط مش باين ..بعد ما كان عند حنان في المستشفى ..خرج من المستشفى روح بيته ..وبقاله اسبوع مخرجش ..بعت رجاله يدوروا ملقوهوش في البيت ..عايزك تعرفلي طريقه بأي شكل من الاشكال ..اكيد الارض ما انشقتش وبلعته
ماهر : امرك يا باشا ..
المجهول : يبقى كويس اوي لو اتصرفت بسرعه ..الولد دا هيساعدنا اوي (رفع سبابته في وش ماهر فبانت وحمته البنيه اللي في ايده اليمين ) وخد بالك ..لو حد حس بيك مش هرحمك
ماهر بهدوء : عيب عليك يا باشا
المجهول ابتسم بشر فبانت تجاعيد وشه :كويس اوي
*********
سليم واقف في بلكونه بيته ماسك تليفونه وبيعمل زوم على صوره من صور اسراء جه فيرديان من وراه بكوبايه شاي : مش هتبطل توجع في قلبك هكذا
سليم : والنبي اقعد بالمصري المكسر بتاعك دا ..(اتنهد) حنان بتتجوز …واسراء فتحت المطعم وشغال معاها ابن خالتها اللزج اللي مبكرهش في حياتي قده ..وساره ونور عايشين حياتهم وسمير ساب ابويا وسافر ..كل حاجه بتتغير ..وانا بقالي ٨ سنين بتنقل بين البلاد اشوف شغلي ..عارف لو طلبوا نهايه الخدمه تمام هزعل عشان شغلي بس هفرح اكتر ..هرجع ..هاخد مراتي في حضني واشم ريحتها وامسك ايديها ..هيطول بس هخليها تسامحني
فيرديان قاطعه بالمصري المكسر : سليم فوق ..انت ظابط ..وفي امن الدوله ..ولما اختاروك ..اختاروك عشان تبعد عن اهلك وتنساهم وتفكر بس في امن البلد ..ركز كدا ..انت متخيل ان اسراء شيفاك ملاك يا سليم ..اسراء شيفاك راجل وقح ..سابها قبل فرحهم بيوم ..مقالهاش مبرر واحد …ولا اي حاجه .. فاجأه بقى فص ملح وساح ولا تعرف هو فين ولا هو كويس ولا عايش اصلا ولا مات ولا اي تفصيله ..مسبتش وراك حاجه ..فلو حصل ورجعت متستناش تاخدك في حضنها وتقولك كنت فين يا حبيبي دانا جهزتلك العشا ..بطل سزاجه ..الدنيا مش سهله كدا
سليم : عندك حق ..بس نفسي اشوفها ..تبصلي وابصلها حتى لو عتابنا هيزيد ويطول بس هتبقى قدام عيني ..شايفها حاسس وجودها ..
سابه وهيمشي بس وقف وقاله : واه على فكره اسمها فص ملح وداب مش ساح
سابه ومشي ووقف فيرديان بيبتسم بمراره على حال صاحبه
********
حنان ويوسف وصلوا الشركه ونزلوا من العربيه بصوا لبعض ويوسف مد ايده وحنان مسكتها ودخلوا الشركه ايديهم في ايدين بعض الكل بيبارك لهم ويهني قابلهم عم سعيد موظف الامن وباركلهم وطلعوا فوق قابلوا هادي ومراته منى سكرتيره حنان واقفين بيضحكوا سوا
يوسف قرب عليهم وحنان في ايده : يا صباح الفل
هادي ضحك : يا صباح الخير …يا اهلا يا اهلا يا متأخرين
منى بصت لحنان : على فكره ورانا شغل كتير يا عروسه ..
حنان بتزمر : اديكي قولتي اهو ..لسه عروسه سيبوني ارتاح يا عالم
منى بضحك وبصت ليوسف : حددتوا معاد الفرح ولا لسه يا مستر
يوسف بص بتعاطف لحنان : لا لسه هنحدده بس قريب بإذن الله ..وتاخدي اجازه وترتاحي يا حنه
حنان ابتسمت ومنى شدتها على المكتب مكانتش عايزه تسيب يوسف وتمشي بس منى رخمت عليها واخدتها معاها المكتب
ودخلت عشان تشوف شغلها ويوسف عنيه متعلقه بباب المكتب اللي اتقفل
هادي نبهه : هشش …انت ..يلا يا معلم ورانا شغل
شده هو كمان عالمكتب عشان يشوفوا شغلهم
*********
قاعد في الارض مربوط بسلسله من حديد بيصرخ بأعلى صوته
_ مش هسيبك يا يوسف يا غفرااان …هكسر قلبك عليها ..مش هسيييبكك
جه رجل من اللي بيحرسوه وكب عليه جردل مياه متلج ووعق فيه : اسكت يلا .. مسمعش حسك ..(صرخ في وشه ) فاهم ؟!!
*قبل 5ايام *
في المستشفى
حازم بيتقلب في نومه لقى يوسف قاعد على كرسي ومش نايم في سريره فقام وقرب منه لقاه سرحان وبيفكر ومره واحده انتبله
_حازم ..اول حاجه تعملها الصبح انك تجيبلي يونس ..وحطه في اي مخزن من المخازن بتاعتك .. وانا هشوف معاه صرفه ..
حازم بصله بإستغراب انه عرف ف يوسف كمل : حنان اللي قالتلي ..اسمع مني انت بس
حازم اتنهد : طيب هنشوف ..هياخدوا اقوالك بكرا ..هتقول ايه ..
يوسف بمكر : انا معرفش حاجه ..انا بني ادم مليش اعداء اصلا ..ومبتهمش حد ابدا ..
حازم بحذر : ناوي على اي يا يوسف
يوسف : كل خير
********
اسراء في مطعمها معاها ابن خالتها حسام
_ ما كنت شغال في السعوديه مهندس محترم كدا بس ازاي ..لازم اجي اهزق نفسي هنا
اسراء بضحك وهي بتحطله مواعين زياده في الحوض :امال تهزق نفسك فين لما متهزقهاش هنا
حسام بصلها بطرف عينه : امشي يا اسراء من قدامي ..امشي
اسراء فضلت طول النهار تضحك عليه وعلى منظره وسط المواعين
*******
ساره نزلت المرسم بتاعها وفتحته وكانت المفاجأة فعلا ..المرسم متدمر وكأن مر من هنا اعصار ..حتى لوحها متقطعه ومرميه على الارض الالوان في كل حته والدنيا كلها متكسره ومتبهدله
مش معقول ..مش مصدقه ان مجهودها على الارض كدا ..نزلت قعدت جنب لوحها المتقطعه على الارض وهي بتبكي ..ليه كدا بس ؟! مين عمل كدا؟! انا مبعاملش حد بطريقه وحشه
كلمت نور تيجي تنجدها من اللي هي فيه ..وجت نور تواسيها وفضلت جنبها والسؤال اللي محدش لاقيله اجابه مين عمل كدا وليه ؟!!
**********
اليوم كان طويل اوي والشغل كان كتير على حنان ويوسف
في نص اليوم نزلوا سوا هم وهادي ومنى يتغدوا ورجعوا كملوا شغلهم
بليل يوسف موصل حنان
ركن العربيه قدام البيت وقعدوا يتكلموا شويه
يوسف في نص الكلام : حنان ..انتي مبسوطه
حنان بإستغراب :ازاي يعني مش فاهمه
يوسف : مبسوطه انك بقيتي مراتي يا حنان ..قدام الناس كلها
حنان بفرحه : هو واضح انك مخدتش بالك من فرحتي في كتب الكتاب …يوسف انا اسعد انسانه في الدنيا دلوقتي ..انا مراتك والكلمه دي كفايه اوي ..حاسه اني ملكت الدنيا كلها ..وبتسألتي مبسوطه
مسكت ايده في تردد وبصت في عيونه : انا طايره من فرحتي وانا جنبك ..
يوسف اخدها في حضنه واتنهد براحه ..ربنا هداه اعظم هديه في حياته كلها ..
رد عليها: وانا فرحتي هي وجودك دايما في حضني كدا يا حنان ..طول مانتي جنبي فأنا مبسوط ..ربنا يديمك اكبر هبه ربنا وهبهالي في حياتي
فضل حاضنها وحنان مستكينه في حضنه لفتره
بعدها بعدت عنه براحه : انت اكيد تعبان اليوم كان طويل اوي ومجهد ..والشركه اليومين دول محتاحه مجهود جبار ..روح ارتاح دلوقتي عشان عندنا موال بكرا
يوسف ابتسم: وانتي كمان تعبتي النهارده ..ارتاحي شويه
حنان فتحت باب العربيه : تصبح على خير يا حبيبي ..
يوسف مسك اديها وباسهم : وانتي من اهل الخير يا حنه
حنان نزلت من العربيه بإرتباك وهو ضحك على كسوفها
دخلت الفيلا لقيتهم قاعدين كلهم جنب ساره
حنان بقلق : في اي يجدعان مالكوا
اسلام : مرسم ساره
حنان : ماله
اسلام : اللي طلع عنيها توضيب فيه دا
حنان: ايوا ماله
اسلام : اتساوى بالاسفلت
حنان :لا اله الا الله …انت بتقول ايه
ساره بخنقه : كان معاهم لوحتين من أهم اعمالي ..كانوا عُزاز على قلبي اوي
حنان قربت واخدتها في حضنها : خلاص يقلبي ..ربنا هيعوضك بإذن الله ..انا واثقه
اسلام طلع اوضته عشان في واحد صاحبه بيكلمه
والبنات قاعدين سوا مع عبير ومنيره وشويه وابو نور اتصل فيديو كول بعد ما عرف اللي حصل في مرسم ساره
وسلم عليهم كلهم
_ متزعليش نفسك يا ساره ..تتحل بإذن الله وهتعرفي مين عمل كدا ..ربنا هيعوضك يا حبيبيتي
ساره بهدوء: يارب يا عمو بجد ياارب
حد نده عليه وكان لازم يقفل : معلش يا بنات لازم اقفل حالا ..سلام يا جماعه ..سلام منيره هانم وعبير هانم تصبحوا على خير (شاورلهم بإيده فظهرت وحمته البنيه في ايده اليمين )
يتبع ….
- لقراءة الفصل التالي: اضغط هنا
- لقراءة باقي حلقات الرواية اضغط على (عائلة بالإكراه)