رواية قلاع الضر الفصل الثالث والثلاثون 33 بقلم زينب ماجد

رواية قلاع الضر الفصل الثالث والثلاثون 33 بقلم زينب ماجد

رواية قلاع الضر البارت الثالث والثلاثون

رواية قلاع الضر الجزء الثالث والثلاثون

رواية قلاع الضر الحلقة الثالثة والثلاثون

من شفنه القطار يصيح
طير وشاف جنحانه
شال الناس كل الناس
وانه وياج خلانه
الگاطع
قدس: اهل الكلعة ما رضوا نروح
حلفوا ما نطلع ما دام حنه خطار من بغداد نضل يمهم هين ليما نكضي شقلاتنا بالموصل ونرد .. تشكرنا منم وكنالم فد نمر على بيت ثاىر اخو وسام نستفسر منو .. ونرد لهين
طلعنا انا وخطاب ونهلة لبيت ثاىر
وصلنا غاد دكينا الباب طلعت النا مرة جبيرة ، كالت : هلا تفضلوا
نهلة : انا نهلة بنت ابو فاضل ال خشان
كالتلها : هلا ومرحبا تفضلوا
– زاد فضلج ما جايين نكعد رايدين نسال على ابو حسن (ثاىر) موجود لو لا ؟
– لا والله ما موجود .. طلع كبل شوية
– رقم تليفون ما عده
– اي عده رقم
– اطينا نخابر خاطر نجي بغير وكت
– اي هسه
خطاب واكف على صفحة من سمع مرة طلعت ما ادخل خلا نهلة تحجي واني واكفة بسدها .. راحت جابت التليفون واجت .. ردتلها وهي تسجل الرقم
حجت نهلة : وسام هين لو ما اسال عنها
– لا والله جتنا كبل مدة بس اتكاونت هي وابو حسن وخذت ولدها وطلعت
– تعرفين وين نلاكيها
لوت براسها المرة كن تتبرى من الموضوع: والله حنه ما ندري عنها انتم اسالوا وان شاءالله تلاكوها هي بالموصل هساع
ما حصلنا منها لا حك ولا باطل
هديناها وخابرنا على ثاىر حجه وياه خطاب كالو :عندي شغلة ويا ام مروان وجاي عليها
كايلوا : وياهو الكايلك انا سكرتيرها لام وسام
– بس تعرف وين هي
– لا عرف ولا اريد اعرف
– انت مو اخوها شلون ما تدري عن اختك وين هي ؟
– لا لا ما ادري عن اختي عود جاي تبزني وتكلي اختك انا لا عرف ولا ولف وياها من قال وبلا انا متبري منها
– بس كاعد ابيتها مو
– وانت شنهو وتحاسبني عم ولد خال بنية ياهو انت
-انا لا عم ولد ولا خال بنية وراح اجرجركم واطحلكم مثل ما طحنتوني وخذيتو اغلى ما عندي انا وياكم والزمن طويل.
ردينا من بيت ثاىر للكلعة استضافونا بواحد من بيوت ولد حميد
انا ونهلة بمجان .. وخطاب بالدوانية يم الزلم ، حجت نهلة : والتالي شلون راح احصلهن ووين الاكيهن ؟
كلبي نار على بناتي لو بس الاكيهن واعرف وين هن ؟
ثاني يوم رحنا الظهرية على بيت ثاىر
جان ثاىر موجود وما رضى يطلع النا .. عاد نهلة تكاونت وياه كالتله : شرايدة جاية اخذ بيتك اخذ منك كل الرايدته بناتي ما عدك دم ما عدك غيرة وتشيلك غيرتك على مرة ماخذين ضناها
تكاون وياها وتجاوز عليها
واهل بيته يهدون بيه واني اجر بنهلة اخر شي ابنه زلكها وكاللها على عنوان وسام ووين كاعدة هي وولدها .
والله اخذنا الحجاية من ثمه وطلعنا
على الوصف وصلنا الفرع ما نعرف هي يا فرع ..
عاد سالنا المنطقة عن مواصفاتها كالوا : والله ما نعرفها
بس ذاك البيت اللي يصير سابع بيت ع اليمنه .. ناسه نزلوا جديد ماجرين مشترين ما ندري بس ما صارلهم جثير من كاعدين يمكن ثلث تشهر .
عاد رحنا دكينا الباب دكينا محد طلع النا
عد ما ايسنا وكلنا محد بالبيت ..وردنا نمشي
ما نحس الا صوت عمار وهو يصيح : منهووووو البااااااب
التفتت نهلة : مو صوت عمار هذا
– امبلا صوتا
فتح الباب لكانا بوجهه عكد حاجبه : نهلة قدس .. شجايبجن ؟
دفعته وفاتت على البيت كالتله : جاية على بناتي وينم
راحت تدور باللبيت اول ما طبت .. بستها سمية صارت بوجها
صاحت: يمممممه بتي
حظنتها واني وعمار طبينا وراها ، حجا عمار : اشجابجن للموصل ؟
– خطاب جابنا
– وخطاب شله بيجن ويجيبجن
نهلة : انجب حيوان هسه شالتك الغيرة وجاي تتمطحل علينا شلون اجيتن اخيتك هاي ما فكرت شلون عايشة وحدها ابغداد ما كلت لو هين غيرتك عدم غيرة سز
– لا تغلطين اني شمدريني بيها غير عد ريسان
– ريسان نا طلكها خاطر يبيعها لواحد ارهابي لو هاي ما سامعها
– لا والله ما سامعها محد كلي .. ريسان طلكها
– عبير وين
– ما ادري ؟
– ما تدري شلون البنات اثنينهن خذيتوهن من بيتي وين عبير
– والله ما ادري هم من جابتهم امي .. جابت بس سمية ما جابت عبير
كامت تلطم على وجهاا وتصيح : دخيلك الهي وين بتي
اندارت حجت ويا سمية : اختج وين يمه وينهااا
– ما ادري جدة خذتها
– وين خذتها احجيلي
– ما ادري
زكحت بعمار : امك ال***** وينها خابرها خل تتهير بسع
– حسني الفاظج هييي ما ادري طلعت للسوك شوية وتجي انطري
– انعل ابوك لابو اليحسن الفاظه ولكم ماخذين بناتي وتريد مني اسكتتتتتت بناتي وييييين
صرخ : واني شمدريني بيييييييهن
عافنا ومشا للقرفة ونهلة تدحك بيه : شلون بيه كليلي اذا عبير ما هي وينها ؟
– ما سمعتي يكلج امي بالسوك ننطرها تجي والله كريم
كعدنا ننظر فد نهلة كاعدة على نار تلوب
خابرت نهلة على خطاب نطته عنوان البيت ودلته وكالتله على حالها .. وسدته منو
شوي قاد واجت وسام بس علير ما وياها وكامت الها نهلة تتكاون وياها .. تكاضبن من الروس اكوان … وسام تشتم بنهلة ونهلة تبيس بوسام وتصيح وين بتي وين وديتي بتي احجيلي
جا عمار فاككهن وهنا من فوك عمار يتكاونن
وهن بكوانهن .. خطاب اندل البيت
جا هجم البيت هجم يدافر بالباب طلعله عمار يتكاون وياه
كضب عمار مده بالكاع وتولاه بوكسيات .. طلعتله وسام تجر بيه وتغلط عليه
لزم وسام ودفرها برجله للكاع
تكسرت تكسر التمت الناس اتفاكك وهوا يكللهم : ارهابية هاي ارهابية جتلت ابني وفخخت مرتي
كامت تشهر وسام بيه وتكلو : مرتك يال …. منين جبتها مرتك مرة معرسة نمت وياها وحبلتها وردت اتذب البطنها براس خالك وخالك درى وجتله اني ياهو مالتي فوك شينك جاي تشهر بيه بيه ابن الجلب
صارت كونه جبيرة بينم وانا كاضبة بسمية ومنحية عنم وادحج
جروا نعلة طردوها وصكوا الباب على خطاب ونهلة وانا منعت عليه وسام اطلع كتلها : اني ما اريد اضل وياج بعد رايدة اروح ويا نهلة
كاملي عمار يصارخ ويكلي : سمعي هين ادخلين جوا وتجفيني صوتج لا وحك هو دين الله جيلة احطها براسج وانعل والديج
صاحت وسام : وين تكدرلها بعد تعلمت على درب الفلاته الحيوانة الجنت حابستها بالجول طلعلها حس وكامت ترادد وتطالب هاي نومتج هين من اسمعلج حس الا اهيضهم عليج اخليهم يكسمون ظهرج نصين .
دفعني عمار وكعدني بالقرفة ضليت ادحج ما حجيت خفت احجي ويجتلوني وانا حيلي منهد لليطكني اموت بيدو .
كامت وسام تحرض بعمار على نهلة وعلى خطاب
لليل يوسف هم جا .. وكعدوا يتحلفون لخطاب ولنهلة ..
وزكحو ليه خاطر اكوم اعمل الهم الاكل ..
كمت للمطبخ وسمية اتدليني على شقلات المطبخ وكعدت تسولفلي شلون جدة وسام جتها للبيت مال امها وخذتم هي وعبير كتلها : عجل عبير وينها ؟ ليش ما هي
كالت : جدة خذتها مرة وما ردتها من كتلها وين عبير صارخت عليه وكالتلي ( نظفي ومالج غرض بعبير ) وبعد خفت اسعل عنها )
ضليت افكر وين وسام خذت عبير ووين مشت بيها ؟
ما ادري ليا متى راح اضل هيج ضعيفة واخاف احامي لروحي واضل خايفة من وسام ومن اخوتي بعد كل الصار بيه
ثاني يوم هم اجت نهلة تكاونت تريد بتها بس ما نطوها ..
لحد ما خابرت وسام على اخوة نهلة وتكاونت وياهم كالتلهم : بزرنا وبزر ابني على يا مال بتكم جايتني للموصل تطالب بيهم تجون تاخذون اختكم من عدنا لا نكضبها ونعرف شنعمل بيها وانتم تعرفوني من اهوى افعل .
اخوة نهلة مخابرين عليها ومتكاونين وياها الا ترد وهي تكللهم بناتي اخذ بناتي وارد كايم ابوها يحجي عليها ويقلط ويكللها الج منا لباجر لو ما رديتي نكسم راسج .
انجبرت ترد مكسورة خاطر من دون بناتها
ما عرفنا عبير وين هي ولا وسام حجت ولا اهل نهلة خلوا نهلة تكرب خاطر تدور بناتها ضلت ابيت اهلها قاد ليل نهار تون وتنوح على بناتها
اما خطاب الكل صار ضدة عبن الصار بيناتنا لا ينكال ولا ينحجي .. من يكاون ويطالب ماله حك بيه عبن انا لا مرته ولا جريبته .
بس ما فارج الموصل ضل بيها يداور بيها من بعيد لبعيد خاطر يوصلي .. الا ما فد يوم عمار اطى لسمية خمسمية دينار كاللها روحي جيبيلي بيض من الدكان بسع خلي قدس تسويلي
فهي لبست نعالها وكالتلي : اكفيلي بالباب اخاف
كتلها : لح البس حجابي واجي وراج
جبت ربطتي ورحت فكيت الباب ادحج وراها
عمار نايم واني ادحج الفرع شكثر محتاجك اطلع احس روحي حيل ضيجانة ومقبوته من هالحيطان فد السواه ريسان بيه وبابني يتراوالي واذكرو كل يومية وابجي ليلي كلو
واني اطمش بالفرع دحجت خطاب واكف ليقاد من شافني اشرلي بسع ، اشرتلو الوح بيدي
جت سمية اطتني للبيض كتلها : امشي روحي لخطاب احجي وياه واعرفي منو الحجي
راحت تركض وتتلفت واني ادحج
صاح عمار : عليش ادحجين بالشارع بتل بتل
فزيت دخلت للبيت بسرعة طلع وراي هين انا الخوف كضب كلبي اصطكيت .. دحج منا ومنا كال : وين راحت سمية ما وديتها على بيض هيانو الدكان جريب وين مشت
من كال هيج تطمنت كلت اكيد ما شاف خطاب وسمية
فد ضليت اكرضم باديه من الخوف واني اتنطر سمية .. دخل عمار وسمية اجتي فد خايفة كلش ما حجت وياي فاتت كبل
اني خذيت البيض طكيتهن الها وادحج اريد فد اخلص خاطر افهم منها شكال خطاب .. حطيتله طاوة البيض بالصينية وخذيتها الو ورحت لسمية صاح وراي : هييين الخبز وين دماغ سز
رديت اركض جبتلا الخبز ونطيتو الو
ورديت اركض لسمية الهث واني اكلها : يولي بشري شكالج خطاب ؟
– يكول العصر هين تعالي خاطر انطيج تليفون تنطينوالقدس
– يمه تليفون شلون واذا عرفوا بينا ؟
– ما ادري هو كالي هيج
– يربي اني اخاف من هاي السوالف تالي شلون يا الله والله ما ادري شسوي
كمت افتر بالبيت سارح بالي افكر شلون لا جاب التليفون
وين اضمه
وين اشحنه
اذا اكتشفه واحد من اخوتي
لو عرفت وسام عدي موبايل شلون
اني حتى ما عرف شلون اخلي ساكت ولا اعرفلو شلون يربي ويا خطاب .. فد لا يكضبوني ويكطمون اركبتي ..
للظهر اجت وسام .. وبعدها يوسف
صبيتلم قدا تقدوا ونامو واني بليت هالبنية كل شوية بالظهرية
اكللها تطلع خاطر اعرف خطاب جا لو بعده
لحد ما راحت وطولت ..
وسام ويوسف نايمين فد عمار كاعد يدحج ع التلفزيون
جت وجايبتلي التليفون مطفي .. اخذتو منها ضميته بصدري
وفتحت الكاونتر وخبيتو بالكاونتر
فد ضل بالي خاف وسام تجي تريد تطبخ شي وتشوفه
رحت ادور علاكة خذيتها وجريت التليفون لفيته بالعلاكة وضميتو بكونية الطحين .. فد عقلي اكلني بالتفكير وسمية تمشي وراي وكل شوية تسعل ( ها شراح نسوي )
كتلها ( بالليل نفتحوا هسه ما نكدر )
ونطرنا لليل فد ما حسيت نفسي اكدر عبن البيت هدوووووء وصغير وين احجي اخاف انسمع انطر لباجر احسن ما انكشف وانجتل
والله وانتظرت لثاني يوم
كعدت الصبح على صياح وسام على عمار
تكلو : كاعد مثل النسوان بالبيت كوم شوفلك شغلا عنله اطلع اشتغل بيا وكت تضل هين اكل ونوم وفدوة اطوني فلوس باكيت جكاير وتشحد من الرايح والراد
وهو نايم بسابع نومة ما يرد عليها
عافتو وطلعت من البيت .. سمية نايمة
ويوسف طالع من الفجر للشقل فد اني كعدت
سليت روحي ومشيت للمطبخ طلعت التليفون من كونية الطحين وفتحتو .. اني فتحتا .. لو طلع صوت يرعد رعد لما انفتح حطيت بين رجليه من الخوف وكلبي صار تراب من الخوف رديت لفيتا بالجيس وضميته ورحت اتفكد خاف عمار كعد .. شفته بعده بسابع نومه
رديت اخذتو وصعدت للسطح على كيفي وسديت الباب هم على كيف لان حديد وبيه صوت من ينرد خاطر لو احد جا اعرف واضم التليفون .
التفيت ليورا ..
وفتحت التليفون لكيت رقم كدام كبل اتصلت
رن رنتين وانفتح الخط واجاني صوت خطاب : الووو
حجيت بهمس : الو خطاب هذا انت ؟
-اييولي اني صدك تحجين عفتيني هيج معلعل ما فكرتي اطلعين اتشردين توديلي خبر
– اخاف يجتلوني والله انت تعرفهم ما يرحمون واسعل ما على كلوبهم كطمة الركبة
– عجل جاييج هسه لمي بسرعة واطلعي خاطر نطلع لبغداد
– هسه
– عجل يمتى يولي امشي بسرعة
– خاف احد يكمشنا
– محد يكمنش وها اكلج جيبي وياج هاي بت نهلة تراها تنحت بيه بكد رحمة الله خطية خل اردها لامها خاطر تقر عينها
– خطاب ولو ما كدرت
– يولي منو موجود هسه
– فد عمار نايم
– اي دنزلي هسه جيبي البنية وتعالي
– اخاف
– خدس لا تكفريني انزلي لا تخليني اني اجي صدك واهد واجرح من البيت انزلي بدون مصايب خل نروح ونستر على ارواحنا
– ولا عرفوا ؟
– يولي دا تكولين نايم دنزليييي راح تجلطيني
سدو بعصبية .. صفنت
شلون يربي اجر هدومي والبس عباتي شافني عمار الا يكضبني ، كعدت سمية كتلها : لازم نطلع من هين بسع
خطية النوم بعينها ممفتهمة شي
فهمتها ع السريع وكتلها : لح نروح لامج
لبست انعالها ووكفت تنطر
لميت هدومي بعلاكة وخذيت الربطة تحت ابطي ومشيت للحوش حطيت علاكتي وفوكها العباية ..
كتلها ادخلي شوفي عمار كاعد لو بعدو نايم وتعالي بسع
دخلت واجتي ركض : نايم نايم
لفيت الربطة واني البس عباية هي خذت الهدوم وراحت للشارع تركض .. واني طلعت ورديت الباب على كييييف
طبينا بالفرع الجان يكف عندو خطاب اقل الربع ساعة اجا
بتكسي صعدنا وياه بسرعة وطلعنا للكراج كال : تكدرن تصبرن هين شوية ؟
– وين لح تروح ؟
– شغلة واجيب اغراضي ما اطول
راح ودى تبليغ للشرطة والامريكان على يوسف كلم : يشتغل ويا القاعد ة هو وامو ..
ورجعنا ركبنا بكيه وخذانا وطلع بينا لبقداد .. وهو يسولفلي بالدرب كال منها انتقم من وسام والهملتو بينا ومنها يتلعون عنا وما يدورون ورانا ويجون تا نخلص منم
– عجل عليش ما بلقت عنم كل هاي المدة ليش هسه
– خفت يجون الامريكان لو الشرطة ويطبكوج وياهم سابقا وتتورطين ما اخاف من الشرطة العراقية بس الامريكان يكرفون كرف ما يحسبون لمرة لو رجال
– وهسه وين راح نروح
– رايح اذبج يم نهلة جم يوم اعيد ترتيب البيت مالنا القديم واجيبج بيه .
خذاني لبيت اهل نهلة
عد ما دكينا الباب وفتح النا اخوها الباب .. سلم على خطاب ونحن دخلنا داخل وسمية راحت تركض تصيح : يممممه يمااااا
فزت نهلة على صوت بتها وطلعتها
من شافتها شهكت وحضنتها حيل وشالتها على كلبها تبجي من كل كلبها وتصيح : دخيلك ربي استجابيت دعواتي فدواتك ربي ما خيبتني وما خيبت دموعي يمة ردتلي بنيتي .
نزلتها وسلمت علي وامها سلمت
ودخلنا جوا اسولفلهن اشلون اجينا فد ما كتلهم خطاب بلق عليهم عبن هو مالي ما اكول
ضليت عندم خمس تيام
وسام لا خبرت ولا جت ولا وصلت ولا ندري عنم شي
من بعد الخمس تيام جا خطاب وعمامه على ابو نهلة طلبني منو وكالو : اريدها الي مرة على سنة الله ورسوله
قروا الفاتحة وقرروا يوم الجمعة الملچة
واني خذتني نهلة هم اشترتلي جم قماش ودتهن للخياطة
وخذتلي من مرة دلالة مكياج وشغلات مال بنات بالقساط
واخذتلي شحاطة ام الاصبع ملمعة مال بنات حلوات .. وخذالي ربطات جديدات
خطاب كاص البيت مالت اهلو بهالايام
ماخذ الاستقبال وبظهرها قرفة اميرة من جانت .. كاطعهن عن البيت وفاتح وحدة ع اللخ وصابقهن وجايب قرفة اخشاب مستعملة وفراش جديد وبطانية احبك .. وفارشها
وجاب عمامه ونسوان بيومها وجاب شيخ
واني لبستي بدلة خذنها من بنية اشترتها كبل سنتين بعرسها وما لبستها بعد اجرتها النا ب١٥ الف لبستها واجم النسوان هلهلن وصفكن
وخذونا يم الشيخ كطعولنا مهر
وخذوني بسيارة مزورقه وزفونا بيها جانت بوكتها طاشة اقنية اسمها ( الكبد مالي ) وجابوا الدرب كلو يقنون ويركصون عليها .
ليما دخلنا للبيت خطاب ما مصدك صرتلا مرة
جان طاير من الفرح كضبني حبني بكصتي وكالي : وعد عليه الا اعوضج عن كل ايام التعب الشفتي .. والا انسيج كلشي مريتي بي .. من اليوم انت مرتي وحلالي واكولها وما خايف منها ويا ويل ويلا اليكربج لو ياذيج الا اشعل اهله
يمكن هذا جان احلى يوم يمر عليه ..
كثر ما حسيت انتهت همومي وخلصت وبعد خلصت من وسام ومن ضيمها للابد .
فد هذا جان حلم ليوم واحد بس
عد ما كعدت الصبح بلشت مشاكلي ويا امه
وبنات ابو وهب الما يحبني فد اني اخاف منم .. اخلص يومي بقرفتي ابد ما اطلع الا من يجي خطاب ولو جا احجيله كلشي صار وياي
كام يشتغل هو ويكد وجابلي تلفزيون وستلايت طرت من الفرح من جابه اليه وحطلي القنوات كلها وبيه كل المسلسلات رورتانا سينما ما تخلص افلام فلم ورا فلم اخلص يومي كلو لحد ما هو يجي
من بعد شهرين حبلت بطفل خطاب حيل فرح بيه عبن صرت حامل خاطر انسى الراح .. كام يداريني هواي ويدللني ويجيبلي كلشي وكلاشي وياه من يجي من الشقل
جان يحذر امه وبنات ابو وهب يكربلي
وهن يهابنه من هو موجود .. ومن ما موجود كل شوية داكات الباب عليه ومتحججات بشقلة خاطر يتكاونن وياي فد اني شيكولن اكول امرجن خاطر لتصير مشاكل تعبت بعد ما بيه حيل كوان وبهذلة .
مرت الشهور والايام
وامو لخطاب شوية لانت وياي من شافتني لا صاحبة مشاكل ولا عدي عداوة وياها كامت تسايرني عادي وتذكرني مرات بتمر لو حلاوة عبن اني حامل من ابنها بحلال
من بعد التسع اشهر جبت بالمستشفى عملية
وجبت بنية سماها خطاب ( خديجة )
ومن بعد الشهرين حبلت نوبة اللخ
وهم جبتلا ولد .. سماه خطاب ( محمد )
ومرت الايام والشهور ..
وسام ما سمعت عنها خبر ولا وصلتني اخبارها ولا مرت بيه ولا شافتني لا هي ولا خوتي وسمية ضلت عد نهلة وعبير ما عرفنالها مكان ووين ودتها وسام والمن انطتها .
واني عايشة بجال رجلي عيشة مرتاحة
كل فترة ياخذني يركلني لفة كص من هاي الاحبها لو يجيبلياها للبيت لو يجيب دجاج مشوي .
لحين سنة ٢٠١٣
وكتها ما ادري شلون ابو وهب .. هرب من السجن
وجانت وجهته الاولى عد ما جا .. هو بيتنا ..
وكتها خطاب ما جان موجود .. بالشغل
جنت اني اغسل بالفرشة بايل عليها ابني وجاي اشطف بيها ومدنجة وحسيت الباب انفتحت ..
اندرت وما احس الا ابو وهب دخل
من شفته حيلي انهد فزيت من مكاني بسرعة جاي اركض عثرت بابني ووكعت عليه صرخ الجاهل وكام يبجي .. شلته من ايده عتيته وركضت للبيت قفلته عليه وخابرت على وهاب …
رد كال : ها يولي
كتلو : هسه ترد بسرعة
– شكو يولي شصاير ؟
– اذا ما اجيت هسه يمكن نموت خطاب ريسان هين شفتو اني دخل للبيت
– ريساااان شجابه شطلعه يولي بالسجن
– دكلك والله شفتا اني شفته بعيوني وهسه جريت جهالي وحبستم بالقرفة عليك الله تعال والله عدارجف من الخوف
ضليت ادحك من الجام ما ادري شحجه ويا ام خطاب وطلع من البيت .. رجع خطاب بسرعة دخل لامه
كالتله : صحيح اجا وكال اني ما راسد منكم شي ولا الي غرض بيكم بس اني راح اطلع لتكريت غاد اضل بس رايد بناتي يعيشون وياي غاد وبس يحضرون نفسهم وكت الاخابرج حضريهن خاطر اخذهن واطاني رقمه
خطاب ضل دايخ
كاللها ما عرفتي مكانه بتكريت وين ؟
كالتلو ؛ ما كلي بس مال اريد بناتي
خطاب بلغ عليه وكاللهم ارهابي شارد واجانا للبيت وعلى موعد يرجع ياخذ بناته اذا خابر على بناته ابلغكم .
ابو وهب عرف بخطاب بلغ
عاف بناته شهرين لا اجاهن ولا مر بيهن
من بعدها ونحن كاعدين الضحى ما نحس الا ابو وهب دخل علينا مسرع وهو يصيح ابناته يصعدن بالسيارة اللي بالباب .. وكاللها لام خطاب : انا ما ودت اذي ابنج وردت بس بناتي بس بعد سوايته هاي .. يا سليمة الا ابجيكم دم
وخذا بناته ومشى ..
فرغ البيت من بعد ما راحن بنات ريسان
اني رديت ويا عمتي عبن ضلته وحدها اداريها خطية ..
من بعد ايام من تهديد ريسان لخطاب ..
الشرطة هادة على خطاب الشغل ومعتقلته
ليش وشنو السبب منعرف .. تخبلنا من عرفنا السبب راحت عمتي ومشت ووصلت للسجن الهو بيها كاللولها : روحي حجية وانسي ابنج قضيته ٤ ارهاب
كامت ادك على راسها وتكللهم : والله مالو بالارهاب ابني بري من الارهاب عمره ما حط ايده وياهم
لا سمعولها ولا احد خذا بحالها ..
ونقلوا خطاب لسجن جديد واني وعمتي والجهال وابن ريسان محمد جا ويانا عاش ..
بس حالنا انكلب فوك تحت
من بعد ما جنه مرتاحين وعايشين يومنا بنعمة ورزكتنا على كدنا وخطاب فوكانا خيمة راح خيمتنا وضلينا بلا والي .. صبحنا تراب .
كعدنا جريب من بيت نهلة هم ابوها شالفنا بيت رخيص
بس عيشتنا ما تطلع عمتي عدها راتب رعاية يا درب يسد نص الشهر باكي الشهر نكوم نصفن بالوجوه وحال الضيم حالنا .
دخلت حرب د١عش وعرفنا من الطروش ابو وهب وياهم ومنطي بناته اثنينهم غاصبهم على ناس اشتركت بد١عش وناسبهم خاطر يحمي نفسه لان مطلوب .
والعرفنا من بعدها
اخوي يوسف بعدا بالسجن فد وسام واخوي عمار هم اشتركوا بد١عش .. وحالهم اتغير وصاروا احوال من فوتت د١عش ع الموصل .
ونحن حال الضيم حالنا .. كل يوم نكول هسه تخلص محاكته ويطلع هسه يعرفون بي بريء ويطلع .. ومرت اسنين العمر وخطاب ما طلع
عد ما اتحررت الموصل سمعت بوسام وعمار عد ما عرفم بد١عش احترك فلمه وراح يرحون بالرجلين شاردين من الموصل لكركوك ومتبرين من د١عش ومستقرين ابيت بكركوك .
وابو وهب اخر شي عرفنا عنا شرد لاربيل وعايش بيها لحد هذا اليوم ما انمسك بس مبتعد ابد ما داخل للعراق يخاف يكشوه .. هالحجي سمعناها من الكرايب اللي متواصلين ويا بناته .
اما اني فمبتلية بعمتي خشت بالعمرين وما ضل من عمرها شي .. من قهرها على خطاب واحمد اتمرضت حيل وانضربت جلطة واننيتها الوحيدة كبل ما تموت اشوف خطاب وضلت عايشة وياي اداريها وحاسبتها امي واباريها حبا بخطاب .
حالتي المادية صعبة مرات ادبرها ومرات تعصى علي اشتغل بالخبز اجيب كواني طحين اخبر وابيع واحصل هالقاسمه الله .
سمعت قصتي بنت اخو نهلة وكالت انقل قصتج للناس واني سولفتلها قصتي وقصة نهلة والكلعة واستعانينا بحميد ابن يازي من بعد ما ترك الموصل وعاش ابغداد بوكت االسقوط .. سجلنا الكالو تسجيل ونقلناه عن اللي صار بالقلعة
وهاي اني وهاي قصتي راضية بعيشتي واكول الف الحمدلله والشكر على كل شي ولابد الله يوم ليتفت النا وتنتهي احزانا ومنتظرة اليوم اللي ربنا يظهر براءة خطاب ويرجعوا النا سالم .
من عجايب هالقصة
الارهابي حر والبريء بالسجن
المظلوم مبتلي والظالم متنعم
لكن لابد فد يوم الحق ينتصر وكل مضلوم يرضى
وكل ظالم ينال جزاتو

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية قلاع الضر)