رواية هتلر الداخلية الفصل الحادي والعشرون 21 بقلم جنى غنيم

” النهاية أم البداية ؟ في جميع الأحوال أنا ميت ! “

#بقلمي 

شاب بيتكلم في الموبايل بيضحك و قال : تم إرسال الرسالة بنجاح يا بوص 

رد عليه البوص : عظيم كده نبدأ الشغل على نضيف ، مبقاش أنا لو مخلصتش على عيلة الحلواني كلهم … مجدي الغبي الحنين فاكرني أني خايف عليه ميعرفش أني ناوي على نيه سودة ..و لا چنی أو ريان مش فارقة اللي عاملة فيه وحش الكون و محدش يقدر عليها أنا هردلها كل حاجة عملتها معايا غالي اوي بس كله في وقته ، اه صحيح عامل أيه مع الراجل الخرفان اللي أسمه شهامة 

الشاب بتأفف : متفكرنيش يا بوص أنا زهقت من تمثيل دور خضر ده و بصراحة بقالي فترة مش بسأل عليه

البوص ببرود : تؤ تؤ كده أزعل منك و أنا زعلي وحش أهتم بشغلك عشان متحصلش خضر الحقيقي 

و قفل الخط معاه و قال البوص بضحك : النهاية هتبقى مبهرة بس بتوجع أوي ! 

عند چنی 

چنی اتخضت و قالت و هي بتبلع ريقها : هل شايفة ملامح للبنت دي 

الست و هي مغمضة عينها : لا ضهر البنت ليا بس هي لابسة نفس فستانك ، الشاب اللي لابس أسود غرز المقص في الشاب اللي لابس أبيض و جري بعيد و البنت بتقع على الأرض جانب الشاب اللي لابس أبيض كأنه كسرة ضهرها و بيجي شاب تالت مش عارفة أشوفه كويس الصورة مشوشة بيقوم البنت و يمشوا بعيد 

فتحت الست عنيها و اتنهدت چنی و أخدت نفس و قالت : حسابك كام ؟ 

الست بطبطب عليها و قالت : مش عايزة منك فلوس يا شابة ..بس أعرفي تفسير كلامي ده مش أنا اللي هقوله أنتِ اللي عندك إجابات للتفسيرات دي بس هتاخدي وقت طويل أوي عشان تعرفي … النهاية هتبقى مبهرة بس هتوجع خلي بالك على نفسك !

و قامت الست و مشيت ،مسحت چنی وشها بإيدها و طلعت كتاب لونه أبيض و كتبت في أول صفحة 

” تعبت من كتر التفكير عايزة أعيش حياة هادية بس مش عارفة جايز عشان أنا چنی اللي أقسمت إن حياتها تبقى عشان الإنتقام طبيبعي تكون دي حياتي بقى ” 

أفتكرت مراد و أبتسمت و كتبت 

(لا تكن سجينًا لماضيك لقد كان درسًا فقط و ليس حكمًا مؤبدًا … إهداء من صديقي مراد الزيني )

أستغربت چنی لما كتبت صديقي و لسة هتشطب على كلمة ( صديقي ) سابتها و قامت بتعب 

في شقة مراد 

مراد ماشي بنوم لقى مامته في المطبخ بتحضر الفطار ف قال : صباح الفل يا ست الكل 

سلوى بإبتسامة بهتانة : صباح الخير يا مراد روح أغسل وشك عقبال ما اخلص الفطار 

راح مراد و مستغرب طريقة أمه 

عمل روتينه الصباحي و راح فتح مذكرات چنی 

(ظهرت شخصية جديدة في عالمي اسمه مراد الزيني هو لطيف بس فضولي و مستفز و شخصية لزجة …)

قفل مراد المذكرات و قال بغضب مكتوم : أنا شخصية لزجة أما وريتك يا چنی مبقاش أنا مراد الزيني 

خرج مراد و قعد على السفرة و مامته قعدت قدامه ف قالت : بقولك ايه يا مراد معاكش صورة ل چنی

مراد ساب الأكل و قال بإستغراب : غريبة !بتسألي ليه ؟

سلوى بتوتر : عادي بس يعني عايزة اشوف شكلها 

مراد بتأفف : في الواقع معيش صور ليها بس معايا صورة ليها و هي صغيرة و طلع السلسة من جيبه و فتحها و قال : اتفضلي يا ستي 

اخدتها منه و اتصدمت لما شافت الصورة ف قال مراد بقلق : هو في ايه يا ماما  

سلوى بتوتر : ها و لا حاجة و بتحاول تغير الموضوع و قالت : شوفت كنت هنسى برشامة السكر هقوم اخدها 

و قامت ف إستغرب مراد و كمل أكله

في إيطاليا 

ليان خرجت تقعد في جنينة الفيلا لقت قاسم بيلعب مع الكلاب ف قالت بعصبية و زعيق : مش قولت ميت مرة مدخلش الكلاب هنا 

قاسم بيلعب مع الكلاب و قال بإستفزاز:  بس يا حبيبتي دول لطاف جدا 

و كان في خرطوم ماية مسكته ليان و رشته عليهم و فجأة الكلاب جريت وراها و هي بتجري و بتصوت و تقول : ألحقني يا قاسم ألحقني و قاسم بيجري وراها و بيقول : اهدي يا حبيبتي اللي أنتِ بتعمليه ده غلط 

ليان بتجري و قالت : حبك برص أتصرف 

قرب قاسم منها و شالها راحت ماسكة في رقبته جامد و غمضت عينها و بتترعش ف قال بضحك : عاملالي فيها زعيمة مافيا و أنتِ بتخافي من الكلاب 

ضربته ليان على دراعه و قالت بعصبية : نزلني بدل ما اقتلك 

غمز لها قاسم و قال : ما بلاش .. الكلاب هيبقى ليها رأي تاني 

و اشتغلت رشاشات الماية و قاسم و ليان بدأوا يتغرقوا ف جرى قاسم و لسة شايل ليان و لكن بيتزحلق و يقلع و تقع ليان فوقه ف قال بألم : ونش وقع فوقي 

بصتله ليان بلوية بوز حضنها و هما على الأرض و بصوا لبعض و ضحكوا 

عند چنی 

قاعدة بتشرب قهوة و ماسكة تليفونها و قالت : ياه التليفون ده ليه ذكريات كتيرة اوي و كمان الأكونت بتاع الفيس بوك و عمالة تقلب في الموبايل ف لقت حد بيخبط على دراعها 

بتلف چنی بنت لابسة فستان تحت الركبة مش بتتعدى 18 السنة ف قالت البنت بإبتسامة بهتانة : اتفضلي ده شربات نجاحي بمناسبة دخولي كلية الطب … أحنا جرانك في الشاليه اللي جانبك ده 

بصتلها چنی بتركيز و قالت : شكرا لذوق و اخدت چنی كوباية الشربات و قالت : بس عندي سؤال ليه شايفة في عيونك الحزن 

البنت بتوتر : ها …حزن لا طبعا عن اذنك عشان اكمل توزيع 

چنی مسكت ايد البنت و قالت : متخافيش محدش هنا يقدر يعملك حاجة تعالي اقعدي 

قعدت البنت على الكرسي و بدأت تعيط 

ف قالت چنی : يعني احساسي صحيح … أنتِ اسمك ايه ؟

البنت بعياط : اسمي يمنى 

چنی بإبتسمانة : ماشي يا يمنى احكيلي بقا و يا ريت من غير عياط كده ، على فكرة انا ظابط يعني خلقي ضيق 

مسحت البنت دموعها بأيدها و قالت : أنا عندي أخ أكبر مني بتلات سنين مامتي توفت و أنا عندي خمس سنين و بابا دايما في صف اخويا و كان حلمها أن واحد منا يدخل كلية الطب بس للأسف أخويا صايع و ملوش في موال التعليم و دخل كلية سياحة و فنادق ف طبعا شوفت ايام سودة و اخويا هددني و قالي لو مدخلتيش كلية الطب هخلي ابوكي يجوزك و مكملش تعليمي 

قاطعتها چنی : شكلي هرتكب جناية …طب و أنتِ كنت عايزة كلية ايه ؟

البنت بحسرة : كلية ألسن 

قامت چنی و قالت : قومي معايا 

البنت بترجي : أرجوكي بلاش

چنی ببرود : مش بحب اعيد كلامي مرتين قولتلك خلقي ضيق 

راحت چنی على الشاليه اللي ساكنة فيه يمنى و يمنى ماشية وراها بخوف ف قالت چنی بعصبية : ممكن تمشي قدامي عشان ده بيتك

دخلت البنت و وراها چنی لقت اخوها واقف بيقطع تفاحة و بياكلها قال بعصبية : كنت فين يا زفتة و مين دي

يمنى بصتله بخوف و مردتش قرب منها هيمسكها من شعرها ، مسكته چنی من ايده بصتله بقرف و قالت : مين إداك الأذن تمسكها من شعرها 

بصلها بإستغراب و قال : و أنتِ مال أهلك و مين أنتِ أصلا 

چنی بعصبية : أنا هقولك بروح أمك أنا مين و ضربته چنی بالروسية وقع الأرض و مسك رأسه بألم و يمنى بتبص بصدمة ف قالت چنی : مش وقت صدمات روحي شوفي ابوكي فين 

جه الأب على صوتهم ف قالت چنی : و الله فيك الخير يا أستاذ كنت لسة بجيب في سيرتك

بص الأب بصدمة و قال : اي اللي بيحصل هنا ده و أنتَ يا كريم واقع على الأرض كده ليه 

چنی ببرود : اللي بيحصل أن البيه و بتشاور على كريم بيهدد اخته لو مدخلتش كلية الطب هيجوزها غصب عنها و مش هتكمل تعليمها و لو مش مصدقني أتفضل أسأله 

الأب بصدمة : الكلام ده صح يا كريم ؟ 

كريم بتعب : ايوة حصل بس انا بحافظ على شرفنا عشان متبقاش صايعة و دايرة على حل شعرها و تركز في دراستها 

چنی بعصبية :  يعني أنتَ اللي ماشي على الصراط المستقيم و بعدين مش مبرر ، مرة شوفت مشهد في فيلم بيقول ( ايه المبادئ انك تدي لنفسك الحق انك تعرف ٣٠ بنت في حياتك و تفضل شريف و يقولوا شقاوة شباب و لو بنت كان ليها علاقة واحدة في حياتها تبقى صايعة و مينفعش تنول الشرف انها تبقى مراتك ،المبادئ مبتتجزءش.. ) 

قاطعها كريم : بس انا راجل 

ف قالت چنی بعصبية : برضو هتقولي راجل ، يعني لما ربنا ياخدك إن شاء الله كده عشان تتحاسب هتقول له يا رب أنا راجل لاء إطلاقا ، الراجل زي الست بني آدم هما الأتنين اتخلقوا عشان يعمروا الأرض من غير أي حد فيهم البشرية هتنتهني … و لكن أرجع اقول الغلط في التربية من البداية أن الأب ربى بطريقة غير سوية و بتوجه كلامها للأب : بنتك لو ملقتش السند و الأمان هنا هدور عليه برة و ساعتها مش هينفع تلوم عليها يعني برضو مش هتحافظ عليها …جيت تكحلها عميتها يا أستاذ اتمنى كلامي يكون اتفهم يا ريت تقرب من بنتك و تحسسها بالأمان دي في الأخر يتيمة و محرومة من حنان الأم و على فكرة بنتك عايزة تدخل كلية ألسن 

لسة چنی هتمشي وقفتها البنت و قالت : انا مش عارفة اشكرك ازاي 

چنی ببرود : لو عايزة تشكريني بجد كوني أنسان ناجحة لنفسك مش لحد و على فكرة هيوافقوا متقلقيش 

يمني ببلاهة :اه صحيح انتِ اسمك ايه 

ابتسمت چنی و قالت : چنی 

في أوضة ليان 

ليان قاعدة قدام المراية و قاسم بينشف شعرها بالمجفف ف قال : محضرلك مفاجأة 

ليان و ماسكة موبايلها ف قالت : ما بلاش ..

الواحد مش ناقص 

قاسم بتمثيل أنه زعلان : اتصدقي أن غلطان و انا اللي قولت افسحك في لندن 

قامت ليان بفرحة و وقفت قدامه و قالت : بجد يا قاسم 

قاسم بإبتسامة: اه يا روح قايم انا عرفت ان اختك حاجزة في طيارة بكرة و انا حجزت على نفس الطيارة و طبعا احنا هنسافر لأن الطيارة من مطار القاهرة ، لازم يكون في مقابل بقا

رجعت ليان لورا و قالت : مقابل 

شاور قاسم علي خده ، ضحكت ليان و باسته من خده و قعدت تاني و بدأ قاسم يكمل تنشيف شعرها 

ف قالت و هي ماسكة الموبايل : بص يا قاسم

ساب قاسم المجفف ف قالت : ده الأكونت بتاع چنی بس شكلها مش بتستخدمة يعني هي حاطة صورة ليها بقالها 8 سنين تفتكر شكلها اتغير 

قاسم : معتقدش بحكم انها متنكرة و كده ف لازم تفضل بنفس الشكل

في اسكندرية

شهامة قاعد بيقرأ في المصحف و تليفونه رن ف رد : ألو سلام عليكم 

خضر : أزيك يا حاج عامل ايه

شهامة بفرحة و عتاب: خضر ، ازيك يا بني .. كده يا خضر متسألش على أبوك كل الفترة دي 

خضر : سامحني يا ابويا مشاغل الحياه أنت اخبارك ايه و أخبار چنی ايه 

شهامة بتعب : الحمد لله يا بني ، فكرتني يا واد يا خضر انا بقالي فترة معرفش حاجة عن چنی ربنا يجعله خير …مش ناوي تنزل بقا يا خضر عايز اشوفك قبل ما اموت 

خضر بحجة : صدقني يا حاج الشغل و كمان اتجوزت 

شهامة بصدمة: اتجوزت من خواجاية يا خضر و من غير ما تقولي ..اخس عليك 

خضر : بحبها يا حاج اعمل ايه ..انا مضطر اقفل معاك عشان الشغل و وصل تحياتي ل چنی 

عند مراد 

مراد بيتكلم في التليفون : يعني حضرتك متعرفش هي فين ؟ 

عثمان بتأفف : يا مراد زهقتي دي المرة العشرة اللي بتسأل فيها صدقني ده مش جديد على چني و بعدين أنت ليه بتسأل كل شوية هو في حاجة ؟

مراد بتوتر : ها .. هو يعني انا غلطان اني عايز اطمئن عليها 

قفل معاه و قعد مراد على طرف السرير و افتكر موقف بينه و بين چنی‌ 

فلاش باك

چنی قاعدة مع مراد على الكورنيش

جنى بتبص على مراد لقيته ماسك الموبايل ف قالت بإستغراب : بتعمل ايه 

مراد ببرود :بصورك  

چنی بتاخد منه التليفون و قالت بعصبية : مين سمح لك تصورني مبحبش اتصور 

و مسحت الصور ؛ ف قال مراد بغضب مكتوم : نفسي اعرف مش بتحبي تتصوري ازاي …ده كل البنات بيحبوا التصوير

بصتله چنی بنص عين و قالت ببرود : اصلي من جنس أخر معلش 

انتهي الفلاش باك * 

ضحك مراد و نام من كتر التعب 

في صباح جديد 

عند چنی 

بتحط چنی شنطتها في العربية و افتكرت انها نسيت نضارتها دخلت تجيبها رن تليفونها ف ردت : ألو

رد عليها واحد صوته مخيف : مش قولنالك يا هتلر باشا خليك بعيد عن سكتنا عشان متزعلش 

چنی بإستغراب : مين معايا ؟

ضحك الراجل و قال :مالك قلقانة كده ليه خدي النضارة هي قدامك اهي 

چنی‌ طلعت مسدسها من جيبها و خرجت برة الفيلا و بتبص حواليها و هي ماسكة الموبايل ف قال : مفيش داعي تدوري و نزلي سلاحك بلاش غباء ، انا حظرت اختك بس شكل مفيش فايدة ف قولت اقول انا بنفسي 

چنی بعدم فهم : اختي !

الراجل بسخرية : متقوليش انك مش عارفة ان اختك الفاضلة استلمت كرسي العرش من بعد ابوها زعيمة المافيا و شريكها قاسم …احنا عارفين عنك كل حاجة يا چنی أفتكري كلامي كويس و خافي على نفسك و على كل اللي بيحبوكي سلام يا هتلر باشا و قطع الخط 

چنی بعصبية : الو الو 

فجأة حد بيخبط في ضهرها بتلف چنی و ترفع السلاح ف تلاقيها يمنى ..بتنزل چنی السلاح ف قالت يمنى بخوف : ده مسدس حقيقي 

چنی ببرود : لا مسدس ماية اكيد مسدس حقيقي …انتِ جاية ليه 

يمنى طلعت من شنطتها هدية و قالت : ممكن تقبلي مني الهدية دي 

بصت چنی‌ بإستغراب و قالت : ايه ده 

يمنى بإبتسامة :افتحي و انتِ تعرفي

فتحت چنی الهدية و ابتسمت و قالت بلمعة عين : مصحف 

يمنى بإحراج : مكنتش عارفة انتِ بتحبي ايه ف قولت اجبلك مصحف ، اسفة لو…

قاطعتها چنی بفرحة و حضنت المصحف : دي اجمل هدية جاتلي في حياتي

يمنى بفرح : انا مبسوطة ان الهدية عجبتك حبيت اشكرك بابا وافق اني ادخل الكلية اللي انا عايزاها حقيقي انا مبسوطة و كمان كريم اعتذر مني و وعدني انه يعاملني كويس 

چنی بإبتسامة خفيفة : طب الحمد لله ، انتِ عارف انك اول واحدة هشكرها في حياتي …بجد شكرا جدا عمري ما هنسى الذكرى الحلوة دي ..انا مضطرة امشي عشان متأخرش على ميعاد طيارتي 

قالت يمنى بعفوية : هو انا ممكن احضنك 

چنی بإبتسامة و شعور غريب : اكيد طبعا و فتحت دراعتها و يمنى حضنتها 

و بعد كده چنی ركبت العربية و بدأت تتحرك و هي بتفكر في المكالمة 

في شقة مجدي 

محمود بصوت عالي : يلا يا زفت هنتأخر يا ربي ايه البرود ده 

مجدي و بيلبس القميص و بيسيب اول زرارين ف قال : خمس دقايق بس 

محمود بعصبية : يخربيت ام برودك يا عم يلا هنتأخر على الطيارة 

في مطار القاهرة 

بتنزل چنی من العربية و بتمسك شنطتها و بتدخل و كانت لابسة بنطلون جلد أسود عليه تيشرت اسود و نضارة سودة و راحت على كافيه المطار عشان كان فاضل ساعة طلبت قهوة و فجأة ييجي صوت نسائي من وراها : ريان 

بتلف چنی و كانت الصدمة قلعت نضارتها و قالت بصوت بارد : ليان !