رواية آدم الفصل الرابع عشر 14 بقلم جهاد عامر

رواية آدم الفصل الرابع عشر 14 بقلم جهاد عامر

رواية آدم البارت الرابع عشر

رواية آدم الجزء الرابع عشر

رواية آدم الحلقة الرابعة عشر

– لا مافيش عرسان تاني ولا حاجة.
وقف وبصلي..
– سافري انتي بس وارجعي بنجاحك ونبقى نشوف الموضوع دا.
– يااااه دا كان هم وانزاح.. أنا عارفة انتي كنتي مستحملاه ازاي دا؟ دا انتي جبل يا بت جبل!
طلعت البلكونة وأنا ببتسم..
– خلاص بقى يا رحمة الله يسهله مش عايزين نجيب سيرته تاني.
– يختي ولا هنجيب سيرته ولا هنتكلم عليه أصلا دا احنا هنمحيه من ذاكرتنا.
ابتسمت وقولت وأنا ببص على بابا وعمي وآدم اللي قاعدين في الحوش وباين عليهم بيتكلموا في حاجة مهمة..
– أشطر كتكوتة.
– مقولتليش بقى قال ايه لآدم وهو بياخد منه الحاجة بتاعته؟
ضحكت بصوت عالي فـ رفع عينه وابتسم..
كنت لسه هشاورله لقيت الباب بيخبط..
– ادخل..
فجأة الباب اتفتح ودخل منه ماما وطنط حنان مامت آدم وجم وقفوا جنبي من الناحيتين بابتسامة من الودن للودن!
نقلت نظري بينهم بارتياب كدا وقولت لرحمة..
– طب أقفلي يا رحمة دلوقتي أما نشوف في ايه!
قفلت في وشها وبصيتلهم..
– ايه داخلة ريا وسكينة دي؟ في ايه مالكوا؟
ماما شدتني وقعدتني على السرير وقعدوا حواليا..
بصيت لماما..
– في ايه يا ماما؟
ماما بصتلي بنفس الابتسامة العريضة..
– اتكلمي انتي يا حنان أنا مش هتكلم.
بصيت للتانية لقيتها بنفس الابتسامة..
– في ايه يا حنون!
اتعدلت وبصت لماما فشجعتها..
مسكت إيدي وطبطت عليها..
– حوَّاا انتي عارفة غلاوتك عندي قد ايه صح؟
ضميت حواجبي بقلق وهزيت راسي بـ أيوا فكملت..
– وعارفة إنك بنتي اللي مجبتهاش صح!
– في ايه يا ست انتي! لو عايزة حاجة من برا اجيبهالك وأنا جاية قولي على طول!
– بصراحة اه عايزة.
خدت نفس بارتياح..
– يا شيخة وقعتي قلبي.. عايزة ايه!
حنون سكتت وماما كملت..
– في عريس متقدملك وعايزينك توافقي عليه.
بصيتلها بدهشة..
– عريس! دا أنا لسه مفركشة الصبح يا ماما!
كشرت وقالت بزهق..
– وايه يعني.. لا أول واحدة تفركش ولا آخر واحدة ايه هتترهبني!
بصيت للي كانت جنبي بتضحك بصوت عالي ورجعت بصيت لماما تاني..
– يا ماما أترهبن ايه بقولك سايباه الصبح.. اديني فرصة أموف أون حتى!
– ايه أموف أون دي عايزة أعملك فرخة بكره ع الغدا يعني ولا ايه!
رجعت بصيت للي عمالة تضحك دي لحد ما هديت وقالت لماما..
– بقولك ايه ما تطلعي برا انتي على ما أجيبهالها بالراحة؟
– والله أحسن حاكم أنا خلفي ضيق وشبشبي مبيسكتش!
طلعت وبصيت لمامت آدم..
– هو في ايه مالكوا النهارده كدا!
– بصي من الآخر كدا..
– ها
– آدم..
– هااا
– طلب إيدك من شوية.
رمت الجملة وسكتت وبصتلي بترقب مستنية رد فعلي..
– ما تقولي يا ست آدم عمل ايه!
ابتسمِت ورجعت مسكت إيدي..
– آدم طلبك للجواز من أبوكي تحت يا حوَّاا.

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية آدم)