رواية انت الترياق الفصل الخامس عشر 15 بقلم هايدي أحمد

رواية انت الترياق الفصل الخامس عشر 15 بقلم هايدي أحمد

رواية انت الترياق البارت الخامس عشر

رواية انت الترياق الجزء الخامس عشر

رواية انت الترياق الحلقة الخامسة عشر

اتغطى جاسر ونام جمبهم وهو حاسس براحه محسش بيها قبل كده وغمض عينيه وفى ابتسامه على وشه
بعد وقت
فتح جاسر عينه من تقليب غزل وبص عليها كانت بتتقلب وواضح انها منامتش فعرف هى ليه منامتش
بص على داوود لقاه نايم فى عمق غطاه وقرب شويه وحط ايده على شعر غزل ومشى ايده عليها شويه وهو مركز معاها بعد شويه قرب منها وكانت بتتنفس بهدوء فابتسم لما اتاكد انها نامت قرب وباسها على اول راسها وغطاهم كويس وبعدين نام
★★★★★****★*★★★★★★★★★*★****★★★
نزل حازم من العربيه بعد ما ركنها وبعدين طلع شقته ودخل حط مفاتيحه على السفرة وبعدين دخل اخد شاور وطلع عارى الصدر وبينشف شعره ودخل المطبخ طلع اكل من التلاجه وحطه فى الميكرويف يسخنه واستناه وهو حاطط ايده على خده بشرود وبيفتكر مايا (يا بنت ال ….مسيرى هردهولك القلم ده بس مش دلوقتى خليها كده على الهادى بس استنى ) طلع الاكل بعد ما سخنه وقعد ياكل وبعدها عمل نسكافيه وطلع البلاكونه يشربه وكل ما يفتكرها ويفتكر انها ضربته يضايق ويجز على سنانه (غورى بقى من بالى …اااه لو مسكتك هعرفك تضربى مين يا سحلية انتى ) خلص النسكافيه وبعدها دخل ينام
★★★★★*★★★**★*★★★★★★***★★★★
دخلت والدة غزل لاوضة غزل بليل تتطمن عليهم وهى مبسوطه ان اوضتها فيها حد زى زمان
قربت من غزل ومشت ايديها على راسها بحنان فاتملمت غزل بنوم واتقلبت الناحية التانية فابتسمت والدتها انها نايمه فعلا وبعدين بصت على جاسر وغطته وطبطبت عليه وباست داوود وخرجت فى الوقت ده صحى جاسر وبص فى أثرها بعد ما مشيت وبعدين بص فى الفراغ بشرود وعنده مشاعر متخبطه وبعدين بص على غزل وابتسم واتقلب نحيتهم وحضنهم ونام وكانت دى اسعد ليلة تمر عليهم كعيله ❤️
★★★★★★★★★★*★★★★★★★★★★*★
مايا
طلعت مايا اوضتها بضيق واخدت شاور وغيرت هدومها وجه فى بالها حازم
يوووه مبقاش فاضل الا انت كمان افكر فيك بس والله لادفعك تمن ده كله غالى اوى عشان تعرف انت بتلعب مع مين بس ..ازاى كان بيتكلم صعيدى اللهجه دى صعيدى معقول معقول يكون صعيدى فعلا بس مش باين عليه الصعايده مش كده …الله وانا مالى بالزفت ده انا هناسبه مش هتفرق صعيدى ولا لا
قعدت تفكر كتير وبعدين تعبت ونامت
★★★★★★★★★★★★★★★★★★★*★★*
كنتى فين دلوقتي
كنت بشقر على الولاد واغطيهم
هم صغيرين ده كبار ومتجوزين
الله وايه يعنى مهما كبروا احنا اكبر وفى نظرنا عيال
وبعدين مبسوطه ان اوضتها اتملت تانى بريحتها زى الاول
معاكى حق عاملين حس فى البيت
متقلقش بكره تملى علينا البيت ده عيال وبعدين فى داوود
ايوه بس انتى عارفه الى فيها
وماله اعتبره ابن بنتى يعنى انا كمان سته وانت جده يلا نام بقى وابقى صحينا للفجر
تصبحى على خير
وانت من اهله
بعد وقت صحى والد غزل يصلى الفجر وصحى ام غزل وراح يصحيهم بس لقى جاسر بيتوضى عشان يصلى
انت هنا طب مش تصحينا
قلت ما اقلقكوش
لا تقلقنا ازاى دى صلاة الفجر يا ابنى
صحى غزل يا ام غزل نصلى جماعه
حاضر
راحت والدتها تصحيها وكانت غزل نايمه بعمق
بت يا غزل
اممم
قومى يا بت الفجر اذن قومى عشان نصلى
طب شويه وهاجى وراكى
قومى يا بت بلاش كسل
حا..ضر خمس دقايق بس
يا بت قومى جوزك صحى بره قومى صلى معانا
ايه جاسر
اه قومى
قامت غزل بصت مكانه ملاقتوش واتاكدت انه برا فقامت لمت شعرها وخرجت بتقل ورا مامتها
لقت جاسر برى بيصلى السنه هو وابوها
ايه ده جاسر فعلا
يلا يا غزل اتوضى عشان نصلى جماعه سوى
اتوضت غزل ومامتها وبعدين صلوا السنه وخلصوا
بعدها قام جاسر وقف قدامهم وأمهم واستغربت غزل انه هو الى هيصلى بيهم
بعدها كبر جاسر وبدأ يقرأ القرآن بصوت عذب وهم بيصلوا وراه وبعدها سلموا
رفعت غزل راسها بذهول من الى سمعته
ربنا يبارك فيك يا ابنى ما شاء الله عليك
بسم الله تبارك الله ايه التلاوة الحلوه دى اتعلمت القران فين
كنت اشتغلت فترة ضابط عمليات وفى الفترة دى كنت وزمايلى بنحفظ القران وبنسمعه لبعض وكنت علطول بأمهم فى الصلاة وده كان بيبقى تحسبا لو حد فينا مات قبل التانى نقابل ربنا واحنا حافظين كتابه لان شغلنا كان صعب و راح منه كتير
ربنا يحميكم ياابنى فعلا شغلكم صعب ده انتم الى بتحموا البلد
كانت بتبصله غزل وهى حاسه بفخر بيه وفى نفس الوقت بحزن عشانه لانه اكيد مشافش قليل فى الشغلانه دى وهو عينيه جت فى عينها وهو سرحان فيها
يلا يا اولاد قوموا ناموا شويه على اما الصبح يطلع
قامت غزل وراحت قلعت الاسدال وبعدين اتغطت وجاسر دخل وراها ونام جمبهم
انت اكيد بتصلى الفجر علطول ليه مكنتش بتصحينى اصلى معاك
بصلها جاسر شويه وبعدين بص قدامه
معرفش انك بتصلى اصلا ثم فى قصة الصلاة دى الى مش عايز مش بكبره بكره يفهم ويتعظ
ليه كده علفكره ممكن تكون سبب ان حد مبيصليش يبدأ يصلى تانى بسبب نصيحتك امال الشيوخ والداعيه بيفضلوا ينصحوا فى الناس ليه عشان لعل وعسى حد يتعظ ويبعد عن الغلط الى بيعمله ده ربك الى قال كده
-ربنا لو عاوز يهديه هيهديه هو قادر على كل شئ
=ايوه بس مش معناه اننا منحاولش ونقوى ايمانا بيه
بصلها جاسر شويه وبعدين سكت
مش كل الى حواليكى بتقدرى تغيريه فى حاجات انتى مش قدها فبتسيبها لربك
بصتله غزل شويه وهى بتحاول تفهم قصده
يلا نامى عشان هنمشى الصبح عندى شغل وداوود هيروح الحضانه
نامت غزل وهى فى راسها مية حاجه وبتفكر فيها وبعدها غمضت عنيها واستسلمت للنوم
★★★★★★★★★★★★*
تانى يوم صحي جاسر واتقلب جمبه وبص على غزل وادوواد وهم نايمين وداوود نايم فى حضن غزل وابتسم وفضل يبصلهم شويه وهو بيمشى ايده عليهم فصحيت غزل وجاسر شال ايده بسرعه وبصتله شويه وبعدين بصت لداوود الى فى حضنها
يااه لو نفضل كده علطول ده العيله الى كنت عايزه اعملها بس شكلى مليش نصيب
صحى داوود وقومى يلا عشان نمشى
قامت غزل وهى بتتمطع وبتصحى داوود براحه وجاسر قام راح الحمام وغير هدومه ورجع تانى كانت غزل راحت لبابها الى قاعد فى الصاله صبحت عليه
صباح الخير يا حج ايه الحلاوة دى على الصبح صغرت عشر سنين
يا بت بطلى بكش بس وحشنى البكش بتاعك ولمضاتك يا بنت الكلب
ههه لا يبقى وحشتك فعلا
وبعدين راحت تساعد والدتها فى المطبخ
صباح الخير يا ماما
صباح الخير يا حبيبتي يلا صحى جوزك وداوود يلا عشان نفطر سوى
هم صحيوا وجاسر لبس عشان هيمشى
يمشى ليه يا بنتى
عنده شغل يا ماما وداوود هيروح حضانته
بسرعه كده زعلتينى يا غزل
يا ماما هبقى اعدى عليكى انا تانى وهجيب داوود معايا متقلقيش
طب خلاص افطروا الاول
مش عارفه هيفطر ولا لا انا هعمله قهوة على اما يطلع
يفطر وميفطرش ليه اوعى كده انا هروحله
هه ايوه انتى قدها يا ماما
بس يا بت يلا جهزى السفره
طلع جاسر وقعد جمب حماه
صباح الخير يا ابنى ايه مالك مستعجل ولابس هدومك ليه
صباح الخير يا عمى همشى عشان عندى شغل ضروري
طب غزل وداوود هتاخدهم معاك
ايوه هى غزل فين
غزل جوه مع مامتها
يلا يا غزل الفطار ..ايه ده انت لبست بسرعه كده ليه
يلا اتصرف انت مع حماتك بقى
عندى شغل والله يا طنط ومش هقدر اقعد اعذرينى
لا انتم هتمشوا ازاى مش هتتغدوا معانا النهاردة
لا غدا ايه مش هينفع المره الجايه ان شاء الله
يعنى كده ماشيبن انا ما صدقت جيتوا طب حتى اقعدوا كمان يومين
متزعليش هجبهم واجى تانى متقلقيش يا اما انتم تيجوا تقعدوا معانا
لا نقعد ايه يا ابنى الواحد كبر ومعدتش يقدر يقعد فى مكان تانى غير بيته هتفهمها بعدين دى يلا قوموا عشان نفطر
بعد شويه طلع داوود وهو بيفرك فى عينه بنوم وبعدين راح قعد على السفره وهو مستنى الاكل
انت صحيت يا صغنن ثوانى وهنحط الفطار يلا يا بت يا غزل
حااضر يا ماما
جابت غزل لاطباق وحطتها وبعدين جابت العيش السخن ومعاه الشاى وحطت جمبه النعناع
الله الله واضح ان الفطار الملوكى ده مش معمول عشان خاطرى انا مش كده
بصلها جاسر بإستفهام وهى بتكلم مامتها
بس يا بت بطلى برطمه ما انتى ياما اكلتى ده عشان جاسر وداوود
اه اخد بعضى انا وامشى بقى
لا يا حبيبة ابوكى تمشى ازاى
وقرب وهمس بخبث
هنمشيهم هما ونقعد احنا
اشطا يا حج
ايوه يا اخويا دلعها فى الاخر هتطردنا احنا
ضحكوا كلهم وبصلهم جاسر ولعلاقتهم مع بعض وهو مبتسم وحاسس بالدفى بينهم بعدها اتنهد وقام وبص للاكل وشكله وهو سخن وجمبه العيش والشاى وفى ريحه بتاخدك لزمان ولبيوت زمان
بدأو ياكلوا فى وسط كلامهم وضحكهم مع بعض
بعدها قام جاسر واستعجل غزل وبعدين اخدت داوود وراحوا يلبسوا
خد بالك منهم يا ابنى وخدوا بالكم من الطريق ومتطولوش علينا يومين كده وتعالوا تانى
خاضر يا طنط متقلقيش
دخلت والدة غزل ليها
يلا يا بناى حوزك متاخر على شغله
ما يتاخر ملبسش يعنى
غزل اوعى تكونى بتعامليه كده فى بيتكم مينفعش المعامله دى الراجل ميبحش العند والشد فى المعامله
بصتلها غزل بسخريه (والنبى لا ده نافع ولا ده يا ماما)
سمعتينى
خلاص سمعت حاضر يا ماما
ربنا يهدى سركم يا بنتى
بعد شويه هرجت غزل ومعاها داوود وسلموا على اهلها واخدهم ونزلوا واهلها وصلوهم للعربيه
مع السلامه يا ماما مع السلامه يا بابا هتوحشونى
مع السلامه يا حبيبتي متكوليش الغيبه علينا
مع الف سلامه يا بنتى خدوا بالكم من نفسكم خد بالك من الطريق يا ابنى مع الف سلامه
الله يسلمك يا عمى
شغل جاسر بالعربيه و غزل شاورت لاهلها وهى متأثرة وزعلانه وبعدها مشيوا اخد جاسر باله من غزل ومزاجها الى اتقلب وباين عليها الحزن وبعدين كمل سواقه ووصل داوود لحضانته وبعدها وصل غزل البيت
اخدت غزل شنطتها وكانت هتنزل بس وقفها جاسر
احم ..محتاجه حاجه اجبهالك وانا جاى
بصتله غزل بإستغراب وذهول
قولت .. ايه
محتاجه اى حاجه اجبهالك وانا جاى يعنى حاجه عايزاها
سكتت غزل شويه (هو سالنى بجد يا ترى فيه فخ ورى سؤاله ده بس انا مش محتاجه حاجه …طب وماله احتاج طلاما عايز )
اييه اه ..كنت عايزه …شوكلاته
شوكلاته …بس ده الى عايزاه
ايوه شوكلاته دارك جت على بالى
تمام ..هجيب وانا جاى
تمام
سابته غزل ونزلت ودخلت البيت من غير كلمه زياده معاه
بص جاسر فى أثرها واتنهد
وماله نجيب شوكلاته
وبعدها شغل العربيه وطلع على شغله
دخل المكتب ولقى حازم مستنيه فى المكتب
ايه يا كبير نموسيتك كحلى يعنى جاى متاخر ليه
وانت مالك يلا هتحقق معايا
حاشا لله يا كبير بس قلبى متوغوش عليك بس
لا يا اخويا متتوغوش خليك غى حالك
كده ده انا حازم حبيبك تخبى عليا
اخبى عليك يلا سيبك من ده كله عملت ايه فى الشغل الى قولتلك عليه
خلصته يا اخويا مانا مفيش غيرى هنا ..اه كان فى حاجه كنت عايز اقولك عليها حصلت امبارح
ايه الى حصل قول
امبارح شوفت بنت عمتك فى نايت …….وانا فى عيد ميلاد صاحبى
وبعدين
حكى حازم لجاسر كل الى حصل امبارح لعند ما روح
بص جاسر قدامه بشرود وبعدين بص لحازم
دى العادى بتاعهم بس البت دى وراها حاجه وانا مش قادر اوصلها
انت لسه هتشك مى باينه زى عين الشمس
لا ده مش كفايه دى مش اول مره يوصلنى حاجه عنها وخايف تعمل حاجه دى مجنونه
طب الحل ايه ما انت عارف انها كانت عايزاك
ما تتلم ليه عايزاك دى
الله ده الاعمى يشوف انت ازاى مش شايف واكيد نراتك برضه اخدت بالها واراهنك ان حصل بسببها خناقات بينكم
ايوه صح بس قولت غيرة بنات عادى
لا ده الست اكتر واحده تفهم الست
سكت جاسر شويه وهو بيفكر وبعدين بص لحازم
ايه بتبصلى كده ليه
بفكر فى الحل والى متاكد منه ان الى زى مايا مبيحبش هى بس من النوع الى بيحب الحاجه تبقى بتاعته بس مش اكتر وانا عرفت حلها
ايه هو
ضحك جاسر بخبث
هقولك …………..
بعد شوية
ايه ده مستحيل
وليه مستحيل
الموضوع مش سهل زى ما انت مفكر ده موضوع عايز ترتيبات ومينفعش يجى بسهوله كده وبعدين افرض اتدبست وانت عارف اهلى
متقلقش اكيد هنوصل لل. عايزينه قبل ما تتدبس ثم انت عارف المنظمات دى مش سهل الوصول ليها لا بالمراقبه ولا غيره لازم تبقى تحت ايدينا
طب ليه مش انت
كان ممكن فعلا انا بس انت عارف فيه غزل
اااه قول كده يا حبيب
اتلم بقى يلا وخلص اعمل الى قولتلك عليه فى اسرع وقت
طيب انا همشيها من عندى بس الجمب التانى انت مشيه بقى
متقلقش مرتب كل حاجه
ازاى بقى
بصله جاسر بخبث
ابويا
اه يا ابن ال
هااا
ده انت مرتب لكل حاجه بقى وعايز تدبسنى
ايه هنخاف ولا ايه
لا وعلى ايه حاضر مقداميش حل تانى سلا انا عشان اجهز نفسي
مع السلامه يا ….ولا بلاش خليها بعدين
اااااع ده انا اتدبست بجد
مشى حازم متغاظ وحاسر بيضحك عليها بعدها قعد يشوف القضايا والمحاضر الى وراه
★★★★★★★★★★★★★★★★★★★★★***
بليل
كانت غزل قاعده فى البلاكونه بتقرأ كتاب وهى مندمجه فيه وبتشرب قهوة بعد شوية سمعت صوت باب الاوضه فعرفت ان جاسر جه نزلت الكتاب وشافته داخل عليها وكان فى ايده بوكس فاستغربت غزل شويه وهى بتبصله حط جاسر البوكس قدامها على الترابيزة بصتله غزل وبعدين ابتسمت واخدته بحماس وفتحته وجاسر متابعها ولقته مليان شوكلاته دارك بالبندق بصتلها غزل بذهول وبعدين بصت لجاسر
انت عرفت منين انى بحب الشوكلاته بالبندق
بصلها جاسر بصدمه شويه
اايه انا معرفش انك بتحبيها ونسيت اسألك بتحبى انهى نوع …بس جبت دى عشان ..والدتى كانت بتحب النوع ده فقولت اجيبه عشان اعرفه
بصت غزل للشكولاته وبعدين بصتله بصدمه
مامتك كانت بتحبها ….هى مامتك كانت عامله ازاى انا ولا مره شوفتلها صورة هنا
بصلها جاسر بشرود
كانت فيها شبه منك
بجد بابا قال كده بس مصدقتش طب ليه ملهاش صور هنا خالص
ليها بس فى اوضه لوحدهم
طب …ممكن اشوفها
اتنهد جاسر وسابها ودخل
بصتله غزل بحزن (كنت عارفه انه لا …)
اخدت البوكس والكتاب ودخلت الاوضه لقت جاسر بيطلع برواز من الدولاب بتاعه و وراح لغزل وهى بتابعه بذهول وبعدين ورهولها شافته غزل وهى مصدومه لان فعلا فيها شبه منها وابتسمت وحطت الى فى ايديها على الترابيزة ومسكت الصورة
ايه ده انا فيا شبه منها فعلا هى اتوفت ازاى
كشر جاسر وعقد حواجبه واخد منها البرواز وكان هيمشى بس غزل مسكت ايده
انا ..اسفه مش قصدى ازعلك ولا اجرحك انا بس عايزاك تفضفض وتطلع الى جواك طول ما انت كاتمه هتتوجع اكتر صدقنى لو اتكلمت هترتاح لو مش عايز خلاص بس متزعلش
اتنهد جاسر ولف وبصلها وهى بتبصله برجاء عشان يرضى لكن هو شد ايده ودخل الحمام اتنهدت غزل بحزن واخدت بوكس الشوكلاته وقعدت على السرير تاكل منه بضيق وبعدين سابته واتغطت ونامت وهى مستنياه يجى عشان يمشى ايده على راسها
كان جاسر بياخد شاور ومتضايق وبيبص فى الفراغ بحزن وبيفتكر مامته وبعدها خلص وخرج وهو بينشف شعره لقى غزل متغطية فقرب شويه وعرف انها منامتش فابتسم بسخرية وبعدين طلع على السرير واتغطى واستنى شوية وبعدين بص لغزل واتنهد وحط ايده على راسها وهو بيمشى ايده عليها وبيبص فى السقف اما غزل كانت مبتسمه ونامت وهى مطمنه (هيجى اليوم الى هتتكلم فيه يا جاسر وهتفتحلى قلبك وانا مستنيه اليوم ده ومش هيأس)
بعد مرور شهر بدون احداث لسه علاقة جاسر بغزل زى ما هى بس علاقتها بداوود بدأت تتحسن عن الاول وتقربه ليها ولجاسر اكتر
عند حازم
ايوه يا ابنى ..جاى فى الطريق خلاص استنانى
تمام …بس خليك فاكر انت الى دبستنى التدبيسه دى
ماشى يا عم الحبيب سلام
قفل حازم وبعدين رش برفان وهو مضايق
وعمل كام مكالمه وبعدين نزل
(الى الهلاك يا حازم ..يا صغير على الهم)
نزل حازم وراح قابل جاسر ووالده وبعدين مشيوا
عند مايا
ايييه لا لا لا مستحيل ايه الى بتقوليه ده يا مامى مستحيل طبعا
وليه مستحيل بقى ان شاء الله جه لحد عندنا نقوله لا
ايوه تقولوا لا لانى مش موافقه طبعا ده لو اخر راجل على الكوكب مستحيل اتجوزه
اسمعى يا بنت انتى الولد محترم وعاحبنى وظابط وعاحب ابوكى جدا ده غير ان خالك الى جايبه يعنى ميترفضش ايه عليزانى اجوزك لمين لحد من العيال الهايفه الى انتى مصحباهم مستحيل طبعا انا بنتى متاخدش حد مش من مستواها
وده من مستوانا ازاى بقى ان شاء الله انتى شوفتى بعينك وبعدين ده صعيدى يعنى من الفلاحين عايزه بنتك تعيش فى الفلاحين هو ده مستوايا
فلاحين اه انت تعرفى الفلاحين دول عايشين ازاى ولا املاكهم قد ايه ميغركيش البساطه الى هم فيها دول معاهم ملايين
ولو انا مش محتاجه الملايين ولا هبقله عشانهم
مايا خمس دقايق وتكونى جاهزه الناس على وصول وانتى حره اتصرفى مع باباكى وخالك وابن خالك
ايه ..جاسر جاى معاهم
الله مش صاحبه هيجى من غيره
يعنى جاسر موافق
اكيد طبعا مين هيشهدله غير جاسر
يلا متتأخريش
اغاظت مايا وقعدت تكسر فى كل حاجه فى الاوضه
لا لالا مستحيل يعنى ايه جاسر جاى معاااه ااااع
انا مستحيل اعيديها على خير وهندمه على الخطوه دى ويا انا يا انت يا حازم
بعد شويه
وصل حازم وجاسر ووالده ودخلوا البيت واستقبلهم والد ووالدة مايا وضايفوهم
اهلا وسهلا طبعا يا حازم انت مش معترف بالجيه دى وده لعدم حضور والدك معاك على الاقل
كان حازم شارد(والله انا مكنتش جاى اصلا) بس فاق لما جاسر زقه عشان ياخد باله
ها ..ايه اسف يا عمى والله بس والدى عنده ظروف ومعرفش يجى وكمان تعب الطريق عليه هو ووالدتى فعشان كده جبت عمى داوود معايا
طبعا مجى داوود على راسى بس كان يصح والدك معاك بس انا عاذرهم طبعا وان شاء الله تتعوض فى الجايه
ان شاء الله طبعا انت عارف احنا جايين ليه يا سامى رغم انى كمان من موكلين العروسه هه بس ميصبش حازم عندى زى جاسر بالضبط شاب محترم وشهم ومن اكفأ الضباط فى المديريه واظن انت واصلك عنه كل كده وبصراحه ملاقيش احسن منه لبنت اختى
بلع حازم ريقه بتوتر(اه ادبست يا حازم )
اكيد يا داوود طبعا ده شرف ليا بس ناخد رأي العروسه ووالدتها طبعا
اكيد طبعا هى فين عروستنا
جت والدة مايا وسلمت عليهم
ثوانى يا داوود هتنزل حالا
قعدت والدة مايا وشاورت للداده تطلع تناديها وده تحت نظرات حازم المتوترة بعد شويه سمعوا صوت كعب عالي فبصوا ناحية السلم وكانت مايا و….

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية انت الترياق)