Uncategorized
رواية ليل الفصل الحادي والثلاثون 31 بقلم ياسمين خالد
رواية ليل الفصل الحادي والثلاثون 31 بقلم ياسمين خالد
 |
| رواية ليل الفصل الحادي والثلاثون 31 بقلم ياسمين خالد |
رواية ليل الفصل الحادي والثلاثون 31 بقلم ياسمين خالد
‘بتقرب عليه بنت جميله ،لابسه دريس أسود عليه طرحه حمرا لون عيونها سماوي حاطه ميكاب خفيف يبرز ملامحها الهاديه قربت ب إبتسامه علي أنس وقال برِقه :إذيك ياأنس ؟
= ‘بيرفع حاجبيه إتكلم بحدود’ كويس عاوزه حاجه ؟
_البنت ب ارتباك:لأ..لأ انا بس شوفتك قاعد ف قولت أجي اسلم عليك .
=سهيله بلُطف حاولت تداري موقف انس:اتفضلي ياحبيبتي اقعدي افطري معانا
_لا ميرسي ياطنط انا همشي .
=ليه ياحبيبتي كده !
_لأ مفيش عادي سبقتكم ، بس هو ممكن أخد رقمك ياأنس؟
=أنس بلُغه جافه:نعم ! هو انتي هبله ؟
_سهيله بغضب: انس عيب كده ؟ معلش يابنتي هو مضغوط شويه اليومين دول .
=لا مش مضغوط ياماما انتي عارفه دي تبقي مين ؟
‘بص للبنت ب _إستحقار’: ما تردي تقوليلها تبقي مين وعايزه تاخدي رقمي ليه؟
=انا مش فاهمه فين المشكله !انت صاحب عبدالله وانا حبيبته وعاوزه نتكلم ونكون صحاب فيها ايه؟
_وهو عارف ؟
=…….
_سهيله ف ذهول: يابنتي لازم تحافظي علي اللي معاكي وخصوصا ده صاحب انس الانتيم هو انتي عاوزاهم يخسروا بعض؟
=لا ما هو عبدالله مش هيعرف حاجه .
_انس بيضحك بسخريه ويتجاهل كلامها ويبص من ازاز الكافيه علي البحر
=سهيله بهدوء:يابنتي كده عيب مينفعش انتي عارفه اصلا لو عبدالله عرف انكم مخبيين عنه كده هيشوف إن صاحبهُ خاين؟وقتها هيعمل ايه بقي ؟اول حاجه هيخسروا بعض وممكن يتخانقوا خناقه كبيره وهيبقي حقو يعمل ف انس اي حاجه
_عمتا هو كان عارف قبل كده ان سالت ع انس كام مره وحس اني معجبه بيه وقولتله ان انا مرتحاله كمان..
_انس:ايه يابت البجاحه والعك والقرف اللي انتي فيه ده؟
=انس متغلطش لو سمحت انا بنت ناس بردو مش معني اني صارحتك بمشاعري تعمل فيا كده!
_طب امشي بجد عشان محرجكيش أكتر من كده
=’البنت بتمشي وف عيونها نظره كلها شر ومكر’
=سهيله: اهدي متتوترش وبطل تلعب بالشوكه ف الطبق وكل
_تفتكري أروح أحكي ل عبدالله ولا لا؟انا مشوفتش بجاحه كده
=متحكيش يابني حاجه وربنا مسيروا يكشفله حقيقتها .
_ممكن تروح تحور وتعمل حوارات اني كلمتها وكده .
=فين الدليل؟
_مفيش دليل بس انتي عارفه حركات البنات دي وانا مش ناقص حوارات .
=صاحبك هيصدقك إنت متقلقش .
_خير إن شاء الله ، يلا ناكل بقي ياقمر مش عاوز حاجه تعكنن عليا وانتي معايا
=ياقلب القمر إنت ،كمل ياحبيبي أكلك .
_بصلها بتساؤل
_عاوز تسال إيه؟
=لسه بتحبي بابا!ولو جت فرصه إنكم ترجعوا !هترجعوا!
_بصتله بدهشه : ايه اللي بتقوله ده ياانس؟ باباك ف حياته واحده وبيحبها استحاله حتي لو هو طلب ده انا عمري ما هوافق.
_لسه بتحبيه؟
=هتفيد ب ايه اجابه السؤال ده ياأنس!
_هتفيد ب إن هعرف اذا كنتي موقفه حياتك عشان أنس ورودينا ولا عشان لسه حب يوسف ف قلبك.
=لا طبعا انا بحبكم ومحبتش اني ادخل حياتي حد عشانكم علي فكره انا زميلي ف الشغل لحد الان عايزني وانا اللي رافضه تماما حتي رافضه كلامي معاه واي مشروع المدير بيطلب اننا نعملوا سوا برفض وبتهرب انا محبتش احسسكم ان ف راجل بيشاركني حياتي،حبيت أفضل موجوده وقت ما تحتاجوني تلاقوني وتيجوا ..ومحطش ف قلبكم شعور الخوف من جوز الام بقي وانكم تبقوا مش عاوزين تيجوا علشان متسمعوش كلمه متعجبكُمش اما عن حبي ليوسف ف انا ضيعته مني ومحستش ب اني بحبه غير لما ضاع مني وسابني بس عمري ما فكرت تاني ادخل حياته او اتكلم معاه ب اسلوب اخليه يحنلي خلاص موضوع وإتقفل..وغير المواضيع دي وتعالي نتمشي يلا ناكل ايس كريم .
_ماشي ياست سهيله بتتهربي مني ها ..
‘ابتسمت ‘
دفعوا فلوس الفطار ونزلوا يتمشوا .
__________
علي الجانب الآخر .
___________
_البنت بخُبث وغِل : موافقش وصدني وكلمني بطريقه وحشه اوي .
=مجهول بزعيق: غبيه ،ازاي معرفتيش تلعبي عليه!
_قولتلك صدني أعمل ايه يعني ؟
= هتعرفي هعمل ايه معاكي ،تجهزي هدومك انتي وأمك علشان مش هتقعدي ف الشقه لحظه واحده.
_طب استني انا هعمل اي حاجه انت عاوزها لو حتي عاوزني أقتله هقتله بس سيبني حتي شهر اجمع الفلوس امي هتتبهدل .
=لو جيت لاقيتك موجوده ف الشقه هفضحك وهتبلى عليكي وإنتي مش قدي
_بقله حيله: تمام ماشي .
‘حد بيحط إيدو علي كتفها ‘
قالت بذعر: مين!!!
__________
_مالك ياعائشه !سرحانه ف إيه؟
= مفيش ياماما ،تيتا فاطمه صحيت؟
_لا لسه ،ليه بتتهربي ؟
=أنس مكلمكيش؟
_كلمني الصبح بس وقالي انه كويس ..بتسالي ليه؟
=مفيش عادي فضول مش أكتر .
_فضول بس !ولا خوف عليه !
=لا مش خايفه عليه عشان هو قال انه هينساني ف مش هيتعب عشان حبي يعني ..
_ومين قالك ان اللي بيحب بجد بيعرف ينسى بسهوله حتي لو قال كده! مشاعرنا مش ريمود كنترول نقدر نتحكم فيها نقول لقلبنا كفايه تحب ده ف يبطل يحب ده
= بس انس اول مره يكلمني كده ياماما حسيت انه فاض بيه خلاص .
_كان زعلان من اللي حصل يابنتي،اتقي شر الحليم إذا غضب وانتي ياما اديتيله كلام وهو مصمم يكمل عشانك ،هو انتي بتحبيه ياعائشه؟
=مش قادره احدد انا بحبه ولا متعلقه بيه؟من يوم ما وعيت علي الدنيا لاقيتهُ قدامي يمكن اكون اتعودت علي وجوده جمبي اي مشكله او اي حاجه بتحصلي كنت بجري عليه ويحلهالي يمكن هو كان مصدر الامان ليا مكنتش بخاف منه مكنتش بخاف احكيله اي حاجه بتحصلي حتي لو هيتعصب عليا من غيرته بس كنت ببقي مطمنه انه مش هيقسى عليا مهما حصل ..
=وهو الحب ايه غير امان يابنتي، راجل تتسندي عليه وقت ما الدنيا تميل بيكي،راجل متخافيش وانتي بتحكيله حاجه ل يفهمك غلط راجل مش متسرع ف غضبه ،راجل ميهنكيش ميمدش ايدهُ عليكي ،راجل حنين لين الطبع حتي ف عز زعلهُ راجل ميهونش عليه دموعك تنزل راجل ف عز تعبك يفضل سهران وتعبان عشانك لحد ما تخفي،يقاسمك حزنك قبل فَرحِك،وكل ده موجود ف أنس
_حاسه اني مُزبزبه مش عارفه أخد قرار بس عدم وجوده ف حياتي مضايقني ومخليني مش ف الموود وحاسه إن ف حاجه نقصاني .
=غياب انس يابنتي هيعرفك قيمتهُ
_عارفه قيمته من وهو معايا ياماما .
=هو تعب يابنتي من حقه يعيش حياته حتي لو مع واحده غيرك
_’بدموع متجمعه ف عيونها’ واحده غيري!
=اه واحده غيرك ياعائشه ،وانتي ربنا يرزقك بواحد متكونيش متردده ف تعبير حبك ليه وتكوني متاكده من مشاعرك .
‘سابتها ومشيت ‘ ..
‘عائشه دخلت اوضتها ‘..
__________
بعدها ب ربع ساعه حد بيخبط علي باب اوضتها.
‘مسحت دموعها ‘
_ايوه اتفضل .
= ماما عامله رز بلبن قولت اجيبلك طبق معايا
_’ابتسمت’ والله دخلتك عليا اوضتي تغنيني عن الرز بلبن .
=ابتسم ف خجل”: شكرا شكرا ، المهم بقي ف دموع لسه متمسحتش هنا كده ف جمب عينك.
‘بتمسحها’.
_عاوز ايه بقي ؟
=ما انا قولت جايبلك الرز بلبن .
_ماشي ياسيدي شكرا .
=عفوا ..علي فكره بابا جيه وقالي انه جاب حقي من الواد وابوه قعد يشتم عليه وهيروح يبهدل ابنه
_بجد ،طب كويس جدا.
=قولتيلي لما كنا علي الكورنيش هتحكيلي اللي مزعلك ،ها بقي قولي!
_ انا كويسه متقلقش
=لا مش كويسه .
_انس وحشني يارحيم ‘دموعها تنزل ب إستسلام مقدرتش تتحكم فيها ‘ وحشني أوي وخايفه يكون ضاع مني
=بتحبيه!
_بلاش السؤال ده ،بلاش لإني مش عارفه ،انا عايزاه جمبي ومعايا
=ولو جمبك ومعاكي وخطب هتضايقي؟
_بنبره زعل :يخطب!
=اه يخطب !
_انس هيعرف اصلا ينساني بالسهوله دي ؟
=ولو معرفش وحب يخطب من غير حب هتيجي تمنعيه ؟
_لا مش هقدر امنعه ،بس معقوله يظلم بنت تانيه معاه ،يخطب بنت عشان ينساني بيها؟
=هو حر بقي
_متجيش عليا انت كمان يارحيم بالله عليك
‘بياخدها ف حضنه ‘
بيمسح دموعها ..اللي ف نفس الوقت مؤمن بيمسح فيه دموع ليل لما سمعت الحوار اللي دار بين عائشه ورحيم .
‘مؤمن بيكلبش ايدو ف ايد ليل وبيدخلوا البلكونه ‘
_ممكن تبطلي عياط.
_انا كويسه اهو
=البنت مش عارفه لسه تاخد قرار وانا واثق ان انس عمل الخطوه دي وبعد عن عائشه علشان تحس بيه وبقيمته وان وجودهُ بقي مش مضمون زي زمان والدليل مجرد ما رحيم قالها ممكن يخطب هي ردت وقالت يخطب !يعني احتمال اه يعملها مردتش بثقه وقالت لا استحاله ..تهديد انس ليها اخر مره فوقها وهيخليها مع الوقت تحدد مشاعرها اتجاهه ..
_الاتنين عيالي،مش عاوزه حد فيهم يتإذي ولا ينام موجوع .
=تفائلي خير وان شاء الله هيكونوا كويسين .
_يارب .
=تيجي نشرب شاي بالنعناع !
_ ياااه فاكر ايام ما كنا بنقف ف البلكونه والدنيا بتمطر ونشرب الشاي بالنعناع ؟
=ما تيجي نعيد الذكريات دي ياجميل ياقمر انت !
_وانت اللي هتعمل الشاي؟
=لا انتي عشان مش بتمزج كده غير من الشاى بتاعك.
_عيني حاضر.
=صح تيتا فاطمه صحيت!
_عملتلها شوربه خضار كلت وخدت الدوا ونامت تاني
=ربنا يشفيها يارب اكيد العلاج مخلى دماغها تقيله .
_ايوه ،اجيبلك رز بلبن عقبال ما الشاي يتعمل ؟
=لا هاتي ترمس .
_حاضر ياحبيبي .
_____
شخص من البلكونه المجاوره:ايه ده هو انا شوفت حضرتك فين قبل كده ؟
=مؤمن ب ابتسامه: ايه ده انت دكتور الطوارئ اللي خيط لرحيم إبني امبارح .
_الدكتور بابتسامه: سبحان الله علي الصدف انا لسه معزل هنا النهارده وبصراحه ما صدقت لاقيت شقه ف وسط بيت عيله علشان بيت العيله امان عن اي بيت ،مش عشاني عشان حتي اخويا الصغير اكون مطمن وانا رايح الشغل وسايبهُ
_فرصه سعيده ،لا ده انا هخليه يتصاحب علي رحيم ابني متقلقش عليه خالص،واحنا ف بيت عيله يعني لو حصل اي حاجه يجري علي اي بابا هنفتحله علي طول .
_ربنا يبارك ف حضرتك يارب ..
=يارب ،تعالي اتفضل نعشيك حاجه بقي.
_متشكر جدا لحضرتك لسه متعشي انا واخويا الحمدلله.
=طب تحب اجي اساعدك ف توضيت الشقه .
_الدكتور بفرحه:ربنا يكرمك يارب مُتشكر لحضرتك جدا .
______
رحيم: بطلتي عياط الحمدلله !
_اه خلاص .
=طب انا هطلع ،وانتي كلي الرز بلبن ونامي .
_حاضر ياسيدي
‘بيديها بوسه علي الهوا وبيتغزل فيها’ يااخواتي سكر مسكر كده
=عائشه ب ابتسامه: والله انت اللي سكر .
___________
‘رحيم بمشاكسه’ :ايه يابوب تاكل رز بلبن !
=لو عوزت اي حاجه احنا تحت امرك .
=ايه يابابا بتكلم مين .!
_الدكتور: اذيك يارحيم!
=ايه ده مش انت الدكتور ..!!!
‘بيقاطعهُ’
_ايوه انا .
=حضرتك بقيت ساكن معانا ف العماره ؟
_اه يابطل شوفت الصدفه!
=صدفه جميله جدا ،اتفضل بقي طبق الرز بلبن ده .
_لا والله مش قادر خالص.
=والله لازم تاخدوا
_شكرا يارحيم جدا .
_مؤمن:روح هات طبق تاني علشان الدكتور عندو اخ ولد صغير كده ف سنك .
_بجد!خلاص هنلعب مع بعض
=اكيد هعرفك عليه
_ان شاء الله .
‘بيجيبلوا الرز بلبن وبيديهوله وبيشكروا وبيدخل جوا’..
________
=ليل: هو بجد دكتور رحيم هو اللي سكن ف الشقه!
_اه والله هو
=طب كويس شكله دكتور محترم ،عشان مندخلش حد مش كويس معانا البيت
_اه فعلا هو محترم..المهم ف حاجه كنت مخبيها عليكي
=ليل بخوف:ايه هي!
_انا ..
=انت ايه يامؤمن متقلقنيش.
_انا بحبك ..
“اتنهدت بإرتياح” إخص عليك يامؤمن هو انا ناقصه خضه!
=طب ايه !
_ايه انت !
=مبتحبنيش ولا ايه !
=قالت بخجل:بحبك .
=قد ايه !
_قد حبي للورق العنب .
=قد ايه انتي زوجه عظيمه .
‘بتضحك’.
_رحيم بمشاكسه: وانا عاطف معاكوا
=مؤمن:خلي عندك دم واخرج يابارد .
_واسيبك وتستفرض ب امي؟
“بيضربه ضربه خفيفه بمشاكسه” دي مراتي ياأهبل .
_بردو دي ست الحبايب .
‘بيحضنها ‘
=روح قلبي ده
_روح قلبك ها وانا اللي بحب فيكي بقالي ساعه بتقوليلي بحبك قد ورق العنب .
‘بتضحك’ قلبك أبيض بقي .
_ماشي ياستي .
____________
_انبسط اوي معاكي ياماما ،اليوم كان حلو من بدايته لحد أخروا وحقيقي مودي أتغير تمامًا .
=نكرر ده كل اسبوع ايه رايك؟
_موافق جدا .
=وتكون معانا رودينا .
_تعرفي ان رودينا مفكرتش حتي تسال فيا .
=معلش ياحبيبي انت عارف تلاقيها نايمه طول اليوم .
_عادي ياماما ،المهم اطلعي وسلميلي علي تيتا وانا لما اروح هطمنك عليا .
_ماشي ياحبيبي .
‘بتبوسه وبتحضنهُ’.
خلي بالك علي نفسك.
=حاضر ..
_____________
انس بيروح بيته وبيطمن مامته عليه ،بيدخل الاوضه اللي عبدالله سايبهالهُ ..
_بيبعت مسدج ل ليل ..
_وحشتيني ووحشني حضنك ..
=ليل بلهفه بتجري علي الموبايل لما سمعت الرنه المُخصصه اللي حطاها لمسدجات انس علي الواتساب .
_ردت ب اشتياق وقالت: وانت كمان وحشتني اوي اوي ..
=عائشه كويسه!
_لا ياانس ،انتو الاتنين تعبانين ..
=قال بجمود :هتكون كويسه
‘قفل ومستناش ليل ترد عليه ،كان بيكلم نفسه بصوت مسموع’ لا مش هحِن تاني ،هي مش تعبانه عشاني هي مبتحبنيش انا بس اللي تعبان انا بس اللي بحبها ..هفوق لنفسي خلاص ..هفوق ..هي كلها يومين وتنسي او ليه يومين هي نسيت اصلا وتروح بقي لمازن ولا لمحمد تدريب انا خلاص ..
_صوت بيرد عليه :هتقدر تشوفها مع حد غيرك!
=اصوات انفاسه بتتسارع بيحط ايدهُ علي ودنه بيمنع الصوت ” ششششش ، بس كفايه بس بس .
‘قعد علي الارض مُنكمش زي الاطفال فضل يعيط لحد ما راح ف النوم .’
_____________
بعد مرور يومين
_____
_يلا يابني هنتاخر علي الشغل .
=انس: يابني كنت بلبس الساعه ..
_عبدالله :مااشي يلا .
________
بينزلوا وبيركبوا العربيه بيوصلوا للشغل بعد مرور ربع ساعه .
________
_عبدالله: انس مستر محمد تحت ف الاداره وبيقولي قول ل انس يجيب مفاتيج الخزنه ولو ملقهاش علي المكتب يفتح الدُرج ويجيبها .
=طب ما تروح انت !
_ما هو قايلي اعمل حاجه تانيه يابني ..روح انت وخلي المفاتيح معاك هاجي اخدها منك وشيلها ف الدرج بتاعك علشان بس متضيعش دي مفاتيح الخزنه ومهمه جدا هنروح ف داهيه لو ضاعت ..
_ماشي .
‘عبدالله بيمشي وأنس بيدخل اوضه مستر محمد مدير الشركه اللي شغال فيها انس ، بيدور علي المفاتيح مش لاقيها علي المكتب ،فتح الدرج وقعد يدور لحد ما لقاها وراح مكتبه وحطها ف الدرج زي ما عبدالله طلب منهُ
_______
بعد مرور ربع ساعه ..
صوت زعيق مستر محمد وف دربكه ف الشركه وانس مش فاهم حاجه بس كان ف حاجه ضروريه بيخلصها وكان هيطلع يشوف ف ايه ؟
_عبدالله ل مستر محمد:للاسف انا اللي قاعد علي كاميرات المراقبه وبقولك انس هو اللي سرق المفاتيح .
_محمد ب استحقار: انت بتقول ايه !انس ده ابني استحاله يعمل كده ؟
=يافندم مش معني انه صاحبي اداري عليه ،انس سرقهم وحطهم ف مكتبه كمان تقدر تفسرلي وجوده ف مكتبك وانه بيدور علي المفاتيح وبعدها حطها ف درج المكتب بتاعه .!
_انت كذاب .
_عبدالله بصوت عالي ف الشركه ..انا مش كداب وده الدليل اهو الفيديو انا خدته من علي كاميرات المراقبه اتفضلوا شوفوا اهو ده انس اللي مخدوعين فيه اهو طلع حرامي ..
_الكلمه نزلت علي سمع انس كالصاعقه خرج برا اوضه المكتب بتاعه طلع بيبص علي الموظفين اللي بيبصولهُ نظرات استحقار ..بص ل عبدالله اللي كانت نظراته لأنس كلها كرهه وغل وحقد بص لمستر محمد اللي كان بيبصلهُ نظره كلها بتقول انت خذلتني ..
_انس بتلعثم: هو..هو ف ايه !
=عبدالله بجبروت :ف انك حرامي يا أنس .
يتبع..
لقراءة الفصل الثاني والثلاثون : اضغط هنا
لقراءة باقي فصول الرواية : اضغط هنا
نرشح لك أيضاً رواية وقعت أسيرة في حبك للكاتبة غفران