رواية ولا كان على البال الفصل الرابع 4 بقلم عبير عمر

رواية ولا كان على البال الفصل الرابع 4 بقلم عبير عمر

رواية ولا كان على البال البارت الرابع

رواية ولا كان على البال الجزء الرابع

رواية ولا كان على البال الحلقة الرابعة

الحقيقه اللي انتِ مش عايزه تعترفي بيها انك غيرانه عليه صح؟
لا خالص انتو بس فاهمين الموضوع غلط
انتِ خايفة تقولي يابنتي هو احنا هنمسمها عليكي ذله؟
اه بتمسكوها بس والله لاا الموضوع أكبر من كده أكبر من إن حد يفهمه أصلا!!
انتِ مضايقة عشان ارتبط صح، حقك بصراحه
انتِ كل شويه هتجبيلي سيره البت دي يعني ولا ايه ما يرتبط ولا يتجوزها حتي أنا مالي
طب امسحي دموعك دي بس الاول
ندي أنا مش متخيلة انه اتاخد مني، حاسه انه ابني، بتاعي انا لوحدي، يعني ايه بيحبها يعني؟ حبها امته أصلا عشان يرتبط بيها
هو لازم يكون قالك يعني؟
اومال عارفين بعض بقالنا كل ده عياقه!! جبر خواطر يعني! لقي نفسة فاضي قال يلا اما اعرفها
أيوه بس عادي يمكن اتكسف يقولك
اتكسف يقولي انه بيحب واحده! ده لما بيشتري شراب جديد بيعرفني
خلاص سهلة تعالي نعمل خطه نطفشها ونجوزهولك
ومين قال اني عايزه اتجوزه أصلا!
ياولي الصابرين انتِ عايزه ايه في يومك ده
كنت ماسكه نفسي من العياط بس معرفتش، مش طبيعي نبقي بنحكي لبعض أدق التفاصيل ويجي مره واحده يرتبط، ده حتي مقاليش ياندي مجتش مناسبة يعني ولا ايه؟
نهارك أبيض أومال انتِ عرفتي منين؟
كنت قاعده في المكتب لا بيا ولا عليا لقيت بت صفره داخله بتقولي لو سمحتي هو يحيى فين، قولتلها خير! قالتلي عايزاه في موضوع شخصي، لقيته داخل أول ما شافها وشه قلب ألوان كأني امه وقفشته لقيته بيقولها اتفضلي يا أستاذه ساندي
هو لسه فيه حد اسمه ساندي أصلا
ايوه فين الارتباط برضو؟
هقولك اهو الشيطان لعب في دماغي دخلت عنده علي الانستجرام لقيتها عنده وكاتبه حرف ال y عندها وحاطه قلب وكوكب شغل ٢٠٠٩ والله
ممكن مش هو؟
ايه ناقص الاقيها حاطه صورته خلفية موبايلها، البت أول ما شافته الابتسامه بقت من هنا لهنا مره واحده
وانتِ مسالتيهوش ليه وارتاحنا
معني اني اسئله اني مهتمه وغيرانه عليه وفارق معايا
طب ما دي حقيقه
كدب طبعا ولا فارق معايا
عدي يومين بتعامل معاه معامله العبيد
عبير انتِ تعبانة؟
تعبانة مالي منا زي القرده اهو
أومال بتتعاملي معايا كده ليه، ده انا لو واكل عيالك هتتعاملي أحسن من كده
بتعامل معاك عادي علي فكرة، ساندي أخبارها ايه ياتري
ساندي مين؟
انت هتستهبل.!
معرفش عنها حاجه يعني بس بتسالي ليه؟
يحيى انت مرتبط من غير ما تقولي!
مين قالك؟
يعني مرتبط! وأنا معرفش! عملتها ازاي ده انت قدامي ٢٤ ساعه بتروح تاكل وتنام ووانت بتاكل بتبقي بتكلمني!
حد دخل قطع الكلام فا سابني وطلع
ممكن تبطلي عياط بس والله ما يستاهل كل عياطك ده
بقا ميقوليش! خايف مني يعني ولا خايف عليا، مهو افهمها دي، ندي والله العظيم أدق تفاصيل حياته معايا، أنا رايح انا جيت انا هعمل كذا، ايه رأيك في ده، طب بصي كده دي حلوه؟ كل ده ويوم ما يعرف واحده ميقوليش؟ خايف احسده يعني ولا ايه! ازاي بس وامته!
انتِ اللي مضايقك دلوقت انه ارتبط ومقالكليش ولا انه ارتبط أصلا؟
الاتنين
طب نتكلم بالراحه انت بتحبيه؟
بكرهه ومش طيقاه ولو شوفته مش هرحمه
يبقي بتحبيه
ولا بحبه ولا نيله علي دماغه بقولك بكرهه
طب هي البت حلوة!
انتِ مش ناويه تعدي يومك انتِ التانية النهارده أنا عارفه
والله سؤال بجد يمكن عجبته عشان حلوه
وأنا وحشة؟
قطع لسان اللي يقول كده بس يمكن هو حاطك في دايره انكو اخوات واصحاب وبس!
انا مبعترفش ب الجو الخايب ده بلا اخوات بلا زفت عنده ٣ أخوات بنات حب يخليهم ٤ يعني ولا ايه، عارفه اللي مضايقني ايه؟ ان البت مش استايله خالص، ارتبط بيها ازاي دي
ما يمكن عجباه هو
انتِ معايا ولا معاه؟
معاكي طبعا ايه القرف ده حبها ازاي دي
خير يارب قالبه وشك واصله لحد مكتبي جوه
مبعرفش افرد وشي زي ساندي معلش
انتِ حطاها في دماغك ليه بس!
وأنا احطها في دماغي ليه ربنا يهني سعيد بسعيده
هو كل يومين ترجعي عينك وارمه م العياط دي مبقتش عيشه
أنا اللي غلطانه واستاهل حدوده معايا بعد كده صباح الخير وصباح النور انا اللي اخدته عليا فعلا
بعتلي مسدج بليل ايه رأيك في دول اجيب انهي واحد فيهم؟
وأنا مالي!
من امته وأنا مالي دي؟
من دلوقت تصبح علي خير
خدت أجازه أسبوع كنت بعاقب فيها نفسي عشان أنا اللي عملت فيها كده، وعشان خبا عليا برضو، وعشان ارتبط أصلا، استوعبت ساعتها انه معدش ليا أنا لوحدي زي ما كان بيقولي، ادركت أن كل اللي اتقال مكنش حقيقة، ازاي؟ ازاي حد يداري كل ده، يداري انه بيحب حد تاني؟ عملها ازاي بجد، حبها امته؟ وفين وازاي، حاسه ان دماغي هتنفجر ياندي، لو مكنش في الشغل كان بيبقي معايا بره بنخلص شغل، حتي لما سافرت كان بيحكيلي كل حاجه، عرفها امته بجد؟
عبير انتِ اللي كنتي كل مره بيجي يلمحلك فيها كنتي بتصديه، يحيى أحنا أصحاب بس، راجعة تزعلي ليه دلوقت بقا لما هو قرر يشوف حياته!
معرفش بس متخيلتش ان كل حاجه تيجي بسرعة كده والله
تاني يوم روحت الشغل بكل هدوء معرفش كنت جيباه منين، خلصت و وأنا نازله قابلتهم علي السلم هما الاتنين أول ما شافتني ابتسمتلي بسخافة كده
مش تقوليلنا مبروك؟
مبروك
مش تعرفي علي ايه الاول! علي العموم خطوبتي أنا ويحيى قريب هنستناكي أكيد
مش هنكر اني لوهله اتضايقت ومكنتش عارفة انطق والدموع كانت في عيني خلاص
مبروك يا يحيى أنت تستاهل كل خير، عن اذنكوا
كان واقف جمبها مبينطقش، ولا اللي مضروب علي دماغه ياندي.
أنا شوفت بجاحة كتير وقليل زيها مشوفتش بصراحة، البت عارفة ومتاكده انك بتحبيه وعادي كده يعني!!
روحت يومها وقعدت افكر في كل حاجه ٥ سنين كنا مع بعض في كل حاجه، أعترفت دلوقت اني فعلا بحبة، كنت بحس أوقات اننا اخوات، اصحاب أوي، كنت خايفة ل نتخطب فا اخسره، مكنتش هبقي مبسوطه وهو مش موجود، بس حاليا هو معدش موجود فعلا
لقيت مسدج من رقم غريب
كفاية تفكير فيه هو لو بيحبك كان زمانه ارتبط بيكي من زمان
كنت عارفة إن هي، كانت جت كذا مره قبل كده بس مكنتش بركز معاها ولا كانت في دماغي حتي، حد زي اي حد جي يخلص شغل، سمعتهم في مره حد بيقولها لا عبير ازاي دي عند يحيى حاجه تانيه غيرنا كلنا، مكنتش اعرف بيتكلموا علي ايه ولا فضولي خدني أسال حتي لانها كانت حقيقه فعلا، كنت غير اي حد، في كل حاجه وأي حاجه، الكل كان بيحسدني علي معاملته معايا، وعلي وجوده اللي كانوا مفكرين اني مش مقدراه.
مردتش عليها ومكنش عندي رد ممكن أقوله أصلا، هو اختار حياته واختارها
بعدها بكام يوم لقيت انفتيشن الخطوبة بتاعتهم
هتروحي طبعا؟
اروح فين واروح أعمل ايه؟
أومال عايزاها تقول انك غيرانه! انها خدته منك، معدش غير خطافة الرجاله دي اللي تتكلم؟
مفيش راجل بيتخطف ياندي، هو راحلها بمزاجه محدش غصبه علي فكره.
بس هي عارفه انها خدته منك، وعارفة انكوا بتحبوا بعض ليه شغل قله الادب ده بقا..
كان شكلة زي القمر لابس بدله مظبوطه عليه بالملي، وهي كانت حلوة، كان بيدور علي حد، أول ما شفاني فضل واقف ساكت مش بيتكلم حتي هي لاحظت ده ووقفت زغرتلي
بعدها بشويه قالتله حاجه ووقفوا بعيد عن بعض كان باين انهم بيتخانقوا
بعدها جه وقف قدامي والناس كلها بتتفرج علينا
عبير تتجوزيني؟

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية ولا كان على البال)