رواية شيئ من الخوف الفصل الثاني 2 بقلم رحاب القاضي

رواية شيئ من الخوف الفصل الثاني 2 بقلم رحاب القاضي

رواية شيئ من الخوف البارت الثاني

رواية شيئ من الخوف الجزء الثاني

رواية شيئ من الخوف الحلقة الثانية

وصلت سماء مع سهير بيتها اللي في القاهره، واول ما دخلت معاها كانت عزه بنت سهير اللي اكبر من سماء بسنتين قاعده في الصاله ولما شافت سماء قالت..
عزه
انتي مش قولتي انك رايحه تزوريهم وجايه، جايبه ليه البتاعه دي معاكي..
سماء بحده
ايه بتاعه دي، انا اسمي سمااء يا عزه..
قبل ما ترد عزه زعقت سهير وقالت
جرا ايه يا عزه ما براحه علي بنت خالك اللي خلاص هتعيش معانا وتبقي زي اختك الصغيره..
عزه
نعمم اختي الصغيره وتعيش معانا، لا طبعا انا مش بحب البنت دي خليها تمشي..
سماء بدموع
لو سمحتي يا عمتي كلمي عادل او عمي يجو ياخدوني..
عزه
وانتي مالك ان شاء الله ومال عادل، يا ماما خلي البنت دي تمشي انا مش طايقه اشوفها قدامي..
سهير
ما تخرسي يا بت انتي وانتي يا سماء روحي الاوضه اللي جنب المطبخ دي روقيها واقعدي فيها يا بنتي يلا
سماء
حاضر يا عمتي عشان خاطرك انتي بس….
ودخلت سماء اوضتها وقعدت سهير جمب عزه بنتها اللي كانت متعصبه جدا وقالت..
سهير
انتي ليه ما بتسمعيش الكلام مش انا بقولك اسكتي..
عزه
لا والله بقي جيبالي البت دي هنا وعايزاني اسكت انتي عارفه اني مش بطيقها ولا بحب اتكلم معاها..
سهير
لا والله اومال يعني عايزاني اسيبها قاعده عند عادل لحد ما تاخده منك…
عزه
نعمم ده يبقي اخر يوم في عمرها لو فكرت في عادل..
سهير
خلاص يبقي تسمعي كلامي بالحرف الواحد. يا عزه فاهمه ولا لا وانا هخلي عادل ما يتجوزش غيرك..
عزه
حاضر يا ماما هسمع كلامك، بس انا مش عايزه البت دي تقعد. هنا وتحط راسها براسي..
سهير
فشر هو انا في حد زي بنتي، ده انا هخليها تبقي المرمطون بتاعت البيت هنا بس كله بالهداوه..
عزه
اذا كان كده ماشي يا ماما..
وبالليل كان كلهم قاعدين بيتعشو ومعاهم سماء ونعيم جوز سهير بص لسماء وقال..
نعيم
منورانا يا سماء يا بنتي اوعي تعملي نفسك ضيفه دي بيتك وانتي هنا زي بنتي عزه مش عايزك تتكسفي من حاجه وكل اللي تحتاجيه تيجي وتقوليلي..
سماء
شكرا يا عم نعيم ربنا يبارك فيك يا رب…
نعيم
قوليلي بقي انتي ناويه تدخلي كلية ايه؟..
سماء
انا عملت التنسيق علي كلية تربيه انجليزي..
نعيم
وليه مش طيب او هندسه انتي جيبتي مجموع كبير ده انتي طالعه الاولي علي الجمهوريه..
سماء بحزن
يعني عشان احمم انا حاسه اني هكون احسن في تربيه..
نعيم
ماشي يا بنتي وانا معاكي في اللي انتي عايزاه مش عايزك تشيلي هم اي حاجه…
سماء
شكرا يا عمي والله انا مش عارفه اقولك ايه؟..
بصت عزه لسهير بغيظ وقالت
سماء قومي هاتيلي مايه من المطبخ وحطيلي فيها نص لمونه..
نعيم
وانتي فيكي رجلين سيبي اختك تاكل وقومي هاتي لنفسك اللي انتي عايزااه..
سهير بحده
في ايه يا نعيم ما بالراحه علي البنت، وبعدين سماء اختها وعادي يعني لو طلبت منها حاجه..
وبعدين بصت لسماء وقالت
معلش يا سماء هاتيلها مايه اصلها لما بتقوم من علي الاكل وترجع نفسها بتتسد..
قامت سماء وقالت
حاضر يا عمتي من عينيا…
وراحت سماء جابت مايه لعزه وقعدت كملت اكلها معاهم، وبالليل كانت سماء قاعده في اوضتها ودخلت عندها عمتها وقالت..
سهير
كويس انك لسه صاحيه يا سماء، كنت عايزه اتكلم معاكي شويه..
سماء
اتفضلي يا عمتي انا تحت امرك..
سهير
ما يؤمرش عليكي عدو يا حبيبتي، المهم انا كنت هكلمك علي موضوع الكليه..
سماء
لو سمحتي يا عمتي انا كنت عايزه ادخل تربيه انا مش قد كلية الطب..
سهير
وبصراحه كده ولا احنا قد اننا ندخلك كليات اصلا..
سماء
يعني ايه الكلام ده يا عمتي انا مش فاهمه حاجه..
سهير
الكلام واضح والمفروض انك تاخدي بالك، عمك دفع اد كده عشان يخليكي تاخدي الثانويه ولما لاقاكي لسه مكمله وكليه ومصاريف رماكي عندي وانا بصراحه الكليه الخاصه بتاعت عزه والجهاز بتاعها ومصاريف البيت هما اللي بقدر عليهم يعني لا هقدر ادخلك كليات ولا اصرف عليكي غير في الاكل والشرب لحد ما يجيلك نصيبك ونبقي نشوف بقي هنجيب فلوس جهازك منين..
نزلت دموع سماء وقالت
بس عم نعيم قالي انه يعني ممكن اا..
سهير
عمك نعيم يا حبيبتي طيب وبيقول كلام في الواسع، انما انتي ترضيها يتداين عشان يصرف عليكي..
مسحت سماء دموعها وقالت
لا طبعا، واللي حضرتك عايزاه اعمليه انا فعلا كفايه عليا اني لاقيه بيت يسترني وباكل وبشرب..
سهير
عليكي نور انتي كده فهمتي كلامي كويس،بكره لما نعيم يسالك علي تقديمات الكليه تقوليلو انك مش عايزه تكملي عشان عايزه تقعدي في البيت فاهمه يا بنت اخويا….
سماء بصت للارض وقالت
فاهمه يا عمتي حاضر
وقامت سهير وطلعت بره اوضة سماء اللي فضلت تعيط وراحت وقفت في الشباك وقالت..
سماء
ياارب انت عارف ايه اللي جوايا واللي حاسه بيه دلوقتي وكلتك اموري انا ما ليش غيرك يهون علي قلبي..
وتاني يوم كانت سهير قاعده، وقرب منها نعيم وقال..
نعيم
انتي يا وليه قولتي لسماء حاجه، البنت بدل ما كانت فرحانه بالكليه بقيت رفضاها وبتقولي عايزه تقعد في البيت..
سهير
الله وحده غبيه وكسوله انا مالي، بقولك ايه يا نعيم خلي البنت براحتها وانت طلع نفسك منه الموضوع ده..
نعيم قام وقال
انا سيبهالك وماشي اصلا، رايح اقعد علي القهوه لو احتاجتو حاجه كلموني وهاجي…
سهير
روح يا اخويا بالسلامه والقلب داعيلك..
طلع نعيم بره البيت وندهت سهير علي سماء بصوت عالي وقالت..
سهير
سمااااء يا بت يااا سماء خدي هنا بسرعه..
طلعت سماء من اوضتها وقال
نعم يا عمتي في حاجه ولا ايه؟..
سهير
بصي الشغاله ما جاتش الفلوس اللي كنت بديهالها الفلوس مش هتيجي لتن مصاريف البيت بعد كده هتزيد بسببك انتي وقعدتك معانا، وانا قولت بقي مش هجيبها تاني وتبقي انتي تساعديني في شغل البيت بدل ما تبقي قاعده. واهو تتعلمي عشان تبقي ست بيت شاطره لما تتجوزي..
سماء
حاضر يا عمتي انا اصلا كنت بساعد مرات عمي في اللي وبعرف اعمل حاجات كتيره في شغل البيت كله..
سهير
بجد. طيب يلا وريني شطارتك يلا، امسحي الحمام وبعدين اغسلي ايديكي كويس تعملي غدا لينا وابقي لما تيجي عنه شوفيها عايزه تتغدي ايه وتعمليه وبعدين روقي المطبخ..
سماء
كل ده هعمله انا لوحدي يا عمتي؟..
سهير
دي حاجه بسيطه شغل البيت ساهل اصلا يلا يلا روحي اعملي اللي قولتلك عليه بدل ما انتي قاعده كده…
بصت اسماء للارض وخاقت ترفض هي هتروح فين يعني وعملت كل اللي قالته سهير، وتعبت جدا ولما جات تنام قالتها سهير..
سهير
علي فين دلوقتي يا حبيبتي، انا رايحه الشغل بتاعي تستني يجي جوز عمتك عشان تجهزيله الاكل وعزه لما. تيجي اوعي تزعليها انا بكره اي حد. يزعل بنتي فاهمه..
اسماء بحزن
حاضر يا عمتي…
وسماء من الوقت ده وبقيت شغاله في بيت عمتها، وبتستحمل كلام عزه ورخامتها عليها واتعودت تسمع وتسكت وتقول حاضر ونعم وفي يوم كان عمها رايح عندهم ، ودخلت عندها سهير وقالت..
سهير
بت يا سماء عمك جه بره تعالي سلمي عليه وادخلي علي طول لانه جاي يكلمني في موضوع خاص..
سماء
عمي ده واحشني اووي وانا عايزه اقعد. معاه شويه..
سهير
انتي ما بتفهميش يعني بقولك جاي عايز يتكلم معايا في حاجه خاصه يعني تسلمي وتدخلي جوه علي طول..
سماء
حاضر يا عمتي اللي تشوفيه..
وعملت فعلاً سماء زي ما طلبت منها عمتها سلمت ورجعت اوضتها بسرعه وفوزي سألها وقال..
فوزي
مالها سماء يا سهير دي البت خست النص ووشها بقي دبلان..
سهير
والله مش عارفه ده. انا غلبت اراضيها يا بت يهديكي يراضيكي مالك مش بتتكلم، ده. حتي عزه بتتدخل تتكلم معاها وتقولها يلا نخرج بتزعق فيها وتكسفها وانا بقول معلش تلاقيها بس تغير المكان هو اللي مخليها مش كويسه..
فوزي
ما يمكن طيب زعلانه عشان الكليه هي ليه اصلا ما دخلتش وا..
قالت سهير بسرعه
عشان يحيي اللي خدت بالي منه. ان البنت سماء عينها علي يحيي وبتحبه واللي مزعلها هو بعدها عنه..
ضحك فوزي وقال
يا ستي كلها سنه ويكون يحيي خلص الكليه وانا هخليه يظبط الشقه بسرعه واخليهم يتجوزو، ونخلي عادل وعزه لبعدين لحد ما عادل يخلص كليته ويفتح العياده هنا في القاهره..
سهير
ايوه هو ده الكلام ربنا يريح بالك وقلبك..
فوزي
طيب امسكي الفلوس دي خليهم معاكي او ادي سماء شويه منهم انا مش عايز تكون حاجه نقصاها…
سهير
اخص عليك يا ابو عادل بقي تديني فلوس عشان اصرف علي بنتي…
فوزي
ايه اللي بتقوليه ده. يا سهير، امسكي طيب دول قرشين توسعي بيهم علي نفسك وعلي البنات…
سهير
ربنا يخليك ليا وما يحرمنيش منك ابدا يا حبيبي…
قام فوزي وقال
يلا بقي امشي انا عشان الحق اوصل البيت قبل الضلمه ما تضلم..
سهير
طيب استني نتغدي مع بعض..
فوزي
لا ما انا اتغديت مع نعيم لما روحتله المكتب بتاعه، يلا بقي فوتك بعافيه..
وبعد ما مشي فوزي دخلت سعير اوضتها وكلمت فايزه وقالتلها..
سهير
ايوه يا فايزه جوزك جه ومشي وعملت زي ما انتي قولتي ما خلتش سماء تقعد. معاه..
فايزه
جدعه يا سهير دي لو كانت قاعدت معاه كانت قالتله علي اللي عملاناه انا وانتي..
سهير
جرا ايه يا فايزه هو احنا عملنا ايه يعني، انتي بتحافظي علي عيالك عشان كانت هتخرب بينهم، وانا عايزه آمن مستقبل بنتي..
فايزه
ايوه انتي معاكي حق، علي العموم هو قريب اووي هجيب يحيي وارجعها عندي تاني انا بصراحه بحبها وغاليه عليا وهي وحشتني اووي..
ضحكت سهير وقالت
هههههه لا ضحكتيني والله المحبه يا اختي باينه ومقطعه بعضها..
فايزه
اسكتي انتي مش عارفه حاجه، انا ايوه بحبها بس مش عايزه ولادي يخسرو بعض، ولا عايزاها تبقي اعلي من يحيي في العلام وعشان كده انا سيبتهالك..
سهير
انا المهم عندي تجيبي ابنك وجوزك وتيجو تاخدوها من عندي قأقرب وقت..
فايزه
حاضر بس تجهز الشقه وهنيجي….
وقفلت معاها فايزه وراحت لابنها عادل اللي كان بيذاكر في اوضته ودخلت عنده وقالت..
فايزه
مش هتبارك لاخوك يا عادل؟..
عادل
خير يا ماما هباركله علي ايه ان شاء الله..
فايزه
قال انه عايز يخطب سماء وانا وابوك وافقنا..
عادل بعصبيه
ايه الكلام ده. يا ماما، انتي عارفه وكلكم عارفين ان انا بحب سماء وانا اللي هتجوزها..
فايزه
ابوك هيخطبلك عزه بنت عمتك، انما سماء دي مناسبه لاخوك وهو اللي قال عليها قبلك..
عادل
انا مستحيل اوافق علي الكلام ده.، انا بحب سماء مش عزه ليه بتعملو فيا كده.؟..
فايزه
انت عاقل وهتسمع الكلام لما تتجوز عزه اللي متعلمه تبقي مرات دكتور تبقي لايقه عليه، انما سماء اللي واخده الثانويه مش هتليق بيك هي هتبقي كويسه مع يحيي وهو بيحبها هتكسر قلب اخوك…
عادل
يحيي قالك انه بيحبها يا ماما؟..
فايزه
ايه اللي بيحبها، اخوك لو ما اتجوزهاش يا عادل هيعمل حاجه في نفسه ابوس ايدك. يا ابني بلاش تعمل مشكله ولا تخليني اخسر اخوك…
عادل عيونه اتملت دموع وقال
براحتكم اللي انتو عايزين تعملوه اعملوه..
فايزه
شاطر يا حبيب امك ربنا يخليك ليا وميحرمنيش منك ابدا انت واخوك…
قالت كلامها وطلعت وعادل طلع صورة سماء من بين الكتب بتاعته وقال وهو بيعيط..
عادل
هو انا اللي لازم اضحي بيكي يا سماء عشان اخويا، انا اسف بس مش هقدر اقف في وش سعادة اخويا حتي لو علي حساب نفسي..
ــــــــــــ #بقلم_الكاتبه_رحاب_القاضي ـــــــــــ
_وعدت سنه كامله كانت سماء بتتعرض لكل ما هو ظالم مع عمتها وبنت عمتها، وفي يوم دخلت عندها سهير اوضتها بالليل وقالت..
سهير
قاعده صاحيه ووقفه في الشباك والصبح تقومي بالعافيه…
سماء
نعم يا عمتي في حاجه عايزاني اعملهالك…
سهير
ايوه بكره تصحي بدري وتاخدي شاور وتلبسي حاجه حلوه عشان عمك ومراته جايين يقرو فاتحتك..
فرحت سماء وقالت
هيقرو فاتحتي انا وعادل مش كده؟..
قربت منها سهير ومسكتها من دراعها جامد وقالت بحقد…
سهير
عادل ده عريس بنتي انا هياخد عزه، جايين يا روح امك يخطبوكي ليحيي..
اتملت عيون سماء دموع وقالت؟؟…

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية شيئ من الخوف)