رواية بداية حياتي معاك الفصل التاسع 9 بقلم داليا أحمد

رواية بداية حياتي معاك الفصل التاسع 9 بقلم داليا أحمد

رواية بداية حياتي معاك البارت التاسع

رواية بداية حياتي معاك الجزء التاسع

رواية بداية حياتي معاك الحلقة التاسعة

لينا كانت بتغير هدومها و جهزت عشان تروح مع عمر
في اللحظة دي حست بوجع جامد قي قلبها و صورة ادم مشوشة بيجي في دماغها و مش قادرة تستوعب ولا تفتكر مين الشخص ده صرخت جامد و حبيبة جريت عليها
حبيبة :لينا … ردي عليا مالك
لينا بتتكلم بصعوبة :مش عارفة قلبي بيوجعني اوي و بشوف ناس مش عارفة هما مين
حبيبة :طب انا هنزل اشوف عمر
حبيبة خرجت من الاوضة و نزلت تحت كان عمر و هاجر و اميرة بيفطرو
حبيبة :الحقوني لينا صرخت ووقعت علي الارض و بتقولي ان قلبها بيوجعها جامد
هاجر :يوووه بقا هو كل مرة بتعمل كدا و في الاخر بيكون اغماء بسيط سيبك سيبك
عمر بعصبية :ممكن تسكتي خالص دلوقتي
اميرة :طب يلا يا عمر بسرعة عشان تشوف مالها
____________
آدم وقع علي الارض
كلهم اتخضو عليه
يوسف :خير يا دكتور إبني فيه ايه
الدكتور أعطاه حقنة مهدءة
الدكتور :ابن حضرتك عنده انهيار عصبي من الصدمة و اديته حقنة مهدءة
جاسر :يعني ممكن يفوق امتي
الدكتور :ممكن علي بالليل كدا عشان الحقنة فيها نسبة منوم
حسام :جيب العواقب سليمة يارب
____________
طلعت حبيبة و عمر و اميرة عندها و لينا كانت واقعة علي الارض و ايديها علي صدرها و رأسها بتوجعها
اميرة :مالك يا حبيبتي
لينا :حاسة ان ضربات قلبي سريعة و فيه وجع جامد في راسي
عمر :طب انا هجيب السماعة عشان اكشف عليكي و هجيب الدواء بتاعك
خرج عمر من الاوضة
_________
تقي و ريم كانو قاعدين برة في الاستراحة و دموعهم مش بتبطل تنزل تقي اغمي عليها
ريم :يا طنط تقي اغمي عليها
رحمة جريت علي بنتها :تقي مالك يا حبيبتي يعني مش كفاية آدم و لينا اللي حصلها كفاية بقا يارب اللي بيحصلنا
أسماء والدة ريم :حرام عليكي يا رحمة متقوليش كدا استغفري ربنا
ريم :انا هروح انده دكتور
_________
اميرة : طب اسنديها معايا يا حبيبة تقعد علي السرير
حبيبة :حاضر يا ماما
سندتها حبيبة و اميرة و قعدت علي السرير
_________
ريم بتبص حواليها شافت سليم واقف لوحده و ساند علي الحيطة ريم جريت عليه
ريم :سليم دكتور سليم
سليم بصلها:أيوة يا ريم
ريم :تقي اغمي عليها و مش لاقية اي دكتور يفوقها و يشوفها مالها من فضلك ممكن تيجي معايا انت برضو اكيد تقدر تعمل حاجة
سليم :هي فين
ريم :هناك آخر الممر ده
_________
عمر دخل الاوضة و كشف عليها
عمر :ضربات قلبك سريعة و ده ممكن نتيجة انك اتذكرتي حاجة من الماضي لان راسك بتوعجك انتي بتاخدي الدواء بتاعك كل يوم
لينا :بصراحة لا ساعات مش باخده
عمر بنرفزة :ازاي يعني ماهو انتي كدا مش هتخفي بسرعة
و سرح في خياله لحظات و كلم نفسه :ماهو يا غبي لو افتكرت كل حاجة هتتهد و هتعرف انك سبب تدميرها و ممكن تبلغ البوليس
عمر فاق من تفكيره و بص ل لينا وكانت خافت منه
حبيبة :بالراحة عليها يا عمر معلش اصل انا اللي كنت بديهولها و انا عشان كنت مشغولة عنها الأيام اللي فاتت بالمذاكرة و كدا هي اكيد نسيت
عمر :ازاي يعني يا حبيبة هي مش صغيرة المفروض هي تاخده
لينا :اسفة هبقا أخده
عمر :لينا انا اسف بس انتي متهمليش علاجك تاني
لينا :حاضر حاضر
عمر :طب يلا انزلي افطري عشان نروح و هقدملك
لينا :حاضر
اميرة :يلا يا حبيبتي انا عاملالك الجيلي بالموز اللي بتحبيه انتي و شمس
لينا بفرحة :بجد يا ماما
و بصت في الأرض باحراج و كملت كلامها :انا اسفة كان قصدي اقولك يا طنط بس يمكن قولتها عشان حبيبة و هاجر بيقولولك كدا
حبيبة و عمر نظرو لبعض باستغراب و إعجاب بالكلمة
اميرة قعدت جنبها و مسكت ايديها :تعرفي اني اول مرة اسمع كلمة ماما بالحلاوة و الجمال ده
حبيبة :ايه يا ست ماما يعني مش حلوة مني ولا من عمر ولا من هاجر طب ده كفاية من شمس
اميرة :لا من لينا احلي ولله
حبيبة :الله الله يا لينا ميرو راضية عنك ده انتي محظوظة ولله و عاملالك الجيلي اللي بتحبيه كمان
اميرة : بصي يا لينا انا عارفة انه مش قصدك يا حبيبتي بس ممكن تعتبريني ماما و تقوليها علي طول لحد ما ترجعي لاهلك
لينا بصتلها و سكتت لحظات
اميرة فتحت ايديها ل لينا عشان تحضنها
اميرة :ها يا لينا هتقوليلي يا ماما عايزة اسمعها منك تاني بقا و بعدين انتي خلاص بقيتي زي عمر و حبيبة و هاجر
لينا حضنتها جامد و كأنها كان نفسها في الحضن ده كأنها محتاجاه من ام فعلا
لينا :ياااه حضنك حلو اوي يا
اميرة :يا ايه
لينا :يا ماما …. كأني كنت محتاجة الحضن ده اوي يمكن كان زي حضن امي اللي معرفهاش يمكن حضن بابا اللي معرفش كان عندي بابا و ماما ولا لا
عمر أتضايق من كلامها و حس انه هو السبب في حرمانها من أهلها أهلها اللي هو مش عارف هما مين و في اللحظة دي حبيبة اخدت بالها من عمر و بصتله و اتاكدت هو بيفكر في ايه كانت حابة تلطف الجو
حبيبة :ما خلاص بقا يا ست ميرو جو العشق الممنوع ده و يلا بقا ننزل نفطر كدا هنتاخر و انا عندي سيكشن كمان ساعة
اميرة :يلا يا لينا
لينا :يلا
عمر :طيب انا رايح اوضتي هجيب حاجة لحد ما تفطرو انا سبقتكم
لينا حست انه متضايق لكن مقدرتش تفسر ايه السبب
نزلت لينا و اميرة و حبيبة و كانت هاجر بتفطر
___________
سليم نقل تقي غرفة عادية
سليم بص للمرضة :بصي لو سمحتي ممكن تجيبي الحقنة دي
الممرضة :حاضر يا دكتور هو حضرتك دكتور هنا اصل اول مرة اشوفك
سليم بعصبية :أيوة زفت بس مش هنا انا دكتور صيدلي
الممرضة :اه يا فندم طب هو
سليم قاطعها :انتي هترغي معايا يلا روحي هاتي الحقنة دي
ريم :بالراحة عليها يا سليم هي يعني ذنبها ايه روحي لو سمحتي
الممرضة :حاضر
رحمة :بنتي مالها يا سليم
سليم :عندها اغماء و كمان هي اكيد ماكلتش حاجة و حصلها كدا
رحمة بحزن : و مين فينا داق الاكل يابني دي يا حبة عيني كانت زي الوردة مش قادرة انطقها ولا قادرة اقول ربنا يرحمها
أسماء : معلش يا رحمة ده عمرها انتهي علي كدا من وهي مولودة و ربنا كاتبلها كدا
ريم:ماما اومال فين شهاب
أسماء :شهاب خرج يا حبيبتي و راح شغله
ريم :طب ما روحتيش معاه ليه يا ماما
أسماء :ايه اللي انتي بتقوليه ده يا ريم مستحيل اسيبكم في الحالة دي
في اللحظة دي الممرضة دخلت
الممرضة :اتفضل يا دكتور الحقنة اللي حضرتك طلبتها
__________
لينا انتهت من الفطار هي و حبيبة
حبيبة :طب انا لازم امشي بقا عشان متاخرش علي كليتي عندي سيكشن كمان ساعة الا ربع و يدوب
اميرة :ماشي يا حبيبتي ربنا ينور طريقك يارب
حبيبة باست ايد اميرة :يخليكي ليا يا ست الكل يلا باي بقا … باي يا جوجو … باي يا لولي و ابقي طمنيني عليكي و لا صح انتي مش معاكي فون انا هبقي اقول لعمر يجيبلك فون جديد
هاجر :يجيب ايه يا حبيبتي
عمر في اللحظة دي كان قدامها و خافت وعمر قاطعها
عمر :الباص بتاعك بيزمر برة يا هاجر يلا عشان متتاخريش
هاجر :ها… اه انا كان قصدي يعني تجيبلها فون كويس
حبيبة ضحكت و قالت في سرها :الحمد لله عمر لحق الموقف قبل ما هاجر تعك الدنيا
عمر :اه مانا عارف قصدك يلا عشان متتاخريش و انتي كمان يا حبيبة و يلا يا لينا انتي جهزتي ولا لسة
حبيبة مالت رأسها علي هاجر و وشوشتها :جبتي ورا يعني
هاجر :ملكيش دعوة
لينا :اه خلصت يلا
عمر بصلها من فوق لتحت :انتي رايحة باللبس ده
لينا بصت علي لبسها اللي كان عبارة عن جيبة سادة لونها أصفر بكسرات فوق الركبة بشوية و شيميز بينك و شوز بينك و شنطة كروس بينك و سايبة شعرها العسلي مفرود
لينا :ماله لبسي حلو اوي
هاجر :اه علي فكرة لبسك قصير اوي ده انا نفسي عمر ميرضاش يخليني البس كدا وانا اصغر منك
حبيبة :هاجر ملكيش دعوة يلا عشان الباص بيزمر
هاجر :طيب
خرجت هاجر و حبيبة
و عمر بص ل لينا و لينا فهمت نظراته انها لازم تغير هدومها
لينا :مش يلا عشان منتاخرش
عمر بهدوء:لينا اطلعي غيري اللي انتي لابساه ده مينفعش تروحي كدا معايا
لينا :انا مش هغير يا عمر و بعدين انا لبسي كويس و مش باللبس علي فكرة
عمر :ده كويس يا ماما بذمتك
اميرة :معلش يا عمر خليها يا حبيبي تروح هو شكله حلو عليها
عمر بعصبية :ماما متستفزنيش انتي كمان
لينا:علي فكرة انا مش هغير هدومي يا عمر و انا شايفة ان لبسي كويس
عمر :انتي مش شايفة ان ده قصير اقول للناس ايه اتفرجو علي المزة الحلوة اللي معايا
لينا ضحكت اوي و عمر بصلها و سكتت
عمر :هو انا قولت نكتة بتضحك
لينا :لا مقصدش بس يعني مش باللبس علي فكرة و بعدين هما المفروض يغضو بصرهم
عمر :احنا في مصر حضرتك مفيش حاجة اسمها يغض بصره
لينا :انا مش هغير هدومي علي فكرة وانا ملبستهوش ولا مرة و انت شوفته عليا و احنا في المول و وافقت
عمر :وافقت انتي مصدقة نفسك
لينا :اه وافقت يا عمر يلا بقا
عمر :ما تقولي حاجة يا ماما
اميرة :خلاص يا عمر هي صغيرة يا حبيبي سيبها تعيش سنها
لينا باست اميرة و حضنتها :يخليكي ليا يا ماما ميرو يا جميلة بحبك ولله
عمر :يعني ايه
لينا :يعني يلا بينا يا عمر نمشي قبل ما نتاخر
عمر بخنقة :يلا بس برضو الجيبة دي
لينا شدت الجيبة تحت شوية
لينا :طولتها اهو حلو كدا
عمر ضحك :يلا يا لينا بس مش تنزلي من العربية كتير و تمشي بأدب
لينا :حاضر يا دكتور عمر يلا بقا
عمر :يلا عايزة حاجة يا ماما
اميرة :عايزة سلامتك يا حبيبي ربنا معاكو
__________
ريم كانت قاعدة جنب تقي و بتمسح علي شعرها
ريم :فوقي بقا يا تقي مش كفاية لينا حرام عليكم ولله هو انا ليا مين غيركو
أسماء كانت ماسكة مصحف بتقرا فيه صدقت و اغلقت المصحف
أسماء :مالك يا ريم
ريم دموعها نزلت علي خدها :مش مصدقة يا ماما ولا قادرة أصدق لينا راحت خلاص راحت عند ربنا يعني خلاص مش هشوفها تاني يا ماما خلاص كدا صاحبة عمري ماتت دي اختي ولله ما كانت صاحبتي كانت اختي كأن ربنا سبحانه و تعالي قسمنا لبعض كل واحدة فينا وحيدة مالهاش اخوات بنات كأننا مولودين لبعض عشان نكون اخوات هو بجد يا ماما لينا ماتت يعني انا مش بحلم صح
أسماء :ادعيلها يا حبيبتي هي محتاجة ده دلوقتي
ريم :مش قادرة يا ماما مش قادرة أصدق اني مش هشوف ضحكتها تاني ولا هسمع صوتها ولا شقاوتها و لماضتها مش قادرة أصدق أن خلاص واحدة فينا ماتت
أسماء :يا ريم كلنا هنموت ولله احنا جايين الدنيا دي زيارة و ماشيين
ريم بعصبية :لا يا ماما احنا مش اتفقنا علي كدا اتفقنا ان احنا هنموت مع بعض ولله اتفقنا علي كدا
في اللحظة دي رحمة كانت واقفة علي الباب و سمعت كلام ريم و دموعها نزلت علي بنت اختها الوحيدة
رحمة:مش مصدقة اني مش هسمع كلمة خالتو تاني ربنا يرحمك يا لينا
___________
لينا كانت قاعدة مع عمر في العربية و وصلو المستشفي
عمر :لينا خليكي هنا مش هتاخر ساعة كدا
لينا :ازاي يعني تسيبني في العربية ساعة
عمر :ما هو بصراحة مش هينفع تنزلي بلبسك ده
لينا :مانا معاك و بعدين متخافش محدش هيبصلي بس مش هقدر اقعد هنا و بعدين انت فاكر لما هقعد في العربية حد مش هيبصلي لا ده انا لما هكون معاك محدش هيجرا يبص
عمر :صبرني يا رب …. بس تصدقي اقنعتيني
لينا :شوفت بقا
عمر فتحلها الباب
عمر :انزلي
لينا نزلت معاه و دخلو المستشفي و كل اللي جوة مستغرب مين دي اول مرة عمر يجيب معاه بنت غير اخواته و معظمهم متنحين ل لينا من جمالها و لبسها كان ملفت
عمر بصلهم بغضب :ياريت كل واحد يركز في شغله
كلهم :حاضر يا دكتور عمر
عمر بص ل لينا:عاجبك كدا
و شدها من ايديها و دخل مكتبه بسرعة
لينا :براحة يا عمر ايديا بتوجعني
عمر :هو انا مش قولت الزفت ده ميتلبسش شوفتي بقا كلو مركز ازاي
لينا :علي فكرة هما مش محترمين اصلا عشان يبصولي
عمر :اقعدي بقا لحد ما اشوف كام حاجة هخلصها و راجعلك
خرج عمر و لينا لاحظت مكتوب علي مكتبه مدير المستشفي و لاحظت شهادات كتير علي الحائط
___________
هاجر و سيرين كان عندهم حصة العاب و قاعدين بيتكلمو
هاجر :عاملة ايه مع صاحبك هو كان اسمه ايه
سيرين:مراد اسمه مراد يا بيبي … احنا فاين (كويسين ) يا روحي و هو بيموت فيا اصلا
هاجر :اممممم بس انا مش حاسة كدا يا سوسو خايفة يكون بيتسلي بيكي زي اللي قبله و انتي كمان بتتسلي بيهم
سيرين:يا بيبي لا مراد غيرهم اصلا و هتشوفي
هاجر :طيب الحصة التانية هتبدا و الميس زمانها جاية نكمل كلامنا في البريك
_____________
لينا كانت واقفة بتنظر لشهادات عمر و مندهشة من كمية الشهادات و عمر دخل بعد 10 دقايق كانت لينا ماسكة السماعة و لبست البالطو الأبيض بتاع عمر و بتلعب بالسماعة عمر اندهش من اللي هي عاملاه و ضحك
عمر :سيبي السماعة دي مش للعب و اقلعي البالطو ده
لينا :صورني وانا كدا
عمر :حاضر بس تعرفي شكلك حلو وانتي دكتورة لايق عليكي
لينا :بجد حلوة يعني
عمر :جدا يلا بقا smile حلو كدا عشان اصورك
لينا ابتسمت و عمر صورها
لينا :الله حلوة اوي هاخده
عمر :لا ده بتاع الشغل
لينا:هو السماعة دي بتسمع بيها ايه
عمر :بسمع بيها اغاني
لينا ضحكت :لا بتسمع قلب المرضي استني كدا هحطها عند قلبك و اسمع صوته
لينا وضعت السماعة عند صدر عمر و بصتله و عينه جات في عينيها و كانت مبسوطة أنها سامعة ضربات قلبه
عمر: يلا عشان كلمت خالد و هو هيجيلنا علي جامعة 6 أكتوبر عشان نقدم بس الأول نروح السجل المدني وانا كلمت حد هناك و هيستخرجلنا شهادة ميلاد و بطاقة جديدة باسمك الجديد
لينا :يلا ثواني اجيب شنطتي
_______
ادم طول الوقت نايم كانت جنبوا امه و باباه و خالو و زوجة خالو و جاسر و يمني وكان طول اليوم الدموع نازلة من عنيه وبينطق لينا وهو نايم..
في اللحظة دي موبايل جاسر رن و خرج يرد و يمني كانت عايزة تعرف مين
___________
عمر و لينا وصلو السجل المدني و عمر قابل شخص هناك و كان مفهمه الوضع ان ورقها كلو ضاع
عمر :طب يلا يا لينا عشان تتصوري
لينا دخلت و هي مبتسمة
الظابط :اتفضلي اقعدي
لينا قعدت و هي مبتسمة
الظابط :اسمك ايه
لينا :اسمي لينا
الظابط :تمام يا لينا قومي انتي اتصورتي
لينا:ازاي انت مش قولتلي هصورك
الظابط :لا يا ماما احنا مش في أستوديو
لينا :أيوة بس انت صورتني وانا ساكتة و مش بضحك
الظابط :يلا طيب عشان اللي بعدك يتصور
لينا :طيب
خرجت لينا ل عمر و عمر لاحظ أنها متضايقة
عمر :فين الصورة
لينا :وحشة
عمر :وريني كدا
عمر ضحك اوي
لينا :في ايه يا عمر
عمر :ابدا بس انتي مكشرة ليه
لينا :الظابط الرخم عايز كدا
عمر :وانا كمان كدا حتي بصي
و خرج عمر بطاقته ليها
لينا ضحكت علي صورته لأنه مكشر فيها
عمر :يلا طيب نستخرجهم هو المفروض بتقعدي 15 يوم لكن انتي حالة خاصة
لينا :طيب يلا
________
جاسر :ايه يا نبيل
نبيل :انت عيل زبالة يلا و واطي انت و الواد آدم بتصل عليه مش بيرد ومجيتوش الجامعة ليه
جاسر :معلش يا نبيل
نبيل:مالك يا جاسر صوتك في حاجة هو آدم عرف أخبار جديدة ولا لسة
جاسر :لينا ماتت
نبيل بصدمة:انت بتهزر
جاسر :احنا في المستشفى و لقينا جثتها و لينا ماتت
نبيل :طب آدم عامل ايه طمني
جاسر :آدم في أوضة و متعلقله محاليل و كل شوية ينهار و بياخد مهدءات
نبيل :انت غبي يلا انت ازاي متكلمنيش ولا تقولي هو انا مش صاحبكم و اخوكم
جاسر :يا جاسر اتلهيت في اللي حصل
نبيل :اسم المستشفى ايه
جاسر :مستشفي رأس البر المركزي
نبيل:مسافة السكة و هكون عندك
جاسر :لا يابني انت مش عندك محاضرات
نبيل :يا عم ما تولع ده آدم يعني اخويا
جاسر :انت جدع اوي يا نبيل
نبيل :يلا هكلمك بعدين ….. سلام
__________
عمر وصل الجامعة و خالد كان منتظره في الجامعة و كان في طلاب كتير بيبصو علي لينا و عمر أتضايق لأنه هو اللي سمحلها تيجي كدا
عمر :شوفتي بقا بس العيب عليا مش عليكي عشان خليتك تيجي كدا
لينا :بص مش ده خالد صح
عمر:اه هو بتغيري الموضوع يعني
لينا :ده خالد جاي اهو
خالد :ايه يابني اتأخرت ليه
عمر :ميدان جهينة كان زحمة ما انت عارف
خالد :ماشي …. ازيك يا لينا ايه الحلاوة دي
لينا :بجد الطقم ده شكله حلو
خالد :حلو اوي بس مش ينفع للجامعة
لينا :طيب يلا عشان تقدملي
خالد :طيب خليكو هنا شوية وانا هشوف حد هنا
__________
في المدرسة عند هاجر
سيرين كانت بتتكلم في الموبايل و هاجر قاعدة جنبها و كان وقت البريك
سيرين بتضحك :اي ميس يو بجد يا بيبي……. هههههه بجد هتيجي انهاردة ……. اوكيه يا بيبي مستنياك ….يلا سي يو بيبي
و قفلت معاه
هاجر :هو جاي بجد
سيرين:مراد جاي يشوفني
هاجر :هار اسود يا سيرين افرضي حد شافك
سيرين :يا بيبي نقي الفاظك بعد كدا و بعدين محدش هياخد باله ده من بعيد
هاجر :طيب
_________
خالد كان بيتكلم مع ناس يسهلو الموضوع ل لينا و خرج و وصل عند لينا و عمر
لينا:متقبلتش صح
خالد :للاسف
لينا بحزن:كنت حاسة
عمر :محاولتش تاني ليه يا خالد
خالد خرج من جيبه كارنيه :للاسف اتقبلتي
لينا :بجد يا خالد
خالد :بجد ولله
عمر :ابو شكلك هتفضل عيل طول عمرك
لينا :احلي خالد ده ولا ايه
خالد ضحك :من بكرة تبداءي دراسة تمام
لينا :تمام يا خالد ميرسي اوي
خالد :هتروحو ولا ايه
عمر :اه
___________
يمني :طيب يا انكل انا لازم امشي لان ماما بتتصل و هاجي بكرة ان شاء الله
يوسف :طيب يا بنتي روحي انتي
يمني :لما آدم يفوق خليه يكلمني
__________
تقي فاقت لكن حالتها كانت صعبة و ريم قاعدة معاها
___________
هاجر و سيرين خرجو من المدرسة و استاذنو من الباص أنهم هيشترو حاجات و هياخده تاكسي و هما ماشيين كان فيه 2 شباب في عمر 22 سنة راكبين عربية و ماشيين قريب منهم
سيرين :مراد اهو
هاجر :انهي واحد
سيرين :اللي سائق
هاجر:اممممم طب يلا ناخد تاكسي
سيرين: يلا
_______
لما فاق آدم قام زي المجنون يدور علي لينا ..ويجري في المستشفي كلها نبيل و جاسر حاولو يمنعوه ادم دخل الأوضة اللي فيها الثلاجة ..والممرضين والدكاترة والامن بيجروا وراه يلحقووه ……
________
سيرين كانت قاعدة بتتكلم في الموبايل في اوضتها
سيرين :لا بجد هي عاجباه اوي كدا
مراد :جدا يا بنتي ده وليد هيتجنن و يكلمها بس هي توافق
سيرين :لا قوله فوكك هاجر محترمة و مالهاش في كدا
مراد :يا بيبي نخليها ليها في كدا
سيرين :مراد لا انت مش عارف اخوها
مراد :يا روحي الزن علي الودان امر من السحر جربي مش هتخسري حاجة
سيرين:اوك هحاول
مراد :بس سيبك من وليد و هاجر دلوقتي انتي وحشتيني جدا يعني
سيرين :وانت كمان يا بيبي
_______
نجوي كانت قاعدة في أوضة آدم و هو نايم و بتعيط علي ابنها و بنتها اللي راحت اللي كانت كل حياتها
____________
تاني يوم
ادم كان قاعد علي باب الاوضة اللي كانت فيها البنت اللي شبه اخته .. ومحدش قدر يمنعه.. يوسف راح عنده و قومه و الرائد علي دخل عنده
علي :انا اسف جدا يا آدم اتأخرت عليك بس كنت بعمل تحريات و اشوف مين اللي عمل فيها كدا
يوسف :ها يابني عملت ايه ولا وصلت لايه
علي :الدكتور كشف عليها هي الحمد لله متلمستش بس التشوهات اللي حصلت لوشها دي معناها أنها عملت حادثة و اللي خبطها رماها و طبعا علي ما الريحة ظهرت الناس شموها و بلغو البوليس
في اللحظة دي الدكتور دخل عندهم
____________
صحيت لينا بدري ولبست بنطلون جينز تلجي وعليه بلوزه لونها اصفر وكوتشي ابيض وعملت شعرها ضفيرتين علي جنب و حبيبة حطتلها ميك اب خفيف
و نزلت حبيبة و لينا و كانت هاجر و عمر و اميرة مستنينها على الفطار
هاجر بصتلها من فوق لتحت و اتضايقت ان لينا احلي منها و حبيبة لاحظت كدا
حبيبة :يلا يا هاجر الباص بتاعك ايجا انا ماشية يا لولي عندي محاضرة كمان ساعة و نص عايزة حاجة
لينا :باي يا بيبا
حبيبة :باي يا ماما … باي يا عمر
خرجت حبيبة و هاجر
اميرة:صباح الخير يا حبيبتي ها مستعده للدراسه؟
لينا:ان شاء الله
عمر:خلي بالك من نفسك يا لينا انا هوصلك و لما تخلصي هرجع اخدك لحد ما اشوف سواق يوديكي و يجيبك
لينا :حاضر
وبعد الفطار قام عمر و لينا وخرجوا من باب الفيلا سوا و فتحلها باب العربيه اللي جنبه و أعطاها فلوس
لينا:ايه ده؟
عمر :ده مصروف ليكي عشان لو احتاجتي حاجه
لينا:انا مش عايزه
عمر:وبعدين اسمعي الكلام بقا و بعدين انتي مش معاكي فلوس
لينا :طيب
وقفل عمر باب العربيه و اتحرك وفضلت لينا تبص على عمر كل ما تلاحظ أنه مركز في السواقة
____________
الدكتور: ادم انا مقدر الحالة اللي انت فيهاا بس دا قضاء ربنا كلنا هنموت طبعاا احنا لسة حاطين جثة لينا في التلاجة مش نقلناها ..لغاية ما الوضع يتحسن و تاخدوها و تعملوا اجراءات الدفنة ..
ادم دموعه نزلت : لا هي وعدتني انها مش هتسيبني ونموت مع بعض ..انا عايش ليه دلوقتي عايش ليه
جاسر:لا اله الا الله وحد الله يا آدم
الدكتور :اختك بقالها 3 أيام في التلاجة ولازم تدفنووها ..اكرام الميت دفنه
ادم بعصبية:لينا في التلاجة يعني ايه ..يعني ماتت بجد …يعني اخرتها اروح ادفنها بإيدي ..لييه ياارب بس ..يارب يكون كابوس واصحي منه ..
الدكتور عينيه دمعت علي حالة آدم
الدكتور : ياريت تعمل اجراءات الدفن عشان تستلمهاا عن اذنكم
خرج الدكتور و آدم وضع ايديه علي رأسه حاسس ان كل ده بجد مش قادر يتخيل أنه هيدفن اخته بايديه
حسام :وحد الله يابني لينا دلوقتي عند اللي خلقها عند اللي احسن من اي حد
نجوي :كفاية بقا يا آدم كفاية اللي انا فيه بتوجع قلبي اكتر
ادم:مش قادر استوعب ان لينا ماتت، يمكن لما بنحب حد اوي ونطمن بوجوده أوي منعملش حساب لموته خالص لدرجة لو حصل منصدقش أو نخاف نصدقه كنت بفكر في حاجة قريتها من زمان إنه أي حد بتموت أمه الملائكة بتقوله اليوم مات حبيب فلا حبيب لك بعد اليوم ، لكن في حاجة جوايا رافضة تصدق انه خلاص لا حبيب لي بعد اليوم
نبيل:آدم انت اتجننت لينا مش أمك دي اختك
ادم بعصبية :كانت امي و اختي و بنتي و حبييتي كانت كل حاجة ليا
نبيل :انا اسف يا آدم
يوسف : يا بني حرام عليك نفسك ..ادعيلها بالرحمة ..انا هقوم اعمل اجراءات الدفنة
____________
لينا كانت ساكتة طول الطريق
عمر قطع الصمت :لينا
لينا :أيوة
عمر :بصي بقا من اولها كدا مفيش حاجة اسمها تصاحبي اي حد في الجامعة ولا حتي بنات الا لما اشوفها بنفسي لو حسيت أنها بجد كويسة هخليكي تتعرفي عليها عادي
لينا :ماشي
عمر :اه و متكلميش اي ولد فاهمة
لينا :حاضر يا عمر
عمر :احنا وصلنا
نزلو ودخلت الكليه بتاعتها وعرفها عمر المكان اللي هتدرس فيه اول ماده
عمر:ده المدرج بتاعك و هتخلصي الساعة 1
لينا :اوك
عمر :خدي الفون ده انا جبتهولك و عليه رقمي اول ما هوصل هرن عليكي و تطلعيلي
لينا بابتسامة :ماشي
__________
يوسف دخل عند آدم
يوسف :آدم انا خلصت يابني كل الإجراءات عشان ندفنها
نجوي :يعني خلاص بنتي خلاص مش هشوفها تاني
تقي :عايزة اشوفها يا خالتو قبل ما تمشي عايزة اسلم عليها
ريم :وانا كمان تعالي نروحلها
__________
هاجر كانت خلصت الحصص و مروحة هي و سيرين
سيرين:بيبي ما تكلمي طنط اميرة و قوليلها انك جاية عندي نذاكر مع بعض عايز احكي معاكي في مواضيع كتير اوي
هاجر :طيب هقولها
__________
تقي دخلت عند لينا هي و ريم و اتكلمو معاها كأنها سامعاهم
تقي:لولي …. ايه يا بت خلاص كدا بتخلفي وعدك معايا هو ده اللي هنعيش مع بعض طول العمر
ريم :شوفتي بقا يا لينا انك كدبتي عليا طب مين هيرخم عليا و مين هيغيظني بالشوكليت اللي آدم بيجيبهولك وانا عشان شهاب مش بيجيبلي حاجة
تقي :انا زعلانة منك يا لينا انا عارفة انك سامعاني و حاسة بيا ليه مش بتردي ليه عارفة ان انكل يوسف خلص كل الإجراءات و هندفنك طب ولله حاسة اني بحلم كنت فاكرة ان يوم ما ننقص واحدة هننقص واحدة لما واحدة فينا تتجوز و تلبس الأبيض مش الكفن الأبيض يلا بقا انتي اكيد مش موتي صح قومي قومي يا لينا معانا
__________
سيرين و هاجر دخلو البيت عند سيرين
سيرين :أخيرا بقا طنط وافقت
هاجر :بالعافية يا بنتي
سيرين :قوليلي بقا يا جوجو انتي ليه مش موافقة ترتبطي و كدا زيي
هاجر :انتي اتجننتي يا سيرين انتي عايزة عمر يقتلني
سيرين : وهو اصلا ايه اللي هيعرفه ؟؟؟؟ محدش هيعرف حاجه الا انا وانتي .. وصدقيني انتي اسمعي كلامي وكلمي واحد وهتشوفي حياتك هتتغير ازاي
هاجر : انا اكلم واحد معرفهوش يالهوي .. لالالالالالا ماليش فالكلام دا
سيرين : متعرفيهوش ازاي يا هبله .. دي تعتبر فترة خطوبه وبتتعرفو على بعض وهيجي يتقدملك … وبصراحه كدا احنا لما خرجنا من المدرسه امبارح لما كان مراد حبيبي مستني على اول الشارع عشان يشوفني .. كان معاه واحد صاحبه اسمه وليد وهيموت ويكلمك .. ها قولتي ايه ؟؟
هاجر : بجد ؟؟ عاوز يكلمني ..؟؟ اعجب بيا يعني ؟؟
سيرين : اومال انا بقولك ليه خطوبة وجواز .. وتتعرفو بقى ع النت وكدا وبعدها نتقابل كلنا في مكان عام كدا ونخرج ونعيش حياتنا
هاجر :اامممممم خطوبة
سيرين :أيوة يا هبلة اومال انا بحكي في ايه من الصبح
هاجر :لالالالا يا سيرين انا مش كدا لا مش هينفع
سيرين :يا بيبي ولله جربي بس و انتي ممكن تعجبي بيه و كدا
هاجر :لا بلاش
_________
وآخر اليوم الدراسي عمر اتصل علي لينا و كان مستنيها قدام الجامعة
عمر :ها عملتي ايه انهارده؟
لينا:الحمد لله
عمر:طيب كويس
عمر وصل لينا الفيلا و طلع اوضته و لينا قعدت مع اميرة و حكتلها كل اللي حصل في يومها
___________________
لينا كانت قاعدة في الحديقة و حاسة ان فيه حاجة وجعاها حد بيجي في خيالها مش قادرة تتخيل مين الشخص ده لحد ما قاطع تفكيرها مريم
مريم:الجميلة سرحانة في ايه
لينا :مريم ازيك
مريم :مالك يا لينا
لينا :مخنوقة اوي يا مريم نفسي افتكر وحشتني حياتي اللي اصلا مش فاكراها
مريم ضمتها و حضنتها و طبطت عليها
لينا :حاسة اني هعيش عمري كلو كدا مش فاكرة حاجة
مريم :ممكن تهدي يا لينا ولله هتخفي مع الوقت
لينا :انتي كنتي جاية ل عمر صح
مريم : و جاية اشوفك انتي كمان عمر قالي ان انتي روحتي اول يوم الجامعة انهاردة
لينا :اه
مريم :لينا احنا ممكن نكون أصحاب علي فكرة انا مش عندي أصحاب بنات عمر بس اللي صاحبي و اخويا
لينا بابتسامة:وانا مش عندي غير شمس و حبيبة بس و كدا بقا عندي 3
مريم :بصي بقا مش عايزاكي تتضايقي تاني و تسيبيها علي ربنا
لينا :اوك
_________
ادم قام و كان بيفتح الباب يخرج
جاسر منعه
جاسر : عاوز تروح فين ؟
ادم ببمسح دموعه : اسلم ع لينا قبل ما تمشى ..مينفعش تمشى من غير ما اسلم عليها …
جاسر و نبيل مستغربين من هدوئه
نبيل : طيب انا جاى معاك
ادم بصله : ماشي
جاسر :وانا كمان
ادم دخل الأوضة اللي فيها البنت اللي شبيهة اخته عشان يستلمهاا ….
ودخل شال من علي وشها الملاية وفضل لحظات يبكي ومش مصدق انه خلاص مش هيشوفهاا تاني وباس راسهاا …
ادم حاول يتمالك ويمسك نفسه ويجمع نفسه .. وكان واقف جاسر و نبيل والدكتور والممرضه
ادم : لو سمحت ممكن تخلصلى الاجراءات الورق يعنى علشان نخرج
الممرضه: كله جاهز الاستاذ والد حضرتك خلص الاجراءات
بص علي نبيل و جاسر ومسح دموعه
ادم : ممكن استأذنكم ابقى لوحدى
الدكتور بص للممرضه وخرجوا وقفوا بره و ادم واقف قدام اخته بيحاول يلاحق ع الدموع ال بتنزل من عنيها وع وشه ابتسامه ودموعه نازله وبيمسح فيهم
ادم : لولتي …انتي مرتاحة دلواقتى ..طبعا مبسوطة عند احسن حد في الدنيا بس سيبتنى انا لوحدى .. انا زعلان منك تسيبنى فاجاءه كده من غير مقدمات .. وانا كنت عاوز اقعد واتكلم معاكي كتير واحكيلك علي حاجات كتير اوي وانا ف حضنك زى ما عودتينى ولله يا لينا كنت هاخدك و نسافر الغردقة و هفسحك حتي لو شهر فاكرة اخر مرة شوفتك فيها لما حضنتك كنت خايف اوي و قلبي مقبوض بس مرضتش ازعلك
….(بيمسح دموعه اللي نازله زى المطر )
بيكمل ادم كلامه: دلوقتى انا عاوز اترمى ف حضنك .. اعمل ايه انا بقى ..
انا حاسس انى بردان اوووى .. عاوز اترمى ف حضنك محتاجلك اووى … انا مش هعيط لانك مش بتحبي الدموع بس مش عارفه عينى مالها …
مسك الساعة اووى
ادم :كنت فرحان اوي انك افتكرتيني و جبتيلي الساعة دي بس كان نفسي البسها من ايدك لينا انا عاوزك معايا مش عاوز ابقى لوحدى .. انا بحبك اوووى ومش هحب حد قدك لان مفيش غير لولي واحدة بس … مع السلامه يا لولا عاوز اقولك هتوحشينى اووى لأنك من دلوقتى وحشتينى
كمل ادم كلامه ودموعه بتنزل من عينيه
_________________
عمر قعد مع لينا بعد ما مريم مشيت
عمر :لينا مالك ساكتة ليه
لينا :لا عادي بس حبيبة بتذاكر فوق و مريم مشيت
عمر : امممممم فكرتك متضايقة من حاجة
لينا :صحيح يا عمر
عمر :ايه
لينا :هو انت ازاي صاحب مستشفى وانت شكلك صغير يعني هو انت قولتلي انت كام سنة
عمر :28 سنة
لينا :اصل انت دكتور استشارة و كمان صاحب مستشفي و الدكتور الاستشارة بيكون سنه 40 في الرينج ده مش في رينج 28
عمر :بصي يا لينا انا اصلا كنت قاعد في امريكا فترة و درست المعادلة الأمريكية و حضرتك الماجيستير و الدكتوراه هناك
لينا :اممممممم عشان كدا
عمر :اه و اخد الدكتوراه من جامعة هارفرد في امريكا اما بقا المستشفي دي بتاعة بابا الله يرحمه وانا بديرها
لينا :اممممم طب و ليه عملت كدا
عمر :انا درست 8 كتب كل كتاب 200 صفحة يعني 1600 صفحة عشان أحضر المعادلة الأمريكية و غير كدا انا ولا عملته ده الصح انا اختصرت 10 سنين من عمري
لينا بصدمة:يلهوي 1600 صفحة تذاكرهم و ده امتحانهم 100 ورقة صح
عمر ضحك :لا يا بنتي مش للدرجة ده امتحانهم علي كمبيوتر لمدة 8 ساعات و الحمدلله نجحت فيه
لينا :بس ليه مش عملت هنا في مصر كل ده
عمر :برة مصر مانا قولتلك افضل عشان أختصر 10 سنين من عمري اما بقا درست ليه كل ده عشان في امريكا مش بيعترفو بشهادة مصر كان لازم أحضر المعادلة الأمريكية دي
لينا :اه عشان كدا اخد شهادات اجنبية اصل انا شوفتهم
عمر:طب انا لازم امشي دلوقتي عشان محمد بيتصل و خارجين عايزة حاجة اجيبهالك
لينا :لا ميرسي
عمر :باي
___________________________________
راحوا المدافن ..
و آدم وصحابه و اهله كانو ف دفنتها والكل مصدووم وبيبكي عليها ..
ادم لحد الان مش مصدق ..وكان شايلها ولما ايجو ينزلوها …
ادم طلعها من الصندوق وضع ايدها عليهاا وودعها
…….الكل بيصرخ ويعيط عليهاا
الكل روح ما عدا ادم و سليم..فضلو قاعدين جنبها ..حاولوا معاهم كتير لكن مقدروش عليهم ..
جاسر :يلا يا آدم بقا يلا انت يا سليم طيب
ادم :لا مش هينفع اسيبها
جاسر :طب روح انت يا عمي عشان طنط نجوي تعبانة وانا و نبيل مش هنسيبهم و هنروحهم
يوسف:خليكو معاهم يابني
يمني :طب يا آدم آدم هروح انا بقا
جاسر :ماشي ياريت تروحي لان وجودك مالوش لازمة
يمني :ولله طيب
يوسف مشي هو و نجوى و يمني
سليم :انا مش همشي روحو انتو
ادم :وانا كمان مش هينفع اسيبها
نبيل :مش هينفع يا آدم الليل هنا وحش في المقابر حرام يا آدم
ادم :لينا بتخاف تقعد في الضلمة و هي لوحدها انا مش هيسبها
الراجل اللي بيدفن :يا استااذ قوم بقي حرام عليك ..مينفعش تقعد اكتر من كداا هناا
ادم:مينفعش ليه انا قاعد مع اختي فيها حاجة دي
الراجل:لا حول ولا قوة الا بالله ..قوم ي بني ربنا يهديك ويصبرك ..ادعيلهاا بالرحمة ..
ادم بيبكي بصوت جامد اووي وبحرقة …ويقول: ي ليييينا قومي روحي معاايا بقي..
الراجل :ي بني انت كدا بتعذبهاا..انت روح وتعالي لها تاني ..بس روح دلوقتي دا انت وشك اصفر خالص و بعدين يابني محدش بيقعد في المقابر بالليل يابني حرام ده انا نفسي خايف ده في ناس بتخاف تعدي من جنب المقابر بالليل وانت عايز تقعد هنا
جاسر :يلا يا آدم ربنا يصبرك
نبيل :يلا جاسر اسنده معايا و نركب العربية يلا يا دكتور سليم
سليم قام معاهم و ادم مشي معاهم و وصل الفيلا
____________
بعد ما مريم مشيت لينا قعدت هي و اميرة في الحديقة يتكلمو و كانت ساندة رأسها في حضن اميرة
اميرة :طيب يا لولي انا هطلع انام
لينا :ماشي يا ماما وانا شوية كدا و هنام اومال عمر اتأخر كدا ليه
اميرة :هو اكيد سهران مع محمد صاحبه برة او خارجين
لينا :ماشي يا ماما
طلعت اميرة اوضتها نامت و لينا حست ان دماغها هتتشل من كتر الوجع و التفكير بصت شافت حمام السياحة نزلت الميه كانت لابسة شورت احمر و تيشرت نص كم اسود وفضلت تحت الميه كتير كأنها محتاجه تريح اعصابها من الوجع اللي عندها وطلعت راسها وابتدت تعوم لكن حست انها زهقت خرجت من الميه ولفت الفوطه حوالين جسمها و دخلت عشان تدخل الفيلا لكن لقيت عمر قدامها
عمر:فين ماما
لينا:طلعت تنام
عمر: انتي لازم تنامي بدري عشان الدراسة
لينا :حاضر بس علي فكرة بكرة اجازة الجمعة
عمر ضحك :طيب يلا اطلعي اوضتك تصبحي على خير
وسابها عمر لوحدها ودخل اوضته وهي طلع الاوضة و كانت حبيبة نايمة خدت شاور و نامت
___________
ادم دخل أوضة لينا و فتح الدولاب و بيشم في هدومها و مش مصدق ان خلاص اخته ماتت فتح تليفونها بيبص علي صورهم مع بعض بيفتكر ضحكتها و كأنه شايفها دلوقتي و فتح أغنية :مصطفي كامل (حبيبتي ماتت )
كان بيسمع الأغنية و حاسس أنها حبيبته فعلا مش اخته حاسس ان روحه راحت منه
الأغنية بتقول :
حبيبتي ماتت
ماتت
ماتت حبيبتى ونور عنيا
ماتت اغلى شيىء فى الدنيا
راحت لا خلاص مش راجعة تانى
راحت لا مش هشفها تانى
ماتت الى كانت حب عمرى نبض قلبى روحى
حلمى وكل املى الى كانت
حتة منى ابويا وامى ناسى ودنيتى واهلى وحبايبى
خلاص معتش ليا مكان
خلاص يحرم عليا كمان اعيش بكرة
ادام بكرة هيجى وهكون لوحديا
خلاص هعيش لمين تانى خلاص
خلاص اشتقت يا زمانى لمين هبيع من النهاردة الف رحمة ونور عليا
ماتت
كانت لسة جامبى فى حضن قلبى بنطق اسمى تشوفنى تبكى
زى ما يكون قلبها حاسس بحاجة اخر مرة اتقابلنا
قالت لى كلمة اوعى تنسى انسى اية
هوة فى بعدك سعادة ولسة ما كملناش كلمنا بضم
ايدها لقتها كاتبة حرف وكلمتين فى قلب بتقولى
فيهم افتكرنى ولو وحشتك باقى زرنى
على عينى بعادك عنى يا رب حكمتك يا رب
خلاص معتش ليا مكان خلاص يحرم عليا كمان اعيش بكرة
هيجى وهكون لوحديا خلاص اشتقت يا زمانى لمين هضيع من
النهاردة الف رحمة ونور عليا
ماتت
_________
وقت الفجر
صحي عمر و خبط علي مامته صحاها و حبيبة صحيت هي و لينا و هاجر كانت مكسلة لكن عمر صحاها
و عمر صلي بيهم الفجر و لينا كانت مبسوطة
_______
تاني يوم الصبح
ادم ركب عربيته و اتحرك و لف بيها أماكن كتير كان مشغل اغنية شيرين (كدا يا قلبي ) و بيفتكر لينا
كده يا قلبي يا حته مني
يا كل حاجة حلوة فيا
كده هتمشي وتسبني وحدي
في الحياة والدنيا ديا
يعني ايه
يعني خلاص انا مش هشوفك تاني
مش هلمسك
مش هحكي ليك عن حاجة تاعباني
كنت روحي لما كان جوايا روح
عمري ما اتخيلت انك يوم تروح
مش فاضلي مني غير حبة جروح
مع السلامة يا حبيبي وفي أمان
عمري ما هقول يوم عليك ماضي وكان
عمري ما انسى مهما طال بيا الزمان
في اللحظة دي يوسف اتصل عليه و آدم رد
يوسف:الحقني يا آدم امك بتموت
ادم بصدمة:في ايه ……
__________
عمر و هو داخل الفيلا اندهش لما شاف لينا كانت …….

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية بداية حياتي معاك)