رواية موضوع عائلي 2 (الجميله والشعر الأبيض) الفصل الثالث والعشرون 23 بقلم رحاب القاضي

رواية موضوع عائلي 2 (الجميله والشعر الأبيض) الفصل الثالث والعشرون 23 بقلم رحاب القاضي

رواية موضوع عائلي 2 (الجميله والشعر الأبيض) البارت الثالث والعشرون

رواية موضوع عائلي 2 (الجميله والشعر الأبيض) الجزء الثالث والعشرون

رواية موضوع عائلي 2 (الجميله والشعر الأبيض) الحلقة الثالثة والعشرون

“هذَا هو الفراق الَّذِي كُنَّا نُحَاذِرهُ!”
_في بيت عزيز في القاهره كان قااعد هناك ومعاه واحد لابس بدله وكبير شويه في السن، لكن الشر باين عليه بشكل كبير وزعق في عزيز وقاله…
زيدان
ما ينفعش زكريا يسيبنا يا عزيز احنا مش لسه هنعلم حد شغلنا ويا عرف يعمله يا معرفش…
عزيز
هو انت بعد اللي شوفته ده والحاجات اللي كان واخدها علينا لسه عايزه يشتغل معانا تاني..
زيدان
بس المره دي مختلفه هو لو فكر يلعب بدليه معايا هيروح فيها، عزيز احنا جايلنا كام مصلحه حلوين ومن ناس تقيله اولهم يونس الصاوي وتخيل بقي عاايز يخلص من مين؟..
عزيز بفضول
مين؟..
زيدان بخبث
الواد اللي اسمه يوسف شريكه في كل حاجه..
عزيز
طيب وهنقنع زكريا ازاي بقي، اظن بعد. اللي حصل في مراته واللي عملناه معاه مش هيكون سالك من ناحيتنا..
زيدان
هو فين سيبني انا اتكلم معاه وهعرف اقنعه كويس…
عزيز
اهو متلقح في المخزن تحت، اما نشوف اخرتها يا زيدان…
_ قام زيدان ونزل تحت ودخل اوضه كلها ضلمه وكان زكريا نايم علي الارض واول ما الباب اتفتح قعد وبص لزيدان بسخريه وقال…
زكريا
جاي تخلص بنفسك يا زيدان؟..
زيدان
اخص عليك زيدان حاف كده ده انا حتي قد ابوك، ما علينا انا مش هزعل منك يا زكريا انت زي ابني برضو..
زكريا
عايزين ايه مني تاني؟..
زيدان
ترجع زي ما كنت ما احنا كنا كويسين يا ابني ايه اللي غيرك بس..
زكريا
انا حر ودراعي ما يتلويش يا زيدان..
زيدان
اممم لا يا زكريا ما تفهمهاش كده انت هترجع عشان ما عندكش اختيار تاني، يا ترجع يا تطلع من هنا ميت بأوحش طريقه ممكن تيجي في بالك..
زكريا بجمود
ارجع مراتي الاول وتضمنولي ان ما حدش ليه دعوه بيها فيكم..
زيدان بخبث
البنت اللي من لما ظهرت في حياتك انت اتغيرت وسيبت شغلك عشانها، دي خطر يا حبيبي ولازم نخلص منها هي واللي في بطنها..
_‌قام زكريا بسرعه ومسكه من هدومه وقال بغضب وعيونه مليانه دموع…
زكريا
اقسم بالله لو حصلها حاجه ما هيكفيني فيكو الموت..
زيدان بهدوء
اهدي يا زكريا يا حبيبي اهدي وافهم انت اللي زيك ما ينفعش يعمل عيله ويبقي اب وزوج والكلام ده، وانا قولتلك كده اول ما اشتغلت معايا قولتلك لازم ما تبقاش عندك نقطة ضعف، شوفت لما هي ظهرت في حياتك انت حصلك اي وهي كمان حصلها ايه، انت لو خايف عليها ابعدها عنك واحنا ادينها لاخوها يريحنا منها بطريقته ما رمينهاش في النار يعني…
زكريا بغضب
لما اشتغلت معاكم قولتولي اننا بنقتل ناس بتأذي البلد واننا بنقضي علي الفساد بس من تحت الترابيزه..
زيدان
ولما عرفت اللي فيها كملت معانا بمزاجك..
زكريا
كانت اكبر غلطه..
زيدان
وغصب عنك هتكمل في غلطتك معاك لليل تفكر كويس عشان في عمليه مهمه لازم انت اللي تنفذها..
زكريا بجمود
انسي يا زيدان..
زيدان
فكر يا زكريا بلاش تسرع وافتكر انك مش هتطلع من هنا عايش لو ما سمعتش كلامي..
_ مشي زيدلن وفضل زكريا واقف مكانه ومش عارف يختار ايه، عايز يخرج عشان ينقذ جهاد من جبروت اخوها ولو خرج هيرجع تاني للطريق اللي ماشي فيه ولو رفض هيموت ويسيبها ويسيب ابنه لوحدهم..
_ قد يكون الاختبار صعب ولكن سينجح بهِ من يستحق العوض والجبر🤍🌺
ــــــــــ #بقلم_الكاتبه_رحاب_القاضي ــــــــ
_وفي بيت فيروز كانت قااعده متعصبه جدا علي عكس مامتها واخوها االي كانو مبسوطين من وجود عزالدين واهله…
عزالدين
اومال الاستاذ جمال حمايا فين؟
مها
نزل يصلي العشا وجاي يا الني، قومي يا فيروز اعملي عصير للضيوف.
اتنهدت فيروز بضيق وقامت وقالت
عز بيه بعد اذنك عايزااك في كلمتين..
بص حسن اخوه لمراته وقال
شايفه بتقوله يا بيه مش يا موكوس زي حضرتك.ما بتقوليلي..
مريم بأحراج
اتلمم يا حسن مش قدام النااس..
لميااء بصوت واطي
ومالها يا اختي نافخه نفسها علينا ليه؟..
علياء ردت عليها
انا عارفه دي حتي مسهتنه كده ومعرقبه..
ليلي
اومال انتو كنتو فاكرين انكم هتجيبو واحده زيي تبقي مرات اخوكم التاني انا نسخه نادره، بس البت حلوه برضو شويه..
حسن بغيظ
اتلمي يا زفته منك ليها واحترمو انكم قاعدين في بيتها.. وبعدين احنا ما صدقنا الزفت ده حاله هيتعدل وهيتجوز
علياء
قوم يا عز شوف عروستك عايزه ايه، بسم الله مشاء الله عليها فرعه وحلوه..
عز وقف وقال
هي شجره يا علياء اسكتي وما تتكلميش تاني..
_ وقام دخل مع فيروز المطبخ وقال وهو بيقرب منها بجراءه..
عز
مش عيب اللي انتي عايزاه ده قدام اخواتي يا بيبي..
زقته جامد وقالت
ايه اللي انت بتقوله ده،طبعاً مش عايزااك عشان كده..
عز بغيظ
وعايزاني في ايه يا ابله الناظره؟.
فيروز بحده
عايزاك تاخد اهلك وتمشي عشان ما يبقاش شكلك وحش قدامهم من اللي هعملو فيك لو قعدتو دقيقه واحده تاني..
عزالدين
ايه يا بت قلة الذوق دي، وبعدين ما انا جيبتلك اهلي اهو اعمل لامك ايه تاني عشان تصدقي اني حبيتك وعايز اتجوزك..
فيروز بسخريه
هه عبيطه انا عشان اصدقك ما انت ممكن تكون عملت كده عشان تخليني اصدق اللعبه بتاعتك عليا..
عزالدين بغيظ
يا باااارده يعني هروح البلد اجيب اخواتي واشحتط فيهم كلهم لحد هنا عشان تصدقيني وفي الاخر تقولي كده، طيب اعمل لامك اييه لا حراام امك غلباانه وصدقتني يا حربايه انتي..
فيروز بهدوء
خلاص خلاص انا هصدقك بس عندي شرط واحد..
عزالدين
ايوه بقي هو ده الكلام عينيا ليكي..
فيروز
الخطوبه تبقي تلات سنين..
عزالدين
عند. امك يا روح امك، هو انتي شيفااني عيل مراهق قدامك دا انا داخل علي 40 سنه…
فيروز بصدمه
نعم وكمان فرق السن بينا كبير لا لا امشي احسن..
عزالدين
اولا عندي 36 سنه وانتي يا بايره تلاتين فمش حوار يعني..
فيروز بغيظ
انت تبطل تقولي يا بايره وتبطل تشتمني وسط كلامك انت فاهم ولا لا..
عزالدين
هحاول المهم متنيله موافقه ولا اروح افكرلي في طريقه تانيه اقنعك بيها عشان انا كده كده مش هسيبك يا مفتريه..
فيروز
استغفر الله العظيم ياارب ما فيش فايده في لسانك ده بينقط زفت، وهتنيل اوافق لو وافقت بالشرط بتاعي..
اتنهد بضيق ورد عليها وقال
طيب بصي يا بت الناس انا هعصر علي نفسي غيط لمون بحاله واصبر سنه..
فيروز ببرود
تلات سنين يا تاخد اهلك وتمشي..
عزالدين بحده
في ايه يا وليه ما بالراحه شويه انا ما فيش واحده في حياتي تعبتني قدك، وبعدين ايه تلات سنين دي هنتجوز واحنا بنقدم علي المعاش يعني..
كتمت ضحكتها وردت عليه وقالت
اهو ده اللي عندي..
عزالدين
بومه وذوقي زي الزفت في النسوان انا عارف..
فيروز
نعم بتقول ايه سمعني؟..
عزالدين
انو بقول نقسم البلد نصين احنا نقول تلات سنين وفي اول سنه خطوبه لو اتأكدتي من الحاجات اللي جوايا دي ليكي نتجوز ها؟..
فيروز
استني بس هي ايه الحاجات دي؟..
عز بنفاذ صبر
اللي بيقولو عليها مشاعر دي، المهم موافقه ولا ايه؟..
فيروز ببرود
هفكر وارد عليك..
عز بعصبيه
لا مش هينفع طيب واخواتي اللي بره دول جايين ومتعشمين في دخله واهي رسيت علي خطوبه ولسه كمان مشكوك فيها..
فيروز
قولتلك هفكر مش سلق بيض هو ده جواز وهتتحسب عليا راجل، وحاجه كمان اهلي ما ياخدوش منك ولا قرش بعيد عن الحاجات بتاعت الفرح الاصول يعني..
عز
لا دي حاجه بيني وبينهم انتي بعيده عنها…
فيروز بعند
يبقي ما اعطلكش وما فيش نصيب..
عزالدين
هو انا فلوسي دي لقيها في الشارع عشان اوزعها علي اهلك، كده متفقين اهلك مالهمش حاجه عندي..
فيروز ابتسمت بهدوء وقالت
تمام هفكر وارد عليك، وعشان انا واحده عندي ذوق هطلع اسلم علي اخواتك قبل ما يمشو..
عزالدين بغيظ
واااضح الذوق ده معداش علي بيتكم بالغلط حتي…
ــــــــــ #بقلم_الكاتبه_رحاب_القاضي ــــــــ
_في بيت يونس الصاوي..
كانت قاعده هناء مع اميره مرات محمد ابنها في الصاله تحت…
هناء
خلاص بقي يا اميره مش كل مره تعملي المندبه دي..
اميره بضيق
هو لازمته ايه يسافر هو عشان يجيب ابنه كان استني لحد ما نزلو كلهم..
هناء
يالهوي تاني ما انا قولتلك محمد الفتره الجايه هيبقي مضغوط ومش معاه غير اليومين دول اجازه فقال يسافر يجيب ابنه اليومين دول وجوز امه هيرجع ياخده..
اميره بغيظ
قصدك سافر عشان يشوف حبيبة القلب..
هناء بنفاذ صبر
استغفر الله العظيم يا رب، الله يعينك يا ابني علي ما ابتلاك..
اميره بدموع
كده يا طنط انا ابتلااء..
هناء
ما هي دي مش طريقه يا بنتي، ده بدل ما تكلميه وتطمني عليه وتشغليه كده في كل لحظه لاا قااعده تنكدي عليا انا، وبعدين انا مالي كلميه وقوليلو..
اميره بحزن
براحته بس ما يزعلش بقي من اللي هعمله..
هناء بسخريه
بلا نيله انتي من كلمه واحده منه بتنسي انتي كنتي زعلانه ليه، المهم اوعي اما تيجي عظيمه تتكلمي قدامها كده وتقطعي في جوزك،وما تتكلميش معاها اصلا ويبقي لا بينكم كلام خالص اخرها صباح الخير يا جاري انت في حالك وانا في حالي. ..
اميره
حاضر يا طنط هناء، هي فين صح وشهد كمان مش موجوده..
هناء
راحو يشوفو بنت عظيمه وجايين..
_في الوقت ده بره البيت نزلت شهد من العربيه وهي بتكلم يونس في الموبيل ومش بيرد عليها، وراحت مسكت ايد عظيمه عشان تساعدها تنزل..
عظيمه
معلش يا بنتي تعبتك معايا، انا عايزه اقعد معاها والله بس هشيلها همي الصحه خلاص ما بقيتش زي الاول..
شهد بهدوء
هنا بيتك وهناك بيتك يا طنط واحنا هنا كلنا تحت امرك..
عظيمه
جدعه يا شهد وبنت اصول، بقولك ايه انا عايزااكي تقولي الكلام ده علي طول قدام هناء اللي عامله فيها ام يونس بس لا انا بحبه اكتر منها هو ابني انا..
شهد
حاضر يا طنط عظيمه…
عظيمه
اصلا هي ايه اللي جايبها هي وابنها، بقي حلو يونس دلوقتي لما ربنا كرمه..
شهد
ما هي ابنها برضو ربنا كرمه يا طنط وبقي مشهور اووي..
عظيمه
مهما عملو عمرهم ما هيبقو زي يونس ابداً..
شهد وهي بتبص في موبيلها
هو ده في حد زيه اصلا…
_ ودخلو جوه وراحو قعدو مع هناء واميره..
شهد
معلش يا جماعه اتأخرنا عليكم..
اميره
لا ولايهك المهم بطه عامله ايه مش كويسه دلوقتي..
ردت عليها عظيمه وقالت
بنتي زي الفل يا حبيبتي وجوزها جنبيها ومش ناقصها حاجه..
قامت هناء وقالت
هو احنا نكره انها تبقي كويسه يا عظيمه بالراحه يا اختي علي نفسك..
عظيمه
هو انتو هتمشو امتي من هنا اصلنا بنحب نقعد علي راحتنا في بيتنا..
ضحكت هناء وقالت
وانتي مالك محمد ابني جاي يقعد مع اخوه مالك انتي يا مرات ابوه..
وقفت اميره وقالت
خلاص يا طنط بقي هو مش انتي كنتي رايحه تنامي ما يلا اطلعي..
شهد
هما الولاد فين؟..
اميره
اخدو عائشه وطلعو يلعبو فووق..
شهد
طيب تعالي يا اميره نروح نقعد معاهم فوق..
اميره بصوت واطي
وهنسيبهم لوحدهم هنا..
شهد
ما انا بصراحه مش ناقصه خناق ودول ما بيتهدوش..
_وطلعت اميره مع شهد فوق، وهناء قعدت مكانها تاني وحطت رجل علي رجل وقالت بخبث لعظيمه…
هناء
اوعي تفكري تقلديني وترفعي رجلك احسن ما تقدريش تحركيها تاني بعد كده من الخشونه..
عظيمه بهدوء
لا هو انا هحركها عادي بس وانا بقلع اللي في رجلي وانزله عليكي يا وليه يا عقربه..
هناء
ليه كده بس يا عظيمه ده انا حتي بحبك انتي بس اللي علي طول متكاده مني، بس انا مقدره زعلك ما هو صعب برضو علي الست انها تعيش عمرها كله مع راجل بيحب واحده غيرها وفي الاخر الواحده دي تبقي في وشها علي طول..
قامت عظيمه وقفت وقالت
الله يرحمه سوا كان بيحبني او ما بيحبنيش ما حدش شاف حنيته ودلعه غيري، تصبحي علي خير يا هناء..
_ قالت كلامها وسابتها قاعده متعصبه ومشيت، وهناء فلضت تهز رجلها بغيظ وقالت..
هناء
اخص عليك يا حامد ودي كان عاجبه فيها ايه دي كمان بس اما اجيلك،لا بعد الشر عليا انا ان شاء الله هدخل الجنه…
ــــــــــ #بقلم_الكاتبه_رحاب_القاضي ــــــــ
_ في بيت يوسف اول ما مشيت عظيمه وشهد دخل عندها وكانت قاعده علي السرير وشكلها مدايق جداً، راح قعد جنبيها وقال..
يوسف
هو انا زعلتك في ايه عشان تطلبي الطلاق مني؟..
_بصتله بقلق وسكتت ما ردتش عليه، حاول هو التحكم في اعرف اعصابه وتابع كلامه..
يوسف
محسساني ان انا اللي قولتلك روحي اعملي العمليه وانا اللي كنت بزن عشان نجيب ولاد، هو مش انتي اللي اختارتي بتعاقب ليه علي اختيارك انا؟!..
ردت عليه بدموع وقالت
بالعكس ده انا بخلصك من انك تتحمل معايا نتيجة اختياري، انا مش هقدر اكمل معاك وانا السبب في انك تتحرم من حاجه من حقك..
يوسف بجمود
طيب وانتي فاكره اني لما هطلقك لو حصل يعني اني هروح اتجوز واقدر اعيش حياتي عادي، هو انتي فاكره اني هقدر اعيش من غيرك اصلا..
بطه ببكاء
انا عايزه انام مش عايزه اتكلم..
مسك ايدها جامد وقال بحده
مش هتهربي المره دي غير لما نخلص كلامنا…
بطه
نعم عايز ايه…
يوسف
انتي اللي عايزه ايه وما تقوليش طلاق عشان مش هيحصل يا بطه..
بطه بحزن
مش هينفع اكمل معاك هكون انانيه، انا بجد حاسه اني خلاص ما بقيتش كامله في نظرك وديما هحس بالذنب وهحس اني وجودي معاك ظلم ليك، اللي بيحب حد يا يوسف بيتمني راحته وانت راحتك مش هتكون معايا انا مش هعرف اكون كويسه معاك بعد كده ومش هعرف اخليك تبقي مبسوط….
يوسف بجديه
ولو بقيت اب وخلفت انتي هتكوني مرتاحه..
نزلت دموعها بألم وردت عليه
ايوه بس واحنا بعيد مش هتحمل اشوفك متجوز وانا معاك..
يوسف
هتجوز عشان اخلف وبس وبعد ما ده يحصل هطلقها وقبل ما تفكري اني هعمل كده مع واحده غصب عنها لا كل حاجه بالاتفاق..
بطه بصدمه
اتفاق هو انت اتفقت؟…
يوسف
ايوه عشان كنت عارف انك هتعملي الحوار اللي احنا فيه ده…
بطه بحزن
واتفقت علي ايه يا يوسف ومع مين؟..
يوسف
واحده في نفس ظروفي نفسها تبقي ام وخايفه تتجوز او مش جاهزه، فأتفقنا نتجوز عشان نجيب طفل وبعدين كل واحد يروح لحاله وتبقي علاقتنا كويسه..
بطه بدموع
مين دي؟..
يوسف بتوتر
دارين..
بطه
دارين اللي كانت حاطه عينها علي يونس، هي اللي طلبت منك كده ولا انت؟..
يوسف
انا وهي عندها شرط انك تكوني موافقه، ولو انتي مش عايزه خلاص هلغي الحوار كله..
بطه بسخريه
لا والله بعد. ما اتفقت ورتبت كل حاجه..
يوسف بعصبيه
هو انا اعملك ايه يعني عشان. ارضيكي يا بطه؟..
بطه بهدوء
ولا حاجه كمل في الاتفاق اللي انت عملته واعتبرني موافقه..
يوسف بقلق
والله العظيم هيكون مجرد وقت، بس لو فكرتي تسبيني انا لا هتجوز دارين ولا غيرها، انا اهو هتجوز واحده مش بحبها عشان اقدر اعيش معاكي من غير متت تكوني حاسه انك ظلماني او تحسي بتأنيب ضمير..
بطه بهدوء
فاهمه وانا كده هكون مرتاحه فعلا، ممكن تعملي حاجه اكلها بجد. جعانه…
ابتسم بهدوء ورد عليها
بس كده من عيني انتي تؤمري..
_وطلع فعلا عشان يطيبلها اكل، وهي فضلت تعيط بحزن والم وضعف انها مؤتره تتحمل انه يتجوز عشان يجيب الطفل اللي هي ما قدرتش تجيبه واتحرمت منه طول عمرها…
ــــــــــ #بقلم_الكاتبه_رحاب_القاضي ــــــــ
_وفي بيت عمار المنشاوي….
كان يونس قاعد هناك معاه وعمار كان في قمة عصبيته..
يونس
طيب بالهداوه كده ما نروح نجيب اخوك ونقلبها الي دماغهم لازمته ايه اللف والدوران..
عمار بجمود
هو انا لو عايز اعمل كده كنت هجيبك انت ليه يا يونس، لو عملت اللي انت يتقول عليه ده اخرها خناقه وكام رقم رصاصه وبعدين هما هيسيبوه في حاله، انا عايز اخلص منهم خالص..
يونس
والله اخوك ده يعني مش عارف اقولك ايه بس دي نتيجة اللي كان بيعمله اصله ما كانش دكتور يعني..
عمار بضيق
فااهم بس هو ما ينفعش تحصله حاجه وانا ما ينفعش اسيبه، ومتاكد ان اللي حصل ده هيخليه يفوق لحاجات كتير..
يونس مسك موبيله اللي بيرن وقال
زيدان بيكلمني؟..
عمار بأهتمام
طيب رد. بسرعه يلااا..
رد يونس وقال
ايوه يا زيدان بيه معاك..
زيدان
ايوه يا يونس بيه انا في انتظارك في المكتب بتاعي مش هينفع نتكلم في التلفون..
يونس
تمام انا هجيلك ابعتلي بس العنوان، واجيبلك الفلوس ولا ايه؟..
زيدان
لا لا مش دلوقتي احنا هنتفق…
يونس
تمام بس المهم زكريا المنشاوي هو اللي ينفذ انا مش عايز اي غلط…
زيدان
قولت لحضرتك ما بنفعش الكلام علي الموبيل انا في انتظارك…
قفل معاه زيدان ويونس قال لعمار
حويط اووي ابن ال… هنعمل ايه؟..
عمار بتفكير
روحلهم وصمم انك تشوف زكريا الاول وتتفق معاه…
_قبل ما يرد عليه يونس موبيل عمار رن برقم مروان، فرد عليه عمار بسرعه وقال..
عمار
ايوه يا مروان وصلت عند جدك..
مروان
ايوه يا بابا بس جدو بيقولي ان عمي خرج هو ومراته والاتنين ما رجعوش..
عمار بقلق
يعنب اخدو عمك ومراته كمان معاه…
مروان
تقريباً حاجه زي كده، المهم انا هقفل واروح لجدو عشان هو عمال يحقق معايا وحاسس ان في حاجه..
عمار
ماشي وخلي بالك منه يا مروان…
قفل عمار معاه ويونس سأله وقال
في ايه؟
عمار
زكريا مراته كانت معاه، بس الواد بيقولي انه شاف زكريا بس معاهم ما كانتش مراته ولو كانو سابوها كانت رجعت عند. ابويا..
يونس
قصدك انهم عملو فيها حاجه؟..
عمار
زكريا هو اللي يعرف واحنا لازم نوصله في اقرب وقت ممكن..
يونس
تمام انا هروح دلوقتي لزيدان وانت هتعمل ايه؟..
عمار
مش هينفع نستني دلوقتي خالص…
يونس بحماس
برغم صعوبة الموقف الا اني مشتااق للاكشن…
_بصله عمار بنفاذ صبر وقبل ما يرد عليه موبيل يونس رن وكانت شهد فبعد عنه يونس شويه ورد عليها وقال..
يونس
ايوه يا شهد نعم؟..
شهد
انت فين كل ده ومش بترد علية ليه؟..
يونس
عندي شغل يا شهد مش فاضي..
شهد
انا كلمت يوسف وقالي انك مش فس الشركه، ممكن تقولي انت فين؟..
يونس بعصبيه
خلي يوسف يقولك بقي…
_ قالها كده وقفل في وشها وراح لعمار اللي قاله بكل ثقه وثبات..
عمار
انا عارف اني ممكن اكون بورطك معايا بس انا ما فيش حد. ممكن اثق فيه ويبقي جدع معايا غيرك..
يونس
وانا معاك في اي حاجه برغم اني مش طايق اخوك، بس انا حاسس بيك وعارف يعني ايه يبقي اخوك في خطر انا لو يرجع بيا الزمن كام سنه لورا عمري ما كنت هبعد عن اخواتي لحظه وخصوصا اخويا مازن الله يرحمه اللي ما عرفتش احميه ولا انقذه من اللي حصله..
عمار بهدوء
يبقي اتفقنا وانا مش هنسي وقفتك دي جنبي، علي العموم خليني اقولك هنعمل ايه..
يونس
استني بس انت عشان جو ولاد. الناس المتربين بتاعك ده مش هياكل مع الناس دي، اسمع اللي انا هقولك عليه وتنفذه انت معايا لو عايز اخوك يرجع..
_تفتكرو ايه اللي هيخطتلو يونس؟…
ــــــــــ #بقلم_الكاتبه_رحاب_القاضي ــــــــ
_ في بيت جميله..
كانت قاعده في الصاله ومعاها ايتن اللي بتتفرج علي التلفزيون، ومسكت جميله موبيلها وبعتت رساله صوتيه لعمار وقالتله..
جميله
ازيك يا عمار عايز ايه، اا ممكن اشوفك؟..
بعتتها وقالت لايتن
رساله رخمه صح انا همسحها وابعت غيرها..
ومسحتها فعلا وبعتت رساله جديده بتقوله فيها
عمار انا لازم اشوفك ضروري..
ايتن
علي فكره دي ارخم من اللي قبلها..
جميله بضيق
مسحتها اهو ابعت ايه طيب..
ايتن
تكون رساله كده فيها احساس يشوفها كده تخطفه تخليه ينسي الدنيا ويكلمك..
جميله بعدم فهم
ابعت ايه يعني ما فهمتش برضو..
ايتن بغيظ
ياارب صبرني هو حبك ازاي ما حقه يهرب، يا بنتي خليكي متأثره وانتي بتبعتي الرساله بلاش طريقة العساكر بتاعتك دي فين الانوثه..
جميله ببكاء
في الصيانه بقالها حبه يا اختي…
ضحكت ايتن وقالت
طيب اسمعي كلامي وابعتي ريكورد كده يبان فيه صوتك وانتي متأثره وزعلانه وعايزه تشوفيه هو مش هيرفض وقتها يلاا..
جميله بقلق
طيب هحاول اسكتي بقي..
جميله بجديه
عمار انا لازم اشوفك عشان في مشاكل معايا في الشغل ومحتاجه لرئيك فيها..
وبعتتها وقالت لايتن
ايه رئيك جباره صح؟..
ايتن بحده
انتي يا بنتي عبيطه يعني يوم ما تكلميه تقوليلو عايزااك في شغل ده انتي لو عايزااه يعملك بلوك مش هتبعتي الرساله دي..
جميله بضيق
ما انا مش عارفه اتكلم بجد. ولا عارفه اقوله ايه..
ايتن
_خدي نفس عميق وابعتي رساله باللي جواكي ليه كده هتوصله بجد وهيتأثر بيها والاشواق هتعود وكده بقي…
جميله بضيق
طيب اسكتي انا مش عايزه اقابله اصلا خلاص…
ايتن
خلاص براحتك اصلا هو ممكن ما يردش عليكي مروان قالي ان في مشكله مع عمه وهو وباباه بيحلوها ومش هيكون فاضي.
جميله
طيب انا داخله انام عشان بكره هروح الصبح بدري مع خالك الشركه..
ايتن بسخريه
خالي اااه خالي بقي يحبنا فجأه ومهتم بينا لما بقينا اصحاب املاك..
_ ما ردتش عليها جميله ودخلت اوضتها وبرغم انها كانت عارفه ان خالهم بيقرب منهم وبيساعدهم عشان معاهم فلوس دلوقتي الا انها قررت تاخد كل حد علي قد عقله، واول ما نامت افتكرت عمار تاني، ومسكت موبيلها.. وفتحت الريكورد وبدون اي تمثيل قالت بدموع..
جميله
انا مش عارفه اقولك ايه وممكن يكون كلامي دلوقتي تقيل عليك، بس انا محتاجه اشوفك ضروري واتكلم معاك…
_بعتت الرساله وما وصلتوش لانه كان قاافل، اتنهدت بضيق ومسحتها تاني وقررت انها مش هتبعتله حاجه…
ــــــــــ #بقلم_الكاتبه_رحاب_القاضي ــــــــ
_ وفي بيت مجدي فضلت جهاد محبوسه في الاوضه اللي حبسها فيها اخوها ومعاها عماد، وكان في جرح في ايدها مش مبطل ينذف..
قرب منها عماد وقال
فكي الطرحه اربطهالك علي ايدك عشان تبطل نذيف..
مسحت دموعها وردت عليه
لا مش عايزه..
عماد
علي فكره ده خطر عليكي وانتي حامل تقريباً يعني..
_ خافت فعلا ليتأذي طفلها وفكت الطرحه بتاعتها بسرعه وحاولت تربطها علي ايدها لوحدها بس ما عرفتش، مسك عماد ايدها واخدها منها وربطها هو بطريقه كويسه وقالها بهدوء..
عماد
كده ان شاء الله النذيف هيقف، هو ايه اللي حصل لزكريا وازاي يسيب مجدي ياخدك منه؟..
ردت عليه ببكاء وخوف
الراجل اللي جه مره الشقه عندك اللي اسمه عزيز كان معاه ومعاهم رجاله كتير وفضلو يضربو فيه، هو اي علاقة زكريا بالراجل ده اصلا؟..
_دخل في الوقت ده مجدي وهو معاه طبق فيه اكل ورد عليها بخبث وقال..
مجدي
ايه ده هو انتي ما تعرفيش جوزك شغال ايه؟..
عماد بقلق
اسكت يا مجدي ما تقولش حاجه..
جهاد بخوف
هو في ايه؟..
مجدي بسخريه
في انك متجوزه قتال قتله، حامل وشايلع في بطنك ابن واحد كان بيتأجر عشان يقتل الناس اطفال وستات ورجاله سفاح يعني..
اتملت عيونها دموع وقالت
لا لا هو بيكدب يا عماد صح، زكريا كويس ومن عيله كويسه اكيد لا..
عماد بضيق
والله العظيم هو تاب، هو قالي انه هيتغير عشانك وعشان ابنه..
مجدي
يا حرام قلبي الضعيف اتأثر، هو المجرم ده بيحس اصلا..
عماد بغضب
كفايه بقي انت ايه ما بتحسش…
مجدي
لا واترزع علي جنب انا جاي اتكلم مع اختي حبيبتي شويه عشان نخلص من الحوار ده…
قعد مجدي قدامها وقال
كلي يا حبيبتي يلا عشان النونو يلاا..
بصتله بخوف وما ردتش عليه، فضحك هو وقال
هههههههه اوعي تكوني فاكره اني هحطلك سم في الاكل واخلص منك بسهوله كده، انا مش هرحمك. يا جهاد بموته ساهله كده كلي يلاا..
_مسكت الاكل غصب عنها بخوف وقبل ما تاكل منه مسك عماد ايدها واخد الاكل اللي في ايدها واكله هو الاول وبعدبن ابتسملها وقال..
عماد
كلي الاكل ما فيهوش حاجه..
_ اكلت جهاد سندوتش واحد من اللي كانو في الطبق لانها فعلا كانت جعانه، بس نظرات مجدي ليها كانت بترعبها وقال بهدوء..
مجدي
عندك اختيارين يا جهاد يا تتنازلي انتي واخوكي عن ورثكم كله ليا..
بص لعماد وقال
يا انت يا حلو هتشرف في السجن معايا بس انت لاخر عمرك بأي مصيبه هلبسهالك..
وكمل كلامه لجهاد وقال بحقد
وانتي بقي يا مدام جهاد ورحمة امي لو ركبتي. دماغك اكتر من كده لهخليكي هنا لحد ما تولدي بس بعد ما تولدي علي طول انا هموتلك ابنك قدام عينك وهوريكي عذااب عمرك ما شوفتيه..
_حضنت بطنها بأيديها وبدأن تتنفض بخوف وبكاءها زاد، وهو ابتسم بانتصار وقال…
مجدي
حلو كده خافي عليه بقي عشان اخليكي تغوري من هنا، بكره الصبح المحامي هيجيب كل الورق المطلوب عشان تتنازلو وبعد كده اللي هسمع عنه بس هقتله لانكم اكتر اتنين بقيت بكرهم في حياتي..
_ قال كلامه وقام وسابهم وطلع وقفل عليهم الباب تاني، بصلها عماد بحزن وما عرفش يعمل حاجه قدام جبروت اخوه وقال بدموع..
عماد
تعالي نتنازل انا مش فارق معايا حاجه اصلا بس عشانك انتي هو مش هيسيبك في حالك..
جهاد ببكاء وخوف
حح حاضر..
ــــــــــ #بقلم_الكاتبه_رحاب_القاضي ــــــــ
_ وفي الوقت ده وصل يونس لوحده للمكان اللي موجود فيه عزيز وزيدان، نزل من عربيته وكان داخل جوه بس وقفه اتنين حراس وقالولو..
الحارس
جاي لمين؟..
يونس
يونس الصاوي واسأل اللي مشغلك انا جاي لمين..
رد الحارس التاني وقال
طيب اتفضل زيدان بيه في انتظارك..
_ دخل يونس جوه وكان مكان شبيه للملهي الليلي بل وابشع من ذلك، ولقي زيدان قاعد هناك مستنين وقاله..
زيدان
اهلا اهلا يا يونس بيه نورت المكان؟..
يونس بسخريه
والله انا شوفت شكل المكان من بره فكرتكم بتحفظو قرآن هنا…
ضحك زيدان وقال
هههههههه اصله ده مكان خااص جداً، مش بيدخله غير الناس بتوع المزاج الرايق تعالي بقي اعرفكم علي اللي هيجيبلك من الاخر في موضوعك..
يونس
تمام يلا بينا..
_ دخلو مكتب عزيز وقعدو قدامه وقال يونس بكل ثقه..
يونس
هو فين زكريا المنشاوي انا جاي وعامل حسابي عليه هو زي ما سمعت ما حدش بيخلص غيره..
عزيز
طيب. مش نتفق الاول..
يونس
اشوفه الاول هو مش المفروض اتأكد انتو معاه ولا لا.؟..
عزيز
هو اللي معانا واللي قالك ده مقالش ان الاتفااق بيكون معايا انا وانا بديه هو التعليمات..
يونس
الموضوع حساس يا بيه فانا مش هتفق علي حاجه غير لما اشوف زكريا…
زيدان بشك
هو انت ليه مصمم تشوف زكريا؟…
بص يونس لموبيله وابتسم بخبث وقال
رخاامه هو فين بقي؟..
عزيز بحده
انا مش موافق اعتبر الشغل بينا منتهي..
يونس حط رجل علي رجل وقال بجمود
ما قولتليش برضو فين زكريا المنشاوي..
زيدان
ما فضيناها سيره بقي شوف غيرنا يا يونس بيه واطمن السر بتاعك في بير احنا نعرف اصول الشغلانه برضو..
يونس
عيبكم انكم عاملين نفسكم جامين وانا زمان ايام ما كنت بلطجي زي ما بتسمعو عني اكيد كنت بتكلف اجيب الاشكال اللي زيكم دي للحكومه، فلعبتكم خسرانه عشان بتلعبو مع واحد صايع..
_ خلص كلامه وكان ماسك موبيله في ايده وكلم عمار اللي كان واقف بعربيته بره المكان ده ومعاه رجالته واول ما رن عليه يونس، شاور لرجالته يدخلو المكان..
_ وكان عدد رجالة عمار كبير ومسلحين كمان فدخلو هناك وسيطرو علي المكان بكل سهوله..
عزيز بقلق
ايه الصوت ده ايه اللي بيحصل بره..
زيدان بغضب
انت اللي عملت كده يا يونس..
يونس ببرود
يونس بيه واقعدو ده لسه الحكايه بتبدأ وفي واحد ليه امانه عندكم جاي ياخدها..
عزيز بغضب
انت مش قد اللي بتعملو ده احنا مش لوحدنا..
يونس
ما انا عارف احنا معانا الكابتن زيدان اهوو…
دخل في الوقت ده عمار عندهم وبصلهم بغضب وقال…
عمار
كده الصوره واضحه صح.؟..
زيدان بخوف
عع عمار بيه اللي بينا وبين زكريا انت من زمان بعيد عنه..
مسكه عمار من هدومه وقال بكل عصبيه
عشان كان اخويا معاكم برضااه انما يتخطف وتفتكرو ان ما فيش وراه حد تبقو بتحلمو، زكرياا فين ومش عايز اكرر سؤالي تاني..
_جه عزيز في الوقت ده يطلع سلاحه من درج مكتبه بس عمار كان الاسرع لما مسك المسدس بتاعه وضرب عزيز بالنار في دراعه وقال..
عمار
حركه كمان وهتبقي اخرتك النهارده زكريا فين؟..
عزيز بألم وهز ماسك دراعه وواقع علي الارض
فف في المخزن تحت..
عمار بجمود
خدهم بره يا يونس والرجاله مأمنين كل حاجه..
يونس وهو بيبص في ساعته
بسرعه طيب الشرطه بالكتير ربع ساعه وهتكون هنا..
_ سابه عمار ونزل تحت من خلال سليم صغير بره مكتب عزيز والمكان كان مضلم شويه، ونادي بصزت عالي وقال..
عمار
زكريااااا يا زكرياااا..
_فجأه ظهر قدامه واحد ماسك سكينه وكان هيغرزها في ضهره بس عمار لف بسرعه ومسك ايده وضربه براسه في وشه اكتر من مره لحد ما الولد مناخيره نزفت وفقد الوعي..
_ ولقي في باب حديد. كبيؤ مقفول راح بسرعه هناك وكان مقفول بقفل كبير فضرب بمسدسه عليه وكسره ودخل جوه لقي زكريا قااعد علي الارض ووشه كله كدمات..
اتنهد عمار بأرتياح وقال
تعبتني معاك يا زكريا…
ابتسم زكريا بهدوء ووقف قدامه وقال
شويه من اللي عليك يا عمار بيه…
عمار بحده
هو ايه اللي عليا وايه اللي وصلنا للاماكن الزباله دي مش انت…
زكريا بغضب
مش هنتخانق هنا اكيد يلا نمشي..
مسك عمار دراعه جامد وقال
مراتك فين، ابوك بيقول كانت معاك..
زكريا بجمود
ما انا بقولك يلا نمشي بسرعه عشان اقدر اروح الحقها لانها عند اللي اوسخ من دول…
عمار
طيب يلا وانا معاك..
_ وطلعو بره فعلا وزكريا اول ما شاف زيدان وعزيز اللي كان ماسك دراعه وبيتألم قاله..
زكريا
ورحمة امي انت وهو ما هسيبكم واللي حصلي منكم ده هدفعكم تمنو غالي، واللي اتسرق من بيت ابويا انا عندي منه كتير…
زيدان بخبث
خليك فاكر كلامي كويس انا قولتلك انت مش هتطلع من هنا علي رجليك…
يونس
هو البعيد. ما بيشوفش ما الراجل اهو واقف علي رجليه وطالع..
_ بعد عنهم زكريا وكان ماشي جنب عمار ويونس مع رجالة عمار وبيديهم تعليمات ولفت نظره واحد واقف في الدور التاني وماسك سلاح ومصوبه علي زكريا، فمسك يونس سلاحه بسرعه وقال لعمار بصوت عالي..
يونس
حااااسب يا عماااار…
_ وقف بسرعه عمار قدام زكريا وفي الوقت ده طلعت رصاصتين واحده من مسدس يونس جات في الولد اللي ضرب نار علي زكريا بس جات في دراع عمار اللي وقف قدامه..
زكريا بقلق
عمار انت كويس..
مسك دراعه بألم وقال
خايف عليا يعني مش كنت بتقول هقتلك؟
زكريا بسخريه
كنت بقول زمان مش دلوقتي
ابتسم عمار بألم وهو ماسك دراعه المصاب وقاله
خد يونس معاك وروح هات مراتك وانا هروح المستشفي..
يونس وهو بيمسك دراع عمار جامد
جرح صعب انا هروح معاك المستشفي ولا الوحش صعب عليه يجيب مراته هنروح نساعده..
زكريا بغضب
ما بلاش انت، وبعدين انت ايه اللي جابك؟..
يونس بنبره واثقه
ما اتعودتش اشوف حد ضعيف يا حرام ومتهان واسيبه معلش الجدعنه بعيد. عنك بكتير مش هتفهمها..
زكريا بغيظ
هروقلك يا ابن الصاوي الكل دوره جاااي، ومش عايز حد معايا من رجالتك يا عمار انت وصاحبك انا هعرف اتصرف..
قال كلامه ومشي ويونس قال بضيق
بقي هو ده اللي انا بقيت قتال قتله بسببه من دقيقه واحده، يلا يا عم اوديك انت كمان المستشفي وامسح رقمي من عندك…
عمار بجمود
انت بتكلمني انا كده يا يونس؟!..
يونس
ايوه ويلا مش هنبات هنا الشرطه علي وصول..
_واخده فعلا يونس وراحو المستشفي، وفي الوقت ده كان عماد قاعد جنب جهاد اللي بتعيط وقالها..
عماد
كفايه يا جهاد بقي انتي كده بتضري نفسك..
جهاد ببكاء وحزن
ازاي زكريا كده قولي يا عماد ان مجدي بيكدب، قولي ان ابو ابني مش وحش بالشكل ده..
عماد بحزن
والله العظيم زكريا اجدع واحد ممكن تقابليه في حياتك، واللي عملو زمان كان غلطه هو قالي انه هيقولك كل حاجه وهيبدأ معاكي من جديد اوعي تسبيه يا جهاد او تخليهم يوقعو بينكم، عارفه لو كنتي ظهرتي في حياة زكريا من زمان انا متأكد انه ما كانش دخل السكه دي، بس صعب اووي لما الانسان يحبط، لما يبقي متعشم في نااس بزياده والوجع ما يجيش غير من الناس اللي اتعشمنا فيهم …
جهاد بحده
ما فيش تبرير للي بيعمله انه يقتل ناس اا انت عارف ده عقوبته ايه عند ربنا، ومش معني ان حياتي فيها شوية مشاكل اني اكفر…
زاد بكاؤها وقالت
عارفين انتو كلكم خلتوني ما اثقش في حد تاني. ولا حتي احب حد تاني كلكم وحشين وكلكم شياطين كلكم خلتوني اكره الدنيا باللي فيها..
_سكت عماد وما عرفش يرد عليها بأيه، وبعد شويه تحت وصل زكريا هناك ومعاه رضا ورجالته اللي كانو بيشتغلو معاه..
زكريا بغضب
ادخلو واي حد منهم يوقفكم اضربوه بالنار بس بلاش موت..
رضا
اوامرك يا كبير..
_ وفضل واقف عند عربيته ورجالته نفذو كلامه، وجوه اول ما مجدي سمع صوت ضرب النار نزل من فزق بسرعه وحتي شيماء طلعت من اوضتها وقالت بقلق..
شيماء
في ايه انا كنت نايمه وصحيت علي صوت ضرب نار..
مجدي وهو ماسك مسدسه
مش عارف خليكي انتي هنا..
_ وقفت شيماء عند السلم ونزل مجدي تحت وكان لسه هيفتح الباب بس زكريا زقه جامد برجله فأتفتح ووقع مجدي علي الارض وكان لسه هيمسك سلاحه من تاني، بس زكريا زقه برجله ومسكه من هدومه خلاص وقف قدامه، وزكريا هنا افتكر لما ضرب جهاد قدامه وفضل يضرب فيه جامد لدرجة ان مجدي وقع علي الارض وما كانش قادر يتحرك..
قرب منه زكريا وقال بغضب
ما كنتش ناوي اذيك عشانها هي، بس بعد اللي عملتو انا هوريك الجحيم انت واي حد هيقرب من جهاد…
مجدي بصوت متألم
والله لاحرق قلبك عليها وعلي ابنك..
_ضربه زكريا برجه في وشه جامد فزاد نزيف وشه وفضل بدور في كل الاوض عليها ولما مالقهااش طلع فوق بسرعه وقابل شيمااء في وشه فقالها بحده..
زكريا
مستعده يحصل فيكي زي اللي حصل في اخوكي ولا هتبقي شاطره وتقوليلي جهاد فين؟..
شيماء بخوف
ففف في الاوضه اللي هناك دي..
_ راح بسرعه زكريا للاوضه اللي فيها جهاد، وهي نزلت عند مجدي اخوها عشان تطمن عليه وهي مرعوبه من زكريا…
_وعند جهاد كانت قاعده ماسكه في ايد عماد وهي خايفه ولما سمعو حد بيحاول يفتح الباب جامد وقفو بخوف وعماد وقف قدامها، ولما فتح زكريا الباب اتنهد عماد بارتياح وقال..
عماد
طيب ما تقول ان انت اللي علي الباب خوفتنا يا عم…
_تجاهله زكريا وقرب منها وعي كانت نظرتها ليه مختلفه ارتاح وخوف وحزن وزعل، واول ما وقف قدامها حضنها بكل قوته وقال بدموع ونبره مهزوزه..
زكريا
لو كانت حصلتلك حاجه انا كنت هموت يا حبيبتي…
_ غمضت عيونها بتعب وبدأت دقات قلبها تزيد وتلقائياً بادلته الحضن وهي ماسكه فيه زي الغريق اللي لقي قارب النجااه…
“اخبروني كيف يأتي الامان من اكثر شخص مخيف” 💔
ــــــــــ #بقلم_الكاتبه_رحاب_القاضي ــــــــ
_ في المستشفي عند عمار..
بعد ما مشي يونس من عنده كان قاعد هو لوحده في اوضته الطبيه اللي الدكتور طلب منه يقعد فيها لحد ما بعمل فحص شامل عشان يطمن عليه، مسك موبيله واول ما فتحه شاف عدد رسايل كتير من جميله، واول ما فتح الشات لقاهم ممسوحين..
ابتسم بسخريه وارسل لها
نعم يا جميله عايزه ايه؟..
_ وفي بيت جميله كانت نايمه بس موبيلها صوته عالي ولنا وصلتها رسالته، رن موبيلها بالرنه الخاصه اللي حطاها ليه عشان تميز رسايله عن الباقي..
_قامت بسرعه ومسكت الموبيل وبصت للموبيل وهي مفتحه عين ومغمضه عين بأنزعاج من نور الموبيل لانها كانت نايمه، واول ما فتحت رسالته وسمعتها اتوترت وردت عليه وقالت..
جميله
وصلولك بالغلط..
رد عليها وقال
هعمل نفسي مصدقك، علي العموم لو عاوزه حاجه قولي…
وابتسم بخبث وبعتلها
اديني في المستشفي قااعد لوحدي وفاضي..
انتفضت بخوف وردت عليه وقالت
ليه في المستشفي انت كويس؟..
زاد حماسه وهو بيرد عليها وقال
يعني يهمك في حاجه انا فيا ايه، اخلصي يا جميله عايزه ايه؟..
_ استني ردها عليه بس شافت الرساله وما ىدتش، وبعد كام دقيقه لقي مروان بيكلمه، رد. عليه لهدوء وقال..
عمار
ايوه يا مروان..
مروان
في ايه يا بابا جميله بتقولي انت في المستشفي حصل ايه انت كويس..
عمار بصدمه
هي لحقت تكلمك بنت المجنونه، ما تقلقش جرح بسيط..
مروان
طيب انا كده كده جايب جدو وجاي علي طول، بجد يا بابا انت كويس؟..
عمار بخبث
والله كويس المهم عايزك تكلم. جميله وتقولها اني حالتي خطر وقاعد لوحدي وتخليها تيجي عندي لوحدها فااهم..
ضحك مروان ورد عليه
هههههههه لا انا كده اطمنت انك كويس اووي كمان..
عمار
اخلص يا حيوان يلا اعمل اللي قولتلك عليه..
_قفل معاه وابتسم بخبث وبرغم كل حزنه منه الا انه مشتااق ليها وجداً…
ــــــــــ #بقلم_الكاتبه_رحاب_القاضي ــــــــ
_ وفي بيت يونس..
دخل بيته بالليل وكانت اميره مرات محمد قاعده بابنها في الجنينه وكان بيعيط جامد..
قرب منها وقال
ماله في ايه بيعيط كده ليه؟..
اميره بتوتر
لا ما فيش حاجه انا اسفه بجد علي الازعاج ده بس هو متعود يصحيني كده بالليل..
يونس
طيب هاتيه وروحي انتي نامي انا كده كده صاحي..
اميره
لا لا والله ما ينفعش يعني مش كفايه صوته وبعدين مش هيسكت..
يونس
يا ستي انا عايز اتعب وعايز اصدع منه، هاتيه بس وروحي نامي جنب بنتك لاحسن تصحي تتخض انها لوحدها..
اميره وهي بتديه ابنها
انا بجد مش عارفه اقولك ايه يا يونس..
_‌يونس شال ابن محمد بكل هدوء بين ايديه ورد عليها بابتسامه بسيطه..
يونس
ابن اخويا يبقي ابني يا اميره، تصبحي علي خير..
_واخد ابن اخوه وطلع اوضته فوق واول ما دخل كانت شهد قااعده علي الكنبه وحواليها ورق كتير ولما شافته بصت الناحيه التانيه وهي مدايقه..
يونس
ليه كده طيب، ده انا حتي داخل ومعايا ضيف..
شهد
انت جايبه معاك ليه؟..
_يونس وهو بيحط الولد علي السرير وبيلاعب فيه ورد عليها بهدوء…
يونس
امه كانت تعبانه وهو مصحصح قولت اجيبه يقعد معانا بما اننا صاحين ومش هنام..
شهد
وانت عرفت منين بقي اننا صاحين ومش هنام انا اصلا رايحه انام..
يونس
هتنامي وانتي مقموصه مع ان اللي المفروض يزعل انا..
شهد
وانت ايه اللي يزعلك كنت قعدالك بره لحد نص الليل مثلا؟..
يونس
تعالي اقعدي جنب الواد طيب وما تخليهوش يعيط..
وكان داخل الحمام فوقفت قدامه وقالت
كنت فين؟..
يونس
علي اساس لو قولتلك كنت فين هتصدقي؟..
شهد
لا بس رد عليا برضو، وبلاش تتجاهلني..
يونس
الواد هيعيط روحي سكتيه..
شهد بغيظ
لا رد عليا الاول كنت فين؟..
يونس بتنهيدع
هقولك انا عمار المنشاوي كلمني وقالي ان اخوه مخطوف وطلب مني اساعده وطول اليوم كنت معاه بنجيب اخوه واكشن وكنت هكوت يا بت والله..
شهد بحده
انت هتستعبطني انا عارفه ان عمار المنشاوي ده مش معاه اخوات صغيرين يتخطفوه..
يونس
ما هو اللي كان مخطوف اخوه الكبير..
شهد بسخريه
ومش عايزني اقول عليك كداب..
يونس بجمود
براحتك ان شاالله عن اهلك ما صدقتي..
وزقها من كتفها جامد وقال
روحي سكتي الواد يلااا…
_ وسابها ودخل اخد هدوم ليه ودخل الحمام، وهي راحت شالت ابن محمد وفضلت تهز تنيم فيه لحد ما فعلاً نام، وطلع يونس بعد شوين من الحمام وهو بينشف شعره ولما شافها لسه مدايقه حدفها بالمنشفه علي وشها وقال…
يونس
افردي خلقتك دي بقي يا بومه..
ضربته بيها تاني وقالت بعصبيه
اهو انت البومه ومالكش دعوه بيا وما تتكلمش معايا خالص..
يونس
احسن… روحي ودي الواد لامه عشان ننام..
شهد بخبث
لا هينام هنا..
يونس
لا لا مش هينفع انا هروح اوديه ليها..
شهد بسرعه
لو شيلته من علي السرير هيصحي عايز تنام جنبينا نام مش عايز عندك. الكنبه..
راح يونس نام جبيهم وابتسم وقال
بقولك ما تيجي نخلف تاني، ويا سلام لو جيبناها بنت المره دي..
شهد بحده
اممم ودي خطتك الجديده صح؟..
يونس بعدم فهم
خطتي الجديده لايه؟..
شهد
اني اخلف واتلهي بالبيبي اللي هجيبه واسيب الشغل صح؟!..
يونس بغيظ
اتخمدي يا شهد عشان ما اغلطش فيكي انتي والشغل اللي بقي واكل دماغك ده…
شهد بحده
ماشي بس يكون في علمك انا مش هخلف دلوقتي خاالص..
يونس بغضب
هو انا لو عايز هاخد اذنك، هو انتي لسه هتعرفيني يا شهد…
_ قال كلامه واداها ضهره ونام، وهي اخدت ابن محمد في حضنها بهدوء ونامت وعيونها كلها دموع وحزن من خنقاتها معاه اللي رجعت زي الاول تاني..
ــــــــــ #بقلم_الكاتبه_رحاب_القاضي ــــــــ
_ وفي بيت جميله..
كانت طالعه من اوضتها وهي بتتسحب وقبل ما تفتح الباب وتخرج بره شقتهم وقفتها ايتن وقالت..
ايتن
علي فين يا جميله هتطفشي وهتسيبي البيت…
جميله
اسكتي خالص يخربيتك، انا رايحه لعمار؟..
ايتن
انتي بتخرفي صح، دي احلام العصر مش كده خشي نامي يا جميله..
جميله بصوت واطي
اخرسي ووطي صوتك، عمار تعبان في المستشفي ومروان قالي ان حالته صعبه..
ايتن بقلق
يا نهار اسود. طيب استني انا هغير هدومي واجي معاكي..
جميله
لا لا مش هينفع عشان لو ماما سالت عليا الصبح تقوليلها ان انا لسه خارجه اوعي تعرف اني خرجت بالليل كده..
_طلعت في الوقت ده فريده من اوضتها وقالت بحده..
فريده
تاني يا جميله.. تاني هتكدبو عليا..
ايتن بقلق
يا ماما عمو عمار تعبان ومروان فعلا في اسكندريه دلوقتي وجميله هتروحله..
فريده بجمود
تروحله ما فيش مشكله بس الصبح وانا هروح معاها ونعمل الواجب..
جميله
لا يا ماما انا هروحله دلوقتي ومش هسيبه لوحده وهو تعبان..
فريده بحده
وانا قولت لا وعلي اوضتك يلا انتي وهي..
جميله بدموع
كفايه بقي انا وجعته كتير عشانك وهو دلوقتي محتاجني جنبه وانا مش هسيبه يا ماما وهروحله يعني هروحله..
_ وفعلا خرجت جميله واخدت عربية مامتها وراحت المستشفي لعمار وحصل؟….
_ تفتكرو ايه اللي هيحصل لكل الابطال؟…
ــــــــــــــــــــــــــــــــــــــــ

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية موضوع عائلي 2 (الجميله والشعر الأبيض))