رواية قدر لنا لقاء الفصل الأول 1 بقلم ريهام أبو المجد

رواية قدر لنا لقاء الفصل الأول 1 بقلم ريهام أبو المجد

رواية قدر لنا لقاء البارت الأول

رواية قدر لنا لقاء الجزء الأول

رواية قدر لنا لقاء الحلقة الأولى

شروق: بابا احنا جايين هنا لي؟
سامح: جايين نلعب مع الأطفال دي شوية.
شروق: بس أنا بخاف ألعب من حد يا بابا.
سامح: بطلي كلام يا شروق، وامشي وأنتي ساكتة.
شروق بزعل: حاضر.
مروة بغضب: ما كنا نسيبها عند حد من أهلك وخلاص.
سامح بغضب: أنتي تسكتي خالص، ثم أنتي مش أمها يعني المفروض أنتي اللي تاخديها ولا مفيش عندك ذرة أمومة.
مروة بزعيق: وهو أنت يعني واحد غريب ما أنت أبوها، ولا السنيورة بتاعتك كان طلبها أنك ترمي بينتك الوحيدة.
سامح مسكها من شعرها وقال: كلمة واحدة زيادة وهرميكي هنا في الشارع، وبعدين ما أنتي كمان هترميها عشان تروحي لحبيب القلب يبقى خلصانين كدا.
كل دا وشروق سامعة بس مش فاهمة لكن عمرها ما هتنسى الكلام دا في يوم.
وصلوا ووقفوا قدام ملجأ كبير اسمه *دار الأمل*.
ـــــــــــــــــــــــ& بقلمي ريهام أبو المجد &ـــــــــــــــــــــــ
نزل سامح ومروة ومسكوا إيد شروق الطفلة البريئة اللي عمرها ٦ سنين بس، قرروا يسبوها لوحدها غريبة بين كل الأطفال دي بس الفرق اللي بينها وبينهم أنها أهلها عايشين بس قرروا يرموها عشان كل واحد فيهم يعيش حياته زي ما هو عايش، كل واحد فيهم كان أناني حتى الأم اللي بتحامي على أطفالها سابتها عشان تتجوز واحد غني بتحبوه، وأبوها كمان سابها اللي المفروض يكون سندها؛ عشان يتجوز ويعيش حياته، وكان التمن طفولتها وحياتها اللي سلبوها منها.
شروق كانت نتيجة علاقة زواج فاشلة، شخصيين أنانيين، كل واحد بيفكر في نفسه وبس، مكنوش عايزين أي حاجة تربطهم ببعض فقرروا يتخلوا عنها ويخلوها يتيمة وهي ليها أهل.
قربوا والموظفين استقبلوهم وعملوا الإجراءات وهي كانت واقفة برا بتبص على الأطفال اللي موجودين، شروق كانت بنت هادية اووي وجميلة فوق الوصف، بسبب بيئتها مكنتشي تعرف حد ولا بتتكلم مع حد، كان كل حياتها زعيق وصراخ من أبوها وأمها.
شروق كانت واقفة فقربت منها بنت جميلة كانت أكبر منها، عندها ١١ سنة اسمها هيام.
هيام بإبتسامة جميلة: أنتي اسمك أي؟ أنتي جديدة هنا صح؟
شروق متكلمتشي وبعدت كانت خايفة، فهيام قربت منها وقالت تاني: أنتي خايفة لي أنا مش هعملك حاجة، أنا بس عايزة أعرف اسمك.
شروق بصوت واطي: اسمي شروق.
هيام فرحت وقالت: وأنا اسمي هيام، ممكن نبقى صحاب؟
شروق بطفولية: بس أنا همشي تاني مع بابا وماما فمش هنعرف نكون صحاب.
هيام بحزن: اللي بيجي هنا مش بيخرج تاني.
شروق مش فاهمة كلامها، فسكتت وفضلت تبص على اللي حواليها.
ـــــــــــــــــــــــــ& بقلمي ريهام أبو المجد &ــــــــــــــــــــــــ
في الوقت دا كان سامح ومروة خلصوا كل حاجة، وخرجوا عشان يمشوا ويسبوها لوحدها في عالم غريب عنها.
شروق: بابا، ماما استنوا رايحين فين؟
سامح بقسوة: ماشيين وأنتي خليكي هنا، هنبقى نجيلك تاني.
شروق عيطت وقالت: بس أنا مش عايزة أفضل هنا، خدوني معاكم.
سامح بزعيق: قولتلك هنبقى نيجي، مش عايز عياط.
شروق جريت على مروة وقالت: ماما حبيبتي قولي لبابا ياخدني معاكم، أنا بخاف أنام لوحدي.
مروة بجمود: بس أنتي مبقتيش صغيرة يا شروق، واسمعي الكلام.
شروق حضنتها وقالت: لا يا ماما أنا عايزة أكون معاكي متسبنيش.
مروة بعدتها عنها وقالت: بطلي شغل العيال الصغيرة دا واسمعي الكلام.
وسامح شاور للموظفات، وهم مسكوا شروق عشان متجريش وراهم، كل دا وهيام شايفة وسامعه، وكان في عيون تانية بتراقب كل حاجة بغل وكره لسامح ومروة.
شروق فضلت تعيط وتصرخ وهم كانت قلوبهم حجر، وهيام عيطت عشان شروق مع أنها لسه شيفاها بس حست بوجعها وألمها، وشروق قدرت تفلت من إيدين الموظفات وجريت بس كانت البوابة اتقفلت، فمسكت في حديد البوابة ونادت عليهم وهي بتعيط.
شروق بعياط: ماما متسبنيش، والله هسمع الكلام بس متسبنيش.
وكملت بعياط: يا بابا والله مش هزعلك بس متسبنيش هنا، ماما قولي لبابا.
لكن هما ركبوا العربية ولا كأنهم سامعين عياط وصراخ بنتهم الوحيدة اللي ملهاش ذنب في كل دا.
مروة حتى مبصتشي من شباك العربية عليها وكأنها مش بنتها.
شروق: ماما أنا بخاف متسبنيش لوحدي.
لكن لا حياة لمن تنادي، واختفوا واختفى معاهم طفولة وبراءة الطفلة الصغيرة دي اللي اتحكم عليها بالشقة والتعب والوحدة.
ــــــــــــــــــــــــــ& بقلمي ريهام أبو المجد &ــــــــــــــــــــــــــ
وقعت على الأرض تعيط وهي مش عارفة هي عملت أي عشان تتعاقب كدا، لي مامتها تسيبها وهي عارفة أنها بتخاف تنام لوحدها؟ بتخاف من الضلمة ومن الوحدة اللي اتكتبت عليها من زمان.
هيام قربت منها وحضنتها وقالت بعياط: خلاص يا شروق انسي، ومتزعليش أنا معاكي.
شروق بصتلها وقالت: بس أنا عايزة ماما.
هيام حضنتها وفضلت تعيط وقالت: أعتبريني أنا ماما يا شروق، بس بطلي عياط.
شروق: بس أنا بحب ماما، وأكيد هترجعلي تاني هي وبابا، أنا والله معملتش حاجة غلط عشان اتعاقب بس أكيد هيرجعوا صح يا هيام؟
هيام بحزن: صح.
شروق فرحت وقالت: يعني هيرجعوا، خلاص أنا هستناهم هنا.
هيام: لا مش هيعرفوا يجوا النهاردة، تعالي ونيجي نستناهم سوا بكرا اتفقنا.
شروق بطفولية: اتفقنا.
كل دا ولسه العيون بتراقبها، هيام أخدت شروق ودخلتها العنبر بتاعهم، وشروق كانت خايفة وماسكة في هدوم هيام جامد لأنها أول مرة تشوف أطفال كتير كدا؛ لأنها طول حياتها وهي محبوسة في البيت، ومش بتختلط بحد.
هيام: تعالي يا شروق أنتي هتنامي على السرير دا.
شروق: طب وأنتي فين سريرك؟
هيام بإبتسامة: اللي جنبك دا، متخافيش أنا جنبك.
شروق: ماشي.
قربت منهم بنت جميلة بس باين على ملامحها الحدة والقوة وكانت أكبر منهم، عندها ١٣سنة.
نورهان: أي دا يا هيام دي جديدة؟
هيام بضيق: ايوا جديدة، وملكيش دعوة بيها لأنها مش هتستحمل طريقتك.
نورهان بغضب: لمي نفسك يا هيام، وبعدين أنا هنا اللي كلامي يمشي.
هيام: وأنا مش هسمحلك تقربي من شروق بالذات.
نورهان بتريقة: الله الله، دا أي الحنية دي يا هيام، دي شكلها دخلت قلبك.
هيام: ايوا وملكيش دعوة، ولو سمحتي امشي بقى دلوقتي.
نورهان قربت من هيام ومسكتها من هدومها وقالت بغضب: هيام اتعدلي معايا في كلامك، وبعدين هو أنا بعبع ولا أي؟
هيام شالت إيدها جامد وقالت: أنتي تمشي كلامك على كله إلا أنا، وبعدين مين قالك أنك بعبع أنتي بس بتداري ورا قناع الجمود والحدة دي خوف وماضي بيوجعك.
نورهان اتعصبت وجات لسه تمسك هيام من شعرها، لقوا شروق بتصرخ وحاطة إيديها الإتنين على ودنها وهي بتقول بهستريا: لا لا كفاية، خلاص يا بابا كفاية متضربشي ماما ولا تضربني خلاص مش هعمل حاجة تانية والله بس سيبنا.
ــــــــــــــــــــــــ& بقلمي ريهام أبو المجد &ــــــــــــــــــــــــ
هيام ونورهان اتفاجأوا ووقفوا مصدومين وبصوا لبعض بعدم فهم، بس هيام جريت عليها وقالت: مالك يا شروق؟
شروق بعياط ولسه باصة قدامها بخوف: بابا، بابا ابعدوه عني، أنا معملتش حاجة.
هيام حضنتها وقالت: متخافيش يا شروق أنا جنبك، وباباكي مش موجود يا حبيبتي.
نورهان صعبت عليها اووي شروق وقربت منها وطبطبت على ضهرها وقالت: فوقي يا شروق ابوكي مش هنا، احنا اللي جنبك، كل اللي بتشوفيه دلوقتي مش حقيقي، فوقي يا شروق.
شروق بدأ نفسها يختفى ومش قادرة تتنفس، فهيام خافت اووي ونورهان بدأت تهوي عليها، وهيام قالت: خدي نفسك يا شروق، خدي نفسك يا حبيبتي.
شروق بدأت تهدى بالتدريج وبعدين هيام حضنتها وقالت بخوف ظاهر: بقيتي أحسن دلوقتي؟
شروق هزت راسها بمعنى ايوا، ونورهان مشت إيدها على شعرها بحنية، وبعدين قامت من جنبها وراحت على سريرها وهي مخنوقة لأنها افتكرت الماضي بتاعها، وهي الوحيدة اللي حاسة بمعاناة شروق الطفلة الصغيرة دي.
وهيام نيمت شروق على السرير وفضلت جنبها لحد ما نامت وهي منكمشة على نفسها، وبعد وقت قامت شروق وملقتشي هيام جنبها على السرير فخافت اووي، فقامت وراحت على سرير هيام ونامت جنبها وحضنتها، فهيام حست وابتسمت لها وحضنتها جامد ونامت شروق وهي متطمنة في حضن هيام.
في صباح يوم جديد، مع حياة جديدة على شروق، وعالم مختلف عليها، ووشوش جديدة، كل وش وراه قصة مختلفة وألالم مختفية.
كانت قاعدة لوحدها في ركن بعيد وفي إيدها سندوتش بتاكله هيام كانت عطتهولها، بس مكنشي ليها نفس تاكل كانت حزينة وحاسة بالوحدة رغم صغر سنها، ففي شاب قرب عليها، شكله جميل بس هو متنمر وبيدايق الكل، هو أكبر منها عنده ١١ سنة.
حازم: أنتي قاعدة لوحدك لي يا حلوة؟
شروق بصتله وسكتت لأنها خايفة، فهو أدايق لأنها مردتشي عليه، فقرب عليها وأخد منها السندوتش ورماه على الأرض وقال: لما أكلمك تردي عليا.
شروق خافت ورجعت لورا وهو بدأ يقرب عليها ومسك إيدها وقال: ردي عليا.
ـــــــــــــــــــــــــ& بقلمي ريهام أبو المجد &ـــــــــــــــــــــ
شروق دموعها نزلت وساكتة، وفجأة لقت إيد بتتحط على إيد حازم وشده ليه جامد وقال بغضب: لو لمستها تاني يا حازم هزعلك.
حازم: وأنت بتدخل لي يا محمود؟
محمود: أنا مبعدشي كلامي مرتين، وامشي من هنا يلا.
حازم: والله لأخد حقي منك.
محمود ضحك بسخرية وقال: الخوف متخلقشي عشاني.
حازم مشي وهو بص لشروق بضيق وجي يمشي لقى إيد صغيرة مسكت إيده، فبص لقاها بتبصله وبتبتسم إبتسامة جميلة اووي شبهها.
شروق بطفولية: شكرًا.
محمود انسحر بإبتسامتها الجميلة وقال: متسمحيش لحد أنه يخوفك ويتنمر عليكي، خليكي قوية، لأنك لو مكنتيش كدا هتنداسي.
شروق مش فاهمة كلامه اووي فقالت ببراءة: أنا مش فاهمة، بس أنا معملتش حاجة أنا مش بحب أتكلم مع حد وهو كان بيقولي ردي عليا وأخد مني السندوتش ورماه وهيام اللي كانت عطتهولي، هي كدا هتزعل مني؟
محمود ضحك على كلامها وبراءتها وقال: لا متخافيش تعالي معايا هعطيكي السندوتش بتاعي عشان متعرفشي وتزعل منك.
شروق بعد تفكير: بس أنت كدا لما تديني السندوتش بتاعك مش هيكون معاك حاجة.
محمود ابتسم وقال: مش مشكلة أنا مش جعان.
شروق: ما أنا كمان مش جعانة اصلا.
محمود: خلاص تعالي معايا هناك كدا ونشوف حل.
شروق مشيت معاه وهي لسه ماسكة إيده وهو كان كل شوية يبصلها ويبتسم وراح أخد السندوتش وقالها: خدي بقى السندوتش عشان صاحبتك متزعلشي.
شروق: بس هي قالتلي اكله.
محمود ابتسم وقال: أنتي لمضة اووي، طب أنتي عايزة أي دلوقتي؟
شروق ابتسمت وقالت: أنت تاخد نصه وأنا نصه.
محمود ابتسم وقال: خلاص اتفقنا.
ـــــــــــــــــــــــ& بقلمي ريهام أبو المجد &ــــــــــــــــــــــــ
وفعلا قسم السندوتش واكلوا مع بعض ومحمود كان أول مرة يتكلم مع حد ويضحك كدا، وكان الكل مستغرب لأنهم أول مرة يشوفوه بيضحك.
فضلوا ياكلوا سوا ويتكلم معاها، حب براءتها اووي وجمالها، لأن شروق كانت جميلة بمعنى الكلمة، شعرها أسود سواد الليل، وعيونها زرقا، وعندها غمازة في خدها الشمال بتزيد من جمال إبتسامتها.
هيام شافتهم من بعيد فقربت منهم وهي متدايقة وقالت: شروق بتعملي أي هنا؟
شروق بطفولية: قاعدة مع محمود شوية، تعالي اقعدي معانا.
هيام بصت بغيظ لمحمود وقالت: لا، ويلا تعالي عشان نلعب سوا.
شروق: حاضى، بس محمود هيلعب معانا.
هيام: لا احنا هنلعب بنات بس مع بعض.
شروق بزعل طفولي: بس كدا محمود هيقعد لوحده وكدا حرام، مش عايزاه يبقى شبهي.
محمود ابتسم وقال: بس أنا بحب كدا، وبعدين روحي العبي معاها ولما تخلصي نقعد تاني سوا اتفقنا؟
شروق بفرحة ومدت صابعها الصغير وشبكته في صابعه وقالت: اتفقنا.
محمود استغرب وقال: أي دا؟
شروق: دي علامة الوعد.
محمود ابتسم وقال: حلوة شبهك.
شروق مسكت في إيد هيام ومشيت معاها وبعد ما مشيت محمود خبط على راسه وقال: نسيت اسألها على اسمها.
هيام: شروق متقربيش من محمود تاني.
شروق: لي؟
هيام: كدا اسمعي كلامي، هو وحش ومفيش حد بيحبه هنا، وكله بيخاف منه.
شروق بزعل: بس هو حلو ومش بيزعلني، وأنا مش عايزاه يبقى وحيد شبهي.
هيام بزعل: طيب بس مش تقعدي معاه كتير.
شروق: حاضر.
بعدين شروق راحت على البوابة وقفت عندها مستنيه أبوها وأمها، فهيام قربت منها وقالت بحزن: شروق يا حبيبتي يلا ندخل الليل قرب.
شروق: لا أنا هستنى بابا وماما هنا عشان لما يجوا يشوفوني.
هيام مسكت إيدها وقالت: يلا يا شروق مش هيجوا.
شروق شدت إيدها منها وقالت: لا هيجوا وسبيني بقى.
هيام زعلت وقالت: عايزاني امشي يا شروق.
شروق بعياط: لا، بس خليني استناهم هنا، هم هيجوا ومش هيسبوني عشان هم بيحبوني.
هيام: يا شروق خلاص تعالي استنيهم بكرا، يمكن معرفوش يجوا النهاردة.
شروق: لا هستناهم.
ــــــــــــــــــــــ& بقلمي ريهام أبو المجد &ـــــــــــــــــــــــ
فضلت هيام قاعدة جنبها لأنها مش عارفة تقولها أنهم مش هيجوا تاني؛ لأنها ممكن تتعب، محمود لمحها فقرب عليها وقال: قاعدة هنا لي؟
شروق: مستنيه بابا وماما عشان هيجوا ياخدوني.
محمود حب يلهيها فقال: أنتي على فكرة مقولتليش اسمك أي.
شروق ابتسمت وقالت: اسمي شروق.
محمود: اسمك جميل شبهك يا شروق.
هيام حست بالغيرة عليها فقالت: يلا يا شروق عشان نرجع العنبر.
شروق بعند: لا، قولتلك هستنى هنا بابا وماما.
محمود بصلها عشان تسكت لأنه عارف أن شروق مش هتيجي بالضغط، فهيام نفخت بضيق وسكتت.
محمود: شروق تحبي تيجي ترسمي معايا؟
شروق: بس أنا مش بعرف أرسم.
محمود ابتسم وقال: هعلمك.
شروق بإبتسامة: بجد؟!
محمود: ايوا تعالي معايا يلا.
شروق نسيت هي كانت قاعدة لي وقالت بفرحة وهي بتمسك إيده: يلا.
هيام استغربت أنها إزاي رضيت بالسهولة دي، بس فرحت أنها نسيت أهلها واتحركت معاه.
محمود كانت كل أما تمسك إيده بيستغرب، بيحس إتجاهها بالمسؤولية مع أنه لسه شايفها من يوم بس، بس اتعلق بيها اووي.
راحت معاه وفضل يخليها ترسم، وهي كانت فرحانة اوي، ومع إن هيام مدايقة بس فرحانة أنها بدأت تضحك وتنسى.
ــــــــــــــــــــــ& بقلمي ريهام أبو المجد &ــــــــــــــــــــــــــ
مرت الأيام والسنين وشروق تعلقها بمحمود بقى أكبر، وهو كل أما يكبر يحبها أكتر، ومحدش بقى يقدر يهديها ولا يغير مزاجها غيره، نورهان بقت بتعامل شروق وهيام أحسن وتقربت منهم، وبقوا هم التلاتة أصحاب اووي.
في يوم كانوا قاعدين سوا وهيام كانت بتسرح شعر شروق، وشروق بتغني وكله بيسمعها لأنهم بيحبوا صوتها اووي.
شروق: هيام اعمليلي ضفيرة.
هيام: عيوني يا قلبي، أحلى ضفيرة لأحلي شروق.
شروق ضحكت وقالت: بحبك اووي يا هيام.
هيام باستها في خدها وقالت: أنا أكتر يا روحي.
نورهان بهمس لهيام: بقولك أي يا هيام، أنا حاسة إن محمود قريب أووي من شروق، أنتي ملاحظة دا؟
هيام: ايوا، هو صاحبها وهي بتحب تتكلم معاه.
نورهان: طب خلي بالك منهم لما يكونوا سوا.
هيام: حاضر، أنا فعلًا باخد بالي.
شروق كانت قاعدة في مكانها اللي دايمًا بتقعد فيه، فحازم قرب عليها وقال: هو أنا ممكن اقعد معاكي؟
شروق: لا عشان أنت وحش وبتزعلني.
حازم: بس أنا مش هزعلك تاني والله، عايز ابقى صاحبك.
شروق: وعد؟!
حازم ابتسم وقال: وعد.
شروق: خلاص اقعد بس مش هديك من السندوتش بتاعي.
حازم ابتسم وقال: بس أنا مش عايز؛ أنا أكلت.
في الوقت دا محمود شافهم واضايق وراح ليهم وهو متعصب وقال لحازم: أنت بتعمل أي هنا.
حازم: وأنت مالك.
محمود: متعصبنيش ورد عليا عدل.
حازم: قاعد مع شروق عشان بقينا صحاب.
محمود بص لشروق بغضب وقال: هو بيتكلم صح؟
شروق: هو قالي أنه معدشي هيدايقني، ووعدني عشان كدا صالحته.
محمود مسكها من إيدها وقال: تعالي معايا.
حازم مسكه وقال: مش هتروح سيب إيدها.
ــــــــــــــــــــــــ& بقلمي ريهام أبو المجد &ــــــــــــــــــــــ
محمود اتعصب وانقض عليه وضربه وكله اتجمع عليهم وشروق قعدت تفرق بينهم بس محمود زقها من عصبيته ومأخدشي باله، فهيام جات شالتها ولقت إيدها انجرحت فزعقت لهم والمديرة وصلت.
المديرة: أي اللي بيحصل دا؟
حازم بص لمحمود بغل وسكت ومحمود كمان، فالمديرة اتعصبت وقالت: أنتم الأتنين معاقبين عشان اللي حصل دا ممنوع؛ أنتم هنا أخوات مينفعشي تأذوا بعض فاهمين، وعقابكم أنكم هتنضفوا الحوش دا كله مع بعض.
وسابتهم ودخلت، وشروق كانت بتعيط فمحمود خاف عليها لما لقاها بتعيط وقال: مالك يا شروقي فيكي أي؟
هيام بغضب: مش عارف فيها أي، أنت زقتها وإيدها اتجرحت، وبعدين بتشاكلوا في بعض لي أنت هتعمل نفسك وصي عليها.
محمود مهتمش لكلامها وقرب من شروق ومسك إيدها وقال: أنا أسف يا شروقي، هي بتوجعك اووي.
شروق بعياط: لا بس أنت متعور كمان في وشك.
محمود: أنا مش مهم المهم أنتي.
شروق: أنا هروح أقول للمديرة تسامحك هي طيبة والله.
محمود: لا يا شروقي متطلبيش حاجة من حد أبدًا، وبعدين عادي أنا هنفذ العقاب عشان أنا أذيتك.
شروق: بس أنا مش زعلانة منك.
هيام: يلا يا شروق عشان أعالج جرحك.
وأخدتها هيام وضمدلها الجرح وشروق كانت زعلانة عشان محمود.
شروق: هيام هو ينفع أساعد محمود؟
هيام بغضب: لا يا شروق، وبلاش تقربي منه اووي.
شروق: أنتي لي بتتكلمي عنه كدا، محمود كويس وبيعاملني حلو اووي، وبيعلمني حاجات كتيرة.
هيام: عشان هو بيخلي الكل يبعد عنك وبيخافوا منه، وبعدين مش شايفة ضرب حازم إزاي.
شروق: بس أنا بحبه عشان هو بيهتم بيا.
نورهان: خلاص يا هيام اقفلي على الموضوع دا.
هيام: بس…
نورهان: قولتلك خلاص يا هيام، سيبيها براحتها، وبعدين حازم يستاهل هو أصلًا غلس.
ـــــــــــــــــــــ& بقلمي ريهام أبو المجد &ـــــــــــــــــــــــــــ
كانوا قاعدين وشروق اتسحبت من غير ما هيام أو حد ياخد باله وطلعت عشان تشوف محمود.
شروق بهمس: محمود.
محمود بص وابتسم وقال: أي اللي جابك يا شروقي؟!
شروق: جيت عشان أكون معاك أسليك.
محمود بحزن: إيدك بتوجعك؟
شروق: شوية صغننين.
محمود ضحك وقال وهو بيقلدها: صغننين إزاي؟
شروق: متتريقشي عليا.
محمود: خلاص متزعليش.
محمود قرب منها وقال: لي مضفرة شعرك؟
شروق: عشان يبقى ضفيرة كبيرة العب بيها.
محمود ضحك وقال: شعرك وهو مفرود أحلى يا شروقي.
شروق ابتسمت وقالت: خلاص مش هضفرة تاني.
حازم كان مدايق لما شافهم مع بعض بس مرديش يعمل حاجة عشان ميتعاقبشي تاني.
خلص اليوم ونامت شروق في حضن هيام كالعادة لأنها بتحس بالحنان معاها، وفعلًا هيام عوضتها عن حنان أمها رغم صغر سنها.
أشرقت شمس يوم جديد، وكان معاه هدية جديدة ليهم، كانت شروق وهيام ونورهان قاعدين سوا وفجأة دخلت عليهم موظفة ومعاها بنوتة صغيرة عندها ٤ سنين وبتعيط، فراحوا يشوفوها.
العاملة: دي بنوتة جديدة يا بنات، خلوا بالكم منها، اسمها لارين.
نورهان أخدتها منها وحبتها اووي ولارين مسكت فيها.
شروق: يا روحي دي جميلة اووي وصغننة خالص.
هيام: فعلًا، يا ترى قصتها أي دي كمان؟
نورهان بحزن للموظفة: هي جات إزاي؟
العاملة: دي عمها جابها هنا، عشان أهلها ماتوا وهو مش عايزها.
نورهان بغل وكره: أكيد ما هم كلهم كدا.
ـــــــــــــــــــــــ& بقلمي ريهام أبو المجد &ــــــــــــــــــــــ
شروق زعلت لما افتكرت أهلها وهيام أخدت بالها فطبطبت عليها وقالت: احنا معاكي كلنا يا شروق.
شروق ابتسمت بكسرة وقالت: شكرًا يا حبيبتي على وجودك.
بيبصوا لاقوا لارين نامت في حضن نورهان، ونورهان بتلعب في شعرها، استغربوا لأن دا مش طبع نورهان أنها تتعلق بحد بسرعة كدا.
شروق: شكلك حبتيها اووي يا نور.
نورهان: شكلي كدا، حسيت أني مامتها وهي بنتي الصغيرة.
شروق: خلاص اعتبريها كدا.
هيام بضحك: ايوا اهو تتلهي عننا شوية وتبطلي جبروت.
نورهان ضحكت وقالت: أنا يا نصابة، امشي من قدامي لقوملك.
هيام بضحك: لا وعلى أي الطيب أحسن.
شروق طلعت ولقت محمود مستنيها وكانت فردة شعرها زي ما قالها، راحت وقعدت جنبه وقالت: صباح الخير يا محمود.
محمود: صباح الخير يا شروقي.
شروق: بحب الإسم دا منك اوووي.
محمود: عشان أنتي فعلًا شروقي.
شروق: هنعمل أي النهاردة؟
محمود: تعالي هرسمك.
شروق بفرحة: بجد! الله بقى.
وفعلًا راحت معاه وهو طلع الإسكتش بتاعه والقلم وبدأ يرسمها، وبعد فترة خلص وبص للصورة وابتسم برضى.
شروق: يلا بقى وريهالي عايزة أشوفها.
محمود عطاها الرسمة وانبهرت بيها، لاقت نفسها هي بالظبط كأنها صورة فوتوغرافية.
شروق: محمود دي أنا بجد! أنت رسام ماهر بجد ما شاء الله.
محمود بحب: يعني عجبتك يا شروقي.
شروق: دا أنا وقعت في غرامها.
محمود: عقبال ما تقعي في غرامي أنا كمان.
شروق اتحرجت وقالت: أنا لازم امشي دلوقتي، بس أنا عايزاها.
محمود: لا دي أنا هحتفظ بيها يا شروقي.
شروق: طب ابقى ارسملي واحدة تانية.
محمود: حاضر.
ــــــــــــــــــــــ& بقلمي ريهام أبو المجد &ـــــــــــــــــــــــــ
مرت سنين بينهم، وكان حب شروق بيكبر في قلب محمود، وشروق حبته واتعلقت بيه، هي عرفت معنى الحب على إيده، حبه ليها، اهتمامه، غيرته اللي موجودة فيه رغم صغر سنه.
وفي يوم كان خلاص سن محمود معدشي يسمحله يفضل في الملجأ أكتر من كدا، وكان خايف يقول لشروق عشان مش عايز يشوف دموعها ووجعها عليه، بس كان غصب عنه هو دلوقتي بلغ وكبر ولازم يبقى راجل ويعتمد على نفسه.
محمود كان قاعد مع شروق، والفاصل اللي بينهم عشان هم شباب وهم بنات، فمحمود كان عايز يقولها.
محمود حمحم وقال بصوته الرجولي: شروقي.
شروق: نعم.
محمود: أنا عايز أقولك حاجة بس متزعليش أرجوكِ.
شروق بقلق: في أي يا محمود قلقتني؟
محمود بحزن: شروقي أنا هخرج من الدار النهاردة.
شروق: لي؟
محمود: لإن خلاص سني معدشي يسمح أفضل هنا، لازم أخرج للدنيا وعافر فيها وأشتغل.
شروق بصدمة: يعني أي هتسيبني لوحدي يا محمود؟! أنت عارف إن يومي مش بيكمل غير بيك.
محمود: غصب عني يا شروقي، بس والله أوعدك هاجي أزورك ومش هتخلى عنك.
شروق بعياط: لا أنت هتسيبني زي ما بابا وماما سابوني زمان.
محمود: لا يا شروق عمري ما هعمل كدا، ومهما حصل خليكي واثقة أنك هتفصلي جوا قلبي ومش هنساكي أبدًا.
شروق: وعد؟!
محمود حط صباعه الصغير في صباعها وقال بإبتسامة: وعد يا شروقي.
ومن اليوم دا وشروق مشافتشي محمود تاني، ولا جي حتى يزورها، رغم حزنها منه وأنه موفاش بوعده ليها بس كانت خايفة عليه وعايزة تطمن.
في اليوم اللي خرج فيه محمود، مكنشي عارف يروح فين، وهينام فين، بس وهو ماشي مهموم شاف عربية مرسيدس واقفة، وكان في راجل باين عليه العز ولابس بدلة شيك، كان واقف وفي اتنين بيهددوه بمسدسات وهو مش عارف يعمل أي.
ــــــــــــــــــــــــ& بقلمي ريهام أبو المجد &ـــــــــــــــــــــــــ
محمود جدع اووي ومبيحبش الظلم، فقرر أنه يساعد الراجل دا، فمسك عصاية في إيده وقرب منهم من وراهم، وخبطهم هم الإتنين بالعصاية جامد على دماغهم واحد أغمي عليه والتاني كان لسه فايق فحاول يضربه بالمسدس بس محمود كان أسرع منه وركله برجله وقع المسدس من إيده وأخده هو وجري على الراجل ومسك إيده وقاله: يلا اهرب بسرعة قبل ما يفوقوا.
الراجل عجبه شجاعة محمود وحاب يكافئوا فقرر ياخده معاه ويعلموا ويخليه دراعه اليمين.
أيمن المصري: أنت أسمك أي؟
محمود: اسمي محمود.
أيمن المصري: طب بص يا محمود أنت وقفت جنبي وأنقذت حياتي، فأنا مدين ليك بحياتي، عشان كدا أنا هاخدك معايا ألمانيا وهعتبرك واحد من عيالي، وهتشتغل عندي وتكون دراعي اليمين.
محمود: بس أنا معملتش حاجة، أي حد مكاني هيعمل كدا.
أيمن المصري: لا مش أي حد هيعمل كدا، ها قولت أي؟
محمود فكر شوية وهو فعلًا محتاج الفرصة دي عشان يبني نفسه ويبقى راجل كويس عشان يقدر يرجع لشروقه تاني وتكون ليه ويتجوزها.
محمود: موافق.
ومن هنا ابتدت القصة، ومن هنا كان فراقهم، فراق حبيبين لكن القلوب مقدرتشي تتفرق.
بعد ٨ سنين من الفراق.
في كافية جميل وهادي على البحر، كانت في بنت جميلة اووي واقفة بتاخد طلبات الزباين، وراحت تجيب الطلبات وواقفة قدام الكشير، لاقت حد ضربها على راسها.
شروق بغضب وهي بتلف بجسمها: أي الغباء دا، هو أنت؟
حازم بضحك: ايوا أنا.
شروق بعصبية: هو أنا مش قولتلك أكتر من مرة بطل التصرفات الغبية بتاعتك دي يا ابني.
حازم: لا مش هبطل، ما أنتي اللي بتسرحي، والزباين مستنيه الطلبات.
شروق بضيق: يووه بقى، طيب ابعد كدا، ومش كل شوية تنطلي في المكان اللي بشتغل فيه، أنا مش فاضية للعب العيال دا.
حازم: براحتشي.
شروق: طول عمرك غلس والله.
حازم: عارف.
ــــــــــــــــــــــ& بقلمي ريهام أبو المجد &ــــــــــــــــــــــ
شروق نفخت بضيق وسابته ومشيت وهي ماسكة صنية الطلبات، وهو ماشي وراها، حطت الطلبات للزباين وهي بتبتسم إبتسامتها الجميلة.
حازم بغيرة: مش قولتلك متبتسميش لحد وبالذات لو راجل قاعد.
شروق: بقولك أي يا حازم أنا مش فايقالك، وبعدين أنا عارفه بعمل أي، وأنا ابتسمت للبنت مش للشاب.
وبعدين كملت كلامها وهي رافعة صباعها في وشة وبتقول: والله لو ممشيتشي دلوقتي لجبلك هيام تتصرف معاك.
حازم: لا خلاص كله إلا هيام.
وبعدين باس صابعها اللي رافعاه في وشه بسرعة وجري.
شروق بغضب: والله ما أنا سيباك يا حازم.
حازم بغيظ: يا ريت والله متسبنيش.
شروق: والله دمك سم.
في اليوم دا وصلت الطيارة اللي واصله من ألمانيا لمصر، ونزل منها راجل كبير في السن وباين عليه الشموخ، وجنبه مراته ست باين عليها الوقار والطيبة، وشاب وبنت جميلة جنبه.
ووراهم نازل شاب جميل اووي وباين عليه الحدة، وكاريزما في نفسه، لابس النضارة بتاعته.
نزلوا وركبوا أسطول العربيات اللي كانت مستنياهم، ووصلوا القصر الكبير بتاعهم.
وكل اللي في القصر انبهروا بيه وبالذات البنات اللي بتشتغل هناك، وبدأوا يسألوا عليه.
واحده من العاملات: مين دا؟
العاملة التانية بإبتسامة: دا محمود المصري……..
طبعًا أنا مذكرتش حياتهم كاملة في الملجأ لإني هذكرها في الأحداث، يعني كذكريات ليهم هيفتكروها في البارتات القادمة بإذن الله.

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية قدر لنا لقاء)