رواية تخاتيخو الفصل التاسع عشر 19 بقلم فاطمة طلال
رواية تخاتيخو الفصل التاسع عشر 19 بقلم فاطمة طلال
رواية تخاتيخو البارت التاسع عشر
رواية تخاتيخو الجزء التاسع عشر
رواية تخاتيخو الحلقة التاسعة عشر
صحيت هبة من نومها كالعادة ونزلت عشان معاد الفطار ’ خدت طبق كبير وراحت تختار كروسونات كتير بأشكال مختلفة وأنواع مختلفة وبعدين خدت طبق فول صغير ومعاه رغيفين عيش وحطت في طبقها مربى وجبن وبعدين بصت للبوفيه وقالت لنفسها
“انا زعلانة ومحتاجة اكل كتير ”
” اكتررر من كده يا مفترية ’ انتي يوميا بتخلصي نص البوفيه لوحدك”
“على فكرة انا كل ده ولسه مكلتش اصلا ! انا اصلا كده بعمل ريجيم ”
“ده منظر ريجيم ’ ده انتي امبارح مخلصة طبقين فول بأربعة أرغفة وتلت سندوتشات مربى وسندوتشين نوتيلا وطبق اومليت!! انتي لو كنتي قاصدة تتخني مش هتعملي كده ”
“بالظبط انا دلوقتي المفروض محرمش نفسي بقى من اي حاجة قبل الريجيم ’ عشان اتخن بذمة عشان الريجيم يبان بقى”
“والله يا هبة انتي طول عمرك بتاكلي عشان الريجيم يبان وعمرك ما عملتي ريجيم اصلا”
“لاااااا المراااادي غيييير المراااادي هاكل كتييييييير بقى عشان ….. ”
الصوت التاني اللي جواها يقاطع الصوت الاولاني
“عشان تتخني زيادة وتبقى كرومبة وبس ’ وعقبال ما يلاقوكي تكوني بقيت اد الدرفيل”
“يوووووه انا مضايقة ومكتئبة ومن حقي اعوض نفسي واكافئها كمان”
“عوووضي عووووضي ’ عوضنا على الله ’ دخلنا في الـ 150 كده ’ يارب راجح يلاقيكي بسرعة بقى قبل ما توصلي للـ 200 ”
“اوووووفر اوي ”
“هو فعلا اوووفر!”
*************************************
وبعد ما تخلص هبة الفطار تطلع على الجيم تحاول تستخدم الالات اللي هناك وهي خمس دقايق وتتعب ونفسها يبتدي يروح منها فتقول لنفسها:
“بــــــــــس انا كده كفاية اوي النهاردة ’ اصلا المفروض ابتدي خطوة خطوة ’ اما اروح اكافىء نفسي بقى”
والصوت التاني اللي جوة عقلها قام قال فورا
“يالهوووووووووووووووي ’ روحتي فطيس يا هبة يا حبيبتي”
وتروح تقعد على البحر المخصص للفندق اللي هي فيه وتطلب من الجرسون:
– لو سمحت انا عايزة بقى ايه هنا احلى حاجة بتعملوها في الحلويات
الجرسون يبتسم:
– حضرتك كل الحلويات هنا حلوة
– لا كلها ايه ’ طب خبي عليا الحقيقة شوية .. انت كده بتغريني اكلها كلها وانا عاملة دايت
الجرسون يبرق ويبص ليها من تحت لفوق ويقولها بابتسامة:
– اه لا باين فعلا
– باين صح؟ لسه طالعة والله من الجيم فعلا حالا .. كنت حاسة اني خسيييت
الجرسون بتريقة:
– اه باين جداااا
– حيث كده بقى كافئنييييييي بأحلى حاجة عندك ويااااه يااااه لو تبقى مليانة شيكولاتة سايحة بقى ومليانة كمان فروالة وموووز وكيوووي يااااااااااااااااااه فتحت نفسسسسسي
– ههههههه ايه رأيك يا فندم اعملك طبق مخصوص
– وااااو انت كده بدأت تفهمني صح ’ على فكرة احنا هنبقى صحاب هنا .. اسمك ايه ؟
– حاتم
– وانا تخاتيـ …. قصدي هبة اسمي هبة
– هههه عاشت الاسامي يا فندم عشر دقايق واجبلك طلب حضرتك
****************************
يروح الجرسون وتبدأ هبة تسمع في الـ I pod بتاعها الاغاني كعادتها فتيجي اغنية لماجدة الرومي تخليها تسرح لبعيد ولذكرياتها مع راجح وفجأة تخرج تلفونها وتطلب رقم راجح ..
***********************
راجح يكون في مكتبه بيخلص تصميم وراه وفجأة تلفونه يرن ’ يفضل مطنشه وقبل ما يقفل بثواني بص للرقم ولقاه غريب بس محطش في باله ورد بعدم اهتمام:
– الوووو
وفجأة سمع صوت موسيقى ’ رجع يبص للرقم الغريب التاني وقال جوة سره:
“ياه يا جينا عليكي وعلى زنك ’ افففففف”
وقفل التلفون قبل ما الاغنية تبتدي غنى …
*****************************
بصت هبة للتلفون لقت السكة اتقفلت فاستغربت ’ فرجعت اتصلت بيه وشغلت الاغنية من تاني
*****************************
رجع التلفون يرن عند راجح واللي رد بعصبية وقال:
– ايه شغل العيال ده!
وطبعا ملاقاش رد ’ لكن لقى صوت ماجدة الرومي شغال بيقله:
ابحث عني
أنا في مكان ما.. أغوص وأنتظر يديك
أنا في مكان ما.. أنطفئ وأنتظر عينيك
ابحث عني
أنا في مكان ما… أناديك وأنتظر مجيئك
أنا في مكان ما أحبك
أحبك
فجأة قلب راجح دق وحس وكأن الحياة فجأة ردت ليه تاني ’ فضل يقول الووو بس مكنش فيه حد بيرد عليه غير صوت ماجدة الرومي بتغني .. سكت وبدأ يركز في اصوات المكان اللي جمب الاغنية اللي شغالة .. سامع صوت موج البحر وسامع صوت نفس .. هو عارف النفس ده كويس ’ حافظ الطريقة .. قلبه بدأ يدق بسرعة شديد مع كلمات ماجدة الرومي …
امنحني وهج عينيك ليكون وطني
وطني الوحيد
ضد أوطان البشر
امنحني حبك.. فلا أدخل حرباً من حروبهم
ولا يأتيني خبر السلام أبداً
مد لي يديك من فوق حقيقة هذا العالم
أحبك
ابحث عني
سرح راجح وبدأ يشوف ملامح هبة بتطير في الهوا حواليه , كان نفسه مع كل آآآه ماجدة الرومي بتقولها يجري على هبة يخطفها من الكون بحاله ويسافر معاها لبعيد .. كان نفسه يصرخ فيها ويقولها انه مش قادر يعيش حياته في بُعدها وان مفيش شيء في الكون ممكن يبعدهم عن بعض .. نزلت دمعة غصبن عنه وماجدة الرومي بتقول “أحبك” وفجأة الاغنية خلصت واتقفلت السكة فورا .. طلب زي المجنون الرقم التاني بسرعة لكن لقاه مقفول .. فرمى الموبايل على الارض من الغضب وفضل يزعق:
– ليــــــــــــــــــــــــــــــــــــــه يا هبـــــــــــــة ليــــــــــــــــــه مش قادر افهم!
*********************************
قفلت هبة التلفون وفضلت تعيط جامد وتقول لنفسها:
“وحشتني اوووووي يا راجح ’ ياريتك ما كنت ظهرت تاني في حياتي ’ يا ترى اتجوزت جينا عشان تنقذها ”
وفجأة جه الجرسون وفي ايده طبق كبير فيه كريب مليان نوتيلا وعسل وحواليه موز وفوقه فروالة وكيوي وكلهم متغرقين بالنوتيلا :
– ايه رأيك يا فندم عملتلك تشكيلة حلوة
هبة بتمسح دموعها بسرعة وتبتسم:
– انت برافو عليك يا حاتم جيت في الوقت الصح ! انا فعلا كنت محتاجة ده
– اي خدمة يا فندم
******************************
ثامر في اوضته وواقف قدامه واحد من البودي جاردات:
– قولي كده بتعمل ايه بقى يوميا
– مفيش يا فندم ’ حياتها روتينية خالص! او بمعنى اصح هي تقريبا مبتعملش في حياتها غير انها تاكل وتدخل جيم خمس دقايق بالكتير وتطلع منه تكمل اكل !
ثامر بعصبية:
– مبتشووووفش حد ’ مبتكلمش حد ’ مبتخرجش ؟؟ مبتروحش ديسكوهات
– لا يا فندم معظم الوقت بتسمع اغاني ع البحر وتاكل ’ يا بتقضية في اوضتها
– حلو..ممممم يعني خطفها سهل
– بس يا فندم هتتعبنا في الاكل بس ’ لحسن دي بتاكل كتير اوي
– ممممم مش مشكلة مش مشكلة
– نجهز يا فندم
– اجهزوا ’ النهاردة الموضوع يخلص ومش عايز اي حركة مغفلة! لان اي تقصير هيكون فيها رقاب !
– تمام يا فندم
– غورواااااا من ووووشي
*************************************
أمل كانت قاعدة في البيت بتعيط وفجأة جرس الباب ضرب ’ فتحت ولقت راجح ’ مقدرتش تمسك نفسها من العياط فحضنته وانهارت من العياط :
– بنتي وحشتني اوووي يا راجح
– طنط مقلتلكيش لسه على مكانها
– كل ما تكلمني بتخانق معاها وتفضل تعيط وتقولي مش هقلك عشان مش عايزة حد يعرف
راجح بعصبية:
– يعني بتهرب مني! طب لييييييييييييييييييه
– والله سألتها كتيييير كتيييير يا بني ومش راضية تقولي حاجة ولا تنطق واخر مرة قلتلها انا لو جرالي شيء هيكون بسببك ودي راسها حجررررررررر
– طب وبعديــــــــــــــن الاقيها ازااااااي !
– والله غلبت ومش عارفة اعمل ايه !
– بتكلمك امتى يا طنط
– هي المفروض بتكلمني الساعة 10
بص راجح لقى في ايده الساعة 9:30 فقال:
– تمام يعني هتكلمك بعد نص ساعة .. انا هفضل هنا ومش هتحرك ولازم اكلمها النهاردة يعني لازم! كفاية دلع بقى
**************************************
تخلص هبة من حمامها وتكون لابسة بيجاما عبارة عن بلوزة باكمام خفيفة مرسوم عليها دبدوب ومكتوب
تحته ” I miss u ” وبنطلون برمودا .. تمسك موبايلها تفتحه وتكلم مامتها واول ما تتفتح السكة راجح يرد عليها :
– انتي فين يا هبــــــــة
تبص هبة للرقم اللي ضربته بس تلاقيه بتاع مامتها ولسه جاية تقفل التلفون فجأة لقت باب بلكونة اوضتها بيتفتح واتنين رجالة بيهجموا عليها ’ وقع الموبايل من ايديها والسكة مفتوحة على الارض وهجموا الرجالة خدروها بعد ما فضلت تزعق وتقول:
– انتوا ميــــــــــــن ؟ انتوا عايزين ايـــه ’ ازاي امن الفندق يخليكم تعملوا كده
وفجأة هبة تبدأ تغيب عن الوعي ويبتدي يشيلوها .. فواحد منهم يقول:
– دي تقيلة اووووي ’ شييييل يا اخي معايا
– اففففف منا بحاول انا مش عارف ثامر بيه ده عايز من البرميل ده ايه
– شيييل وانت سااااكت بسررررعة قبل ما حد يكشفنا
****************************
في نفس الوقت راجح كان مع هبة على التلفون قبل ما تقفل السكة وبيقلها:
– اوووعي تقفلي يا هبة ’ لازم افهم انتي بتعملي كده ليه
وفجأة سمع صرخة هبة من بعيد وعمالة تقول:
– انتوا ميــــــــــــن ؟ انتوا عايزين ايـــه ’ ازاي امن الفندق يخليكم تعملوا كده
وبعدين صوت رجلين وسمع كل الحوار بينهم واول ما سمع اسم ثامر ’ اتجنن راجح وقفل التلفون وقعد
يزعق بعصبية ويقول:
– ورحمــــــــــــــــــــــــــــــــة أمي لو لمسها ليكون اخر يوم ليه على يدي
بصت امل باندهاش وصدمة:
– ايه اللي حصل يا راجح؟ مالك ؟ هبة فين يا بني؟
بص راجح بتوتر لأمل وقالها:
– متتصليش عليها خاااالص يا طنط ارجووووكي ’ اووووعي تعملي ده .. انااا خلاص هجبها .. هجبها
يا طنط
– يعني عرفت هي فين
– هعرف وهجيبها .. اصبري بس عليا
*****************************
نزل راجح فورا وركب عربيته وهو بيتصل بجينا اللي ردت عليه باستغراب:
– ايه ده غريبة راجح بتتصل بيا
– اسمعيني هنا كويس ’ انتي تلبسي فورا والا هاجي اخدك زي ما انتي كده
– في ايه ؟ ايه اللي حصل
– انتي اخترتي طريق وعليكي تكمليه ! هبة ملهاش ذنب تدفع تمن غبائك ده فاهمااااااني
وفضل راجح يصرخ ويهدد جينا كتير اللي طبعا انهارت اول ما عرفت ان ثامر خطف هبة …
يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية تخاتيخو)