رواية كحل عرب الحلقة الثامنة والعشرون 28 للكاتبة زينب ماجد

(مرض سرحان ) 

ضيعتني ….!

ومدري ليش الليل مو ليلي ..

ولا دنياي دنيه ..

ولا على جفوفي انلظم خيط الثلج ..

والعين ..

عميه …

وكلت لا ينهظم راعي الروح …

لو بينت وسط الروح ثنيه …

وضيعتني

ومن ردت كربك … لكيت الخيط سايب

ليش ..؟؟؟

يا تالي الحبايب ….

ليش ؟؟؟؟

ماكتلي اعله غفله …..

وضيعتني

(عريان السيد خلف ) 

سرحان : و علي ما دريت الا الساعة … هدوة بس بهداي افهمنج … هدووووة 

– ميل عني ، حركة افادي و دمعتي عساها بحظك و ابختك و ما تتعداك . 

– وباتعس عسني اهلى هالدموع ، و علي ما احملنهن .. هدووووة موش العرس خلافج روحي مالي نفسي بيها … 

-بعد ما ضيعيتني جاي تكلي هالكلام ، شلون اطاك كلبك و صديت عني شلوووون . 

– ولج وعلي ما الي علم بالصار كله 

– لا تجذب علي ، ميل عني … 

تبجي و انا حيلي اتوهدن اعلى حالها.  اريدن اكضنها فكدت جدامي و تبجي و الباب تندك من البيت .. 

تسودن راسي وانا اشوفن دموعها .. كلشي احملها الا ادموعها .. و هي تلوم : راح تتمدد احذاها .. راح تحط ايدها اعليك و تصير حرمتك .. انا شنهو ومنهو يسرحان ، انا الغريبة و ذيج مرتك … انا راح اموتن . 

– بيش احلفلج و تدكين انا ما ودي هالزواج . 

اندكت الباب اعلينا .. و انا كتله : اسمع دام انت مغصوب اعلى قسمتك جا خل كل واحد ينغصب بقسمته و يمش لحاله ، و من اليوم انت موش ولفي ولا كلبي يريد شوفتك يسرحان . 

 : هدوة … اسمعي هدووووة … احاجييييج 

حجت و طلعت الباب تندك … فتحت الباب و طبت امها كضتها من راسها .. هميت ابعد امها صاحت: 

– حدك يبن ال مطر بسك … امش لعرسك و هد بتي ولا تكرب صوبها وانساها و خلها يطيب كلبها من اثامك . 

– ام ستار 

– هش و ما اريد جلمه ، انا الجنت احسبنك وليدي هيج تعمل بحالنا .. من ورا ظهورنا تواعد بنيتنا و اتطيح كلبها بدروب المهانة . 

– انا رايدها اعلى سنة الله ورسوله و يو مية مرة و يو مو هلي و اعرافهم ، لو تتكاون (تلتم) الدنيا اعليه اخذها اخذه . 

– اخذ مريتك و رايتك بيضة ولا تكرببنا 

دمغت اعلى راس هدوة و كالتلها: حسابج غاد يالنمرة ، ولج انا تصكين الباب هيج و تخليني موهدنة . 

صحت : بهداي وياها …. 

ما ردت اخذتها و مشت ، مشيت من البيت طلعت من باب حجرتي للقصر ، جايبات ملاية ادكلهن و هوسات عرس، عفتهن و طلعت برا . 

طلع جدامي كريم: ها يخوي 

-ابوك هاذ اعلى سوايته اليوم ، الي وياه يوم بس الله يعلم بيه . 

– السواه وياك و ان كونه ما يصير لجن هو شايف بيه مصلحتك . 

اجا خنجر : ها يسرحان 

-احسن الهوة موجف عد زردومي ما يتعداه ، اختنكت و علي . 

– يلا يخوي شد حيلك ، هاي بعد شتسوي ، الخيرة بختيار الله . 

كريم ضحك : جا انت هم تعرف الله . 

خنجر : شنهي ولك شايفتي طاك ركعه لهبل و تنشدني . 

ضحك كريم وكام يلاشي، كمت عنهم .. سكتوا و تبعوني . 

هدية : جبت الدرب كله امي تصكع اعلى راسي وتحجي و تدرم من كون عفتها و صكيت الباب، لجن ما داريه عنها كثر النار الشابة بكلبي .. 

جا يصف حذاها اليوم .. 

يعاينلها و تعاين له و تشبع شوفها برسومه الاتمناهن .

انا الأكضي الليل اساهر الونة اعلى طرواه .. و هي تكضي الليل وياه . 

جا ياهو اليبرد نار كلبي . 

رديت للبيت و كضتني امي من شيلتي و جرتني للحجرة ، و طكتني و تصم اديها حيل و تضرب و تصيح : اتصكين الباب اعليه و تنفردين وياه بلا مستحى ولج ، ما ظلت حشمة ولا كدررررررررررر يالنمرة ، اليوم اخذ حيفي مننننننج . 

وانا اون و اشكف الطك بديه .. 

كضتني و عضتني حيل من زندي كمت اصرخ و ابجي ، دشت حبوبتي و هي تكللها : شمالج تسودنتي هدي البت شعملتي بحالها شنهي شبلاج وتوليتيها . 

– ميلي عني و خليني ابرد افادي بيها ، ولج اهديوة اكضنج يو لا … صبرج علي لا ما شلشت حالج و اخليج عتبة الباب ما تشوفينها . 

حجتها و تفلت علي و مشت .. 

و حبوبتي ظلت كاعدة عدني و تمسح اعلى راسي و انا انشغ و ابجي .. و هي تواسيني : 

– ياله حبوبه ياله جا هي هم ام امج .. ما تكرهج لا تبجين يبعد حبوبتج ، حسي ادموعج ، عاينيلي . 

درت منها و حطيت راسي اعلى الوسادة و كمت اناشغ و ابجي، مسحت اعلى راسي و جرت غطا ، و غطتني و طلعت لمي تتعارك وياها شلون طكتني . 

اجت يم راسي جمارة .. ما حجت بس ظلت كاعدة عد راسي وانا ابجي، ما درت الها ولا كمت .. 

رومه جدامي تتخايلي .. ساعة اتخايل يضحكلها و اطكن قهر .. و ساعة اكولن لا ما يجابلها سرحان يحبني .. واردف روحي و انا اكللها جا الرضا العرس ما يرضالها الضحكة … 

لجن انا الك يسرحان .. لوهدن كلبك و اعلنه و اطلع جروح كلبي كلهن ابيك . 

… 

الشيخ : ياله بويه فضونا و خلنا انزف الولد اعلى امريته . 

سرحان : درت اله اعاين .. شكلله و شحجي .. ما خله الحجي الينحجي … النطكت صاح تجاوزت و السكتت شبعني ضيم . 

فضوا ه سة العشا و الزلم فرت تسلم و تبارك .. و كالوا ياله خلنا نزف العريس .. كمت اعلى حيلي ..عدلت العباية العلى جتفي .. كضني ابوي من ايدي 

– بياض البت اريدنه بعد ساعة 

تنهدت و درت عنه و زوفوني الحجرتي .. دشيت بت يطلع عمرها ١٧ .. كعدت حتى نسيت اسلم اعليها . 

كعدت نزعت العكال من راسي و دنجيت و افرك براسي ، احسنه راح ينفجر اعلى كثر ما متضايك . 

فكيت دكمة الدشداشة .. و طلعيت علبة التتن من جيبي .. لفيت جكارة و جريت الزناد ورثيت و كمت ادخن و انا اعاين المجان الوكفت بيه هدوة .. و صياحها و بجيها جن يرن بذني . 

نسيت وياي بت بالحجرة لا درت ليها ولا عاينتها .. كاضة الجكارة اورث و اوجد بمچين هدوة.. 

من اتضكر ادموعها تضيج بيه الوسيعة و خلكي يضيك و اختنك .. جنت اتمنى ارسم البسمه اعلى اخدودها … تالي خليت الخدود جرف لدموعها . 

اندكت الباب  صحت : ياهووووووو 

فزت البت 

.. دخلت صبيحة وبيدها صينية عشا ،عاينت علي وعل البت و حطت الصينية بالكاع ، وحجت : خالة جبت الكم العشا ، كوموا ياله .

صديت عنها و ما درت ليها ، تكربت : جا خالة انا شلي غرض و صاد عني . 

-من يمتى عرفتي بهالعرس الأكشر ؟ 

– من امس كاللنا الشيخ .. 

– من امس و انا الظهرية يالة دريت ، هيج مسترخصيني ؟ 

– بيناتنا العباس ردت اكللك و اخبرنك لجن الشيخ هو الما رضى احد يجيبلك طاري. 

– بالعافية اعليكم الشيخ، فارجي خالة . 

– سرحان يمه 

– اصبحين اعلى خير … صكي الباب . 

طلعت من عدي و درت اورث، هيست حس بچی ، اندرت للبت لكيتها مدنجة و دموعها تهل ، حجيت بنتر : شمالج تبجبجين براسي ؟ 

بشرى :-ان جنت ما رايدني ردني لهلي . 

-كومي تعشي ومالج بيه . 

ما كامت ، و ظلت تبجي .. عفتها و كمت و دشيت للبين من الباب الأخرى ، شفت امي كبالي : ها يمه شو طلعت 

– دشي ليها واحجي وياها . 

– شمالها ؟ 

– ادري عنها تبجبج براسي و انا خلكي واصل لهامتي . 

كامت امي و دشت للعروس و انا كعدت بالهول … اعاين للمجان الكواغد دمغت بيه هدوة ..  و الضيم بربد اعضاي .. كله مني .. انا الواعديتها و ما جنت كد الوعد و تالي انسبت البت بسبتي . 

جاي اموتن قهر من اشوفن رزحي مقيد و ما بيدي شي، لا اكدر اهدن العروس و تهج و لا بيه اعلى الكعدة و اتحملهم . 

كامت امي و اجتني : سرحان يمه العروس ناطرتك كوم ليها يوليدي . 

-ما اطيك شوفتها . هديني بحالي يمه 

-جا البت شذنبها ييمه ، فوك ظليمتها تظلمها . 

– وانا شذنبي بيها ، ادري عنها رايد عنها، اخذيها للجابها خله يتكفلها ، انا مالي بيها شي . 

اندكت الباب ، مشت امي تفك ، الباب، دخل الشيخ ، حجه : سرحان بحجرته 

دش تفاجئ انا كاعد بالگبة : شعدك هنا . 

– ما درت ليه 

– انا احجي وياك شعدك هنا

– شنهي معناة سوايتك هاي وياي ، فسرلي شتريد مني . 

– رايدك تصير زلمه و تبطل تكسر ظهرك لجل النسوان . 

– و ساعة الكسرت البت و نزلت دموعها و ظالم الثانية و مال خلك روحي اشوفنها .. صرت زلمه مو .. هسه انا زلمه بعينك و هساع ياله احترمتني ، يمتى تفك مني و تهد ركبتي اختنكت من طبايع مضيفك اختننننننننننننكت .

حجيتها و هميت اطلع ، كضني : انا موش ظالمك ، انا بس رايد الهيك عن عشك ياذيك 

– و العملته ما اذاني ، يا مصلحها هاي التحجي عنها يا مصلحة . 

– انت تعرف شي و انا اعرف شي ، الايام جدامك و راح تثبتلك يسرحان بويه وكتها تكول بس ابوي الصح و تعض ايدك ندامه اعلى ايامي . 

– شنهي السويته و استاهل كل هاذ .. واعديتها و كتلها وياج مو ويا غيرج .. تغصبني اعلى المر ليش . 

– شجابرك اعلى المر غير الأمر منه ، البت وراها عمام ما ينحطون بالعب … لا يطيكونك ولا يطيبلهم خاطر منك دام بيك رس من ال ضاحي ، شد حيلك ابني ، الناس ناطرة بياض البت خاطر ارفع راسي بيك … ياله . 

… 

حاكم : ها مساكم الله بالخير 

كواغد : شنهي شو البيت فارغ مامش احد 

-عمتي منسدحة و هديوة نايمة و جمرة عد راسها ، 

– جا صبيلي استكين جاي، خليني اسولف الج . 

راحت خدرت الجاي و جابته ليه ، صبت و انطته : شنهي فض العرس . 

– عرسيش .. جنه فاتحه الوجوه مغندبة ، سرحان مدري شماله جنه مغصوب اعلى العرس. 

– ياهو الغصبه . 

– الشيخ ، حسب ما سمعت من كاطع ، عاشك وحدة من ال ثجيل و الشيخ رافضها و غاصبة اعلى الزواج. 

تنهدت : ايييه مالنا غرض، الله يوفكهم . 

– اجيت اسولف الج اعلى كهوة حجي نوري 

– شمالها ؟ 

– الزلمه كبر و ما بيه حيل وكفه ، و قررت اجرنها منه . 

– جا انت موش تشتغل بالمعمل ويا سرحان ، شنهي بعد شغل الكهاوي . 

– ايد وحدة ما تصفك .. ايمان اظننها حبلة … و مرت ستير راح تجيب و ستير بلا عرس ، و جمرة بالمدرسة .. و امي كبرت و ادويتها زادت .. كل هاذ صرف .. انا رايد اخذ الكهوة و اشغل بيها ستير و اكف جدمه من الدياحة و الشرذمه بالشوارع النهار كله ، جايه فرخ خله يتكوه ويصير زلمه و يعتمد اعلى روحه . 

– بيها الخير 

– شنهي شمالج ، عليش ضايك خلكج . 

حجت و اجت جمارة حبت ابوها بخده و كعدت يمه : شلونج 

– مو زينه 

– عليش بويه 

– هديوة بس تون بويه مكرودة . 

اندرت لكاغد : جا شمالها هدوة . 

– غافلتني ومشت لعرس سرحان خاطر تصف ويا راديون ، ومشيت ليها جتلتها ورديت . 

– عليش جتلتيها ، جا خليتيها تخلص العرس و ترد هي هم بت خديثه و يعجبها الغوى و الهوسات و العرس. 

– البت التعتب الباب بلا علم امها اكضنها و افصم ظهرها ما عدي بت خفيفة . 

– البت صغيرة يكاغد .. بهداي وياها . 

– انا اعرف شتصرف وياها . 

– تعتازون شي ؟ 

جمارة : نام يمي بويه الليلة 

– لا بويه ذيج تخاف وحيدها ، ياله انا اروحن يو اعتازيتو شي ندهولي . 

– عساك سالم . 

كمت من حيلي .. رحت لهديوة : ها هديوة بويه شمالج ، هاااه شمالها عويناتج مورمات ، شجاج بويه . 

– ما بياش شي . 

– ياله بويه هي هم امج و تخاف اعليج، تريدين تمشين غاد تكعدين وي ايمان . 

– لا بويه ما اريدن. 

– اعلى راحتج ، لا توهدنين حيلج و تورمين اعيونج ، انا يو كايلتي جا خذيتج وياي، ياله ، كومي غسلي وجيهج و اكعدي . 

– اريدن انامن . 

– نامي 

حب راسي و كام مشى .. زدت بالبجي 

مدري شبيج جن شعوري هايج ومن اقل موقف يهلن دموعي .. كل هاي وافكر .. هسه هو وياها ؟ 

نشدها عن اسمها .. يو يعرفها من زمان . 

… 

رحت بس ذكرياتك ما خذتها وياك 

و غيري استوطنوك و انا منفية

شكد صعب البديك و من اديك يروح 

و حنينه يصير للما بيها حنية .  

تمنيتك تحس و البيه بيك يصير

تدري شكد الم بدموع البنية ؟

… 

سرحان : كمت من مجاني ، لبست دشداشتي و طلعت .. و البت خذت بياضها و مشت لمي … 

امشي و انا اتخايل ادموع هدوةو ظنونها . 

شجاي تفكر .. و شجاي تحس .. 

مديت ايدي بسطل الماي يجرش بارد .. و الجو يكتل .. ما حمست و تعليت بيه ، جريت دشداشة لبستها و طلعت بطركها … و تمشيت الماي يجري من شعري و دشداشتي مرطبة . 

خذيت التتن و الزناد و طلعت من البيت ، تمشيت العجد و انا ما اهيس لا برد ولا حر و فكري مشدوه بيها . 

كربت لصخرة و كعدت جدام الشط .. 

جلماتها يرنن بذني جلمه جلمه .. 

الله لا يطيك 

تحلف بالعباس و ظالمني .. 

طرت اعلى بالي تهديدها و هي تكلي كلمن يمش بقسمته . 

جا يو سوتها ورضت بقسمتها ، و يجي غيري يكابل هواي .. انا اتحمل هدوة افادي احطنها بدين غيري ، يو سوتها ساعتها كتبت اعليه الموت . 

كل هاذ وادموعها اليتراولي .. ما انساهن و كلما اتخايلهن .. اكوم اتحسر و اتنهد قهر .. 

اجيبن فكري منا و اردن بيه منا ..  

اريدن بس درب يوصلني ليها ، لو فد طريقة اكدر اكسر نهوتها و اخذها .. لو تظل علي اخذنها و اشرد بيها لديار ما يعرفنا بيها احد ، حتى من العراق اطلع .. 

بس ساعة الافكر بهالأحتمال .. تطرى اعلى بالي العواقب ..حاكم خوش زلمه و رفيجي ما يستاهل الفضيحة . 

وابوي يتوهدن بثار اله اول ما اله تالي و ما تفض اهدر دمي و دمها و دم ولدي منها لو صاروا … 

بيا طريقة اقنع ثجيل و شلون اخضعهم .. 

مامش حل منين ما اجيبنها مسدودة 

كمت من مجاني وانا حيل ما بيه ، مشيت للجول، شفت الخيمة مالت خنجر و رفجانه السكارى ، من البرد حاطيلهم خيمة و يغنون ويعزفون اعلى العود و يشربون . 

شلت ودشيت بكعدتهم .. 

كعد خنجر من مكانه : ها جا موش اليوم عرسك يخايب . 

– بالله اسكت مني ، و هدني 

– كرب اكعد .. 

شاعلين نار و جويعدين ويطكون كاس و يشربون وهاذ يعزف ويغني  … كاله خنجر .. غنيلنه يا حريمه . 

كض العود و دندن … يا حريمة 

اسنينك العشرين ما مرها العشك .. و العشك خايف 

يا حريمة 

دمعت عيوني اعلى صوته … 

وساعة الكال ( يا زلف يتغاوى ويا الليل بطراف الكصيبة .. هاك عمري الما غفه و بطيف ما مره حبيبه ) 

طرت اعلى بالي اول لحظات شوفها ، ساعة التترس بالماي و كصيبتها اتطيح و ترد تشيلها ، تبسمت و الدموع بعيني ، اعلى نغمات العود . 

بجى خنجر … درت ليه كام يبجي و يسب بالدنيا و ظلايمها … درت عنه و ابالي سكر و كثر المشروب .. 

والصاحب مستمر يغني .. كام يشرب بقوة .. ردت اوكفنه .. لجن مالي خلك ادخل بيه .. هديته . 

صفنا بالنار و احنا ننصت لحس الغنا و عيونا مدمعة ضيم … حجه خنجر : جا شيصير لو يطونياها .. وعلي اتوبن اعلى اديها .. الحرام ما اكربنه و انعلت امي وامي ابوي يو ما مشيت بصف لحايط لجلها . 

ندسه صاحبه و هو يكله : شمالك دبسك .. هد الشرب 

– جيببببب .. ما اهد الشرب يو ما ردتلي راديون . 

درت اعاينله .. يبجي ويشرب 

– خايب لا تخربط شماااالك ، اصحى ياله 

-صارلي ٥ شهور ما شايفها … 

حجه صاحبه : تراه جاي يخربط . 

خنجر : انا الوهدنت روحي بعشك ما منه ظنه و الا انا ياهو و الشيخ يطيني بته . 

– كمت اتذكر كلامه اعلى البت اليحبها و يسولفلي اعلى المستحيل البينه و بينها و ما مرة نطك بسمها .. تنهدت ساعة العرفته بعشك منهو متوهدن . 

كمت من مجاني و عفته … صرت اتذكر حال اختي راديون .. صفناتها و خمولها ولا جنها ذيج الكمرة الجانت تشع .. و كلما انشدها اعلى حالها تكلي ما بيه متضايكة من كعدت القصر.  .

جريت نفس .. وكمت امشي .. لجن صرت اهيس حرارة كضتني و عيوني وجرن .. و الألم كض راسي دوهني . 

رديت للبيت .. صرخت امي : ياااا بهالبرد طالع بهالدشداشة شمالك يمه تسودنت .. 

– يمه دخيلج بس فراش ، راح اطيحن . 

ركضت مدتلي فريش .. وانجطلت .. دثرتني ب٤ بطاطين .. بس الكحة كضتني و خشمي انكص من الفلاونزة .. دثريت روحي ونمت ..

للصبح هيسيت نار وواجة بلشتي .. الوجع كضني .. وكل كحة تشك صدري من اكحها. .. و الصخونة عمت عيوني . 

ردت اكومن من الفراش ما كدرت . 

وادم جثير جبلت اعلينا تبارك .. ما كمت ، اجا الشيخ : فهمني شنهي نومتك و الوادم تارسة القصر 

ردحة : سرحان مريض يشيخ 

– شماله مريض 

– امس طالع بعز البرد بالليل وكضته الصخونه . 

كرب ليه .. حط ايده اعلى كصته هيسها نار : جا شكلل للوادم … مريض ما يكدر يشوفكم .. فشلة وعلي 

كام يكح سرحان ووكام من مكانه ، حجه : يمه ناوشيني الدشداشة 

.. لبست الدشداشة و عليها السترة و طلعت ويا ابوي كور اجر اجدامي ، رحت وياه لديوان القصر .. دشيت الزلم جثيرة ، فريت الديوان اسلم اعليهم لجن حيلي مهدود و المرض داكني 

وكفت عنهم .. ردت اكعد بمجاني ظلمت عيوني وما كمت اشوفن بيهن ، كضيت ايدي ابوي ، سندني زناد : شمالك 

– ما كمت اشوفن 

حجيتها و فكدت ما دريت بعد. 

تراكضوا الزلمه هموا ليه يتلاكفونه و يسندونه و هم يكولون عرفنا مريض و هاذ يكول عين صابته يشيخ و ذاك يصيح عين ما صلت اعلى النبي 

والشيخ يصيح اعلى الحراس ويشيلون بسرحان ، خذوه للمضمد .. كدر يصحيه و اطاه دوة .. وردوا للبيت .. وخلوه بحجرته نايم . 

ثلث  تيام و سرحان ما كايم من الفراش و كل ما يكوم يتخربط ويوكع .. كضه الشيخ و خذاه للمستشفى كالوله عده ( حمة مالطا ) 

بس النسوان ما اقتنعن بهالحجي وحدة تكول سحر و الثانية تصيح مشرب ، وناس تحرض على مرته الجديدة يسرى ، و خواته من الشيخ هدن عليها لعبن بحالها فلك و تهمنها مسوية للولد سحر .. 

والبنية تبجي و تكللهم  (والله ما عملتله شي ما كربت منه )  … ما يصدكنها و ياهو اليجي مسير يبارك يكللهم ، البت كصتها موش خير .. خايبن لا تكرط راسه ويموت ، طلكوها وردوها لهلها . 

بس الشيخ ما يرضى بهالكلام .. و وصى راديون بته تكض البت و تكعد وياها و تعلمها .. 

عادة اهل العرب لو صار عدهم مريض .. حتى لو خذوه مستشفى و عرفو حالته .. يردونه للبيت و يطونه طب عرب و ياخذونه للسادة يطيهم حرز .  

الولد ميت و يختنك والنساوين كل وحدة تجيب الها علاج و تكللهم هاذ يفيدة ..  وكلساع ردحة مفورة عشب و مطيته لسرحان . 

ويجيبن بالحرز و يدحسن جوا راسه خاف بيه سحر و الحرمل يطكطكن يمه .. خاف مضروب عين .. 

وهو عنده تحسس قوي بصدره 

ساءت حالته كلش ، صار يكح بقوة و يذب من راسه ، شافوا وجهه صار اسود كلش .. كضوه الزلم و طلعو بيه للولايه و دخله الشيخ مستشفى على حسابه . 

لما فحصه الدكتور .. تسودن و ظل يلوم بيهم : هاي انتم شمسوين بالزلمة ، شنهي رايدين تنتقمون منه ، شعاملين بحالة 

زناد : دختور النساوين اطنه شراب، و طكطكنا حرمل يم راسه ، لجنه اختنك و جبناه ليك . 

– الزلمة متسمم يا شراب يا حرمل . و صدرة منتهي . 

دخلوه طوارئ .. و حالته واصلة الموت .. 

لا يسمع احد ولا يشوف احد .. 

ظل بالمستشفى ٤ ايام على هالحال .. 

الشيخ كلش انقهر .. كامت روحة تلوب اعلى وليده .. 

كعد اعلى راسه وسرحان ما داري بأحد . 

حب راسه .. و حجه : ها يسرحان بويه ، شنهي هالنومة بويه ، يبو طول الحلو .. جا عفت ابوك و كاض المستشفى … و علي يو ادري بعشكك بيه ظهر جا حاربيت وياك و اخذتها لجن اعرف كلوب عدويني و انتم ولدي ، يناطرون زلتكم خاطر يكسرون كلبي بيكم . انا من زوجيتك بس ردت الهيك بمرة و مسؤلية عن هالدرب من كون اعرف يو ظليت خالي فكرك يظل وياها و ما من هالدرب رجيه . 

كام يحجي و يبجي على راس ابنه ، و يحاجية : وليدي بويه ، سرحان .. 

جر شطفته وحطها اعلى عيونه و كام يحس بدموعه و يبجي. 

سرحان بصوت تعبان : هاا بويه 

فز : ها يوليدي 

– كلبي ياذيني بويه . 

– هساع يجي الدختور ويشوفك ، خايب كريم ، زناااد ، اندهو الدختور لخوكم .. خلوه يجي. 

– اريدنها 

– انطر بويه .. شواي و الطبيب عدك 

– شوفه وحدة لوجه هواي ترد عافيتي ليه. 

– اجوي مجانها يبوي و طيب كلبك منها، تراك لو ظليت اعلى هواه تخسر رويحتك و انا اخسر وليدي . 

– اريدنها بويه . 

– جا بيدي و جايبها ليك ، يو خيريت اعلى بنات السلف ، خيرتهن احطها حدرك الساعة الا ال ثجيل .. كرباهم نار تحركك بويه . 

اجا الطبيب و كام يفحص بسرحان ..

بعدها بقى يوم واحد بالمستشفى و طلعوه .. بعد ما منع الطبيب اي طب غرب ، لا عشب ولا ورق ولا زهورات ولا حرمل .. صدره تعبان .. و المرض بعده بجسمه . 

وصكد رده الشيخ للبيت ، ووصى المضمد يجيله باليوم ثلث مرات يعاينه . 

راديون ما تحملت حالة سرحان .. و هي تعرف حال هدوة و كلبها .. كضي عباتج و اخذي وحدة من بنات القصر ومشت لبيت حاكم . 

دكت الباب ، فكتلها جمرة : هلا شلونج يجميرة ، جا هدوة وينها ؟ 

كواغد : جمرة ياهو اعلى الباب 

– يمه هاي بت الشيخ 

كواغد : هلا يراديون شلون خالة 

– انشد اعليكم ، شلونكم خالة 

– هلا بيج يبعد خالاتج ، تفضلي 

– اللهم صل اعلى محمد وال محمد .. بيت العامر خالة 

– صليتي اعلى نبيج .. هله بيج 

– جا هدوة وين 

– خالة ان جانت جيتج تخص ذاك الموضوع ، لا تفتحينه ، من كون كلب البت لسه صوابه اخضر وموش طويبة و حالها ما يسر . 

– جا خالة سرحان الحالة يسر ، ما سمعتي باحواله . 

– سمعت و كالو بالمستشفى 

– لا رد امس جبناه . 

طلعت هدوة : شماله سرحان ؟ 

عاينت راديون بوجه كواغد ، حجت كواغد : شرايدة و تنشدين 

هدية : عليج العباس كليلي ، شنهي علومه   

دشت راديون و كعدت ، و هدوة تتبعها : فرحان وياها موش هيج . 

– فرحان ويا منهو ؟ 

– ويا مرته الجديدة 

– خايبة انت بطرانة . 

كواغد : شنهي جيتج يخالة 

– خالة انا ما اكدر اصبر اعلى حالة اخوي، من يوم العرس ولليوم و هو و الميت سوا ، وراح يروح من ادينه . 

صرخت هدوة و لطمت اعلى خدودها صاحت بيها كواغد : كومي دشي داخلي . 

– يمه بس….

– وغمه التغم حظج .. كومي حبوبتج نايمة داخل تروح تسمع و هاي ما عدها حجاية حدر السانها كلهن تكتهن جدام ابوج و تفضيحينا كووومي . 

– يمه صكد مريض 

– التمرض و الصحى احنه ياهو مالنا ؟ 

راديون : عليش تحجين خالة ، ترا هم ما اذنبوا. 

– لا خالة اذنبو ، سوالف العشك ما تجوز عدنا ، احنا ناس عدنا عادات و تقاليد و هالامور ما تمش، لا ياخذجن غوى الشباب يخالة ، تراها الكبار يو درت الدم يصير للرجب و البت منهي اعليها من عمامها يو دروا عاشكة نصير علج بحلوكهم ويامن يخلصنا من شرورهم ، كفي بلاج يمه وؤوحي لاهلج والله يشافي اخيج. 

– اطرديني يخالة 

– اتي بتي وكضيت عمري بخدمة قصركم وياما شلتج وداريتج ..و حسبة هدوة ، لجن خالة جوزي من البت و هديها بحالها ، انا ما اعول اعلى الله وابو الحسن علي يطيب صوابها و تنسى تردين تضكريها ، لا خالة ما ارضى . 

ان جان جيتج لشوفتنا احطنج اعلى راسي، و انا جان يخص هالموضوع ، اعذريني ما ارضى . 

كامت راديون من مكانها و كالت : مشكورة خالة ، بس يو صار بخيي شي بركبتكم. 

– ها خالة عليش بركبتنا ، شنهي اطيتها اله يو واعديته، انا احترمنكم الا اسوايات اخيج و مواعدة الفجر ويا بنيتنه ما تنحجي ولا تنكال .. ويو شكيته للشيخ احكنه لجن الزاد و الملح و الكربه الكاضاتني و مسكتاتني. 

طلعت راديون و هدوة ، يا دموع العين صبي .. كامت تلطم اعلى راسها : تدرين بيه بالمستشفى و ما تكليلي، ظن انشدنج تكلي فرحان و ما داري عنج .. تالي اعرف بالمستشفى ، عليش تضمين عني و تحركين افادي 

– هالزلمة تنسينة يهدوة 

– جا يو تكدرين تمحينه من كلبي، يمه وعلي كلبي راح يوكف . 

– ووكفتهم ، بسج حطي عكلج براسح و فكري، يو لاحت الجلمة ابوج شيجرى بحالة ، بكدج يو احد كربني اشيل الربد و اهطرنه بيه خاطر لا شيبات ابوي يلوحن الجلمة و يعايرونه بيه و انا وحيدة، شمالج انت نساية اهلج و سمعتهم ولج 

اثكلي الخفة موش زينه للبت 

– جا ما سمعتيها و هي تكول عنه عليل 

– جا شنهي انت الطبيب و اداوينه ، الله يشافي ، فكينه ولج شكيتي گلبي بوكاحتج. 

ظليت الوبن من سمعيت سرحان مريض ، يامن يصبر كلبي .. كمت واروحن و ارد بمچين واراوح و الروح لهفانة . 

تزوهرت و ساعاتي غصني و كل دقيقة تمر جن سجين بفادي تنغرز … ما اعرف شنهي اسوي و شلون اشوفنه . 

لثاني يوم وانا لا ليلي ليل ولا نهاري نهار .. 

اندكت الباب .. فكته امي طلع اخو يسرى : ها كواكم الله 

– هلا فلاح شلونك 

– والله يا عمه انا زين لجن اخيتي موش زينه 

– ياااع يسرى شمالها 

– عدها ولادة وهساعها  عد الجدة وحالها ما يسر وولادتها مستعصية 

– ياااع جا بعدها السابع 

– اي جاي تطلك جا شسوي . 

– ادشن اجيبن اعبيتي و اجي . 

دش و انا ظليت موجبه عد الباب اعاين ، اندار هو ضحك : ها بويه شلونج 

– هلا

– ياهي انت ؟ 

– انا هدية 

– هاااااه كبرانه هدية و صايرة مرة ، جا ما تمرين لينا شنهي نبزز .

– امي ما ترضى اطلع . 

– لا لا جا انا ابن عمج ، وكت التريدين اطلعين بس كليلي .

طلعت امي : ياله امشنا 

– جا عمي وينه 

– بالمعمل ، امش 

– هديوة ما تجي ويانا ؟ 

– لا ما تجي جا ياهو اليظل بالبيت ، امش 

اخذت الزلمة امي و طلعت من البيت .. حبوبتي جانت بالقطعة ويا الحلال .. و جمارة بالمدرسة . 

كضيت عبيتي و كلت ياله . 

فكيت الباب ، تخطيت العتبة و مشيت و انا اتلفت وراي ومغطية وجيهي بالعباية خافن يشوفني احد .. ومطلعه بس عيوني . 

نزلت للبستان مالت الشيخ مطر مشيت منه ما مشيت من العجد خاطر لاحد يلمحني و طريت البستان ليما وصلت للبيت، ادك بالباب .. والبرد كاص ادية كوة ادكن . 

فتحت بت ما اعرفها الباب ، حجت : هلا عيني ، تفضلي . 

– الحجية ام سرحان وينها 

– راحت شواي و ترد .. معتازة شي. 

– سرحان بالبيت ؟ 

– اي ، عليش تنشدين . 

– انت ياهي ، انا ما شايفتج 

– انا مرت سرحان. 

كضيت كلبي و انا اذبن حسرة يا كبرها : وينه سرحان 

– شرايدة منه 

– موش شغلج . 

دشيت للبيت كضتني: دية موش فالتو وداشة البيت اعلى كيفج ، البيوت الها حرمتها . 

– عمت عين الوكت الخلاج تكضيني هالكضة ، هدي ايدي. 

– اطلعي منا ، تره اندهلج الحرس من القصر . 

– كتلج هددددي 

دخلت للبيت .. فكيت الباب وكفت هي عد الباب ، حجت : صكد ما تستحين ، اطلعي ياله 

– انا موش جاية اتكاوم وياج ، انا جاية بس اشوفن سرحان وارد 

– وانت شنهو وتشوفينه. 

– انا الميت لجلها ، انا الاواني زماني و حرمني وحرم ولفي من عدي. 

دشيت وفكيت الباب بقوة، سرحان جان منتجي و مغمض غافي ، اعلى حس الباب النفك بقوة ، فز .. ساعة الشافني كباله كام يغمض ويفتح و يعاين. 

ظليت موجفه بمجاني .. اعاين بيه المرة ماكله اكل رايح نصه ، فجوج وجهه طالعه من المرض . 

كف الغطا و كام اعلى حيله ، تكربت منه مرته ، هملن دموعي ، حجت : منهي هاي ، عين وكحة ردت اطردها…… قاطعها . 

– اوكفي برا و صكي الباب 

ظلت مسبله بوجهه .. اندار ليها بخزرة : شكلت 

تحركت بسرعة و طلعت .. مشى و هو يتسند .. مديت ايدي و كتله : عدك .. لا تكرب ، انا ما ادري شجابني ليك و يو درو اهلي يذبحوني و يو درت امي تكص راسي لجن من امس و انا طاير عكلي اعلى شوفتك . 

– هدوة 

– حروف اسمي من اشفافك نغم 

جريت خشمي و انا ابجي : سرحان ليش هيج عملت بحالي ، تعاين عيوني الكضاهن البحي يو ما تعاين لشتي الكضاها الهظم خلافك . 

– كربي 

– انت اختاريت طريجك ….. 

– وعلي ما اختاريت و حات شوك عيوني لشوفتج ما اختاريت .. و المرض يشرح حالي يهدوة . 

-كتلي ادروبنا طويله و هديتنا 

– ما اهد ولا اهدنج و لساها دروبنا طويلة يهدوة ، تهديدج ما احملنه . 

– انا ما بياش خير اهدد من كون عيوني ما يشوفن غيرك ؤ ولا الكلب يدك بعدك . 

– كربي 

– انا اجيت بس لشوفنك ، امي يو ردت و ما لكتني تجتلني . 

– كل مرضي هاذ سببهن دموعج .. انا من اشوفنهن حيل ما يظل بيه يهدوة ، كويني ببسمة اشافج و خليني ارد الحيلي . 

– يا بسمة التطلع و انا اشوفن بحجرتك وحدة غيري . 

– الروح و العكل و الكلب كلهن يمج ، بس الجسد هنا .

– ولوّنه ؟ 

– اسمك ويا غيري . 

كض ايدي .. غمضت عيوني .. حجه : ادياتج باردات . 

– كلشي عكبك بارد وما اله روح وايامي تمر جدام عيني بالابيض و الاسود وما اهيسهن . 

– مشتاك حيل الهجلمات التصفيهن ، من اسمعهن جن لفحة اعذيبي اتطر علي. 

– انا اروحن 

ضحك : جا بعدج يو غازليتج شردتي 

ابتسمت .. ضحك : جا طبت و ما ظل بيه شي عكب هالبسمة التطيب الروح . 

– ريت المرض لا كرب منك ، ومحروس بأمان الله ورسوله . 

– احبنج يهدوة 

– انا اروحن 

ضحك و هو يمد ايده يعدل عبايتها اعلى راسه : روحي و تأكدي و العباس و الكفل زينب و ابو راس الحار ، كلبي الهواج ما يهوى غيرج ، روحي ونامي رغد ، ولا تشكين يوم بعشكي الج . 

ضحكت و طلعت من عنده .. 

بس شطلعت … جن روحي طير و طايرة 

راح الهم و غده الشر عني وروحي طابت بشوفته ولونه معرس ، لجن كلبي رفرف رفرف فرحانه حيل و الفرحة ما تلمني .. من حجيت و ضحكت وياه 

رديت للبيت ، لكيت حبوبتي بالبيت ، حجت : وين جنتي 

– رحت الراديون 

– امج يو درت تكصبج 

– لا تكليلها حبوبه عليج العباس 

– حضري ارويحتج .. خلنا نمش لال ثجيل 

– عليش ؟ 

– يسرى جايبة ، خلنا نمش نشوفها ، امج غاد 

– ياهو الكالج جابت ، كبل اشواي اجت اخوها و كال عد الجدة 

– لا ومودين طارش لبوج بالمعمل جايبة و اجا ابوج و خبرني عداله كاغد هنا ومشا ليهم 

– من كون نشد عني ؟ 

– لاله ما دش داخل . 

– جا خوش ، ياله امشينا 

نطرنا ليما ردت جمارة وخذيتها هي وحبوبتي و مشينا لبيت عمي ناصر .. بالباب شفت ابن عمي الاجانه ، دشينا للبيت .. يسرى غادية تراب . 

كربت ليها تحمدت الها اعلى السلامة و مشيت عد امي وهي حاطة الفرخ بحظنها : شني يمه شجابت 

– بت .. لجنها سبيعية و هالفلفيتها بكطن و مكفكفه اعليها . 

– شو اعاينها . 

اجت مرة كدمت النا ماي، خذيت منها و ضحكتلها : انت ياهي 

– انا مرت فلاح 

-ها الله يحفظكم 

خذت الماي وشربت ، ندستني امي : شو تتمضحكين ولج 

– جا ليش شمالني ؟ 

– كلبي موش مرتاحلج 

– وعلي احتاريت وياج البيجيت رزلتيني و الضحكت رزلتيني . 

– من عبن كلبي يحس . 

– و شحس 

– عليج العباس كون طلعتي عكبي 

– شمالج يمه جا وكتها … بس لشوفنها شو 

تنهدت بحسرة و هي تحسسني ما مطمنتلي و تعينلي بطرف عيونها ، عاينت البت حيل صغيرة .. ضحكت : حليوة يمه . 

– اي زركة مثلج ييمه 

ضحك فلاح : لا تحجين هيج عمتي شمالج ، و ان كون هديوة سمرة لجن حلوة . 

حجت مرته : شنهي كعدتك هنا ، جا ما تكوم 

– كاعد بشيب اهلج ؟ 

صدت عنه ، ردف: مامش غريب  عمتي و امي و اخيتي و هديوة باجر عكبة تصير مرتي … موش غريبة 

فزيت ساعة الكال هيج، و امي ردته : يا حرمتك شنهي 

جا الكاعدة هاي ياهي 

– لا هديوة بت عمي و انا ناهي اعليها و ان شالله اخذها جريب و تصير مرتي …..