رواية مكتوبة على إسمي الفصل الثاني عشر 12 بقلم ملك ابراهيم

رواية مكتوبة على إسمي الفصل الثاني عشر 12 بقلم ملك ابراهيم

رواية مكتوبة على إسمي البارت الثاني عشر

رواية مكتوبة على إسمي الجزء الثاني عشر

رواية مكتوبة على إسمي الحلقة الثانية عشر

امجد كان واقف مع البنات وهما بيحكوله اللي حصل وفجأة سمعوا صوت ضحك شباب عالي والبنات بصوا بأعجاب ل عامر وشريف وبصوا لبعض وضحكوا وامجد اول لما شاف عامر وشريف عرفهم لانهم كانوا زمايله في الجامعة.
كوكو بص ل ميرنا بغضب وقالها بزعل: عجبك اللي خطيبك وصاحبه البايخ ده بيقولوه عليا يا ميرو.
ميرنا: سوري يا كوكو متزعلش نفسك.
اتكلم شريف وهو بيضحك: ايوا متزعلش نفسك عشان الزعل بيضر البشرة.
ضحكوا تاني وكوكو كان هيموت من الغيظ وامجد قرب منهم وقال: عامر الجارحى وشريف زهران!!
عامر وشريف اول لما شافوه سلموا عليه بحب.
امجد نصار انت فينك وحشتنا.
امجد بصلهم وقال بأبتسامة: وانتوا كمان وحشتوني.. طمنوني انتوا بتعملوا ايه هنا؟
شريف رد عليه: خطيبة عامر خبطت عربية بنت واحنا جاين نحل الموضوع.
امجد بصلهم بصدمة وبص ل عامر وقال: خطيبتك!!
عامر بص ل شريف بضيق لانه مش بيحب يقول على ميرنا خطيبته وقال: اه.
امجد كان بيبصلهم بصدمة وقال: مش معقول!!!
وبص على ميرنا.
شريف سأله بفضول: وانت هنا بتعمل ايه يا أمجد؟
رد امجد: البنت اللي خطيبة عامر خبطت عربيتها تبقى اختي.
عامر وشريف بصوا ل أمجد بصدمة وامجد قال: وللأسف خطيبتك هي اللي غلطانه يا عامر وكانت هتضيع حياة أختي وصحباتها وفي شهود علي الحادثة.
عامر بص له بصدمة وميرنا اتكلمت بعصبيه: انا مش غلطانه واختك هي اللي كانت واقفه بعربيتها في نص الطريق.
رد عليها امجد: واقفه في إشارة يا انسه واصحاب العربيات اللي كانوا موجودين شهدوا ان انتي اللي غلطانه.
اتكلم كوكو بعصبيه: ايوا اختك والبنات المتوحشين اللي معاها هما اللي غلطانين.. مش كفايه ضيعوا علينا السهر والاوت فيت بتاعي اتبهدل بسببهم.
وبص ل ميرنا وقالها: شايفه يا ميرو الأوت فيت بتاعي اتبهدل ازاي انا خلاص مش هلبسه تاني.
امجد بص ل عامر وقاله: ايه ده!!!
عامر: سيبك منهم المهم اختك بخير الحمدلله هي والبنات اللي معاها؟
رد امجد: اه بس في بنت منهم اتجرحت في راسها من قوة الخبطة.
عامر بص ل ميرنا بغضب وقال: انا مش عارف اعتذرلك ازاي يا امجد علي اللي حصل وانا متكفل بكل حاجة واي تعويض هتطلبه انا موافق عليه.
رد امجد: ملوش لزوم يا عامر مفيش بينا الكلام ده بس المهم ان خطيبتك تعرف ان حياة الناس مش لعبه.
ردت ميرنا عليه بغرور وصوت عالي: هي اختك والبنات اللي معاها دول نااس!! دول بيئة!
آيات والبنات سمعوها واتغاظوا منها وقربوا منهم وهما غضبانين جدا من الجملة إللي قالتلها ووقفت آيات قدام عامر جمب البنات والشر بيتطاير من عينيها و وردت نغم علي ميرنا بعصبيه: بقى احنا بيئة يا بيئة يا قليلة الاد ب!
وردت آيات وهي بتبصلها بعصبيه: انتي لو كنتي بنت محترمة مكنتيش تنطقي كلمة زي دي.
اتكلم كوكو وهو بيبص ل آيات: هي دي البنت المتو حشة اللي شتمتني.. خليكوا شاهدين عشان هرفع عليها قضية سب وقذف.
ردت عليه آيات بغيظ: سب وقذف ايه يا أنثى البطريق انت.. انت كمان ليك عين تتكلم.
كل اللي في القسم اتجمعوا وكانوا بيحاولوا ينهوا المشاجرة اللي حصلت بين البنات وبين ميرنا وكوكو..
عامر كان في عالم تاني من اول ما شاف آيات قدامه وهو اتجمد مكانه لانها نسخة من الصورة اللي معاه.. مستحيل يتلخبط فيها لانه بقى حافظ ملامحها من الصورة.. بس عقله مش مستوعب انه شايفها قدامه وانها ممكن تكون هي فعلا!!
خرج الظابط علي الصوت العالي وزعق في كل إللي كانوا واقفين وقال: كله يرجع مكانه ومش عايز غير المتهمين واهاليهم هنا.
امجد قرب من الظابط وعرفه بنفسه وقاله: انا بعتذر لحضرتك عن اللي حصل بس ممكن نتكلم في مكتب حضرتك ونحل الموضوع.
وبص ل عامر وقاله: ولا ايه يا عامر؟
عامر عينيه كانت بمتثبته علي آيات وبص للظابط وقال: ان شاء الله مفيش مشاكل وانا مستعد لآي تعويض.
آيات بصتله وكانت حاسه ان شكله مش غريب عليها وكأنها شافته قبل كده بس تجاهلت الاحساس ده وخفضت وشها بسرعة لما طالت النظرات بينهم وعامر عينيه كانت عليها لحد ما دخل مكتب الظابط مع امجد عشان يحلوا الموضوع جوه.
أول لما دخلوا غرفة مكتب الظابط كوكو اتكلم مع آيات بغيظ وقالها قدام البنات: انتي يا بنت يا متوحشة انتي.. شيلي عينك عن خطيب ميرو!
آيات بصتله بصدمة واتحرجت من كلامه ليها قدام البنات وقالتله: خطيب مين يا انثى البطريق انت اللي انا ابصله.. هو انا اتجننت عشان ابص ل ده كمان.
البنات شهقوا بصدمة وهمست نغم ل آيات: لا ملكيش حق يا آيات دا الشاب قمر.. مش عارفه خاطب الحربيه دي ازاي فعلا حظوظ!
وهمست لهم هدير: ولا صاحبه العسل ده شكله دمه خفيف شوفتوا ضحكته.
آيات زعقت فيهم بتوتر وقالت: هو ايه كلام المراهقين ده عيب علي فكرة اسكتوا.
اتكلمت سلمى: بصراحة طرو الجو علينا بعد الفيلم الرومانسي اللي شوفناه النهاردة.
ردت نغم وهي بتضحك: صحيح آيات كانت نايمه طول الفيلم عشان كده مفيش حاجة مآثره فيها.
ردت هدير: كفايه عليها الفيلم الاكشن اللي شوفناه هنا.
ميرنا كانت بتبصلهم بحقد وغضب وكوكى قالها: خلي بالك يا ميرو عشان البنات دول عينيهم من خطيبك والتافه ابن خالته.. مش عارف عجبينهم علي ايه!
ميرنا بصتلهم بغضب والبنات كانوا بيبصولها بتحدي.
…..
داخل غرفة مكتب الظابط.
عامر وامجد اتفقوا على الصلح والظابط كان متعاون معاهم جدا لانه عارف انهم شخصيات معروفه في البلد ومن عائلات كبيرة والصلح كان الحل الأفضل للطرفين وخصوصا ان عامر اتفق مع امجد انه متكفل بكل الخساير اللي حصلت واي تعويض البنات يطلبوه.
الظابط طلب من العسكري انه يدخل البنات عشان يكتب محضر الصلح وياخد توقيعاتهم علي المحضر.
عامر كان قاعد في غرفة الظابط ومش بيفكر غير في البنت اللي شبه الصورة اللي معاه وكان عايز يعرف اسمها عشان يتأكد من شكوكه!
البنات دخلوا وميرنا وكوكو صاحبها.
كوكو اتكلم مع الظابط بصوته الناعم وقال وهو بيشاور علي آيات: انا عايز اعمل محضر سب وقذف في البنت المتو حشة دي.
آيات بصتله بغضب والظابط قال بنبرة صارمة: انا هعمل محضر صلح وكلكم تروحوا ي اما هتباتوا معانا الليلة في الحبس قولتوا ايه؟
كل البنات قالوا: لا حبس لا احنا موافقين على الصلح.
وميرنا ردت بكبرياء: وانا مش موافقة والبنات البيئة دول لازم يتسجنوا مع الاشكال اللي شباهم.
امجد بصلها بغضب وعامر زعق فيها وقالها: ميرنا مش عايز اسمع صوتك لحد ما نخرج من هنا.. والمفروض تشكريهم لانهم لو رفضوا الصلح انتي اللي هتتسجني مش هما!
ميرنا بصتله بغيظ والظابط قال للبنات: انا هكتب محضر الصلح وهتوقعوا كلكم عليه.
كلهم وقفوا ساكتين والظابط كان بيكتب المحضر و عامر مركز بالنظر مع آيات بطريقة ملفته وكل البنات لاحظوا نظراته ليها وآيات كانت متوتره من نظراته وخفضت وشها بارتباك وهي مش فاهمه هو ليه مركز معاها كده!!
نغم كانت ملاحظة نظراته ل آيات وشافت نظرات ميرنا لخطيبها اللي كانت كلها غيره وغضب وهي شايفه عينيه متثبته علي البنت المحجبه!!
حبت نغم تغيظها وتلفت انتباه خطيبها ل آيات اكتر وقالت بصوت مسموع: آيات الجرح اللي في راسك لسه تعبك صح..؟
آيات هزت راسها وقالت: لا انا كويسه الحمدلله.
امجد بص ل آيات وقالها: اقعدي انتي ارتاحي يا آيات.
يا الله.. نفس الشكل ونفس الاسم!! عامر اتصدم لما اتأكد من شكوكه وسمع اسمها!! آيااات.. هي نفس الصورة اللي معاه ونفس الأسم اللي يعرفه.. معقول هي مراته!! طب ازاي!! إزاي وصلت هنا وازاي عرفت البنات دول وامجد عرفها أمتى وازاي!! كان مصدوم وعايز يقرب منها ويسألها ويتأكد بنفسه انها هي..! بس هيقولها ايه وهيقول ل كل الموجودين دول ايه!! كان في موقف صعب ومش قادر يسألها ومش هيقدر يتجاهل انها ممكن تكون مراته ويضيع الفرصه دي لانه احتمال ميعرفش يوصلها تاني!
الظابط خلص المحضر وامجد شكر الظابط علي تعاونه معاهم وعامر شكر الظابط هو كمان وخرجوا كلهم من المكتب.
وقفت هاجر قدام اخوها وقالتله: ابيه احنا هنوصل البنات ازاي اكيد مش هنسيبهم يروحوا لوحدهم.
امجد هز راسه بالايجاب وقالها: انا هوصلهم متقلقيش.
ووقف قدام عامر وقاله: تمام يا عامر خلينا بكره ان شاء الله نتكلم ونخلص الموضوع ده مع بعض.
عامر كان بيبص علي آيات وقاله: انا تحت امركم في اي حاجة يا امجد.
اتكلمت ميرنا بملل: انا عايزة ارجع البيت زهقت.
عامر بصلها بغضب وامجد اتكلم: خلاص يا عامر نتكلم بكره.
واخد امجد البنات وخرج من القسم وعامر مش قادر يضيع الفرصة دي وخرج وراهم علي طول وميرنا وكوكو بصوا لبعض لان اهتمام عامر ونظراته للبنت المحجبه كان واضح جدا.
شريف خرج ورا عامر علي طول وكان ملاحظ انشغال عامر بالبنت المحجبه ومش فاهم ايه اللي بيحصل.
امجد وقف قدام القسم جمب عربيته والبنات قالوا انهم هيقعدوا كلهم ورا مع بعض وآيات تقعد قدام جمب امجد عشان الجرح اللي في راسها.
عامر كان واقف يبص عليها ومش عارف يعمل ايه!
شريف قرب منه وهو بيبصله بدهشة وقاله: عامر ايه الحكايه.. ؟ في ايه؟
عامر بصله وكان لسه هيقوله ان البنت المحجبه دي بنسبه كبيرة ممكن تكون هي مراته اللي بيدور عليها بس قبل ما يتكلم كانت ميرنا وصاحبها خرجوا من القسم وقربوا منهم وميرنا قالت بغضب: عامر انت مش هتوصلني ولا ايه انا تعبانه وعايزة ارتاح في البيت.
عامر كان مركز مع آيات اول لما ركبت عربية امجد والعربيه اتحركت بيهم.
بص ل شريف وقاله: وصلهم انت يا شريف لان انا عندي مشوار مهم.
شريف بصله بصدمة وقال: اوصلهم ايه انا مش معايا عربيتي!
عامر وهو بيتجه ل عربيته قاله: أتصرف يا شريف واطلب عربيه.
وركب عامر عربيته بسرعه واتحرك ورا عربية امجد وميرنا وكوكو بصوا لبعض وكوكو قالها: صدقتيني يا ميرو!!
شريف بصلهم وقال: صدقتك في ايه؟
كوكو بص له بغيظ وقاله: ملكش دعوه انت وصحبك ضيعتوا حقي انا وميرو.. بس انا مش هسكت.
شريف سأله بغيظ: مش هتسكت هتعمل ايه يعني هتضربهم بمبرد الاظافر بتاعك.
كوكو بغيظ: شوفتي يا ميرو صاحب خطيبك التافه بيقول ايه!
شريف مسكه من قفاه بعصبيه وقاله: مين ده اللي تافه.
ميرنا حاولت تخلص كوكو من ايد شريف بسرعه وقالتله: خلاص يا شرشر متزعلش هو كوكو لما بيتعصب مش بيعرف يقول ايه!
شريف كتم الغضب جواه من كلمة شرشر وساب كوكو وهو في قمة غضبه وكان عايز يمشي ويسيبهم هما الاتنين بس هو عارف انه لو موصلش ميرنا لحد البيت خالته ميسرة هتزعل من عامر وهيتسبب له في مشاكل مع والدته.
كوكو ظبط لبسه اول لما شريف سابه وبص ل ميرنا وقالها: سيبك منه يا ميرو شوفتي البنت المتوحشة مشت قبل ما تعتذرلي ازاي !
ميرنا ردت عليه: متزعلش يا كوكو انا هخليها تعتذرلنا احنا الاتنين.
شريف زفر بغيظ وقال: اللهم طولك ياروح.. الله يسامحك يا عامر انت اللي دبستني التدبيسه دي!!… بقلمي ملك إبراهيم.

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية مكتوبة على إسمي)