رواية غرام في المترو الفصل الخامس 5 بقلم ولاء رفعت علي
رواية غرام في المترو الفصل الخامس 5 بقلم ولاء رفعت علي
رواية غرام في المترو البارت الخامس
رواية غرام في المترو الجزء الخامس
رواية غرام في المترو الحلقة الخامسة
يستند رأسه علي زجاج النافذة شارداً في سنين حياته الماضية، كيف عاش ما بين الصخب وزحام الحياة بلا هدف، والدته لديها الحق فأنه يبلغ الآن الثلاثين و ماذا فعل خلالها؟!
انتبه إلي يد صاحبه الذي يقود السيارة يعطيه سيجاراً
“ما تفوكك من جو الكآبة اللي أنت فيه يا چو وفرفش وعيش اللحظة”
أخذ السيجار ونظر إليها فسأله
“السيجارة دي عادية و لا؟”
غمز الأخر قائلاً
“و لا طبعاً”
“خد يا رامي بصراحة مليش مزاج”
“ملكش مزاج و لا بطلت؟، ده شكل رأفت بيه قلب عليك جامد أوي، يعني لا معاك عربية و لا كريدت و جاي تقعد معايا”
مزاح صديقه لم يتحمله، زفر بغضب و صاح
“أقف هنا ونزلني”
توقف الأخر و ألتفت إليه يسأله بجدية
“فيه إيه يا يوسف، ما أنت عارف بهزر معاك، لاقيك سرحان و مخنوق قولت أفك عنك شوية”
تأمل يوسف المكان الذي توقف فيه الأخر فسأله
“إيه ده إحنا فين؟”
“أستني خليك هنا و ما تتحركش هاجيب حاجة من واحد و جايلك”
نزل رامي من السيارة وسار نحو شارع مظلم، ينتظره شاب يخفي وجهه بالقبعة، أخرج له شيء من حقيبته وأعطاه إياه فأعطاه الأخر مبلغ من المال
“المرة الجاية هجيلك في المكان التاني أحسن من هنا، اتفقنا يا… “
أخبره الأخر مبتسماً
“محسوبك سمير العو يا باشا، و لو عايز أي حاجة في أي وقت أديلي تليفون وهتلاقيني عندك”
نزل يوسف من السيارة يستنشق بعض الهواء، لاحظ وجود فتاة تسير نحوه، من مظهرها الفج ونظرتها الجريئة إليه علم لما هي تقترب منه
“أنت رامي بيه؟، ده أنت طلعت حلو أوي”
عقد ما بين حاجبيه وسرعان دار الأمر في رأسه، شعر بالضيق و الحنق من هذا الرامي الذي يقضي حياته في الملذات و العربدة
“ليلتك سودة يا رامي الزفت، أنا إيه اللي خلاني أسيب الفيلا”
جاء رامي و رأى فتاة الليل تقف أمام يوسف
“مش معقول نهي العايقه؟”
ألتفت إليه و صاحت بسعادة بالغة
“يبقي أنت رامي البرنس”
جال ببصره علي جسدها من أعلي إلي أسفل
“بس إيه الحلاوة دي يا بت، ده أنتي طلعتي أجمد من الصور”
زفر يوسف الذي يشعر بـ الازدراء منهما، بالرغم إنه يقضي لياليه في الملاهي الليلية و يحتسي الخمر لكنه لم يفعل الفاحشة يوماً، ربما احتفظ بهذا الأمر أن يكون خاص مع من تشاركه حياته أو زوجة المستقبل الذي لم يجدها إلي الآن، كثيراً من الفتيات يلتفون من حوله لكن جميعهن مثل بعضهن البعض، في الثياب العارية وعمليات التجميل والتي بدلاً من أن تبدي جمالهن بل أظهرت النقيض، كم كره كل ما هو زائف.
“رامي أنا مليش في حواراتك الشمال دي، لو عايز تسهر معاها يبقي خدها في أي حتة بعيد عن البيت”
شهقت الفتاة وقالت
“أخص عليك يا بيه يا حليوة، و أنا اللي كنت ناوية أدلعك، و أخرتها تقول عليا شمال؟!”
“معلش يا نهي أمسحيها فيا أنا، يلا أركبي ورا”
فتح رامي باب السيارة إليها فصاحت
“مش هركب غير لما صاحبك يعتذر الأول”
عقب رامي الذي كاد ينفذ صبره
“يا ستي حقك عليا، أنا اللي شمال إرتاحتي بقي”
أنطلق بالسيارة بين شوارع المنطقة ليجد مخرجاً إلي كورنيش النيل، لكن حظهم السيئ ظهرت أمامهم لجنة تفتيش
“أوبا، يوسف لو معاك أي ممنوعات أرميها من الشباك، وأنتي يا نهي لو معاكي حاجة أرميها”
ردت الأخرى
“الحمد لله معيش ممنوعات”
“بقولكم إيه الظابط لو سألكم هنقول أنك مرات عمي و تعبانة وواخدينك علي المستشفي”
عقب يوسف الذي ود أن يمسك بصاحبه ويلقي به امام رجال الشرطة
“و الله كنت حاسس أن أخرة عمايلك هنلبس في الحيط”
“أكتم بقي يا غراب البين إحنا داخلين عليهم، بت يا نهي أترمي بضهرك لورا وأعملي نفسك بتفرفري”
“حاضر”
و عادت بظهرها إلي الوراء وألقت رأسها وكان لسانها يخرج من فمها، نظر إليها يوسف عبر المرآة وعلق
“دي كدة واحدة مشنوقة مش عيانة، هو يوم باين من أوله ربنا يستر”
“طلع الرخص والبطايق منك ليه”
أمرهما الضابط ثم نظر إلي الفتاة فأخبره رامي بحزن زائف ليثير عطف الضابط نحوهم ويتركه يرحل
“دي مرات عمي يا باشا و تعبانة عاملين نلف بيها من ساعة علي عيادات و الساعة عشرة ونص مش لاقين دكتور”
رفع الضابط شاشة هاتفه ليتحقق من أمر ما وينظر إلي نهي التي تغمض عينيها و ترتعش في آن واحد
“مش كفاية تمثيل يا نهي بقي؟!، ده أنتي مطلوبة بالاسم، يلا يا حلو منك ليه أنزلوا، قال مرات عمك قال”
فتح أحد رجال الضابط باب السيارة وأخرج رامي الذي يتوسل إليهم
“و ربنا يا باشا أنا أول مرة أشوفها”
“بطل ولولة يالاه و مش عايز أسمع صوتك، في القسم أبقي اتكلم”
و داخل سيارة الشرطة، يجز يوسف علي أسنانه، و يضم قبضته
“الله يلعنك يا رامي، شوفت عملت فينا إيه؟!”
لوح الأخر دون مبالاة
“يا عم أسكت بقي مش ناقصاك، مكنتش اعرف ده هيحصل”
عقب يوسف بغيظ شديد
“شكل البت دي وراها بلوه طالما معمول كمين مخصوص عشانها، ربنا يستر و ما ياخدوناش بذنبها “
صاحت رامي من بين أسنانه
“اسكت، كفاية بقي”
“أتلم منك ليه خلي ليلتكم تعدي”
كان صوت العسكري الذي فاض الأمر به منهما
※ ※ ※
في المخفر تقف أمام مكتب الضابط حول رسغها صفد معدني متصل بأخر حول يد رجل الشرطة، تبكي والدتها و تنوح، تربت شقيقتها علي ظهر والدتها لتهدأ
“ما تخافيش يا غرام، بإذن الله مفيش حاجة والمحامي يبقي ابن عمي، أنا حكيتله كل حاجة زي ما هند قالتلي، و إن شاء الله هتخرجي”
“يا جمال أنا مظلومة، و زي ما هند قالتلك عملت محضر في الزفت اللي اسمه رجب”
“طب معاكي صورة من المحضر؟”
“في البيت”
سألتها ابتسام
“قوليلي حطاها فين و أنا هاروح أجيبهالك بسرعة قبل ما المحامي يجي”
اجابت غرام بعد أن قامت بمسح دموعها بالمحرمة
“هتلاقيها تحت هدومي في الدولاب، أول رف و هتلاقي جمبهم فلوس هاتيهم وتعالي بسرعة”
“عشر دقايق و هاكون عندك إن شاء الله”
أوقفها جمال قائلاً
“استني يا ابتسام أنا جاي معاكي أوصلك”
“شكراً يا جمال، مفيش داعي أنا هاروح و أجي بسرعة”
أطلقت ساقيها للريح، بينما ما زالت غرام في الانتظار، انتبهت إلي صياح إحدى رجال الشرطة يدفع ببعض المتهمين
“اوقفوا هنا لحد ما أدخل للظابط”
تشدقت نهي بصوتها النافر
“موبراحة يا شويش، ده لو مش عشاني، يبقي علي الأقل عشان البهوات دول”
عقب يوسف يزجرها بنظرة تحذيرية
“اسكتي مش عايز اسمع صوتك، مش كفاية جابونا هنا بسببك؟!”
“هو أنا ضربتك أنت وصاحبك علي إيديكم عشان تاخدوني معاكم؟!، لاء يا حبيبي كان كله بالاتفاق ورسايل صاحبك معايا علي الواتس أكبر دليل”
كان كلا من غرام و جمال ووالدتها يستمعون و يرون ما يحدث، أدركت غرام التهمة التي جاءوا بها إلي هنا، حدقت إليهم بازدراء مما لفت انتباه نهي والتي وبختها
“مالك أنتي كمان بتبصيلنا بقرف كدة ليه؟!، بصي علي قدك يا حلوة، ما أنتي متكلبشة زيك زينا، و مش بعيد جاية آداب، يعني الحال من بعضه يا عينيا”
زفر رامي بضيق من هذه النهي فصاح
“ما خلاص يا ست نهي، مش كفاية متكلبشين بسببك، أهي دي آخرة الشمال”
دنا جمال وأخبر غرام
“ملكيش دعوة بالأشكال دي و ما ترديش عليها”
استرقت نهي السمع فثارت كالعاصفة
“أشكال مين يا دلعدي…
لم تتحمل غرام أكثر من ذلك فمدت يدها بقدر مستطاع قائلة
“بت أنتي أنا ساكتة لك من الصبح و ربنا ما أنا سيباكي”
حاول جمال منعها وكذلك والدتها، وقف يوسف حائل بينهما حتي لا تشتبك كلتيهما معاً، كان ينظر إلي غرام تلك الشرسة فكانت تدفعه من أمامها لتنال من نهي، لكنه كان يتمتم بكلمات غضبها جعلها لا تسمعها
“اهدي يا آنسة، ما ينفعش اللي بيحصل ده خالص”
و عدم سماعها جعله ضاق به ذرعاً فصاح بغضب عارم
“كفاية بقي”
توقفت وتراجعت تستند إلي الحائط علي نقيض توقع والدتها التي خشيت أن ابنتها تقبض علي تلابيب هذا الشاب لأنه صرخ في وجهها بغضب.
قام عامل بمناداة كلا من نهي و رامي و يوسف
، و تبع قوله بأمر
“يلا أدخل منك ليها”
ذهب ثلاثتهم بينما كان يوسف ينظر إلي غرام التي تحدق إليه بامتعاض و حنق في آن واحد
※ ※ ※
أخذت ابتسام الورقة والمبلغ الذي كان في خزانة شقيقتها فغادرت المنزل مسرعة، أوقفها نداء عثمان
“ابتسام، استني عندك”
توقفت حتي لا يلفت الأنظار بمناداته لها
“هو البوليس جه خد غرام ليه؟”
أخبرته علي عجالة
“لما نرجع إن شاء الله هبقي أقولك، أصلي مستعجلة معلش”
و انطلقت من أمامه كالزئبق، تعبر الطريق المؤدي إلي الشارع الرئيسي حيث يوجد قسم الشرطة، لم تنتبه إلي السيارة التي كادت تدهسها وصوت الزمور الذي لفت أنظار الجميع، نزل من سيارته فتفاجئ إنها هي، قد قفزت علي الرصيف بأعجوبة، همت بالنهوض فوجدت يد رجولية تمتد إليها
“معلش ما أخدتش بالي و أنتي طلعتي فجأة في… “
تلاقت عينيها بعينيه
“مستر حسن؟”
أخذ يتفحصها جيداً بخوف يسألها والقلق يغزو ملامحه
“أنتي كويسة؟”
ابتسمت بخجل وأخبرته، كما تريد أن تتهرب من أمام بصره حيث كلما تجده ينظر إليها تشعر بالتوتر
“الحمدلله أنا بخير، أنا لما لاقيت العربية كانت هتخبطني رميت نفسي علي الرصيف”
“لو حاسة بأي وجع تعالي أخدك علي أقرب مستشفي”
“مفيش داعي يا مستر، الحمدلله أنا كويسة، عن إذنك”
وجدها تتجه إلي باب المخفر فأوقفها يمسك ساعدها
“أنتي داخلة القسم ليه؟”
فنظرت إليه بدهشة لاسيما نحو قبضة يده علي ذراعها، شعر بالحرج وتركها، تحمحم
“أنا آسف”
قلبها يخفق من الخجل والحرج في آن واحد
“و لا يهمك يا مستر، أنا داخلة لـ…”
“ابتسام؟”
قاطعها نداء جمال الذي خرج للتو ينتظرها، تقدم منها وهو ينظر إلي حسن باستفهام، بينما الآخر يحدق نحوه بضيق، ابتلعت ابتسام ريقها وأشارت لجمال نحو الآخر
“مستر حسن مدرس الإنجليزي”
ثم فعلت العكس، و لا تعلم لما تبرر موقفها أمام حسن!
“أبيه جمال يبقي جارنا وخطيب هند صاحبة غرام أختي”
أومأ جمال له قائلاً
“أهلاً وسهلاً يا أستاذ”
ثم سأل إبتسام
“جيبتي الحاجة؟”
رفعت الورقة من داخل حقيبتها الصغيرة
“اه جبتها وجبت الفلوس، هو المحامي جه؟”
زفر الآخر بسأم
“أتصلت عليه عشان استعجله بيكنسل، أنا هخطف رجلي لمحامي تاني معرفة، أدخلي أقفي مع غرام و مامتك عقبال ما أجي”
تدخل حسن بعد شعوره بأن هناك خطب ما يخص عائلة ابتسام
“أنا مش فاهم حاجة، بس لو عايزين محامي شاطر وجمبينا في المعادي”
و في غضون ثلاثين دقيقة قد اتي المحامي صديق المُعلم حسن، شرح له جمال كل ما حدث وقدم له صورة المحضر التي أحضرتها ابتسام، و بكل سلاسة ومهارة أمام الضابط نجح المحامي في اظهار الحقيقة أمام الجميع وبعد ضغط الضابط علي المدعو رجب و بمواجهته بما فعله في غرام مسبقاً فاعترف بكل شيء.
ينظر بخوف مستسلماً
“أيوة أنا اللي دبرتلها موضوع السرقة عشان ماتعتبش المحل تاني وتحكي لأختي علي اللي حصل”
نهضت شقيقته التي كانت تجلس أمام مكتب الضابط وصاحت بغضب عارم
“يخربيتك، إيه يا أخي دي تالت و لا رابع مرة تعملها، و أنا زي الهبلة كل ما أجيب واحدة تسوقلنا البضاعة تقوم تطفشهالي ولما أسألك تقولي حرامية، أتاري كنت بتداري علي وساختك للتفضح قدامي”
“اهدي يا مدام رشا، أموركم تناقشوها في البيت”
تدخل الضابط قائلاً ما سبق فأجابت الأخري
“معلش يا باشا غصب عني، علي طول ما بيجليش من وراه غير المصايب لكن توصل لحد أكل عيشي، يبقي خلاص كل واحد يروح لحاله، و ياريت تحبسه عشان أنا قرفت منه”
رمقها شقيقها بعتاب في مشهد هزلي
“بقي كدة يا رشا؟!، ده أنا أخوكي اللي مالكيش حد غيره في الدنيا”
نظرت بازدراء إليه
“جاتك خو، و أعمل حسابك لو اتكتبلك تخرج من هنا ما أشوفش وشك تاني و ملكش حاجة عندي، أنسي إن ليك أخت خالص”
ألقت عليه كلماتها ثم تابعت
“معلش يا حضرة الظابط، أنا هتنازل عن محضر السرقة”
تنهد الضابط وأخبرها
“تمام يا مدام رشا، بس أخو حضرتك هيشرف معانا عشان محضر التحرش ومحاولة التعدي علي الآنسة غرام”
و بعد قليل…
خرج رجب برفقة العسكري مقيد بالأصفاد، و خلفه غرام والمحامي، ركضت كل من ابتسام و والدتها
“إيه الأخبار طمنينا؟”
تحدث المحامي بدلاً من غرام ليخبرهم
“مدام رشا أتنازلت عن المحضر بعد اعتراف أخوها بكل حاجة”
صاحت عزيزة داعية
“الحمدلله يارب أنت اللي عالم بحالنا، تسلم يا بيه علي وقفتك مع بنتي”
ابتسم الأخر وقال
“العفو يا أمي، أنا معملتش غير الواجب، كفاية أنكم معارف الأستاذ حسن، أعز أصدقائي”
ألتفت غرام نحو حسن و حدقت إليه بامتنان
“شكراً يا أستاذ حسن”
ابتسم الأخر وعقب مرحباً
“مفيش بين الأهل والحبايب شكر، و ربنا يعلم أنتم بالنسبة لي إيه”
و طيف نظرة من عينيه نحو ابتسام التي ارتبكت و خالجها التوتر، لم تغفل غرام عن ما حدث للتو
“تسلم يا أستاذ حسن”
“مش كدة خلاص خلصنا و نقدر نروح؟”
سألتهم عزيزة فأجاب المحامي
“اه طبعاً يا حاجة تقدروا تروحوا”
فقال جمال
“يلا بينا يا خالتي أنا راكن التوكتوك بره”
فتدخل حسن
“معايا عربيتي برة تعالوا هوصلكم كلكم”
عقبت غرام بعد أن ألقت نظرة علي شقيقتها
“مش عايزين نتعبك معانا يا مستر أكتر من كدة”
“تعبكم راحة، أتفضلوا معايا”
ذهب كل من غرام و شقيقتها التي تتشبث في ذراع شقيقتها، كانت تخشي أن يخبر حسن غرام عن مقابلتها بعثمان و ركوبها خلفه الدراجة النارية، لم تترجم ماهية نظرات حسن بعد!
و في الرواق و هم يغادرون، تقابلت عينين غرام بخاصة يوسف الذي كان يجلس القرفصاء بجوار رامي الذي كان يجلسه مثله ويضع كفيه علي وجهه في انتظار المحامي.
※ ※ ※
تلملم والدة عاطف الخضروات في جوال بلاستيكي، رأت نجلها يقف أمام باب البناء ينفث دخان سيجاره وينظر نحو شرفة منزل سماح، كم ألمه حديثها المهين له، انتشلته والدته من براثن أفكاره
“أنت لسه واقف هنا، أنا افتكرتك روحت مع جمال ورا عزيزة و بناتها”
نفث الدخان من فمه قائلاً
“أنا متابع مع جمال علي التليفون، خرجوا و جايين في الطريق”
“و إيه اللي حصل؟”
“الست اللي بتاخد منها غرام شغل اتهمتها إنها سرقت منها مبلغ، و طلع في الأخر أخوها اللي عامل الحوار ده واعترف، فأفرجوا عن غرام”
“لا حول و لا قوة إلا بالله، ولاد الحرام ما بيخافوش ربنا، ده البت غرام يا عيني هي و أمها وأخواتها غلابة، من بعد موت أبوهم و الدنيا عمالة تلطش فيهم، يارب يا غرام يرزقك بابن الحلال اللي يهنيكي يا بنتي”
عقبت والدته حديثها بنظرة ما نحو ولدها الذي يعلم ماذا تقصد، نفث الدخان ثم ألقي بقايا سيجاره فدعس عليها بقدمه
“كل واحد بياخد نصيبه ياماه”
نظرت إليه بامتعاض تسأله بتهكم
“و نصيبك بقي سماح بنت مليجي، اللي سيرتها علي لسان الصغير والكبير في الحارة؟!”
كاد يتفوه لكنها تابعت مقاطعة إياه
“أقسم بالله لو صممت ونفذت اللي في دماغك يا عاطف لا أنت ابني و قلبي هيبقي غضبان عليك ليوم الدين”
زفر بحنق و بنفاذ صبر أخبرها
“من غير تهديد ياماه، الموضوع أصلاً انتهي من قبل ما يبتدي، و السبب فَرشة الفجل والجرجير اللي ملهاش أي لازمة لأننا الحمدلله أنا وأخواتي مش مخلينك محتاجة أي حاجة وبرضو ماسكة في بيع الجرجير”
رأت الغضب في عينيه وتهكم لاذع في حديثه
“ما له الفجل والجرجير يا عين أمك؟!، مش دول اللي علموك أنت وأخواتك وأتربيتوا لحد ما بيقتوا رجالة؟!”
لم يجد قول مناسب أو الدفاع عن موقفه الضعيف، فاستطردت والدته
“لتكون الحلوة أم عباية محزقة و شعرها طالع من نص الطرحة عايرتك بيا؟!، مش أحسن من أبوها الحشاش اللي عايش عالة علي ولاده ده غير رباهم من الحرام؟!، كفاية شوالات الدقيق المدعم اللي كان بيبعها من ورا صاحب كل فرنة يشتغل فيها، فوق يا ابن بطني لنفسك و متخليش حتة بت ما تسواش تترسم عليك و لا تعايرك، أنا ست بميت راجل من عينة أبوها، شقيت عليكم من وأنت وأخواتك لسه عيال بتلعبوا في الحارة، لا عمري مديت إيدي لحد و لا استلفت جنيه، و البيت ده”
ربتت بحدة علي حائط منزلهم
“كل طوبة اتبنت فيه من الفجل والجرجير اللي مش عاجبينك”
اقترب منها قائلاً
“خلاص ياماه حقك عليا، أنا بس كنت مخنوق و جت فيكي، أنا آسف”
قام بتقبيل رأس والدته التي قالت له
“ربنا يهديلك قلبك يابني ويرشدك للصح، قادر يا كريم”
※ ※ ※
حل الصباح وضربت أشعة الشمس عينين أحلام التي غفت في غرفة صغيرها، تشعر بألم في أنحاء جسدها تتذكر ليلة الأمس…
علمت للتو من جارتها عبر الهاتف بأن الشرطة جاءت وقاموا بالقبض علي شقيقتها، جن جنونها و أرادت أن تذهب لتطمئن عليها أو تقدم المساعدة لها، ارتدت عباءتها واستعدت للذهاب، تحمل صغيرها وتفتح باب المنزل فوجدت زوجها قد عاد للتو وكالعادة ثملاً، قبض علي ذراعها ودفعها إلي الداخل
“رايحة فين و من غير استئذان يا…. “
“سيب دراعي للواد يقع مني يا سمير، هاكون رايحة فين، مليش غير أهلي اللي رايحة ليهم”
“مش هاتروحي في حتة و يلا غوري علي جوة”
دفعها مرة أخري بقسوة فوقعت وتحتضن صغيرها بين يديها، تأوهت من الألم تاركة ابنها برفق، صاحت بألم
“يخربيت الزفت اللي كل ليلة بيخليك راجع بالمنظر ده وتبهدل فيا كدة”
حاولت أن تنهض مستندة علي الكرسي فوقفت
“إيه رأيك والله لأنا رايحة وأعلي ما في خيلك أركبه”
اتسعت عيناه بشرٍ، فبالرغم أنه ثملاً لكن خصاله السيئة في حالة وعي ويقظة، اقترب منها
“بتقولي إيه يا بنت الـ…، أصلي ما سمعتش”
آهه اخترقت سمع كل من يقطن في البناء و من يسير في الخارج، ذاك أثر ما فعله بها الآن، جذبها من وشاحها يسحبها كالشاه إلي غرفة النوم
“صوتي يا بنت عزيزة صوتي، أنتي لسه شوفتي حاجة”
أغلق الباب تاركاً صغيرهما في الخارج يبكي و يردد منادياً علي والدته و الذي قام والده بدفعها للمرة الثالثة فوق الفراش، فتراجعت بخوف تتوسل إليه وهي تراه يخلع طوق بنطاله
“خلاص يا سمير، أنا آسفة، والله ما هكررها تاني، أبوس إيدك بلاش الحزام”
“ما أنا مش هخليكي حتي تفكري تكرريها تاني، و لازم تتأدبي”
صرخاتها تتردد ما بين جدران الغرفة، كلما تهرب من أمامه وتحتمي في ركن من أركان الغرفة الأربعة، يجذبها بقسوة من خصلات شعرها بعد أن جذب وشاحها بعنف ضاري و إبرة المشبك قد جرحت جانب عنقها.
كما تكرر هذا المشهد و مازالت تتمسك بهذا الشيطان والحُجة التي لا تنطلي علي طفل صغير إنها تحبه، فكيف ذلك؟!
عادت من فلك ذاكرتها، تنعي حظها كيف تتحمل هذا الرجل الذي لا تعرف الرحمة درباً إلي قلبه.
نهضت بثقل تتحمل آلام كل إنش بجسدها، ذهبت إلي الحمام لعل المياه الدافئة تخفف و لو قليلاً من الألم الذي ينهش بها.
و في طريقها رأته يتمدد علي الأريكة في الردهة يغط في النوم، لفت انتباهها متعلقاته التي تساقطت علي الأرض، فكانت من بينها مُدية، دنت لأخذها وقامت بفتحها وإشهار النصل الحاد، تفكر في التخلص منه لكن ماذا بعد؟!
جافلتها حركة مفاجئة منه، فكان يتقلب علي جانبه الأخر، ألقت المدية برعب وركضت إلي الحمام و أغلقت الباب جيداً، فتحت الصنبور ذو الثقاب المتعددة، خلعت ثيابها ووقفت أسفله، تنظر إلي آثار الطوق علي ذراعيها وتبكي فتختلط دموعها بالماء.
※ ※ ※
ينظر نور في ساعة يده ذات التكنولوجيا الحديثة، مدت زوجته ذراعيها تعانقه من الخلف
“لابس بدري كدة و رايح علي فين؟”
استدار ليصبح أمامها يبتسم بسخرية
“يعني هاكون رايح فين علي الصبح يا كوكي؟!”
ضيقت عينيها و بمكر تخبره
“ما أنا عارفة أنك رايح الشركة، بس مش عادتك تمشي بدري حتي قبل ما أونكل يصحي، و لا تكون رايح تطمن تشوف السكرتيرة الجديدة جت في ميعادها و لا أتأخرت”
ولي ظهرها إليه ليخفي عنها التوتر الذي غزي ملامحه للتو
“و أنا مالي و مال السكرتيرة، هي مساعدة بابا مالهاش علاقة بيا”
عقدت ساعديها أمام صدرها قائلة
“أتمني”
يدرك المغزى من وراء ما قالت، لا يريد الجدال في هذا الأمر معها لأنها سوف تكشف خبايا مكنونه بسهولة و من خصاله يخشى المواجهة أو يكون في وضع المخطئ سواء أمامها أمام والديه.
“لو فيه حاجة أبقي كلميني، سلام”
تركها وغادر الغرفة، تذكر أمر شقيقه الذي يمكث لدي صديقه، قام بمهاتفته و الأخر أجاب بعد رنين استمر لثواني عديدة
“ألو يا يوسف؟”
أجاب الأخر وأثر النوم علي صوته بادية
“فيه حاجة يا نور؟، ماما كويسة؟”
“و ليك نفس تنام بعد اللي عملته امبارح؟”
استمع إلي زفرة نابعة من شقيقه الذي سأله بضجر
“نور، أنا مش فايقلك، وياريت ما تكلمنيش غير لما تكون فيه حاجة مهمة”
“تصدق أنا غلطان بكلمك عشان أطمن عليك و أقولك كفاية لعب العيال بتاعك و أرجع، لكن هقول إيه بس، بابا عنده حق لما قالك إنك دلوعة وتربية ماما”
كانت إجابة الأخر إنهاء المكالمة دون إنذار، زفر نور بحنق و يجز علي أسنانه متمتماً
“ماشي يا يوسف، شوف مين اللي هيخرجك من أقسام و لا أي داهية تاني”
※ ※ ※
تضع عزيزة أطباق الطعام علي المنضدة وتنادي علي ابنائها، فكانت غرام تتظاهر بالنوم، فما حدث افقدها النعاس منذ الأمس و كذلك الشهية، فهي لم تلج إلي مخفر أبداً من قبل سوي عندما قامت بتقديم بلاغ في رجب فقط، لم تعلم أن الأمر سيتطور إلي تلفيق مصيبة كانت ستقضي علي مستقبلها ومستقبل أسرتها.
و علي الجهة المقابلة تقف ابتسام أمام قطعة المرآة المعلقة علي الحائط، تضبط من هندمها وتتذكر نظرات حسن لها طوال الطريق حتي طلبت منه غرام أن يتوقف بالقرب من الحارة، حتي لا تتشدق الألسنة بالقيل والقال.
لما كلما تنظر إليه عينيه تشعر بالرهبة، و لهفة تنضح منه لكن يخفيها خلف وجه صارم أحياناً أخري بالأحرى عندما يراها برفقة عثمان.
انتبهت إلي صوت اهتزاز يأتي من هاتفها، تعلم من المتصل دون أن تلقي نظرة علي شاشة الهاتف فمن غير يتصل بها كل صباح ليطمئن عليها ويقوم بإيصالها إلي المدرسة.
“ابتسام؟”
سرعان استدارت وجدت غرام نهضت وجلست تنظر إليها، ابتلعت لعابها خوفاً من أن تسألها من المتصل
“صباح الخير يا غرام، ماما كانت عمالة تنادي عليكي عشان تفطري”
أشارت الأخرى إليها بجوارها
“تعالي أقعدي عايزاكي في حاجة”
جلست وتشعر بالقلق حتي تلاشي عندما ابتسمت غرام إليها و تخبرها بما لا تتوقعه بتاتاً
“و الله و كبرتي يا بوسي، وبقيتي بتتحبي كمان”
“أتحب؟، قصدك إيه؟”
قامت بالضغط علي خدها بأصبعيها
“مستر حسن أبو علي”
صدمة أخري، فكانت تظن أنها ستسألها عن عثمان
“ماله مستر حسن؟”
“ده ماله و حاله متشقلب من ساعة ما أتعين السنة دي في المدرسة عندكم، و لا نظرات عينيه اللي كل ما يبصلك بتقول شعر و مواويل”
تدلي فكها و لم تكن لديها قدرة علي استيعاب ما تلقيه عليها شقيقتها
“إيه اللي بتقوليه ده، إيه اللي هيخلي واحد زيه في مركزه يبص لتلميذة عنده والفرق ما بينهم عشر سنين؟!”
وضعت غرام ذراعها علي كتفي شقيقتها
“و إيه العجيبة في كدة يعني، كلها كام شهر و هاتدخلي الجامعة إن شاء الله وهو باين عليه إنه محترم و ابن أصول، و أنا من خبرتي في البني آدمين بقولك إنه بيحبك و وقفته معانا إمبارح تمهيد إنه عايز يقرب مننا و يدخل البيت من بابه”
تشعر بانقباضه في قلبها عندما سمعت ما سبق، بالطبع تتمني زوجاً مثل حسن كما تطمح دائماً، لكن هناك عائق بل سداً منيعاً لا يمكن أن تتجاوزه بسهولة، فإذا علم عثمان بحرف من حديث غرام لا تضمن ماذا سيفعل حينذاك، كم هو متهور وسريع الغضب.
“بس أنا… “
“سلام عليكو”
قاطعها صياح هند التي ولجت للتو فنهضت ابتسام وكأن مجيء صديقة شقيقتها أنقذها من هذا الحديث
“و عليكم السلام، هاسيبكم بقي ويادوب ألحق بوابة المدرسة ما يقفلوها”
صاحت غرام
“لما ترجعي هنبقي نكمل كلامنا”
لم تقل ابتسام شىء وغادرت علي الفور قبل أن تعطلها والدتها أيضاً
“بقولك إيه يا غرومة أنا ما فطرتش وواقعة من الجوع وخالتي عزيزة جهزت الفطار و ريحة الطعمية المحشية ما تتقاومش، قومي يلا تعالي نفطر ونبقي نرغي في اللي حصل و عندي موضوع عايزة أحكيهولك”
ما كان من غرام سوي الموافقة والذهاب لتناول الفطور مع صديقتها التي تتظاهر بالجوع لتجعلها تأكل بعد أن أخبرتها عزيزة عندما أتت بعدم تناول ابنتها الطعام منذ الأمس.
طرقات علي الباب فسألت هند بأسلوب الدعابة
“ده مين اللي حماته بتحبه جاي علي الصبح كدة؟”
فتحت غرام فوجدت الطارق شقيقتها فعقبت الأولي بسخرية وتحمل الصغير منها
“الله يرحمها أم سمير ماتت بعد ما بليتنا بابنها”
لم تعلق أحلام علي تهكم شقيقتها، لديها حق فزوجها بلاء بل ولعنة أصابتها ولم تقدرعلي قلبها أن تخلصه من تلك اللعنة.
جلست معهم و نظرت إلي الطعام دون شهية فقالت والدتها
“مدي إيديكي يا قلب أمك و كولي، أنا عاملة الطعمية المحشية اللي بتحبيها”
و قبل أن تبدأ في تناول الطعام نظرت إلي غرام وسألتها
“هو صح اللي سمعته إمبارح؟”
تركت غرام الخبز وأجابت
“أيوة، و الحمدلله الموضوع عدي علي خير وأديني قدامك أهو”
لم يكن لديها رغبة في الحديث عن كل تفاصيل ما حدث، لا تريد أن تزيد من هموم شقيقتها فيكفي همها مع زوجها الفاسد.
هزت أحلام رأسها في صمت، لكن لفت نظر شقيقتها الوشاح الذي يخفي منتصف جبهتها و كاد يصل إلي شفتيها.
“ماما؟”
تحرك الصغير من فوق فخذي خالته، يمد ذراعيه إلي والدته، رفعت أحلام ذراعيها لتأخذه فانحصر طرف كم عباءتها عن ساعديها.
خلعت لها الوشاح لتري ما يخفيه اسفله فاتسعت عينيها وتبادلت كلتيهما النظر، فكانت عينان أحلام تنضح بالانكسار بينما غرام تشتعل عينيها بألسنه من اللهب تنذر بعاصفة علي وشك الحدوث.
يتبع…
ــــــــــــــــ
*الفصل السادس*
ولج للتو من باب الشركة الزجاجي، يستقبله كل ما يقابله من الموظفين بحفاوة و ترحاب لا يخلو من الإطراء و التملق، فهو ابن ربيب عملهم والمدير التنفيذي للشركة، بيده الكثير من الأمور والمسئول الثاني بعد والده مالك مجموعة «Y&N».
صعد عبر الدرج بخفة حتي وصل إلي الطابق المنشود الذي يوجد به مكتب والده أو المكتب الذي يسبق غرفة والده حيث تجلس ذات العيون التي تأسر قلوب الرجال من النظرة الأولي، خبيرة في العزف علي أوتار قلب كل من يقترب منها لاسيما ذوي الأفئدة التي تركض خلف كل ما هو جميل وصعب في آن واحد.
تحمحم قبل أن يعبر الباب، رفعت عينيها عن الأوراق التي تقوم بتحضيرها ريثما يأتي مديرها أو زوجها!
نهضت بخجل متقن للغاية، تنظر إلي أسفل
“مستر نور؟، أهلاً وسهلاً بحضرتك، أنا كنت بخلص مراجعة الإيميلات بعد ما طبعتها، هخلصها وهبعتها لرأفت بيه”
جلس علي الكرسي أمام مكتبها مبتسماً، عينيه تتجول بجرأة سافرة علي ملامحها وجسدها، انتبه إلي انها تلاحظ فحصه الشامل لها، حمحم مرة أخري ليخبرها
“أتفضلي أقعدي يا آنسة سوزي”
ابتسمت وليتها ما ابتسمت، يبدو أن درجات الحرارة ترتفع، ربما المكيف معطل، ألقي نظرة خاطفة وجده يعمل و علي درجة حرارة علي نقيض درجة حرارة جسده للتو.
“أنا جايلك مش جاي للشغل”
علامة استفهام تنضح من عينيها ذات الكحل الأسود القاتم و الأهداب الكثيفة، أكمل دون مقدمات ليس لها فائدة، شخص عملي مثله لايملك وقتاً للمرواغة فالأفضل إليه التحدث مباشرة
“بصراحة من وقت ما قدمتي هنا في الشركة و أنا نفسي أتعرف عليكي أكتر، أقرب منك، اللي حسيته إعجاب و مع الوقت الإعجاب قلب لحب، من الأخر و من غير لف و دوران أنا بحبك وعايز أتجوزك”
※ ※ ※
طرق عنيف بكفيها علي باب منزل شقيقتها وصياح وصل إلي القاصي والداني
“أفتح يا سمير يا عرة الرجالة، بتعمل علي أختي دكر؟!، أفتح و أنا هخليك عبرة يا حيوان”
خرج الجيران ينظرون بشماتة في هذا الجار المؤذي الذي يعتدي علي زوجته بالضرب والشتائم المهينة، اخبرتها احداهن
“ما تسيبهوش غير لما تاخدي حق أختك الغلبانة منه، يا عيني عليها طول الليل عمالة تصرخ و هو عمال يضرب فيها”
ألتفت إليها غرام وبغضب سألتها
“و لما أنتم سامعين اللي بيعملوا فيها الكلب ده، ما كسرتوش الباب علي دماغه و خدوتها و كلمتوني؟”
نظرت السيدة إلي الأسفل بحرج فاجابت الأخري
“ما أنتي عارفة يا غرام اللي فيها، كل ما نيجي نحوشها منه يتجنن علينا وتقوم هي تزعق فينا وتقولنا ملكوش دعوة، واحد ومراته بيتخانقوا، أنتم ليه بتدخلوا في اللي مالكوش فيه”
زادها الحديث غضباً، كأنه وقود انسكب علي النيران فازدادت اشتعالاً، ألتفت نحو الباب في محاولة بائسة
“أفتح يا جبان، خايف مني؟، و الله لو ما فتحت لأنطلك من الشباك و هاجي أجرك من قفاك زي الخروف يا… “
فتح الباب فظهر لها بشجاعة زائفة، يصيح بصوت جهوري
“جري إيه يا بت فيه إيه؟!، هو أنا عشان ساكتلك لأنك أخت مراتي يبقي هتسوقي فيها وتقلي أدبك علي واحد المفروض تقوليله يا أبيه”
“بت ما تبتك، أنا أختي هخلصها منك و من شرك يا شيطان، بس قبل ما أعمل كدة لازم أخد لها حقها، أنت مقطعلها جسمها بالحزام و أنا هقطعلك وشك بالشبشب”
لم تكن لديه فرصة استيعاب ما تفوهت به للتو، في ثوانٍ خلعت نعلها ذو الكعب الثقيل وأخذت تكيل إليه ضربات عشوائية يصاحبها كلمات مهينة إليه، قابل ذلك برفع ساعديه للدفاع عن وجهه ويصرخ بوعيد و سباب يزيدها غضباً وتستمر في ضربه، حتي جذبتها يد ذات قبضة ضعيفة، تصرخ صاحبتها
“كفاية يا غرام”
ابتعدت الأخري تنظر إلي شقيقتها التي أكملت وتقف بينها و بين زوجها في وضع الدفاع عنه أمام الجيران وهند التي أتت برفقة جمال وعاطف حيث لحقوا بغرام قبل أن ترتكب جريمة في هذا السمير
“إيه اللي عملتيه في جوزي ده؟!، أنا مطلبتش منك تاخدي لي حقي”
كان زوجها يتأوه واضعاً كفه علي رأسه التي اصابها جرح من أثر الضرب
“ألحقيني يا حلومتي، أختك المفترية جت فضحتني قدام الجيران و كمان مدت شبشبها عليا، وإيه ده”
نظر إلي كفه وجد الدماء فصاح بهلع يثير ضحك الآخرين
“دم، أختك سيحت دمي يا أحلام”
ألقت غرام نعلها علي الأرض في صدمة غير مبالية لهذا الأبله تسألها
“كنتِ عايزاني أعمل معاه إيه بعد ما شوفت اللي عمله فيكي؟!، أسقفله و أقوله برافو عليك؟!”
ابدت قوة ليست من خصالها
“حتي لو قطعني حتت ملكيش حق تعملي اللي عملتيه، و اللي حصلي يخصني أنا”
لم تصدق غرام مدي ضعف واستسلام شقيقتها
“إيه يا بنتي الضعف و انعدام الكرامة اللي بقيتي فيه ده؟!، لسه بتدافعي عنه و بتحامي له؟!، ده لو ماسك عليكي ذله مش هتعملي كدة في نفسك”
ابتلعت الأخرى لعابها دون أن تظهر التوتر الذي داهم داخلها، أخذت تلتفت من حولها فوجدت الجيران و هند و جمال وعاطف جميعهم ينظرون إليها بامتعاض
“يا ستي أنا حرة، جوزي و بحبه و مش أول ولا أخر مرة بنتخانق، ياريت تاخدي صاحبتك واللي معاها وتمشوا من هنا”
و حدقت إلي جيرانها و صاحت
“و ياريت كل واحد فيكم يخليه في حاله وبطلوا تحشروا نفسكم في حياتي”
هزت غرام رأسها لما تسمعه و تراه، خرج كلا من جمال وعاطف من الفناء، امسكت هند غرام من عضدها تجذبها إلي الخارج
“يلا يا غرام هي اللي اختارت، سبيها براحتها”
و قبل أن تغادر برفقة صديقتها صرخت بوعيد
“عارفة لو قالوا لي يا أحلام إنه بيولع فيكي مش هسأل و لا هعبرك”
تركتها و ذهبت، قلبها يتألم من أجل شقيقتها بالرغم من رد فعلها العجيب و ضعفها المقيت، أخذت تبكي بانهيار، ربتت هند عليها
“بتعيطي ليه مش هي اللي أتجوزته بارادتها برغم رفضكم لجوازهم، و دلوقتي راضية باللي بيعمله فيها، يبقي سبيها تتحمل نتيجة اختيارها”
وقفت الأخري تستند بظهرها إلي حائط مبني قديم
“يا هند أنتي شوفتي بعينيكي اللي عمله فيها، أسيبها لحد ما في يوم يخلص عليها؟!، حب إيه اللي يخليها ترمي كرامتها تحت رجل واحد محسوب علينا راجل، ده ملعون أبو الحب اللي يهين الواحد”
اكتفت هند بهز رأسها أسفاً علي ما يحدث، و داخلها تتذكر ما هي مقبلة عليه، زواجها في منزل حماتها يقلقها للغاية لكن حب جمال لها الدافع الذي يجعلها تطمئن أن لا يسمح بأحد أن يتعدي عليها بقول أو فعل حتي لو كانت والدته.
※ ※ ※
“و بكدة خلصنا Unite 6، و الحصة الجاية عندكم exam علي كل اللي فات”
صدح رنين انتهاء المحاضرة، و كانت ابتسام تلملم دفترها والكتاب و تضعهما داخل حقيبة المدرسة
“ابتسام؟”
انتبهت إلي نداء معلمها، نهضت وأجابت بتوتر
“نعم يا مستر؟”
أشار إليها
“تعالي”
ذهبت إليه وتستمع إلي همس زميلاتها، اقتربت منه فسألها باهتمام
“ماما و غرام عاملين إيه دلوقتي؟”
أومأت إليه بطيف ابتسامة
“الحمدلله بخير، شكراً لحضرتك علي وقفتك معانا امبارح”
ابتسم إليها وفي عينيه آلاف الكلمات تخطها نظرة تجعلها كلما تنظر صوبه يخفق قلبها بشعور غريب.
“كدة أزعل، لأن زي ما قولت مفيش شكر ما بينا، و لو احتاجتي أي حاجة في أي وقت أنا موجود، رقمي عندك علي الملازم، اتفقنا؟”
هزت رأسها بالموافقة، و كادت تستأذن بالعودة إلي المقعد لكنه اوقفه بسؤال تخشي اجابته
“ألا قوليلي، هو مين الشاب اللي كنتِ راكبة معاه الموتوسيكل؟”
“ده، ده يبقي في مقام أخويا و ساكن معانا في الحارة، كان بيوصلني حتي استأذن من ماما”
كان التوتر واضحاً علي ملامحها و يديها المتشابكة في بعضهما البعض، و تجنبها للنظر صوب عينيه وهي تخبره، كل ذلك يعني إنها تكذب، فقال لها بنظرة مبهمة
“تمام يا ابتسام، يلا روحي اقعدي مكانك وماتنسيش ميعاد الدرس بكرة”
“حاضر يا مستر”
عادت سريعاً ومن طرف عينيها وجدته مازال يحدق إليها بنظرة زادت من قلقها أكثر.
※ ※ ※
ولج للتو من الخارج يبحث عن والدته فوجدها تجلس أمام التلفاز وتقطع الخضروات، ألقي التحية فأجابت، جلس بجوارها في تردد فيما سيخبرها به حول موضوع زواجه و المكوث معها في منزل العائلة
“عايز تقول إيه يا جمال؟”
سؤالها أدهشه، نظر إليها بتعجب فتابعت
“أنا مربياك و حفظاك، لما تكون عايز حاجة و خايف لأقولك لاء بتيجي جمبي تقعد وعمال تقول في نفسك أقولها و لا لاء”
أخفي توتره خلف ابتسامة يخبرها
“حبيبتي يا أمي، أنا فعلاً عايزك في موضوع بخصوص… “
ظل متردداً لثوانٍ فقالت له
“عايز تعيشوا أنت و مراتك معايا هنا و خايف لأرفض”
كاد يعقب فقاطعته مردفه
“و مين قالك إن هارفض، بالعكس ده أنا كنت هقولك كدة بس قولت خطيبتك مش هاترضي و خصوصاً أمها اللي ما بطقنيش”
“يا أمي، خالتي أم هند طيبة و بتحبـ… “
قاطعته بإشارة من يدها
“لا عايزها لا تحبني و لا عايزة منها حاجة، أنا كل اللي يهمني هو أنت و بس، طالما مبسوط و مرتاح يبقي خلاص، علي العموم أبقي أعرض الموضوع علي حماك و شوف هيقولك إيه”
“حمايا وحماتي وهند كلهم موافقين”
رفعت جانب شفتيها بتهكم
“و أنا آخر من يعلم؟!”
“لاء أبداً يا أمي، أنا قولت أشوفهم هيوافقوا الأول و لا لاء وبعدين أبلغك، و إيه رأيك أن اللي شار عليا كدة هند بنفسها”
“والله؟!، طيب ماشي”
شعر بأن والدته لم تصدقه، لأنه يدرك جيداً ما بين حبيبته وبين والدته من مشاحنات ومواقف سابقة تركت سد منيع بينهما.
“طيب و ربنا هي اللي قالتلي تعالي نتجوز مع أمك لحد ما ربنا يفرجها عليك و ناخد إيجار برة، حتي أنا ذات نفسي استغربت”
“من غير ما تحلف يا ولاه أنا مصدقاك، و ما تقلقش أنا هابقي أمها التانية”
“بجد يا أمي؟”
ينضح الفرح من عينيه فأجابت بتوكيد
“طبعاً طبعاً يا حبيب قلب أمك، و حتي كمان هسيبكم أول أسبوعين وهاروح أقعد عند أختك دلال، أهو مني أونسها بدل ما قاعدة لوحدها لحد ما جوزها يرجع من السفر و منها أخد بالي منها”
و بسعادة عارمة عانق والدته
“حبيبتي ياماه، ربنا ما يحرمنا منك يا غالية”
ربتت علي ظهره بقوة
“و لا منكم أنت و أخواتك يا غالي يا ابن الغالي”
وإذا اختفت النوايا في الصدور، يكفي ما تبوح به العيون من ما يدور.
※ ※ ※
تخرج الطالبات من البوابة المفتوحة علي مصراعيها، وبمجرد أن عبرت منها سمعت هاتفها يصدح بالرنين، فما غيره الذي يتصل بها منذ الصباح وهي لا تجيب عليه، مما جعلته ينتظرها بالقرب من المدرسة.
“واقفة ليه يا بوسي، يلا تعالي هنركب توكتوك”
“معلش يا سمر روحي أنتي أركبي معاهم، أنا هاتمشي عشان هاشتري حاجات لماما”
“تمام، خدي بالك من نفسك، يلا سلام”
اومأت الأخرى إليها وسارت بخطوات سريعة إلي احدى الشوارع الجانبية الشاغرة من المارة
و لم تنتبه إلي زوج من العيون الرمادية تراقبها.
و إذا بقدميها ولجت إلي الشارع الهادئ لتجيب علي الإتصال فشعرت بيد علي كتفها تدفعها برفق نحو مدخل بناء مهجور، شهقت بخوف
“عثمان؟”
كان الغضب يندلع من عينيه
“أيوة الزفت اللي عمال يتصل عليكي من إمبارح و أنتي منفضاله، و الصبح و أنتي رايحة المدرسة عمال أشاورلك تقابليني في الحتة بتاعتنا كبرتي دماغك و روحتي مشيتي مع صاحبتك”
“امبارح زي ما أنت عارف اللي حصل مع غرام و الحمدلله الموضوع أتحل ورجعنا و مكنش ينفع أرد عليك، و الصبح حصل برضو حوار عند أحلام أختي حتي سيبتهم و مشيت عشان ما أتأخرش، يعني كله كان غصب عني”
كانت نبرتها توحي أنها علي وشك نوبة من البكاء، زفر بضيق من حاله، اقترب منها ووضع يده علي ذراعها
“خلاص حقك عليا ما تزعليش، أنا بس كنت قلقان عليكي”
قد سارت قشعريرة يصاحبها حذر من لمسته علي عضدها، أبعدت يده
“أوعي إيدك أنا زعلانة منك، عشان مش أول مرة تقعد تزعق فيا، ده غير بشوف في عينيك نظرات شك أن بكذب عليك”
“مين قال كدة، أقسم بالله أبداً، ده أنا ممكن أشك في الناس كلها إلا أنتي، أنتي روحي يا بت”
نظرت إلي أسفل بخجل فصاح مهللاً
“الله أكبر علي حلاوة مراتي يا ناس”
اتسعت عينيها بصدمة
“مراتك؟”
“أيوة بعتبرك مراتي قدام ربنا، ادعيلي بس أموري تتظبط و أجي أطلب إيدك من خالتي عزيزة”
انقباضه في قلبها حدثت للتو، فهو ليس الشخص الذي تتمناه، كم تحلم بأن تتزوج من رجل خارج الحارة البائسة، ذو مهنة تفتخر بها أمام عائلتها ومعارفها، و ليس صبي ميكانيكي يحصل علي أجرة يومية تكفي مصاريفه الخاصة.
“مالك ساكتة ليه؟، أنا افتكرتك هتزغرطي من الفرحة لما قولتلك هاطلب إيدك”
اتقنت إظهار ابتسامة علي شفتيها يتبعها قولها
“بالعكس، أنا فرحانة ومبسوطة جداً، بس كل اللي طلباه منك تصبر شوية لحد ما أدخل الجامعة، مش هاينفع أتجوز و في نفس الوقت أدرس، هيبقي صعب عليا”
ابتسم ليلقي عليها مخططه
“عادي يا حبيبتي نتجوز وتدرسي وأنتي معايا، و بين إيديا و في حضني و… ”
توقف عن الحديث ليفاجئها بالتقاط شفتيها في قبلة حميمية، دفعته بكل قوتها
“قبل كدة عملتها وحذرتك إنك لو كررتها تاني مش هاتشوف وشي بعدها”
“حقك عليا يا بوسي أنا والله… ”
كاد يقترب منها بندم فصاحت وتبتعد بمسافة
“إياك تقرب مني، المرة اللي فاتت وعدتني، و برضو مفيش فايدة”
تركته وغادرت مدخل البناء المهجور لتجد أمامها آخر ما تتمني أن تراه في تلك اللحظة، نبضات قلبها وكأنها علي وشك أن تتوقف ولسانها يتفوه بصوت يكاد يكون مسموعاً
“مستر حسن؟”
※ ※ ※
ولج من الباب الزجاجي و وجهه ينذر بما هو جاء من أجله، قد قرر أن لا يصبح تحت ضغط تهديدات والده مرة أخرى بل مرات عديدة.
“مستر يوسف”
كان نداء احدى الموظفات تلحق بخطواته السريعة حتي وصل إلي المصعد، توقف أمامها يرفع يده برفض
“أي حاجة عايزة تبلغيني بيها أطلعي قوليها لمستر نور أو رأفت بيه”
ولج إلي داخل المصعد وضغط علي زر الصعود فأنغلق الباب أتوماتيكياً أمام الفتاة التي عادت إلي غرفة المكتب بين زملائها و تخبرهم بما قاله لها يوسف، الابن المُدلل لدي عائلة الشريف.
و لدي رأفت الشريف يجلس خلف مكتبه، يراجع بعض الأوراق وبجواره تنتظر مساعدته ريثما ينتهي من توقيعه علي كل ورقة منها
“أعملي حسابك بكرة هنسافر نقضي يومين في الساحل”
دنت منه وقامت بتقبيل خده
“حبيبي يا فوفو، ربنا يخليك ليا يا بيبي”
حدق إليها بحزم يوبخها
“اللي حصل دلوقت أخر مرة يحصل هنا في الشركة، فاهمة؟”
أومأت إليه و الحزن جلي علي وجهها، أمسك يدها و كاد يخبرها معتذراً من أسلوبه الحاد معها، لكن فُتح الباب فجأةً دون أن يسبقه طرق أو استئذان ليظهر يوسف الذي صوب بصره نحو يد والده التي تمسك بيد مساعدته و علي مقربة شديدة من بعضهما البعض.
حمحم والده تاركاً يد مساعدته
“خدي أنتي الأوراق و روحي راجعيها”
لملمت الأوراق وعينيها لا تبرح عينين يوسف الذي يرمقها بنظرة اربكتها، عادت بالنظر إلي رأفت قائلة
“حاضر يا فندم”
و ذهبت أمام يوسف، فكان يجز علي أسنانه فهو ليس أحمق حتي لا يدرك ماهية ما رآه، هناك ما يفعله والده سراً.
“مش عيب يا أستاذ يا محترم تدخل عليا من غير ما تخبط الباب و تستني لما أسمحلك تدخل و لا لاء؟!”
عقد ساعديه أمام صدره و يتحدث من مركز قوة
“معلش يا رأفت بيه لو كنت قطعت علي حضرتك قعدتك مع سوزي السكرتيرة”
نهض والده يصيح بغضب
“أنت إزاي بتتكلم معايا كدة يا ولد؟!، أنت نسيت نفسك و لا إيه؟!، أنا ممكن… “
رفع يوسف يده ليقف والده عن إكمال تهديده المعتاد
“كفاية بقي كل ما نشد مع بعض تقعد تهددني بأنك هاتسحب مني العربية ورصيدي اللي في البنك، أنا أصلاً سيبتلك العربية في الفيلا و الكريدت كمان، أنا جيتلك النهاردة عشان أقدملك إستقالتي”
أخرج من جيب سترته الداخلي ورقة ووضعها فوق المكتب
“أتفضل”
همّ بالذهاب أوقفه والده
“استني عندك”
سار نحوه وكان الآخر يتحاشى النظر مباشرة إلي والده الذي أخبره
“أنا لو أب قاسي زي ما بتروح تقول لمامتك، كان زماني رزعك قلمين علي وشك دلوقت وندهتلك الأمن يطردوك قدام الموظفين عشان ما يبقاش ليك عين تدخل الشركة تاني”
“أنا… “
قاطعه والده بحدة
“أنا لسه مخلصتش كلامي، أنا هحاول أتغاضي عن أي حاجة صدرت منك و لا كأني سمعت، و لأخر مرة مفيش بعدها مرة تانية، هديلك يومين تفكر فيهم، يا تعقل وترجع لمكانك في الشركة وتكمل نص دينك يمكن ربنا يهديك، يا إما أقسم بالله لهتشوف مني وش ما شوفتوش قبل كدة، مش هقولك إسطوانة كل مرة، لكن هتتفاجىء باللي عمرك ما هتتخيله، وأنت عارف أبوك كويس لما بيهدد مرة التانية بينفذ”
لم يستطع أن يتحمل توبيخ والده أكثر من ذلك، و حتي يضمن أن لا يتهور بحديث يجعله يخسر والده غادر غرفة المكتب، وقفت سوزي عندما رأته فحدق إليها بازدراء وذهب.
اصطدم بشقيقه في طريقه
“يوسف، اسـ… “
لم يقف يوسف إليه ومضي سريعاً، تعجب نور لأمر شقيقه، ذهب إلي والده ليعلم منه ما حدث، و قبل أن يفعل ذلك نظر إلي سوزي التي عندما رأته انخرطت في البكاء، اقترب منها قلقاً عليها
“مالك يا سوزي فيه إيه؟، بابا زعلك أو يوسف؟”
قد قررت استغلال إعترافه بحبه إليها، وجدتها فرصة لا تعوض، فوالده غير مضمون و لا يعطي لها كل ما تريده من مال أو غيره من سيارة أو منزل، يكفي أنها زوجته في السر و عرفي أيضاً حتي لا يصبح لها حق في الإرث.
رفعت وجهها وأخذت تمسح بالمحرمة دموعها لتظهر أمام نور بالضعف لتمتلك قلبه أكثر
“مستر يوسف كان لسه عند رأفت بيه و شكلهم كانوا بيتخانقوا و أول ما خرج من المكتب بص لي من فوق لتحت بقرف من غير ما أعمله أي حاجة”
اقترب منها أكثر و أخرج من جيبه محرمة وأخذ يمسح لها دموعها
“معلش بالتأكيد مكنش يقصد، حقك عليا أنا، ممكن عشان خاطري كفاية دموع”
اقترب منها أكثر فأكثر حتي كادت تصبح بين ذراعيه يخبرها مردفاً
“ما أقدرش أستحمل دموعك، قلبي بيوجعني لما شوفتك في الحالة دي”
توقفت عن البكاء وداخلها يتراقص مثل الحية عندما تصل إلي هدفها، نظرت إليه و بصوت أنثوي رقيق للغاية
“مستر نور، أنا موافقة علي طلبك”
تراجع خطوة للوراء والدهشة تعلو ملامحه
“قصدك موافقة تتجوزيني؟”
هزت رأسها بالإيجاب وأخبرته بدهاء
“اه، بس علي شرط نعمل فترة تعارف زي الخطوبة نقرب منها انت تعرفني و أنا أعرفك”
اتسع ثغره بابتسامة عارمة
“شرطك أمر و أنا تحت أمرك يا روح و قلب نور”
“و فيه حاجة تانية كنت عايزة أعرفها”
“قولي يا حبيبتي”
“مراتك هاتعرف و لا أنت هتخبي عليها و جوازنا هيبقي في السر؟!”
برغم ما يشعر به من توتر عندما أتت له بذكر زوجته وعواقب قراره الأهوج، لكنه تحلي بالشجاعة والعزم أمامها
“أيوة هاقولها بس بعد ما نتجوز، و ما تقلقيش مش هتعمل أي حاجة، بالنسبة بقي لبابا… “
داهم الخوف قلبها فقاطعته
“لاء، قصدي بلاش رأفت بيه يعرف بأي حاجة، أقل حاجة هيعملها معايا هيطردني من الشركة”
ابتسم مرة أخرى مما جعلها تتعجب من رد فعله الغريب، أوضح لها
“ما أنا كدة كدة أول ما هنتجوز هاقعدك من الشركة، و ما تقلقيش ليكي كل شهر مبلغ أضعاف مرتبك اللي بتاخديه هنا، غير العربية، غير الشقة أو الفيلا اللي هتشاوري عليها”
كم هي نادمة أنها عجلت في الموافقة علي الزواج من هذا الرأفت وبيع نفسها له بثمن بخس، و ها هو نجله كالمارد الذي يريد تحقيق كل أحلامها و هي من تملي شروطها أيضاً و ليس هو كما فعل معها والده.
“سرحتي في إيه يا سوزي؟”
انتبهت إليه وعادت من أفكارها الشيطانية قائلة
“بتخيل حياتي معاك هتبقي إزاي”
أمسك يدها يخبرها
“هتبقي جنة”
صدح رنين هاتف المكتب، ابتلعت ريقها وقالت
“ده رأفت بيتصل”
“ردي عليه و أنا كدة كدة راجع علي مكتبي، هاتصل عليكي بالليل نكمل كلامنا”
“تمام”
نظرت إليه مبتسمة، و بعد أن ذهب تلاشت ابتسامتها وجلست علي الكرسي تفكر كيف تلعب علي كلا الجانبين دون خسائر، بينما الضمير لديها في سبات بل في غيبوبة لن يستيقظ منها قط.
※ ※ ※
تجلس بجوار النافذة شاردة فيما يحدث من حولها، خسرت عملها الذي تقتات منه ورقات من المال تساعد مع معاش والدها، تُتهم بالسرقة وهي لن تقبل قرشاً من الحرام و ذلك كان ثمناً لأنها دافعت عن عرضها بكل ما أوتيت من قوة، و هناك أكبر همومها وهو أمر شقيقتها التي أصبحت كالجارية يفعل زوجها ما يشاء بها، ضرب، إهانة و هي تتقبل كل ذلك بصدر رحب، يكفي إنها تعيش علي ماله الآتي من بيع المخدرات، حرام يدخل البيت فيقلب حياتهما للجحيم فما العجب في ذلك؟!، و آخر الهموم كلما ذهبت إلي كل متجر للعمل يعتذر إليها صاحب المتجر بأنه ليس لديه وظيفة شاغرة لديها فتعود خالية الوفاض.
“بت يا غرام”
كان صوت سماح الذي وقفت أسفل النافذة فأنتبهت إليها الأخرى بنفاذ صبر
“نعم يا سماح عايزة إيه؟”
“مالك ياختي متزرزره عليا كدة ليه؟!، الحق عليا جايبلك شغل وفلوسه حلوة أوي، أحسن من مرمطك في المتروهات بشوية عبايات مضروبة”
زفرت الأخرى بضيق أوشك علي الغضب
“انجزي يا سماح وقولي”
اقتربت من حافة النافذة تخبرها بصوت خافت تسمعه غرام فقط
“بصي هبعتلك رقم واحدة علي الواتس هتتواصلي معاها، هي من أمريكا بس بتتكلم لبناني علي فلسطيني أو أردني، ما تفهميش جنسيتها إيه بالظبط، المهم هاتطلب منك بياناتك وصورة ليكي و هتبلغك بالمطلوب منك”
“و يا تري هي مين الست دي و إيه اللي هاتطلبه مني؟!”
تراقب الأجواء من حولها حتي لا يسمعها أحد سوي غرام
“بصي اسمعيني للأخر من غير ما تقطعيني، هي كل اللي هتطلبه منك مقاطع فيديو ليكي مخبية وشك و لا بسه هدومك عادي مرة وأنتي بترتبي أوضتك، مرة و أنتي بتطبخي، أي حاجة أنتي بتكنسي مثلاً أو بتمسحي، بس تكوني باينة كلك علي بعضك، و هتاخدي علي المقطع الواحد 200 دولار، و أنتي و شطارتك لو عملتي مقطعين و لا أربعة و لا خمسة في الأسبوع الواحد، أحسبي بقي كمان لما يتحولوا بالمصري”
عقبت الأخرى بسخرية
“و يا سلام بقي لو الهدوم خفيفة و اللي تحتها باين و لا تكون مبلولة و لازقة عشان تجيب فلوس أكتر صح؟”
ابتسمت سماح كالحمقاء
“برافو عليكي، طول عمرك ناصحة”
هنا لن تعد غرام في تحمل أمر أخر، صاحت بصوت وصل إلي جميع سكان الحارة
“بقولك إيه يا سماح، أنا سيباكي يا حبيبتي تتكلمي و تقولي كل اللي عندك عشان أقطع الشك اللي جوايا و أكذب اللي بسمعه عنك علي كل لسان رجالة وشباب حتي الصبيان الصغيرة في الحارة، أتاريهم عندهم حق و ما خفايا كان أعظم، عايزاني أعمل زيك ألبس المحزث و الملزق والشفاف و أتصور فيديوهات عشان إيه، شوية دولارات أخسر بيهم دنيا وأخرة و سمعتي؟!”
كانت تتوقع أن الأخرى تبتعد أو تخشي الرد لكن حدث نقيض ذلك
“مالك يا بت شايفة نفسك عليا كدة ليه، فاكرة نفسك مين يا ختي، و الكلاب اللي بيجيبوا في سيرتي أخواتهم وأمهاتهم فيديوهاتهم مالية التيك توك يعني لا تعايرني و لا أعايرك، و اللي بيته من إزاز ما يحدفش الناس بالطوب يا عينيا”
تجمع المارة وبعض الجيران فتدخل سعيد شقيق غرام
“أخواتنا وأمهاتنا أشرف منك يا سماح، و لا الوسخ فاكر كل الناس وسخة زيه”
صاحت غرام في شقيقها
“واد يا سعيد ما تدخلش في الكلام و أدخل جوة”
ثم ألتفت إلي سماح و تمسك بخشب النافذة قائلة
“و أنتي يا أخت سماح روحي أتكلي علي الله ربنا يهديكي أو يهدك، المهم تريحنا منك، عن إذنك”
اوصدت النافذة في وجهها و تركتها تتشدق كالتي فقدت عقلها حتي توقفت عن الصياح عندما رأت عاطف يحدق نحوها بازدراء.
※ ※ ※
في صباح اليوم التالي…
“واد يا سعيد، بت يا ابتسام قوموا يلا جهزوا نفسكم عقبال ما أعملكم الفطار والسندوتشات”
تناديهم والدتهم، و كانت غرام مازالت مستيقظة منذ الأمس، لم تأكل و لم تملك الرغبة في التحدث مع أحد، أثرت الصمت حتي لا تزيد من الآلام داخلها، و كيف لا تزيد و تجد كل أبواب العمل مغلقة مهما سعت إليها.
اكتفت ابتسام بالرد علي والدتها
“ما تعمليش حسابي يا ماما، أنا مش رايحة المدرسة النهاردة”
و صدح صوت سعيد أيضاً
“و أنا مش رايح عشان المستر حلف علينا إمبارح اللي مش هيدفعله فلوس المجموعة مش هيدخله المدرسة”
ولجت والدتهم إلي الغرفة تسأل ابنتها
“و أنتي يا ست ابتسام يا أم ثانوية عامة، مش هاتروحي ليه؟”
لو تعلم السبب الحقيقي لعدم ذهابها إلي المدرسة و هو تخشى و تخجل في آن واحد من رؤية معلمها الذي رآها تخرج من منزل مهجور و خلفها عثمان يناديها، تلاقت عينيها برماديتين حسن الذي حدقها بغضب شديد، لم تملك الشجاعة لتكذب علي سبيل الدفاع عن نفسها، و اختارت الفرار من أمامه غير مكترثه لنداء عثمان.
“تعبانه شوية و مش قادرة، و بعدين معظم اصحابي مش بيروحوا، أنا اللي بيخليني أروح عشان ما باخدش درس غير الإنجليزي و الرياضة و باقي المواد معتمدة علي شرح المدرسين اللي ما بيشرحوش أصلاً”
نهضت غرام و أخيراً تخلت عن صمتها
“واد يا سعيد قوم ألبس و روح و أنا إن شاء الله قبل جرس المرواح هتلاقيني عندك، هدفعلك الفلوس”
و أخبرت شقيقتها
“و أنتي شوفي عايزة تاخدي درس في مواد إيه و مع مين و قوليلي المبلغ المطلوب و هيبقي عندك علي بكرة”
“و هاتجيبيلهم منين يا بنتي، ده المعاش فاضل منه 500 جنيه و إحنا يا دوب في نص الشهر”
كان حديث عزيزة وتشعر بالحزن نحو ابنائها، فهي تعجز عن تقديم لهم كل ما يحتاجونه، فهي صاحبة مرض مزمن يجعلها غير قادرة علي العمل.
كانت غرام قد فتحت الخزانة و أخذت المال المتبقي معها و مدت به يدها إلي والدتها
“اتفضلي يا أمي خلي دول معاكي وبإذن الله هتفرج من عند ربنا”
و نظرت نحو حقيبة الملابس المليئة بملابس قد اشترتها و قامت بتخزينها إلي أن تصبح عروسا!
※ ※ ※
و في مكان آخر في حي المعادي كان قد استيقظ للتو من أجل الذهاب إلي عمل مقابلة في إحدى الشركات، بعد أن رأي الإعلان عن طلب مديرين تسويق علي صفحة خاصة بالوظائف علي موقع التواصل الإجتماعي الشهير.
“أنت رايح فين علي الصبح يا يوسف؟”
ألتفت الأخر إلي صاحبه و أخبره
“رايح interview في شركة طالبة التخصص بتاعي”
اقترب منه صاحبه متعجباً
“أنا هاتجنن منك، يبقي باباك رأفت بيه الشريف صاحب أشهر براند في مصر و مصانع وسلسلة محلات في كل محافظة و رايح تقدم علي شغل في شركة تانية يا عالم دول صادقين و لا نصابين؟!”
انتاب الأخر حالة من الضيق فنظر إلي صاحبه بامتعاض
“لأن ما بحبش التحكمات والتهديد كل شوية، و أنا هوري بابا و نور إن من غيرهم قادر أعيش و اعتمد علي نفسي”
“غلط يا يوسف، أنت صاحبي و بعزك جداً، و والصاحب لما بيشوف صاحبه في شدة يقف جمبه و يقدم له النصيحة اللي توصله لبر الأمان، و الأمان أنك تكون مع عيلتك، تكون في ضهر باباك و أخوك، هم عايزين مصلحتك و أنت فاهمهم غلط، أدي لنفسك فرصة تانية وقرب منهم مش يمكن حالك يبقي أحسن؟!”
ابتسامة ساخرة غزت شفتيه
“الأحسن إن أعمل نفسي بنفسي، مش أعتمد علي حد حتي لو كانوا أهلي”
※ ※ ※
“أي عباية وأي فستان بـ 200 جنيه وبس، يلا عرض خاص و مش هايتكرر، كل قطعة بالتيكت بتاعها، و اللي هتاخد 3 قطع هعملها خصم 100 جنيه”
ظلت تكرر حديثها داخل القطار و تقوم بعرض الثياب أمام أنظار السيدات و الصبايا، تم بيع القليل من القطع و بدأ توافد النساء عليها للشراء، توقف القطار في المحطة و ولجت بائعة علي معرفة بها، اقتربت منها لتخبرها بهمس
“انزلي المحطة الجاية عشان اللي بعدها فيها تفتيش، و الظابط المسئول هناك أجارك الله من رخامته وشره”
“تسلميلي يا حنان”
لملمت سريعاً الثياب من أيادي السيدات
“معلش يا جماعة أنا هنزل المحطة الجاية”
و في مكان آخر ليس ببعيد يقف في حيرة من أمره بعد أن كاد يطلب رحلة من تطبيق التوصيل للذهاب إلي الشركة، وجد المبلغ المطلوب أكبر من ما يملكه حالياً.
ألقي نظرة علي عنوان الشركة فوجده يقع بالقرب من محطة قطار تبعد عن الحي بثلاث محطات، أخذ يلتفت حوله فوجد إنه علي مقربة من محطة المعادي، شعر بالجوع فهو لم يأكل منذ أمس، وجد مطعم خاص بعمل الشطائر و الأكلات الشعبية كالفول و الفلافل،
ذهب وقام بشراء اربع شطائر جبن مقلي و سار نحو المحطة من الخارج باحثاً عن مكان ليجلس فيه و يتناول فطوره، وجد متجر لبيع العصائر الطازجة يوجد به مقاعد للإستراحة، جلس بعد أن طلب من البائع
“عصير قصب لو سمحت”
سأله الرجل
“صغير و لا كبير يا كابتن؟”
نظر إلي ما تبقي معه من مال وقال
“صغير وعايز إزازة مياه”
أشار الرجل إليه نحو براد عرض المشروبات الباردة وزجاجات المياه المعدنية
“أتفضل عندك أزايز المياه في التلاجة”
رفع جانب فمه بسخرية، يتحدث بتهكم علي ما يحدث معه
“فينك يا منيرة هانم، تيجي تشوفي ابنك مش معاه يركب أوبر و هيشرب عصير قصب”
أخذ زجاجة المياه من البراد و جلس علي المقعد ليتناول الشطائر أولاً.
و أمام المتجر علي الجهة المقابلة تقف وتحمل الحقيبة البلاستيكية المليئة بالثياب، تشعر بالعطش الشديد و بعض الدوار، فهي لم تأكل أيضاً منذ أمس و ربما من قبل.
عبرت الطريق وذهبت لتستريح قليلاً علي مقعد شاغر، ترفع يدها إلي البائع
“لو سمحت يا عم جمعة واحد قصب صغير و كوباية ميه”
ابتسم إليها البائع قائلاً
“يا صباح النور، عاش من شافك يا غرام، بقالك فترة ما بتجيش”
“ما بنزلش المعادي كتير، ما أنت عارف الناس هنا ما لهمش في البضاعة اللي بتلف المترو، دول زباين سيتي ستارز، كايرو فيستڤال، شغل ماركات عالية مش شغل التقليد و لا المحلي اللي معانا”
كان الذي يتناول فطوره منتبهاً إلي الحديث خاصة مع صاحبة الصوت المألوف لديه، يريد رؤية وجهها لكنها تجلس موليه ظهرها إليه
بينما عقب عم جمعة
“و الله يا غرام ما كلهم، ما تخدعكيش المظاهر، ممكن واحد لابس بدلة شيك و أحدث موديل لزوم الوجاهة لكن لو دورتي في جيبه معهوش غير حق المواصلات”
توقف الأخر عن الأكل و حدق إلي البائع بحنق، يقول في نفسه
“يا عم ده أنت لو قاصد تلقح مش هتقول كدة”
ردت غرام علي حديث البائع قائلة
“علي رأيك يا عم جمعة، ربنا عالم بحال كل واحد فينا، ربنا يرزقنا جميعاً”
“آمين يارب”
أخذت الكوب و شربت العصير و يليها كوب الماء
“عايز حاجة مني يا عم جمعة؟”
أخرجت ورقة بفئة الخمس جنيهات و تعطيها إليه، رفع الأخر يده برفض
“و الله ما هاخد و لا مليم، و مش عايز حاجة منك غير تيجي تسلمي عليا، و لا محتاجة أي حاجة أنا زي والدك الله يرحمه”
ابتسمت الأخرى واخبرته بإمتنان
“تسلم الله يباركلك”
رفعت الحقيبة الكبيرة واستدارات لتغادر فتعثرت في مقعد مقلوب، وقعت الحقيبة وتناثرت أغلفة قطع الثياب و هي كانت علي وشك أن تقع، نهض يوسف وأمسك ساعدها
“حاسبي”
نظرت إليه و اتسعت عينيها، تمتلك ذاكرة حديدية، سرعان قامت بالتعرف عليه
“أنت اللي كان مقبوض عليك أداب في قسم دار السلام أول إمبارح؟”
جز علي أسنانه بحنق ثم وجه إليها إهانة مماثلة
“ما أنا برضو فاكرك، مش أنتي اللي كان مقبوض عليكي في تهمة سرقة برضو؟”
ابتسامة صفراء زينت ثغرها يليها رد هازء
“دي كانت تهمة متلفقة و الحمدلله أفرجوا عني بعد ما ظهرت برائتي، الدور و الباقي علي الممسوك أداب”
كان سيخبرها بدفاع عن حاله إنه لا علاقة له بتلك التهمة و لا يعلم لما يبرر لها، لكن ما لفت انتباهه بقوة أغلفة الثياب المدون عليها العلامة التجارية الخاصة بشركات والده، أخذ القطعة و دقق النظر في البيانات المدونة علي الغلاف، أخرج الثوب منه و قام بلمسه و فحصه ليكتشف أن تلك القطعة تقليداً لما ينتجونه.
“هات الفستان خليني أمشي، و لو هاتشتريه بـ 200 جنيه”
ابتسم إليها وعقب ساخراً
“يعني مقلدين براند أقل فستان فيه ما يقلش عن 2000 جنية و كمان بتبيعوه بـ 200، لاء واضح إنك بريئة من السرقة بس نصابة كبيرة”
ارتجفت من داخلها لكنها صاحت في وجهه
“أنت بتبرطم بإيه يا جدع أنت، أنا و لا حرامية و لا نصابة، أنا شارية الهدوم دي من محل عندنا، روح أسألها بنفسك لو مش مصدقني”
اختطف الحقيبة من يدها و بيده الأخرى يجري مكالمة هاتفية
“أيوة يا نور، هابعتلك الـ location تعالي و هات معاك المسئول القانوني والرجالة و تعالوا بسرعة”
“هببت إيه تاني يا يوسف؟”
ابتسم بظفر و يرى غرام تقف أمامه تحاول استيعاب ما يتفوه به، أجاب علي شقيقه
“لاقيت مين اللي بيضرب بضاعتنا في السوق”
يتبع….
لقراءة الفصل التالي : اضغط هنا
لقراءة باقي حلقات الرواية اضغط على : (رواية غرام في المترو)