رواية ديجور الهوى الفصل الثالث والخمسون 53 بقلم فاطمة طه سلطان

رواية ديجور الهوى الفصل الثالث والخمسون 53 بقلم فاطمة طه سلطان

رواية ديجور الهوى البارت الثالث والخمسون

رواية ديجور الهوى الجزء الثالث والخمسون

رواية ديجور الهوى الحلقة الثالثة والخمسون

-أنتَ بتقول ايه؟!!!!!!!!!
صاحت نرمين بجنون بعدما أخذت وقتها تحاول استيعاب صدمة ما سمعته…
تحدث منير بنبرة مختنقة:
-أنا عارف أن الموضوع مش سهل بس حسيت أنك لازم تعرفي الأول قبل ما أسجلها باسمي.
“بس حسيت” ؟!
ياله من وغد وكأنه يقدم لها معروف..
تنظر له نرمين نظرات زائغة تحاول أن تلمح في نبرته، طريقته، عيناه أي شيء قد يدل على أن ما يقوله غير صحيح، أنه يمزح لكن لا شيء يدل على ذلك أبدًا..
سألته نرمين باستنكار:
-منير الكلام اللي بتقوله ده حقيقي ولا بتحرق دمي زي عادتك؟!!!
سألته بحماقة وجنون رغم أنها تعلم بأنه لن يمزح في أمر هكذا لكنها حاولت قول أي شيء، تعلقت بأي أمل قد يجعل ما تسمعه غير حقيقيًا…
حطم منير آمالها وهو يغمغم:
-ياريته مكنش حقيقي، ياريتني كنت بكدب..
أنهى حديثه من هنا وانتابتها نوبة صراخ جنونية جعلت زينب تأتي من الداخل، كانت نرمين تصرخ وتقول كلمات غير مفهومة لكنها بالتأكيد تلعنه، تصرخ غاضبة على كل دقيقة عاشتها مع هذا الرجل…
بعد نوبة صراخ طويلة لم يكن منير قادر على تهدئتها ولا حتى زينب، كانت كـ من فقدت عقلها كما فقدت صوتها أثر الصراخ…
كانت تقف في غرفتها بعدما وضعت حقيبتان سفر على الفراش تقوم بإلقاء ملابسها ومقتنياتها الشخصية أي شيء قد يأتي أمامها بعشوائية شديدة وعدم تركيز…
كانت زينب تقف في الغرفة بعدما أخبرت منير بأن يظل في الخارج هي في حالة عصبية ولن تتقبل منه أي حديث..
-اهدي يا بنتي طيب وخلينا نتكلم..
صرخت نرمين في وجهها قائلة بجنون وكأن المشهد الذي مر عليه سنوات عديدة يُعاد أمامها حينما علمت بزواجه:
-محدش يقولي اهدي، قولتيها زمان زي ما أهلي قالوها، زي ما قالولي لو اطلقتي ملكيش مكان ما بينا، وادي النتيجة، لكن دلوقتي أنا مش صغيرة ولا مستنية وصي ليا ولا منتظرة حد يفتح ليا بيته ولا يقولي اه ولا لا، وابنك يطلقني..
تفهمت زينب من الموقف ولم تنزعج من حديثها بل على العكس تحدثت بجدية شديدة:
-أنا عارفة أنه غلط في حقك كتير بس والله هو مكنش يعرف….
خرجت ضحكات ساخرة منها وهي تعقب باستنكار:
-ابنك عارف، اكيد كان عارف…
ثم ختمت حديثها بنبرة غاضبة إلى أقصى حد وهي تضع الملابس في الحقيبة:
-عارف ولا مش عارف النتيجة واحدة..
هتفت زينب بنبرة جادة:
-اخوكي قاعد في بيت العيلة ومش هيسمح بقعادك وأنتِ عارفة كده..
نظرت لها نرمين بضيقٍ كبير واختناق من فكرة أن حديثها صحيح، شقيقها الأكبر يشبه والدها إلى حد كبير لن يقبل بطلاقها…
حينما وجدت زينب أن زوجة ابنها تفكر في حديثها لذلك تحدثت بنبرة جادة:
-اهدي على الأقل والبيت هنا بيتك أنتِ وعيالك حتى لو أطلقتوا هو من حقك، اقعدي فيه وأنا همشي وهخليه يروح معايا البيت، أنتِ اقعدي وخدي قرارك زي ما أنتِ عايزة أنتِ مبقتيش صغيرة فعلا أن حد يغصبك على حاجة…
-خليكي أنتِ هو اللي يلم هدومه و يمشي..
أنهت نرمين حديثها لتجدها زينب جلست على الفراش وأنهارت في البكاء لتقترب منها زينب واضعه يدها على كتفها تربت عليه بشفقة وحزن….
لتنهار نرمين أكثر تدفن رأسها في جسد زينب بانهيار تام، احتضنتها زينب باحتواء، وتلك كانت المرة الأولى الذي يحدث بينهما تقارب بهذا الشكل لدرجة أن تبكي نرمين في أحضان زينب التي كانت ناقمة عليها وغاضبة منها كما كانت غاضبة على والديهما حينما لم تشعر يومًا بأن أحد يساندها في رغبتها…
وقد كان غادر منير المنزل حاملًا حقيبة ملابسه..
________________
– لا بقا كده كتير، أنا الصبح أقعد أنا وعم جوجل أحاول احل الدنيا الخربانة واللي مش فاهمة فيها وبليل تخلينا نبحث في كتاب أبلة نظيرة…
قالت ملك تلك الكلمات بسأم وضيقٍ مما جعل بشرى تعقب على حديثها بسخرية:
-وماله كتاب أبلة نظيرة ما أنتِ بتخلصي الرواية بتاعتك في يوم وتقعدي تطبقي عليها…
تمتمت ملك بتهكم وهي تدافع عن نفسها بشراسة:
-الرواية غير الملل ده، وبعدين طبق أيه اللي هتتعلميه من كتاب أبلة نظيرة هو أحنا فاهمين أي حاجة فيه؟!!..
أستكملت حديثها بتهكم صريح:
-أنتِ مستواكي مش في الضايع لدرجة كتاب أبلة نظيرة؛ عايزة تتعلمي يا حبيبتي افتحي اليوتيوب متصدعنيش، وبعدين ايه الكوامخ دي؟!….
هتفت بشرى وهي تظهر هاتفها والكتاب مفتوح أمامها:
-باين من المكونات انها سلطات وجبت من على النت اهو معناها سلطات أو مخلل..
قالت ملك بابتسامة واسعة:
-ما شاء الله، هتخشي على الراجل بسلطة؟! يعني هو مكلف وجايب كتاب جدته علشان تعمليله سلطة.
تمتمت بشرى بنفي:
-لا طبعا أنا بس كنت عايزة أعرف معناها وبعدين أنا بفكر أخش على قسم البسكويت ايه رأيك؟! حساها حاجة سهلة ومش هيكون فيها فتي كتير..
هتفت ملك باستخفاف:
-هيكون في ايه يعني في قسم البسكويت، هو بسكويت فانيلا، جوز الهند، شيكولاته هو في غيرهم؟!.
-نشوف..
بعدما انتهت بشرى من تلك الكلمة ألتقطت الكتاب مرة اخرى ومن الأرشيف المتواجد فيه استطاعت أن بالجزء الخاص بالبسكويت، لتجد بسكويت الزنجبيل، بسكويت مملح بالبطاطس، بسكويت الرز..
بسكويت القرفة…
أنواع عديدة لا تعد ولا تحصى..
وكانت الصدمة هي بسكويت الانشوجة..
كانت ملك تنظر في الصفحة ذاتها متمتمة بسخرية:
-اهو قابل ياعم بيقولك بسكويت بطاطس وقبلها شوفنا بسكويت رز، لا والكبيرة بقا بسكويت الانشوجة هي مش الانشوجة دي ملوحة من نواحي الرنجة والفسيخ ازاي تبقى بسكويت يا عالم؟!!..
ثم أسترسلت حديثها باستنكار:
-بعدين ايه مح ثلاث بيضات؟! يعني أيه مح أصلا؟! هي مصر اتغيرت عن زمان ولا أيه؟!..
قالت بشرى بنفاذ صبر:
-استني هشوف، عم جوجل ربنا يخليه لينا هيعرفنا ده ايه..
بعد بحث قصير جدًا لم يتأخذ وقت طويلًا غمغمت بشرى بانتصار وحماس:
-المُح ده صفار البيض..
أردفت ملك بنفاذ صبر مقترحة:
-بشرى بقولك ايه؟!.
-قولي يا ملك..
تحدثت ملك بنبرة جادة إلى أبعد حد:
-في ورق عنب عندي في التلاجة وبطة، ايه رأيك اطلعهم من الفريرز واعملهم وتاخديهم بكرا وكأنك أنتِ اللي عملاهم وحلي عن دماغي أنتِ وأبلة نظيرة، اهو اللي نعرفه أحسن من العك اللي منعرفهوش…
هتفت بشرى باقتضاب:
-أنا افتكرتك هتساعديني وتحمسيني، مالك كده مش طايقة نفسك؟!
أردفت ملك بابتسامة سمجة:
-جربي كده حد يجيبلك كتاب أبلة نظيرة معدي ال ٨٠٠ صفحة ونقعد نفك الشفرات بتاعته ونشوف هتضايقي ولا لا؟!.
-ملك أنا بتكلم بجد…
تنهدت ملك وعقدت ساعديها متمتمة بضيقٍ:
-مفيش يا بشرى حاسة اني مش مرتاحة عموما وبفكر أسيب المكتب واروح اشتغل اي حاجة تانية أو أقعد في البيت حتى، حاسة اني بضيع وقت في حاجة أنا مش حباها، أنا مكنتش ناوية اشتغل عموما..
قالت بشرى بتردد:
-كل ده علشان مراد؟!..
تحدثت ملك بنبرة متشنجة:
-متجبيش سيرته يستحسن اني اقعد في البيت قبل ما افتح نفوخه، بقا مستفز بشكل، لما بيجي بجد ببقى عايزة اخبط دماغه في الحيط، اعمى القلب والبصيرة، أعمى كل حاجة…
ضحكت بشرى لم تستطع كتم ضحكاته وهي ترى تعابير وجه صديقتها الغاضبة جدًا، والتي نادرًا ما يصدر رد فعل من ملك بهذا الشكل، هي دومًا مفعمة بالحماس و الطاقة، ولا تجعل أي شيء يؤثر عليها أو يغضبها…
لكن رُبما الحب هو من يغير المعادلة في بعض الأوقات، تحديدًا في المرة الأولى التي لا تصبح قادرًا على التحكم في مشاعرك أبدًا..
صاحت ملك باستنكار:
-متضحكيش عليا..
-مش بضحك عليكي والله، بس يعني ليه محاولتيش…
قاطعتها ملك بجنون وغضب:
-احاول ايه؟! أنتِ عبيطة يا بشرى عايزاني أروح اقوله أنا بحبك مثلا او اروح اخطبه من امه مثلا علشان تكمل..
تمتمت بشرى بحرج:
-مش قصدي بس لو مجرد تلميح..
نهضت ملك من مكانها قائلة بسخرية:
-خليكي في بسكويت الرز ولا البطاطس بتاعك وبطلي عبط، انا هنام شوفي بقا هتطلبي حاجة من السوبر ماركت ولا هتعملي ايه..
_____________
“الـشـرقـيـة”
تجلس فردوس على الأرض بجانبها العديد من الصور الفوتغرافية؛ الصور التي أرسلتها إلى أحد الصفحات حتى يتم طباعتها…
كل الصور التي التقطتها معه في دبي، أرادت الاحتفاظ بهما للأبد لأنه ببساطة الهاتف ليس مكان أمن…
من الممكن أن يحدث أي شيء وتذهب الصور..
بجانبها يتواجد كوب من العصير وقطعة من كعك الشيكولاتة اللذيذ التي قامت بصنعه، صنعت كمية كبيرة مثلما فعلت منذ مدة طويلة، كانت تشعر برغبتها في فعل أي شيء كانت تشعر بالضيق…
لا تدري لما في الآونة الأخيرة تشعر برغبتها في العودة إلى المطبخ وطهي الطعام؛ مرت سنوات ولم تفعل رغم أنها كانت عادة محببة إليها، تحديدًا منذ خطبتها إلى كمال كانت وقتها تقوم بالتحضير بشكل مكثف قبل أن يأتي لزيارتهما..
وكانت تحب مدحه لطعامها، لكنها فقدت بريقها في تلك الأمور انعزلت منذ سنوات، وتشعر بالحرج في أن تعود وتمارس رغبتها هنا في المطبخ، لذلك أستقرت على أمر الكعك بالبرتقال والشوكولاتة….
دخل كمال إلى الغرفة وهو يحمل الطبق الذي تناول منه مع والدته قبل نومها، بعد رحيل أفنان…
فمرت فردوس عليهها وأعطتهم الكعك التي صنعته…
حينما أقترب منها وجد تلك الصور التي تقوم بترتيبها وكتابة بعض الأشياء على ظهرها، رُبما التاريخ والمكان لا يعلم..
-أنتِ طبعتيهم امته؟!…
نهضت من مكانها وهي تلملم الصور من الأرض متمتمة بهدوء:
– بعتهم لصفحة تعملهم، هو ده الاوردر اللي كنت مستنياه النهاردة وكنت بقولك عليه…
هز رأسه بتفهم وهو يراقبها أثناء نهوضها وذهابها إلى الطاولة لتضع الصور فوقها، لكنه عقب بفضول:
-بس يعني أيه اللي خلاكي تعملي كده؟! ما هما موجودين على التليفون..
أردفت فردوس بعدما أتت وجلست بجانبه على طرف الفراش:
-الصور احسن مئة مرة من التليفون لو عدت سنين هتفضل زي ما هي وأنا حابة أحتفظ بيهم..
لوهلة شعر بأنها عادت فردوس ذات النبرة العاطفية، العاشقة المفعمة بالحياة…
أسترسلت فردوس حديثها بعفوية وهي تنظر ناحية الطبق:
-أنتَ مكلتش ليه من الكيكة مش عاجباك؟!
-لا حلوة جدًا كملت طبق ماما لأنها مكلتش كتير..
تمتمت فردوس بنبرة عادية:
-هي نامت؟!.
غمغم كمال بهدوء:
-اه نامت من قبل ما أفنان تمشي، وأفنان روحت كمام..
صمتت فردوس ليتحدث كمال بنبرة بها شيء من الحماس الطفيف:
-ألبسي أي حاجة هاخدك مشوار..
تمتمت فردوس وهي تعقد حاجبيها بعدم فهم:
-دلوقتي؟! ومشوار ايه ده اللي هنروحه؟!.
هتف كمال ساخرًا:
-هخطفك، وبستأذن منك، يلا يا فردوس بطلي أسئلة كتير ملهاش لازمة…
______________
الحب لا يُدوَّن على الورق لأنه يزول، ولا يُحفر على الحجر لأنه ينكسر. الحب يُخَتَم في القلب ويبقى خالداً، لأنه لا يزول مهما تغيرت الظروف.
#مقتبسة
إنك في قلبي ، في عروق يداي ، في عظام عنقي ، في بريق عيناي المنطفئ
وداخلي دائماً وابداً
مقتبسة
‏
لأول مرة تدرك معنى المسؤولية الكاملة مع داغر، هي مسؤولة عن منزل كامل!!
أقصى مسؤولية تحملتها كانت فهد ولم تكن بمفردها بل كان شريف عون لها في كل خطوة ووقت.
الآن هي مسؤولة عن منزل، عن زوج، بالإضافة إلى فهد…..
عادت برفقة داغر وفهد في منتصف الليل، فهي لا تغادر المنزل إلا عند نوم والدتها، وتذهب في الصباح الباكر تقريبًا عند موعد استيقاظها ولا تستغرق وقت طويل، المنزل قريب جدًا من منزل عائلتها…
قامت بوضع الملابس في الغسالة وبعدها قامت بغسل بضعة أكواب بعد نوم صغيرها ثم أتت لتجلس بجانب داغر، الذي يجلس على الاريكة بعدما استلم هو مهمة نوم فهد..
تمتم داغر بنبرة هادئة:
-اقعدي يا أفنان ما أنتِ طول اليوم هناك مع مامتك، هما كوبيتين وكام تيشيرت اللي عاملة عليهم حوار كان ممكن يستنوا لبكرا.
رُبما هي ليست ممتازة في الطهي..
لكنها جيدة جدًا فيما يخص أمور النظافة والترتيب وباقي أعمال ومهام المنزل إذا وقعت عليها تستطيع إنجازها..
أردفت أفنان برفض:
-لا طبعا الحاجة تخلص أول بأول أحسن، مهي لما تتراكم أنا مش هعرف أعمل حاجة، وحتى مش هعرف اجيب حد من البيت يساعدني لأن كلهم مشغولين..
صمت داغر بتفهم..
فعقبت أفنان بعد وقت ليس بالقصير ساد فيه الصمت:
-أنا هدخل أنام، عايز حاجة؟! يدوبك الحق انام علشان هنزل بدري..
تحدث داغر بصوت مكتوم:
-لا استني خليكي يا أفنان حابب أتكلم معاكي في موضوع كده.
جلست متمتمة باهتمام وهي تعتدل في جلستها لتنظر له بإنصات:
-اتكلم.
تنهد داغر ثم غمغم بنبرة خافتة:
-أفنان أنا قدامي كام يوم، اسبوعين بالكتير أوي وهسافر..
كانت تخشى تلك اللحظة..
تخشى الابتعاد عنه بعدما وجدت السعادة طريقها الحقيقي إليها؛ لا تعلم كيف ستكون أيامها من دونه؟!
بالله كيف؟!!.
تغيرت ملامح وجهها في ثواني، ليغمغم داغر بخفوت:
-أنا اكيد مش سهل عليا اني اسيبك بس ده الوضع…
قاطعته أفنان محاولة التماسك:
-متقلقش عليا اهم حاجة تخلي بالك على نفسك وشوف هتعمل ايه في شغلك ومتشغلش بالك بيا أنا هكون مستنياك..
لحظات الوداع دومًا صعبة..
أو الأيام التي تكون قبلها…
تحديدًا لشخص ذاق معنى الحب الذي أضاف معنى كبير للحياة منذ فترة معدودة..
تمتم داغر بنبرة جادة:
-لو مقلقتش عليكم هقلق على مين؟!
أردفت أفنان محاولة تصحيح كلماتها فهو في بعض الأحيان يصبح صياد ماهر لأخطائها:
-انا مش قصدي كده؛ قصدي متشيلش نفسك هم..
لم تتحدث أو تتفوه بشيء غير جيد..
يبدو أنه هو من يشعر بالخطر، الخطر الشديد على قلبه، تلك المرة الثانية التي يسافر بها من هنا؛ وهي تختلف كليًا…
في المرة الأولى هو كان يرغب في الهروب من مشاعره؛ والآن يخشى الابتعاد عن قلبه، نعم أفنان هي قلبه، حبه الوحيد الذي لم يستطع أبدًا دفنه وعيش حب غيره رغم محاولاته الكثيرة ان ينزعه من ضلوعه، ومن أعماق قلبه لكن كل محاولاته باءت بالفشل…
تمتم داغر بتردد ونبرة قلقة لم تكن رزينة أبدًا:
-أنا احتمال أطول يا أفنان اني اسيب شغلي، واصفي كل حاجة وارجع ده هياخد وقت، وده اللي مضايقني ومخليني على أعصابي اني اسيبكم مدة مش عارف هتكون قد ايه، الموضوع مش هيكون سهل عليا..
هتفت أفنان برفق محاولة أن تخفف عنه وعنها في الوقت ذاته:
-أنا هستناك مش مشكلة المهم تظبط أمورك، وتظبط كل حاجة ولا يهمك وزي ما قولتلك حتى لو عايز تكمل شغل هناك وتنزل اجازات مش مشكلة برضو اهم حاجة تعمل اللي يريحك..
تجاهل اقتراحها الثاني ولم يعلق وكأنه لم يسمعه فهي تتعمد دومًا أن تخلي مسؤوليتها وألا تتحمل عاقبة ندمه يومًا ما عن تركه العمل بعد تلك السنوات….
تمتم داغر وهو يضع كفها بين كفيه بحنان:
-أنا مش عايزك تقلقي عموما أنا هكون معاكي طول اليوم وبكلمك، ومش هتحسي اني بعيد وهحاول أخلص كل حاجة بسرعة وبأسرع وقت علشان أكون معاكم..
قالت أفنان بثقة وهي تنظر له بحب:
-وأنا واثقة من ده، وواثقة فيك..
كلماتها الأخيرة كانت تخبرها بها قبل أن تخبره هو، حتى لا تتذكر هاجس زوجته السابقة…
رفع كف يدها يترك عليه قُبلة دافئة وحنونة تعبر عن مشاعره تجاهها؛ والمرات التي فعل فيها هذا قليلًا جدًا لكنها لغة تناسبه، كأحضانه التي يخبرها بها عن حبه..
تلك المرة هي اللي حاوطت عنقه وبادرت في أحتضانه لعلها تشبع منه، تشبع منه قبل أن يرحل….
وعند الفُراق والاستعداد له ومراحل الوداع نُدرك مشاعرنا الحقيقة..
خوفك من البُعد يجعلك تعلم إلى أين مدى أصبحت عاشقًا؟!..
____________
“رغبتي فيك كانت حقيقية جدًا، لم أكن عندها
تحت تأثير أغنية أو ما شابه، كنت أدرك و أعي
بأني أريدك، بطريقة أعمق مما أظن، وتظن”
#مقتبسة
حَين أحبَبتُك،
كُنت كـ مَن يأتيه المَوت
أعطَيتُك روحـي دُفعةٍ واحِده!
لـ عَلي شيهان
…بعد مرور ساعة تقريبًا…
كانت فردوس تقف في الشقة الخاصة بهما في البناية الجديدة، بعدما أرتدت على عجالة عباءة سوداء بالحجاب الخاص بها، لم تفكر طويلًا بل كان فضولها كبيرًا…
أخذت تسير في الشقة تتفحصها كانت تقريبًا أنتهت كل شيء بها فقط ما ينقصها الأثاث وبعض مستلزماته وعلى العكس أعجبها ذوق بكر وكمال…
كان الأمر جميلًا يمنح قدر من الخصوصية إلى حد ما…
سألها كمال حينما وجدتها مرة واحدة واقفة وشاردة إلى حد ما:
-أيه رأيك؟!.
تحدثت فردوس باقتناع وانبهار ظهر في عيناها:
-حلوة، عجبتني..
غمغم كمال وهو يضع يده على أكتافها:
-مش عايزة تغيري حاجة؛ تزودي حاجة قبل ما نختار الاوض ونجيب بقيت الحاجة؟!
رمقت فردوس المكان من حولها قائلة بنبرة هادئة:
-لا مش عايزة اغير حاجة تمام..
ثم أكملت حديثها باستغراب:
-بس يعني كده كله هيجي؟!
-في الغالب اه خلاص بكر بيجهز شقته وجدي وكلهم، وأفنان هتقعد مع ماما في شقتها لأن داغر هيسافر خلاص..
ضيقت فردوس عيناها سائلة أياه بدهشة:
-هي مش هتسافر معاه؟!
أكثر إجابة منطقية أجاب بها كانت:
-هي مش عايزة تسيب ماما الفترة دي على الأقل..
هزت فردوس رأسها بتفهم، فأردف كمال بنبرة هادئة:
-متأكدة أنك مش عايزة تغيري حاجة؟! متشغليش بالك مهما كان أي حاجة ممكن نغيرها..
حاوطت عنقه وتركت قُبلة على وجنتيه متمتمة بنبرة أشبة بالهمس:
-أيوة متأكدة؛ بالعكس أنا فرحانة بالشقة وكانت فدرة حلوة أننا نغير جو البيت لينا كلنا وفي نفس الوقت كل واحد يكون له خصوصية أكتر..
ترك كمال قبلة على رأسها محتضنًا أياها بحب كبير..
عمومًا من أكثر الأفكار دفئًا في العالم هو منزل؛ أو شقة أي أن كان المسمى، أن يكون لك عشًا خاصًا مع زوجك هي أكثر فكرة دافئة تخص من يحملفي قلبه ذرة حب حقيقية..
____________
في اليوم التالي…
‘القــاهـــرة’
“بسكويت الأرز”
“بسكويت البطاطس”
من كتاب أصول الطهي…
تناول الأغلب منه، رغم غرابة الفكرة بالنسبة للجميع إلا أن الأمر كان لذيذ ومختلف حتى ملك الناقمة من الفكرة منذ الصباح تتناول منه، لا تعلم لما قامت بشرى بصنع تلك الكمية كلها في شيء تقوم بتجربته للمرة الأولى ولكنه كان جيد إلى حد كبير..
ليصبح المحتوى الخاص بـ ملك اليوم هو كوب الشاي وبجانبه البسكويت الخاص ببشرى…
الناقد..
التي تنتظر رأيه أمامه موضوع البسكويت في علبة من البلاستيك تحفظ الطعام أتت بها من المنزل..
هتف هلال بعدما تذوقه وبدلًا من أن يعطي رأيه تحدث مداعبًا أياها:
-كويس أنك عرفتي تخلي ليا حاجة أنا سامع أن ملك داخلة في كوباية الشاي الرابعة…
قالت بشرى بنفاذ صبر وهي تقف أمامه في المكتب:
-قول رأيك وسيبك من ملك والشاي دلوقتي..
تمتم هلال بصدق:
-حلو شبة الحاجات القديمة اللي جدتي كانت بتعملها، رغم انه غريب بس عجبني..
سألته بلهفة طفلة صغيرة يثني عليها مُعلمها:
-بجد؟!.
-أيوة لعلمك أنا مش مجامل في الأكل بالذات مبعرفش أكل غصب عني او أقول أكل حلو لو هو مش عاجبني.
تمتمت بشرى بتعالى رهيب وثقة اكتسبتها في ثواني معدودة:
-عموما الكتاب أصلا أغلب الحاجات اللي فيه اعرفها واعرف وصفاتها وعموما يعني مكنش في حاجات معرفهاش أنا بس حبيت أجرب حاجة مختلفة..
نظر لها بشك ليقول بنبرة هادئة:
-والتجربة نجحت اهو الحمدلله.
تمتمت بشرى بهدوء:
-الحمدلله، أنا رايحة بقا أكمل شغلي…
-أنا عموما ماشي علشان ورايا مشوار..
” بعد مرور نصف ساعة تقريبًا ”
كانت بشرى تقف في الشرفة بعدما أصرت اليوم على والدتها أن تخبرها ما بها صوتها لا يعجبها ووالدتها تصر بأنه ليس هناك شيء لكن أمام تصميم بشرى المميت أخبرتها نرمين بصوت باكي…
-أبوكي طلع مخلف يا بشرى..
لم تفهم بشرى جملة والدتها لذلك سألتها ببلاهة وغباء:
-مخلف ايه؟! مهوا مخلفنا أنا وأحمد، مش فاهمة…
أحيانًا الصدمة تجعلك لا تفهم الكلام الذي يتم إخبارك به حتى ولو كان واضحًا وضوح الشمس تصبح أبلة وقتها…
تمتمت نرمين بسخرية مريرة:
-لا طلع عنده بنت غيرك، بنت أكبر منك بسنين، بنت من جوازته التانية…
هتفت بشرى بصدمة تحاول نفي ما سمعته:
-أيه يا ماما اللي حضرتك بتقوليه ده؟! ازاي يعني؟! يعني أيه؟!!..
قالت نرمين بضيقٍ واختناق:
-أسالي أبوكي، بيقول انه مكنش يعرف بس أنا مش مصدقاه انا طلبت الطلاق علشان تبقي عارفة المرة دي أنا مش هسمع كلام أي حد…
سألتها بشرى بتردد لأخر مرة:
-ماما هو الكلام ده حقيقي؟!.
-هو أنا هكدب في كده يا بشرى؟! أنا من ساعة ما عرفت وأنا هتجنن خلاص، هتجنن حسبي الله ونعم الوكيل…
أردفت بشرى باقتضاب وهي تضع يدها على عنقها من فوق حجابها وكأنها شعرت بالاختناق:
-بابا فين؟!.
جاءها صيحة والدتها المقهورة:
-معرفش راح مطرح ما راح لم هدومه ومشي علشان أنا أفضل قاعدة، بس والله لو مطلقني بالذوق لهخلي فضيحته بجلاجا في كل مكان..
تمتمت بشرى باختناق:
-سلام دلوقتي..
-مضايقيش نفسك يا بنتي وحقك عليا لو كنت سبب من الأسباب أنكم تكونوا عايشين في الهم ده، عموما دي حقيقة مش هتتغير هو ابوكي وأنا امك، وملكيش دعوة باللي بيحصل.
تحدثت بشرى بصوت متحشرج:
-سلام يا امي دلوقتي…
قالت نرمين بيأس:
-سلام..
انتهت المكالمة..
وكأن روحها خرجت في تلك اللحظة تحاول ترجمة ما سمعت، عن أي أخت تتحدث؟!
كيف؟!!!
كيف يحدث هذا؟!!
أخت تكبرها بسنوات؟!!
ما الذي يحدث هي على وشك أن تصاب بالجنون، ولما الآن تعلم عنها؟! هل والدها كان يعرف بوجودها ويخفي عنهم الأمر كما تقول والدتها؟! أم ماذا؟!
منذ أيام وهي تشعر بأنها في أجمل أيام حياتها منذ خطبتها، تحاول عيش شعور السعادة الحقيقي مع رجل يهتم بها، تجرب الأمر لأول مرة، ظنت أنها حصلت على السعادة التي تستحقها…
رُبما هذا العوض المنتظر، وعلى الأقل والدتها تحاول تعويضها، والدها وافق على إتيانها كل هذه مؤشرات تجعلها تشعر بأن السعادة تفتح إحضانها إليها لكن كيف كُسر جناحها مرة أخرى!!
لم يفعل والدها هذا حبًا بها لم يتركها تفعل ما تريده لأنه يحبها أو يرغب في إسعادها بأن تعود لممارسة رغبتها، بل فعل هذا رغبة في إبعادها عن المنزل….
ماذا تفعل الآن؟!!.
_______________
…في المساء..
أخذت إذن بطريقة مُريبة من مريم وغادرت المكتب حتى أنها لم تنتظر موعد ذهاب ملك، لم تفسر تفسير منطقي إلى مريم غادرت بشكل مخيف أثار تساؤلات الجميع….
لم يكن هلال متواجدًا وقتها…
غادرت المكتب وهي لا تعلم إلى أين تذهب؟!
هل تعود إلى البلدة؟!..
ولو عادت ماذا تفعل؟!.
ما الذي من الممكن أن تخبر والدتها به للتخفيف عنها؟!
ما الذي يقع على عاتقها فعله أثناء محاولتها استيعاب ما عرفت..
ذهبت إلى الشقة الخاصة بها هي وملك، خلعت ملابسها بوهن شديد وأرتدت ملابس منزلية مريحة، أحتضنت وسادتها ودخلت في نوبة نوم عميق..
عمق لا يدل على الراحة التي تستشعرها خلاله ولكنه يعبر عن هروب من الواقع وكأن الأفكار التي سمعتها سيتم زوالها وعند استيقاظها ستجد أن الأمور بخير..
فقط لأول مرة في حياتها تظن بأن الأمور بخير كانت الأيام الماضية والأمر لم يدوم طويلًا…
أتت ملك بعد مدة وهي تشعر بالقلق الكبير…
بشرى لم تجب على اتصال واحد من اتصالاتها الكثيرة….
حينما ولجت إلى المنزل ووجدتها نائمة هدأت قليلًا…
وذهبت لتصنع الطعام كعادتها وأحيانًا بمساعدة بشرى تحاول إنجاز أي شيء، وبعدها أيقظتها، لتنهض بشرى وتتناول الطعام معها دون التعقيب بأي شيء، رغم اسئلة ملك، فضولها الكبير المقترن بقلقها عليها لكن وكأنها لا تسمع شيء..
كأنها فقدت حاسة السمع، أخذت الأطباق الذي تناول الاثنان بها الطعام إلى المطبخ قامت بغسلهما بسرعة رهيبة، فهي معتادة على تلك النقطة حتى لا تترك ملك تتولى مسؤولية كل شيء….
ورغم أن ملك أخبرتها بأنه ليس هناك مشكلة وستفعل هي الأمر إلا أنها استمرت وانتهت منها دون أن تتفوه بحرف وولجت إلى حجرتها لتنام على فراشها مرة أخرى ولا تعلم أين هاتفها؟!..
ولا تعلم أي شيء هي فقط ترغب في صمت وتركتها ملك لعلها ترغب في الانفراد بنفسها….
بعد مرور ساعة تقريبًا أخذت ملك تطرق باب غرفة بشرى لوقت طويل ولكنها لم تجب عليها ففتحت الباب وكانت بشرى تهبط الدموع من عيناها وصرخت في وجه ملك بانفعال:
-هو مينفعش اقعد لوحدي؟!.
رُبما لو كان شخص أخر غير ملك لأتخذ موقف، ولكن صراخهم في وجوه بعض في أغلب الأوقات جعل الأمر طبيعيًا ولكن ملك مدت يدها بهاتفها متمتمة بسخرية:
-والله أنا سايبة ليكي مطلق الحرية بس المتر عايزك..
من هذا؟!
جزء من الثانية سألت نفسها من الذي يقتحم عزلتها وضيقها، وفي الوقت نفسه نظرت إلى أصابعها لتحاول ترجمة الحديث والأمر التي نسته تمامًا…
أخذت منها الهاتف لتغادر ملك بـ أدب لا يليق بها في بعض الأوقات…
وضعت بشرى الهاتف على أذنيها مغمغة بخفوت وهي تحاول جعل نبرتها عادية:
-ألو..
جاءها صوته الساخر الذي يحاول يخفي أسفل سخريته غضبه الجامح وقلقة الشديد منذ أن اخبرته مريم بالأمر وهو يحاول الوصول إليها في البداية كانت لا تجيب وفي النهاية كان يعطيه مغلق لذلك أضطر للاتصال أخيرًا بـ ملك….
-مبترديش ليه يا بشرى وموبايلك مقفول ليه؟! في تفسير منطقي للي عملتيه النهاردة ولا ايه؟!.
تمتمت بشرى باقتضاب محاولة إلا تكن فظة ولكنها ليست في وقت عليها مراعاة مشاعر الآخرين:
-معلش انا كنت مخنوقة ومحتاجة أروح، واسفة لو مشيت بدري من غير سبب..
بعدما أثارت قلق الجميع..
قلقه هو تحديدًا…
الله وحده يعلم ماذا حدث به منذ مكالمة مريم، والحمقاء ملك التي أخبرته بأنها لن تقتحم عزلتها وقتها أخبرتها بكل بساطة بأنه إذا لم تعطيها الهاتف هو سيأتي إليهم، لذلك قررت ملك الامتثال إلى رغبته..
تجاهل حماقتها وتنهد ثم حاول الحديث بنبرة هادئة ولينة:
-أيه اللي حصل وخلاكي تمشي بالطريقة دي طيب؟.
لا تستطيع أن تكابر وتخبره بأنه لم يحدث شيء، وكيف تفعلها؟! بعدما رأي الجميع حالتها ونبرتها المكتومة لا تستطيع الادعاء بأنه لا يتواجد وفي الوقت نفسه إخباره حسب ظنها بأمر حرج هكذا يخص عائلتها لا تظن أنه من الصواب أن تفعلها…
-مشكلة عائلية حصلت؛ وأنا حسيت اني مش قادرة وعايزة أروح..
لم يكن الأمر صعبًا على هلال تخمينه وهو يعلم الحقيقة كلها، الأمر يخص شمس بكل تأكيد، هو انشغل اليوم بمحاولته محو سجل ثائر تمامًا..
يجب قبل أن يقوم شريف بتسليم نفسه بألا يظهر بانه كان يعيش باسم شخصية أخرى، لا يرغب في أن يدخل إلى نوع أخر من القضايا، كان يجب أن يُقتل ثائر ذلك المسخ الذي نتج تزامنًا مع الأحداث…
هتف هلال بنبرة هادئة:
-مفيش حاجة تستاهل تعملي كده، كل البيوت فيها مشاكل يا بشرى..
سمع صوت ضحكة متهكمة منها..
هو يذكرها بكلمات جدتها التي كبرت عليها، حينما كانت تسأل لما العلاقة بين والدها ووالدتها تتخذ هذا الشكل، لكن لم تعد تلك الكلمات تستطيع تصديقها في هذا العمر..
تمتمت بشرى باستخفاف غير مقصود:
-أكيد..
سمعته يقول برزانة:
-لازم تخرجي من دائرة الطفلة الصغيرة اللي مش متقبلة مشاكل عيلتها مهما كانت هي أيه، وتدخلي مرحلة تانية من النضوج وهو أنك تركزي على مستقبلك وحياتك وتواجهي أن عادي مش كل الناس مرت بطفولة أو مرحلة من مراحل حياتها عايشة فيها استقرار نفسي على الأقل مش هكلمك عن الجوانب التانية، لازم تتقبلي اللي فات علشان تعرفي أنك تأسسي حياتك صح..
حديثه لمسها بشكل كبير..
ورُبما هو محق، لكن هناك أشياء مدمرة بداخلها لا تقدر تلك الكلمات على إصلاحها على الرغم أن الباقي فعل ويشعر بالقليل من الرضا على الأقل..
رُبما ستظل المشكلة كلها في شعورنا بأن هناك شيء قد فاتنا، شيء لم نشعر به، شيء يجعلك تظن بأن هناك من عاش حياة أكرم منك…
رُبما هناك بعض جوانب الحياة ستجد من مر بها أفضل منك، لكن لا تنسى بأنه هناك أيضًا أشياء تذوقت نعيمها وغيرك ذاق جحيمها..
قالت بشرى بنبرة مختلفة قليلا بعد حديثه:
-حاضر معاك حق وعموما أنا أسفة لو قلقتك..
-اسفك مش هيكون مقبول إلا لو في حالة واحدة..
سألته بشرى باستغراب:
-أيه هي؟!.
تمتم هلال بنبرة هادئة لكنها جادة من الدرجة الأولى:
-متقلقنيش عليكي تاني ومتكررهاش ومهما كانت المشكلة أو الظرف تردي وتطمنيني..
ذلك الشعور الذي يتسلل خلسة بداخلك يطمئك، يبهرك..
يغزو كل خلية بك..
هو الحب الذي تشعر به بشرى معه، الذي يجرفها بمشاعر عميقة لدرجة تصعب عليها فهمها
.
الحب ليست قضية قد تبحث عن حلها أو جريمة تنتظر عقوبتها، بل شعور لا تجد أحد قادر على وصفه لأن مفهومه يختلف كثيرًا من شخص لأخر..
-حاضر..
-لو في اي حاجة كلميني ولو حابة تقعدي كام يوم في البيت براحتك..
غمغمت بشرى بعد تفكير:
-هو يوم واحد اللي ممكن مجيش فيه مش عارفة هيكون امته بس هقولك…
بعد وقت كانت بشرى تقف في الغرفة تضع هاتفها الخاص بها على أذنيها بعدما قامت بشحن بطاريته وهي تتصل بوالدها الذي أجاب عليها في الاتصال الثاني..
-خير يا بشرى في حاجة؟!
تمتمت بشرى بثبات:
-أنا كلمت ماما وعرفت كل حاجة..
جاءها صوت والدها مرتبكًا:
-اديني فرصة اشرحلك يا بنتي بس..
قاطعته بشرى باقتضاب:
-أنا مش عايزة حضرتك تشرحيلي انا عايزة حضرتك تاخدني ونروح ليهم مدام مكنتش عارف علشان نعرف الإجراءات اللي ممكن تتعمل..
لا تعلم لما ترغب صراحة رؤيتهما..
هل رغبة في المواجهة كما أخبرها هلال؟!
هل لشعورها بقليل من الفضول تجاة الأمر؟!
أم لرغبتها الشديدة جدًا بمعرفة هل والدها كان لا يعلم الأمر حقًا؟! أم أنه كاذب كما تخبرها والدتها؟!!
رُبما اجتمعت الأسباب كلها في رغبتها…
النتيجة واحدة هي ستذهب….
___________
في اليوم التالي..
قامت بشرى بالاتصال بـ هلال في الصباح تخبره بأنها لن تأتي اليوم، حينما سألها عن السبب أخبرته بأن والدها قادم إليها وهناك أمرٍ ما عليهم حله سويًا..
توقع هلال بالطبع بأن الأمر هو شمس ومنذ ليلة أمس وهو يعلم تقريبًا على الرغم من أن شريف لم يصرح بشيء ويبدو بأنه لا يمتلك العديد من المعلومات منذ تم أخذ العينات من شمس ووالدها لم يتحدث منير معهم مرة أخرى..
قابلت بشرى والدها في أحد الأماكن حاول طوال الطريق أن يقسم بأنه لم يكن يعرف شيء، يخبرها بأن والدتها تظلمه في هذا الأمر وعلى الرغم من أنها ترى بأن والدها ليس من الاشخاص الذين يقومون بمراعاة زوجاتهم لذلك اخفى الأمر عن والدتها..
هذه ليست طباعه لو كان يعلم بأن لديه ابنة لتحدث عنها وأخبرهم منذ زمن…
وشعرت من حديثه بأنه صادق وبالرغم من ذلك أصرت على الذهاب…
في أحدى العمائر المتواجدة في المناطق الراقية نوعًا ما، كانت تقف أمام باب الشقة برفقة والدها، فتحت سوسن الباب لهما قائلة بتردد:
-منير…
لم يتحدث بعدها كثيرًا لأنه لن يكن حديثه سوى شجار عنيف جدًا لذلك كان يحاول تهدئة نفسه..
جعلتهما يجلسا على الأريكة رغم عدم معرفتها الكلية لهاوية الفتاة التي تجلس معه، بعد بضعة دقائق أتت شمس من الداخل ولم تخبرها والدتها بأن هناك شخص جديد بالنسبة لها مع والدتها لكن اكتفت بتعبير مبهم (قاعدين برا) لذلك ظنت بأنها رُبما والدته هي من أتت معه…
لكن بمجرد رؤية بشرى قالت شمس بنبرة عفوية منها بـ صوتٍ مسموع…
-بشرى!!
لم يكن التخمين على بشرى سهل بأن تعرف بأنها تلك الأخت التي يتحدثون عنها!!
لكن كيف عرفتها؟!!..
-عرفتيني منين مع ان هي مسألتش أنا مين..
الضمير في جملتها كان يعود على تلك المرأة التي استقبلتهما وأتت الآن وهي تحمل أكواب الشاي..
كيف تخبرها بأنها حفظت شكلها وكل يوم كانت ترى الصور التي أرسلها ثائر لها؟! حاولت تذكر أي شيء، التفكير في أي شيء حتى يسعفها…
وكانت ما اختارته أما يُنصفها أما سيجعلها كاذبة..
جلست شمس على الأريكة متحدثة بنبرة فاترة تشبه نبرة بشرى:
-اكيد كنت بدور على الاكونت بتاعه وعلى مطعمه وكنتي من ضمن الاكونتات اللي شوفتها وشوفت صورك…
كان الحديث منطقي..
لكن ماذا لو بشرى لا تضع صورها على حسابها الشخصي؟!
وجدت ملامح بشرى ارتخت نوعًا ما لكنها مازالت محتفظة بغضبها ونقمها الغريب، كلاهما ينظر إلى الأخر بتمعن غريب لكنه ليس عاطفي رُبما فضول، رُبما غيظ وكراهية ليس لها سبب واضح، تحديدًا بشرى التي لم تشعر بالارتياح أبدًا…
تحدث منير أخيرًا باختناق شديد:
-نتيجة التحليل ظهرت..
قالت شمس بعجرفة مانعة والدتها من التحدث:
-النتيجة عارفينها مش محتاجين نعرفها بل على العكس احنا كنا سايبينك تعيد حساباتك اللي عايزين نعرفه، وبعدين؟!! بعد النتيجة ما طلعت هتعمل ايه؟!..
غمغم منير هازئًا:
-بعدين دي تقوليها لأمك اللي هي السبب في اللي احنا فيه، بعدين دي تقوليها على اللي خبتك سنين ومعرفش كنتي عايشة ازاي العمر ده كله من غير ورق ومن غير أي حاجة، شوفي امك من الاول خبت ليه…
هو يقوم بإحراجها مما جعل سوسن تصمت تمامًا..
هو يعلم بأنها لن تستطع أن تخبره بأن الأمر بسبب سرقة والدتها له، لكن شمس لا تنكسر ولا تهتم بأي شيء…
تمتمت شمس بنبرة جامدة:
-خافت، خافت على بنتها من راجل بعد ما قضى معاها وقت، استغل انها واحدة ملهاش حد وغلبانة عشمها بالحب صغيرة وصدقته، وعند أول مطب أداها ورقتها وطلقها، علشان أبوه يرضى عنه، باعها واتخلى عنها ومكنش قد قراره بأنه يتجوز تاني تفتكر ده راجل له أمان؟! وهي حاولت كتير تجهضني بس ليا نصيب أعيش وأقعد قصادك في يوم زي ده…
أحمر وجه منير وشعرت تحديدًا بشرى الجالسة بجانبه باحتراقه، لدرجة أنه لم يجد كلمات مناسبة يدافع عن نفسه بها….
أما بشرى كانت صامتة تراقب الوضع لأول مرة تحاول فهم ما حدث في الناحية الأخرى…
كادت شمس أن تتهور لتخبره بأنه إذا كان يتحدث عن الماضي لتخبرها بأنها راقصة ولكنها صمتت، صمتت لأنها تذكرت حديث ثائر (شريف) الذي حذرها بألا تتفوه بذلك الأمر إطلاقًا حتى يتم تسجيلها في نفوذه..
ولأول مرة قررت أن تتصرف بعقلانية…
تحدثت شمس بـ كبرياء:
-قررت هتعمل ايه هتكون ودي ولا أعمل توكيل للمحامي ونرفع قضية؟!!
أحتقن وجه منير ليجيب عليها بصوت غاضب إلى أقصى حد ولكنه عملي نوعًا ما ينفذ تعليمات والدته، ولأنه لا يستطيع أن ينكر نسبها يعد التحليل سيكون أحمق إذا فعل…
-أنا بعت لمحامي وهعرف أيه الإجراءات اللي المفروض تتعمل…
هتفت بشرى بصوت بارد:
-هتروحوا تقريبًا محكمة الأسرة الأول……
قاطعها منير بنبرة حنونة لأول مرة تقريبًا:
-متدخليش في الموضوع يا بشرى ولا تشغلي بالك بيه أنا هحل كل حاجة يا بنتي ولا حتى تحكي لخطيبك حاجة.
نظرت له باستنكار هل هو يظن بأنها تخبره كونها ابنته؟!
هي ناقمة عليه ألف مرة بعدما سمعت ولو جزء بسيط من قصة لا تعلم دواخلها؛ قصة تعرضت أمرأة أخرى للظلم بسببه، هي فقط تحدثت بطريقة عملية لا أكثر…..
تمتمت سوسن بصوت خافت وهي توجه حديثها إلى شمس:
-اهدي شوية..
ردت شمس عليها بصوت خافت:
-مينفعش انه الواحد يهدى في وضع زي ده وإلا هيتأكل..
أنهت بشرى الجلسة وهي تنهض من مكانها متحدثة بنبرة مكتومة:
-يلا نمشي…
_______________
بعد مرور عدة أيام..
المكان المفضل لهما..
النادي المُطل على النيل…
كانت تجلس أمامه، اليوم اتصل بها شريف، بكل أدب ورُقي كان يدعوها لتناول الغداء معه، لأول مرة لا يخبرها بأنه يرغب في رؤيتها فقط وحتى لو تناول الطعام معها لا يقوم بجعلها دعوة رسمية أبدًا..
لذلك كانت تختار ملابسها بعناية، ملابسها التي قامت بشرائها منذ أيام، ملابس أمرأة محتشمة، محجبة، لحسن الحظ بات لا أحد يتعرف عليها بهيئتها والجديدة ورُبما لأنه مع الوقت يكون هناك شيء متداول غيرها ويتم نسيان القديم…
تناولت الطعام معه وكان هو هادئ ليس منفعل، ولا غاضبًا، كانت ملامحه مريحة بشكل غريب لأول مرة تشعر بأنه مرتاح فعلا لا يحمل هم شيء..
واليوم لم تكن هي الوحيدة التي اختارت ملابسها بعناية كان هو أيضًا، حسنًا هو دومًا وسيم وجذاب في نظرها مهما كان يرتدي من الملابس ورُبما لأن أغلب لقائتهم مؤخرًا كانت على عجالة وظروف غير جيدة لم يكن يعتني بملابسه كـسابق عهده….
كان كل شيء غريبًا وجديدًا صدقًا أنها في لحظة من اللحظات رغبت في أن تنهض وتقوم بتقبيله واحتضانه من كثرة اللطف التي وجدته منه اليوم…
تناولت الطعام معه بعدها كل شخص منهما طلب مشروب له..
كان الأمر أشبه بـ لوحة صنعها فنان ماهر، أصابعه تنقش قصة عشق، لكن شمس كانت تنتظر شخص حقود أن يقوم بتخريب تلك اللوحة..
لا تظن بأن اليوم سيظل جيدًا حتى نهايته، سيظل رائعًا..
هو لم يتحدث إلا بكلمات بسيطة لكنها كانت تكفيها..
تحدثت شمس كاسرة جمال اللحظة:
-أنتَ عزمتني يعني احتفال انه مشي في إجراءات تسجيلي باسمه؟!.
عقب شريف بهدوء:
-ايوة يعني ده سبب من ضمن الأسباب لكنه مش السبب الوحيد..
سألته شمس ببسمة صغيرة تحتل وجهها:
-كنت عايز تشوفني؟!.
مرت أيام طويلة ولم يراها ولأول مرة لم يجد مفر..
ليس عليه أن ينكر أنه يشتاق لها بجنون…
-ايوة..
هو يرغب في أن تصيبها سكتة قلبية من فرط مشاعره اليوم، لا تعلم هل هو رائعًا اليوم وجذابًا ومحبًا أم أنها هي التي تجد الكلمة الطبيعية منه هو شعر وغزل؟!
أسترسل شريف حديثه بنبرة هادئة:
-حبيت أن ثائر يودعك بشكل حلو، ويكون في ذكرى حلوة ما بينا، وتفتكري اليوم ده دايما..
توقفت شمس عن الابتسام وحل عدم الفهم وعلامات الاستفهام على وجهها..
تحدثت شمس بنبرة باهتة:
-يعني ايه؟! قصدك ايه بالكلام ده؟!..
تمتم شريف بنبرة غير مفهومة بالنسبة لها:
-ثائر اتمسح من كل حتة، أنا بقيت شريف وبس، وخلاص هكون حر…
-يعني ايه هتكون حر؟!.
قال شريف ببساطة:
-خلاص هسلم نفسي الفجر هتحرك، كل حاجة اتحلت وخلاص مش عايز اعيش هربان تاني..
لما يتحدث بهذا السلام النفسي العجيب لأول مرة تراه يتحدث بتلك اللهجة؟!..
كيف يُقرن الحرية بـ الحبس، كيف يمكنه أن يجد الحرية بتلك الطريقة…
كانت تنظر له بأعين واسعة، مذهولة ودون أن تدري كانت الدموع تهبط من عيناها ليمد شريف يده بالمناديل الورقية ولأول مرة يشعر بهذا الألم الكبير..
الألم الذي يجعلك هشًا مهما كنت قويًا لأن هناك شخص يبكي…شعور جديد ومختلف كليًا…
-متعيطيش يا شمس..
صاحت شمس باستنكار من وسط بكائها:
-شمس اتمحت زي ما ثائر اتمحى، وأنتَ جاي تودعني..
تمتم شريف بنبرة جادة:
-يعني أنا غلطان؟! حسيت انه مينفعش اسيبك من غير ما اودعك..
تمتمت شمس بغضب مكتوم:.
-أنتَ غلطان؟! وبتسأل؟! ده أنا من أول يوم شوفتك فيه وأنتَ غلطان من ساسك لرأسك…
-شمس حاولي تنسيني، مش انا بس، حياتك القديمة كلها أنتِ خلاص حياتك الحقيقية هتعيشها وهتبدأ..
قاطعته حديثه قائلة بنبرة مرتجفة:
-عمري ما هنساك، لأن عمري اللي جاي مش كفايا انه يخليني أقابل حد زيك أو حتى أحب ربع الحب اللي حبتهولك، لو كنت أعرف انك جايبني علشان كده مكنتش جيت أساسًا..
أردف شريف مداعبًا أياها:
-كدابة أنتِ لما صدقتي تيجي أساسا هتعمليهم عليا…..
ابتسمت رغمًا عنها في وسط بكائها وهي تمسح دموعها، لم تكابر الأمر واضح وضوح الشمس…….
-ما بلاش تودعني، اوعدني أحسن.
تمتم شريف بجدية وصدق:
-مبحبش الوعود، مبحبش اوعد يا شمس، ليه مش عايزة ترضي ان دي نهاية حكايتنا؟!!.
قالت شمس بوجع:
-علشان أنا مش هقبل بأن دي تكون النهاية؛ أنا استحق فرصة معاك حتى لو حياتي كلها كانت غلط، أنا بتغير، حبي ليك يخليني اتغير، حبك ليا يخليني اتغير ليه مانع عني ولو فرصة، أي أمل..
ابتلع شريف ريقه باختناق ثم غمغم:
-وعود وأمل ايه اللي بتتكلمي فيه أساسًا مع واحد مش عارف هياخد كام سنة سجن أصلا، بالعكس أنا عايزك تاخدي فرصتك انك تكوني انسانة جديدة مع حد مش عارف ماضيكي، حد ياخدك انك شمس بنت منير وبس، شمس اللي بقت ولسه هتبقى في أحسن حال وأحسن نسخة ليها..
مسحت شمس دموعها التي لم تتوقف عن الهبوط متمتمة بانزعاج جلي:
-وأنا مش عايزة غيرك، ومش عايزة حد اصلا يحبني لمجرد اني بنت منير، انا عايزاك انتَ، أنتَ حبتني او حتى بلاش حبتني ساعدتني، مستغلنيش، أنتَ مش عارف أنتَ عملت ايه معايا؟! وبتلومني لو حبيتك؟!! أنتَ عملت معايا اللي امي معملتهوش، ولا ابويا ممكن يعمله ولا اي حد هيعمله ليا…
تحدث شريف بنبرة ضعيفة لأول مرة تخرج منه:
-أنا معرفش دنيتي هتبقى ايه، ومعرفش أنا هعرف اكمل ولا لا معاكي اللي كنتي فيه مش حاجة سهلة اعديها مهما كنت بحبك، وأنا مش عايز اوعدك بأي حاجة لاني مش عايز اطلع معاكي مش راجل لمجرد اني موفيتش بوعدي ليكي لأي سبب من الأسباب…
تمتمت شمس بنبرة عاطفية من الدرجة الأولى:
-وأنا هستناك مش فارق معايا عدد السنين اللي هتتسجنها، ولا فارق معايا عدد السنين اللي ممكن تاخدها علشان تتقبل او حبك ينتصر على الماضي، هستنى كل ده لو في نهايته أنتَ تكون ليا، ومتفتكرش اني ممكن انساك ولا أقبل بوداع زي ده ولا كل الكلام ده..
عنيدة هي في حبها..
عنيدة بشكل يزعجه ويجعله يرغب في ضربها ضربًا مبرحًا وهذا ما تستحقه، وفي الوقت نفسه يرغب في احتضانها…
-بلاش التفاني مع الناس ده اتعلمي تقدري نفسك ده أول درس في حياتك الجديدة..
هتفت شمس بانزعاج جلي:
-لو حاولت تقول ايه علشان ترجعني عن قراري ما هسمع ليك حاجة لو قعدت تغني للصبح أنا قولت كلمتي عجباك أهلا وسهلا مش عجباك اعتبر نفسك مسمعتهاش، بس أنا عارفة أنا بقول أيه..
ثم أسترسلت حديثها من وسط دموعها:
-بعيدًا عن ده كله أنا عايزة أخد صورة معاك، انا مفيش أي صورة ليا معاك..
-مبحبش اتصور..
تمتمت شمس باستنكار:
-بطل استفزاز اعتبرها صورة ذكرى الوداع…
قال شريف باستسلام:
-حاضر.
_____________
في الصباح الباكر..
في قسم الشرطة…
“الـشـرقـيـة”
وقف شريف أمام أمين الشرطة الذي سأله عما يريده؟! أو سبب إتيانه ليتحدث شريف بأكثر نبرة بها قوة، قوة تكمن في المواجهة..
عدم الهروب من المصير…
قوة أكتسبها حينما قال اسمه وهاويته دون خوف حتى ولو سيتم سجنه بعدها لا يهم هو خلع عباءة ثائر من فوق كتفه وانتهى أمره……..
-أنا شريف محمد توفيق جاي أسلم نفسي..
سأله أمين الشرطة باستنكار:
-تسلم نفسك؟! ايه تهمتك؟!…
-من أكتر من سبع سنين قتلت حسن علي السيد…

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية ديجور الهوى)