رواية عريس الهنا الفصل الأول 1 بقلم نجمة براقة

رواية عريس الهنا الفصل الأول 1 بقلم نجمة براقة

رواية عريس الهنا البارت الأول

رواية عريس الهنا الجزء الأول

رواية عريس الهنا الحلقة الأولى

_ اديني وصلت محطة المترو وجاية علي البيت اهو”
كملت وانا برفع صباعي وافخم صوتي بتحذير وانا وسط مجموعة من الناس
_ بس عارفة يا ماما ما يطلع عريس زنخ او عجوز او متجوز او ابن امه زي اللي قبله لا هو لعلكم في البيت حر يقة عشان انتوا بتعاملوني علي اني خلاص عديت ال 30 وبتجبولي كائنات غريبة وتقوليلي انهم عرساااان ”
_ ليه يا نن عين امك هو انتي عندك كام سنة يا بيضة
_ 26 سنة يعني لسة طفلة المفروض اتدلع واعيش حياتي مش اتجوز واحد مستعمل او أمه مقدرتش عليه ف قالت تجوزه
_ يا نغة يا نغة 26 وطفلة دة وانا فى سنك كنتي انتي في تالتة ابتدائي واخوكي ف خامسة.. واتجوزت ابوكي اكبر مني ب 15 سنة وخدمته وخدمت امه الله يجحـمـ… ولا بلاش ، بقولك ايه ، بت!!! متعصبنيش انا مش طايقة هدومي متبقيش انتي وابوكي والزمن علية انتوا مش لقيني في الخرايب ياااختي
_ اية البكابورت ،روقي دمك واهدي هيحصلك حاجة ومش هنلاقي حد يطبخلنا ، ماله بابا مزعلك ليه تاني
_ مطهقني في عيشتي وكرهني في الجواز وكل اللي عاوزين يتجوزوا.. كان مالي وانا قاعدة في بيت ابويا جنب امي باكل واشرب وانام ، كان مالي يختي ربنا ياخدكم وريحني منكم
_ وعاوزة تجوزيني؟! ماما سؤال ومتخافيش علي مشاعري وانتي بتجاوبي.. هو انتي جيباني من ملجاء؟… متبنياني؟
_ يختي وانا لو روحت ملجأ علشان اتبنا عيل كنت هسيب كله واختار طفلة زيك بوزها ناشف .. ونبي تقفلي… اااه غوري اتلسعت غووووري.. اه وعدي علي عم عبده هاتي اتنين كيلو موز
قولت وانا بتأهب لركوب المترو
_ موز!! اااه ، باينة من اولها… موز يا ماما ليه هو انتوا جيبنلي قرد ”
قولت كده ف قفلت السكة في وشي وبسرعه حطيت التليفون في الشنطة ودخلت المترو مع الناس وانا بتأفأف بحنق قعدت علي المقعد وانا بتمتم بشتيمة علي ام محمد اللي كل اسبوع تجبلي عريس اغرب من اللي قبله وبعد دقايق وانا علي نفس الحال شاب قعد جنبي وبقا يحاول يخفي ضحكته ف بصتله وقولت
_ اية يا استاذ في حاجة في وشي مضحكاك وانا مش واخده بالي
_ لا مش في وشك، فـ…
قاطعت كلامه بعصبية وقولت
_ افندم!!! لا هتقل ادبك هقل منك
_ اية يا انسة في ايه.. انا كنت لسة هكمل واقول في كلامك
مدلي ايده وقال
_ احمد زميل ليكي في الجوازات اللي تعر.. وانا مستني المترو سمعتك بتتكلمي مع مامتك وفهمت ان مشكلتنا واحده
سلمت عليه وقولت
_اه سوري.. وانا هنا .. بس مشكلتنا واحده ازاي بيجيلك عاهات زيي
_ انا اللي بروح مش هما اللي بيجوا ، كل اسبوع بتقدم لواحدة شكل ومش لاقي واحدة مناسبة وكلهم عيوب ”
تفحصت شكله وقولت
_ يا سلام علي الثقة ، ولية ميكونش العيب فيك انت
استعرض هيئته بأيديه وقال
_ طيب انا راضي ضميرك ، ده منظر واحد في عيوب
_ مش بالمنظر، ده كفاية ان اسمك احمد، انا عن نفسي هرفض عريس النهاردة علشان أسمه أحمد
_ نفس الكلمة اللي بتتقالي من كل عروسة بترفضني، اسمك احمد ، بس انا مش فاهم بشمهندس زيي متعلم ومحترم ذنبه اية انه اسمه احمد مش مشكلتي ان هما اتخزوقوا من شخص اسمه احمد.. انا مالي ، انا مهندس في مكتب الهندسة بتاعي في حالي شغلي كله في الهندسة وبعيد عن اي حاجة تانية اتفرض ليه علشان الإسم
ضيقت عنيه وقولت
_ واضح انك حابب تعرفني انك مهندس
_ اه امال انا درست 50 سنة ليه لما الناس تفتكرني واحد زيهم
_ نعم! واحد زيهم ازاي امال انت اية
_ مهندس
_ مهندس يعني ايه ربنا مصطفيك ولا ايه مش فاهمة
_ مهندس يابنتي كلية مبيجبهاش غير الناس الاذكياء والمجتهدين واللي اهلهم صرفين عليهم
قولت بقرف
_ واضح .. اهلا وسهلا يا بشمهندس
_ اهلا بيكي بس بردو انا ليه اترفض علشان اسمي أحمد انا الموضوع ده مصعبني
_ بيقولك فال وحش وبنحس اننا هنتخان ، وعلي فكرة انا كمان في مره واحد اسمه احمد اتقدملي ورفضته ده غير أحمد اللي لسة هرفضه
_ رفضتييييه علشان أسمه ااااحمد.. يا مثبت العقل في الدماغ
_مثبت العقل فين
_ ردي علي سؤالي ازاي رفضتيه علشان اسمه لدرجة دي انتوا سطحيين وتافهيين
_لا طبعاً اكيد مش عشان اسمه
_ انتي قولتي انك رفضتيه وهترفضي أحمد بتاع النهارده علشان اسمه قولتي ولا مقولتيش
_ ياعم لا افهم انا هرفض أحمد بتاع النهارده علشان فكرني ب أحمد الاولاني
_ وماله أحمد الاولاني ايه مشكلته
_ كتييير، حياته كلها ستات
_ نسونجي يعني.. اع كدة تمام مش تقوليلي رفضته علشان أسمه احمد
_ ياريت كان نسونجي
بصلي باستفهام وقال
_ يعني ايه
_ يعني ياريته كان نسونجي وربنا ما كنت ضيعته من أيدي
_ لا لا استني يعني ايه ، مشكلتك دلوقتي انه بتاع ستات ولا لأنه مش نسونجي وجمع الاتنين مع بعض ازاي اساسا ماهو لأما بتاع ستات ونسونجي لأما ملهوش في صنف الستات من اصله
بصيت حولية وبعدين ميلت عليه وصفرت وغمزت بعيني اقصد افهمه هو كان عامل ازاي ف وسعت عينيه وبعد عني وقال بعصبية
_ انتي عاوزه ايه.. ما تحترمي نفسك
بصيت حولية لقيت الناس بتبصلي وكأني خدشت حياه ف حطيت ايدي علي بوقه وقولت
_ اششش.. احترم نفسي ايه يا متخلف انت ، انت اللي تحترم نفسك .. الواد طلع بسكلته ده اللي اقصده
بعد ايدي عنه وقال باستفهام
_ يعني ايه بسكلته معلش.. بيزمر وهو ماشي ولا ايه
اتنهدت بزهق وقولت
_ بسكلتتتته مش عارف يعني اية بسكلته
_ عارف يعني ايه بسكلته اللي هي بتمشي بعجلتين دي وليها جرس ، بس مش عارف يعني بني ادم بسكلته… بيمشي علي ايديه ورجليه طيب
_ ده انت اااابيض وبريء بشكل ياخي.. هقولك
بصلي بتركيز وقال
_ قولي
بصيت حولية وبعدين بصتله وقولت
_ في يوم واحدة بتلف علي البيوت وتنقل اسرار البيت ده للبيت ده وتحكي ل دي عن دي وتوقع البلاد في بعضها جت عندنا قعدت وشربت الشاي وبعدين بصتلي بصات مريحتنيش عارف البصة اللي هي بنتك كبرت يا محاسن ليه ساكته عليها لغيت دلوقتي ياااختي
_ امك اسمها محاسن؟!!
_ ممكن تخرس.. لا مسمهاش محاسن انا بمثلك بس
_ ايوة ايوة فهمت كملي
_ ف كلمة من هنا وكلمة من هناك قالتلها في عريس عنده 31 سنة شيك وغني وسبحانك يارب دكتور بس دكتور تجميل وبيكسب كتير فلوس بالهبل ، كل اللي عاوزه تنفخ وتشفط بتروحله ف انا استغربت واحد زي ده ممكن يوافق ان يخطب بطريقة دي ازاي، كان في حاجه مقلقة في الحوار ده من الاول وقلقت اكتر لما شوفت صورته
_ ايه وشه مشوه
_ يااااريت مشوة ياريت
_ امال طلع اية
_ طلع حاجة كدة شبه توم كروز ، براد بيث ، الواد التاني بتاع تيتانيك ، حلو حلو يعني لدرجة اني بقيت اقارن بين شكلي وشكله واقول ازاي ده يتجوزني انا ده احلي مني ازاي هقعد جنبه علي الكوشة ودي كانت اقسي مشاكلي.. انت متخيل ان الراجل يكون احلي من مراته يالهوي كارثة
_ فعلاً.. طيب وبعدين عملتي ايه
_ الا عملت ايه روحت للكوافير تلات مرات في يومين واليوم اللي جه فيه روحت تاني عشان تعمل معجزة وتخليني احلي منه حتي لو بالغش ماهو مش هينفع يعني ان…. وصلك اللي انا عاوزه اقولهولك
_ ايوه كملي
_ والحمدلله الحمدلله بعد الرموش واللنسيس الزرقة والاكسجين والفونديشين اللي افتح من لوني بخمس ست درجات كدة والبديكير والمانيكير والخدع البصرية بالمكياج واللمبات المضيئة بزيادة اللي جبتها وانا جاية علشان ابان منورة بقيت في نفس حلاوته كدة ايوة بابا واخويا قالوا مين دي واخويا اعجب بيه قبل ما يعرف ان دي انا بس تمام عدت
ضحك وقال
_ وبعدين كملي
_ والله بكلمك بجد
_ ايوة مصدقك كملي
_ وفي المعاد اللي اتفقنا عليه جه هو وامه ، وأمه دي كانت ست عفية ولابسة ابيض وفي نور طالع منها تقولش جاية من الحج وربنا راضي عنها ، وهو بقا دخل بطلته البهية حاجة طويلة، شيك ، ريحة البرفان سبقاه وطلع احلي من الصورة تصور حواجبه لوحدهم احلي من حياتي ، بشرته اصفي من نيتي ، رموشه اطول من شعري واسود من اليوم اللي شوفته فيه
_ ياه لدرجة دي
_ واكتر انا مش هحكيلك بقا عن نعومة ايديه وشعره ولا هيبته وهو مش باصصلي ولا خطف نظرة يشوف العروسة ، مبصليش نهائي وكل كلامه كان مع حسام اخويا.. سبحان الله علي كمية التفاهم والألفه اللي كان بينهم من اول لحظة ، انا استغربت ازاي خد عليه بسرعة كدة ومبصليش خالص وتعب وفلوس الكوافير راحوا علي الفاضي
_ ماهو يمكن يعرف ربنا وبيقولك حرام النظر وكدة
_ ما ده اللي قولته في الاول لغيت ما بدأنا نتكلم وامه قالت
_ طبعاً ام محمد بلغتكم ان احنا جايين علشان نطلب ايد الانسة « هنا» لدكتور احمد ابني
ابتسمت ماما وقالت بهدؤء مبشفهوش غير في اللحظات دي
_ ايوة قالتلنا وانتوا نورتونا والله ياست كريمة
_ حبيبتي ربنا يخليكي.. وبسم الله ماشاء الله بنتك قمر متخيلتش انها بالحلاوة دي
اتدخل اخويا وقال
_ ولا احنا
حديت من نظرتي اسكته ف بصله العريس وقال بإبتسامة ناعمة
_ هو انت عندك كام سنة يا حسام
_ 29
_ حلو.. وبتشتغل اية
_ كوتش في الجيم
_ اية ده هو اخوكي بيشتغل كوتش في الجيم فعلا
_ ايوة وهو ده نفس السؤال اللي سأله ليه بس كان بيسأله وهو منبهر وبعدين مسك في ايده بطريقة خلت اخويا يتهز ويقلق وقال
_ اديني عنوان الجيم.. انا بمووت في الجيم
ابتسم اخويا بقلق وقال وهو بيشد ايده منه
_ اوي اوي حاضر هدهولك
ضم ايديه لبعض وقال بسعادة
_ ميرسي اوووي
بعد حسام عنه وجه جنبي وقالي بخفوت
_ بقولك اية في حاجه مش مظبوطة في الواد ده
رمقته بطرف عيني وقولت
_ يبقي روح اكشف نظر ، ده الواد بينور ده انا مش عارفه ازاي هلمسه حساه هيشبر وبصماتي هتبان عليه
كملت وانا ببص للعريس بذهول
_ معقول ماما داعتلي في ليلة القدر اللي فاتت.. مش ممكن يكون جه صدفة
_ ياااه طيب وده رفضتيه ليه مش فاهم.. فين المشكلة
_ المشكلة في اللي جاي لما تليفونه رن وأشرلنا بصباعه بكل هدؤء علشان نسكت ورد وقال
_ اه يا سوسو.. لا لا مش جاي النهاردة انتي فين دلوقتي
بصينا كلنا لبعض ف قالت مامته بحرج و وشها بيضرب الوان
_ دي المساعدة بتاعته في العيادة بس واخدين علي بعض شوية اصلهم صحاب
قولت بقرف وانا بحلف لا اخليه يبعد عنها بس اتجوزه
_ صحاب!!
قالت ماما وهو بتنغزني في جنبي علشان تسكتني
_ بتحصل ، دلوقتي بقا عادي الكلام ده الواد يصاحب بنت وبنت تصاحب واد كله عادي واسم الله حارسة باين عليه ابن ناس ومحترم
بصلها وقال
_ تانكث… ون منت.. اه يا سوسو لا لا بليز مش عاويز لخبطة في الشغل مدام رنا من احسن الناس اللي بتجيلي انا اللي هشوفها بنفسي… واييية يعني منطقة الـ….. ما علينا المهم كمل وقال _انا دكتور ودي شغلتي وبعدين مدام رنا صحبتي ومبتتكسفش مني وبتوريني اي حاجة ، من فضلك متشوفهاش انتي ”
وبس ياسيدي لما سمعت الفضايح دي داريت وشي بأيدي عن بابا واخويا وانا هموت من الاحراج
ميل عليه وقال
_ منطقة الاية مش فاهم
_ اية هو اللي مش فاهمه
_ اللي مرضيش يخلي مساعدته تكشف عليها واصر ان هو يكشف عليها بنفسه
تحمحمت وقولت بحرج
_ دي حاجة كدة تبع مشاكل البشرة في الـ… ف ال،… في الوش اه في الوش
_ طيب واية المشكلة ماهو دكتور تجميل وده طبيعي
_اه.. ما علينا منتج الحته دي مش مهم تفهمها
_ اوكي كملي طلع بسكلته يعني ايه
_ هقولك اهو.. المهم بعد ما خلص مع سوسو اتصلت بيه لولو وبعدها كوكي وبعدها مارينا ف انا اتعصبت وقومت من مكاني وقولت
_ اييييية… كل دي نسوان من اول يوم امال بعد الجواز هتخوني مع كام واحده قدر احساسي عيب كدة .. ما تقولي حاجه يا مدام كريمة
شدت ماما ايدي وقالت وهي بتنغزني بكوعها في بطني
_ اكتمي.. احنا اسفين هي بس اول مره تشوف الحاجات دي اصلها متربية حقك عليه يا ست كريمة حقك عليه يا دكتور احمد
قال بابا
_ هنا!!! وبعدين!!!
بصله وقال
_ بس يعني يابني انا مشوفتش راجل اتصل بيك لغيت دلوقتي هما كل اللي بيشتغلوا معاك ستات
قال حسام
_ يا بابا بيقولك دكتور تجميل هو في راجل بيكشف عند دكاترت تجميل احنا متأسفين يا دكتور..
بصلي بحده وقال
_ وانتي اقفلي بوقك الرجاله هي اللي بتتكلمه
شيحت بوشي عنهم بغيظ وبقيت اهز في رجلي ف سمعت العريس بيقوله بنبرة هادية غالب عليها الاعجاب
_ واضح انك متفهم وجد وكمان مسيطر في البيت وانا بحب كدة
بص لبابا وقال
_سوري يا انكل بس حضرتك معاك راجل في زمن قلت فيه الرجاله
خبط بابا علي صدره وقال بتفاخر
_ ربنا يخليك.. هو كده حسام ابني طالعلي
بصتله ماما بقرف من تحت لتحت وقالت
_ ايوة فعلا الاتنين رجاله ولاد رجالة.. وحمشين بيروحوا السوق هما وبيقولولي لا متتعبيش وتروحي انتي ، لا وكمان تقولهم علي الحاجة لا ياكلوا ولا يشربوا غير لما يعملوها .. وهنا كمان مستحييييل مستحيل تنام وكباية شاي في الحوض.. كلهم ما شاءلله عليهم ”
حمدت ربنا انه مخدش باله من تلميحات ماما ولكن لاحظت ان عينه معلقة علي حسام ورد بنفس الابتسامة الغريبة
_ يارب.. اممم ممكن رقمك يا حسام علشان اكلمك وتبعتلي عنوان الجيم علشان اشترك عندكم
_ اه اوي اوي هات اسجله
ادا التليفون لحسام ف ميلت اشوف الدنيا فيها ايه يمكن الاقي رقم بنت مسجل ولا حاجه.. بس عارف لقيت ايه
_ إيه
_ صورة شاب بعضلات وجسم بيلمع
_ باين عليه بيحب الجيم قوي ومتأثر بيه
_ ما ده اللي انا شكيت فيه في الاول لغيت ما شوفت إشعار برسالة من رقم علي الواتساب حاطط صورة شاب وبيقوله
_ هتفضل بعيد لامتي
_ ده صاحبه؟!
_ ده اللي انا فهمته في الاول لغيت ما قاله حسام علي الرساله دي ف شد منه التليفون وقال
_ ون منت
وخد التليفون وطلع في البلكونة ف ميل عليه حسام وقال
_ بت يا هنا شوفتي اللي انا شوفته
_ ايه
_ الدكتور ده مسجل رقم عنده ب My Ex يعني بيخونك
قولت وانا ببص للبلكونة
_ ولو ان شاءلله حتي يتجوز عليه مش هسيبه خلونا نحسن النسل شوية.. دقيقة وجاية
قومت من جنبهم واتسحبت و وقفت عند البلكونة وسمعته وهو بيقول
_ بليز بليز بليز.. ابعد عني خلاص انا لقيت حد احسن منك
_ يمكن واحد معاه في الشغل
_ لا ما انا جيالك في الكلام
_ ايوة
_ بعدين قاله
_ انت اهملتني واهنتني في مشاعري كتير علشان محتاجلك
_ يمكن صاحبه وتخلا عنه
_ امممم موصلتكش لسه.. لا ماهو بعدين قاله
_ وعرفت عليه بنت
_ واضح ان المشكلة كانت علشان بنت وخسروا بعضهم عشانها
_….
_ مالك
_ مالك انت… ياعم بقولك سابه علشان بنت.. طيب خد دي بعدين قاله بس انا مش هسمحلك تلعب بمشاعري تاني وتتسلي معايا شوية وبعدين تبعد عني لما تكتشف انك راجل وبتقرف ”
تنح وقال
_ بيقرف من إيه
_….
قال بصدمة
_ لااااا، متقوليش انه مبيحطش مزيل عرق اصل انا عندي صاحبي كدة بقرف من ريحته قوي اصله مبيحطش مزيل عرق هو كمان
_ اه اه هو مبيحطش مزيل عرق ريحته كانت وحشة قوي
_ لا احسن انك رفضتيه.. بس انا بردو مش فاهم ليه شبهتيه ب بسكلته
_متدققش ما انا مش هفسد اخلاقك واضح انك متربي كتير قبل كدة ، اهي كلمة طلعت مني وخلاص
_ اه تمام.. بس انا كمان تعرضت لمواقف شبه كدة مع بنات تقدمتلهم
_ طيب ما تحكيلي موقف منهم لسة شوية عشان يوقف المترو
_ اممم اوكي هحكيلك.. في مرة
_ ايووووة حصل ايه بقا

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية عريس الهنا)