رواية وراء كبرياءه عاشق الفصل الثامن 8 بقلم دودو محمد

رواية وراء كبرياءه عاشق الفصل الثامن 8 بقلم دودو محمد

رواية وراء كبرياءه عاشق البارت الثامن

رواية وراء كبرياءه عاشق الجزء الثامن

رواية وراء كبرياءه عاشق الحلقة الثامنة

عند حبيبه وصلت بالتاكسى لبيت رشا صحبتها وحاسبت التاكسى وطلعت وخبطت على باب شقة رشا وشويه وفتحت ليها
رشا :- بستغراب حبيبه انتى مش مفروض فرحك النهارده
حبيبه :- اه بس انا هربت
رشا :- يا نهارك اسود تعالى ادخلى
حبيبه :- لو هسبب ليكى ازعاج اروح اشوف مكان تانى انام فيه مش هزعل والله
رشا:- طب بس يا هبله ادخلى ده بيتك تيجى فيه فى اى وقت
حبيبه :- شكرآ يا رشا ودخلت معاها وسلمت على ام رشا ودخلت معاها فى اوضتها
رشا :- احكيلى بقى ايه حصل علشان تهربى قبل الفرح
حبيبه :- بدموع عمى كان عايز يجوزنى ابنه علشان الارض اللى بابا كتبها بأسمى
رشا :- وانتى عرفتى منين
حبيبه :- سمعتهم وهما بيتكلموا
رشا :- ومقولتيش لباباكى ولا اخوكى ليه
حبيبه :- بابا لو قولتلو ممكن يروح فيها من الصدمه ومش هيقدر يقف قصاد عمى وابنه ولو قولت لعمر متهور وممكن يعمل حاجه متهوره تخسره نفسه وشغله
رشا :- طب ما كده برضه ممكن باباكى يروح فيها من زعله عليكى ومن اللى عملتيه ده وممكن المشاكل تكبر اكتر بين عمك وابن عمك وباباكى واخوكى
حبيبه :- مش عارفه اعمل ايه يارشا بس هو ده الحل اللى جه فى دماغى قولت ابعد وافكر براحتى فى المشكله دى
رشا :- طب ناويه على ايه
حبيبه :- مش عارفه بس مش هقدر انزل الجامعه اليومين دول علشان اول مكان عمى وابنه هيدوره عليا فيه هو الجامعه وبعدين هحاول اشوف مكان تانى اقعد فيه علشان هما هيسألو على صحباتى مين وهيوصلو ليكى
رشا :- طب هتقعدى فين وهتجيبى مصاريف منين تعيشى بيها
حبيبه :- هنزل ادور على شغل واصرف منه ومعايا قرشين هدفعهم إيجار شقه او اوضه على قدى لحد ما اشوف صرفه وارجع تانى البيت
رشا :- ربنا يصلح حالك يارب ويبعد عنك ولاد الحرام
حبيبه :- يارب يارشا
رشا :- طب غيرى هدومك على ما احضرك عشا واجى
حبيبه :- لالا ملهوش لزوم الاكل انا مش جعانه انا هدخل الحمام اغير وانام
رشا :- بت انتى متستعبطيش هجيب الاكل واجى بسرعه
حبيبه :- هههههههههه ماشى
وطلعت رشا تحضر الاكل وحبيبه غيرت هدومها وجت رشا واتعشت حبيبه ونامو جمب بعض
……………………………………………………
اشرقت شمس يوم جديد بنورها الساطع فى سماء الاسكندريه واستيقظ الجميع على صوت تغريد العصافير استيقظت حبيبه وبصت حواليها وافتكرت انها مش فى اوضتها وان دى اوضت رشا صحبتها وفاقت من سرحانها على صوت رشا
رشا :- صباح الفل يا جميل سرحان فى ايه وغمزت ليها
حبيبه :- هفكر فى مين يا حسره فى مصطفى اللى طلع واطى ولا فى اشرف ابن عمى اللى طلع اوطه منه كل الرجاله واطيه شبه بعضيهم
رشا :- مش كلهم يا حبيبتى دى قله منهم بس فى شباب كتير كويسه وولاد ناس بس مختفين ومنهم اخوكى واخويه
حبيبه :- الحمدالله كل اللى بيقع فى سكتى اندال وميستهلوش كلمة ذكر فى البطاقه
رشا :- ربنا يرزقك بأبن الحلال يارب
حبيبه :- انا وانتى يارب
رشا :- يلا قومى ادخلى الحمام وتعالى علشان نفطر مع بعض
حبيبه :- لالا انا اتكسف
رشا :- تتكسفى من ايه يا بنتى مفيش حد غير ماما واخويه عبدالله واختى سيلا
حبيبه :- لا اتكسف من اخوكى
رشا :- عبده ده عسل ده انتى هتحبى قعدته اوى يلا بس احنا مستنينك بره
حبيبه :- ماشى
وخرجت رشا وحبيبه دخلت الحمام وغسلت وشها واتوضت وطلعت ادت فرضها وخرجت بإسدال الصلاه من الاوضه
رشا :- تعالى يا بيبه اقعدى جمبى
حبيبه :- م.م.ماشى
ام رشا :- صباح الخير يا بنتى
حبيبه :- صباح النور يا طنط
عبدالله :- يا سبحان الله اول مره القمر يطلع بالنهار وفى بيتنا مش بالسما
حبيبه :- اتكسفت ووشها احمر
رشا :- اهدا يا ابنى على البت بص وشها احمر ازاى من الكسوف ده انا اقنعتها بالعافيه تيجى تقعد معانا
عبدالله :- ايه ده هو فيه من النوع ده دلوقتى اللى تتكسف من الكلام وكده ده انا كنت فقد الامل
رشا :- يا ابنى ابلع ريقك شويه افصل شويه بقى خلى البت تاكل براحتها وبصت لحبيبه وقالت متزعليش يا حبيبتى من اخويه بيحب يهزر كتير مع اى حد
حبيبه :- احم لالا عادى ده شبه اخويه عمر بيحب يهزر زيه كده
عبدالله :- الله يخليكى يا اختشى ياريت بس ناس تحس بقيمة الاخ اللى معاها مش علطول كلامها دبش معاه
سيلا :- يووووووه انتو مش هتبطلو صداع بقى خلينا نفطر فى هدوء شويه
عبدالله :- بقى انتى يا سوكه صدعتى مننا ده انتى مش باينه من الارض يا ام ست سنين انتى يا ام فطيره
سيلا :- بصى بقى يا ماما بيقولى سوكه وام فطيره
ام رشا :- بس يا عبده متقولهاش كده
حبيبه :- هههههههه ده انتى زى العسل
سيلا :- ميرسى يا ابله حبيبه
حبيبه :- يا خلاثى اسمى زى العسل من بؤقك
عبدالله :- بلاش بس تمرعيها علينا
رشا :- اه لو تعرفى يا بيبه هى مطلعه عنينا فى البيت ازاى
حبيبه :- من حقها دى حتة سكر والله
سيلا :- قوليلهم يا ابله احسن هما مش حاسين بقيمتى فى البيت
حبيبه :- هههههههههههههه يخربيت طعمتك وبستها فى خدها وحضنتها
……………………………………………………
فى قصر عزالدين
كانت ديمه قاعده فى اوضتها ودموعها على خدها اللى بقت ونسها فى الفتره الاخيره وسمعت تليفونها بيرن بتبص لاقته رقم غريب فتحت السكه وقالت
ديمه :- الو مين معايه
عصام :- هههههههه انتى مفكره لما متجيش الجامعه ومترديش على رقمى مش هعرف اوصلك ده انتى عبيطه اوى
ديمه :- بدموع عايز ايه تانى مش خلاص اخد اللى انت عايزه منى
عصام :- مشتاق ليك يا جميل ونفسى نقضى ليله مع بعض وبرضاكى زى ما كنا بنعمل مع بعض على الكاميرا
ديمه:- كان فيه وخلص كنت عبيطه وفؤقت متأخر اوى بعد ما خسرت كل حاجه
عصام :- لا ما انتى هتسمعى كلامى بالذوق احسن ما ازعل منك وزعلى مش هيعجبك
ديمه :- اللى عندك اعمله مبقتش تفرق معايه
عصام :- ههههههههههه لا هيفرق لما تشوفى اللى هبعته ليكى على التليفون ويا اما تيجى ليا الشقه يا اما الفيديو ده هيكون عند ابوكى واخواتك سلام يا قلبى وقفل معاها وبعد شويه تليفون ديمه اعلن عن وصول رساله ليها
ديمه :- فتحت الفيديو واتصدمت لما شافت اللى فى الفيديو وكان المحتوى
فيديو ليها وهى بتعمل معاه المحرمات على الكاميرا قاعدت تلطم وتقول يا فضحتى السوده وخبطت على رجليها بأيديها الاتنين وقالت اعمل ايه ياربى لو الفيديو ده وصل لبابا هيروح فيها ولو وصل لابيه سيف وأدهم هيقتلونى منك لله يا عصام حسبى الله ونعمه الوكيل ربنا ينتقم منك يارب وقاعدة تعيط وتدعى ربنا يخلصها من اللى هى فيه ده
……………………………………………………
فى بيت حسن جادالله
كان قاعد حسن فى اوضه وماسك المصحف فى ايده وبيقراه فيه ودخلت عليه حوريه وقالت
حوريه:- انت هتقعد كده ملكش لازمه فى البيت قوم دور على مقصوفت الرقبه بنتك اللى فضحتنا فى المنطقه وفى البلد ده البلد كلها عرفت هناك واهلى واهلك مش عارفين يرفعو راسهم
حسن :- صدق بالله العظيم وقفل المصحف وقال عايزانى اعملك ايه اجيب عربيه وانادى وقول عيله تايها ياولاد الحلال ولا الف بصورتها على الناس فى الشارع وأسألهم عليها
حوريه :- هو ده اللى ربنا قدرك عليه بدل ما تلف الدنيا لحد ما توصلها وتكسر ليها رقابتها ما انت السبب فى اللى احنا وصلنا ليه من دلعك فيها
حسن :- وليكى عين تتكلمى ما انتى السبب فى اللى حصل لو مكنتيش غصبتى عليها فى الجوازه مكنتش هربت وكانت زمنها فى وسطنا
حوريه :- وانا السبب ليه علشان كنت عايزه افرح بيها زى اى ام مع راجل يحميها ويحرسها
حسن :- وهو انتى كنتى متأكده ان اشرف ده اللى كان هيسعدها ده بتاع امه
حوريه :- المفروض انت اللى كنت تتمسك بالجوازه دى علشان ابن اخوك انت
حسن :- انا مصلحة بنتى اهم عندى من اى حد واهو شفتى الشده معاها وصلتها لايه منك لله ياشيخه ضيعتى مننا البنت
حوريه :- انا هروح اتصل بأشرف هو ده اللى هيعرف يوصلها ويكسرها رقابتها احسن انت وابنك ايدى منكم والقبر مش هتتحركوا ولا تعملوا اى حاجه
حسن :- بصلها وقال لله الامر من قبل ومن بعد ربنا يهديكى ويحنن قلبك على بنتك بدل ما انتى طول عمرك قاسيه عليها
……………………………………………………
فى بيت رشا
كان الكل خلص اكل ودخلت حبيبه الاوضه تغير هدومها وبعد شويه دخلت ليها رشا
رشا :- ايه ده انتى رايحه فين
حبيبه :- هروح ادور على شغل اصرف منه على نفسى لحد ما اشوف هعمل ايه وهرجع ازاى تانى بتنا مع انى عارفه ومتأكده ان عمى وابنه مش هيعدى الموضوع بالساهل
رشا:- ربنا يسهلك الحال يارب
حبيبه :- يارب هروح انا بقى علشان الحق وقتى
رشا :- ماشى يا حبيبتى ربنا معاكى
……………………………………………………
فى قصر عزالدين
كان الكل قاعد على سفرة الفطار
عزالدين :- عملت ايه فى موضوع ضم شركة lamar للبناء والتعمير لشركتنا
سيف :- كل حاجه تمام يا بابا وبكره هنمضى عقود الانضمام
عزالدين :- اهم حاجه قريت الشروط والبنود فى العقد عندهم
سيف :- ايوه واكتر البنود فى مصلحة شركتنا وكل الصلاحيه لينا استبدال موظفين ونقلهم من مكان لمكان وتطبيق شروط جزائيه على مخالف بنود العقد بمالغ كبيره علشان الكل يلتزم بيها
عزالدين :- الله ينور عليك يا ابنى
أدهم :- هو ايه لزمته ضم الشركتين على بعض ما احنا شركتنا كبيره ومش محتاجه تصيد من حد ولا تشهير
عزالدين :- لا ليه لازمه شركة لمار من اشهر الشركات للبناء والتعمير ووجود الاسمين مع بعض هيضيف لتانى شهره اكتر غير ان احنا بندخل فى منتجعات سياحيه كبيره وفنادق كبيره وسعات بنحتاج لسيوله وجود الشركه تانيه هتساعد معانا فى السيوله وفى المعدات فهمت
أدهم :- امممم دى ليله كبيره بقى انا مليش فيها
سيف :- حضرتك بتشرح لمين ده فاشل هتوجع قلبك على الفاضى وقام وقف وقال عن أذنك يا بابا هروح الشركه
عزالدين :- ماشى يا حبيبى ربنا معاك وانا هحصلك علطول
ومشى سيف راح على الشركه
أدهم :- هى برضه البت ديمه مش راضيه تروح الجامعه
عزالدين :- بتقول صحبتها بتجيب ليها محاضراتها لحد هنا وهى بتذاكر فيهم
أدهم :- البت دى اتحسدت كانت زى الورده المفتحه مش عارف ايه حصلها والنعمه عايزه تتبخر
عزالدين :- صبرنى يارب وقام وقف وقال انا ماشى بدل ما يحصلى حاجه منك
أدهم :- ليه بس ابابى ده انا بقول البت عايزه تتبخر وتتعمل ليها عروسه ونفضل نخرم فيها ونقول من عين سيف ومن عين عز وهكذا لحد ما نفقع عيونكم كلكم
عزالدين :- لا انت ناوى تشلنى انا ماشى
ومشى عزالدين على الشركه
أدهم :- لنفسه هما مالهم خلقهم عند مناخيرهم كده انا مالى خلى البت كده محسوده ومحدش يرقيها
وقام هو كمان ركب عربيته وراح لشركه
……………………………………………………
عند حبيبه نزلت تدور على شغل وكل ما تروح تقدم فى شركه يطلبوا منها شهادة خبره ويأست من كتر ما لفت ومش لاقيه شغل وهى قاعده على الرصيف وبتقول
حبيبه :- اعمل ايه يا ربى محدش راضى يقبلنى فى الشغل وانا الفلوس اللى معايا يدوب ادفعهم إيجار شقه ومش هيبقى معايا فلوس للاكل والشرب هجيب مصاريف منين بس ياربى وبتبص حواليها كان فى كشك بيبع جرايد ولمحت خبر فى اعلان الوظائف قامت جريت واشترت الجريده وقعدة تقراه الخبر وكان مكتوب مطلوب مهندسين حديثى التخرج للالتحاق بعمل فى شركة لمار لبناء والتعمير لا يشترط الخبره
حبيبه :- الحمدالله ياربى الف حمد وشكر انك سمعت دعائى ومسكت الجريده وبصت للعنوان ووقفت تاكسى وادته العنوان وراح بيها عند الشركه
……………………………………………………
فى بيت حسن جادالله
اتصلت حوريه على تليفون اشرف وانتظرت الرد
اشرف :- خير يا مرات عمى بنتك راجعت
حوريه :- لا لسه
أشرف :- امال متصله بيا ليه
حوريه :- علشان تيجى تدور على خطيبتك وتكسر رقابتها
أشرف :- ومين قالك ان انا ساكت يا مرات عمى انا مكلم ناس بيدورو عليها فى الجامعه وعند اصحبها وانا نازل النهارده بليل ادور عليها بنفسى مش هسكت غير لما الاقيها
حوريه :- ارفع راسنا قدام البلد كلها يا اشرف
أشرف :- ده انا هخدها حيه واغسل شرفنا قدام البلد كلهم
حوريه :- انت اللى راجل بجد اما اللى عندى دول عيشت اسكندريه نستهم سلوهم واصولهم الصعيديه
اشرف :- ان شاءالله هكون عندك بليل سلام
حوريه :- سلام
……………………………………………………
عند حبيبه وصلت لعنوان الشركه ونزلت من التاكسى وحسبته ودخلت الشركه وسألت على السكرتيره ووصف ليها مسؤول الاستقبال وطلعت حبيبه زى ما قالها
حبيبه :- السلام عليكم
السكرتيره :- وعليكم السلام امرى
حبيبه :- انا كنت جايه علشان اقدم فى الوظيفه اللى مكتوب عليها فى الجريده
السكرتيره :- معاكى السى فى بتاعك
حبيبه :- اه اهو ومدت ايديها بى لسكرتيره
السكرتيره :- اخدته منها وقالت تمام اتفضلى اقعدى ثوانى وانا هدخل ابلغ المدير
حبيبه :- شكرآ
وقعدة حبيبه وهى متوتره
ودخلت السكرتيره لمدير وبعد شويه طلعت وقالت
السكرتيره :- اتفضلى يا انسه المدير فى انتظارك
حبيبه :- ش.ش.شكرآ
ودخلت السكرتيره حبيبه فى مكتب المدير وقفلت الباب وراها
المدير تامر :- اتفضلى يا انسه
حبيبه :- شكرآ وقعدة على الكرسى اللى قصاد المكتب
تامر :- هههه انتى مالك خايفه كده ومتوتره
حبيبه :- ا.ا.اصل اول مره اقدم على شغل
تامر :- متخفيش مش هاكلك خليكى عادى وانسى اي حاجه واتصل على السكرتيره وطلب منها واحد ليمون
وشويه والسكرتيره جابت الليمون وحطته قدام حبيبه وطلعت
تامر :- اشربى يا انسه علشان تهدى شويه
حبيبه :- شكرآ ومدت ايديها واخدت كوباية العصير وشربتها
تامر :- ها بقينا تمام
حبيبه :- ايوه اتفضل حضرتك اسأل
تامر :- اوكى انتى قولتى انك اول مره تشتغلى
حبيبه :- تمام علشان انا لسه فى الجامعه
تامر :- يبقى انتى هتدخلى تدريب مش وظيفه علشان انا محتاج شباب متخرجه
حبيبه :- يعنى حضرتك هتقبلنى فى الشركه
تامر :- طبعآ انا بشجع الشباب وتملى بوفر ليهم فرص عمل هما الاوله عند التخرج مش بشترط الخبره ومع الوقت بيتعلم فى شركتنا وبيبقى اشهر مهندسين عقبالك يارب
حبيبه :- شكرآ لحضرتك طب انا اقدر انزل من امته
تامر :- بصى انتى وشك حلو وبكره عندنا احتفال بأنضمام شركتنا لشركة عز لبناء والتعمير تقدرى تنزلى من بكره وتشاركى معانا فى الاحتفال
حبيبه :- حضرتك قولت شركة عز
تامر :- اه اكيد انتى عرفها دى مشهور فى مصر وفى العالم كله
حبيبه :- اه عرفها
تامر :- تمام انا هكلم المحامى يحضرك العقد وتمضيه بكره مع امضاء عقد انضمام الشركات
حبيبه :- شكرآ لحضرتك عن اذنك
تامر :- اتفضلى
وخرجت حبيبه من المكتب ونزلت وقفت تاكسى وراحت على بيت رشا
ولسه هتنزل من التاكسي شافت اتنين لبسين لبس صعيدى وطالعين العماره
حبيبه :- يا نهار اسود هما وصله لرشا بسرعه كده اعمل انا ايه دلوقتى
السواق :- ايه يا انسه هتنزلى ولا هتروحى فين
حبيبه :- ها م.م.مش عارفه طب ممكن تخدنى عند لوكانده بس تكون فلوسها بسيطه مش غاليه
السواق :- والله يا انسه انا مش ضامن ليكى الرخيص بيبقى اكترهم مشبوه وسمعتهم مش حلوه
حبيبه :- لنفسها طب اعمل ايه الفلوس اللى معايا مش تكفى واحد غالى
السواق :- ايه يا انسه قولتى ايه
حبيبه :- طب متعرفش اى اوضه رخيصه اقعد فيها اليومين دول
السواق :- لا والله معرفش
حبيبه :- طب ممكن تمشى من هنا وتروح اى مكان بعيد
السواق :- بزهق ماشى ومشى بيها لحد ماراح لمكان بعيد عن بيت رشا
ونزلت من التاكسى وحسبته وقعدة على البحر
حبيبه :- منك لله يا اشرف انت وابوك علشان البهدله اللى انا فيها دى
وحست بجوع راحت اشترت سندوتشات وقعدة تاكلها

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية وراء كبرياءه عاشق)