رواية العشق الأبدي الفصل الثالث 3 بقلم لبنى دراز

رواية العشق الأبدي الفصل الثالث 3 بقلم لبنى دراز

رواية العشق الأبدي البارت الثالث

رواية العشق الأبدي الجزء الثالث

رواية العشق الأبدي الحلقة الثالثة

إن السعادة الحقيقية لا توجد إلا بالإيمان بالله عز وجل والتزود من الأعمال الصالحة، قال الله تعالى : ” مَنْ عَمِلَ صَالِحًا مِّن ذَكَرٍ أَوْ أُنثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُم بِأَحْسَنِ مَا كَانُواْ يَعْمَلُونَ ”
العشق الابدي بقلمى✍️____________لبنى دراز
فـ بيت حلم
بعد مكالمة رانيا حلم فضلت متوترة و رايحة جاية فـ اوضتها واخيرا طلعت ع السطوح اللى بالنسبة ليها ده جنتها و منفسها الوحيد اللى بتطلع فيه ضغوط يومها ودخلت اوضة الرياضة بتاعتها تنفس عن غضبها وطلعت تجرى فوق المشاية باقصى سرعتها
بعد شوية طلعت ياسمين و عاليا و أدهم ونجوى وأمينة ومعاهم فاتن علشان تجهز لهم القاعدة
نجوى:: الله ايه الجمال ده
أمينة:: اهو السطوح ده بقى جنة حور مهما تلف مش بترتاح غير هنا
عاليا::فعلا جميل جدا ومريح تحسى كدا انك قاعدة فـ جنينة الڤيو روعة بجد
أدهم:: الورد والزرع اللى عاملاه والنجيلة فعلا حكاية..ده انا بعد كدا مش هخرج من البيت الخالص
ياسمين::تصدق فعلا يا دومى بالمنظر ده مش هنخرج خالص
نجوى::انا اول مرة اشوف سطوح مزروع نجيلة واشجار بالشكل ده
أمينة::حور من حبها فـ الخضرة والزرع عملته كدا وبتهتم بيه جدا حتى لو مش موجودة علمت فاتن ازاى تراعى الزرع وتهتم بيه زيها
فاتن::عارفة يا ست نجوى الانسة حور دايما تقولى الزرع ده ابنى اللى ربنا رزقنى بيه طول ما انا مش موجودة هنا خلى بالك منه
أدهم::قد كدا بتحب الزرع
وبص لـ عاليا هو فارس لسة نايم
عاليا::اه دخلت عشان اشوفه لاقيته نايم مش رضيت اصحيه
أمينة::يا خسارة كان نفسي يسهر معانا
نجوى::مرة تانية ان شاء الله..هو يا قلبى أكيد ماسك قضية صعبة لانه من طبعه لما يكون مشغول فـ قضية كبيرة بيكون كلامه قليل وع طول عايز يفضل لوحده او ينام كتير
أمينة::ربنا يعينه..ولـ فاتن شوفى حور صحيت ولا لسة
فاتن::انسة حور مش نايمة يا ست الحاجّة
أمينة::اومال فين
وقبل ما ترد فاتن كانت حور طالعة من اوضة الرياضة بتتكلم فـ الموبايل مع اللوا حسين يبلغها انه نفذ طلبها و غيّر لها طقم الحراسة و زيادة عناصر التأمين ع المزارع والمصنع وكمان المستشفى
حلم::متشكرة جدا يا سيادة اللوا..تعبت حضرتك معايا
اللوا::مافيش تعب يا انسة حلم..ده واجب علينا حماية الناس..وانتى مش اى حد يا حلم يابنتى
حلم::حقيقى مش عارفة اقول لحضرتك ايه يا باشا..كان الله فـ العون..أمن البلد مش بالمهمة السهلة أبدا
اللوا::مش ناوية طيب بالمرة تعيين حرس شخصى
حلم::أكيد مش محتاجة وصدقنى لو جه اليوم اللى هحتاج فيه حرس شخصى هاجى لحضرتك بنفسى يا سيادة اللوا واطلب ده منك
وقفلت الخط بعدها وقعدت معاهم بعد ما سلمت عليهم
أمينة::حور انتى هنا من امتى؟ ومين اللوا اللى كنتى بتكلميه؟ وايه اصلا حكاية الحرس دى؟
حلم::بمقاطعة..خدى نفسك شوية يا ست الكل..انا هنا من بدرى..وبالنسبة للوا..كنت بغيّر حراسة المزرعة وطلبت طقم جديد متدرب ع أعلى مستوى تأمين مش أكتر وبالنسبة للحرس الخاص اللوا حسين عرض عليا يعين حارس خاص وانا رفضت بس مش اكتر
نجوى::قد كدا شغلك صعب يا حور يابنتى ولا انتى عندك عداءات مع حد؟
حلم::ابدا يا طنط والله مش صعب بالعكس انا بلاقى نفسى فيه..وأكيد مش عندى عداءات مع حد بس طبيعى يكون فى حراسة لان المزرعة كبيرة و محتاجة تأمين
أدهم::بتسرع..حور هو انتى كنتى فـ المستشفى النهاردة ليه
حلم::باندهاش مصطنع..مستشفى؟!! مستشفى ايه اللى كنت فيها دى
أدهم::مستشفى الحلم..شوفتك هناك و انا داخل بعد الضهر
حلم::بطفولية مين انا لأ انا ما روحتش اى مستشفيات النهاردة تلاقى اختلط عليك الامر بس وشوفت حد شبهى ولا حاجة
أدهم::بعدم تصديق..جايز برضوا
ياسمين::بأستفسار..هى ايه الاوضة دى يا حور
حلم::بصى ياستى السطوح كله عالمى الخاص هنا زى ما انتى شايفة كدا جنتى القاعدة فيها مع أمى بالدنيا وما فيها..و الاوضة دى عبارة عن چيم صغير لما بكون متوترة بدخل اهدى نفسى فيها
أدهم::انتى غريبة أوى يا حور
حلم::ليه يا دكتور
أدهم::مش عارف حاسس انك شخصيتين فـ بعض
حلم::دى حقيقة..انا فعلا شخصيتين..حور اللى بتشتغل ليل نهار وتقعد بالشهور برة بيتها عشان شغلها..لازم اكون جد جدا والا ماكنتش النهاردة عندى مزارع خضار و فاكهة ومواشى و دواجن وحاليا مصنع انتاج مواد غذائية..وفـ نفس الوقت مانسيتش حور البنت البسيطة اللى عايشة فـ منطقة شعبية وبتحب تضحك وتهزر وعايشة حياتى زى اى بنت فـ سنى
أدهم::بس مش غريبة ان واحدة عندها مزارع بالحجم ده وعايشة هنا فـ المنطقة البسيطة دى
حلم::أيه الغريب فيها..مش معنى انى عندى كل المزارع دى..أنى انسى أصلى و المكان اللي اتولدت و اتربيت فيه يا دكتور
عاليا::بمقاطعة..هو انا ممكن اتفرج ع الچيم بتاعك يا حور؟
حلم::بتأكيد..طبعا وممكن تستعمليه كمان لو حبيتى
عاليا::بفرحة..بجد ممكن استعمله يا حور
حلم::تعالى معايا افرجك عليه وخليكى يا ستى العبى براحتك
واخدتها هى و ياسمين تفرجهم فعلا ع الچيم الصغير بتاعها وشافوا الاجهزة وعجبتهم جدا
عاليا::وااااو ده جميل جدا و الاجهزة كلها حديثة..وندهت تعال يا دومى اتفرج
أدهم::واضح انك بتحبى تهتمى بنفسك يا حور
حلم::مش بالظبط يا دكتور
أدهم::بمقاطعة..ع فكرة انا عديتهالك بمزاجى قبل كدا..فـ ياريت بلاش دكتور وخليها أدهم بس ممكن ولا لأ
حلم::اكيد ممكن طبعا وأكيد لو حبيت انت كمان تستعمل الچيم ده تقدر تستعمله و بهزار..مرة كل شهرين تلاتة
ياسمين::وجاية ع نفسك ليه ما تقولى كل سنتين تلاتة تبقى مبلوعة شوية ههههههههههههه
أدهم::لـ ياسمين..بس يا خفة..و لـ حلم..انا كفاية عليا المستشفى ما عنديش بصراحة وقت
حلم::بجدية..لازم فعلا تلعب رياضة ع الاقل نص ساعة يوميا بتظبط مودك و تهدي التوتر والقلق
أدهم::بتأكيد..دى حقيقة غير انها بتنظم ضربات القلب و تنشط الدورة الدموية
حلم::أى وقت انت او عاليا او ياسمين او أخوكم..معلش مش فاكرة اسمه تقدروا تاخدوا المفتاح من فاتن وتطلعوا تلعبوا رياضة فـ اى وقت
عاليا::يا خبر ده أبيه فارس هيفرح اوى لانه بيحب يلعب رياضة ويجرى كل يوم
ياسمين::فعلا ومن يوم ما جينا هنا ما اعتقدش انه نزل يجرى او لعب رياضة
حلم::تمام تقدروا تبلغوه..اى وقت يحتاج يطلع الچيم تحت امره
و عدى الوقت بسرعة ما بين ضحك وهزار واسئلة كتير من ياسمين و عاليا اللى عايزين يعرفوا كل حاجة عن حلم و أدهم اللى بيحاول يفهم شخصيتها ومعرفش
بقلمى✍️______________لبنى دراز
فـ شقة فارس
صحى من نومه مالاقش حد فـ الشقة ورن ع أدهم عرفه انهم سهرانين ع السطوح وطلب منه يطلع فارس رفض وفضل قاعد شاغل تفكيره القضية لغاية ما نزلوا كلهم
فارس::حمد الله ع السلامة..ايه عجبتكم القاعدة فوق اوى كدا
نجوى::بتأكيد..فعلا يا حبيبى القعدة فوق ترد الروح وتشرح القلب
فارس::للدرجة دى السطوح حلو كدا
أدهم::ده جنينة يا ابنى..نجيلة فـ الارض معرفش ازاى و اشجار صغيرة و ورد وفل و ياسمين وريحان و تكعيبة و كراسى حاجة وهم من الاخر
ياسمين::ونسيت اوضة الچيم يا دومى
فارس::بذهول..نعم !! اوضة چيم
عاليا::اه يا أبيه فيها مشاية و عجلة و شنطة سونا وجهاز البطن ده وشوية اجهزة كدا مافهمتهاش بصراحة
أدهم::حور دى دماغ شوفتوها كانت طالعة من الچيم بتاعها بتتكلم ازاى فـ الموبايل ولما قفلت اتكلمت ازاى واحدة تانية خالص
فارس::ازاى يعنى
عاليا::انا اقولك يا أبيه..هى تقريبا كانت فيها حاجة معصباها لانها قالت انها بتدخل اوضة الچيم دى لما بتكون متوترة المهم طالعة من الاوضة بتتكلم مع حد بتقوله سيادة اللوا وبعد ما خلصت مكالمة طنط سألتها مين اللوا ده قالتلها انها بتغيّر حراسة المزرعة و كدا يعنى
أدهم::بس ع فكرة انا متأكد انها هى اللى كانت فـ المستشفى
ياسمين::يا ابنى ما انت سألتها وقالتلك اختلط عليك الامر
أدهم::لأ ما اختلطش نفس الشكل نفس الجسم حتى اللبس..بس فى حاجة هى مش عايزة حد يعرفها أكيد
فارس::طب ايه هنتكلم عنها كتير كدا..مش هنتعشى يا لولى انتى و سمسمة ولا ايه
نجوى::بأمر..يلا يا عاليا حضرى العشا يا حبيبتى لـ أخوكى
عاليا::حاضر يا مامتى هوا
فارس::وانتوا مش هتتعشوا ولا ايه
نجوى::احنا بصراحة اتعشينا فوق و قولت لـ عاليا تنزل تشوفك قالت انك نايم
فارس::شكلك مبسوطة يا نوجة هنا
نجوى::فعلا..انت عارف أمينة مش بنت عمى بس دى كمان صاحبتى و أختى وطول عمرنا سِرنا واحد بس الدنيا فرقتنا..وبصراحة ما صدقت اننا اتجمعنا تانى
فارس::طيب يا ست الكل كلمتيها فـ عقد الايجار ولا هنفضل قاعدين عالة كدا ع الناس؟
نجوى::لا يا حبيبى بصراحة نسيت
فارس::مسك ايد أمه و باسها طيب ممكن حبيبة قلب فارس ماتنساش تانى وتكلميها الصبح عايز ارجع من شغلى أمضى العقد وادفع لها الايجار اللى تقول عليه واحس انى قاعد فـ بيتى مش ضيف ممكن؟
نجوى::حاضر يا حبيبى هقولها
فارس::حاجة كمان يا ست الكل بلاش الحاجات اللي بتبعتها طنط أمينة او بنتها وانا وأدهم هنجيبلك كل حاجة واحنا راجعين من الشغل ممكن؟
نجوى::بس لو حور صممت زى كل مرة
فارس::قوليلها كدا بالحرف فارس مش بيحب يعيش عالة ع حد ولو صممتى هتاخدى تمن الحاجات اللي جبتيها كلها من اول يوم جينا فيه و ياريت ما تشغليش بالك بينا وطلعينا من حساباتك
عاليا::العشا يا أبيه
ياسمين::بأستفهام..انت عايز ماما تقول الكلام ده ؟
فارس::اه تقول وبالحرف كمان والا هقول انا ومش هتبقى ظريفة منى لانى لسة ما شوفتش حور دى و معرفهاش
نجوى::حاضر يا حبيبى هقولها بكرة ان شاء الله..يلا تصبحوا ع جنة يا حبايبى
كلهم وانتى من أهلها يا ست الكل وبعدها كل واحد دخل اوضته ينام الا فارس سهران فـ سريره بيفكر فـ اللى بيسمعه عن حور طول الوقت
____________________
فـ ڤيلا عابد الوزير
تصميمها راقى والوانها هادية والعفش فيها فاخر جدا وكله ماركات عالمية
عابد فـ مكتبه قاعد بيفكر ازاى يكـ سر حلم بعد ما وصلته رسالتها دخلت عليه مراته
سيلين::بيدو حبيبى مالك يابيبى
عابد::بعصبية..سيلين اعتقد قولتلك كتير بلاش بيدو دى
سيلين::بنرفزة..مالك يا عابد متغيّر مني ليه ومش طايق ليا كلمة
عابد::بحب مصطنع..مين قالك بس يا روحى انى متغيّر منك..انا بس مشغول بصفقة جديدة لو تمت هتنقلنى قصدى تنقلنا نقلة تانية خالص
سيلين::عبارة عن ايه الصفقة دى و بابى معاك فيها
عابد::بشرود..لا دى بتاعتى انا وبس وااااه لو توافق هتتفتح لنا طاقة القدر
سيلين::هى مين اللى توافق يا عابد وع ايه
عابد::فاق من شروده ع سؤال سيلين..الوزارة يا حبيبتى اصل الصفقة دى تعتبر خبطة العمر..وسرح تانى فـ مزارع حلم و المصنع و المستشفى وقبلهم أسم حلم الرشيدى اللى بيفتح البيبان المتقفلة اكتر من أسم حماد الدمنهورى..ويقدر يعمل من وراها كل اللى بيعمله
سيلين::حبيبى مش فاهمة منك حاجة
عابد::بأبتسامة مكر..حبيبتى هتفهمى كل حاجة فـ وقتها بس أدعى ان الصفقة تتم وقتها هتبقى ملكة الكون يا ملكة قلبى يا سيلي
سيلين::حاضر يا حبيبى هدعيلك بس وقتها بقى عايزة طقم سوليتير
عابد::أكيد يا روحى وبغيظ متدارى..كل اللى تؤمرى بيه ياقلب عابد
شوية ودخلت البنت الشغالة قالت ان حماد بيه وسوسن هانم برة.
سيلين::بسعادة..بابى حبيبى وحشتنى..مااااامى يا روح قلبى انا..انتى كمان وحشتينى
سوسن::يا سلام عشان كدا كنتى بتسألى يا وحشة
حماد::وتسأل ليه يا سوسو..عابد شاغلها عننا خالص يبقى تفتكرنا ليه
عابد::بأبتسامة صفرا..ابدا يا باشا مقدرش اشغلها عنكم ده انتوا الاصل
سوسن::بتكبر..كويس انك عارف اننا الاصل وانك ما كنتش تحلم اصلا تتجوز سيلين الدمنهورى
عابد::بنفس الابتسامة..أكيد يا طنط ماكنتش احلم بالقمر ده لانها حاجة كبيرة خالص بس قلبى وقلبها بقى السبب اللوم عليهم مش عليا
حماد::خلاص بقى يا سوسو عابد بيحب سيلي وهى بتحبه و بقى جوزها مش هنعيد تانى الكلام ده
سيلين::اسكت يا بابى عابد داخل صفقة كبيرة خالص قال لو تمت هتنقلنا نقلة تانية خالص وتخلينا فووووق
عابد::فـ نفسه اه يا بنت الـ….. لو سأل دلوقتي اقو……
حماد::قطع تفكيره..صفقة ايه يا عابد اللى داخلها
عابد::هااا..بتقول حاجة يا عمى
حماد::بقول صفقة ايه اللى داخلها
عابد::أستيراد اجهزة طبية حديثة وقصادها تصدير منتجات مصانع الحلم
حماد::تبادل منافع يعنى ولا ايه
عابد::أه اه هو كدا بالظبط
حماد::بس اعتقد حلم الرشيدى مش بتصدر منتجاتها
سوسن::بتكبر..بنت غريبة جدا البنت دى رغم كل شهرتها دى وكل اللى عندها الا انها مصممة تفضل مع الفقرا اللى هى منهم
حماد::كانت يا سوسو كاااااانت دلوقتي بمجرد ذكر أسمها بس حتى لو مش موجودة الدنيا تقف ع رجل
سيلين::حقيقى يا بابى انا مش عارفة هى بقت كدا ازاى..انا مش ناسية شكلها ايام الجامعة..ياي كانت فظيعة
عابد::بشرود..حلم طول عمرها ذكية جدا و بتعرف تحقق هدفها كويس وبطريقة صح جدا ومحبوبة من يومها علشان كدا وصلت للى هى فيه
سيلين::بغيرة..عابد انت بتتكلم عنها كدا ليه..هو انت لسة بتحبها
عابد::انتبه وبحب مصطنع..ابدا يا روحى احبها ايه بس..انا من يوم ماشوفتك ياقلبى ونستيني حتى نفسى..وبعدين يا حياتى لو كنت بحبها..ماكنتش اتجوزتك ياقمر..انما انتى انا داااايب فـ هواكى يا سيلي يا روح قلبى
حماد::خلاص بقى يا سيلي جوزك بيحبك و دايما بيتباهى بحبك فـ اى مكان
عابد::قول لها يا باشا..هو انا عندى كام سيلين يعنى..هى واحدة بس ملكة قلبى وطبيعى اتباهى بيها و اقول للكون كله انى بعشقها مش بس بحبها
( اه يابن النصابة كلت بعقلهم كلهم حلاوة ماتركزوش معايا😂 )
بقلمى✍️______________لبنى دراز
فـ مكتب فارس
قاعد مجتمع بـ فريقه
و بيتناقش فـ حلول للقضية
فارس::بص لـ سيف دلوقتي انت قولت ان العيال دى بيستخبوا او يهربوا قبل ما توصل الحملة صح
سيف::صح بيستخبوا ومش بنمسك منهم حد
فارس::ده معناه ان ليهم عين هنا بتبلغهم بكل حركة بنتحركها
سيف::ده أكيد..بس مش عارفينه
فارس::بعصبية..انا عايز اعرف انت ظابط ازاى؟ عيب عليك لما تقول كدا..ولـ هانى عايز أعرف مين عين العيال دى هنا وبأقصى سرعة
هانى::أعتبره حصل يا باشا
فارس::مافيش أعتبره..عايزه حصل فاااهم
هانى::فاهم يا باشا
فارس::بمجرد ما يتعرف مين عينهم هنا هنحركهم زى الشطرنج..كمان عايز عين لينا وسطهم و ده الاهم وبص لـ سيف
سيف::نعم بتبص لى ليه..اكيد انا مش هدخل وسطهم
فارس::وانا ماقولتش ادخل وسطهم..بس انت أكيد تعرف العيال دى وأهاليهم
سيف::أكيد طبعا
فارس::يبقى من خلال ملفاتهم نشوف منهم اتنين او تلاتة ونشتغل عليهم
ياسر::واذا رفضوا يا باشا او اتكشفوا
فارس::يبقى الحل البديل موجود.
سيف::قصدك ان
فارس::مافيش غيره
سيف::خطر يا فارس
فارس:: بنرفزة..ده بجد؟انت اللى بتقول خطر
ياسر:: بس يا فندم حضر…
فارس::بمقاطعة قام وقف وبزعييق خبط ع المكتب بأيده الاتنين..مافييييش بس..انتوا عارفييين انتوا شغاليين فيييين..عارفييين يعنى ايه امن وطنى..ولا مش عارفين
سيف::احنا فاهمين كلامك كويس يا فارس بس فعلا اللى بتفكر فيه خطر
فارس::سييييف انت عارف لقبى ايه..المُد مر عارف ده معناه ايه..معناه ان فارس المنصورى مابيخافش من حد ولا بيخاف الموت بيدوس من غير ما يقف ولا يبص وراه
القضية اخدت اكتر من اللازم ومن قبل مانتحرك اللى خايف يتفضل يطلع برة المكتب ده ..انا عايز رجالة وحوش تسد مش عايز ناس جبانة مفهوم ولا لأ
سيف::معاك
هانى::معاك
ياسر::هى جات عليا..اكيد معاك
فارس::يبقى اتفضلوا كل واحد يعمل اللى طلبته منه..النهاردة قبل ما اروح بيتى يكون المطلوب ع مكتبى..اتفضلوا
سيف::بهمس..ربنا ع الظالم
فارس::انا ظالم يا سيدى ليك شوق فـ حاجة
سيف::يخربيت شيطانك..انت رعبت العيال لا ده انت رعبتنى انا شخصيا
فارس::بهدوء..انا فـ شغلى ماعرفش حد..لقبى ما اخدتهوش بالساهل يا سيف و تعبت جدا علشان احافظ عليه
سيف::بهزار..مش ناوى تعزمنى عندكم ع الغدا يا باشا ولا انت بخيل ولا حكايتك ايه انت
فارس::بنفس الهزار..شكلى بتورط مش كدا؟
سيف::ينوبك ثواب ده انا يتيم وغلبااان..امى و ابويا ميتين وماليش حد وحيد بائس
فارس::خلاص ما تعيطش نخلّص بس شغلنا و اخدك واعمل فيك ثواب حاضر
سيف::حبيبى يا ابو الفوارس..بالمرة بقى ما عندكش عروسة والنبى
فارس::اطلع برة يا سيف اعمل اللى طلبته منك..اه ومافيش غدا يلا بقى امشى..هههههههههه
سيف::وأهون عليك يا باشا وانا اللى كنت هبعتلك قهوة مع أمين تظبط دماغك
فارس::بلاش شغل الصعبنيات ده مش هياكل معايا امشى خلص المطلوب منك قبل ما اروح يكون الملف ع مكتبى اتفضل
وفعلا خرج سيف وابتدا الكل يتحرك علشان ينفذوا اللى طلبه فارس منهم
_______________________
فـ شركة عابد الوزير نفس الوقت
عابد::فـ مكتبه وخبط الباب كانت مروة السكرتيرة بنت مايصة كدا وع طول باللبانة
مروة::بدلع..مستر عابد فى حد ساب لحضرتك الظرف ده
عابد::طيب سيبيه عندك و تعالى اقولك كلمة فـ بؤقك ههههههه
مروة::عبودى انت نسيت ولا ايه اسمها كلمة فـ ودنك يا بودى
عابد::لا اتغيرت من زمان ياقمر
مروة::ايه ده بجد اتغيرت ما حدش قالى
عابد::اخص ع كدا..طب تعالى بقى وانا اقولك اصل القاموس كله اتغير
مروة::عبودى احنا فـ الشركة حد يدخل علينا
عابد::وحشتينى طيب أعمل ايه بس
مروة::هستناك بعد الشغل يا روحى فـ عِشنا..وبهمس أصل انت كمان وحشتنى موووووت يا بودى وبعتتله بوسة فـ الهوا وخرجت
عابد::بضحك..اه يا بنت اللذينا وبيمسك الظرف يفتحه وبيقول اما نشوف ايه ده كمان
كان فيه فلاشة حطها فـ اللاب وشغلها واتصدم من اللى شافه
و بزعيق مرووووة
مروة::نعم يا مستر عابد
عابد::ميييين جاااااب الظررررف ده وقالك اييييه بالظبط
مروة::بخوف من عصبية عابد..ما قالش حاجة غير انى اسلمه ليك فـ ايدك..خير يا عابد فيه ايه الظرف ده عصبك كدا
عابد::اخرجى برة مش عايز اى حد يدخل عليا وألغى اى مواعيد النهاردة
مروة::وميعادنا يا بودى
عابد:: انتى غبييية ولا شكلك كدا بقولك ألغى اى مواعيد تقوليلى و ميعادنا وقبل ما تطلع برة رن موبايله
حلم::عجبك الفيديو يا عابد..اتمنى تكون اتفرجت باستمتاع ههههههههههههه
عابد::حللللم..ما تلعبيش معايا اللعبة دى انتى مش قدى
حلم::بضحكة قوية هههههههههههههههههه العين بالعين يا عابد وانت البادى وغلطت لما هد دت حلم الرشيدى
عابد::هقتتلللللك يا حللللم
حلم::بخبث..اهدى ع نفسك يا بييدو التقيل ورا
عابد::بغضب..قولتلك قبل كدا ما تتحدنييييش يا حلم
حلم::بهدوء عصب عابد اكتر.. وانا قد التحدى يا عابد..اوعدك هتشوف أسوء كابوس فـ حياتك سلام يااااا يا بيدو
وقفلت حلم الخط من غير ما تسمع رده
عابد:: وقع كل حاجة فوق المكتب ع الارض و اى حاجة ايده تطولها يكـ سرها..ازاااااى ازززااااااى قدرت تعرف حاجة زى كدا اززززاااااى قدرت تعمل كدا لااااااااااااا كدا انتى اللى جنيتى ع نفسك يا حلم واللى ماعرفتش اخده بالزوق هاخده بالعافية ورينى بقى يا بنت الرشيدى هتعملى ايه
____________________
فـ المزرعة
حلم قاعدة مع حازم وبيزعق معاها لما سمع مكالمتها لـ عابد
حازم:: بزعيق..انننتتتى أكييييد اتجننتى ياااحلم لما تتصلى بـ عابد وتعرفيه انك انتى اللى بعتيله الفيديو
حلم::بغضب.. حاااازم لاااازم عابد يعرف انى مابقيتش حلم الهبلة اللى بتخاف ولا تتهـ دد ..لازم يعرف انى خلاص بقيت اقوى منه و بدوس ع اى حد مهما كان مين
حازم::بقلق.. انتى متخيلة سيادتك انه هيخاف منك ويلزق مكانه لاااااااا تبقى بتحلمى يا حلم
حلم:: بكل هدوء ..وانا بحب أحلم يا حازم و بحب أحقق احلامى
حازم::تبقي اتجننتى رسمى..وبترمي نفسك فـ التهلكة و ده انا مش هسمح بيه ابدا يا حلم ابدا
حلم::مش حلم الرشيدى اللى تخاف يا حازم ولا تسمح لـ حد يتحكم فيها او يهـ ددها..حلم لما تضـ رب ضر بتها لااازم الكل يعمل لها ملييون حسااااب
الاء::حازم خايف عليكى يا حلم من عابد..ده مجـ رم وممكن يأذيكى
حازم::بعصبية..لأ مش ممكن ده أكيد هيأذيها..هى مش عارفة بتلعب مع مين
حلم::بعصبية اكبر وقفت و خبطت ع المكتب..يظهر انتوا اللى نسيتوا انا مين..انا حلم الرشيدي يا حازم الاسطورة مش حلم البسيطة اللى كانت كل امنياتها تعيش فـ حالها وكافية خيرها شرها..حلم دى انتهت من 5 سنين والفضل لـ عابد و دلوقت جه دوره عشان يقبض تمن اللى عمله
الاء::أرجوكى يا حلم بلاش تمشى فـ سكة الانتـ قام..علشان خاطرنا..حتى علشان طنط أمينة وبلاش احنا
حازم::انا لازم اطلبلك حارس خاص..بعد اللى انتى عملتيه ما ينفعش تمشى لوحدك
حلم::وانا مش هعين حارس خاص يا حازم و مستنية عابد لو يقدر يعمل حاجة يبقى يورينى نفسه..وخلص الكلام لغاية كدا..انا ماشية راجعة السويس سلام
ومشيت حلم فعلا رجعت بيتها وسابت الاء وحازم هيتجننوا من خوفهم وقلقهم عليها
ألاء::بقلق..وبعدين يا حازم هنعمل ايه حلم دماغها ناشفة وعابد مش سهل
حازم::مش عارف يا الاء بس لازم اتصرف..وبغمزة المهم يلا نروح عايزك فـ موضوع مهم
الاء::بخجل..وبعدين معاك اتلم بقى
حازم::يالهووى عليكى وانتى بتحمرى كدا عسل
الاء::بس بقى يا حازم
_______________________
فـ بيت حلم
رجعت بيتها وهى داخلة من باب البيت قابلتها جارتها
ام عبير::حمدالله ع السلامة حور يابنتى
حلم::الله يسلمك يا ام عبير عم جاد عامل ايه
ام عبير::والنبى تعبان يا حور ليه اسبوع و الراجل اخد منه العربية ونفسيته زى الزفت
حلم::الف سلامة عليه..قوليله حور بتقولك شد حيلك والمزرعة مستنياك
ام عبير::عايزة أقولك حاجة والنبى يا حور بس مكسوفة
حلم::خير يا ام عبير..قولى وعينى ليكى
ام عبير::ممكن بالله تسامحينى بس فـ أيجار الشهر ده لغاية بس ما عمك جاد ينزل الشغل من تانى
حلم::هاتى ايصالات الايجار كدا يا ام عبير..همضيلك انى أخدت منك الايجار 3 شهور من الشهر ده ومش عايزة منك فلوس و زى ما قولتلك لما عم جاد يخف ويبقى زى الفل هستناه فـ المزرعة
ام عبير::يارب يجبر بخاطرك يا حور يابنتى يارب ويكرمك ويرزقك بأبن الحلال
حلم::قاطعتها بهزار..رجعت فـ كلامى يا ام عبير..قال ابن الحلال قال مش طالبة تخلف هى الحكاية
أم عبير::والنبى لا بكرة ربنا يرزقك بواحد يخليكى تقولى كنت فين من زمان يا نور العين
حلم::بهزار..تبقى اتغطى كويس يا أم عبير و ضحكت وطلعت تجرى ع السلالم فـ نفس الوقت كان فارس داخل وراها وسمع تقريبا أخر الحوار واستغرب تفكيرها..وصلت حلم شقتها
حلم::فاااتن فين الغدا جعااانة
فاتن::من عينى يا ست البنات حالا ادخلى خدى شاور وغيرى هدومك و أكون جهزته
حلم:: ماما فين؟
فاتن::عند الست نجوى. هروح اندهلها و اجى
و راحت ندهت أمينة من عند نجوى ورجعت جهزت الغدا وهما قاعدين يتغدوا
حلم::أمينة حبيبتى وحشتينى
أمينة::قلب أمينة البكاشة
حلم::انا بكاشة يا امونة
أمينة::وأجمل بكاشة فـ الكون كله..المهم خالتك نجوى كلمتنى عايزة تكتب عقد إيجار
حلم::باندهاش..عقد إيجار؟! لييه؟
أمينة::بتقول فارس رافض يقعد كدا..لانه مش بيحب يقعد عالة ع حد وكمان مش عايز اى حاجة من اللى بتجبيها
حلم::امممممم بقى مش عايز يبقى عالة هو هيبتديها من اولها..وفـ نفسها ده انا لسة ما شوفتش شكلك وانت شبه اللهو الخفي كدا
أمينة::يابنتى الراجل قصده انك عملتى واجب الضيافة وبزيادة وليهم فترة وعايز يحس انه فـ بيته وبدء يظهر عليها التعب
حلم::حاضر يا أمى..وانتبهت مالك يا حبيبتى فيكى ايه
أمينة::مافيش بس هدخل ارتاح شوية و قولى لـ فاتن تعملى شوية يانسون
فاتن::وهى بتلم السفرة سمعتها وقالتلها من عينى يا ست الحاجّة هعملك اليانسون
حور دخلت اوضتها بعد الغدا بتغيّر هدومها عشان تطلع الچيم بتاعها كالعادة لما تبقى متعصبة
امينة دخلت اوضتها
فاتن::عملت اليانسون و داخلة..اما عملتلك يا ست وقطعت كلمتها لما شافتها مغمى عليها وبصريخ ياااااااست الحااااجّة فوقى
الحقيييينى يا ست حووور الحقوووونى ياااا ناااااس
حلم::جات تجرى وشافت أمينة وصرخت مااااااااماااااااا ردى عليا الله يخليكى فوقى ابوس ايدك
وبصت لـ فاتن بسرعة اندهى الدكتور أدهم
وقبل ما تكمل كلامها كان جرس الباب رن جريت فاتن فتحت وكانت نجوى و ولادها
أدهم::جرى اول واحد عليها..مالها يا حور
حلم::بعياط..معرفش لسة كانت كويسة وقالت هتدخل ترتاح شوية وطلبت يانسون
فاتن::بعياط..انا عملته و دخلته ليها لاقيتها واقعة مغمى عليها
أدهم::بص لـ فارس أرفعها معايا نطلعها ع السرير وبص لـ عاليا شنطتى بسرعة..وفعلا جريت جابت الشنطة وبعد ما كشف أدهم قالهم دى بداية جلطة وقال ع نوع حقنة مذيبة للجلطات
حلم::طيب انا بسرعة هنزل الصيدلية أجيبها
أدهم::لأ خليكى وانا هنزل لان فى علاج لازم أجيبه بنفسى بس اوصفيلى الصيدلية فين
فاتن::اول ما تطلع من الشارع يا دكتور هتلاقيها فـ وشك ع طول
وفعلا نزل أدهم جرى و قعدت حلم ماسكة إيد مامتها و بتعيط وقصادها قاعد فارس ومستغرب اللى بيسمعه عنها انها قوية لكن دى واحدة اضعف ما يكون
نجوى::أهدى يا حور يا بنتى أمينة هتبقى كويسة ان شاء الله
حلم::بشهقات وصوت متقطع ..خـ خـ خايفة عليها اء اوى يا خالتو اء أء انا ماليش غيرها
ياسمين::ادعيلها يا حور..ان شاء الله هتخف ماتخافيش
نجوى::يا حبيبتى هتبقى كويسة دلوقتي أدهم يجى ويعالجها
عاليا::بعياط..ماتخافيش يا حور أدهم شاطر والله وهيلحقها صدقينى
حلم::لو جرالها حاجة اعمل ايه وأعيش ازاى من غيرها
فارس::أخيرا اتكلم..أنسة حور ما تقلقيش ان شاء الله مش هيجرالها حاجة وهتبقى كويسة
حلم::مش شايفة و لا سامعة فارس كل تركيزها ع مامتها
وشوية و رجع أدهم معاه بنت و متنرفز منها جدا وبصلها
أدهم::عاليا..هاتيلى كارنيه النقابة لو سمحتى من محفظتى
عاليا::بغيظ منه..هو كل حاجة عاليا عاليا
فارس::ايه الحكاية يا أدهم.
أدهم:: وهو بيجهز الحقنة علشان يعالج أمينة و يعلقلها المحاليل..الاستاذة مش مصدقة انى دكتور ولازم تيجى بنفسها تشوف الكارنيه
فارس::نعم و ده ليه ان شاء الله
أمل::عشان يا استاذ العلاج اللى حضرته عايزه نازل جدول و ممنوع صرفه من غير أذن الدكتور
أدهم::بغيظ منها بعد ما ركّب المحاليل لـ خالته..هى البعيدة غبية مانا بقول انى زفت دكتور
امل::ع فكرة بقى دى مش اخلاق دكتور..و عموما خلاص مش عايزة كارنيهات عن أذنكم
أدهم::أوووف بنت مستفزة..انا ماشوفتش كدا
حلم::طمنى يا أدهم أرجوك
أدهم::ماتقلقيش بمجرد ما تخلص المحاليل هتبقى زى الفل ان شاء الله المهم لحقنها فـ وقتها..بس قوليلى هى البنت اللى كانت هنا دى مجنونة ولا حاجة ولا ده نظام الصيدليات عندكم
حلم::بشبح أبتسامة..مافيش منه الكلام ده..صحيح بيكون فى صعوبة فـ نوعية بعض الادوية بس طالما بالروشتة خلاص بيبقى سهل
أدهم:: يبقى البنت دى اكيد مجنونة
حلم::ممكن علشان انت ماكتبتش روشتة..وانت عايز العلاج بسرعة ده شككها فيك
فارس::بتأكيد..انسة حور بتتكلم صح..انت كنت متوتر ومتصربع وكمان ماكتبتش روشتة طبيعى يكون ده رد فعلها
حلم::أخيرا انتبهت لـ فارس..بس ماتكلمتش
شوية وخلصت المحاليل اللى علقها أدهم لـ أمينة وطلعوا كلهم بعدها قعدو فـ الليڤنج ورن جرس الباب وفتحت
فاتن::سي الاستاذ هشام حمد الله ع السلامة
عزة::اسمه هشام بيه ثم ايه حمد الله ع السلامة دى هو كان مسافر
حلم::ببرود..أعملى حاجة للضيوف يا فاتن
فاتن::بصت لها و فاهمة تقصد ايه..حاضر يا انسة حور
حلم::بهدوء ماقبل العاصفة.. هشام بيه اهلا اهلا يادى النور وكمان عزة هانم ده النهاردة عيد يا ولاد
هشام::انتى بتتريقى يا حور
حلم::بصت لـ أخوها وغمضت عينها بتحاول تهدى نفسها
فارس::متابعها وحاسس ان فى حاجة غلط
عزة::بخبث..مش تعرفينا يا حور ع ضيوفك وياترى مين فيهم بقى المبجل صاحب السمو
حلم::ببرود..مايخصكيش يا عزة
هشام::بزعيق..ما يخصهاش ازاااى لااازم اعرررف الهانم اللى الشباب طالعة داخلة ع بيتها دى بتعمل ايه بالظبط
حلم::أخرس قطع لسانك ع لسانها..انت جاى لييه
نجوى::أهدى يابنتى..مامتك لسة تعبانة ما ينفعش كدا
حلم::مش سامعة يا خالتو بيقولوا ايه هو ومراته يعنى لا منهم ولا كفاية شرهم
هشام::انتى شكلك عايزة تتربى من اول و جديد شكل قاعدتك لوحدك فـ المزرعة خليتك واحدة سهلة ورخيصة
فارس::بغيظ منه..اعتقد كدا انت زودتها اوى داخل تقل أدبك انت واللى معاك ومش عاملين احترام لصاحبة البيت ولا الست الكبيرة اللى راقدة عيانة جوة
هشام::وانت مين بقى ولا رقم كام يا باشا
حلم::بغضب..ضربت هشام بكل قوتها بالقلم..سألتك جاى ليه واعتقد انت جاوبت يبقى اتفضل من هنا اطلع برة انت والهانم بتاعتك
عزة::لما يبقى ملكك ياحبيبتى تبقى اطرديه منه..ده بيت أبوه زى ما هو بيت أبوكى
حلم:: ههههههههه مين ضحك عليكى وقالك كدا؟..هو صح؟..مسكينة يا مرات اخويا..البيت ده بيتى انا بفلوسى وتعبى وشقايا انا..أخويا باع نصيبه من زمان وبصت لـ أخوها ولا نسيت يا استاذ يا محترم
أدهم::حور لو سمحتى ممكن تهدى..طنط أمينة تعبانة واخدت حقنة مهدئ علشان تنام..ياريت بلاش صوت عالى علشان ماتسمعش وتنفعل تانى وبص لـ هشام بغيظ علشان ما يحصلهاش انتكاسة
عزة:: ممكن أعرف البهوات اللى بهدوم البيت دول يبقوا مين
حلم::وانتى مالك؟
عزة::لسة هترفع ايدها تضرب حلم بالقلم
حلم::بحركة سريعة مسكت ايد عزة ولويتها وراها وبكل قوة.. ماعاش ولا كان اللى يفكر يرفع ايده على حلم الرشيدي
فارس ::………؟؟
أدهم::نعععععم بتقولى ميييين؟؟

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية العشق الأبدي)