رواية أحفاد البارون 3 الفصل السادس والعشرون 26 بقلم إيمان جمال
رواية أحفاد البارون 3 الفصل السادس والعشرون 26 بقلم إيمان جمال
رواية أحفاد البارون 3 البارت السادس والعشرون
رواية أحفاد البارون 3 الجزء السادس والعشرون
رواية أحفاد البارون 3 الحلقة السادسة والعشرون
سمر فضلت قاعدة مكانها لحد ماجه وقت انها تمشي عشان حفلة عيد الميلاد وعاليا دخلتلها
عاليا: يلا يابنتي
سمر: ادخلي استأذني منه
عاليا: هو انا اللي صاحبة الحفلة
سمر بضيق: مش عاوزة ادخله
عاليا بصتلها بشك: ليه؟!
سمر: مافيش انا هقوم اهو
سمر قامت ووقفت ادام الباب ومترددة انها تخبط بس اتشجعت وخبطت ودخلت وهو قاعد مكانه
سامر: في حاجة؟
سمر بتتكلم بتوتر ومش بتبصله: ممكن امشي؟
سامر: ليه؟
سمر: عشان حفلة عيد ميلاد ابن اختي
سامر قام وراح وقف ادامها: وعشان كدا بقى متشيكة ؟
سمر ماردتش عليه وهو رفع وشها بإيده وعينهم اتقابلوا…..سامر: ماتبعديش عينك عني تاني
سمر بتبصله بتوهان لا هي عارفة انه فعلاً حبها ولا هي قادرة تقوله بحبك عشان لسة خايفة
سامر: انا اسف عاللي حصل
سمر بصت بعيد عنه: ماتعملهاش تاني
سامر قرب منها بهدوء: ما اوعدكيش عشان ساعتها هتكوني مراتي
سمر اتوترت واتكسفت وهو مسك ايديها وباسها في كف ايديها من جوا: مين رايح معاكي؟
سمر بتوتر: عاليا راحة معايا
سامر: محدش تاني؟
سمر: تقصد مين؟
سامر: اقصد ذي جواد او ذياد
سمر: جواد اصلا مايعرفش وذياد هيروح هو وخطيبته
سامر: هو خطب؟
سمر: ايوا
سامر لسة هيتكلم بس عاليا خبطت ودخلت
عاليا: مستر جواد بارة
سامر بص لسمر وبص لعاليا: دخليه
عاليا خرجت وجواد دخل…… جواد: عاملين ايه؟
سامر: تمام، ايه سر الزيارة
جواد: عادي اصل انا رايح عيد ميلاد ابن اخت سمر فقولت اجي اخدها وانا رايح
سامر بص لسمر وسابهم وراح قعد مكانه: تمام تقدروا تمشوا
جواد بص لسمر: يلا؟
سمر بصتله وبصت لسامر: طب ممكن تسبقني بس على تحت
جواد بص لسامر وبصلها: ماشي
جواد نزل وهي فضلت واقفة: انا معرفش انه رايح
سامر: عادي
سمر قربت من المكتب: والله ماكنت اعرف
سامر بصلها واتكلم بحزن: عادي ياسمر، ماهو له الحق يعمل اللي هو عاوزه عشان بيحبك
سمر لسة هترد بس سامر قاطعها: روحي عشان ماتتأخريش على معادك
سمر بتوتر: بس انا مش عاوزاك تكون زعلان
سامر بصلها بهدوء رهيب: عادي
سمر: لو مش عاوزني اروح معاه مش هروح
سامر قام من مكانه تاني ووقف ادامها: يعني لو قولت ماتروحيش معاه هتعملي كدا؟
سمر بتوتر: ايوا
سامر رفع وشها وهي بصتله: ليه؟
سمر متوترة اوي: عشان انت عاوز كدا
سامر: ايوا ليه باردوا؟
سمر معرفتش ترد وهو ابتسم: طب روحي معاه عشان ماتركبوش مع حد مانعرفوش
سمر: يعني مش هتكون زعلان؟
سامر قرب من ودانها واتكلم بصوت واطي وكله حب: انا مش هبقى زعلان بس هكون غيران عليكي وانتي معاه
سمر فرحت اووي وبصتله: تعالى معايا
سامر: نفسي بجد بس سامي هيضايق، روحي وانا هتصرف معاه بس عاوز اخد الموافقة منك انتي
سمر لسة هترد بس عمر دخل
سامر بصله بغضب: نعم
عمر ضحك: في ايه؟
سمر بصت لسامر: عن اذن حضرتك
سمر خرجت وسامر مضايق….عمر: في ايه؟
سامر: كانت لسة هتقول ياعمر كان لازم تيجي دلوقتي
عمر ضحك: اهو حظك بقا
سمر نزلت هي وعاليا وجواد كان مستنيهم في العربية وقبل مايركبوا هي اخدت بالها ان سامر بيبص عليهم من فوق
سمر: عاليا ممكن انتي تركبي جمب جواد؟
عاليا: ليه؟
سمر: مش عاوزة اركب جمبه
عاليا: ماشي
عاليا ركبت جمب جواد اللي استغرب التصرف دا وسمر ركبت في الكرسي الخلفي وسامر فرح اووووي لما هي عملت كدا ورن عليها وهي ردت
سمر: الو
سامر: انا بحبك اوي ياسمر
سمر فرحت اوي لانها حست بإنه فعلاً صادق: طب ممكن نتكلم بعدين؟
سامر: حاضر
سمر قفلت وكانت سعيدة اوي وطول الطريق عاوزة تبعتله رسالة تقوله انها بتحبه بس كل ماتكتب الرسالة ترجع تمسحها بس قالت بعد الحفلة
وصلت الحفلة بس قبل ماتدخل جواد وقفها
جواد: اختارتي مين؟
سمر بصتله وابتسمت: اختارته ياجواد
جواد رغم انه زعل بس ابتسم: كنت متأكد
سمر: هو فعلاً بيحبني بجد
جواد: ربنا يسعدكم
الحفلة فضلت ساعات لحد اخر اليوم وسمر انشغلت بيها أوي
في الڤيلا، الشباب قاعدين سوا والبنات بيجهزوا العشا
امير بص لسيد: البطيخة بتاعتك هتولد امتى؟
سيد ضحك: هانت اهي خلاص
باسم بص لعمر: وبطيختك امتى
عمر ضحك اوي: بعد بطيخة سيد
أيهم: وانا بطيختي بعدكم
ليث ضحك: هفرح فيكم اوي
مهاب بص لسامر السرحان: ايه ياسامر سرحان في ايه
سامر بصله: انا عاوز اخطب
سيد بحماس: وأخيرا
اكمل: سمر؟
سامر: ايوا
وهما بيتكلموا دخل معاذ وقعد معاهم بسرعة: عاوز حد يلحقني
ليث: في ايه؟
معاذ: ريما شكة في سفر عمو عماد وانا خلاص مبقتش عارف اقولها ايه
اكمل: خلاص هما نازلين بكرة فهتعرف منه
معاذ بخوف: الله يطمنك دا انا كدا هموت
أيهم ضحك: ياعيني عالرجالة
في اللحظة دي دخل مروان وقعد معاهم وباين على وشه الخوف
سيد: في ايه مالك انت كمان
مروان: ديما عرفت بمرض ابوها
أيهم بصله بشك: ومين قالها؟
مروان بصله بتوتر: انا
ليث بغضب: مابتمسكش نفسك أبداً
مروان: اهو اللي حصل بقى ياليث، كنت بكلمهم وهي سمعتني ومعرفتش اكدب اكتر من كدا
معاذ: طب ماهي كدا هتقول لريما
مروان: لا ماتقلقش انا فهمتها انها متعرفش وهي وعدتني انها مش هتقول حاجة وكمان هي جات النهاردة هنا عشان عرفت برجوعهم من السفر بكرة
سامر ماسك تليفونه وكأنه مستني سمر ترن والوقت بيمر وهي مارنتش
عمر طبعاً قاعد جمبه وبيتكلم بصوت واطي: قوم كلمها
سامر: متردد
عمر: قوم ياسامر
سامر قام وساب الشباب وخرج الجنينة ورن على سمر مرة بس هي ماردتش لانها كانت في الحمام، وهو قال مش هيرن تاني طالما هي ماردتش ودخل قعد مع الشباب تاني
سمر خرجت من الحمام وخرجت قعدت مع اختها وسابت تليفونها ذي ماهو، سامر فضل مستنيها ترن وحس انه غلط انه رن والساعة 12 بالليل وسمر كانت سهرانة مع اختها في البلكونة
سها: انتي مش عندك شغل الصبح
سمر ضحكت: اه بس مش جايلي نوم
سها: هي الساعة كام دلوقتي
سمر: انا تليفوني جوا استني هروح اجيبه
سمر قامت دخلت اوضتها واخدت تليفونها وشافت ان سامر رن عليها وخرجت تاني لأختها
سمر: دا سامر رانن عليا
سها قامت وضحكت: طب شوفي عاوز منك ايه
سها دخلت وسابتها وسمر كانت مترددة ترن عشان الوقت اتأخر فقالت هتبعت رسالة الاول على الواتس تشوفه صاحي ولا وبعتتله فعلا رسالة بتقوله فيها (صاحي؟)
سامر في الوقت دا كان واقف في بلكونة اوضته بيبص للسما وسمع صوت الرسالة وفتحها وشافها وابتسم ورن عليها
سمر: الو
سامر: الو
سمر: انا ماشفتش المكالمة غير دلوقتي
سامر بهدوء: ما انتي انشغلتي عني النهاردة
سمر ابتسمت: هو بس اليوم كان طويل ورجعنا الساعة 7
سامر: جواد فضل لحد اخر الحفلة؟
سمر: لا
سامر: تمام وذياد؟
سمر: ذياد مشي معانا في الاخر لانه صاحب سامي
سامر: وكان قاعد مع مين؟
سمر فرحانة انه غيران عليها: ما اخدتش بالي لان كنت واقفة مع سها وفاروق
وهما بيتكلموا دخل ليث الاوضة ووقف ورا سامر
ليث: بتكلم مين
سامر اتخض وبصله: ياشيخ حرام عليك خضتني
ليث بتريقة: ايه ياحلوة اتخضيتي
سمر لسة معاه على التليفون….سامر ضحك: بلاش رخامة بقا الله يسترك
ليث بصله وغمزله: ليه بتكلم مين؟
سامر ضحك اوي: يلا ياليث روح نام
ليث اتكلم بصوت عالي عشان يسمع سمر: طب ابقى قولها تنام بدري عشان عندها شغل الصبح
ليث سابه ومشي وسامر بيضحك بصوت
سمر لأول مرة تسمع ضحكته بالشكل دا وقالتله بتلقائية: اول مرة اسمعك بتضحك كدا
سامر: حقك عليا ان انا كنت دايما قاسي معاكي
سمر: عشان ماكنتش شايفني ياسامر
سامر: انا بحبك ياسمر وعاوزك معايا موافقة؟
سمر: سامر
سامر: ياقلب سامر
سمر: بحبك
سمر قالت الكلمة وسكتت خالص من كسوفها
سامر: انتي قولتي ايه؟
سمر بتوتر: انت سمعتها
سامر: وايه يعني لما اسمعها تاني
سمر: هي مرة وخلاص ها
سامر ابتسم: بس انا هعتبر نفسي ما اسمعتهاش
سمر: ليه؟
سامر: عشان لازم اسمعها منك وانتي ادامي
سمر: لالالالالا
سامر بزعل: يعني مش هتقوليها وانا ادامك
سمر بكسوف: لا
سامر فعلاً زعل وسكت وهي حست بدا بس هي فعلاً هتتكسف
سمر: سامر
سامر: نعم؟
سمر: سكت ليه؟
سامر: أبداً مافيش
سمر: هتنام؟
سامر: ايوا
سمر زعلت بس هو فعلاً زعل: طب تصبح على خير
سامر قفل معاها من غير حتى مايرد وقعد مضايق جداً لحد ما نام
تاني يوم الصبح، كلهم صحيوا عشان الفطار ويروحوا الشركة والمفروض الفهد والباقيين يرجعوا
فهد الصغير بيتكلم مع ابوه: جده راجع النهاردة؟
ليث: ايوا ياحبيبي
نوح: وحثني (وحشني) اوي
اكمل ضحك: ماتقلقوش شوية وهتلاقوه هنا ان شاء الله
سامر صحي وغير هدومه وصلى ركعتين الصبح وخرج من اوضته ومزاجه مكانش حلو واتقابل في قصي وهو داخل الڤيلا
قصي: صباح الخير ياعمو
سامر ابتسم: صباح الخير ياحبيبي
سامر دخل على اوضة السفرة وكلهم متجمعين
ليث: في اجتماع النهاردة لازم كلنا نحضره
عمر: مع مين؟
ليث: مع شركة الجواد
أكمل: طبعاً دا الاجتماع اللي هنتفق فيه على كل حاجة؟
ليث: ايوا
أيهم بص لسامر اللي بيفطر في هدوء: شايفك هادي يعني ياسامر
سامر بصله: ايوا يعني اقوم اشد في شعري مثلا
مهاب: في ايه ياسامر مالك؟
سامر قام وساب الفطار: مافيش انا رايح الشركة…… وبص لعمر: رايح معايا؟
عمر قام: اكيد
خرجوا سوا والباقيين لسة قاعدين
ديما بصت لليث: انا حقيقي زعلانة منك
ريما بإستغراب: ليه ياديما؟!
ديما اتكلمت بهدوء وحذر عشان اختها ماتحسش بحاجة: أبداً مافيش عشان رخامته عليا
ليث قام وبصلها: رخامتي دي كانت لازم وخدي بالك كويس لحد مايرجعوا ياديما
الشباب قاموا واحد ورا التاني عشان كل واحد فيهم يروح شغله
في الطريق سامر سايق العربية وباين عليه انه مضايق
عمر: حصل ايه ياسامر؟
سامر بغضب: اخيرا قالتلي امبارح انها بتحبني بس هي رافضة تقولها ليا ادامي
عمر بهدوء: طب ماهي اكيد مكسوفة
سامر بعصبية: وليه تقولها من الاول هي حسستني امبارح اني بشحتها منها
عمر ضحك غصب عنه: هو انت بجد مضايق من كدا؟
سامر بصله بغضب: اقسم بالله هتتريق هنزلك هنا
عمر: خلاص هسكت خالص
بعد شوية وصلوا الشركة بس كان في الفرع التاني وماوصلش مكتبه وسمر كانت قاعدة مستنياه وعرفت من عاليا انه في الفرع التاني في مكتبه وراحت هناك وخبطت على الباب ودخلت وهو شافها داخلة بس مافيش اي ردة فعل منه
سمر: انت هنا ليه؟
سامر ببرود: عادي
سمر: عادي ازاي مش انت مكان الفهد هناك؟
سامر بصلها اوي: انا حابب اكون هنا النهاردة
سمر: طب ليه مكلمتنيش ان اكون هنا
سامر: مش يمكن عاوز اكون لوحدي
سمر اتفاجأت من رده وزعلت اوي: متأسفة
سمر لسة هتخرج بس سامر وقفها: استني
سمر وقفت وعنيها في الارض وهو قام من مكانه ووقف ادامها: في شوية ورق في درج المكتب التاني ياريت تبعتيه مع اي حد
سمر رفعت وشها وعنيهم اتقابلوا وعنيها كلها دموع: اي اوامر تانية؟
سامر: لا
سمر خرجت وسابته واول ماخرجت سمحت لدموعها تنزل بس قبل ماتمشي من ادام باب المكتب هو خرج بسرعة ودخلها المكتب تاني
سمر بصتله من غير اي كلام وهو زعل من نفسه انه خلاها تعيط ومسح دموعها: بتعيطي ليه؟
سمر بإنهيار: عشان انت مش عاوز تشوفني
سامر ابتسم: عشان انا زعلان منك
سمر: ليه انا عملت ايه؟
سامر: انتي عارفة عملتي ايه
سمر بصتله بكسوف: انا مش هعرف اقولها
سامر بيقرب منها: ليه؟
سمر بتبعد: كدا
سامر بيقرب اكتر وهي بتبعد لحد ماكان وراها الحيطة…..سامر: هتهربي مني تروحي فين؟
سمر بكسوف واضح: بحبك
سامر غمض عنيه وابتسم وبصلها: ماسمعتش
سمر بغضب: لا بقى
سامر بيقرب من وشها: من حقي اسمعها كتير
سمر مش عارفة تتكلم من كتر كسوفها ومتوترة من قربه ليها ولسة هتبعد تليفونها رن وكان جواد وسامر شاف اسمه
سمر بصتله بتوتر: انا قولتله اني اختارتك
سامر: وبيرن ليه؟
سمر: مش عارفة
سامر: طب ردي
سمر ردت بس قصدت تفتح الاسبيكر: الو
جواد: انتي فين؟
سمر: في الشركة
جواد: انا في المكتب بتاعك مش لاقيكي ولا كمان سامر
سمر: احنا في الفرع التاني
جواد: تمام
سمر: شوية وهنيجي
جواد: ماشي
جواد قفل وهي بصت لسامر واتكلمت بحب وكسوف: انا اختارتك انت ياسامر عشان بحبك
سامر: اعمليله بلوك
سمر ضحكت: طب والشغل بقى
سامر قرب اكتر: انتي هتبقي زوجة سامر البارون وبس يعني ملكي انا ومافيش شغل خالص وهغيرلك الرقم دا تاني
سمر بتبصله بحب وهو بيقرب اكتر وعاوز يبوسها بس هي منعته….سمر بصتله: انت عملتها مرة وانا زعلت منك بس همنعك المرادي
سامر ابتسم: بس لما تكوني مراتي مش هتقدري تمنعيني
سمر بصت للأرض واتكلمت بكسوف: ساعتها هكون ملكك
سامر رفع وشها: انتي ملكي من دلوقتي ياسمر انا رايح لسامي
سمر: بجد؟
سامر: اه هاتيلي عنوان شغله وانا هنزل دلوقتي اروحله
سمر: طب والاجتماع؟
سامر: هما يحضروه
سمر بخبث: طب وجواد؟
سامر بصلها برفع حاجب: وبعدين بقا
سمر ضحكت: ماهو انت هتمشي وهو هيحضر الاجتماع وبكدا هيجي يتكلم معايا
سامر قرب منها اكتر: انا واثق فيكي وعارف انك مش هتسمحيله يتعدى حدوده معاكي
سامر عاوز باردوا يبوسها ومش قادر يمنع نفسه عنها
في اللحظة دي الفهد وصل الشركة لان قرر يروح الشركة بعد وصوله المطار وقرر يروح لسامر يشوفه الاول
سامر بيبص لسمر اوي: مش قادر
سامر باسها بوسة بحب وشوق ورقة وهنا بقى الباب اتفتح وكان الفهد طبعاً والاتنين بعدوا عن بعض بسرعة وواقفين متوترين
الفهد بصلهم بغضب: ايه اللي بيحصل هنا دا
سامر مش عارف يرد يقول ايه وسمر بتتمنى الارض تنشق وتبلعها
الفهد بعصبية وصوت عالي: ماتردوا عليا
سامر رد: انا هفهم حضرتك
الفهد بغضب: تفهمني ايه وزفت ايه، دي شركة محترمة مايحصلش فيها الكلام دا
سمر مقدرتش تتماسك واغمى عليها وسامر جري عليها بسرعة والفهد خرج وسابه يتصرف هو وقرر يروح لعمر وفي اللحظة دي روان وصلت عند عمر عشان هتروح للدكتورة وحبت تعدي عليه وباردوا واقفين ادام بعض في موقف رومانسي وعمر بيبوسها😂 والفهد دخل والاتنين اتخضوا وروان وقفت ورا عمر
الفهد بغضب: هو في ايه، هو انا كل ما ادخل على حد الاقيه بيبوس واحدة
عمر غصب عنه ضحك: قفشت مين غيري
الفهد بصله وضحك: صاحبك وحبيبك
عمر بصدمة: اوبا وعملت ايه طيب
الفهد: ولا حاجة اتعصبت عليهم…..الفهد بص لروان اللي واقفة ورا عمر: احمدي ربنا انك مراته كان زمانك شفتي طريقة تانية
روان ضحكت: سامحنا ياعمو، وسامح سامر باردوا
الفهد بخبث: لا دا بقى لازم اعلمه الادب
سامر بيفوق سمر وهي أخيراً فاقت وبصتله بدموع وانهيار وبتحاول تبعد عنه
سامر: استني بس ياسمر
سمر بإنهيار: استنى ايه اكتر من كدا انا قولتلك لا وانت باردوا عملت اللي في دماغك والنتيجة كانت اني اتهانت
سامر: انا عمري ما اقدر اهينك ولا اتسبب في دا
سمر بغضب: وتسمي اللي حصل دا ايه
سامر سكت ومعرفش يرد عليها بس الفهد دخل وهو اللي رد عليها
الفهد: تسميه قرصة ودن ليكم انتو الاتنين عشان تفوقوا
سمر وقفت ورا سامر تتحامى فيه من كسوفها ودا فرّح سامر اوي….سامر: بعد اذن حضرتك ياعمي كلامك معايا انا مش معاها عشان انا السبب
الفهد: انت حسابك معايا بعدين بس لما نرجع الڤيلا …..وبص لسمر: امال انتي بقى تتفضلي تقدمي استقالتك
سمر بصتله بصدمة ودموع……سامر: اسمعني بس ياعمي
الفهد بصله: اللي قولته يتنفذ ومحدش يراجعني فيه
الفهد سابهم واتحرك عند الباب ورجع بص لسمر: ماهو مش معقول مرات سامر البارون هتفضل سكرتيرته
سمر بصتله بدموع صدمة معاها فرحة…..سامر بغضب: حرام عليك والله بالمقالب اللي حضرتك بتعملها فينا كل شوية دي
الفهد بصلهم وغمزلهم: اتلموا بقى شوية لحد ماتتلموا وتتجوزوا مش كل شوية هقفش حد في وضع مخل
الفهد خرج وسابهم وسمر واقفة مش مصدقه اللي هي سمعته وسامر مسحلها دموعها: يلا عشان اوصلك للبيت وانا هروح لسامي
سمر بصتله بحب: انا بحبك اوي
سامر بغيظ: يلا ادامي عشان شوية والفهد هيرجع يقفشنا تاني
في القصر بعد رجوع الكبار، هاجر قاعدة في اوضة لوحدها وعماد راح لأوضتها بس هو لسة تعبان وخبط وهي قامت فتحت
هاجر: نعم؟
عماد: هتسبيني واقف على الباب كدا؟
هاجر دخلت الاوضة وهو دخل وقفل الباب
هاجر: بعد اذنك افتح الباب
عماد بصلها بحزن وفتح الباب تاني وراح قعد على اقرب كرسي: هتفضلي كدا لحد امتى؟
هاجر: انا مصممة على رأيي
عماد بزعل: لآخر مرة ياهاجر بسألك انتي عاوزانا نطلق وصدقيني اللي هتقولي عليه انا هنفذه
هاجر بتعاند نفسها وفي نفس الوقت رافضة الفكرة بس ردت وقالتله: ايوا مصممة
عماد وقف وبصلها: تمام ياهاجر المأذون هيكون هنا الليلادي
عماد بيتحرك للباب بس حس انه دايخ وسند على الكرسي وهاجر جريت عليه قلقانة: عماد انت كويس
عماد بصلها وفجأة اغمى عليه وهاجر قعدت تصرخ وكل اللي في القصر اتجمعوا في الاوضه والادهم كان هنا لان الفهد هو اللي راح الشركة بس، وشريف بيكشف عليه وبيقيس الضغط وكان واطي
شريف: ضغطه واطي حد يعمله اي حاجة ياكلها….شريف بص لهاجر: وياريت محدش يضايقه لانه لسة تعبان
هاجر واقفة بتعيط وليل واقفة جمبها: خلي بالك منه ياهاجر
هاجر بإنهيار: انا السبب في كل دا
ملك: اهدي ياهاجر
نور: يلا ياجماعة نسيبها معاه شوية
ليل والباقيين خرجوا ومعاهم الرجالة وهاجر فضلت واقفة جمب السرير وعماد فايق بس مش بيبصلها
هاجر بتعيط: انا اسفه
عماد بصلها من غير اي كلام…..هاجر: انا السبب في كل دا
عماد بهدوء: ليه مش دا قرارك؟
هاجر قعدت جمبه: قرار في وقت زعل
عماد: يعني ايه؟
هاجر: يعني انا مقدرش اعيش من غيرك ولا هقدر ابعد عنك
ديما في اللحظة دي دخلت ووقفت ادامهم: ممكن بقى افهم انتوا ليه خبيتوا عننا اللي حصل؟
عماد بتوتر: هو ايه اللي حصل؟
ديما: بلاش كدا يابابا عشان انا عرفت كل حاجة وزعلانة منك اوي
عماد ضحك: لا بقولك ايه كفايه زعل امك مني
ديما بحزن: لا يابابا بجد زعلانة عشان تخبي علينا انك تعبان بالمرض دا
عماد: ماكنتش حابب اقلقكم
ريما هنا بقى دخلت وكانوا فاكرين انها عارفة اللي حصل
عماد بصلها: ابوس ايدك انتي كمان ماتقولي انك زعلانة مني بسبب ان خبيت عليكوا مرضي بالسرطان
ريما بصتله بصدمة: سرطان؟
ديما بصتله: ريما مكانتش تعرف يابابا
ريما بصت لأختها بدموع: يعني انتي كنتي عارفة حاجة ذي دي وخبيتي عني؟
ديما: والله انا لسة عارفة امبارح حقك عليا
ريما بإنهيار: وليه معرفتنيش، انا اصلا كنت شكة في السفر اللي جه فجأة دا
هاجر: اهدي ياحبيبتي بابا الحمدلله كويس وعمل العملية ونجحت
ريما: ولو لا قدر الله كان حصله حاجة ساعتها كنت انا هعمل ايه بكلامكم دا
عماد: والله انا كويس وادامكم اهو اهدي بقى
البنات قعدوا جمب ابوهم واخدهم في حضنه والاتنين بيعيطوا جامد وبيحضّنوا عليه كأنه هيهرب
سامر وصّل سمر البيت وراح للشركة اللي بيشتغل فيها سامي وطلع وسأل على مكتبه وعرف مكانه وراحله، سامي كان في مكتبه وطبعاً هو في ال (إتش آر) وكل المكاتب في قاعة كبيرة جمب بعض
وسامر وقف قصاده: ممكن نتكلم شوية؟
سامي بصله: انت عرفت المكان هنا ازاي؟
سامر: اكيد عارف الاجابة
ذياد شاف سامر موجود وراح عندهم: اهلا سامر
سامر: اذيك ياذياد
ذياد: الحمدلله، نورت الشركة
سامر: متشكر
ذياد بصلهم: طب هسيبكم شوية
سامر: لا استنى ياذياد انا محتاجك تكون موجود
سامي وقف: تعالوا ننزل الكافتيريا
نزلوا الكافتيريا وقعدوا سوا على الترابيزة
سامي: اتفضل اتكلم انا سامعك
سامر: انا جاي اقولك ان بحب سمر وعاوزها بجد
سامي: وبعدين؟
سامر: وبعدين دي بقى عندك، انا جاي عشان اخد منك معاد ان اجيب اهلي واجي اتقدملها
سامي: وانا مش موافق
ذياد: ماخلاص بقى ياسامي وافق
سامر: طب ممكن اعرف انت ليه رافض؟
سامي: عشان انت مش بتحبها
سامر اتكلم بكل حب وصدق: والله بحبها، انا عارف ان كنت قاسي اوي معاها وان ماكنتش شايفها ذي ماهي شايفاني بس انا بجد بحبها وجاي دلوقتي اقولك انا عاوز اتجوزها
سامي وقف: وانا باردوا مش موافق
سامر وقف ادامه واتكلم بحزن: انت قولتلي قبل كدا انك رافض بسبب اني ماكنتش بحبها بس انا دلوقتي بعشقها مش بس بحبها، وانا النهاردة جيتلك عشان اتكلم معاك وتفهمني
سامي: انت اناني ومتكبر ومش بتحب غير نفسك وبس
سامر بصله بحزن واضح وخرّج الكارت بتاعه من جيبه وحطه على الترابيزة: انا عمري ماكنت اناني يمكن فعلاً كنت متكبر بس معاها هي واحد تاني وحبي ليها هو اللي غيرني، دا الكارت بتاعي مستني ردك عليا بس حتى لو بالرفض فأنا باردوا هاخدها
سامر سابه ومشي وذياد واقف يغلّطه ويلومه على اللي عمله
ذياد: ليه كدا ياسامي؟
سامي: كنت عاوز اشوف حبه ليها
ذياد: ها وشفت؟
سامي: ايوا ياذياد، سامر المرادي جاي وهو فعلاً بيحبها وعاوزها
ذياد: طب ليه باردوا صممت على رأيك؟
سامي: عشان اخرّج كل الكلام اللي جواه وانا دلوقتي هجوزهاله وانا مطمن
سامر محبش يرن على سمر ولا يقلقها بس هي رنت عليه وهو مكانش عاوز يرد بس هو لو ماردش هيقلقها اكتر
سامر: الو
سمر: طمني عملت ايه؟
سامر رد عليها بس بالكدب: قالي هيفكر ويرد عليا
سمر: يعني حسيت من كلامه بإيه؟
سامر: مش عارف
سمر: ماتقلقش طالما قال هيفكر يبقى هيوافق
سامر بيكلم نفسه من غير صوت: يارب فعلاً يوافق
في المساء في البيت عند سمر، قاعدين بيتفرجوا على التليفزيون وسمر مستنية تشوف سامي هيقول ايه
سامي: سامر جالي الشركة النهاردة
سهى بصتله: بجد؟
سامي بص على سمر: ايوا
سهى: طب ليه؟
سامي: بيتقدم لسمر
سهى بفرحة: طب انت قولتله ايه؟
سامي: قولتله لا
سمر اتكلمت: لا ازاي انت مش قولتله انك هتفكر وترد عليه؟
سامي: هو بقى اللي قالك كدا؟
سمر: ايوا
سامي: لا ياسمر انا ماقولتش كدا بس باللي هو عمله دا فهو كبر في نظري اكتر، لان اللي انا قولته اني رافض الجوازة دي ومش عاوزه ليكي بس هو قالي انه مستني ردي ولو حتى انا فضلت رافض باردوا هيتجوزك
سمر بصتله بدموع: يعني افهم من كدا انك موافق؟
سامي ابتسم: ايوا ياسمر
سمر: طب ممكن اعمل حاجة
سامي: حاجة ايه؟
سمر قامت حضنته لانها هي عنده اخته الصغيرة وهو اللي مربيها رغم انه مش كبير في السن بس هي عاشت معاهم، هو حضنها بحنان اخ كبير: ربنا يخليك ليا يا احسن اخ في الدنيا
سامي: كبرتي وبقيتي عروسة
سمر حضنت اختها وفرحانة اوي وبصتلهم: انا هكلمه افرحه بقى
سامي: قوليله اني مستنيه بكرة هو وأهله
سمر: حاضر
سمر دخلت اوضتها ورنت على سامر اللي رد عليها
سمر: جهز نفسك بكرة انت واهلك
سامر: انتي بتتكلمي بجد؟
سمر: اه والله
سامر: انا اسعد انسان في الدنيا الليلة يلا بقى سلام دلوقتي عشان اروح اقولهم
سامر قفل معاها ونزل لأهله يعرفهم وكلهم كانوا متجمعين والبنات والشباب كمان
سامر: حلو اوي انكم كلكم هنا
اسلام: خير؟
سامر: انا خلاص قررت اخطب
مي بفرحة: بجد ياحبيبي
سامر: ايوا بجد
الفهد بصله: نويت خلاص؟
سامر ضحك: ايوا نويت اتلم بقى
الادهم: طب نويت على امتى؟
سامر: بكرة ان شاء الله انا اتكلمت مع جوز اختها واداني معاد بكرة
ليث: والله وهنفرح فيك
سامر ضحك: ماخلاص بقى
اسيل: مبروك ياحبيبي
سلمى: ايوا كدا خلينا نخلص منك
سامر ضحك اوي: ما انا قاعد على قلبكم ياحلوين
جاسر: كدا بقى هندور على سكرتيرة تانية ليك
سامر: لا انا هختار راجل مش بنت
الاكمل: دا مسيطرة من اولها
سامر: دا ايه الكسوف دا بقى
ناجي ضحك: سيبوه بقى كفاية عليه كدا
آسر: لا ازاي دا احنا ماصدقنا
عمر بصله: الا قولي ياسامر ياحبيبي انت هتتجوز طبعاً معانا في الڤيلا
سامر بصله بشك: ايوا اكيد
أيهم: طب حلو احنا بنقول بقى ليلة الفرح حابين نلعب معاك بوكس
سامر بصلهم بصدمة: الله يستركم دنيا وآخره انا عاوز ادخل دنيا مش ادخل اخرة
مهاب: اسمع مننا بس لازم نديك قوة كدا
سامر: لا ياسيدي انا متنازل عن القوة دي
سيد: ليه بس دا انت هتنبسط
سامر: لا شكرا مش عاوز
الفهد: اتصل بيه وعرفه اننا هنكون عندهم بكرة بعد المغرب، وطبعا كلنا عارفين مين اللي هيروح
الادهم ضحك: طبعاً انا وآيه وانت وليل وإسلام ومي وسامر وأسيل
ليث: لا وربنا مايحصل أبداً دا اخر العنقود وكمان اخر فرحة فينا يبقى نروح كلنا
الفهد: كدا مش هينفع ياليث
اكمل: يابابا مع احترامنا لوجهة نظرك بس احنا بجد فرحانين بسامر اوي وحابين كلنا نكون موجودين
سامر: ماتقلقش ياعمي انا هعرف سمر بكل دا وهفهم منها ايه ردهم
الجاسر: تمام شوف وعرفنا
سامر فعلا كان نفسه ياخد العيلة كلها وفي نفس الوقت هو مقتنع بوجهة نظر الفهد عشان يعني البيت ممكن مايكونش واسع وياخد كل العيلة بس البيت فعلاً واسع والفهد عارف كدا كويس بس باردوا ماشي بالمبادئ اللي رباهم عليها
سامر دخل اوضته وبيتكلم مع سمر
سامر: ممكن اخد رأيك في حاجة؟
سمر: اكيد ياحبيبي
سامر: هيكون في مانع لو العيلة كلها جات معايا؟
سمر: لا أبداً ياحبيبي
سامر: يعني سامي هيوافق؟
سمر: اكيد وبعدين ايه اللي مش هيخليه يوافق وبتاخد رأيي في حاجة ذي دي ليه دول اهلك
سامر: بصي ياسمر، الفهد ربانا على مبادئ وماشيين عليها من واحنا صغيريين، ذي مثلا يوم ماعمر اتقدم لروان العيلة كلها محضرتش اليوم دا اللي راح بس الفهد وطنط ليل والأدهم وطنط آيه وعمي آسر وطنط مريم وأمير اخو عمر ومراته شهد بس فالفهد عمل كدا عشان مانحرجش حد عشان العدد كبير والبيت كان صغير
سمر ابتسمت: تعرف ياسامر ان انا كل يوم بكتشف حاجة جديدة فيكم وبحبكم اوي بس بجد ياسامر تعالوا كلكم انا بجد هكون فرحانة بيكم
سامر ضحك: والله انتي حرة، بس انا باردوا هكلم سامي واتفق معاه
سمر: ماشي
سامر قفل معاها ورن على سامي ورد عليه
سامر: مناسب بكرة بعد المغرب؟
سامي ضحك: جرا ايه ياعريس مافيش مساء الخير حتى
سامر ضحك: معلش اعذرني بقى
سامي: ماشي ياعم مناسب
سامر: طب مناسب العيلة كلها تيجي؟
سامي: وفيها ايه؟
سامر بتوتر: اصل يعني العدد كبير
سامي ابتسم: ماتقلقش ياسامر
سامر بفرحة: هتلاقيني عندك في الميعاد
سامر قفل وكان فرحان ونزل يقعد مع الرجالة تحت والباقيين
الفهد بصله: بص بقا احنا هننتفق ان الجواز مش هيكون غير بعد ما البطيخ بتاعنا يولد
عمر ضحك: ايه ياعمو دا حضرتك عاوزه يستنى تمن شهور على ماهدى تولد
سامر: لا انا ممكن اوفق ان استنى روان وسلمى يولدوا لكن هدى لا كدا كتير
هدى ضحكت: خلاص يابابا خليه يتجوز بعد ولادة سلمى وروان
الادهم: موافقين بس عندنا شرط
مي بصتله بصدمة: شرط ايه يا ادهم اللي هتشرطوا لجواز ابني
الأكمل ضحك: قابل يامعلم
ناجي: انا بقول توافق من غير شروط احسنلك
الادهم بص لمي: هو شرط واحد بس
سامر: اللي هو ايه بقى؟
الادهم: ان من قبل الفرح بأسبوع ماتشوفش سمر
سامر بصدمة: نعمممم بقى عاوزني اقعد اسبوع من غير ما اشوفها لييه
عماد ضحك: هو ايه العذاب دا
ديما ضحكت: ايه بس ياخالو ادهم كدا الواد هيتجنن
سامر بصلها: اه والنبي ياديما يا اختي قوليله
ليل ضحكت اوي: كدا حرام
الفهد حط رجل على رجل: دا اللي عندنا
سامر بص لإسلام: ساكت ليه يابابا ماتقول حاجة
إسلام دور وشه بعيد عن ابنه: انا يا ابني مش مستغني عن نفسي انا من رأيي وافق
سامر: الله يسترك ياوالدي…..وبص لعمه آسر اللي مايختلفش عن ابوه تماماً: حتى انت ياعمو آسر
آسر بصله وضحك: ماهو لو احنا قولنا غير كدا هيتعمل فينا مصايب فوحياة ابوك مشي امورك خلي جوازتك تعدي
سامر بصلهم بغيظ وبص لأدهم: طب ولو قولت لا؟
الادهم: والله يبقى انت اللي اختارت وتستنى تمن شهور
سامر بص لليث: طب ماتلحقني
ليث بصله بتحدي: والله هما كدا اختاروا الصح
سامر بهدوء: طالما بقى اتفقتو عليا يبقى الشرط دا يتنفذ علينا كلنا
الفهد بصله واتكلم بغضب: نعم يا اخويا
سامر بصله بتحدي: والله يافهد باشا لو حضرتك رافض فأنا كمان رافض لان ذي ماحضرتك ماتقدرش تعدي يوم من غير ماتشوف طنط ليل يبقى انا كمان مقدرش اعدي يوم من غير ما اشوف سمر
الفهد وقف ادامه بتحدي: انت بتتحداني ياسامر
سامر بصله بتوتر: اه واذا كان حضرتك الفهد فإحنا تلاميذك
الفهد: ولو وافقت؟
سامر ضحك: بقى حضرتك هتقدر تعدي اسبوع كامل يعني سبع أيام بست ليالي من غير ماتشوف طنط ليل ولا حتى تكونوا في نفس الاوضة
الادهم بص للفهد وضحك: انا بقول تنسحب بكرامتك
الفهد بتحدي: موافق ياسامر
ملك بصدمة: معقولة يافهد؟
ليل بصت لفهد بهدوء: واللي يرجع في كلامه بقى؟
الفهد بصلها بتحدي: يبقى عيل
اكمل: هو حضرتك بتتكلم بجد يابابا؟
الفهد ايوا يا اكمل
ليل ضحكت….سارة بصتلها بإستغراب: هو انتي مش زعلانة؟
ليل: بالعكس انا مبسوطة عشان كدا الفرحة هتكون كبيرة وطالما هما هيعملوا كدا يبقى يابخت سامر ويابخت يومه بجد
آيه بصت للأدهم: وانت يادوما؟
الادهم وقف جمب الفهد وبصلها: ماهو انا مش هطلع عيل
ناجي: طب وهنكون فين في الاسبوع دا؟
الاكمل: اكيد احنا هنكون في القصر وهما في الڤيلا
معاذ ضحك: بالنسبة ليا انا معنديش اي مشكلة عشان هكون في شغلي وهحضر يوم الفرح
الفهد بصله بتحدي: وحياة امك لهتاخد اجازة يا ابن ناجي
معاذ ضحك: الله يسترك ياخالو بلاش انا
ريما ضحكت اوي: الله عليك ياخالو
عمر بص لسامر بغضب: يلا ياواطي
سامر بصله وضحك وطلعله لسانه: ماهو مش هيترخم عليا لوحدي
سمير ومرام دخلو بأولادهم
ناجي بص لسمير: اهلا بجوز بنتي الغالي
سمير ضحك: الترحيب دا وراه مصيبة
أيهم ضحك: ادامك تقريباً كدا خمس شهور او ست شهور وتقعد اسبوع من غير ماتشوف مراتك
سمير بصله بصدمة: نعم دا اللي هو ازاي؟
سيد بص للفهد بخبث: لا وخد عندك كمان ممنوع كلام في التليفون معاها
الفهد بصله بغضب: بتقول ايه انت
سيد ضحك: واخيرا الفهد اعترض على حاجة
الفهد قام من مكانه وبصلهم: ماتلعبوش معايا وخليكم في حالكم
الفهد اخد ليل وسابهم ومشي
ونيجي لليوم اللي كلنا مستنينه اخيرا😂😂
سامر صاحي من بدري وتقريبا كان صاحي الليل كله ، صحي ونزل من اوضته عشان يفطر وكلهم هيفطروا في القصر
الفهد شافه نازل: مش عوايدك يعني تصحى بدري
سامر قعد على السفرة وبصله وضحك: يومي بقى يا ابو الفهايد
ليث ضحك: امال لو النهاردة الفرح كنت عملت فينا ايه
سامر بصله: بلاش اقول اسيبكم تتفاجئوا
الفهد: يعني افهم من كدا انك مش رايح الشركة؟
سامر بتوتر: حضرتك ابو المفهومية بقا
الادهم ضحك: دا احنا هنشوف ايام عنب
الفهد محبش يضايقه النهاردة واخد الباقيين وراحو الشركة وسامر قاعد في القصر بيكلم سمر
سمر: انت مانزلتش الشركة؟
سامر ضحك: شركة مين بقى دا النهاردة يومنا
سمر ضحكت اوي: انت ليه بتتعامل انه يوم فرحنا دا كدا الفهد هينفخك
سامر بثقة: لا تقلقي الامور تحت السيطرة
سمر: اممم ماشي ها هتعمل ايه دلوقتي؟
سامر: ولا حاجة انا قاعد اهو بفكر انزل حمام السباحة شوية عشان الشاكوزي
سمر: هتروح النادي؟
سامر: نادي مين، لا بصي انا هفهمك القصر والڤيلا كل مكان فيهم فيه حمامين سباحة حمام خاص بالبنات وحمام خاص بالشباب وكل حمام سباحة فيهم فيه شاكوزي
سمر: اه عشان كدا مش بتكونوا في النادي كتير؟
سامر: بصي ياسمر، الفهد عامل لكل واحد فينا اشتراك حتى الاطفال ووقت مابنحب نروح بنروح وفي نفس الوقت هو موفر لينا كل الامكانيات دي في البيت عشان لو ملناش مزاج نخرج يبقى كل دا موجود، وفيه اوضة الرياضة تدخليها كأنك في الچيم بالظبط وكل دا هتشوفيه لما تيجي
سمر: ان شاء الله ياحبيبي
سامر: هتعملي ايه انتي بقى
سمر: عاليا هتجيلي ونقعد قاعدة بنات حلوة كدا نشوف هنعمل ايه
سامر: اممم يعني هتنشغلي عني
سمر ضحكت: ما احنا بالليل هنكون سوا
سمر اتفاجأت ان تليفونها بيرن وهي مع سامر في المكالمة وكان جواد
سامر: رحتي فين؟
سمر: لا أبداً دي عاليا بترن عليا
سامر: خلاص ياقلبي روحي كلميها وانا هقوم اشوف هعمل ايه
سامر قفل وهي ردت على جواد بس بدأت تسجل المكالمة
سمر: الو
جواد: ازيك
سمر: الحمدلله، ايه سر المكالمة؟
جواد: أبداً حبيت اباركلك
سمر: الله يبارك فيك، فيه حاجة تانية؟
جواد: ايه مش حابة تتكلمي؟
سمر: وانا من امتى ياجواد بحب نتكلم، انت في ايه ؟ انت خلاص قفلت الموضوع وقولتلي اختاري وانا اختارت سامر والنهاردة هو جاي يتقدملي عاوز ايه بقى ماخلاص
جواد: بحاول استوعب اللي انا وصلتله
سمر بغضب: مش مشكلتي انت كدا هتعملي مشاكل وفعلا سامر كان عنده حق ان لازم اغير رقمي سلام
سمر قفلت المكالمة وعملت بلوك وحفظت التسجيل
سامر دخل اوضة الرياضة يتمرن شوية وتليفونه رن وكان جواد ورد عليه
سامر: الو
جواد: اخبارك ياعريس
سامر ضحك: االحمدلله عقبالك
جواد: ان شاء الله، انا كنت لسة ببارك لسمر قولت اباركلك انت كمان
سامر رد عليه بهدوء: كنت بتباركلها؟
جواد: اه دا انا لسة حتى قافل معاها دلوقتي
سامر اضايق ان سمر كدبت لما قالت ان عاليا اللي كانت بترن: تمام ياجواد الله يبارك فيك عقبالك، انا هرجع اكلمك تاني
سامر اضايق اوي انها كدبت وقبل ما يعمل ردة فعل سريعة وصلتله رسالة من سمر فيها تسجيل مكالمتها مع جواد وهو سمعها وسمع كل كلمة سمر قالتها وبعد التسجيل دا وصلتله رسالة صوتية من سمر تانية: انا اسفه ان قولتلك ان عاليا هي اللي رنت هو كان جواد بس محبتش اضايقك واقولك انه رن عليا انا خلاص هسمع كلامك وهغير الرقم ونعيش في سلام بعيد عنه
سامر فرح جداً وحمد ربنا انه ما اخدش اي قرار متسرع وهي اتصرفت صح ورد عليها بكل سعادة: ماشي ياحبيبتي سيبك منه وانا اللي هتصرف معاه
بنات القصر قاعدين بيرتبوا هيلبسوا ايه وهما راحين
چويرية: بنات مش عاوزين لبس أوڤر
هدى ضحكت: يعني احنا بنلبس لبس أوڤر ياچوري؟
شهد ضحكت وقالت: هي مش قصدها بأوڤر انه وحش لا هي تقصد اننا نلبس حاجات بسيطة مش اننا ندور على اشيك واغلى وافخم لبس واكسسوار ونروح بيهم
حور: صح كدا، احنا هنلبس دريسات شيك بس بسيطة وكل واحدة فينا تلبس دهب الشبكة وبس مش تروح تطلع المجوهرات كلها
رنا: طب ليه مفكرتوش اننا لو مثلا لو لبسنا حاجتنا كلها او اختارنا منها الاغلى ساعتها هنحسس اهل سمر انها هتكون ذينا
سلمى: يمكن يكون رأيك صح يارنا بس ليه ماتفكريش انهم يفهموها من وجهة نظر تانية اننا مثلا بنحب نتكبر باللي احنا لابسينه
أسيل: يبقى الأحسن اننا نلبس بالمعقول وبس والولاد الصغيرين يلبسوا لبسهم الشيك ومش بدل لانها مش حفلة
روان: صح كدا يابنات
سامر فضل طول اليوم في القصر ووقت الغدا اتجمعوا كلهم على السفرة
جاسر: ناويين نمشي امتى؟
الفهد: بعد المغرب ان شاء الله
سامر بص لعمر: يلا قوم معايا
الادهم: راحين فين؟
سامر: هنجهز للخطوبة
الاكمل ضحك: يا ابن اعقل دي قراية فاتحة مش فرح
سامر: سبوني اخد فرصتي بقى
مي: سيبوا سامر حبيبي براحته
ناجي ضحك: ننوس عين مامته
سارة: الحيلة بسلامته
سامر بصلهم بغيظ: اقعدوا انتو كدا اتريقوا يلا يا ابني قوم
عمر قام مع سامر وخرجوا الجنينة
عمر: ها ناوي تعمل ايه؟
فهد الصغير خرج وراهم: خدوني معاكم
سامر: ليه؟
فهد: كدا عاوز اخرج معاكم
سامر: تعالى ياعم واهو بالمرة ناخد رأيك
عمر ضحك: تاخد رأيه في ايه
سامر: اسكت والنبي اللي ادامك دا الفهد بنفسه
عمر ضحك اوي: والله عندك حق يلا بينا نمشي
النهار بيخلص وهما لسة مارجعوش البيت
ليث بغضب: نفسي افهم راحوا يعملوا ايه واخدوا ابني معاهم ليه
چويرية: فيها ايه ياليث ماتسيبهم يعملوا اللي هما عاوزينه وبعدين فهد مش مع حد غريب دا مع اعمامه يعني
أيهم ضحك: تقريباً اللي مخوف ليث ان فهد خارج مع عمر وسامر
اكمل: بلاش تكبر الموضوع بقى ياليث هما شوية وهيظهروا
باسم وصله رسالة من عمر بيقوله فيها: احنا جاهزين ومستنينكم قريب من بيت سمر يلا تعالو
باسم بص للي قاعدين: يلا نتحرك عشان هما مستنيين عند البيت هناك
سامر خرج عشان يعمل مفاجأة لسمر تحت البيت، اخد العربية المفتوحة واشترى بوكيه ورد جميل باللون الأحمر والغلاف بتاعه باللون الاسود وحوالين الورد فيه دولارات
فهد(الصغير): ها هتعمل ايه بقى؟
سامر مسك تليفونه ورن على سمر اللي ردت بسرعة: الو
سامر: اخرجي في البلكونة كدا
سمر خرجت البلكونة وهي لابسة دريس باللون الأبيض وحجاب بنفس اللون والحجاب داخل جوا الفستان وواقفة ذي القمر بالميك اب والروچ الاحمر واتفاجأت باللي عامله سامر تحت
عمر ماسك الكمانجا وقاعد بيعزف لحن رومانسي
سامر: انا النهارده اسعد انسان في الدنيا بجد
سمر بدموع فرحة: بحبك اوي
سامر: انا اللي بحبك اوي وكنت فعلاً هكون ندمان جدا لو ماكنتيش معايا دلوقتي
سمر: ربنا يخليك ليا ياحبيبي
سامر: ويخليكي ليا ياروحي
في اللحظة دي واحد من الجيران بيصور المشهد وهو مبسوط باللي بيحصل دا وان دا نادر لما بيحصل بين اي اتنين بيحبوا بعض
وبعد دقايق وصلت العربيات والعيلة كلها اتجمعت وشافوا سامر واقف فوق العربية وهو لابس قميص ابيض ببنطلون أسود وحزام اسود وجزمة سودا
الفهد: مش يلا ولا ناوي تقضي الخطوبة في الشارع؟
سامر نزل وبصله وضحك: كدا بوظت اللحظة
الادهم: يلا عشان شوية والفهد هيرجع في كلامه
سامر بسرعة نزل وسبقهم على فوق وكلهم طلعوا وراه وسامي فتح الباب ليهم ورحب بيهم جداً وكلهم اتجمعوا والبيت كان مليان فعلاً
كلهم فضلوا ساكتين حوالي دقيقتين
سامر بصلهم: لا بقولكم ايه احنا مش جايين نقعد ساكتين انجزوا
فهد الصغير اتكلم وبص لسامي: احنا جايين عشان نطلب ايدين طنط سمر لعمو سامر
الفهد بصله برفع حاجب: انت بتاخد دوري ولا ايه
فهد الصغير: لا احنا واحد ياجدو
سامي ضحك: هو في ايه
الادهم ضحك: لا انت هتشوف من دا كتير ماتقلقش
ليل: امال فين عروستنا الحلوة
سهى: ثواني وجايا
سهى دخلت تجيبها، وخرجت سمر وهي شايلة صينية الشربات ولسة بتقرب عليهم النور قطع
عمر ضحك: ياليلة فل
سامي: دي اول مرة تحصل
سامر: قصدك اني نحس
هدى ضحكت: لا طبعاً مايقصدش ياسامر
النور خلاص رجع وسمر لسة واقفة مكانها وقدمت لكل واحد الشربات وجات عند سامر باردوا النور فطع
سامر: لا بقى هو في ايه
كلهم ضحكوا…..ناجي: تقريباً كدا الكهربا حالفة انها ترخم عليك
النور رجع وسامر وقف اخد الصينية من ايديها: الله يسترك انا مش عاوز اشرب اي حاجة كدا كفاية اوي يلا نقرأ الفاتحة قبل مايقوم زلزال
الفهد غصب عنه ضحك: ياعيني عليك
مي: يلا قبل مايحصل اي حاجة تانية
سامي بص لسامر: مش لما نتفق الاول
سامر: انا موافق على كل اللي انت عاوزه بس يلا ننجز عشان انا بدأت اخاف
سامي ضحك: طب يلا ياجماعة نقرأ الفاتحة
كلهم بدأوا يقرأوا الفاتحة وسامر قدم البوكيه لسمر وقدملها كمان خاتم الماظ
سمر بصتله: بس كدا كتير اوي
سامر: مافيش حاجة كتيرة عليكي
الحمدلله الليلة عدت من غير اي كوارث😂 وسامر استأذن سامي واخد سمر وخرجوا يتعشوا رغم ان اهل سمر عاملين عشا كبير بس هما الاتنين خرجوا والباقيين فضلوا قاعدين يتعشوا مع اهل سمر
سامر كان حاجز كافيه على النيل والارضية كلها ورد احمر وشموع وسمر كانت فرحانة اوي باللي هي شايفاه وحساه والسعادة اللي عايشاها
سمر: كل دا عشاني انا
سامر بحب: واكتر كمان انتي تستاهلي كل حاجة حلوة في الدنيا مش بس كدا انتي تستاهلي الدنيا كلها تكون تحت رجلك
سمر دموعها نزلت من الفرحة وبصتله: لو كان حد قالي ان هعيش كل اللحظات دي معاك ماكنتش هصدقه
سامر مسحلها دموعها: ربنا يقدرني دايما على سعادتك
سامر مسك ايديها وقعدوا على ترابيزة وعليها بوكس هدية
سمر بصتله: ايه الهدية دي؟
سامر: افتحيها
سمر فتحت البوكس وكان فيه أيفون 15 وخط جديد…..سمر بصتله بزهول: كدا كتير اوي
سامر ابتسم: عاوزك دايما تتأكدي انك غالية اوي وعاليا وتستاهلي يجيلك من السما نجمة
سمر: انا بحبك اوي ياسامر ويارب نفضل سوا في سعادة وفرح كدا
سامر: يارب ياحبيبتي، يلا افتحي علبة التليفون ونحط الخط الجديد عشان مافيش اي حد رخم يرن
سمر ضحكت: حاضر
عدت ايام على اليوم الجميل دا وكل يوم سامر بيجهز في اوضته اللي هيقعد فيها هو وسمر في الڤيلا وبيعد أيام حمل البنات اكتر من اجوازاتهم😂
ليث بصله وضحك: ايه يا ابني دا عمر وسيد مش بيعدوا الايام ذيك كدا
سامر: عاوز اتجوز ياناس انجزوا بقى
روان ضحكت: حاضر هنخبطلهم ونقولهم ممكن تنزلوا يلا
سلمى ضحكت اوي: الصبر حلو
سامر بصلهم بغضب: ربنا يصبرني
سمر وعاليا كل يوم بينزلوا يشتروا هدوم لسمر عشان الفرح
عاليا: لسة كدا فاضل الهدوم البيتي
سمر: بالظبط بس مش عاوزاها كلها تكون بنص كم او شفافة
عاليا: ليه؟
سمر: عشان ماتنسيش اننا مش لوحدنا في الڤيلا
عاليا: ايوا فاهمة، بس انتي ليه تختاري لبسك اللي هيكون خاص بيكي في اوضتك على حسب البيت بصي انتي طبعاً هتشتري عبايات بيتي فتقدري تشتريهم كويسين عشان الشباب اللي موجودين وياستي لو حبيتي تجيبي بيچامات بكم مش مشكلة المهم مش كله محترم
سمر ضحكت: انتي بقيتي قليلة الادب
عاليا غمزتلها: ايه ياسمورة دا انتي عروسة ولازم اللبس يكون مفهوش غلطة
سمر: ماشي ياختي يلا نكمل
بعد اليوم دا بيومين الفهد رن على سامي
سامي: وانا اقول التليفون نور كدا ليه
الفهد ضحك: عامل ايه
سامي: الحمدلله حضرتك عامل ايه والباقيين
الفهد: كلهم كويسين والله، بقولك انا بكلمك عشان اعزمكم بكرة عالغدا عندنا
سامي: مالوش لزوم والله
الفهد: لا ازاي احنا بقينا عيلة
سامي: أكيد طبعاً
الفهد: خلاص هنستناكم بكرة عالغدا
سامي: ان شاء الله حاضر
سامر قاعد في اوضته بيكلم سمر
سامر: مشغولة عني انتي النهاردة
سمر: مقدرش طبعاً انت عارف بقى ان بنزل اشتري الحاجات اللي محتجاها
سامر: ربنا يهون الفترة دي والبطيخ اللي عندنا دول يولدوا بقى
سمر ضحكت: يعني هتولدهم غصب عنهم الصبر حلو ياحبيبي
سامر: محدش يقولي الصبر حلو دا عشان كدا كتير اوي
سمر: آخرة الصبر فرح وسعادة
سامر: ماهو دا اللي مصبرني
سمر: هو انت كدا صابر؟
سامر ضحك: اه والله ياختي صابر
سمر ضحكت اوي وعمر خبط على باب اوضة سامر ودخل…..عمر: صاحي؟
سامر: اه تعالى
سامر: هكلمك بعد شوية ياحبيبتي
سمر: ماشي ياحبيبي
سامر قفل معاها وقعد مع عمر
سامر: في ايه مالك؟
عمر: مش عارف مش جايلي نوم وحاسس اني مخنوق
سامر: في حاجة حصلت ولا ايه؟
عمر: لا أبداً والله، انا مش عارف مالي حتى محبتش اقلق روان وسبتها نايمة وقولت اجيلك
سامر: طب تعالى ننزل نقعد في الجنينة
عمر: ماشي، انت عرفت ان الفهد عزم اهل سمر بكرة على الغدا؟
سامر: اه كلمني وقالي وقت ماكلم سامي
عمر: هتروح الشركة بكرة؟
سامر: اه هروح عشان الفهد ما يتخانقش معايا
عمر: مشي امورك عشان يمشيلك الدنيا ايام الفرح
سامر ضحك: ربنا يستر عليا والله
اليوم عدا جميل والعيلتين فرحانين، في القصر الكبار صحيوا وجاهزين للشغل عشان يرجعوا على الغدا ولازم على الاقل يكونوا في استقبال عيلة سمر
الادهم بص لسامر: اقعد انت النهاردة
سامر بصله باستغراب: حضرتك بتتكلم بجد؟!
الادهم: اه عشان لو حصل تأخير تكون انت موجود
الفهد بهدوء: انا بقول خليكم كلكم هنا النهاردة واحنا هنروح نخلص الشغل ونرجع ومش عايز اي غلطات
ليث: حاضر يابابا ماتقلقش هنشرفكم
جاسر ضحك: احنا والله مابنقلقش غير من هنشرفكم دي
اكمل(الصغير) ضحك: ليه بس ياعمو دا احنا غلابة
الاكمل: غلابة اوي
الفهد قام: يلا على الشركة
ناجي بصله: بالنسبالي عادي ممكن اخد اجازة من شركتي النهاردة
الادهم: حلو اوي عشان انا مش ضامن العيال دول
أيهم ضحك: والله دايما ظالمنا كدا
سيد: سيبهم يا أيهم مش عارفين قيمتنا
اسلام: انا بقول نمشي عشان لو قعدنا شوية كمان هنعمل جنايا
آسر: انا بقول كدا باردوا
كلهم خرجوا للشركة والباقيين في البيت، ليل مع البنات والباقيين في المطبخ
سامر دخلهم: محتاجين مساعدة؟
مي ضحكت: يلا ياحبيبي جمب اخواتك
سامر ضحك اوي: انا بجد مش عارف ايه لازمتها البهدلة دي ماكنتوا طلبتوا اكل جاهز
نور: عشان احنا اتعودنا على كدا وبنكون مبسوطين واحنا بنعمل الاكل بنفسنا
سامر: طب بجد لو في اي حاجة اساعدكم فيها قولولي
شهد: بص عليك انت والشباب شوي اللحمة
سامر بحماس: موافق جداً، بس على شرط تعرفوهم ان انا اللي هعملها
مريم ضحكت: ماشي ياعريس يلا
سامر خرج للشباب اللي قاعدين مع الولاد فيهم اللي بيلعب وفيهم اللي نزلوا حمام السباحة
سامر واقف وحاطت ايده في وسطه: الله الله امال مين اللي هيجي يشوي اللحمة معايا
ليث: مع نفسك ياعريس
سامر بص لعمر: عمور حبيبي
عمر ضحك: ماهو انا للأسف هضطر اساعدك عشان كل واحد فيهم قاعد بيلعب مع ولاده
سامر: ايوا الله يسترك يلا عشان ننجز الوقت
سامر وعمر راحوا يخلصوا شوي اللحمة والباقيين قاعدين
سمر في بيتها قاعدة محتارة تلبس ايه وتقريبا كدا طلعت كل الهدوم من الدولاب وفرشتها عليكم السرير
سهى دخلتلها وضحكت على منظر السرير: ايه يابنتي اللي عملاه دا
سمر: محتارة البس ايه، حاسة ان كل الهدوم مش عجباني
سهى: ياحبيبتي بلاش توتري نفسك، اي لبس عليكي جميل
سمر ضحكت: خلاص اقنعتيني
سهى مسكت دريس باللون الأصفر الكناري وعليه ورد باللون الأبيض وبصت لسمر: هيكون تحفة عليكي
سمر: ماشي خلاص هلبسه
سهى خرجت تشوف ابنها وسمر بدأت تجهز لبسها عشان كل حاجة تكون جاهزة وقت اللبس، اختارت حجاب باللون الاصفر الكناري وكوتشي أبيض وشنطة بيضا واختارت الاكسسوار اللي هتلبسه وطبعا لابسة الخاتم اللي جابوا سامر
في الشركة، جاسر قاعد في مكتبه وأكمل دخله
اكمل: بقولك ايه انا عاوز اروح
جاسر: خلصت شغلك؟
اكمل: لسة بس انا زهقت هاخد الورق اعمله في القصر
جاسر ضحك: الفهد هينفخك
اكمل: ياعم الشغل هسلمه بكرة
جاسر: خلاص قوله ان قالك روح خدني معاك
اكمل ضحك: لا مع نفسك
جاسر: وربنا ماهيحصل رجلي على رجلك
الاتنين قاموا خرجوا راحوا مكتب الفهد وكان مشغول اوي في الورق اللي ادامه وعاوز هو كمان يروح ويخلصه في البيت😂
جاسر: بنقولك ايه يافهد
الفهد بصله: خير؟
جاسر: احنا كنا عايزين نمشي وناخد الورق نخلصه في القصر
الفهد بصلهم وضحك: انا بقول كدا باردوا عشان انا زهقان
اكمل ضحك اوي: الله عليك يلا ونشوف الادهم كمان
الفهد بصله بخبث: لا سيبه واحنا هنمشي
جاسر واكمل قعدوا يضحكوا وكل واحد فيهم اخد الورق اللي هيكملوه في البيت ومشيوا هما التلاتة
نيجي لوقت الغدا الكل في القصر والادهم كان لسة في الشركة وبعد دقايق وصل القصر وواقف متعصب: بقى انتوا تمشوا وتسيبوني لوحدي اعمل كل دا
الفهد بيحاول مايضحكش: احنا قولنا نخلص شغلنا هنا
الادهم بغضب: وانا اللي قولت عليك عاقل ومش هتحب يكون في اهمال
الفهد ضحك: ياعم ماتكبرش الموضوع بقى
الاكمل: والله يا ادهم احنا قولناله نقولك قال لا سيبوه
الفهد بصله بغضب: يخربيتك
الادهم بص للفهد: انا بقول لينا حساب تاني مع بعض في اوضة البوكس بعد الغدا
الفهد لسة هيرد بس وصل سامي وعيلته، سمر كانت جميلة اوي في الدريس دا وسامر قلبه بيتخطف في كل مرة بيشوفها ودخلوا قعدوا وكلهم رحبوا بيهم اوي، وكان معاهم هدايا والبنات اخدوها دخلوها
الفهد: نورتونا والله
سامي: دا نوركم
فاروق بيلعب مع الولاد وفرحان بيهم وسهى وسمر قاعدين مع البنات
سامر بص لسامي: بعد اذن حضرتك بقى، اخد سمر بعد الغدا وننزل نشتري الشبكة
سامي: طب انت ليه ماتخليش الشبكة وقت كتب الكتاب والفرح وخلاص؟
سامر: لا بصوا انا وافقت ان انا هصبر الكام شهر دول عشان البطيخ يولد لكن غير كدا لا، فأنا بقى عاوز نشتري الشبكة ونلبس الدبل عشان الكل يعرف انها خطيبتي وبعد كدا بقى نبقى نشوف يوم كتب الكتاب والفرح
سامي ضحك: ماشي ياسامر موافق
ليل خرجتلهم: يلا ياجماعة الغدا جاهز
كلهم اتجمعوا على السفرة وكان في مكان للأطفال عشان يعرفوا ياكلوا بعيد عن الكبار، السفرة كان شكلها جميل بالتجمع دا والفهد قاعد يبصلهم بحب وسعادة
سيد بصله: طبعاً حضرتك فرحان باللمة دي
الفهد ابتسم: جدااا انا بجد بحب اللمة
الادهم: يارب دايما على طول متجمعين
سمر قاعدة جمب سامر وهو قاعد يعاكس فيها
سامر: ايه ياكناري انت
سمر: بس بقى
سامر ضحك: يعني اشوف الحلاوة دي واقعد ساكت طب ازاي
سمر ضحكت بخجل واكلت وسامر خلص اكل واخدها وخرجوا يشتروا الشبكة والباقيين قاعدين في القصر
الادهم بص لسامي: تعالوا بقى ندخل اوضة البوكس
سامي باستغراب: بوكس ايه؟
الادهم بص للفهد واتكلم بتوعد: اصل بيني وبين الفهد طار ولازم اخلصه النهاردة
سامي ضحك: انتو ناويين على ايه
جاسر بيضحك بصوت: هتشوف بنفسك دلوقتي
وفعلا قاموا دخلوا اوضة البوكس والفهد بدأ يقلق من نظرات الادهم عشان ناوي يعلم عليه بجد
الفهد: بلاش غباء يا ادهم
الادهم: هو انت لسة شفت غباء صبرك بس
ليث ضحك: انا بقول يابابا تنسحب بهدوء عشان لو خسرت ساعتها شكلك هيكون وحش اوي
الأكمل: انا بقول نعقل بقى عشان احفادنا هيجوا يتفرجوا علينا ويقولوا علينا ايه
سامي بيحاول يهديهم: استاذ اكمل عنده حق اهدوا بس كدا وصلوا على النبي
الادهم: عليه الصلاة والسلام، ماهو انت ماتعرفش الاستاذ دا عمل ايه
سامي: ايه اللي عمله؟
الفهد رد عليه ببرائة: والله كل اللي عملته اني مشيت من الشركة وسبته
الادهم رد عليه بغضب: قصدك خلعت
سامي بيبصلهم باستغراب وفي نفس الوقت شايف الموضوع تافه وبص للشباب: انا بقول نطلع نقعد في الجنينة احسن عشان انا شوية ومرارتي هتتفقع
أيهم ضحك: شفتوا من اول قاعدة عملتوا فيه ايه
سمر وسامر اشتروا الشبكة وهما الاتنين اختاروها سوا وهما دلوقتي في العربية
سمر: الشبكة دي كتير اوي ياسامر
سامر بصلها بحب: مافيش حاجة كتيرة عليكي
(الشبكة كانت عبارة عن طقمين طقم اسويرة معاها خاتم وكمان سلسلة بنفس الشكل، والطقم التاني الدبلة ومعاها التونز وانسيال وخاتم وكمان جاب ليها غوشتين)
سمر: لا بجد ياسامر انت لحد دلوقتي جايب ليا حاجات كتير وغالية
سامر بصلها ومسك ايديها وباسها من كف ايديها من جوا: بصي ياسمر انا عمري ماهلاقي ذيك لا في حبك ولا في حنيتك ولا طيبتك ولا اي صفة فيكي هلاقيها في حد تاني، انا حبيتك بجد وبحاول على اد ما أقدر اعوضك عن قسوتي ليكي ورفضي لحبك اللي مهما لفيت وشفت مش هلاقي ذيه
سمر دموعها نزلت من فرحتها بكلامه……سامر كمل كلامه: ودا مش كلام وبس بالعكس كل حرف انا قولته طالع من قلبي ليكي وصادق في كل كلمة قولتها انا عمري ماهلاقي ذيك وبدعي كل يوم ان ربنا يتمم فرحتنا ببعض على خير ونفضل دايما مع بعض وعايشين في سعادة ومبسوطين
سمر: انا بحمد ربنا عليك في كل يوم بجد، انا عمري ماشفت غيرك حتى لما كنت رافضني انا فضلت احبك ومقدرتش ادخل حد حياتي او افكر في اي حد غيرك كان دايما عندي يقين انك هتكون معايا وهكون ليك في يوم من الايام، انا حبيتك بعقلي وقلبي
سامر: بحبك اوي
الايام بدأت تعدي وكل واحد مشغول في ترتيبات حياته، سامر مابين الشركة وترتيب اوضة نومهم وسمر مشغولة في تجهيز هدومها وحاجتها عشان كل حاجة تبقى جاهزة واختارت مع سامر الوان اوضتهم اللي هتبقى باللون الابيض وهما اختاروا اللون دا عشان يفضل لون حياتهم وسامر اتفق مع رسام محترف يرسم ليهم صورة على الحيطا، الصورة دي من ضمن صور السيشن اللي اتصوروه سوا عشان صور الفرح، وكانت سمر لابسة دريس باللون الازرق الفاتح لون السما وحجاب بنفس اللون وكوتشي ابيض وسامر كان لابس تي شيرت بنفس لون دريس سمر وشورت چينز ابيض وكوتشي ابيض والصورة دي كانت على البحر والرسام ابدع فيها ورسمها على الحيطا وكانت صورة في غاية الجمال في وسط بياض الاوضة وحقيقي كانت اجمل اختيار ليهم هما الاتنين
عدت الايام وروان وسلمى ولدوا وروان جابت بنت وعمر كان فرحان بيها جداً وسموها مسك وسلمى جابت بنت وسيد طبعاً كان نفسه في بنت عشان ربنا رزقه بولدين في الاول وسماها هبةُ الله، وسامر كان طاير من الفرحة عشان خلاص هيحدد معاد الفرح أخيراً 😂
الفهد قاعد والباقيين قاعدين حواليه
سامر بصله: هاااا هتجوز امتى
الفهد ضحك: الصبر
سامر: لا بقولك ايه انا استنيتهم يولدوا وهدى لسة ادامها شوية وانا خلاص كدا جبت اخري وعاوز اتجوز
الادهم ضحك اوي: خلاص يافهد كفاية كدا سامر خرج عن شعوره
الفهد بص لسامر: بس اللي اتفقنا عليه هيحصل
سامر: ياعم موافق بس ابوس ايدك اخلص
ليل ضحكت اوي: الواد اتجنن
مي: سيبوا حبيبي يفرح بقى
الفهد: خلاص ياسامر هكلم سامي واتفق معاه ان الفرح بعد شهر
سامر بصله بصدمة: نعممممم لا بص اتفق على ان الفرح بعد ١٥ يوم حلو اوي لكن شهر بـ٣٠ يوم لأ
الفهد: افرض رفض؟
سامر: لا مش هيرفض انا عارف انه هيوافق
الفهد: ماش ياسامر هكلمه
وفعلا الفهد كلم سامي والحمدلله وافق😂 لان الفهد قاله انه لو رفض سامر هيموتهم كلهم
واهي الفرحة هتدخل القصر من تاني وكل اللي في القصر مستعديين ليوم سامر أوي ، وعدت الايام وفاضل اسبوع كامل على الفرح والاتفاق حصل ومافيش اي راجل او اي شاب يشوف مراته عشان هما اتفقوا على كدا وبيتكلموا في التليفون بس ورغم ان سامر ندم انه وافق على الاتفاق دا بس اهو مستحمل عشان أيامه تعدي من غير مقالب ولا تحديات
ليث دخل عليه الاوضة وهو بيتكلم مع سمر في التليفون: وحياة امك انت قاعد تحب هنا واحنا قاعدين تحت قوم معايا
سامر ضحك: ياعم يعني لا اعرف اشوفها ولا كمان اكلمها
ليث مسكه من هدومه وأخد التليفون ورد هو: بقولك ايه ياعروسة اقفلي انتي بقى دلوقتي عشان احنا عاوزينه في موضوع مهم وليلته سودا
سمر ضحكت: ربنا معاكم بقى سلام
سمر قفلت وسامر نزل مع ليث قعد معاهم تحت والفهد قاعد مضايق منهم
سامر بصله: ايه ياعمو مالك مضايق ليه
الفهد بصله بغيظ: خليك في حالك عشان هقوم اضربك
سامر ضحك وسكت لان كلهم عارفين ان الفهد مضايق انه بعيد عن ليل وكل واحد فيهم مضايق انه بعيد عن مراته بس هما اتفقوا واتحدوا بعض فلازم يكونوا اد التحدي
الاسبوع عدا وجه اليوم المنتظر وكل واحد فيهم مستني يشوف مراته بعد غياب اسبوع كامل خصوصا ان كلهم فضلوا اد التحدي ومحدش حاول يغش ولا يخدعهم عشان يكونوا فرحانين ببعض بذيادة
سمر هتلبس فستانين وسامر هيلبس بدلتين واحدة بچاكيت ابيض والتاني اسود، سمر اختارت اول فستان منفوش ورغم بساطته وشياكته بس كان جميييييل جداً هي مابتحبش انها تكون مأڤورة في اللبس، اختارت فستان جميييل برقبة مقفولة عشان هي محجبة ودراع الفستان كان عبارة عن طبقتين فوق بعض شفاف من نوع قماش غير باقي الفستان وطبعا هتلبس تحت باضي باللون الابيض والتاج بتاعها كان شبيه بتاج الملوك المرصع بالماس واللولي، الفستان تطريزه رقيق جدا وكان في غاية الجمال والبساطة، اما الفستان التاني كان صك ستان من غير تطريز عليه غير بس من عند الكتف من فوق فيه تطريز رائع وكان باردوا مقفول عشان حجابها، الكوتشي بتاعها كان ارضي ومطرز بالدانتيل المرصع باللولي
نيجي بقى للعريس سامر عريسنا المنتظر، بدلته السودا كانت في غاية الشياكة والرقي بقميصها الابيض بالببيونة السودا وكان على صدره من الشمال عند القلب كدا سلسلة متعلقة في جيب الچاكيت
وفي نهاية السلسلة حرف سمر بالانجليزي (S)
اما البدلة التانية كانت بيضا بقميص أبيض بنفس الاستايل واختيار اللبس كان في غاية الجمال، كل البنات لبسوا نفس لون الفساتين باللون الكاشمير بحجابهم الكاشمير والكوتشيات البيضا، حتى البنات الاطفال نفس الالوان والولاد لابسين بدل بيضا ذي الكبار
الرجالة الكبار لابسين بدل بيضا وكل زوجة ليهم لابسة فستان باللون الفضي الجميل بنفس لون الحجاب والشوزات مختلفة بس بألوان بيضا والفرح كله كان في غاية الرقي والجمال وفعلا فرح يليق بس بعيلة البارون، الفهد فخور بالعيلة واللمة الجميلة اللي دايما بيحافظ عليها وبيحاول على أد مايقدر انه يجمعهم لآخر العمر
العرسان رقصوا على أغنية صاحبة الصون والعفاف وسامر كل شوية يشيل سمر ويلف بيها، وطبعا جواد حضر الفرح ورغم انه لسة بيحب سمر بس فرحان ليها من قلبه وانها تستاهل كل خير، وطبعا تم كتب الكتاب قبل بداية الحفلة وكالعادة تم تصوير العرسان والفرح مش هيكون فرح من غير الصورة العائلية اللي مجمعة العيلة كلها
الفرح انتهى والعرسان في طريقهم لبيت الزوجية وعند وصولهم للڤيلا الشباب قعدوا يضربوا كلاكسات بالعربيات وكأنهم بيعملوا احتفال تاني من اول وجديد وقعدوا يرقصوا مع سامر، ودخلوا للڤيلا والشباب قالوا بلاش يرخموا على سامر لان دا يومه اللي مستنيه من زمان ومن حقه يفرح من غير اي مقالب
سمر وسامر دخلوا اوضتهم وفرحانين ببعض جداً
سامر واقف ادامها وماسك ايديها وبيبص في عنيها: عاوز اتكلم معاكي شوية
سمر: خير ياحبيبي
سامر: تعالي نقعد
قعدوا جمب بعض على السرير وسامر بدأ يتكلم: اوعديني ان ماتناميش ابدا في يوم وانتي زعلانة مني، اوعديني ان لو حصل اي خلاف مابنا نسمع بعض وبلاش ناخد موقف من بعض من قبل مانسمع لبعض، اوعديني ان محدش يدّخل مابنا في اي حاجة غير لو فيه مشكلة كبيرة ودا ان شاء الله اوعدك ان دا مش هيحصل، اوعديني ان عمرك ما تسيبي بيتك ولا تسبيني، اوعديني انك دايما تكوني سندي وواقفة جمبي
سمر بصتله بكل حب: اوعدك ان هكونلك الزوجة والام والاخت والصديقة والصاحب كمان، اوعدك ان هصونك وهحترم غيابك ذي وجودك، اوعدك ان عمري ما احكم على اي حاجة تعملها غير لما اسمعك، اوعدك ان هكون جمبك في اي وقت وفي اي حاجة
سامر باس دماغها: ربنا يباركلي فيكي يلا نبدأ حياتنا بركعتين شكر لربنا
وهنا بدأت حياتهم الجميلة الهادية (او يمكن تكون مش هادية اوي😂)
عدت الايام وهدى ربنا رزقها بولد وسموه أدهم وكأن ربنا بيقولها قبلت دعوتك ورزقتك بالولد، و أيهم كان فرحان بيه اوووووي
بعد حوالي سبع شهور من جواز سامر، سمر كانت حامل وكلهم قاعدين تحت في الڤيلا وسمر بتجري ورا سامر وهي شايلة السكينة
سمر: بقى بتخوني انا لازم اقتلك
سامر بيجري منها: ياستي وربنا مابخونك دي عميلة جديدة في الشركة
ليث بصلهم: احنا مش هنخلص بقى من خناقكم دا
سامر وقف وبص لسمر وبيتكلم بتريقة: اللي يشوفك يوم الفرح وانتي بتوعديني انك تسمعيني قبل اي مشكلة مايشوفكيش ياختي دلوقتي وانتي بتجري ورايا بالسكينة
وهنا بقى نقدر نقول ان الاتنين دول هيكونوا مجانين القصر😂)
اخر مشهد في الرواية نيجي للشركة كان في اجتماع مهم مابين شركة البارون وكذا شركة بس كنت انا ككاتبة لازم يكون ليا مشهد في الرواية دي😂😂
الفهد قاعد على اول ترابيزة الاجتماعات وكان موجود ابطال رواياتنا الحلوين
سليم الشامي (بطل رواية تلاقينا)
فهد المنياوي (بطل رواية مكتوبة ليك)
مهاب (بطل رواية إختارتك إنت)
مهاب العمري (بطل رواية هكذا يكون الحب)
زين صفي الدين (بطل رواية قلوب حطمها العشق)
يوسف (بطل رواية نصيبي وقسمتي)
أسد (بطل رواية سري)
الفهد بص ليهم: ياترى الكاتبة هتجيب مين بطل جديد؟
انا بقى هنا كنت لازم ادخل، وفعلا انا دخلت عليهم اوضة الاجتماعات وقعدت قصادهم وبصيت لكل واحد فيهم: جاي ليكم بطل جديد بشخصية جديدة بحكاية جديدة
سليم الشامي: وياترى يطلع مين دا بقى؟
الكاتبة إيمان جمال: مش انا اللي هرد هو اللي هيقول
وهنا بقى دخل بطل روايتي الجديدة اللي لسة محددتش اسمها بس كتبت افكارها ودخل بكل هيبة ورجولة وبصلهم واتكلم بكل تحدي وثقة: انا صقر الألفي
تمت
لقراءة باقي حلقات الرواية اضغط على : (رواية أحفاد البارون 3)